ខេមបូឌានលីគ (Cambodian Premier League) Archives - Kampuchea Thmey Daily

លីគកំពូល កម្ពុជា ឈរលេខ ៦ ក្នុងបញ្ជីលីគមានតម្លៃថ្លៃបំផុតប្រចាំតំបន់ អាស៊ាន ឆ្នាំ ២០២៦

Kosal Sem — Fri, 29 May 2026 12:34:00 +0000

លីគកំពូល កម្ពុជា Cambodian Premier League កំពុងរីកចម្រើនពីមួយឆ្នាំទៅមួយឆ្នាំ ខណៈនៅឆ្នាំ ២០២៦ នេះ បានឈរលេខ ៦ ក្នុងបញ្ជីលីគមានតម្លៃថ្លៃបំផុតប្រចាំតំបន់អាស៊ាន។

យោងតាម Transfer Market ដែលដកស្រង់បន្តចេញពី ASEAN Football បានបង្ហាញ ថា លីគកំពូល កម្ពុជា ឈរនៅចំណាត់ថ្នាក់លេខ ៦ ដោយមានតម្លៃសរុបចំនួន ២១.៤៨ លានដុល្លារអាមេរិក។ ចំនួននេះបានកើនឡើង ២.៨៧ លានដុល្លារអាមេរិក បើធៀបនឹងឆ្នាំ ២០២៥។

ចំណាត់ថ្នាក់នេះ បានធ្វើឱ្យលីគកំពូល កម្ពុជា ឈរនៅក្រោមលីគក្នុងតំបន់ អាស៊ាន ៥ រួមមាន ឥណ្ឌូណេស៊ី ថៃ ម៉ាឡេស៊ី វៀតណាម និង សិង្ហបុរី។ ទោះបីជាយ៉ាងណា លីគ កម្ពុជា បានស្ថិតនៅលើលីគក្នុងតំបន់ ៥ ដែរ រួមមាន មីយ៉ាន់ម៉ា ហ្វីលីពីន ឡាវ ទីម័រ និង ប្រ៊ុយណេ។

លីគកំពូល ឥណ្ឌូណេស៊ី បានឈរនៅចំណាត់ថ្នាក់លេខ ១ ដោយមានតម្លៃសរុបចំនួន ១០០.៨៣ លានដុល្លារអាមេរិក។ ចំណាត់ថ្នាក់បន្ទាប់ លីគកំពូល ថៃ មានតម្លៃសរុបចំនួន ១០០.៦១ លានដុល្លារអាមេរិក។ លីគកំពូល ម៉ាឡេស៊ី ឈរលេខ ៣ មានតម្លៃសរុបចំនួន ៦៦.១០ លានដុល្លារអាមេរិក។

រីឯលីគកំពូល វៀតណាម ឈរលេខ ៤ មានតម្លៃសរុបចំនួន ៦៥.៧៣ លានដុល្លារអាមេរិក។ លីគកំពូល សិង្ហបុរី ឈរលេខ ៥ មានតម្លៃសរុបចំនួន ២២.២៣ លានដុល្លារអាមេរិក។ លីគកំពូល មីយ៉ាន់ម៉ា ឈរលេខ ៧ មានតម្លៃសរុបចំនួន ១៨.៣០ លានដុល្លារអាមេរិក។ ចំណាត់ថ្នាក់លេខ ៨ គឺលីគកំពូល ហ្វីលីពីន មានតម្លៃសរុប ១៣.៣៤ លានដុល្លារអាមេរិក។

ចំណែកលីគកំពូល ៣ ស្ថិតនៅចំណាត់ថ្នាក់ក្រុមគេបំផុត គឺ លីគកំពូល ឡាវ ឈរលេខ ៩ មានតម្លៃសរុប ៥.៥៧ លានដុល្លារអាមេរិក។ លីគកំពូល ទីម័រ ឈរលេខ ១០ មានតម្លៃ ៥០ ម៉ឺនដុល្លារអាមេរិក និងចុងក្រោយលីគកំពូល ប្រ៊ុយណេ មានតម្លៃទាបជាងគេចំនួន ១៦.២៩ ម៉ឺនដុល្លារអាមេរិក៕

អត្ថបទ៖ សេម កុសល

The post លីគកំពូល កម្ពុជា ឈរលេខ ៦ ក្នុងបញ្ជីលីគមានតម្លៃថ្លៃបំផុតប្រចាំតំបន់ អាស៊ាន ឆ្នាំ ២០២៦ appeared first on Kampuchea Thmey Daily.

Breaking News! Cristian នឹងចាកចេញពី ព្រះខ័នរាជស្វាយរៀង ចុងរដូវកាលនេះ

chean virakbot — Mon, 25 May 2026 02:25:53 +0000

ខ្សែប្រយុទ្ធប្រេស៊ីល Cristian Roque បានបដិសេធក្លិបជាច្រើននៅក្នុងតំបន់អាស៊ានដើម្បីបន្តលេងនៅក្នុងលីគបាល់ទាត់កំពូលកម្ពុជាទៀត។

ក្រោយចប់ការប្រកួតវគ្គផ្តាច់ព្រ័ត្រ ពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី១៩ កាលពីយប់ថ្ងៃទី២៤ ខែឧសភា ឆ្នាំ ២០២៦ កីឡាករ Cristian Roque បានប្រាប់ក្នុងបទសម្ភាសថា រដូវកាល ២០២៥-២៦ គឺជារដូវកាលចុងក្រោយសម្រាប់រូបគេនៅក្លិបបាល់ទាត់ព្រះខ័នរាជស្វាយរៀង ដូច្នេះរូបគេនឹងចាកចេញពីក្លិបជើងឯកលីគកំពូលកម្ពុជានៅចុងរដូវកាលនេះហើយ។

