ចិន Archives - Kampuchea Thmey Daily

កូរ៉េខាងជើង សន្យារឹតបន្តឹងចំណងមិត្តភាពជាមួយចិនឱ្យរឹងមាំជាងពេលណាទាំងអស់

Minea Neu — Wed, 01 Jul 2026 14:02:00 +0000

មេដឹកនាំកូរ៉េខាងជើង លោក គីម ជុងអ៊ុន សន្យាថានឹងបន្តពង្រឹងចំណងមិត្តភាពជាមួយប្រទេសចិន ហើយបានពិពណ៌នាអំពីកិច្ចប្រជុំកំពូលថ្មីៗនេះជាមួយប្រធានាធិបតីចិន លោក ស៊ី ជីនពីង ថាជាឱកាសប្រវត្តិសាស្ត្រក្នុងការជំរុញទំនាក់ទំនងជាមួយប្រទេសជិតខាងដ៏ធំរបស់លោក។

លោក គីម ជុងអ៊ុន និង លោក ស៊ី ជីនពីង។ រូបភាព៖ KCNA

ក្នុងសារអបអរសាទរមួយផ្ញើជូន លោក ស៊ី ក្នុងឱកាសខួបលើកទី១០៥ នៃការបង្កើតបក្សកុម្មុយនីស្តចិន លោក គីម និយាយថា ជំហររបស់ទីក្រុងព្យុងយ៉ាង គឺដើម្បីអភិវឌ្ឍទំនាក់ទំនងជាមួយទីក្រុងប៉េកាំងជាបណ្តើរៗ។ នេះបើយោងតាមរបាយការណ៍របស់ទីភ្នាក់ងារសារព័ត៌មានកណ្តាលកូរ៉េ (KCNA) នៅថ្ងៃពុធ។

លោក គីម លើកឡើងក្នុងសារនោះថា៖ « វាគឺជាជំហរដ៏រឹងមាំរបស់គណបក្ស និងរដ្ឋាភិបាលរបស់យើង ក្នុងការអភិវឌ្ឍទំនាក់ទំនងមិត្តភាពរវាងកូរ៉េខាងជើង និងចិន ដោយមានឫសគល់យូរអង្វែង និជាប្រវត្តិសាស្ត្រ ព្រមទាំងបណ្តុះលទ្ធិសង្គមនិយមជាស្នូល។ កិច្ចប្រជុំកំពូលទីក្រុងព្យុងយ៉ាងថ្មីៗនេះ គឺជាឱកាសប្រវត្តិសាស្ត្រមួយ នៃការពង្រឹងមិត្តភាព និងការជឿទុកចិត្តគ្នារវាងយើងទាំងពីរ»។

អំឡុងពេលកិច្ចប្រជុំកំពូលរបស់ លោក ស៊ី ជាមួយ លោក គីម នៅកូរ៉េខាងជើង មេដឹកនាំទាំងពីរបានអនុម័តផែនការដ៏វែងឆ្ងាយសម្រាប់ពង្រឹងទំនាក់ទំនងដ៏មានឥទ្ធិពល និងជាយុទ្ធសាស្ត្របំផុត។

យោងតាមប្រព័ន្ធផ្សព្វផ្សាយរដ្ឋចិន លោក ស៊ី បានជំរុញឱ្យមានកិច្ចសហប្រតិបត្តិការការទូត ការអនុវត្តច្បាប់ និងយោធាកាន់តែជិតស្និទ្ធជាមួយកូរ៉េខាងជើង អំឡុងពេលដំណើរទស្សនកិច្ចនោះ៕

សម្រួល៖ ណឺ មិនា

The post កូរ៉េខាងជើង សន្យារឹតបន្តឹងចំណងមិត្តភាពជាមួយចិនឱ្យរឹងមាំជាងពេលណាទាំងអស់ appeared first on Kampuchea Thmey Daily.

