ការបញ្ជាក់នេះ ធ្វើឡើងបន្ទាប់ពីមានការផ្សព្វផ្សាយរូបភាព និងព័ត៌មានពីសំណាក់អង្គភាពសារព័ត៌មានមួយចំនួន ដែលបានលើកឡើងថា ផ្លូវបេតុងថ្មីទើបសាងសង់រួច ត្រូវបានកាត់បំបែកឡើងវិញដើម្បីដាក់លូ បង្កឱ្យមានការចាប់អារម្មណ៍ និងការងឿងឆ្ងល់ពីសំណាក់ប្រជាពលរដ្ឋ។

តាមការបញ្ជាក់របស់រដ្ឋបាលខណ្ឌឫស្សីកែវ បញ្ហាជំនន់ទឹកភ្លៀងគឺជាបញ្ហាប្រឈមដែលបានកើតមានជាយូរមកហើយនៅក្នុងមូលដ្ឋានសង្កាត់ទួលសង្កែទី១ និងសង្កាត់ឫស្សីកែវ។ នៅរៀងរាល់រដូវវស្សា តំបន់មួយចំនួនក្នុងសង្កាត់ទួលសង្កែទី១ រួមមានកំណាត់ផ្លូវលេខ៩៣ ស្ថិតក្នុងក្រុមទី២ ក្រុមទី៣ ភូមិផ្សារតូច និងក្រុមទី១៥ ភូមិចុងខ្សាច់ ជាប់ព្រំប្រទល់ភូមិសាមគ្គី សង្កាត់ឫស្សីកែវ តែងតែរងការជន់លិចដោយសារទឹកភ្លៀង។ ជាមួយគ្នានេះ តំបន់មួយចំនួនក្នុងសង្កាត់ឫស្សីកែវ ដូចជាភូមិឃ្លាំងសាំង និងភូមិសាមគ្គី ជាពិសេសតំបន់ជុំវិញផ្សារសាមគ្គី ក៏ទទួលរងការលិចលង់ជាញឹកញាប់ផងដែរ។

ប្រភពដដែលបានឱ្យដឹងថា មូលហេតុចម្បងនៃបញ្ហានេះ គឺដោយសារប្រព័ន្ធលូចាស់ដែលឆ្លងកាត់ក្រោមផ្លូវបេតុងថ្មីអតីតផ្លូវរថភ្លើង មានទំហំតូច មិនអាចទទួល និងរំដោះបរិមាណទឹកភ្លៀងដ៏ច្រើនដែលហូរចេញពីតំបន់ទាំងពីរបានទាន់ពេលវេលា។ កត្តានេះបណ្តាលឱ្យទឹកហូរយឺត និងបន្តជន់លិចលំនៅឋានប្រជាពលរដ្ឋក្នុងរយៈពេលយូរ ដែលធ្វើឱ្យប៉ះពាល់ដល់ជីវភាពរស់នៅ និងសកម្មភាពប្រចាំថ្ងៃរបស់ប្រជាពលរដ្ឋ។

ដើម្បីដោះស្រាយបញ្ហានេះឱ្យបានមានប្រសិទ្ធភាព អាជ្ញាធរបានសម្រេចអនុវត្តគម្រោងស្ថាបនាប្រព័ន្ធលូរំដោះទឹកជំនន់ទឹកភ្លៀងថ្មីមួយខ្សែបន្ថែម ដោយតភ្ជាប់ប្រព័ន្ធរំដោះទឹកពីតំបន់ព្រំប្រទល់រវាងសង្កាត់ឫស្សីកែវ និងសង្កាត់ទួលសង្កែទី១ ឱ្យហូរកាត់ក្រោមផ្លូវបេតុងថ្មី បន្តចូលទៅក្នុងប្រព័ន្ធលូមេតាមបណ្តោយផ្លូវលេខ៩៩ មុននឹងហូរចូលព្រែកអូវែង និងបន្តទៅទន្លេសាប តាមរយៈស្ថានីយបូមទឹកគីឡូម៉ែត្រលេខ៩ ស្ថិតនៅក្នុងសង្កាត់ស្វាយប៉ាក។