កីឡាករបានបន្តថា មានក្លិបមួយចំនួននៅតំបន់អាស៊ានដូចជានៅវៀតណាម ឥណ្ឌូណេស៊ី និងម៉ាឡេស៊ីជាដើមបានចាប់អារម្មណ៍លើរូបគេ ប៉ុន្តែរូបគេមិនទាន់ចង់ចាកចេញពីកម្ពុជាឡើយ។ រូបគេចង់បន្តលេងនៅលីគបាល់ទាត់កំពូលកម្ពុជានៅរដូវកាលក្រោយមួយទៀត។

កីឡាករបានបញ្ជាក់ថា ៖«ខ្ញុំចង់មានលិខិតឆ្លងដែនកម្ពុជា ហើយលេងឲ្យក្រុមបាល់ទាត់ជម្រើសជាតិកម្ពុជា»។

រហូតដល់ពេលនេះ Cristian Roque បានលេងនៅលីគបាល់ទាត់កំពូលកម្ពុជាចំនួន ៤ រដូវកាលហើយពោលគឺនៅក្លិប ណាហ្គាវើលដ៍ ២ រដូវកាល និង ព្រះខ័នរាជស្វាយរៀង ២ រដូវកាល។

តាមច្បាប់របស់សហព័ន្ធកីឡាបាល់ទាត់អន្តរជាតិ (FIFA) បានចែងថា កីឡាករបរទេសម្នាក់លេងនៅក្នុងលីគបាល់ទាត់របស់ប្រទេសមួយរយៈពេល ៥ ឆ្នាំ រូបគេមានសិទ្ធិលេងតំណាងឲ្យជម្រើសជាតិនៃប្រទេសនោះ ប្រសិនបើប្រទេសនោះត្រូវការ ហើយផ្តល់សញ្ជាតិឲ្យ។

Cristian បានក្លាយជាតួសំខាន់ម្នាក់ក្នុងការជួយឲ្យ ព្រះខ័នរាជស្វាយរៀង ឈ្នះជើងឯកលីគកំពូលកម្ពុជា ២ លើក ឈ្នះជើងឯកពានរង្វាន់សម្តេចអគ្គមហាសេនាបតីតេជោ ហ៊ុន សែន ១ លើក និងទទួលបានចំណាត់ថ្នាក់លេខ២ ពានរង្វាន់អាស៊ី AFC Challenge League ២ លើក៕

អត្ថបទ៖ វិរបុត្រ

The post Breaking News! Cristian នឹងចាកចេញពី ព្រះខ័នរាជស្វាយរៀង ចុងរដូវកាលនេះ appeared first on Kampuchea Thmey Daily.

ក្រោយឈ្នះជើងឯកលីគ សុផល ឌីម៉ង់ ប្តេជ្ញាប្រឹងបន្ថែមទៀត ដើម្បីប្រជែងកៅអី ១១នាក់រដូវកាលក្រោយ

Kosal Sem — Fri, 22 May 2026 03:00:07 +0000

កីឡាករសុផល ឌីម៉ង់ បានបង្ហាញអារម្មណ៍រំភើបខ្លាំង បន្ទាប់ពីសម្រេចក្តីស្រមៃឈ្នះពានលីគកំពូល កម្ពុជា ជាលើកដំបូងនៅក្នុងអាជីពរបស់ខ្លួន ហើយរូបគេបានប្តេជ្ញានឹងពង្រឹងសមត្ថភាពខ្លួនឯងបន្ថែម ដើម្បីប្រជែងយកកៅអីជម្រើស ១១ នាក់ដំបូងនៅរដូវកាលក្រោយ។

បន្ទាប់ពីផ្លាស់ពីក្រុម អង្គរថាយហ្គឺរ មកចូលរួមជាមួយក្រុម ព្រះខ័នរាជស្វាយរៀង នៅរដូវកាលនេះ ឌីម៉ង់ ពិតជាទទួលបានភាពជោគជ័យខ្លាំងគួរឱ្យកត់សម្គាល់ ខណៈថ្មីៗនេះ ទើបតែបានឈ្នះពានលីគកំពូល កម្ពុជា ជាមួយក្រុមរហស្សនាម ព្រះខ័នខៀវ។

ក្រោយឈ្នះពានលីគជាលើកដំបូង ឌីម៉ង់ បានបង្ហាញអារម្មណ៍រំភើបខ្លាំង ប៉ុន្តែកីឡាករគិត ថា ខ្លួនឯងមិនទាន់ល្អគ្រប់គ្រាន់ ដូចអ្វីដែលគាត់ចង់បាននៅឡើយទេ។ ខ្សែបម្រើការពារវ័យ ២៥ ឆ្នាំបានប្តេជ្ញាចិត្ត ថា នឹងព្យាយាមដុសខាត់សមត្ថភាពខ្លួនឯងឱ្យល្អជាងនេះបន្ថែមទៀត ដើម្បីប្រជែងកៅអី ១១ នាក់ដំបូងនៅក្នុងក្រុម។

ថ្លែងប្រាប់សារព័ត៌មាន «កម្ពុជាថ្មី» សុផល ឌីម៉ង់ បានឱ្យដឹងថា ៖ «ជាពានដំបូងនៅក្នុងអាជីពរបស់ខ្ញុំ។ ខ្ញុំពិតជាមានអារម្មណ៍សប្បាយរីករាយ និងរំភើប ព្រោះវាជាពាន ដែលខ្ញុំចង់បាន។ ខ្ញុំគិត ថា ក្រុមទាំងមូល គឺធ្វើបានល្អហើយ ប៉ុន្តែសម្រាប់ខ្ញុំ គឺនឹងនៅព្យាយាមដុសខាត់ខ្លួនឯងបន្ថែមទៀត ដោយសារខ្ញុំមិនទាន់គ្រប់គ្រាន់ទេ»។