រុស្ស៊ីអនុម័តការហ្វឹកហ្វឺនយោធាយ៉ាងសម្ងាត់ជាមួយចិន ដើម្បីវាយអ៊ុយក្រែន

Minea Neu — Wed, 01 Jul 2026 11:06:30 +0000

ការហ្វឹកហ្វឺនយោធាដ៏សម្ងាត់របស់ចិន ចំពោះកងកម្លាំងរុស្ស៊ីកាលពីឆ្នាំមុន ត្រូវបានអនុម័តដោយផ្ទាល់ដោយរដ្ឋមន្ត្រីក្រសួងការពារជាតិរុស្ស៊ី ហើយមានការចូលរួមដោយផ្ទាល់ពីឧត្តមសេនីយ៍របស់ទីក្រុងមូស្គូ និងទីក្រុងប៉េកាំងយ៉ាងហោចណាស់ ៤នាក់។ នេះបើយោងតាមមន្ត្រីអឺរ៉ុបពីររូប និងការរកឃើញដោយទីភ្នាក់ងារសារព័ត៌មានរ៉យទ័រ ចុះផ្សាយនៅថ្ងៃទី០១ ខែកក្តដា ឆ្នាំ២០២៦ ។

មន្ត្រីអឺរ៉ុបនិយាយថា ការចូលរួមរបស់បុគ្គលជាន់ខ្ពស់បែបនេះក្នុងការបណ្តុះបណ្តាលទាក់ទងនឹងសង្គ្រាមអ៊ុយក្រែន បានបង្ហាញពីសារៈសំខាន់របស់រុស្ស៊ីនិងចិននៃកិច្ចសហប្រតិបត្តិការ នាំឱ្យមានការភ្ញាក់ផ្អើលនៅអឺរ៉ុប ទោះបីជាទីក្រុងប៉េកាំងបដិសេធលើរឿងនេះក៏ដោយ។

លោក ស៊ី ជីនពីង និង លោក ពូទីន។ រូបភាព៖ Reuters

ឯកសារសម្ងាត់របស់រុស្ស៊ី ត្រូវបានរកឃើញដោយភ្នាក់ងារសារព័ត៌មានរ៉យទ័រ យោងដោយផ្ទាល់ទៅលើក្រឹត្យផ្ទៃក្នុងចេញដោយរដ្ឋមន្ត្រីក្រសួងការពារជាតិ គឺ លោក Andrei Belousov ក្នុងខែសីហា ឆ្នាំ២០២៥ ។

ឯកសារនោះរាប់រៀបថា ស្របតាមការសម្រេចចិត្តរបស់ លោក Belousov គណៈប្រតិភូមួយក្រុមមកពីកងកម្លាំងប្រដាប់អាវុធរបស់រុស្ស៊ី បានធ្វើដំណើរទៅកាន់ប្រទេសចិន ដើម្បីចូលរួមក្នុងសមយុទ្ធហ្វឹកហ្វឺននៅឯមូលដ្ឋានកងទ័ពរំដោះប្រជាជន(PLA)។

របាយការណ៍ដដែលបានលម្អិតពីវគ្គបណ្តុះបណ្តាលមួយ គឺវគ្គបណ្តុះបណ្តាលរយៈពេលបីសប្តាហ៍ ផ្តោតលើការការពារវិទ្យុសកម្ម គីមី និងជីវសាស្រ្ត នៅឯមូលដ្ឋានយោធាមួយក្នុងទីក្រុងប៉េកាំងក្នុងខែវិច្ឆិកា។

របាយការណ៍ទីពីរបានពិពណ៌នា និងបង្ហាញរូបភាពទាហានរុស្ស៊ីកំពុងទទួលបានការបង្រៀនដោយគ្រូបង្ហាត់ជនជាតិចិន កំពុងសម្លឹងមើលគំរូរ៉េអាក់ទ័រនុយក្លេអ៊ែរ និងបង្រៀនពីការឈ្លបយកការណ៍គីមី ការឈ្លបយកការណ៍វិទ្យុសកម្ម និងការការពារប្រព័ន្ធខ្យល់ចេញចូលពីការបំពុល។

ការដាក់បញ្ចូលការបណ្តុះបណ្តាលសង្គ្រាមវិទ្យុសកម្ម ជីវសាស្រ្ត និងគីមី បានគូសបញ្ជាក់ពីលក្ខណៈយុទ្ធសាស្ត្រនៃការផ្លាស់ប្តូរមួយ នេះបើតាមមន្ត្រីអឺរ៉ុបម្នាក់ ដោយកត់សម្គាល់ថាការបណ្តុះបែបនេះ គឺមានភាពរសើបជាពិសេសសម្រាប់យោធាជាទូទៅ។

យ៉ាងណា ក្រសួងការពារជាតិរុស្ស៊ី និងចិនមិនបានឆ្លើយតបទៅនឹងសំណើសុំការអត្ថាធិប្បាយជុំវិញបញ្ហានេះទេ។