ក្នុងអំឡុងពេលអនុវត្តការងារ ការដ្ឋានបានបង្កឱ្យមានការកកស្ទះចរាចរណ៍ជាបណ្តោះអាសន្ននៅតំបន់មួយចំនួន ដោយសារត្រូវកាត់ផ្ទៃបេតុង និងដាក់ប្រព័ន្ធលូថ្មី។ ទោះជាយ៉ាងណា អាជ្ញាធរបានអំពាវនាវឱ្យប្រជាពលរដ្ឋមានការយោគយល់ និងអធ្យាស្រ័យ ដោយសារគម្រោងនេះមានគោលបំណងសំខាន់ក្នុងការកែលម្អហេដ្ឋារចនាសម្ព័ន្ធរំដោះទឹក និងកាត់បន្ថយការលិចលង់នៅក្នុងមូលដ្ឋាន។

រដ្ឋបាលខណ្ឌឫស្សីកែវក៏បានបញ្ជាក់ផងដែរថា គម្រោងសាងសង់ប្រព័ន្ធលូថ្មីនេះ គ្រោងនឹងបញ្ចប់នៅក្នុងអំឡុងខែកក្កដា ឆ្នាំ២០២៦ ខាងមុខ។ បន្ទាប់ពីការងារដាក់លូរួចរាល់ ផ្ទៃបេតុងដែលត្រូវបានកាត់សម្រាប់ការដ្ឋាន នឹងត្រូវចាក់បំពេញ និងស្តារឡើងវិញឱ្យមានសភាពដូចដើម ដើម្បីធានាការប្រើប្រាស់ផ្លូវ និងសុវត្ថិភាពចរាចរណ៍របស់ប្រជាពលរដ្ឋ៕

អត្ថបទ៖ សំណាង

The post រដ្ឋបាលខណ្ឌឬស្សីកែវ បញ្ជាក់មូលហេតុនៃការកាត់ផ្លូវបេតុងថ្មី ក្រោយមានមតិរិះគន់លើបណ្ដាញសង្គម appeared first on Kampuchea Thmey Daily.

ជាក់ស្តែងកាលពីព្រឹកថ្ងៃទី១៩  ខែកុម្ភៈ ឆ្នាំ២០២៦នេះ រដ្ឋបាលខណ្ឌឬស្សីកែវ បានចុះរៀបចំសណ្តាប់ ធ្វើអនាម័យ បរិស្ថាន បាញ់ទឹកលាងសម្អាត ទីតាំងបញ្ចេញសម្រាមមួយកន្លែង ស្ថិតក្នុងភូមិក សង្កាត់ច្រាំងចំរេះទី២ ខណ្ឌឬស្សីកែវ រាជធានីភ្នំពេញ  ។

លោក ជិន ប៊ុនធឿន អភិបាលខណ្ឌឫស្សីកែវ បានឱ្យដឹងថា លោកបានចុះដឹកនាំកម្លាំងរដ្ឋបាលខណ្ឌឬស្សីកែវដោយផ្ទាល់គោលបំណងលើការត្រួតពិនិត្យចំណុចទីតាំងបញ្ចេញសំរាម ក្នុងសង្កាត់ចំរេះទី២ ដើម្បីលាងសម្អាតកំចាត់ក្លិនមិនល្អចេញ ដែលហូរចេញពីកាកសំណល់ប្រើប្រាស់ជាប្រចាំថ្ងៃ របស់បងប្អូនប្រជាពលរដ្ឋ ។ 

លោកអភិបាលបន្តថា សម្រាប់កាកសំណល់ បានមកពីការធ្វើម្ហូបអាហារប្រចាំថ្ងៃ ត្រូវតែបែងចែកអោយដាច់ដោយឡែកពីគ្នា ។ហើយកាកសំណល់កែច្នៃបានដាក់ផ្សេង នឹងកាកសំណល់កែច្នៃមិនកើតរួមមានក្លិនល្អ ត្រូវតែច្រកថង់ ០២ទៅ០៣ជាន់ ដើម្បីប្រាកដថាគ្មានក្លិនមិនល្អសាយភាយ ដល់អ្នករស់នោះក្បែរនោះ ។ 

