បុរសវ័យជាង៤០ឆ្នាំ ចុះដាក់ម៉ងយកត្រីចិញ្ចឹមក្រពះ សង្ស័យរអិលជើងធ្លាក់ចូលទឹកទន្លេលង់ស្លាប់

សង្ស័យរអិលជើង កំឡុងពេលដាក់ម៉ងយកត្រី បណ្តាលអោយបុរសម្នាក់ លង់ទឹកស្លាប់ភ្លាមៗ។ ហេតុការណ៍នេះបង្កភ្ញាក់ផ្អើលកាលពីវេលាម៉ោង ១និង៣០នាទីរសៀលថ្ងៃទី២៧ ខែមិថុនាឆ្នាំ២០២៦ ក្រោយវត្តព្រែកលៀប ក្នុងសង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។

តាមប្រភពព័ត៍មានពីប្រជាពលរដ្ឋបានអោយដឹងថា ជនរងគ្រោះតែងតែជិះម៉ូតូមួយគ្រឿង ម៉ាក ស៊ុយសូគី ឡេត ពណ៍ស ពាក់ស្លាកលេខ ភ្នំពេញ 1CW-3948 ខាងលើមករាយម៉ងដាក់យកត្រី នៅក្រោយវត្តព្រែកលាបជាប្រចាំ ខណៈនាវេលាកើតហេតុ សង្ស័យបុរសខាងលើរអិលជើងស្រាប់តែលង់ទឹកលិចបាត់តែម្តង ។ ភ្លាមៗប្រជាពលរដ្ឋនៅក្បែរ នោះបានឃើញហើយនាំគ្នាទៅជួយសង្រ្គោះនិងជួយរាវរកឃើញតែបុរសរូបនោះបានស្លាប់បាត់ទៅហើយ។

បច្ចុប្បន្ន សមត្ថកិច្ចកោសល្យវិច័យ នៃស្នងការដ្ឋាននគរបាលរាជធានីភ្នំពេញ បានត្រួតពិនិត្យសាកសពខាងលើ រួចប្រគល់កំណត់ជូនមន្រ្តីមូលដ្ឋាន និងតម្កល់សពនៅវត្តព្រែកលាប រងចាំសាច់ញ្ញាត្តិយកទៅធ្វើបុណ្យ ៕ អត្ថបទ ៖ រដ្ឋា