ចិញ្ចឹមកូន Archives - Kampuchea Thmey Daily

ស្គាល់ទេពកោសល្យកូន អាចទាយដឹងខ្លះៗពីអាជីពរបស់ពួកគេនៅអនាគត

Sonya — Sun, 17 Apr 2022 08:10:46 +0000

កុមារទាំងអស់សុទ្ធតែមានទេពកោសល្យផ្ទាល់ខ្លួន និងខុសៗគ្នា។ ការដឹងពីទេពកោសល្យរបស់កូនៗអាចជួយម៉ាក់ប៉ាដឹងពីសមត្ថភាព និងអាចជួយអាអូនជោគជ័យក្នុងអាជីពអនាគត។ តើក្មេងៗមានទេពកោសល្យពីកំណើតអ្វីខ្លះ? ហើយអាជីពណាខ្លះត្រូវនឹងទេពកោសល្យអាអូន?

កុមារម្នាក់ៗអាចមានទេពកោសល្យ ឬភាពវៃឆ្លាតពីកំណើតមួយឬច្រើនក្នុងចំណោមប្រាំបួននេះ៖

១. ទេពកោសល្យខាងអក្សរ

អាអូនដែលមានទេពកោសល្យខាងអក្សរចេះពាក្យច្រើន ចូលចិត្តការអាន ភាសា ពាក្យជួន ពាក្យបណ្តៅ និងការសិក្សាសង្គមជាងគណិតវិទ្យា ឬវិទ្យាសាស្ត្រ រៀនភាសាបរទេសយ៉ាងងាយស្រួល អាចប្រកបពាក្យ និងសរសេរពាក្យពិបាកបានល្អ ហើយបញ្ចេញគំនិតបានល្អ។

អាជីពអនាគត៖ កវីនិពន្ធ អ្នកកាសែត គ្រូបង្រៀន ឬមេធាវីជាដើម។

២. ទេពកោសល្យខាងលេខ

បើកូនមានទេពកោសល្យខាងលេខតែងតែចង់ដឹង ឬចង់ឃើញពីរបៀបដែលអ្វីមួយដំណើរការ ចូលចិត្តលេខ គណិតវិទ្យា ការពិសោធន៍ កុំព្យូទ័រ ហ្គេមយុទ្ធសាស្ត្រដូចជាអុក ឬល្បែងផ្គុំរូប អាជីពថ្ងៃអនាគតអាចជាអ្នកវិទ្យាសាស្ត្រ វិស្វករ អ្នកស្រាវជ្រាវ ឬគណនេយ្យករជាដើម។

៣. ទេពកោសល្យខាងរូប

អាអូនដែលមានទេពកោសល្យខាងរូបអាចមើល និងយល់ពីគំនូសតាង ឬផែនទីបានយ៉ាងល្អ ស្រមៃញឹកញាប់ មានជំនាញក្នុងការគូរ និងសូនរូប ហើយចូលចិត្តរុះរើរបស់របរចេញពីគ្នា រួចផ្គុំចូលគ្នាវិញ អាជីពអនាគត អាចជាជាងចម្លាក់ ស្ថាបត្យករ ជាងមេកានិក ឬអ្នករចនាជាដើម។

៤. ទេពកោសល្យខាងប្រើរាងកាយ

អាអូនដែលមានទេពកោសល្យខាងប្រើរាងកាយ ពូកែខាងកីឡា ចូលចិត្តធ្វើចលនាជាជាងនៅអង្គុយស្ងៀមៗ អាចធ្វើត្រាប់តាមចលនា ឬកាយវិការរបស់អ្នកដទៃបានយ៉ាងងាយ ចូលចិត្តប៉ះវត្ថុផ្សេងៗ រីករាយនឹងសកម្មភាពដែលប្រើរាងកាយ និងអាចប្រើអវយវៈលើរាងកាយបានយ៉ាងល្អ អាជីពអនាគត អាចអ្នករបាំ អ្នកពន្លត់អគ្គីភ័យ គ្រូពេទ្យវះកាត់ តារាសម្តែង ឬអត្តពលិកជាដើម។

៥. ទេពកោសល្យខាងតន្រ្តី

កូនខ្លះមានទេព្យកោសល្យខាងតន្រ្តី ចូលចិត្តតន្រ្តី និងចំរៀង។ អាអូនអាចច្រៀងបានពិរោះ ដឹងថាពេលណាដល់ភ្លេងត្រូវច្រៀង ចូលចិត្តលេងឧបករណ៍តន្រ្តី ធ្វើចលនាតាមចង្វាក់ភ្លេង ឬហួចជាដើម អាជីពអនាគតអាចជា តន្ត្រីករ អ្នកចម្រៀង ឬអ្នកនិពន្ធជាដើម។

៦. ទេពកោសល្យខាងមនុស្ស

អាអូនដែលមានទេពកោសល្យខាងមនុស្សចូលចិត្តធ្វើការទំនាក់ទំនង ឬលេងជាមួយមិត្តភ័ក្តិ អាចដឹកនាំមិត្តភ័ក្តិ ចេះយកចិត្តទុកដាក់ ជួយមិត្តដោះស្រាយបញ្ហា និងអាចយល់ពីអារម្មណ៍ ទឹកមុខ កាយវិការ ឬទឹកសំឡេងរបស់អ្នកដទៃ អាជីពអនាគតអាចជា អ្នកប្រឹក្សា គ្រូពេទ្យ អ្នកនយោបាយ គ្រូបង្រៀន ឬអាជីវករជាដើម។

៧. ទេពកោសល្យលើខ្លួនឯង

អាអូនដែលមានទេព្យកោសល្យលើខ្លួនឯងចូលចិត្តភាពឯករាជ្យ ដឹងពីសមត្ថភាព និងចំណុចខ្សោយរបស់ខ្លួន ហើយលេង ឬរៀនបានល្អនៅពេលនៅតែម្នាក់ឯង អាចដឹកនាំខ្លួនឯង មានការគោរពខ្លួនឯងខ្ពស់ និងអាចរៀនពីកំហុស និងភាពជោគជ័យរបស់ខ្លួន អាជីពអនាគតអាចជា ទស្សនវិទូ សាស្រ្តាចារ្យ គ្រូបង្រៀន ឬអ្នកស្រាវជ្រាវជាដើម។

៨. ទេពកោសល្យខាងធម្មជាតិ

អាអូនដែលមានទេព្យកោសល្យខាងធម្មជាតិ ចូលចិត្តនិយាយអំពីសត្វចិញ្ចឹម ឬកន្លែងនៅខាងក្រៅ ចូលចិត្តធម្មជាតិ សួនសត្វ ឬលេងនៅខាងក្រៅ ហើយចាប់អារម្មណ៍លើជីវវិទ្យា ឧតុនិយម ឬតារាសាស្តជាដើម អាជីពអនាគត អាចជាអ្នកអភិរក្សសត្វ ឬព្រៃ ជីវវិទូ តារាវិទូ ឬពេទ្យសត្វជាដើម៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ សម្រាប់ម៉ាក់ៗ! តិចនិកជួយកូន កុំឲ្យនោមដាក់ខោពេលយប់

The post ស្គាល់ទេពកោសល្យកូន អាចទាយដឹងខ្លះៗពីអាជីពរបស់ពួកគេនៅអនាគត appeared first on Kampuchea Thmey Daily.