នាឱកាសនោះ លោកអភិបាលខណ្ឌ បានស្នើសូមឱ្យប្រជាពលរដ្ឋ ចូលរួមវេចខ្ចប់ទុកដាក់សំរាមនៅតាមផ្ទះរៀងៗខ្លួន បញ្ចេញសម្រាមតាមម៉ោងដែលបានកំណត់ និងបញ្ឈប់ការយកសំរាមមកទុកចោលតាមដងផ្លូវ ដែលនាំឱ្យប៉ះពាល់ បរិស្ថាន សោភ័ណ្ឌភាពនិងសុខភាពប្រជាពលរដ្ឋរស់នៅក្នុងភូមិដ្ឋានផ្សេងៗ ផងដែរ ៕

អត្ថបទ ៖ រដ្ឋា

The post អភិបាលខណ្ឌឬស្សីកែវ ចុះដឹកនាំកម្លាំង បាញ់ទឹកសម្អាតកន្លែងបញ្ចេញសំរាម ដើម្បីលើកសោភ័ណ្ឌភាពដងផ្លូវសាធារណៈ  appeared first on Kampuchea Thmey Daily.

លោក អ៊ុ គឿន អនុប្រធានការិយាល័យសាធារណការ​ខណ្ឌឬស្សីកែវ បានដឹកនាំមន្ត្រីជំនាញ ចូលរួមសហការជាមួយមន្ត្រីមន្ទីរបរិស្ថានរាជធានីភ្នំពេញ ចុះធ្វើការត្រួតពិនិត្យ និងធ្វើកំណត់ហេតុណែនាំដល់ម្ចាស់សិប្បកម្មកែច្នៃត្រីស្រស់មួយកន្លែង ស្ថិតនៅដីឡូតិ៍លេខ ១១៦៨ ផ្លូវបេតុង ភូមិ៤ សង្កាត់ច្រាំងចំរេះទី១ ខណ្ឌប្ញស្សីកែវ រាជធានីភ្នំពេញ។

សិប្បកម្មខាងលើមានម្ចាស់ឈ្មោះ នី វណ្ណារី ដែលត្រូវបានរកឃើញថា បានបង្កផលប៉ះពាល់ដល់បរិស្ថានជុំវិញ ដោយបណ្តាលឱ្យមានក្លិនស្អុយ និងអាចប៉ះពាល់ដល់សុខភាពសាធារណៈរបស់ប្រជាពលរដ្ឋរស់នៅជិតខាង។

បន្ទាប់ពីត្រួតពិនិត្យជាក់ស្តែង ក្រុមការងារបានធ្វើការណែនាំ និងដាក់វិធានការបច្ចេកទេសដល់ម្ចាស់សិប្បកម្ម ដើម្បីឱ្យអនុវត្តកែលម្អបរិស្ថានឱ្យស្របតាមច្បាប់ និងបទដ្ឋានជាធរមាន រួមមាន៖ តម្រូវឱ្យកែប្រែប្រព័ន្ធលូបង្ហូរទឹកសំណល់ឱ្យបានត្រឹមត្រូវតាមលក្ខណៈបច្ចេកទេស ណែនាំឱ្យលាងសម្អាតបរិវេណធ្វើការកែច្នៃត្រីឱ្យបានស្អាត និងជាប់ជាប្រចាំ។ ហាមដាច់ខាត មិនឱ្យយកកាកសំណល់គ្រប់ប្រភេទទុកចោលនៅខាងក្រៅទីតាំងអាជីវកម្ម។

ជាមួយគ្នានេះដែរ ក្រុមការងារបានកំណត់រយៈពេល ១៥ថ្ងៃឱ្យម្ចាស់សិប្បកម្មអនុវត្តការកែប្រែ និងកែលម្អតាមការណែនាំខាងលើ។ បន្ទាប់ពីផុតកំណត់រយៈពេលនេះ ក្រុមការងារនឹងចុះមកធ្វើការផ្ទៀងផ្ទាត់ឡើងវិញ ដើម្បីវាយតម្លៃលទ្ធផលនៃការអនុវត្ត និងចាត់វិធានការបន្ថែមតាមលទ្ធផលជាក់ស្តែង ប្រសិនបើមានការអនុវត្តមិនបានត្រឹមត្រូវ៕

អត្ថបទ៖ សំណាង

The post រដ្ឋបាលខណ្ឌឬស្សីកែវ ចុះណែនាំម្ចាស់សិប្បកម្មកែច្នៃត្រីស្រស់ដែលបង្កផលប៉ះពាល់ដល់សុខភាពសាធារណៈ appeared first on Kampuchea Thmey Daily.