កីឡាករមានដើមកំណើតនៅខេត្ត សៀមរាប បានបន្តទៀត ថា៖ «រដូវកាលក្រោយ ពួកយើងត្រូវលេងពាន AFC Champions League Two ដែលវានឹងឡើងទៅកម្រិតមួយទៀត។ ខ្ញុំនឹងព្យាយាមប្រឹងប្រែងប្រជែងយកកៅអី ១១ នាក់ដំបូងនៅរដូវកាលក្រោយបន្តទៀត»៕

អត្ថបទ៖ សេម កុសល

The post ក្រោយឈ្នះជើងឯកលីគ សុផល ឌីម៉ង់ ប្តេជ្ញាប្រឹងបន្ថែមទៀត ដើម្បីប្រជែងកៅអី ១១នាក់រដូវកាលក្រោយ appeared first on Kampuchea Thmey Daily.

ក្រុមហ៊ុន វឌ្ឍនៈ ចូលរួមអបអរសាទរ ព្រះខ័នរាជស្វាយរៀង សម្រាប់ការបង្កើតកំណត់ត្រាថ្មី

chean virakbot — Wed, 20 May 2026 01:40:03 +0000

ក្លិបបាល់ទាត់ ព្រះខ័នរាជស្វាយរៀង ដែលមានក្រុមហ៊ុន វឌ្ឍនៈ ជាដៃគូឧបត្ថម្ភជាច្រើនរដូវកាលមកហើយ បានបង្កើតកំណត់ត្រាថ្មីក្នុងនាមជាក្លិបបាល់ទាត់កម្ពុជាដំបូងគេបង្អស់ដែលបានឈ្នះជើងឯកលីគបាល់ទាត់កំពូលកម្ពុជា ៣ រដូវកាលជាប់គ្នា។

និយាយជារួម ក្រុមហ៊ុន វឌ្ឍនៈ ជាដៃគូឧបត្ថម្ភធំសម្រាប់ការប្រកួតខេមបូឌានព្រីមៀរលីគ និងក្លិបបាល់ទាត់ផ្សេងៗទៀតជាច្រើនទៀតនៅក្នុងប្រទេសកម្ពុជា ប៉ុន្តែនិយាយដោយឡែក ក្រុមហ៊ុនក៏ជាដៃគូអភិវឌ្ឍ ក្លិបព្រះខ័នរាជស្វាយរៀង ជាច្រើនរដូវកាលមកហើយ។

ក្នុងនាមជាដៃគូឧបត្ថម្ភធំ ក្រុមហ៊ុន វឌ្ឍនៈ សូមចូលរួមអបអរសាទរ និងមានមោទនភាពសម្រាប់ជោគជ័យដ៏ធំធេងទាំងពានរង្វាន់ក្នុងស្រុក និងលើឆាកអន្តរជាតិរបស់ ក្លិបបាល់ទាត់ ព្រះខ័នរាជស្វាយរៀង។ ជាពិសេស ការបង្កើតកំណត់ត្រាថ្មីក្នុងនាមជាក្រុមគ្រងជើងឯក ខេមបូឌានព្រីមៀរលីគ ៣ រដូវកាលជាប់ៗគ្នា។

ក្រុមហ៊ុន វឌ្ឍនៈ បានយកចិត្តទុកដាក់ និងឧបត្ថម្ភគាំទ្រដល់កីឡាគ្រប់វិស័យទាំងថ្នាក់មូលដ្ឋាន ថ្នាក់ជាតិ និងអន្តរជាតិ ដែលបានក្លាយជាដៃគូឈានមុខគេក្នុងការគាំទ្រ និងលើកស្ទួយវិស័យកីឡាជាតិគ្រប់ទម្រង់ រួមមាន កីឡាបាល់ទាត់ កីឡាប្រដាល់គុនខ្មែរ និងកីឡាផ្សេងៗទៀតជាច្រើនទៀតអស់រយៈពេលជាយូរមកហើយក្នុងស្មារតីជាខ្មែរតែមួយ ខ្មែរជួយខ្មែរ ខ្មែរលើកស្ទួយកីឡាខ្មែរ ហើយកីឡាខ្មែរខ្លាំង។

មិនត្រឹមតែឧបត្ថម្ភគាំទ្រផ្នែកធន់ធានហិរញ្ញវត្ថម្ភ និងសម្ភារៈប៉ុណ្ណោះ ប៉ុន្តែថ្នាក់ដឹកនាំក្រុមហ៊ុន វឌ្ឍនៈ បានចូលរួមផ្ទាល់ក្នុងកម្មវិធី ក៏ដូចជាព្រឹត្តិការណ៍នានាដើម្បីលើកទឹកចិត្ត និងជំរុញស្មារតីកីឡា។ ជាក់ស្តែង អ្នកឧកញ៉ា សំអាង វឌ្ឍនៈ អគ្គនាយកក្រុមហ៊ុន វឌ្ឍនៈ ក៏មានវត្តមានក្នុងពិធីប្រគល់ពានរង្វាន់ និងមេដាយជាផ្លូវការដល់ម្ចាស់ជ័យលាភីនៃខេមបូឌានព្រីមៀរលីគ រដូវកាល ២០២៥-២៦ កាលពីថ្ងៃទី១៧ ខែឧសភា ឆ្នាំ ២០២៦ នៅពហុកីឡដ្ឋានជាតិមរតកតេជោ។ សកម្មភាពរបស់ អ្នកឧកញ៉ា បានស្តែងឱ្យឃើញយ៉ាងច្បាស់ពី បេះដូងស្រឡាញ់កីឡាពិតប្រាកដ៕

អត្ថបទ៖ វិរបុត្រ

The post ក្រុមហ៊ុន វឌ្ឍនៈ ចូលរួមអបអរសាទរ ព្រះខ័នរាជស្វាយរៀង សម្រាប់ការបង្កើតកំណត់ត្រាថ្មី appeared first on Kampuchea Thmey Daily.

