សូមបញ្ជាក់ថា ហេតុការណ៍នេះបានកើតឡើង កាលពីវេលាម៉ោង ៦:៥៥នាទីល្ងាច ថ្ងៃទី២ ខែកក្កដា ឆ្នាំ២០២៦ លើកំណាត់ផ្លូវជាតិលេខ៦៨ ចន្លោះបង្គោលគីឡូម៉ែត្រលេខ៣១-៣២ ស្ថិតក្នុងភូមិជ្រោយនាងងួន ឃុំជ្រោយនាងងួន ស្រុកស្រីស្នំ។

តាមសមត្ថកិច្ចឧបទ្ទវហេតុនេះកើតឡើងរវាងម៉ូតូ Honda Dream C125 បើកបរដោយក្មេងស្រីអាយុ១៤ឆ្នាំ និងមានសិស្សស្រីអាយុ១៣ឆ្នាំជិះរួមដំណើរ ជាមួយគោយន្តកន្ត្រៃម៉ាកគូបូតា ដែលបើកបរដោយលោក ជន់ ជួន អាយុ៣១ឆ្នាំ ជាមន្ត្រីយោធា។ ក្នុងនោះបណ្តាលឱ្យសិស្សស្រីទាំង២នាក់រងរបួសធ្ងន់ និងត្រូវបានបញ្ជូនទៅសង្គ្រោះនៅមន្ទីរពេទ្យកុមារអង្គរ។ ចំណែកអ្នកបើកបរគោយន្ត និងកុមារអាយុ៨ឆ្នាំដែលរួមដំណើរ មិនរងរបួសឡើយ បណ្ដាលឲ្យម៉ូតូខូចខាតធ្ងន់ ខណៈគោយន្តខូចខាតស្រាល។

សមត្ថកិច្ចបញ្ជាក់ថា ការសន្និដ្ឋានជាបឋមបង្ហាញថា អ្នកបើកបរម៉ូតូបើកក្នុងល្បឿនលឿន ខណៈគោយន្តបានឈប់នៅលើចិញ្ចើមផ្លូវដោយគ្មានភ្លើងបំភ្លឺ។

ក្រោយការស៊ើបអង្កេត សាលាដំបូងខេត្តសៀមរាប បានចេញដីកាចុះថ្ងៃទី៥ ខែកក្កដា ឆ្នាំ២០២៦ សម្រេចឃុំខ្លួនលោក ជន់ ជួន ជាបណ្តោះអាសន្ន ពីបទ «បើកបរដោយធ្វេសប្រហេស ខ្ជីខ្ជាមិនប្រុងប្រយ័ត្ន ឬមិនគោរពកាតព្វកិច្ច បណ្តាលឱ្យរបួសដល់អ្នកដទៃ»។

សមត្ថកិច្ចអះអាងថា ករណីនេះត្រូវបានអនុវត្តនីតិវិធីដោយតម្លាភាព និងយុត្តិធម៌ចំពោះភាគីទាំងសងខាង ដោយបានរាយការណ៍ទៅថ្នាក់ដឹកនាំ និងព្រះរាជអាជ្ញាអមសាលាដំបូងខេត្ត មុនសម្រេចឃាត់ខ្លួនជនពាក់ព័ន្ធ បញ្ជូនទៅតុលាការតាមនីតិវិធី។

បន្ទាប់ពីមានការឃុំខ្លួន ករណីនេះបានផ្ទុះការពិភាក្សានៅលើបណ្ដាញសង្គម។ ក្នុងនោះ ស្នងការរងនគរបាលខេត្តសៀមរាបមួយរូប បានសរសេរលើគណនីហ្វេសប៊ុកផ្ទាល់ខ្លួនថា៖ «ខ្ញុំក៏គោរពស្រឡាញ់វីរៈកងទ័ពដែរ តែខ្ញុំប្រឹងជួយអស់លទ្ធភាពហើយ»។

លោក ប្រាក់ សោភ័ណ អភិបាលខេត្តសៀមរាប

ជាការឆ្លើយតប លោក ប្រាក់ សោភ័ណ អភិបាលខេត្តសៀមរាប បានបញ្ចេញមតិថា៖ «ពួកអូនបានធ្វើល្អហើយ ដំណោះស្រាយនៅមាន កុំតូចចិត្តអី បងកំពុងរកវិធីសម្របសម្រួលជួយហើយ»។