យោងតាមការរាយការណ៍របស់សារព័ត៌មានរ៉យទ័រកាលពីខែមុន ដោយដកស្រង់សម្តីភ្នាក់ងារស៊ើបការណ៍សម្ងាត់ និងឯកសារយោធាអឺរ៉ុប ប្រទេសចិនបានបណ្តុះបណ្តាលបុគ្គលិកយោធារុស្ស៊ីប្រហែល ២០០នាក់កាលពីខែវិច្ឆិកា ខ្លះបានចូលរួមក្នុងសង្គ្រាមនៅអ៊ុយក្រែន៕

សម្រួល៖ ណឺ មិនា

The post រុស្ស៊ីអនុម័តការហ្វឹកហ្វឺនយោធាយ៉ាងសម្ងាត់ជាមួយចិន ដើម្បីវាយអ៊ុយក្រែន appeared first on Kampuchea Thmey Daily.

អាមេរិកបន្ថែមទំនិញបច្ចេកវិទ្យាចិនទៅក្នុងបញ្ចីហាមឃាត់ការនាំចូល ជុំវិញកង្វល់សន្ដិសុខជាតិ

Huon Dina — Mon, 29 Jun 2026 04:29:47 +0000

គណៈកម្មការទូរគមនាគមន៍សហព័ន្ធសហរដ្ឋអាមេរិក (FCC) បានឱ្យដឹងកាលពីថ្ងៃសុក្រសប្ដាហ៍មុនថា ខ្លួននឹងបន្ថែមទំនិញបច្ចេកវិទ្យាពីក្រុមហ៊ុនផលិតចិនជាច្រើនទៅក្នុងបញ្ជីហាមឃាត់ការនាំចូល ដែលជាផ្នែកមួយនៃកិច្ចប្រឹងប្រែងកាត់បន្ថយការប្រើប្រាស់បច្ចេកវិទ្យាផលិតនៅប្រទេសចិន។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

ច្បាប់ថ្មីនេះ ពង្រីកការហាមឃាត់របស់ FCC ដែលបានដាក់ចេញក្នុងឆ្នាំ ២០២២ លើម៉ូដែលថ្មីនៃឧបករណ៍ទូរគមនាគមន៍ និងកាមេរ៉ាសុវត្ថិភាព ដែលផលិតដោយក្រុមហ៊ុន Huawei, ZTE, Hytera, Hikvision និង Dahua។ FCC បាននិយាយថា ផលិតផលរបស់ក្រុមហ៊ុនទាំងនេះ បង្កហានិភ័យដល់សន្តិសុខជាតិរបស់សហរដ្ឋអាមេរិក។

ការពង្រីកការហាមឃាត់ឥឡូវនេះ ក៏គ្របដណ្តប់លើម៉ូដែលបច្ចេកវិទ្យាចាស់ៗ ផងដែរ មិនមែនគ្រាន់តែផលិតផលដែលចាប់ផ្ដើមផលិតចាប់ពីចុងឆ្នាំ ២០២២ នោះទេ។ ទំនិញដែលហាមឃាត់រួមមាន ឧបករណ៍ដែលប្រើសម្រាប់សុវត្ថិភាពសាធារណៈ សម្ភារៈរដ្ឋាភិបាល កាមេរ៉ាសុវត្ថិភាពនៅកន្លែងហេដ្ឋារចនាសម្ព័ន្ធសំខាន់ៗ និងបច្ចេកវិទ្យាប្រើប្រាស់ក្នុងគោលបំណងសន្តិសុខជាតិផ្សេងៗទៀត។

ការបន្ថែមការហាមឃាត់នេះ នឹងចូលជាធរមាននៅដើមខែកក្កដា។ FCC បាននិយាយថា វាគឺជារឿងចាំបាច់ដើម្បីការពារសន្តិសុខជាតិសហរដ្ឋអាមេរិក ដោយកាត់បន្ថយហានិភ័យដល់វិស័យទូរគមនាគមន៍របស់ប្រទេស។

ស្ថានទូតចិនប្រចាំទីក្រុងវ៉ាស៊ីនតោន និងក្រុមហ៊ុនចិននានា មិនបានប្រតិកម្មយ៉ាងណានៅឡើយទេ។ យ៉ាងណាមិញ ពលរដ្ឋអាមេរិកដែលមានបច្ចេកវិទ្យាហាមឃាត់រួចស្រាច់ នៅតែអាចបន្តប្រើប្រាស់បាន។