វីរះ ដារ៉ា ប្រាប់ កយ សាលីម សក្តិសមឈ្នះស្រោមដៃមាសជាងខ្លួន

Kosal Sem — Mon, 18 May 2026 07:00:41 +0000

អ្នកចាំទី វីរះ ដារ៉ា របស់ក្រុម ព្រះខ័នរាជស្វាយរៀង បានទម្លាយអារម្មណ៍ពិតអំពីការឈ្នះពានរង្វាន់ស្រោមដៃមាសនៅរដូវកាលនេះ ដោយរូបគេទទួលស្គាល់ ពាននេះគួរតែបានទៅលើកីឡាករ កយ សាលីម ជាងខ្លួន ដោយសារអ្នកចាំទីក្រុម បឹងកេត មានកំណត់ត្រារក្សាកំណត់ត្រាសំណាញ់ទីច្រើនជាងខ្លួន។

បន្ទាប់ពីលីគកំពូល កម្ពុជា បិទបញ្ចប់រដូវកាល ២០២៥-២០២៦ កាលពីថ្ងៃ អាទិត្យ ទី ១៧ ខែ ឧសភា ឆ្នាំ ២០២៦ ដោយប្រគល់ពានរង្វាន់ស្រោមដៃមាសទៅឱ្យអ្នកចាំទី វីរះ ដារ៉ា បានធ្វើឱ្យមានការវែកញែកខ្លាំងនៅលើបណ្តាញសង្គម ដោយមតិភាគច្រើនយល់ ថា ពាននេះគួរតែបានទៅលើអ្នកចាំទី កយ សាលីម ព្រោះ សាលីម មានកំណត់ត្រារក្សាសំណាញ់ទីច្រើនជាងគេចំនួន ១២ លើក ពោលគឺឈរលើ ដារ៉ា ដែលឈរលេខ ២ មាន ៩ លើក។

យ៉ាងណាមិញ ម្ចាស់ស្រោមដៃមាស វីរះ ដារ៉ា ក៏មានគំនិតសុទិដ្ឋិលើរឿងនេះ ដោយរូបគេយល់ ថា កយ សាលីម សក្តិសមឈ្នះស្រោមដៃមាសជាងខ្លួន។ រូបគេសប្បាយចិត្តខ្លាំង ដែលបានឈ្នះពានគ្រាប់បាល់ល្អបំផុតប្រចាំរដូវកាល ប៉ុន្តែពានស្រោមដៃមាស គឺរូបគេមានការគោរពទៅលើ កយ សាលីម ដោយសារ សាលីម មានស្ថិតិរក្សាសំណាញ់ទីច្រើនជាង។

ថ្លែងប្រាប់សារព័ត៌មាន «កម្ពុជាថ្មី» វីរះ ដារ៉ា បាននិយាយដូច្នេះ ថា៖ «ខ្ញុំមានអារម្មណ៍សប្បាយចិត្តខ្លាំងមែនទែន ដែលបានឈ្នះពានឯកត្តជនទាំង ២ នេះ (ពានគ្រាប់បាល់ល្អបំផុត និងពានស្រោមដៃមាស)។ ខ្ញុំសូមនិយាយពាក្យក្នុងចិត្តមួយទៀត ថា ខ្ញុំគឺមានអារម្មណ៍សប្បាយចិត្ត ប៉ុន្តែមួយទៀតខ្ញុំគឺមិនសូវសប្បាយចិត្តអំពីការឈ្នះពានស្រោមដៃមាស»។

កីឡាករបានបន្តទៀត ថា៖ «ខ្ញុំសប្បាយចិត្តជាងគេនូវពានគ្រាប់បាល់ល្អបំផុតរបស់ខ្ញុំ ដោយសារខ្ញុំបានទាត់បញ្ចូលទីក្នុងចម្ងាយឆ្ងាយ។ ប៉ុន្តែសម្រាប់ស្រោមដៃមាស ខ្ញុំមិនហ៊ាននិយាយទេ ដោយសារយើងដឹងគ្រប់គ្នា ថា ខ្ញុំគោរពចំពោះបងលីម ដោយគាត់សក្តិសមឈ្នះជាងខ្ញុំ ដោយសារគាត់មានស្ថិតិរក្សាសំណាញ់ទីច្រើនជាងខ្ញុំ»។

គួរបញ្ជាក់ ថា វីរះ ដារ៉ា បានរួមចំណែកយ៉ាងធំធេង ក្នុងការជួយឱ្យក្រុម ព្រះខ័នរាជស្វាយរៀង ឈ្នះជើងឯកពានលីគកំពូល កម្ពុជា នៅរដូវកាលនេះ ដែលជាកំណត់ត្រា ៣ រដូវកាលជាប់គ្នា។ ជាមួយគ្នានេះ ដារ៉ា បានឈ្នះពានឯកត្តជន ២ ម្នាក់ឯង រួមមានពានគ្រាប់បាល់ល្អបំផុត និងពានស្រោមដៃមាស៕

អត្ថបទ៖ សេម កុសល

The post វីរះ ដារ៉ា ប្រាប់ កយ សាលីម សក្តិសមឈ្នះស្រោមដៃមាសជាងខ្លួន appeared first on Kampuchea Thmey Daily.