គិតត្រឹមថ្ងៃទី៩ ខែកក្កដា ឆ្នាំ២០២៦ មន្ត្រីយោធារូបនេះនៅតែស្ថិតក្រោមការឃុំខ្លួនបណ្តោះអាសន្ន ក្នុងពន្ធនាគារខេត្តសៀមរាប ដើម្បីរង់ចាំការបន្តនីតិវិធី និងដំណោះស្រាយតាមផ្លូវច្បាប់រវាងភាគីពាក់ព័ន្ធ៕ អត្ថបទ៖កុសល

The post រឿងកងទ័ពជាប់ឃុំព្រោះគ្រោះថ្នាក់ចរាចរណ៍នៅស្រីស្នំ៖ អភិបាលខេត្តសៀមរាប បញ្ជាក់ថា កំពុងសម្របសម្រួលដោះស្រាយ appeared first on Kampuchea Thmey Daily.

តាមប្រភពព័ត៌មានពីពលរដ្ឋបានអោយដឹងថា មុនពេលកើតហេតុ គេឃើញយុវជនរងគ្រោះជិះម៉ូតូម៉ាក ហុងដាឌ្រីមសេ១២៥ ពណ៌ខ្មៅ ពាក់ស្លាកលេខ កណ្តាល 1AG-7559 បើកបរតាមបណ្តោយមហាវិថីម៉ៅសេទុង ទិសដៅពីត្បូងទៅជើង ក្នុងល្បឿនលឿន លុះមកដល់ចំណុចក្រោមស្តុបទេពផន ក៏មានរថយន្តកុងតីន័រមួយគ្រឿង បានបត់ឆ្វេង។ ភ្លាមៗនោះ បានជ្រុលទៅបុកពីខាងមុខរថយន្តកុងតឺន័រពេញទំហឹង បណ្តាលអោយយុវជនជាអ្នកដឹកជញ្ជូន បោកក្បាលស្លាប់ភ្លាមៗ នៅក្រោមស្តុបទេពផន តែម្តង។

ក្រោយកើតហេតុ សមត្ថកិច្ចជំនាញចរាចរណ៍ នៃស្នងការដ្ឋាននគរបាលរាជធានីភ្នំពេញ ចុះមកធ្វើការវាស់វែង និងយករថយន្ត និងម៉ូតូ ទៅរក្សាទុក រងចាំដោះស្រាយតាមនីតិវិធីច្បាប់ នៅពេលក្រោយ ។ ចំណែកសព ត្រូវបានប្រគល់ជូនក្រុមគ្រួសារដើម្បីយកទៅធ្វើបុណ្យតាមប្រណៃណី៕ អត្ថបទ ៖ រដ្ឋា

The post អ្នកដឹកជញ្ជូនម្នាក់ ជិះលឿនជ្រុលបុកពីមុខរថយន្តកុងតឺន័រ ពេញទំហឹង បោកក្បាលស្លាប់យ៉ាងអនោចអធម៍ appeared first on Kampuchea Thmey Daily.

ហេតុការណ៍នេះបានកេីតឡើងកាលពីវេលាម៉ោង ៩និង៣០នាទីយប់ ថ្ងៃទី៦ ខែកក្កដា ឆ្នាំ២០២៦ ស្ថិត នៅតាមបណ្ដោយផ្លូវជាតិលេខ៤ ភូមិព្រៃស្វាយ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។

ជនរងគ្រោះម្នាក់ក្នុងចំណោម៤នាក់ មានឈ្មោះ បូ វ៉ាយ ភេទប្រុស អាយុ៣៤ឆ្នាំ រងរបួសបាក់ភ្លៅខាងឆ្វេង មានទីលំនៅភូមិតាងួន សង្កាត់កំបូល ខណ្ឌកំបូល រាជធានីភ្នំពេញ។