អ្វីជាការ “ចិញ្ចឹមកូនដូចខ្លា”? មានផលល្អ ឬអាក្រក់អ្វីខ្លះ លើការលូតលាស់កូន?

Sonya — Tue, 14 Dec 2021 06:14:00 +0000

ជាធម្មតា ម៉ាក់ប៉ាម្នាក់ៗតែងតែមានរបៀបផ្ទាល់ខ្លួនក្នុងការចិញ្ចឹមកូន ប៉ុន្តែមិនថាវិធីចិញ្ចឹមកូនបែបណានោះទេ គឺសុទ្ធតែចង់ឲ្យកូនលូតលាស់ប្រកបដោយសុខភាពល្អ និងចរិតសមរម្យទាំងអស់។ បើនិយាយពីការចិញ្ចឹមកូន ក៏មានម៉ាក់ប៉ាមួយចំនួនមានរបៀបចិញ្ចឹមកូនដូចខ្លាដែរ។

តើអ្វីទៅជាការ “ចិញ្ចឹមកូនដូចខ្លា”?

ការចិញ្ចឹមកូនដូចខ្លា សំដៅលើវិធីសាស្ត្រដ៏តឹងរ៉ឹង និងដាច់អហង្ការក្នុងការចិញ្ចឹមកូន ចង់ឲ្យកូនទទួលបានជោគជ័យខ្ពស់ក្នុងគ្រប់ផ្នែកនៃជីវិតកូន (ពិសេសរំពឹងឲ្យកូនរៀនជាប់លេខល្អគ្រប់ពេល)។ នេះមានន័យថា មិនអនុញ្ញាតឲ្យកូនចូលរួមការជប់លៀង ឬសកម្មភាពកម្សាន្តផ្សេងទៀត ដើម្បីទុកពេលផ្ដោតលើការសិក្សារបស់ពួកគេមួយមុខគត់។

អត្ថប្រយោជន៍នៃការចិញ្ចឹមកូនដូចខ្លា

ម៉ាក់ប៉ាដែលអនុវត្តវិធីសាស្ត្រចិញ្ចឹមកូនដូចខ្លានេះ ភាគច្រើនជឿថាវិធីសាស្ត្រចិញ្ចឹមកូនដ៏តឹងរ៉ឹងផ្ដល់អត្ថប្រយោជន៍ដល់កូន ដោយអាចជួយឲ្យពួកគេទទួលបានភាពជោគជ័យនាពេលអនាគត។ លើសពីនេះ មនុស្សដែលប្រើវិធីនេះចិញ្ចឹមកូន មានអារម្មណ៍ថា តាមរយៈការកំណត់ស្តង់ដារខ្ពស់ក្នុងជីវិត ប្រៀបបាននឹងកំពុងបណ្ដុះក្រមសីលធម៌ការងារដ៏រឹងមាំដល់កូន និងលត់ដំកូនឲ្យរឹងមាំរហូតដល់ពួកគេពេញវ័យ។ កុមារដែលលូតលាស់ក្រោមការចិញ្ចឹមតាមវិធីសាស្ត្រនេះ ត្រូវបានបង្រៀនឲ្យមានការខិតខំប្រឹងប្រែងតាំងពីតូច។

ឥទ្ធិពលមិនល្អនៃការចិញ្ចឹមកូនដូចខ្លា

ដ្បិតតែការចិញ្ចឹមកូនដូចខ្លា អាចឲ្យកូនមានការខិតខំប្រឹងប្រែងខ្ពស់មែន ក៏ប៉ុន្តែមានមតិជាច្រើនរិះគន់នឹងការចិញ្ចឹមកូនបែបនេះព្រោះថាអាចប៉ះពាល់ដល់សុខភាពផ្លូវចិត្តរបស់កូន។ ក្មេងៗដែលលូតលាស់ឡើងក្រោមវិធីសាស្ត្រនេះ អាចជួបប្រទះនឹងបញ្ហាជឿជាក់លើខ្លួនឯងដោយសារតែសម្ពាធពួកគេទទួលបានពីការរំពឹងទុកដ៏ខ្ពស់របស់ម៉ាក់ប៉ា។ ម៉្យាងវិញទៀត ពួកគេក៏មានភាពភ័យខ្លាចនៅពេលមានកំហុស ឬធ្វើឲ្យម៉ាក់ប៉ាខកចិត្តផងដែរ ប្រសិនបើពួកគេគិតថាខ្លួនធ្វើអ្វីមួយមិនបានល្អតាមការគិតរបស់ម៉ាក់ប៉ា៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ ចង់ឱ្យកូនក្លាយជាក្មេងចិត្តល្អ ឪពុកម្ដាយអាចបង្រៀនវិធីទាំងនេះ

ចុចអាន៖ អ្នកជំនាញបង្ហាញក្ដីបារម្ភខ្លាំង ស្របពេលក្មេងអាយុក្រោម ២ឆ្នាំ មានទម្លាប់មើលអេក្រង់ឌីជីថលរយៈពេលយូរ

The post អ្វីជាការ “ចិញ្ចឹមកូនដូចខ្លា”? មានផលល្អ ឬអាក្រក់អ្វីខ្លះ លើការលូតលាស់កូន? appeared first on Kampuchea Thmey Daily.

