អភិបាលខណ្ឌឬស្សីកែវ ​ប្រមូលទិញផ្លែឈើពីអ្នកលក់រំលោភចំណីផ្លូវនៅតំបន់ផ្សារច្រាំងចំរេះដើម្បីបញ្ឈប់ការលក់ដូរលើផ្លូវសាធារណៈ

លោក ជិន ប៊ុនធឿន អភិបាលនៃគណៈអភិបាលខណ្ឌឬស្សីកែវ និងជាប្រធានគណៈបញ្ជាការឯកភាពរដ្ឋបាលខណ្ឌ បានប្រមូលទិញផ្លែឈើពីអ្នកលក់ដូរដែលរំលោភចិញ្ចើមផ្លូវទាំងអស់នៅផ្សារច្រាំងចំរេះ ដើម្បីបញ្ឈប់ការលក់ដូរលើចំណីផ្លូវសាធារណៈបន្តទៀត។ ការប្រមូលទិញផ្លែឈើពីអ្នកលក់ដែលរំលោភលើចំណីផ្លូវសាធារណៈនេះ គឺក្នុងគោលបំណងឱ្យបញ្ចប់ការជួញដូរលើផ្លូវសាធារណៈ ដែលបណ្តាលឲ្យបាត់បង់សណ្តាប់ធ្នាប់ បង្កភាពអនាធិបតេយ្យ និងបង្កឲ្យមានការកកស្ទះចរាចរណ៍។

ការប្រមូលទិញផ្លែឈើនេះ គឺធ្វើឡើងនៅពេលលោកអភិបាលខណ្ឌដឹកនាំកម្លាំងចុះត្រួតពិនិត្យ និងរៀបចំសណ្តាប់ធ្នាប់នៅតំបន់ផ្សារច្រាំងចំរេះ និងផ្សារក្រមួនគីឡូម៉ែត្រលេខ៩ កាលពីព្រឹកថ្ងៃអង្គារ៍ ថ្ងៃទី២ ខែធ្នូ ឆ្នាំ២០២៥។

ក្រោយពីប្រមូលទិញផ្លែឈើ អាជ្ញាធរខណ្ឌឬស្សីកែវ ក៏អំពាវនាវឲ្យប្រជាពលរដ្ឋសហការយ៉ាងជិតស្និទ្ធក្នុងការរក្សាសណ្តាប់ធ្នាប់ និងរៀបចំបរិស្ថានឲ្យកាន់តែប្រសើរក្នុងមូលដ្ឋាន។ ការរៀបចំសណ្តាប់ធ្នាប់ និងរបៀបរៀបរយត្រូវបានអនុវត្តគ្រប់សង្កាត់ក្នុងមូលដ្ឋាន ដោយមានគោលដៅបង្កើតបរិស្ថានល្អ សុវត្ថិភាព និងអនាម័យសម្រាប់ប្រជាពលរដ្ឋ៕

អត្ថបទ៖ សំណាង