តាមប្រភពព័ត៌មានបានឲ្យដឹងថា មុនពេលកេីតហេតុគេបានឃេីញរ៉ឺម៉កជាងម៉ាស៊ីនត្រជាក់មួយគ្រឿង រ៉ឺម៉កសម្រាប់ដឹកអីវ៉ាន់លក់ដូរមួយគ្រឿង រួមជាមួយម៉ូតូ២គ្រឿងទៀតកំពុងធ្វេីដំណេីរតាមបណ្តោយផ្លូវជាតិលេខ៤ ក្នុងទិសដៅពីកេីតទៅលិច លុះមកដល់ចំណុចកេីហេតុស្រាប់តែមានបុរសម្នាក់ បេីករថយន្តមួយគ្រឿងម៉ាក TOYOTA PRIUS ពាក់ផ្លាកលេខ ភ្នំពេញ 2BP-9352 បេីកក្នុងល្បឿន លឿនរ៉េចង្កូតបញ្ច្រាសទិសដៅចរាចរណ៍ ជ្រុលទៅបុករះទាំងរ៉ឺម៉ក និងម៉ូតូបណ្តាលឲ្យមានមនុស្ស ៥នាក់ រងរបួសធ្ងន់ស្រាលក្នុងនោះមានម្នាក់របួសធ្ងន់ ត្រូវបានរថយន្តសង្គ្រោះរបស់អង្គភាព៧១១ កងពលតូចលេខ៧០ ដឹកបញ្ជូនទៅមន្ទីពេទ្យព្រះកុសុមះ។

ក្រោយកេីតហេតុ កម្លាំងសមត្ថកិច្ចជំនាញមូលដ្ឋានខណ្ឌបានចុះមកដល់ទីតាំងខាងលេី និងបានរាយការណ៍ទៅកាន់សមត្ថកិច្ចជំនាញផ្នែកការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំេពញ ដេីម្បីចុះមកធ្វេីការវាស់វែងយករថយន្តខាងលេីទៅរក្សាទុក ដេីម្បីរង់ចាំដោះស្រាយគ្នានៅពេលក្រោយ៕

អត្ថបទ៖ សុខា

The post រថយន្ដ PRIUS បុករះរ៉ឺម៉ក និងម៉ូតូ៤គ្រឿង បណ្ដាលឲ្យមានអ្នករងរបួសធ្ងន់ស្រាល៥នាក់ appeared first on Kampuchea Thmey Daily.

ហេតុការណ៍នេះបង្កការភ្ញាក់ផ្អើលកាលពីវេលាម៉ោង ៨ និង ៣០ នាទីយប់ ថ្ងៃទី ៥ ខែកក្កដា ឆ្នាំ ២០២៦ លើបណ្តោយផ្លូវ ឌួង ងៀប សង្កាត់ស្ទឹងមានជ័យទី ៣ ខណ្ឌមានជ័យ រាជធានីភ្នំពេញ។

តាមប្រភពបានបញ្ជាក់ថា មុនពេលកើតហេតុ គេឃើញប្តីប្រពន្ធ ១ គូ ជិះម៉ូតូម៉ាក ហុងដា វ៉េវ ពាក់ស្លាកលេខ ព្រៃវែង 1P-3775 ឌុបគ្នា បើកបរលើបណ្តោយផ្លូវ ឌួង ងៀប ទើបតែចេញពីផ្ទះបងប្អូន។ លុះមកដល់ចំណុចកើតហេតុ ក៏មានម៉ូតូ ១ គ្រឿងទៀត ជិះលឿន ទាក់ប្រពន្ធគាត់ បណ្តាលឲ្យធ្លាក់ពីលើម៉ូតូ។ ភ្លាមៗ បុរសជាប្តី មិនបានដឹងថា ប្រពន្ធធ្លាក់ពីលើម៉ូតូនោះឡើយ។ ទាល់តែជិះរាងឆ្ងាយបន្តិច គាត់បានមើលកញ្ចក់ក្រោយ បែរជាមិនឃើញប្រពន្ធ រួចក៏ជិះម៉ូតូបត់ត្រឡប់ក្រោយវិញ ទើបដឹងថា ប្រពន្ធរបស់ខ្លួនដេកស្លាប់នៅកន្លែងកើតហេតុ។

បច្ចុប្បន្ន សព ត្រូវបានប្រគល់ជូនបុរសជាប្តីយកទៅធ្វើបុណ្យតាមប្រពៃណីនៅឯខេត្តស្វាយរៀង៕
អត្ថបទ ៖ រដ្ឋា

The post ជិះម៉ូតូឌុបគ្នាត្រឡប់ពីផ្ទះបងប្អូន ត្រូវម៉ូតូ ១ គ្រឿង បើកទាក់ ធ្លាក់ប្រពន្ធផ្ងារក្រោយ បោកក្បាលស្លាប់ appeared first on Kampuchea Thmey Daily.

លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍នៅព្រឹកថ្ងៃទី៤កក្កដានេះថា នៅឆមាសទី ១ ឆ្នាំ ២០២៦នេះ មានករណីកម្មករនិយោជិកជួបករណីគ្រោះថ្នាក់ចរាចរណ៍នៅទូទាំងប្រទេសមានចំនួន ៣ ៤១១ករណីដោយមានជនរងគ្រោះសរុបចំនួន ៣ ៨៤៧នាក់ (ស្រី ២ ៥៧៣នាក់) ស្លាប់ចំនួន៦៣នាក់ របួសធ្ងន់ចំនួន ៩៧៨នាក់ និងរបួសស្រាលចំនួន ២ ៨០៦នាក់។

លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស និងជាអ្នកនាំពាក្យក្រសួងការងារ

លោកបណ្ឌិតបានបញ្ជាក់ថាវក្នុងចំណោមគ្រោះថ្នាក់ចរាចរណ៍ខាងលើ ក្នុងនោះករណីគ្រោះថ្នាក់ចរាចរណ៍លើរថយន្តដឹកកម្មករនិយោជិត មានចំនួន ១០ករណីដោយមានជនរងគ្រោះសរុបចំនួន ២២៧នាក់ (ស្រី១៨៥នាក់) ស្លាប់ចំនួន ១៤នាក់ របួសធ្ងន់ចំនួន ៣៤នាក់ និងរបួសស្រាលចំនួន ១៧៩នាក់។

លោកបណ្ឌិតបានបន្តថា ចំនួននេះបើធៀបទៅនឹងរយៈពេល៦ខែដូចគ្នាឆ្នាំ២០២៥ កន្លងទៅឃើញថាមានការកើនឡើងតែចំនួនអ្នកស្លាប់ថយចុះ ដោយ៦ខែឆ្នាំមុនមានករណីគ្រោះថ្នាក់ចរាចរណ៍កើតឡើងលើកម្មករ-និយោជិតចំនួន ២ ៣០៩ ករណី ជនរងគ្រោះសរុប ២៩៧៧ នាក់ ស្រី ១៦៩១ នាក់ ក្នុងនោះ ស្លាប់ ៩០ នាក់ រងរបួសធ្ងន់ ៩១២ នាក់ និងរងរបួសស្រាល ១៩៧៥ នាក់។ក្នុងចំណោមករណីគ្រោះថ្នាក់លើរថយន្តដឹកទំនិញគ្រោះថ្នាក់ចំនួន ៤ ករណី ជនរងគ្រោះសរុប ៩៤នាក់ ស្រី៨៦នាក់ ក្នុងនោះ ស្លាប់១នាក់ រងរបួសធ្ងន់ ១១នាក់ និងរងរបួសស្រាល ៨២នាក់។

លោកបណ្ឌិត បានបន្តទៀតថា មានកត្តាសំខាន់មួយចំនួនដែលជំរុញឱ្យមានករណីគ្រោះថ្នាក់ចរាចរណ៍កើតឡើង ក្នុងនោះ រួមមាន បើកបរលើសល្បឿនកំណត់ មិនប្រកាន់ស្តាំ (បញ្ច្រាសទិស) កត្តាមិនគោរពសិទ្ធិអាទិភាព ការបត់មិនត្រឹមត្រូវ និងកត្តាយានយន្ត។

លោកបណ្ឌិត បានធ្វើការអំពាវនាវដល់កម្មករ-និយោជិត ទាំងអស់ មេត្តាបង្កើនការប្រុងប្រយ័ត្នឱ្យបានខ្ពស់ក្នុងការធ្វើដំណើរ ទាំងអ្នកធ្វើដំណើរដោយម៉ូតូ និងទាំងអ្នកធ្វើដំណើរដោយរថយន្តដឹកកម្មករ-និយោជិត ត្រូវគោរពច្បាប់ស្ដីពីចរាចរណ៍ផ្លូវគោក ដើម្បីចៀសវាងករណីគ្រោះថ្នាក់ជាយថាហេតុ និងក្រើនរំលឹកទៅកាន់អ្នកបើកបររថយន្តដឹកកម្មករ-និយោជិត ទាំងអស់ ត្រូវមានស្មារតីទទួលខុសត្រូវខ្ពស់ និងយកចិត្តទុកដាក់រាល់ពេលបើកបរផងដែរ

