អភិបាលខណ្ឌឬស្សីកែវ ដាក់គោលការណ៍អាទិភាព​ចំនួន៤ ដើម្បីសោភ័ណភាព និងបរិស្ថានល្អស្អាតក្នុងមូលដ្ឋាន

រដ្ឋបាលខណ្ឌឬស្សីកែវ ក្រោមការដឹកនាំរបស់លោក ជិន ប៊ុនធឿន បានបន្តអនុវត្តយុទ្ធសាស្ត្រអភិវឌ្ឍមូលដ្ឋានដោយឥតឈប់ឈរតាមគោលការណ៍សំខាន់ ៤ចំណុច ដែលបានកំណត់ជាអាទិភាពសម្រាប់កែទម្រង់បរិស្ថាន និងលើកកម្ពស់ការរស់នៅរបស់ប្រជាពលរដ្ឋក្នុងតំបន់។

លោក ជិន ប៊ុនធឿន បញ្ជាក់ថា គោលការណ៍ទាំង៤នេះ គឺជាគន្លឹះដ៏សំខាន់ក្នុងការបង្កើតបរិយាកាស បរិស្ថាន រស់នៅដ៏ស្អាតប្រសើរ សម្រាប់ក្រុមគ្រួសារប្រជាពលរដ្ឋទូរទាំងខណ្ឌឬស្សីកែវ។

គោលការណ៍អទិភាពទាំង៤ ចំណុចទាំងនេះរួមមាន ១.ផ្លូវក្នុងមូលដ្ឋានត្រូវស្អាតជានិច្ច។ ២.គ្រប់តាមផ្លូវទាំងអស់ក្នុងមូលដ្ឋានត្រូវមានបង្គោលបំភ្លឺផ្លូវសាធារណៈ ដើម្បីប្រជាពលរដ្ឋងាយស្រួល និងមានភាពកក់ក្តៅ សុវត្ថិភាពក្នុងការធ្វើដំណើរពេលយប់។ ៣.បញ្ឈប់រាល់សកម្មភាពរបស់បុគ្គលដែលរំលោភដីចំណីផ្លូវ និងដីសាធារណៈរបស់រដ្ឋធ្វើជាប្រយោជន៍ផ្ទាល់ខ្លួន។ ៤.ប្រជាពលរដ្ឋត្រូវបញ្ឈប់យកសំរាមបោះចោលពាសវាលពាសកាល ដើម្បីមូលដ្ឋានកាន់តែមានសោភ័ណភាពកាន់តែស្រស់បំព្រង។

ជាមួយគ្នានោះដែរ រដ្ឋបាលខណ្ឌឬស្សីកែវ អំពាវនាវឲ្យប្រជាពលរដ្ឋចូលរួមសហការដោយថែរក្សាបរិស្ថាន បញ្ឈប់សកម្មភាពរំលោភលើដីសាធារណៈ ឬការទុកដាក់សំរាមមិនត្រឹមត្រូវដើម្បីលើកម្ពស់សោភ័ណភាពខណ្ឌប្ញស្សីកែវ៕

អត្ថបទ៖ សំណាង