គួររំឭកថា FCC កាលពីខែធ្នូ បានហាមឃាត់ការនាំចូលដ្រូនម៉ូដែលថ្មីទាំងអស់ពីចិន។ កាលពីខែមីនា ស្ថាប័នដដែលក៏បានហាមឃាត់ការនាំចូលឧបករណ៍ Router (រ៉ោតទ័រ) ផលិតនៅចិន ដែលគេប្រើសម្រាប់តភ្ជាប់កុំព្យូទ័រ ទូរស័ព្ទ និងឧបករណ៍ឆ្លាតវៃអនឡាញផងដែរ។ យ៉ាងណាមិញ ការហាមឃាត់ពីមុនៗទាំងនោះ មិនបានអនុវត្តចំពោះដ្រូន និងរ៉ោតទ័រម៉ូដែលចាស់ៗរបស់ចិនទេ៕

The post អាមេរិកបន្ថែមទំនិញបច្ចេកវិទ្យាចិនទៅក្នុងបញ្ចីហាមឃាត់ការនាំចូល ជុំវិញកង្វល់សន្ដិសុខជាតិ appeared first on Kampuchea Thmey Daily.

ចិន-រុស្ស៊ី បញ្ជូនយន្តហោះទម្លាក់គ្រាប់បែកនិងយន្តហោះចម្បាំង ល្បាតលើដែនសមុទ្រជប៉ុន នៅសមុទ្រចិនខាងកើត

Minea Neu — Sun, 28 Jun 2026 08:36:35 +0000

ប្រទេសចិន និងរុស្ស៊ីបានបញ្ជូនយន្តហោះទម្លាក់គ្រាប់បែក និងយន្តហោះចម្បាំងសម្រាប់ល្បាតផ្លូវអាកាសយុទ្ធសាស្ត្ររួមគ្នាក្នុងដែនអាកាសសមុទ្រជប៉ុន នៅឯសមុទ្រចិនខាងកើតនិងតំបន់ប៉ាស៊ីហ្វិកខាងលិចកាលពីថ្ងៃសៅរ៍។ នេះបើយោងតាមក្រសួងការពារជាតិរបស់ទីក្រុងប៉េកាំង និងចុះផ្សាយដោយសារព័ត៌មាន The Japan Times នៅថ្ងៃទី២៨ ខែមិថុនា ឆ្នាំ២០២៦ ។

ក្រសួងការពារជាតិចិននិយាយថា៖ « ការល្បាតរយៈចម្ងាយឆ្ងាយលើកទី១១ រវាងកងកម្លាំងអាកាសទាំងពីរ បានបង្ហាញពីការតាំងចិត្ត និងសមត្ថភាពក្នុងការរួមគ្នាការពារសន្តិភាព និងស្ថិរភាពក្នុងតំបន់»។

យន្តហោះចម្បាំងនិងទម្លាក់គ្រាប់បែករបស់ចិន។ រូបភាព៖ Reuters

ដោយឡែក ក្រសួងការពារជាតិជប៉ុនលើកឡើងថា ខ្លួនបានបញ្ជូនយន្តហោះចម្បាំងជាច្រើនគ្រឿងជាការឆ្លើយតប ដោយបន្ថែមថា ជប៉ុនបានតាមដានចលនារបស់យន្តហោះចិននិងរុស្ស៊ី រួមទាំងយន្តហោះទម្លាក់គ្រាប់បែក H-6 របស់ចិនចំនួន ៤គ្រឿង និងយន្តហោះទម្លាក់គ្រាប់បែក Tu-95 របស់រុស្ស៊ីចំនួន ២គ្រឿង ចាប់ពីព្រឹកថ្ងៃសៅរ៍ រហូតដល់រសៀល។ ការហោះហើរនេះក៏ពាក់ព័ន្ធនឹងយន្តហោះល្បាត Tu-142 របស់រុស្ស៊ីចំនួន ២គ្រឿង យន្តហោះចម្បាំង J-16 របស់ចិនចំនួន២គ្រឿង និងយន្តហោះចម្បាំង Su-30 របស់រុស្ស៊ីមួយគ្រឿងផងដែរ។