ដើម្បីកាត់បន្ថយការរងហានិភ័យដោយសារគ្រោះថ្នាក់ចរាចរណ៍ នៅលើដងផ្លូវសម្រាប់កម្មករ-និយោជិតនេះ លោកបណ្ឌិត ហេង សុផាន់ណារិទ្ធបានបញ្ជាក់ថា បេឡាជាតិសន្តិសុខសង្គមបាននិងកំពុង បន្តចុះអប់រំផ្សព្វផ្សាយច្បាប់ស្ដីពីចរាចរណ៍ផ្លូវគោកដល់អ្នកបើកបរយានយន្តដឹកកម្មករ និងកម្មករ-និយោជិត ជាពិសេសកម្មករ-និយោជិត ដែលធ្វើដំណើរតាមម៉ូតូ ជំរុញឱ្យពាក់មួកសុវត្ថិភាពឱ្យបានគ្រប់ៗ គ្នា។ ចុះអង្កេតសិក្សាស្រាវជ្រាវរកមូលហេតុចម្បងដែលបណ្តាលឱ្យកើតមានគ្រោះថ្នាក់ចរាចរណ៍មកលើកម្មករ-និយោជិត ឱ្យបានច្បាស់លាស់។

រៀបចំបទបង្ហាញជាមេរៀន វីដេអូណែនាំ ស្ពត និងជាសារសំឡេងសម្រាប់អប់រំផ្សព្វផ្សាយនៅតាមបណ្តារោងចក្រ សហគ្រាស គ្រឹះស្ថាន និងតាមរយៈបណ្ដាញសង្គមនានា ដល់អ្នកបើកបរយានយន្តដឹកកម្មករ និង កម្មករ-និយោជិត ជាពិសេសកម្មករ-និយោជិត ដែលប្រើប្រាស់ម៉ូតូ កង់ និង ថ្មើរជើង ឱ្យបានយល់ដឹងច្បាស់ពីច្បាប់ និងសុវត្ថិភាពចរាចរណ៍ផ្លូវគោកនិងជំរុញរថយន្តប្រភេទដឹកទំនិញ និងម៉ូតូសណ្តោងរ៉ឺម៉កដែលដឹកកម្មករ-និយោជិត ប្តូរមកប្រើប្រាស់រថយន្តប្រភេទដឹកអ្នកដំណើរ និងជំរុញរថយន្តប្រភេទដឹកទំនិញដែលដឹកកម្មករ-និយោជិត ឈរ ឱ្យផ្លាស់ប្ដូរមកជារថយន្តប្រភេទដឹកអ្នកដំណើរ ឬ កែច្នៃឱ្យមានកៅអីអង្គុយ៕អត្ថបទ ៖ សំអឿន

The post ៦ខែឆ្នាំ២០២៦ កម្មករនិយោជិតជាង ៣,៨០០នាក់ ស្លាប់និងរបួសដោយជួបគ្រោះថ្នាក់ចរាចរណ៍ កើនឡើងជាងឆ្នាំមុន appeared first on Kampuchea Thmey Daily.

ជនរងគ្រោះ មានឈ្មោះខុន នីម ភេទប្រុស អាយុ៤២ឆ្នាំ រងរបួសបែកជញ្ជើមផុសឆ្អឹង បែកមាត់ និងរយ:សាច់ប្រដាប់ភេទ មានទីលំនៅ នៅភូមិត្រពាំងរាំងចាស់ សង្កាត់ឃ្មួញ ខណ្ឌសែនសុខ រាជធានីភ្នំពេញ។