មកដឹងលំអិតពីម្ចាស់ពានទាំងអស់ លីគកំពូលកម្ពុជា រដូវកាល ២០២៥-២៦

chean virakbot — Mon, 18 May 2026 03:09:02 +0000

ព្រឹត្តិការណ៍បាល់ទាត់ជម្រើសជើងឯកជាតិ«ខេមបូឌានព្រីមៀរលីគ» រដូវកាល ២០២៥-២៦ បានបិទបញ្ចប់នៅយប់ថ្ងៃទី១៧ ខែឧសភា ឆ្នាំ ២០២៦ បន្ទាប់ពីដំណើរការប្រកួតតាំងពីខែសីហា ឆ្នាំ ២០២៥។

ព្រះខ័នរាជស្វាយរៀង

ការប្រកួតសរុបចំនួន ៨៣ លើក និងកើតមានគ្រាប់បាល់ចំនួន ២៧៦ គ្រាប់ ដោយមានអ្នកគាំទ្រចូលទស្សនាផ្ទាល់ចំនួន ១០៥,១៧១នាក់។ ជាលទ្ធផល ក្រុម ព្រះខ័នរាជស្វាយរៀង បានឈ្នះជើងឯក និងបានក្លាយជាក្រុមទី១ដែលបានឈ្នះជើងឯកលីគកំពូលកម្ពុជា ៣ រដូវកាលជាប់គ្នា។ ចំណាត់ថ្នាក់លេខ ២ បានទៅ ភ្នំពេញក្រោន និងលេខ ៣ បានទៅ អង្គរថាយហ្គឺរ។

ភ្នំពេញក្រោន

សម្រាប់ពានរង្វាន់ឯកត្តជន គឺ ខ្សែប្រយុទ្ធសញ្ជាតិហ្គាណា Kwame Peprah របស់ ព្រះខ័នរាជស្វាយរៀង បានក្លាយជាកីឡាករល្អបំផុតប្រចាំរដូវកាល និងជាម្ចាស់ស្បែកជើងមាស សម្រាប់ការរកបានគ្រាប់បាល់ច្រើនជាងគេគឺចំនួន ២៤ គ្រាប់ ហើយរូបគេក៏ជាប់ក្នុងជម្រើស ១១ នាក់ដំបូងល្អបំផុត។

អង្គរថាយហ្គឺរ

អ្នកចាំទី វិរះ ដារ៉ា របស់ ព្រះខ័នរាជស្វាយរៀង បានឈ្នះពានរង្វាន់ ២ គឺពានស្រោមដៃមាសក្នុងនាមជាអ្នកចាំទីល្អបំផុត និងពានគ្រាប់បាល់ល្អជាងគេបំផុត ប៉ុន្តែមិនបានជាប់ក្នុងជម្រើស ១១នាក់ល្អបំផុតប្រចាំរដូវកាលឡើយ។ ចំណែកពានគ្រូបង្វឹកល្អជាងគេបំផុតបានទៅលោក Mattew McConkey របស់ក្លិបព្រះខ័នរាជស្វាយរៀង។

កីឡាករ Kwame Peprah

ពាន ៣ ទៀតគឺកីឡដ្ឋានស្អាតជាងគេបំផុតបានទៅ ក្លិបបាល់ទាត់វិសាខា ពានរៀបចំធ្វើម្ចាស់ផ្ទះល្អជាងគេបំផុតបានទៅ ព្រះខ័នរាជស្វាយរៀង និងពានអ្នកគាំទ្រច្រើនជាងគេបំផុតបានទៅ បឹងកេត។

កីឡាករ វិរះ ដារ៉ា

ចំពោះកីឡាករជម្រើស ១១ នាក់ល្អបំផុតប្រចាំរដូវកាលគឺ អ្នកចាំទី៖ កយ សាលីម (បឹងកេត), ខ្សែការពារ៖ សារ៉េត គ្រីយ៉ា (ព្រះខ័នរាជស្វាយរៀង) Raul Feher (ភ្នំពេញក្រោន) និង Barbosa (កំពង់ដេវ៉ា) និង Yusuokaa Takuto (អង្គរថាយហ្គឺរ)។ ខ្សែបម្រើប្រយុទ្ធ៖ Patrick ស្លាបឆ្វេង (ព្រះខ័នរាជស្វាយរៀង) ម៉ាត់ នូរ៉ុន កណ្តាល (បឹងកេត) ស៊ីន កក្កដា កណ្តាល (វិសាខា) និង Mark Kurita ស្លាបស្តាំ (អង្គរថាយហ្គឺរ) ហើយខ្សែប្រយុទ្ធជួរមុខគឺ Kwame Peprah (ព្រះខ័នរាជស្វាយរៀង) និង Yusuke Minagawa (ណាហ្គាវើលដ៏)៕

លោកគ្រូ McConkey

ចំណាត់ថ្នាក់

ជើងឯក៖ ព្រះខ័នរាជស្វាយរៀង
លេខ ២៖ ភ្នំពេញក្រោន
លេខ ៣៖ អង្គរថាយហ្គឺរ

ពានរៀបចំធ្វើម្ចាស់ផ្ទះល្អបំផុត

ពានរង្វាន់ឯកត្តជន

ពានកីឡាករល្អបំផុត៖ Kwame Peprah (ព្រះខ័នរាជស្វាយរៀង)
ពានម្ចាស់ស្បែកជើងមាស៖ Kwame Peprah (ព្រះខ័នរាជស្វាយរៀង)
ពានអ្នកចាំទីល្អបំផុត៖ វិរះ ដារ៉ា (ព្រះខ័នរាជស្វាយរៀង)
ពានគ្រាប់បាល់ល្អបំផុត៖ វិរៈ ដារ៉ា (ព្រះខ័នរាជស្វាយរៀង)
ពានគ្រូបង្វឹកល្អបំផុត៖ Mattew McConkey (ព្រះខ័នរាជស្វាយរៀង)
ពានម្ចាស់ផ្ទះល្អបំផុត៖ ព្រះខ័នរាជស្វាយរៀង
ពានកីឡដ្ឋានស្អាតបំផុត៖ វិសាខា
ពានអ្នកគាំទ្រច្រើនបំផុត៖ បឹងកេត