ការប្រមូលទិញផ្លែឈើនេះ គឺធ្វើឡើងនៅពេលលោកអភិបាលខណ្ឌដឹកនាំកម្លាំងចុះត្រួតពិនិត្យ និងរៀបចំសណ្តាប់ធ្នាប់នៅតំបន់ផ្សារច្រាំងចំរេះ និងផ្សារក្រមួនគីឡូម៉ែត្រលេខ៩ កាលពីព្រឹកថ្ងៃអង្គារ៍ ថ្ងៃទី២ ខែធ្នូ ឆ្នាំ២០២៥។

ក្រោយពីប្រមូលទិញផ្លែឈើ អាជ្ញាធរខណ្ឌឬស្សីកែវ ក៏អំពាវនាវឲ្យប្រជាពលរដ្ឋសហការយ៉ាងជិតស្និទ្ធក្នុងការរក្សាសណ្តាប់ធ្នាប់ និងរៀបចំបរិស្ថានឲ្យកាន់តែប្រសើរក្នុងមូលដ្ឋាន។ ការរៀបចំសណ្តាប់ធ្នាប់ និងរបៀបរៀបរយត្រូវបានអនុវត្តគ្រប់សង្កាត់ក្នុងមូលដ្ឋាន ដោយមានគោលដៅបង្កើតបរិស្ថានល្អ សុវត្ថិភាព និងអនាម័យសម្រាប់ប្រជាពលរដ្ឋ៕

អត្ថបទ៖ សំណាង

The post អភិបាលខណ្ឌឬស្សីកែវ ​ប្រមូលទិញផ្លែឈើពីអ្នកលក់រំលោភចំណីផ្លូវនៅតំបន់ផ្សារច្រាំងចំរេះដើម្បីបញ្ឈប់ការលក់ដូរលើផ្លូវសាធារណៈ appeared first on Kampuchea Thmey Daily.

លោក ជិន ប៊ុនធឿន បញ្ជាក់ថា គោលការណ៍ទាំង៤នេះ គឺជាគន្លឹះដ៏សំខាន់ក្នុងការបង្កើតបរិយាកាស បរិស្ថាន រស់នៅដ៏ស្អាតប្រសើរ សម្រាប់ក្រុមគ្រួសារប្រជាពលរដ្ឋទូរទាំងខណ្ឌឬស្សីកែវ។

គោលការណ៍អទិភាពទាំង៤ ចំណុចទាំងនេះរួមមាន ១.ផ្លូវក្នុងមូលដ្ឋានត្រូវស្អាតជានិច្ច។ ២.គ្រប់តាមផ្លូវទាំងអស់ក្នុងមូលដ្ឋានត្រូវមានបង្គោលបំភ្លឺផ្លូវសាធារណៈ ដើម្បីប្រជាពលរដ្ឋងាយស្រួល និងមានភាពកក់ក្តៅ សុវត្ថិភាពក្នុងការធ្វើដំណើរពេលយប់។ ៣.បញ្ឈប់រាល់សកម្មភាពរបស់បុគ្គលដែលរំលោភដីចំណីផ្លូវ និងដីសាធារណៈរបស់រដ្ឋធ្វើជាប្រយោជន៍ផ្ទាល់ខ្លួន។ ៤.ប្រជាពលរដ្ឋត្រូវបញ្ឈប់យកសំរាមបោះចោលពាសវាលពាសកាល ដើម្បីមូលដ្ឋានកាន់តែមានសោភ័ណភាពកាន់តែស្រស់បំព្រង។

ជាមួយគ្នានោះដែរ រដ្ឋបាលខណ្ឌឬស្សីកែវ អំពាវនាវឲ្យប្រជាពលរដ្ឋចូលរួមសហការដោយថែរក្សាបរិស្ថាន បញ្ឈប់សកម្មភាពរំលោភលើដីសាធារណៈ ឬការទុកដាក់សំរាមមិនត្រឹមត្រូវដើម្បីលើកម្ពស់សោភ័ណភាពខណ្ឌប្ញស្សីកែវ៕

អត្ថបទ៖ សំណាង

The post អភិបាលខណ្ឌឬស្សីកែវ ដាក់គោលការណ៍អាទិភាព​ចំនួន៤ ដើម្បីសោភ័ណភាព និងបរិស្ថានល្អស្អាតក្នុងមូលដ្ឋាន appeared first on Kampuchea Thmey Daily.