ផលវិបាកប្ដីប្រពន្ធប្រញាប់យកកូន ទាំងគ្មានផែនការច្បាស់លាស់

Sonya — Fri, 12 Nov 2021 06:39:18 +0000

សម្រាប់អ្នកមានជីវភាពធូរធារការយកកូន ទោះមាន ឬគ្មានផែនការមិនចោទជាបញ្ហាសម្រាប់គ្រួសារគេឡើយ។ តែប្រសិនបើគ្នាយើងមួយចំនួនខ្វះខាត ការមានកូនដោយគ្មានរៀបគម្រោង ឬដាក់គោលដៅជាមុន អាចជាធ្វើឲ្យស្ថានភាពគ្រួសាររឹតតែដុនដាបជាងមុន ហើយដើម្បីឲ្យស្រីៗយើងដឹងពីផលលំបាកទាំងនេះ ដោយអត្ថបទនេះបានស្វែងរកអ្នកមានបទពិសោធបែបនោះ មកចែករំលែកជាចំណេះដឹង។

១- គ្មានប្រាក់បម្រុងទុក

តាមបទពិសោធ កែ សុវណ្ណី ជាអតីតបុគ្គលិកក្នុងរោងចក្រនៅ 7NG ផ្នែកគណនេយ្យ វ័យ ២១ ឆ្នាំ និងទើបតែសម្រាលកូនរួចបានឲ្យដឹងថា ក្រោយពេលរៀបការរួចនៅចុងឆ្នាំ ២០១៨ នាងក៏មានផ្ទៃពោះតែម្ដង ដោយមិនខ្វល់រឿងគម្រោងការទៅថ្ងៃអនាគតអ្វីទេ។ វណ្ណី បានបន្តថារយៈពេល ៣ ខែដំបូង នាងមានអាការៈចាញ់ខ្លាំង ញ៉ាំ គេង ធ្វើអ្វីក៏មិនបាន ក៏សម្រេចចិត្តបោះបង់ការងារ ដោយពឹងផ្អែកលើស្វាមីទាំងស្រុង ហើយពេលកូនបាន ៦- ៧ ខែតម្រូវការហូបចុក សម្ភារៈផ្សេងៗទុកឲ្យកូន និងម្ដាយកាន់តែច្រើនឡើងៗ តែហិរញ្ញវត្ថុចូលតាមច្រកតែមួយដដែល។ ដូចនេះមិនមានអ្វីសេសសល់ជាដុំកំភួនឡើយ សម្រាប់ពេលសម្រាល ហើយអ្វីដែលកាន់តែធ្ងន់ធ្ងរទៀតនោះ គឺដល់ពេលសម្រាល មិនអាចតាមធម្មជាតិបាន ដូចនេះតម្រូវឲ្យវះកាត់ ព្រោះមិនគ្មានកម្លាំងប្រឹង វិធីចុងក្រោយគឺសម្រាលតាមវះកាត់។

អ្នកម្ដាយវ័យក្មេងបានបន្ថែមថា ប្រាក់ដែលមានបន្តិចបន្តួចទុកសម្រាប់ពេទ្យ គឺមិនគ្រាន់ឡើយ ហើយរឿងកាន់តែយ៉ាប់យ៉ឺនគឺគ្មានទឹកដោះបំបៅកូន ទើបធ្វើឲ្យការចំណាយរឹតតែធ្ងន់ធ្ងរថែមទៀត។ ក្រោយពេលឆ្លងកាត់បញ្ហានេះ ស្រ្តីមេផ្ទះម្នាក់នេះ បានតាំងចិត្តថា ពេលមានកូនលើកក្រោយត្រូវតែគិតគូរជាមុនសិន ព្រោះឥឡូវ គ្មានសេសសល់អ្វីក្រៅពីកូនឡើយ ហើយពេលកូនដល់អាយុចូលរៀនក៏ប្រហែលជាមិនអាចបញ្ជូនទៅសាលាល្អៗដែរ ដោយសារតែគ្មានថវិកាគ្រប់គ្រាន់។

២- គ្មានលទ្ធភាពទិញរបស់លេងឲ្យកូន

“ខ្ញុំរាងចាលហើយរឿងយកកូនតាមចិត្តគ្មានគិតមុខក្រោយនេះ ព្រោះវាជាការធ្វើបាបកូនទៅវិញ” នេះជាការលើកឡើងរបស់អ្នកស្រី មេសា មានកូន ៣ នាក់ និងមានវ័យ ៣៣ ឆ្នាំ។ កាលពីកូនដំបូងស្ថិតក្នុងជីវភាពខ្វះខាត ព្រោះទើបឈប់រៀន ហើយរៀបការតែម្ដង ដោយជឿតាមចាស់ៗថា ការហើយយកកូនសិនទៅ ព្រោះខ្លាចពន្យារកំណើតយូរពេក ទៅជាគ្មានកូន។

អ្នកស្រុកចម្ការលើរូបនេះ បានបន្តទៀតថា ដំបូងៗពេលដឹងថាមានកូនពិតជារំភើបណាស់ តែពេលកូនកើតមក គ្មានលុយគ្រប់គ្រាន់ ទុកផ្គត់ផ្គង់កូនពេលចេះលេងនេះលេងនោះ គ្មានលុយទុកបង្ការពេលកូនមានជំងឺ និងទិញចំណីចំណុកល្អៗឲ្យកូនញ៉ាំ ដើម្បីការលូតលាស់ប្រកបដោយសុខភាពល្អ ទើបជាការស្ដាយក្រោយ ព្រោះពេលងាកទៅឃើញកូនអ្នកដទៃមានអ្វីលេង ហើយកូនយើងទារដែរ តែគ្មានលទ្ធភាពទិញឲ្យ។

ក្រោយជួបការលំបាកពេលមានកូនដំបូង អ្នកស្រុកពារាំងរូបនេះ ក៏ចេះគិតពីផែនការណ៍ជីវិត និងចេះរកស៊ី ដើម្បីទុកសន្សំកូនបន្ទាប់ៗ ព្រោះការពឹងផ្អែកលើឪពុកម្ដាយ និងប្ដី គឺមិនគ្រប់គ្រាន់ទេ ព្រោះត្រូវត្រៀមតាំងពីមុនកូនកើត កូនកើតហើយ កូនធំបន្តិច កូនចូលរៀន។

៣- សុខភាពការចិញ្ចឹម និងអប់រំកូនមិនបានល្អ

អ្នកស្រី សេថា វ័យ ៣៦ ឆ្នាំ និងជាមេផ្ទះ បានរៀបរាប់បទពិសោធខ្លួនថា៖ “ខ្ញុំមានកូន ៦ នាក់ កូនឲ្យញឹកស្អេកជាប់គ្នា ហើយបើមានកូនមួយណាឈឺវិញ គឺឈឺទាំងអស់តែម្ដង។ បើនិយាយពីមើលថែទាំវិញគឺមិនបានដិតដល់ទេ កូនខ្លះប្រឡូកប្រឡាក់ដី ខោអាវមិនបានបោកគក់យកមកស្លៀកឡើងវិញ ស៊ីចុកមានអីស៊ីហ្នឹង”។ អ្នកខេត្តកំពតរូបនេះ បានឲ្យដឹងទៀតថា គាត់ប្រកបរបបធ្វើចម្ការស្រែតិចតួច ហើយក៏មិនសូវយល់ដឹងពីវិធីពន្យារកំណើតអ្វីទេ រឹតតែមិនដឹងថាគួរគិតពីអនាគតកូនយ៉ាងម៉េច ដឹងត្រឹមខំរកទៅមានប៉ុនណាក៏ចាយប៉ុណ្ណឹងចុះ។