ពានកីឡដ្ឋានស្អាតបំផុត និងពានអ្នកគាំទ្រច្រើនបំផុត

ជម្រើស ១១ នាក់ល្អបំផុតប្រចាំរដូវកាល

អ្នកចាំទី៖ កយ សាលីម (បឹងកេត)
ខ្សែការពារ៖ សារ៉េត គ្រីយ៉ា (ព្រះខ័នរាជស្វាយរៀង) Raul Feher (ភ្នំពេញក្រោន)
Barbosa (កំពង់ដេវ៉ា) និង Yusuokaa Takuto (អង្គរថាយហ្គឺរ)
ខ្សែបម្រើ៖ Patrick (ព្រះខ័នរាជស្វាយរៀង) ម៉ាត់ នូរ៉ុន (បឹងកេត) ស៊ីន កក្កដា (វិសាខា) និង Mark Kurita (អង្គរថាយហ្គឺរ)
ខ្សែប្រយុទ្ធ៖ Kwame Peprah (ព្រះខ័នរាជស្វាយរៀង) និង Yusuke Minagawa (ណាហ្គាវើលដ៏)

អត្ថបទ៖ វិរបុត្រ

The post មកដឹងលំអិតពីម្ចាស់ពានទាំងអស់ លីគកំពូលកម្ពុជា រដូវកាល ២០២៥-២៦ appeared first on Kampuchea Thmey Daily.

បឹងកេត អស់ឱកាសលេខ ២ ខណៈ ភ្នំពេញក្រោន និង អង្គរថាយហ្គឺរ ត្រូវប្រជែងគ្នាដល់ប្រកួតចុងក្រោយ

Kosal Sem — Mon, 11 May 2026 02:49:12 +0000

ក្រុម ភ្នំពេញក្រោន និង អង្គរថាយហ្គឺរ នៅមិនទាន់សម្រេចថា តើក្រុមណាទទួលបានចំណាត់ថ្នាក់លេខ ២ ក្នុងលីគកំពូលកម្ពុជា រដូវកាលនេះទេ បើទោះបីជានៅសល់តែ ១ ប្រកួតចុងក្រោយនឹងបញ្ចប់ ខណៈ បឹងកេត វិញ គឺបានអស់ឱកាសហើយ។

ការប្រជែងតំណែងលេខ ២ នៅក្នុងលីគកំពូល កម្ពុជា នៅតែជាប្រធានបទក្តៅក្នុងរដូវកាលនេះ បន្ទាប់ពី ភ្នំពេញក្រោន និង អង្គរថាយហ្គឺរ ឈ្នះដូចគ្នាកាលពីល្ងាចថ្ងៃ អាទិត្យ ទី ១០ ខែ ឧសភា ឆ្នាំ ២០២៦។ លទ្ធផលក្នុងសប្តាហ៍ទី ២៩ គឺ ភ្នំពេញក្រោន បានឈ្នះក្រុម ណាហ្គាវើលដ៍ នៅទឹកដីខ្លួន ៣-០ ខណៈ អង្គរថាយហ្គឺរ ឈ្នះ អឹមអូអាយ កំពង់ដេវ៉ា ២-១ នៅកីឡដ្ឋាន វិសាខា។

បច្ចុប្បន្នក្រុម ភ្នំពេញក្រោន បានហក់ឡើងមកឈរ ២ វិញ ដោយមាន ៥៣ ពិន្ទុស្មើគ្នា ជាមួយនឹងក្រុមលេខ ៣ អង្គរថាយហ្គឺរ។ ក្រុមទាំង ២ ត្រូវរង់ចាំអ៊ុតមើលដល់សប្តាហ៍ទី ៣០ ដែលជាការប្រកួតចុងក្រោយក្នុងលីគរដូវកាលនេះ ទើបនឹងរកឃើញក្រុមទទួលបានតំណែងលេខ ២ ជាផ្លូវការ ដើម្បីទទួលបានកន្លះកៅអីចូលរួមការប្រកួតក្នុងពាន AFC Champions League Two។

ប្រកួតនៅថ្ងៃ អាទិត្យ ចុងសប្តាហ៍នេះ ក្រុម ភ្នំពេញក្រោន ត្រូវជួបក្រុមម្ចាស់ជើងឯក ព្រះខ័នរាជស្វាយរៀង នៅពហុកីឡដ្ឋានជាតិមរតកតេជោ។ ចំណែក អង្គរថាយហ្គឺរ ត្រូវជួបក្រុម ណាហ្គាវើលដ៍ នៅទឹកដីខេត្ត សៀមរាប។ ប្រសិនបើ ភ្នំពេញក្រោន និង អង្គរថាយហ្គឺរ ឈ្នះ ឬ ចាញ់ដូចគ្នា នោះ ភ្នំពេញក្រោន នឹងនៅបន្តកាន់កាប់តំណែងលេខ ២ ដដែល ដោយផ្អែកលើរូបមន្ត head to head។ ដូច្នេះ ករណីដែល អង្គរថាយហ្គឺរ អាចឡើងមកឈរលេខ ២ បាន ទាល់តែពួកគេឈ្នះ ហើយ ភ្នំពេញក្រោន ចាញ់ការប្រកួតចុងក្រោយនេះ។