អនុវត្តតាមបទបញ្ជាផ្ទាល់ពីឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរងនិងជាស្នងការនគរបាលរាជធានីភ្នំពេញ កម្លាំងជំនាញអធិការដ្ឋាននគរបាលខណ្ឌប្ញស្សីកែវ ដឹកនាំដោយលោកវរសេនីយ៍ឯក ហ៊ាង ថារ៉េត  អធិការនគរបាលខណ្ឌប្ញស្សីកែវ សហការជាមួយកម្លាំងការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តសៀមរាប និងកម្លាំងស្នងការដ្ឋាននគរបាលខេត្តកំពង់ធំ បានស្រាវជ្រាវឃាត់ខ្លួនជនសង្ស័យប្រុសស្រីចំនួន០៣នាក់ កាលពីវេលាម៉ោង១៨ និង៣០នាទីថ្ងៃទី២៨ខែវិច្ឆិកាឆ្នាំ២០២៥ បានជាបន្តបន្ទាប់ករណីលួចមានស្ថានទម្ងន់ទោសដោយការកាប់គាស់ទម្លុះទម្លាយនិងសមគំនិតអំពើលួចមានស្ថានទម្ងន់ទោស និងទទួលផលចោរកម្ម  (ឆ្កិះសោបន្ទប់ជួលលួចប្រាក់ចំនួន៣០០០០ដុល្លារ -បីម៉ឺនដុល្លារ អាមេរិច)នៅចំណុចបន្ទប់ជួល ផ្លូវ១០៣ ក្រុម៣ ភូមិបាក់ទូក សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ កាលពីថ្ងៃទី២១ ខែវិច្ឆិកា ឆ្នាំ២០២៥ វេលាម៉ោង៥ និង៣០នាទីទាបភ្លឺ។

ក្នុងប្រតិបត្តិការនេះកម្លាំងសមត្ថកិច្ចឃាត់ខ្លួនបានជនសង្ស័យចំនួន០១នាក់នៅចំណុចផ្លូវK5  ភូមិចុងខ្សាច់ សង្កាត់ទួលសងែ្ក១ ខណ្ឌឬស្សកែវ រាជធានីភ្នំពេញ និងជនសង្ស័យចំនួន០២នាក់ ក្នុងនោះស្រី០១នាក់ ឃាត់ខ្លួននៅចំណុចផ្លូវជាតិលេខ៦ ស្រុកបារាយណ៍ ខេត្តសៀមរាប។ មានឈ្មោះ ឆោម ទិត្យរង្សី ភេទប្រុស អាយុ៣៨ឆ្នាំ មុខរបរមិនពិតប្រាកដ(មានសារធាតុញៀន) ,២.យឹម ស្រីប៉ុច ភេទស្រី អាយុ៣៣ឆ្នាំ ជនជាតិ ខ្មែរ មុខរបរមិនពិតប្រាកដ (មានសារធាតុញៀន) ធ្លាប់ជាប់ពន្ធនាគារ ០១ លើក។៣,អាន វិនា ភេទប្រុស អាយុ២៥ឆ្នាំ ជនជាតិ ខ្មែរ មុខរបរជាងដែក ធ្លាប់ជាប់ពន្ធនាគារ ០១ លើក។

ចំពោះវត្ថុតាងសមត្ថកិច្ចរកឃើញដកហូតបានរួមមាន៖ ម៉ូតូចំនួន០១គ្រឿងម៉ាក ADV ពណ៌ស ពាក់ស្លាកលេខភ្នំពេញ 1MB-5101,ទូរសព្ទចំនួន០៣គ្រឿង ,ខ្សែក ១ខ្សែ, ខ្សែដៃ, ចិញ្ចៀន ១វង់,ប្រាក់ចំនួន ២១០០$និងប្រាក់ជប៉ុន ១០២៤០០០យេន -ប្រាក់ចំនួន ១០២៤០០០យេន (ជប៉ុន)។

បច្ចុប្បន្នជនសង្ស័យខាងលើ ត្រូវបានកម្លាំងសមត្ថកិច្ចនៃ អធិការនគរបាលខណ្ឌ កំពុងបន្តនីតិវីធីនិងបញ្ចូនទៅកាន់សាលាដំបូងរាជធានីភ្នំពេញ ដើម្បីផ្ដន្ទាទោសតាមច្បាប់៕ ដោយ៖ ម៉េង

The post ករណី​គាស់បន្ទប់ជួលយកលុយ៣ម៉ឺនដុល្លារនៅឬស្សីកែវ​ សមត្ថកិច្ចស្រាវជ្រាវឃាត់ខ្លួនជនសង្ស័យប្រុសស្រី៣នាក់ appeared first on Kampuchea Thmey Daily.