ងាកមកពីការបង្រៀនកូនវិញ ស្ត្រីវ័យកណ្ដាលរូបនេះថា មិនសូវមានពេលប៉ុន្មានដែរ ឲ្យតែកូនទៅរៀន ហើយការប្រដែប្រដៅវិញក៏មានតែខុសវ៉ៃៗ មិនដឹងនិយាយម៉េចជាមួយកូនៗ៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ នេះជាចំណុចល្អ និងមិនល្អ សម្រាប់ប្ដីប្រពន្ធគ្មានកូន

ចុចអាន៖ ទាំងប្រុស-ស្រីមានវិបត្តិអត់កូន អាចបណ្ដាលមកលើសអ័រម៉ូនម្យ៉ាងនេះ

The post ផលវិបាកប្ដីប្រពន្ធប្រញាប់យកកូន ទាំងគ្មានផែនការច្បាស់លាស់ appeared first on Kampuchea Thmey Daily.

ចេញសញ្ញាមួយចំនួននេះ បង្ហាញថា កូនមានជំងឺពិបាកផ្ចង់អារម្មណ៍

សាង ស្រីល័ក្ខ — Thu, 28 Oct 2021 04:50:00 +0000

ជំងឺពិបាកផ្ចង់អារម្មណ៍ កើតឡើងនៅពេលអូនតូចសកម្មជ្រុល មិនអាចរក្សាការផ្តោតអារម្មណ៍ និងមានអាកប្បកិរិយាដែលអាចធ្វើឲ្យប៉ះពាល់ដល់ការសិក្សា ទំនាក់ទំនងក្នុងគ្រួសារ និងក្នុងសង្គម។ តើជំងឺពិបាកផ្ចង់អារម្មណ៍មានអាការៈអ្វីខ្លះ?

កុមារដែលមានជំងឺពិបាកផ្ចង់អារម្មណ៍អាចបង្ហាញអាការៈមុនអាយុ ១២ឆ្នាំ តែចំពោះកុមារមួយចំនួនអាចមានអាការៈតាំងពីអាយុ ៣ឆ្នាំ។ អាការៈជំងឺអាចស្រាល មធ្យម ឬធ្ងន់ ហើយអាចបន្តរហូតដល់ពេញវ័យ។ ជំងឺនេះកើតឡើងញឹកញាប់លើក្មេងប្រុសជាងក្មេងស្រី។ ម្យ៉ាងទៀតក្មេងប្រុស ស្រី ដែលមានជំងឺពិបាកផ្ចង់អារម្មណ៍អាចមានអាកប្បកិរិយាខុសគ្នា។ ជំងឺពិបាកផ្ចង់អារម្មណ៍ចែកចេញជា ៣ ប្រភេទគឺ៖

១. មិនយកចិត្តទុកដាក់

មិនយកចិត្តទុកដាក់ចំពោះព័ត៌មានលម្អិតទេ ឬធ្វើកិច្ចការសាលាខុសច្រើន និងខ្ជីខ្ជា
មានបញ្ហាក្នុងការផ្តោតអារម្មណ៍មិនថាពេលធ្វើកិច្ចការ ឬលេង
មិនស្តាប់ ទោះបីជាយើងនិយាយជាមួយផ្ទាល់ក៏ដោយ
មានការពិបាកក្នុងការធ្វើតាមការណែនាំ ហើយមិនអាចបញ្ចប់កិច្ចការសាលា ឬការងារផ្ទះ
មានបញ្ហាក្នុងការរៀបការងារ និងសកម្មភាពផ្សេងៗ
គេចវេះ ឬមិនចូលចិត្តកិច្ចការដែលត្រូវការការគិតដូចជាកិច្ចការសាលា
បាត់សម្ភារៈដែលត្រូវការចាំបាច់សម្រាប់កិច្ចការ ឬសកម្មភាពប្រចាំថ្ងៃដូចជា តុក្កតា កិច្ចការសាលា ឬខ្មៅដៃជាដើម
ងាយបែកអារម្មណ៍
ភ្លេចធ្វើកិច្ចការប្រចាំថ្ងៃមួយចំនួនដូចជាធ្វើកិច្ចការផ្ទះ

២. សកម្មជ្រុលឬធ្វើតាមចិត្ត

នៅមិនស្ងៀម
មានការពិបាកក្នុងការអង្គុយក្នុងថ្នាក់ ឬក្នុងស្ថានភាពផ្សេងទៀត
រត់ជុំវិញ ឬឡើងទីខ្ពស់ក្នុងស្ថានភាពមិនសមស្រប
មានបញ្ហាក្នុងការលេង ឬធ្វើសកម្មភាពណាមួយដោយស្ងៀមស្ងាត់
និយាយច្រើនជ្រុល
ឆ្លើយមិនបានគិត និងរំខានដល់អ្នកសួរ
មានការលំបាកក្នុងការរង់ចាំឱ្យដល់វេនខ្លួន
រំខាន ឬជ្រៀតចូលការសន្ទនា ការលេង ឬសកម្មភាពរបស់អ្នកដទៃ

៣. ចំរុះ

កុមារដែលស្ថិតក្នុងប្រភេទនេះមានអាការៈទាំងអស់របស់ជំងឺផ្ចង់អារម្មណ៍ទាំងប្រភេទទី ១ និងទី ២។

ជំងឺពិបាកផ្ចង់អារម្មណ៍អាចត្រូវព្យាបាលដោយប្រើថ្នាំ ប្រសិនបើធ្ងន់ធ្ងរ ប៉ុន្តែជាទូទៅជំងឺនេះត្រូវបានព្យាបាលដោយកែប្រែអាកប្បកិរិយាដូចជា ការបង្កើតព្រំដែនឱ្យកុមារ ការផ្តល់ការណែនាំខ្លីៗ និងឱ្យកុមារធ្វើតាមការណែនាំឡើងវិញម្តងទៀត ព្រមទាំងកែប្រែបរិយាកាសសិក្សាដើម្បីកាត់បន្ថយការរំខានដូចជា ឱ្យកុមារអង្គុយនៅមុខ ឬជិតតុរបស់គ្រូ។ កុមារដែលមានជំងឺពិបាកផ្ចង់អារម្មណ៍ ចូលចិត្តធ្វើចលនា និងធ្វើសកម្មភាពដែលប្រើរាងកាយ ប៉ាម៉ាក់អាចលើកទឹកចិត្តឱ្យអាអូនលេងកីឡា៕

អត្ថបទផ្ដល់ដោយ៖Hello Krupet

ចុចអាន៖ហេតុអ្វីបានជាកុមារ ប្រើពាក្យអាសអាភាស នៅក្នុងប្រព័ន្ធផ្សព្វផ្សាយតាមអ៉ីនធឺណិត?

