ប្រទះឃើញសពមនុស្សប្រុស ០២ នាក់ អណ្តែតទឹកបន្តបន្ទាប់គ្នា ក្បែរស្ពានជ្រោយចង្វារ ចម្ងាយពីគ្នាប្រមាណ ៤០០ ម៉ែត្រ

ប្រជានេសាទ ប្រទះឃើញសពមនុស្សប្រុសចំនួន ០២ នាក់ អណ្តែតទឹកបន្តបន្ទាប់គ្នា ក្បែរស្ពានជ្រោយចង្វារ ដែលមានចម្ងាយពីគ្នាប្រមាណ ៤០០ ម៉ែត្រ។

ហេតុការណ៍នេះបង្កការភ្ញាក់ផ្អើលកាលពីវេលាម៉ោង ១២ ថ្ងៃត្រង់ ថ្ងៃទី ០៣ ខែកក្កដា ឆ្នាំ ២០២៦ ស្ថិតនៅចំណុចផ្លូវទន្លេសាប សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។

តាមការបញ្ជាក់ពីប្រជាពលរដ្ឋជាអ្នកនេសាទ បានឲ្យដឹងថា មុនមានការផ្អើលឆោឡោថាមានសពអណ្តែតនៅកណ្តាលទន្លេ ក្បែរស្ពាន ក្នុងមូលដ្ឋានសង្កាត់ជ្រោយចង្វារ ភ្លាមៗ គាត់បានរាយការណ៍ជូនសមត្ថកិច្ច ដើម្បីអូសសពយកមកច្រាំងទន្លេ។ ខណៈពេលកំពុងអូសសពបានបន្តិច ក៏មានគេឃើញសាកសពម្នាក់ទៀត អណ្តែតក្បែរច្រាំងទន្លេ ជិតអូតែលសុខា ដែលមានចម្ងាយពីគ្នា ប្រមាណជា ៤០០ ម៉ែត្រ។ ស្របពេលនោះ ប្រជានេសាទ ក៏បានអូសសពយកឡើងមកលើគោកទាំង ០២ តែម្តង។

បច្ចុប្បន្ន សមត្ថកិច្ចជំនាញកោសល្យវិច័យ នៃស្នងការដ្ឋាននគរបាលរាជធានីភ្នំពេញ និង មន្រ្តីមូលដ្ឋាន ចុះមកត្រួតពិនិត្យសពទាំង ០២ នាក់ ខាងលើ រួចធ្វើកំណត់ហេតុ ដើម្បីយកទៅតម្កល់នៅវត្ត រង់ចាំសាច់ញាតិមកទទួលទៅធ្វើបុណ្យតាមប្រពៃណី៕
អត្ថបទ ៖ រដ្ឋា