ងាកទៅកាន់ក្រុម បឹងកេត វិញ គឺបានអស់ឱកាសប្រជែងលេខ ២ ហើយ ទោះពេលនេះពួកគេមាន ៥០ ពិន្ទុ ដោយចាញ់ពិន្ទុក្រុមលេខ ២ តែ ៣ ពិន្ទុក៏ដោយ។ ប្រការនេះ មានន័យ ថា ការប្រកួតចុងក្រោយក្រោយទល់នឹងក្រុម អឹមអូអាយ កំពង់ដេវ៉ា ទោះ បឹងកេត ឈ្នះ ហើយក្រុម ភ្នំពេញក្រោន និង អង្គរថាយហ្គឺរ ចាញ់ដូចគ្នា ក៏ក្រុមនាគខៀវមិនអាចឡើងមកលេខ ២ បានដែរ ដោយសារតែគិតលើរូបមន្ត head to head។

គិតត្រឹមពេលនេះ មានតែ ភ្នំពេញក្រោន និង អង្គរថាយហ្គឺរ ប៉ុណ្ណោះ ដែលនៅស្ថិតជាបេក្ខភាពប្រជែងតំណែងលេខ ២ ដល់ការប្រកួតចុងក្រោយ។ យ៉ាងណា ភ្នំពេញក្រោន ហាក់មានតែមជាងបន្តិច ត្រង់ ថា អង្គរថាយហ្គឺរ មិនបានជាប់ក្នុងអាជ្ញាបណ្ណក្លិប AFC នោះទេ។ ចំណុចនេះ ធ្វើឱ្យក្រុមមានមូលដ្ឋាននៅខេត្តសៀមរាបហាក់មានភាគរយទាបក្នុងការតំណាងឱ្យ កម្ពុជា ឡើងទៅលេងពានទី ២ របស់ទ្វីប អាស៊ី ទោះពួកគេដណ្តើមបានលេខ ២ ក្នុងលីគ។

គ្រប់យ៉ាងមានតែរង់់ចាំដល់ដំណាក់កាលចុងក្រោយតែម្តង ដោយសារប្រធានក្លិបរបស់ អង្គរថាយហ្គឺរ លោក Akihiro Kato បានលើកឡើង ថា ក្រុមលោកនឹងតស៊ូដល់ទីបញ្ចប់ ហើយកំពុងដាក់បណ្តឹងឧទ្ធរណ៍ ដើម្បីតវ៉ាអំពីអាជ្ញាប័ណ្ណក្លិប AFC នេះ។ ដូច្នេះ អង្គរថាយហ្គឺរ នៅតែមានឱកាសអាចលេងពាន AFC2 បាន ប្រសិនបើការតវ៉ាទទួលបានជោគជ័យ៕

អត្ថបទ៖ សេម កុសល

The post បឹងកេត អស់ឱកាសលេខ ២ ខណៈ ភ្នំពេញក្រោន និង អង្គរថាយហ្គឺរ ត្រូវប្រជែងគ្នាដល់ប្រកួតចុងក្រោយ appeared first on Kampuchea Thmey Daily.

បឹងកេត តាមស្មើពិន្ទុ អង្គរថាយហ្គឺរ ខណៈ ភ្នំពេញក្រោន ធ្លាក់មកលេខ ៣ ក្នុងតារាងពិន្ទុ

chean virakbot — Fri, 08 May 2026 03:13:11 +0000

បន្ទាប់ពីទទួលបានជ័យជម្នះដោយលទ្ធផល ៣-២ លើក្រុមម្ចាស់ជើងឯក ព្រះខ័នរាជស្វាយរៀង ពេលនេះ បឹងកេត បានតាមទាន់ពិន្ទុ ភ្នំពេញក្រោន និង អង្គរថាយហ្គឺរ ដើម្បីប្រជែងតំណែងលេខ ២ នៃលីគបាល់ទាត់កំពូលកម្ពុជា រដូវកាលនេះ។

បឹងកេត មាន ៥០ ពិន្ទុ ស្ថិតនៅលេខ ៤ ស្ថិតក្រោម អង្គរថាយហ្គឺរ និង ភ្នំពេញក្រោន ក៏មាន ៥០ ពិន្ទុដូចគ្នា ស្ថិតនៅលេខ ២ និងលេខ ៣ ប៉ុន្តែ ភ្នំពេញក្រោន និង អង្គរថាយហ្គឺរ នៅសល់ ២ ប្រកួតក្នុងដៃ ខណៈ បឹងកេត នៅសល់តែ ១ ប្រកួតទៀតប៉ុណ្ណោះ។

នៅថ្ងៃអាទិត្យ ទី១០ ខែឧសភា នេះ ភ្នំពេញក្រោន ត្រូវប្រកួតជាមួយ ណាហ្គាវើលដ៍ ហើយ អង្គរថាយហ្គឺរ ត្រូវប្រកួតជាមួយ អឹមអូអាយ កំពង់ដេវ៉ា។ លទ្ធផលនៃការប្រកួតគូទាំងពីរ នឹងធ្វើឲ្យប្រែប្រួលចំណាត់ថ្នាក់ក្នុងតារាង។