ចុចអាន៖គន្លឹះ ៥ យ៉ាង ជួយឲ្យមានកូនតាមចិត្តចង់បាន

The post ចេញសញ្ញាមួយចំនួននេះ បង្ហាញថា កូនមានជំងឺពិបាកផ្ចង់អារម្មណ៍ appeared first on Kampuchea Thmey Daily.

បណ្ដោយកូនឲ្យលេងតាមចិត្តមិនមែនរឿងអាក្រក់ទេ តែវាមានប្រយោជន៍ច្រើនសម្រាប់ក្មេង

Sonya — Fri, 01 Oct 2021 01:46:01 +0000

មានប៉ាម៉ាក់មួយចំនួនធំគិតថា ការដែលបណ្ដោយឲ្យកូនធ្វើតាមចិត្ត ដូចបង្រៀនកូនឲ្យខូចអ៊ីចឹង ព្រោះបើធ្វើដូចនេះកូននឹងលែងខ្លាចហើយ។ តែបើតាមអ្នកជំនាញ ការដែលឲ្យកូនលេងអ្វីដែលកូនចង់លេង មានប្រយោជន៍ច្រើនជាងរឹតត្បិតការសប្បាយរីករាយរបស់កូន។

បើតាមលោកស្រីវេជ្ជបណ្ឌិត កុសល កណិការ ឯកទេសជំងឺកុមារ ម៉ាកប៉ាមិនគួរយល់ច្រឡំរវាងការលេងដោយសេរីជាមួយនឹងការដែលមានការបង្ហាត់បង្ហាញ។ ក្មេងៗត្រូវការជាចាំបាច់នូវការលេងដោយសេរី ហើយបើយើងបណ្ដោយឲ្យកូនលេងអ្វីដែលកូនចង់លេង នឹងមានប្រយោជន៍ដូចជា៖

– កាត់បន្ថយអត្រាដែលកូនរញ៉េរញ៉ៃជាមួយយើងបានច្រើន (ម៉ាក់ប៉ាអាចមានពេលធ្វើកិច្ចការផ្សេងទៀត)
– បង្វែរចំណាប់អារម្មណ៍ពីការមើលទូរស័ព្ទ ឬគ្រឿងអេឡិចត្រូនិកផ្សេងៗ
– ជាឱកាសឲ្យកូនស្វែងយល់ពីខ្លួនឯង (ស្វែងយល់ពីចំណង់ចំណូលចិត្តរបស់ខ្លួន)
– បង្កើនគំនិតច្នៃប្រឌិតខ្ពស់
– បង្រៀនខួរក្បាលឲ្យចេះដោះស្រាយបញ្ហា
– រក្សាសុខភាពផ្លូវចិត្តកុមារ

បន្ថែមពីលើនេះ ការជំរុញកូនៗឲ្យធ្វើអ្វីដែលកូនចង់ នឹងធ្វើឲ្យកូនៗសប្បាយចិត្ត ជាហេតុដែលបណ្ដាលឲ្យខួរក្បាលបញ្ចេញដូប៉ាមីន ដែលជាសារធាតុគីមីម៉្យាងធ្វើឲ្យយើងសប្បាយចិត្ត។ ម៉្យាងទៀត កូនអាចដឹងពីអ្វីដែលខ្លួនចង់បាន ឬអាចចាប់ផ្ដើមដឹងពីជំនាញដែលខ្លួនមានក៏ថាបាន។

វេជ្ជបណ្ឌិតទទួលសញ្ញាប័ត្រពីបារាំងរូបនេះបន្តថា ការដែលបណ្ដោយឲ្យកូនលេងតាមចិត្តចង់មិនមានបញ្ហាអ្វីទេ ប៉ុន្តែអ្វីដែលជាបញ្ហានោះគឺ ការលេងរបស់កូនខ្លះអាចនឹងប្រឡូកប្រឡាក់រញ៉េរញ៉ៃ។ ហើយម៉ាក់ប៉ាជាច្រើនខឹងកូននៅពេលដែលកូនធ្វើឲ្យផ្ទះរញ៉េរញ៉ៃ ឬប្រឡាក់ប៉ូកប៉ាកក្នុងផ្ទះ។

ទោះយ៉ាងនេះក្ដី អ្វីដែលម៉ាក់ប៉ាត្រូវធ្វើគឺជួយរៀបចំកន្លែងលេងឲ្យកូន ដើម្បីកាត់បន្ថយការប្រឡាក់រញ៉េរញ៉ៃនោះ ឬយើងអាចបង្រៀនកូនឲ្យសម្អាតក្រោយខ្លួនឯងបន្ទាប់ពីរាយបាយហើយ។ នេះក៏ដូចជា យើងបង្រៀនកូនឲ្យមានទំនួលខុសត្រូវលើបញ្ហាដែលខ្លួនឯងបង្កឡើងដែរ៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ កូនៗទទួលបានអត្ថប្រយោជន៍ ៨ យ៉ាង ពេលឪពុកម្ដាយបង្រៀនឱ្យចេះដាក់ខ្លួន

ចុចអាន៖ ឪពុកម្ដាយមករៀនតិចនិកទប់ស្កាត់ កូនៗឈ្លោះគ្នាជាមួយបងប្អូន

The post បណ្ដោយកូនឲ្យលេងតាមចិត្តមិនមែនរឿងអាក្រក់ទេ តែវាមានប្រយោជន៍ច្រើនសម្រាប់ក្មេង appeared first on Kampuchea Thmey Daily.

ពេទ្យបកស្រាយពីពេលវេលា ខួរក្បាលក្មេងលូតលាស់ខ្លាំងបំផុត ចាំបាច់បំប៉នឲ្យល្អ

Sonya — Tue, 14 Sep 2021 12:20:37 +0000

ចង់បានកូនឆ្លាត សរីរាង្គលូតលាស់បានល្អ ម៉ាក់ប៉ាមិនមែនទើបតែបំប៉នក្រោយកូនកើតនោះទេ គឺចាប់តាំងពីមុនពេលពពោះ ឬអំឡុងពពោះមកម្ល៉េះ។ ទង្វើបែបនេះជាការចាប់ផ្តើមដ៏ល្អបំផុត ប៉ុន្តែម៉ាក់ប៉ាមានដឹងអត់ តើពេលណាខួរក្បាលកូនលូតលាស់ខ្លាំងបំផុត ត្រូវការបំប៉នសារធាតុចិញ្ចឹមឲ្យច្រើន?