ការស្នើនេះក្នុងឱកាស លោក ជិន ប៊ុនធឿន បានដឹកនាំមន្ត្រីក្រោមឱវាទអញ្ជើញចុះសំណេះសំណាលសួរសុខទុក្ខប្រជាពលរដ្ឋ និងពិនិត្យរៀបចំផ្លូវបេតុង ស្ថិតនៅក្នុងភូមិឃ្លាំងសាំង សង្កាត់ឫស្សីកែវ ដើម្បីត្រៀមរៀបចំធ្វើអនាម័យ បរិស្ថាន ដោយដាក់គ្រឿងចក្រឈូសសម្អាតដីពង្រីកផ្លូវ និងដាក់បង្គោលភ្លើងបំភ្លឺផ្លូវសាធារណៈ កាលល្ងាចថ្ងៃទី ២៧ ខែវិច្ឆិកា ឆ្នាំ ២០២៥។

លោក លន់ សុភ័ណ្ឌ ពលរដ្ឋរស់នៅជាប់ផ្លូវបេតុងខាងលើ បានបង្ហាញការគាំទ្រ​ចំពោះការចុះពិនិត្យរបស់អាជ្ញាធរដោយលើកឡើងថា ការដាក់បង្គោលភ្លើង និងពង្រីកផ្លូវ នឹងជួយឲ្យការធ្វើដំណើរពេលរាត្រីមានសុវត្ថិភាពជាងមុន។ លោក រីករាយចូលរួមជាមួយអាជ្ញាធរ ដើម្បីអភិវឌ្ឍន៍សហគមន៍ឲ្យកាន់តែប្រសើរ។

ដោយឡែក អ្នកស្រី ជុំ អូន ជាពលរដ្ឋ បានលើកឡើងដែរថា អ្នកស្រី យល់ព្រមសហការជាមួយអាជ្ញាធរ ដើម្បីធ្វើការអភិវឌ្ឍន៍។ បើមានផ្លូវស្អាត និងភ្លើងបំភ្លឺចេញចូលលំនៅឋាន អ្នកស្រី ក៏ងាយស្រួលជាងមុន និងមានសុវត្ថិភាពផងដែរ។

ជាមួយគ្នានេះ ពលរដ្ឋភូមិឃ្លាំងសាំង បានបង្ហាញការគាំទ្រចំពោះចំណាត់ការរដ្ឋបាលខណ្ឌ និងបានពេញចិត្តក្នុងការចូលរួមសហការជាមួយអាជ្ញាធរ ដើម្បីរួមចំណែករក្សាបរិស្ថាន និងបង្កើនសោភ័ណភាពសហគមន៍របស់ខ្លួន៕

អត្ថបទ ៖ សំណាង

The post អភិបាលខណ្ឌឫស្សីកែវ ស្នើពលរដ្ឋបញ្ឈប់ការយកដីសាធារណៈធ្វើជា​ប្រយោជន៍ផ្ទាល់ខ្លួន appeared first on Kampuchea Thmey Daily.