ប្រសិនបើ ភ្នំពេញក្រោន និង អង្គរថាយហ្គឺរ ឈ្នះដូចគ្នា តារាងចំណាត់ថ្នាក់នៅដដែល ប៉ុន្តែបើ អង្គរថាយហ្គឺរ ចាញ់ ហើយភ្នំពេញក្រោន ឈ្នះគឺជាអ្នកឡើងទៅលេខ ២ វិញ។ បច្ចុប្បន្ន ភ្នំពេញក្រោន មិនសូវល្អប្រសើរឡើយឡើយដោយចាញ់ច្រើនជាងឈ្នះ។ ៥ ប្រកួតចុងក្រោយ ពួកគេរកបាន ៣ ពិន្ទុប៉ុណ្ណោះ គឺ ឈ្នះ ១ និងចាញ់ ៤ ខណៈ ណាហ្គាវើលដ៍ ឈ្នះ ១ ស្មើ ១ និងចាញ់ ៣ សម្រាប់ ៥ ប្រកួតចុងក្រោយ។

ជួបគ្នា ៣ លើកកន្លងមក នៅក្នុងរដូវកាលនេះ ភ្នំពេញក្រោន ឈ្នះ ២ លើក ខណៈ ណាហ្គាវើលដ៍ ឈ្នះ ១ លើក។ ជុំទី១ ភ្នំពេញក្រោន បានឈ្នះ ១-០ ក្នុងជើងទី១ និងបន្តឈ្នះ ២-១ ក្នុងជើងទី២។ វគ្គ Top 6 ជើងទី១ ណាហ្គាវើលដ៍ ឈ្នះ ១-០ នៅទឹកដីរបស់ខ្លួន ហើយជើងទី២ ត្រូវទៅលេងទឹកដី ភ្នំពេញក្រោន វេលាម៉ោង ៦ ល្ងាច ថ្ងៃអាទិត្យ ទី១០ ខែឧសភានេះ។

អង្គរថាយហ្គឺរ ដែលឡើងមកកាន់លេខ ២ មិនត្រូវបានសហព័ន្ធកីឡាបាល់ទាត់អាស៊ី ទទួលស្គាល់ក្នុងនាមក្លិបបំពេញលក្ខខណ្ឌគ្រប់គ្រាន់ដើម្បីទទួលបានអាជ្ញាប័ណ្ណក្លិបចូលរួមប្រកួតពានអាស៊ីឡើយ ដូច្នេះទោះបីជាពួកគេទទួលបានចំណាត់ថ្នាក់លេខ ២ ក្នុងលីគ ក៏ទំនងជាមិនអាចបានប្រកួតពានអន្តរជាតិដែរ។ ដូច្នេះមានតែ ភ្នំពេញក្រោន និង បឹងកេត ដែលត្រូវប្រជែងគ្នាដណ្តើមកន្លះកៅពានអាស៊ី AFC Champions League Two៕

អត្ថបទ៖ វិរបុត្រ

The post បឹងកេត តាមស្មើពិន្ទុ អង្គរថាយហ្គឺរ ខណៈ ភ្នំពេញក្រោន ធ្លាក់មកលេខ ៣ ក្នុងតារាងពិន្ទុ appeared first on Kampuchea Thmey Daily.

ខេមបូឌានលីគ (Cambodian Premier League) Archives - Kampuchea Thmey Daily

លីគកំពូល កម្ពុជា ឈរលេខ ៦ ក្នុងបញ្ជីលីគមានតម្លៃថ្លៃបំផុតប្រចាំតំបន់ អាស៊ាន ឆ្នាំ ២០២៦

Breaking News! Cristian នឹងចាក​ចេញពី ព្រះ​ខ័ន​រាជ​ស្វាយរៀង ​ចុងរដូវ​កាល​នេះ

ក្រោយឈ្នះជើងឯកលីគ សុផល ឌីម៉ង់ ប្តេជ្ញាប្រឹងបន្ថែមទៀត ដើម្បីប្រជែងកៅអី ១១នាក់រដូវកាលក្រោយ

ក្រុម​ហ៊ុន វឌ្ឍនៈ ចូល​រួមអបអរសាទរ​ ព្រះ​ខ័ន​រាជ​ស្វាយរៀង សម្រាប់​ការបង្កើត​កំណត់​ត្រា​ថ្មី

វីរះ ដារ៉ា ប្រាប់​ កយ សាលីម សក្តិសមឈ្នះស្រោមដៃមាសជាងខ្លួន

មក​ដឹង​លំអិត​ពី​​ម្ចាស់​ពាន​ទាំង​អស់​ លីគ​កំពូល​កម្ពុជា រដូវ​កាល ២០២៥-២៦

បឹងកេត អស់ឱកាសលេខ ២ ខណៈ ភ្នំពេញក្រោន និង អង្គរថាយហ្គឺរ ត្រូវប្រជែងគ្នាដល់ប្រកួតចុងក្រោយ

បឹងកេត តាម​ស្មើ​ពិន្ទុ អង្គរថាយហ្គឺរ ខណៈ ភ្នំពេញក្រោន ធ្លាក់​មក​លេខ ៣ ក្នុង​តារាង​ពិន្ទុ

Breaking News! Cristian នឹងចាកចេញពី ព្រះខ័នរាជស្វាយរៀង ចុងរដូវកាលនេះ

ក្រុមហ៊ុន វឌ្ឍនៈ ចូលរួមអបអរសាទរ ព្រះខ័នរាជស្វាយរៀង សម្រាប់ការបង្កើតកំណត់ត្រាថ្មី

វីរះ ដារ៉ា ប្រាប់ កយ សាលីម សក្តិសមឈ្នះស្រោមដៃមាសជាងខ្លួន

មកដឹងលំអិតពីម្ចាស់ពានទាំងអស់ លីគកំពូលកម្ពុជា រដូវកាល ២០២៥-២៦

បឹងកេត តាមស្មើពិន្ទុ អង្គរថាយហ្គឺរ ខណៈ ភ្នំពេញក្រោន ធ្លាក់មកលេខ ៣ ក្នុងតារាងពិន្ទុ