លោកវេជ្ជបណ្ឌិត អ៊ុន យូ ឯកទេសរោគកុមារ សញ្ញាបត្រពីប្រទេសបារាំង និងកូរ៉េ បានឲ្យដឹងថា ខួរក្បាលក្មេងលូតលាស់ខ្លាំងបំផុត ចាប់ពីអាយុ ៣-៥ ឆ្នាំ។ មានន័យថា ចាប់ពីពេលកើតភ្លាម រហូតដល់ ៦ ខែ ខួរក្បាលទារកចាប់ផ្តើមលូតលាស់បន្តិចម្តងៗ តាមរយៈការចិញ្ចឹមបីបាច់បានល្អ ដោយការបំបៅទឹកដោះម្តាយតែមួយមុខគត់ រួមទាំងការចាក់វ៉ាក់សាំងការពារជំងឺផ្សេងៗ។

បន្ទាប់ពីរយៈពេល ៦ ខែ រហូតដល់ ១ ឆ្នាំ ឬ ២ ឆ្នាំ ខួរក្បាលក្មេងកាត់តែវិវត្ត និងលូតលាស់ខ្លាំងឡើង បើសិនជាម៉ាក់ប៉ាបន្តការយកចិត្តទុកដាក់ចិញ្ចឹមកូនដោយប្រុងប្រយ័ត្ន បន្តការបំបៅដោះកូន ឬឲ្យម៉ឹមទឹកដោះ ហើយត្រូវបន្ថែមរបបអាហារចម្រុះមុខដល់កូន (របបខាប់គ្រប់គ្រឿង) និងការបន្តចាក់វ៉ាក់សាំងការពារ។

ចាប់ពី ២-៣ ឆ្នាំ ខួរក្បាលក្មេងនឹងបន្តលូតលាស់ខ្លាំងឡើង ដោយពេលនេះក្មេងចាប់ផ្តើមញ៉ាំអាហារជាមួយគ្រួសារបាន ហើយចាប់ពី ៣-៥ ឆ្នាំ ជារយៈពេលដែលខួរក្បាលក្មេងលូតលាស់ខ្លាំងបំផុត ម៉ាក់ប៉ាត្រូវចាំបាច់បំប៉នសារធាតុចិញ្ចឹមឲ្យច្រើនអំឡុងនេះ។

ដោយហេតុថា ចាប់ពីអាយុ ៥ ឆ្នាំឡើងទៅ សញ្ញានៃការវិវត្តខួរក្បាលក្មេងចាប់ផ្តើមធ្លាក់ចុះមកវិញបន្តិចហើយនោះទ បើចង់បំប៉នរយៈពេលនេះ ហាក់យឺតពេលបន្តិច ខណៈលទ្ធផលមិនបានច្រើនដូចពេលក្មេងអាយុ ៣-៥ ឆ្នាំឡើយ៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ ចង់ឱ្យកូនជោគជ័យ មានអនាគតល្អ ឪពុកម្ដាយត្រូវធ្វើរឿង ៥យ៉ាងនេះ តាំងពីកូននៅតូច

ចុចអាន៖ ទាំងនេះជាកំហុសឆ្គង និងការទទួលខុសត្រូវរបស់ឪពុកម្តាយមានកូនអូទីស្សឹម

The post ពេទ្យបកស្រាយពីពេលវេលា ខួរក្បាលក្មេងលូតលាស់ខ្លាំងបំផុត ចាំបាច់បំប៉នឲ្យល្អ appeared first on Kampuchea Thmey Daily.

តិចនិកចិញ្ចឹមកូនឲ្យមានភាពរីករាយ ក្លាយជាក្មេងឆ្លាត

Sonya — Fri, 13 Aug 2021 06:40:00 +0000

កូនៗលូតលាស់បានល្អ មានភាពរីករាយ ឆ្លាតទៀតនោះ ម៉ាក់ប៉ាញញឹមបិទមាត់មិនជិតនោះទេ។ តើត្រូវធ្វើម៉េចដើម្បីកូនយើងមានភាពរីករាយ ក្លាយជាក្មេងឆ្លាត? តាមការលើកឡើងរបស់លោកវេជ្ជបណ្ឌិត អ៊ុន យូ ឯកទេសរោគកុមារ នាពេលកន្លងមក ក្មេងលូតលាស់បានល្អ ឆ្លាត ឬមិនឆ្លាត គិតរាប់តាំងពីហ្សែនរបស់ឪពុកម្តាយ ការលូតលាស់របស់គភ៌ក្នុងផ្ទៃ បូករួមទាំងបរិយាកាសរស់នៅ ការថែទាំ និងរបបអាហារក្រោយពេលកើតមក។

“និយាយដល់ការលូតលាស់របស់កូន គឺត្រូវគិតតាំងពីនៅក្នុងផ្ទៃម្តាយមកម្ល៉េះ បើពេលពពោះ ម្តាយមានជំងឺ ច្បាស់ណាស់គភ៌វិវត្តយឺត មិនគ្រប់គីឡូ ខ្វះអវយវៈ ដល់ពេលកើតមកទៅជាខ្សោយ ការលូតលាស់ក៏យឺតដូចគ្នា”។ នេះការរៀបរាប់របស់លោកវេជ្ជបណ្ឌិត អ៊ុន យូ។

ចំពោះតិចនិកថែទាំកូនឲ្យមានភាពរីករាយ ក្លាយជាក្មេងឆ្លាតវិញ លោកវេជ្ជបណ្ឌិត ចាន់ ស៊ីណេត ឯកទេសទូទៅបានលើកឡើងថា ម៉ាក់ប៉ាគ្រប់រូបតែងតែប្រាថ្នាចង់បានដូចគ្នា តែលទ្ធផលអាស្រ័យលើអនុវត្តក្នុងការរស់នៅប្រចាំថ្ងៃ តើបានត្រឹមត្រូវតាមក្បូនខ្នាតកម្រិតណា។ លោកវេជ្ជបណ្ឌិតពន្យល់ថា ក្មេងរីករាយ ខួរក្បាលវៃឆ្លាតទៅបានលុះណាតែមានសុខភាពល្អ មិនសូវឈឺនេះឈឺនោះ សុខភាពប្រព័ន្ធរំលាយអាហារក៏ល្អ។