បើតាមប្រភពព័ត៌មានបានឲ្យដឹងថា មុនពេលកើតហេតុគេ បានឃើញបុរសម្នាក់បើកកង់បីឥណ្ឌា ពាក់ស្លាកលេខ តាកែវ 1T-2866  ធ្វើដំណើរតាមបណ្តោយផ្លូវមហាវិមានឈ្នះ ឈ្នះ ក្នុងទិសដៅពីលិចទៅកើតក្នុងល្បឿនលឿនលុះមកដល់ចំណុចកើតហេតុ ជ្រុលទៅបុកជាមួយរថយន្តមិនចាំម៉ាកមួយគ្រឿង ដែលធ្វើដំណើរនៅខាងមុខចាប់ហ្វ្រាំងមិនជាប់ក៏ជ្រុលបុកពីក្រោយពេញទំហឹង បណ្តាលឲ្យគៀបតៃកុងកង់បីរងរបួសធ្ងន់ ចំណែករថយន្តបន្តដំណើរទៅបាត់។

ក្រោយកើតហេតុជនរងគ្រោះ ត្រូវបានកងប្រតិបត្តិការរុករកនិងសង្រ្គោះគ្រោះមហន្តរាយ៧១១ កងពលតូចលេខ៧០ បានចេញជួយសង្រ្គោះកាត់ដែកយកចេញ និងបញ្ជូនទៅព្យាបាលនៅមន្ទីរពេទ្យព្រះកុសុម:៕ដោយ៖សុខា

The post បើកកង់បីឥណ្ឌាលឿនជ្រុល បុករថយន្តនៅខាងមុខបណ្តាលឲ្យគៀបតៃកុងជាប់រងរបួសធ្ងន់ appeared first on Kampuchea Thmey Daily.

គ្រោះថ្នាក់ចរាចរណ៍នេះបង្កការភ្ញាក់ផ្អើលកាលពីវេលាម៉ោង ៨ ព្រឹក ថ្ងៃទី ១៩ ខែមិថុនា ឆ្នាំ ២០២៦ នេះ ស្ថិតនៅតាមបណ្តោយផ្លូវអូស៊ីអាយស៊ី សង្កាត់ព្រែកលាប ខណ្ឌជ្រោយចង្វារ រាជធានីភ្នំពេញ។

តាមប្រភពពីប្រជាពលរដ្ឋ បានឲ្យដឹងថា មុនកើតហេតុ គេឃើញម៉ូតូ ១ គ្រឿង ម៉ាក Zoomer x ពាក់ស្លាកលេខ ភ្នំពេញ 1GK-1159 ទិសដៅពីកើតទៅលិច បើកបរដោយយុវជនម្នាក់។ លុះពេលមកដល់ចំណុចផ្លូវបំបែកជាបួន ម៉ូតូខាងលើបានបត់ឆ្វេង គោលបំណងដើម្បីឆ្លងទៅផ្លូវមួយចំហៀងទៀត។ ភ្លាមៗ ក៏ស្រាប់តែមានរថយន្ត ១ គ្រឿង ម៉ាកឡង់គ្រឺស័រ ពណ៌ខ្មៅ ពាក់ស្លាកលេខ CD47 2-002 ធ្វើដំណើរក្នុងល្បឿនលឿន ទិសដៅពីលិចទៅកើត ខណៈមកដល់ចំណុចកើតហេតុ បានជ្រុលទៅបុកម៉ូតូយ៉ាងពេញទំហឹងប្លោងជាច្រើនម៉ែត្រ។ រីឯរថយន្តបានបន្តបុកខឿនពុះចែកទ្រូងផ្លូវ ក្រឡាប់ផ្ងារជើង។ ចំណែកយុវជនដែលជិះម៉ូតូរងរបួសធ្ងន់ ត្រូវបានបញ្ជូនទៅកាន់មន្ទីរពេទ្យ។ ភ្លាមៗ ប្រជាពលរដ្ឋបានធ្វើការឃាត់បុរសជាម្ចាស់រថយន្តនៅទីតាំងខាងលើ ដើម្បីរង់ចាំប្រគល់ ឲ្យសមត្ថកិច្ចផងដែរ។

ក្រោយកើតហេតុ សមត្ថកិច្ចមូលដ្ឋាន បានទំនាក់ទំនងទៅកាន់ការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីវាស់វែងយករថយន្ត និង ម៉ូតូ ទៅរក្សាទុក រង់ចាំដោះស្រាយពេលក្រោយ៕
អត្ថបទ ៖ រដ្ឋា

The post រថយន្ត ១ គ្រឿង ក្រឡាប់ផ្ងារជើង ក្រោយបើកលឿនជ្រុលបុកម៉ូតូ របួសធ្ងន់ម្នាក់ appeared first on Kampuchea Thmey Daily.