ដោយអនុវត្តតាមការបញ្ជាផ្ទាល់ពីលោក មូល វីរៈ ចៅសង្កាត់ឫស្សីកែវ និងជាប្រធានគណៈបញ្ជាការឯកភាពសង្កាត់ កម្លាំងគណៈបញ្ជាការឯកភាពសង្កាត់ដឹកនាំដោយលោក ជ្រិន យូរ៉ាន់ នាយប៉ុស្តិ៍នគរបាលឫស្សីកែវ បានដឹកនាំកម្លាំងនគរបាលប៉ុស្តិ៍ និងកម្លាំងប្រជាការពារសង្កាត់ ព្រមទាំងមានការចូលរួមពីលោកមេភូមិមិត្តភាព បានចុះរៀបចំសណ្តាប់ធ្នាប់តាមដងផ្លូវមួយចំនួនក្នុងភូមិសាស្រ្តសង្កាត់ឫស្សីកែវ ដែលមានចំនួន៣ទីតាំង គឺ ១.ចុះរៀបចំសណ្តាប់ធ្នាប់នៅតាមដងផ្លូវចាក់បេតុងថ្មី ចាប់ពីព្រុំប្រទល់សង្កាត់គីឡូម៉ែត្រលេខ៦ បន្តមកដល់ព្រុំប្រទល់សង្កាត់ឫស្សីកែវ ដោយបានណែនាំ និងជម្រាបដល់ម្ចាស់អាជីវកម្មទាំងអស់ ហាមមិនឲ្យយកចំណីផ្លូវប្រើជាប្រយោជន៍ផ្ទាល់ខ្លួន និងស្នើឲ្យជួយសំអាតកុំឲ្យមានដី មានខ្សាច់ និងសំរាមផ្សេងៗ កកស្ទះលើចិញ្ចើមផ្លូវ និងហូរចូលមាត់លូ ដែលអាចបណ្តាលឲ្យកកស្ទះប្រព័ន្ធលូបង្ហូរទឹក។ ២.រៀបចំសណ្តាប់ធ្នាប់នៅតាមដងផ្លូវចាក់បេតុងថ្មី ត្រង់ផ្លូវបំបែកជា៤ (ផ្សារក្រមួន) ដោយបានណែនាំដល់អ្នកលក់ដូរមិនឲ្យដាក់តាំងលក់ ឬដាក់ឆ័ត្រ គ្រែ និងសម្ភារៈផ្សេងៗ ហៀរមកលើផ្លូវ ដែលជាមូលហេតុបណ្តាលឲ្យកកស្ទះចរាចរណ៍។ ៣.ចុះរៀបសណ្តាប់ធ្នាប់នៅតាមដងផ្លូវក្នុងភូមិសាមគ្គី ដោយបានណែនាំដល់អ្នកលក់ដូរតាមដងផ្លូវ មិនឲ្យដាក់តាំងលក់ ឬដាក់ឆ័ត្រ គ្រែ និងសម្ភារៈផ្សេងៗ ហៀរមកលើផ្លូវ និងត្រូវចូលរួមថែរក្សាអនាម័យបរិស្ថាន ហាមចោលសំរាម ស្បោង ប្លាស្ទិកចូលមាត់លូបង្ហូរទឹក។

ក្នុងផងដែរនោះផងដែរ អាជ្ញារធរស្នើសុំឲ្យពលរដ្ឋរទាំងអស់ ចូលរួមជាមួយនឹងអាជ្ញាធរក្នុងការចុះរៀបចំសណ្ដាប់ធ្នា និង លក់ដូរតាមអ្វីដែលអាជ្ញាធរបានរៀបចំជូនដោយកំណត់ព្រំឲ្យលក់បានត្រឹមត្រូវ ឈប់យកចំណីផ្លូវប្រើជាប្រយោជន៍ផ្ទាល់ខ្លួន និងជួយសំអាតសំរាមផ្សេងៗដែលលើចិញ្ចើមផ្លូវ។

សូមបញ្ជាក់ផងដែរ លោក ឃួង ស្រេង អភិបាលរាជធានីភ្នំពេញ តែងតែក្រើនរំលឹកដល់អាជ្ញាធរទាំង១៤ខណ្ឌ ឲ្យយកចិត្តទុកជាប់ជាប្រចាំពីបញ្ហា សណ្ដាប់ធ្នាប់ បរិស្ថានអនាម័យ សាធារណៈ ជាពិសេសការរំលោភយកផ្លូវធ្វើជាចំណត កន្លែងតាំងលក់ទុកដាក់សម្ភារៈជាដើម ដែលបង្កការកកស្ទះចរាចរណ៍ និងបាត់បង់សណ្ដាប់ធ្នាប់ និងអាចបង្កគ្រោះថ្នាក់បានដល់អ្នកធ្វើដំណើរ៕

ដោយ ៖ ម៉េង

The post អាជ្ញាធរ ចុះរៀបចំសណ្ដាប់ធ្នាប់ ៣ ទីតាំងសំខាន់ៗ ក្នុងភូមិសាស្ត្រសង្កាត់ឫស្សីកែវ appeared first on Kampuchea Thmey Daily.