ធ្វើម៉េចឲ្យប្រព័ន្ធរំលាយអាហារក្មេងដំណើរបានល្អ មិនសូវឈឺនោះ? លោកវេជ្ជបណ្ឌិតឆ្លើយថា ចំពោះក្មេងអាយុ ៣ឆ្នាំឡើង ម៉ាក់ប៉ាត្រូវគិតលើរបបអាហារជាសំខាន់ ដែលក្នុងនោះអាហារដែលមានជាតិកាកសរសៃច្រើន ដូចជាបន្លែផ្លែឈើ ល្អខ្លាំងចំពោះសុខភាពក្រពះពោះវៀនកូន និងត្រូវឲ្យកូនញ៉ាំទឹកឲ្យបានច្រើន។ ដោយឡែកកូនដែលនៅញ៉ាំម្សៅទឹកដោះគោ ម៉ាក់ប៉ាគួរជ្រើសរើសទឹកដោះគោណាដែលសម្បូរជាកាកសរសៃ។ដោយឡែករបបអាហារដែលជួយដល់ការអភិវឌ្ឍន៍ខួរក្បាល និងប្រព័ន្ធប្រសាទវិញ លោកវេជ្ជបណ្ឌិតណែនាំឲ្យផ្តល់អាហារណាដែលសម្បូរអាស៊ីដខ្លាញ់ Omega-3 ដែលជាប្រភពផ្តល់នូវ DHA។

ក្រៅរបបអាហារ លោកវេជ្ជបណ្ឌិតថា ម៉ាក់ប៉ាគួរចៀសវាងឲ្យកូនមើលទូរទស្សន៍ ឬទូរសព្ទច្រើន ត្រូវបង្កើនភាពស្និទ្ធស្នាលជាមួយកូន ឲ្យកូនធ្វើលំហាត់ប្រាណ ធ្វើសកម្មភាពផ្សេងៗទៅតាមវ័យរបស់ពួកគេ ដូចជាប្រើឧបករណ៍ផ្គុំរូបភាពដើម្បីបង្កើតហ្គេមសប្បាយៗនៅផ្ទះ បង្រៀនកូន និងជួយពួកគេឲ្យរៀនពីពណ៌ សណ្ឋាន និងលេខផ្សេងៗ ឬណែនាំកូនពីការអានសៀវភៅ ដោយចាប់ផ្ដើមជាមួយនឹងសៀវភៅដែលមានរូបភាព ព្រមទាំងនិទានរឿងឲ្យពួកគេស្ដាប់៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ សញ្ញាទាំងនេះបញ្ជាក់ថាកូវីដ-១៩ ប៉ះពាល់ផ្លូវចិត្តកូន

ចុចអាន៖ បង្កើតទម្លាប់ល្អៗ ៣នេះសម្រាប់កូន ទើបជួយពួកគេឱ្យមានសុខភាពល្អនិងឆ្លាតវៃ

The post តិចនិកចិញ្ចឹមកូនឲ្យមានភាពរីករាយ ក្លាយជាក្មេងឆ្លាត appeared first on Kampuchea Thmey Daily.

ម្ដាយរវល់ការងារខ្លាំង នេះជាបច្ចេកទេសបែងភាគចិញ្ចឹមកូនឲ្យល្អ

Sonya — Fri, 16 Jul 2021 01:20:00 +0000

ម៉ាក់ៗសម័យនេះ ពេលមានកូន មិនមែនបោះបង់ចោលការងារ នៅមើលថែកូនតែមួយមុខនោះទេ គឺត្រូវធ្វើការងារផង មើលកូនផង ធ្វើឲ្យម៉ាក់រវល់រាល់ថ្ងៃ សឹងតែរកពេលសម្រាកមិនបាន។ ដើម្បីសម្រាលបន្ទុកដ៏ធ្ងន់ធ្ងរនេះ យើងនឹងណែនាំតិចនិកខ្លះ ជួយម៉ាក់រវល់មើលកូនផង ធ្វើការផង អាចរស់នៅដោយសប្បាយចិត្ត មិនស្ត្រេស។

១- រៀបចំកាលវិភាគ និងដាក់អាទិភាពការងារ

កត់ត្រាគ្រប់រឿង និងកិច្ចការដែលត្រូវធ្វើ ទាំងកិច្ចការក្នុងផ្ទះ និងកន្លែងធ្វើការ។ បែបនេះ ធ្វើឲ្យយើងមិនភាន់ច្រឡំ ឬធ្វើកិច្ចការដែលមិនត្រូវពេលវេលានោះដែរ។ ក្នុងចំណោមការងារទាំងអស់នោះ យើងត្រូវដាក់អាទិភាពការងារ តើការងារណាបន្ទាន់ ត្រូវធ្វើមុន ការងារអាចពន្យារពេលបាន កុំបណ្ដោយឲ្យទឹកដល់ចម្រុះ ចាំធ្វើការងារនោះ ប្រាកដធ្វើមិនបានល្អនោះទេ។

២- ចេះបត់បែន

គ្រប់កិច្ចការទាំងអស់ មិនថាការងារនៅកន្លែងធ្វើការ ការងារផ្ទះ ការងារធំ ឬក៏ការងារតូច ចាំបាច់ត្រូវតែចេះបត់បែនទៅតាមកាលទេសៈ នោះទើបមិនជាប់គាំងនៅមួយកន្លែង ប៉ះពាល់ទាំងពេលវេលាធ្វើការងារ អត់មានពេលសម្រាប់កូនទៀត។ ឧទាហរណ៍ថា ម៉ាក់ត្រូវទៅធ្វើការ អត់មានពេលបំបៅដោះកូនទេ អ៊ីចឹងត្រូវច្របាច់ទឹកដោះទុកសម្រាប់កូនម៉ឹម ហើយទៅផ្សារម្តង ទិញអីវ៉ាន់ទុកសម្រាប់មួយសប្ដាហ៍ មិនថារបស់ប្រើប្រាស់កូន ឬម្ហូបអាហារឡើយ។

៣- ឲ្យម៉ឹមទឹកដោះគោ

ម៉ាក់ៗរវល់ការងារ ចៀសមិនរួចពីឲ្យកូនម៉ឹមទឹកដោះគោទេ តែហោចណាស់ត្រូវព្យាយាមបំបៅដោះកូនឲ្យបានហោចណាស់ ៦ខែដែរ។ ការជ្រើសរើសម្សៅទឹកដោះនោះទៀតសោះ ចាំបាច់ត្រូវគិតដល់ម្សៅទឹកដោះគោណាដែលមាន DHA (ជួយខួរក្បាល និងភ្នែក) Prebiotic (ធ្វើឲ្យប្រព័ន្ធការពាររាងកាយរឹងមាំ) និងកាល់ស្យូម (ជួយឆ្អឹង និងធ្មេញ) ព្រោះទាំង ៣ នេះចាំបាច់ខ្លាំងណាស់សម្រាប់ក្មេង។