ក្នុងពិធីប្រារព្ធទិវាសប្តាហ៍ជាតិសុវត្ថិភាពចរាចរណ៍ផ្លូវគោកលើកទី១៧ ដែលរៀបចំធ្វើឡើងនៅក្នុងក្រុងកំពត ខេត្តកំពត កាលពីថ្ងៃទី១៥មិថុនា លោក ស សុខា បានលើកឡើងថា ទោះបីក្រសួងមហាផ្ទៃបានផ្អាកការផាកពិន័យការល្មើសច្បាប់ចរាចរណ៍ជាបណ្តោះអាសន្ន និងជំនួសដោយការអប់រំណែនាំក៏ដោយ ប៉ុន្តែវិធានការសំខាន់ៗមួយចំនួននៅតែបន្តអនុវត្ត ដូចជាការត្រួតពិនិត្យជាតិអាល់កុល និងអាវុធជាតិផ្ទុះជាដើម។

រដ្ឋមន្ត្រីក្រសួងមហាផ្ទៃបញ្ជាក់ថា ការកើនឡើងនៃគ្រោះថ្នាក់ចរាចរណ៍នាពេលថ្មីៗនេះ គឺជាសញ្ញាបង្ហាញថា អ្នកប្រើប្រាស់ផ្លូវទាំងអស់ត្រូវបង្កើនការប្រុងប្រយ័ត្ន និងចូលរួមអនុវត្តច្បាប់ចរាចរណ៍ឱ្យបានម៉ឺងម៉ាត់ ដើម្បីការពារសុវត្ថិភាពខ្លួនឯង ក្រុមគ្រួសារ និងសង្គមជាតិទាំងមូល។

ប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោករូបនេះ បានអំពាវនាវដល់ប្រជាពលរដ្ឋ និងក្រុមហ៊ុនដឹកជញ្ជូនទាំងអស់ ឱ្យប្រកាន់ខ្ជាប់នូវវិធានការសុវត្ថិភាពសំខាន់ៗ រួមមាន មិនបើកបរលើសល្បឿនកំណត់ មិនបើកបរក្រោមឥទ្ធិពលគ្រឿងស្រវឹង ឬគ្រឿងញៀន ពាក់មួកសុវត្ថិភាព ពាក់ខ្សែក្រវាត់សុវត្ថិភាព និងត្រួតពិនិត្យលក្ខណៈបច្ចេកទេសយានយន្តជាប្រចាំ។

លោក ស សុខា ក៏បានជំរុញឱ្យអ្នកចូលរួមទាំងអស់បន្តផ្សព្វផ្សាយសារសុវត្ថិភាពចរាចរណ៍ទៅកាន់ក្រុមគ្រួសារ សាច់ញាតិ និងមិត្តភក្តិ ដើម្បីរួមចំណែកកែប្រែឥរិយាបថអ្នកប្រើប្រាស់ផ្លូវ និងលើកកម្ពស់វប្បធម៌គោរពច្បាប់ចរាចរណ៍នៅក្នុងសង្គម។

សូមបញ្ជាក់ថា ទិវាសប្តាហ៍ជាតិសុវត្ថិភាពចរាចរណ៍ផ្លូវគោកលើកទី១៧ ត្រូវបានរៀបចំឡើងដោយគណៈកម្មាធិការជាតិសុវត្ថិភាពចរាចរណ៍ផ្លូវគោក សហការជាមួយអនុគណៈកម្មការសុវត្ថិភាពចរាចរណ៍ផ្លូវគោកខេត្តកំពត ដោយមានការចូលរួមពីថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ សិស្សានុសិស្ស យុវជន និងប្រជាពលរដ្ឋប្រមាណ ១,៥០០នាក់៕

អត្ថបទ៖ សឹង រ៉ាត់

The post រដ្ឋមន្ត្រីក្រសួងមហាផ្ទៃជំរុញអ្នកប្រើប្រាស់យានយន្តគោរពច្បាប់ចរាចរណ៍ដើម្បីកាត់បន្ថយគ្រោះថ្នាក់ appeared first on Kampuchea Thmey Daily.