៤- ដកឃ្លាពីអនឡាញ

សម័យអនឡាញ បើយើងមិនលេងសោះ ក៏មិនកើតដែរ តែបើធ្វើការផង មើលកូនផង ម៉ាក់ចាំបាច់ត្រូវតែដកឃ្លាពីអនឡាញបន្តិច មិននៅមុខអេក្រង់ទូរស័ព្ទគ្រប់ពេលដូចពេលអត់មានកូននោះទេ។ បើធ្វើការផង មើលកូនផង យប់ឡើងអនឡាញទៀត ភ្នែកម៉ាក់ៗច្បាស់ជាប្រែជាខ្មៅ ឡើងខូង បាក់សម្រស់អស់ហើយ។

៥- គេងឲ្យបានគ្រប់គ្រាន់

ស្ដាប់ទៅរាងចម្លែកបន្តិច មើលកូនផង ធ្វើការផង ម៉ាក់ៗប្រាកដជាគេងមិនគ្រប់គ្រាន់ទេ តែបើយើងគេងមិនគ្រប់វិញ សុខភាពដុនដាប ឈានទៅមានជំងឺធ្ងន់ធ្ងររហូតគេងពេទ្យ ធ្វើឲ្យលទ្ធផលការងារធ្លាក់ចុះ អ៊ីចឹងយកល្អ សុខចិត្តឆ្លៀតពេលគេងឲ្យគ្រប់ ដើម្បីយកកម្លាំងទៅធ្វើការឲ្យបានច្រើន មានកម្លាំងមើលកូន។

៦- រៀបចំរបបអាហាររហ័ស តែផ្ដល់សុខភាពល្អ

ចម្អិនអាហារមួយឆ្នាំងសម្រាប់កូន ឬក្រុមគ្រួសារ ត្រូវការពេលវេលាច្រើន ទាំងការរៀបចំសាច់ បន្លែ គ្រឿងផ្សំ ទើបអាចសម្រេចជាម្ហូបសម្រាប់ញ៉ាំបាន។ ហេតុនេះ យើងអាចធ្វើអាហារទុកជាស្រេច មិនចាំទាល់តែដល់ម៉ោងញ៉ាំ ចាំចម្អិនទេ អាចធ្វើមុនពេលចេញទៅធ្វើការ ហើយពេលត្រលប់មកវិញ គឺមានអាហារជាស្រេចទៅហើយ រីឯទឹកជ្រលក់ផ្សេងៗ អាចធ្វើទុកជាមុនឲ្យហើយ យកល្អច្រកដបស្រេច រក្សាទុកក្នុងទូទឹកកក កាន់តែមានភាពងាយស្រួលពេលត្រឡប់មកពីធ្វើការ៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ ចរិត និងអាកប្បកិរិយាមិនល្អរបស់កូន ៥យ៉ាង ឪពុកម្ដាយគួរកែតម្រូវភ្លាម

ចុចអាន៖ បញ្ហា ៥ យ៉ាងចំពោះកុមារ បណ្ដាលមកពីឪពុកម្ដាយឈ្លោះគ្នាជាប្រចាំ

The post ម្ដាយរវល់ការងារខ្លាំង នេះជាបច្ចេកទេសបែងភាគចិញ្ចឹមកូនឲ្យល្អ appeared first on Kampuchea Thmey Daily.

ចិញ្ចឹមកូន Archives - Kampuchea Thmey Daily

ស្គាល់ទេពកោសល្យកូន អាចទាយដឹងខ្លះៗពីអាជីពរបស់ពួកគេនៅអនាគត

១. ទេពកោសល្យខាងអក្សរ

២. ទេពកោសល្យខាងលេខ

៣. ទេពកោសល្យខាងរូប

៤. ទេពកោសល្យខាងប្រើរាងកាយ

៥. ទេពកោសល្យខាងតន្រ្តី

៦. ទេពកោសល្យខាងមនុស្ស

៧. ទេពកោសល្យលើខ្លួនឯង

៨. ទេពកោសល្យខាងធម្មជាតិ

អ្វីជាការ “ចិញ្ចឹមកូនដូចខ្លា”? មានផលល្អ ឬអាក្រក់អ្វីខ្លះ លើការលូតលាស់កូន?

តើ​អ្វី​ទៅ​ជា​ការ “ចិញ្ចឹម​កូន​ដូច​ខ្លា”?

អត្ថប្រយោជន៍​នៃ​ការ​ចិញ្ចឹម​កូន​ដូច​ខ្លា

ឥទ្ធិពល​មិន​ល្អ​នៃ​ការ​ចិញ្ចឹម​កូន​ដូច​ខ្លា

ផល​វិបាក​​​ប្ដី​ប្រពន្ធ​ប្រញាប់​យក​កូន ទាំង​គ្មាន​ផែនការច្បាស់លាស់

ចេញសញ្ញាមួយចំនួននេះ បង្ហាញថា កូនមានជំងឺពិបាកផ្ចង់អារម្មណ៍

បណ្ដោយកូនឲ្យលេងតាមចិត្តមិនមែនរឿងអាក្រក់ទេ តែវាមានប្រយោជន៍ច្រើនសម្រាប់​ក្មេង

ពេទ្យបកស្រាយពីពេលវេលា ខួរក្បាលក្មេងលូតលាស់ខ្លាំងបំផុត ចាំបាច់បំប៉នឲ្យល្អ

តិចនិកចិញ្ចឹមកូនឲ្យមានភាពរីករាយ ក្លាយជាក្មេងឆ្លាត

ម្ដាយរវល់ការងារខ្លាំង នេះជាបច្ចេកទេសបែងភាគចិញ្ចឹមកូនឲ្យល្អ

តើអ្វីទៅជាការ “ចិញ្ចឹមកូនដូចខ្លា”?

អត្ថប្រយោជន៍នៃការចិញ្ចឹមកូនដូចខ្លា

ឥទ្ធិពលមិនល្អនៃការចិញ្ចឹមកូនដូចខ្លា

ផលវិបាកប្ដីប្រពន្ធប្រញាប់យកកូន ទាំងគ្មានផែនការច្បាស់លាស់

បណ្ដោយកូនឲ្យលេងតាមចិត្តមិនមែនរឿងអាក្រក់ទេ តែវាមានប្រយោជន៍ច្រើនសម្រាប់ក្មេង