យ៉ាងណាមិញ ផែនទីនៃផ្លូវហោះហើររបស់យន្តហោះដែលភ្ជាប់មកជាមួយសេចក្តីថ្លែងការណ៍របស់ក្រសួងការពារជាតិចិនបានបង្ហាញថា យន្តហោះទម្លាក់គ្រាប់បែកមួយចំនួន បានហោះហើរឆ្លងកាត់ច្រកសមុទ្រ Miyako ជិតខេត្ត Okinawa ប្រទេសជប៉ុន និងចូលទៅក្នុងមហាសមុទ្រប៉ាស៊ីហ្វិកភាគខាងលិចនៅភាគខាងត្បូងតំបន់ Shikoku មុនពេលវិលត្រឡប់មកវិញ។

មិនតែប៉ុណ្ណោះ កងទ័ពអាកាសកូរ៉េខាងត្បូងក៏បានបាញ់យន្តហោះចម្បាំងរបស់ខ្លួនឡើងលើអាកាសយ៉ាងឆាប់រហ័ស ដើម្បីឆ្លើយតបទៅនឹងការគំរាមកំហែងដែលអាចកើតមាន បន្ទាប់ពីយន្តហោះរបស់យោធាចិននិងរុស្ស៊ីជាង ១០គ្រឿងបានចូលទៅក្នុងតំបន់ដែលកំណត់ថាជាអត្តសញ្ញាណដែនអាកាសកូរ៉េខាងត្បូងនៅថ្ងៃដដែល។ នេះបើយោងតាមការចុះផ្សាយរបស់ទីភ្នាក់ងារសារព័ត៌មាន Yonhap ។

យ៉ាងណា យន្តហោះចិន និងរុស្ស៊ីមិនបានរំលោភលើដែនអាកាសកូរ៉េខាងត្បូងទេ។

គួរបញ្ជាក់ថា ប្រទេសចិននិងរុស្ស៊ីក៏បានធ្វើការល្បាតចម្ងាយឆ្ងាយពាក់ព័ន្ធនឹងយន្តហោះទម្លាក់គ្រាប់បែក និងយន្តហោះចម្បាំងកាលពីខែធ្នូ ម្តងរួចមកហើយ ដោយរដ្ឋមន្ត្រីក្រសួងការពារជាតិជប៉ុន លោក Shinjiro Koizumi ហៅថាជាការហោះហើរយន្តហោះទម្លាក់គ្រាប់បែករួមគ្នាម្តងហើយម្តងទៀតនិងជាការពង្រីក និងពង្រឹងសកម្មភាពជុំវិញប្រទេសជប៉ុន។

លោក បន្ថែមថា៖ « សកម្មភាពទាំងនេះតំណាងឱ្យការបង្ហាញកម្លាំងប្រឆាំងនឹងប្រទេសជប៉ុនយ៉ាងច្បាស់។ នេះគឺជាក្តីបារម្ភផ្នែកសន្តិសុខធ្ងន់ធ្ងរសម្រាប់ប្រទេសរបស់យើង»៕

សម្រួល៖ ណឺ មិនា

The post ចិន-រុស្ស៊ី បញ្ជូនយន្តហោះទម្លាក់គ្រាប់បែកនិងយន្តហោះចម្បាំង ល្បាតលើដែនសមុទ្រជប៉ុន នៅសមុទ្រចិនខាងកើត appeared first on Kampuchea Thmey Daily.

លោក វ៉ាង យី លើកយោបល់ថា អឺរ៉ុបនិងចិនគួរតែជាដៃគូសហការ ជាជាងគូប្រជែង

Minea Neu — Fri, 26 Jun 2026 06:00:00 +0000

រដ្ឋមន្ត្រីការបរទេសចិន លោក វ៉ាង យី លើកឡើងកាលពីថ្ងៃព្រហស្បតិ៍ថា ប្រទេសចិននិងអឺរ៉ុប គួរតែជាដៃគូសហការជាជាងធ្វើជាគូប្រជែង ដោយសង្កត់ធ្ងន់ថា ការអភិវឌ្ឍរបស់ប្រទេសចិន បង្ហាញពីឱកាសសម្រាប់អឺរ៉ុបជាជាងបញ្ហាប្រឈម។ នេះបើយោងតាមទីភ្នាក់ងារសារព័ត៌មាន Xinhua ផ្សាយថ្ងៃទី២៦ ខែមិថុនា ឆ្នាំ២០២៦ ។

លោក វ៉ាង បានធ្វើការកត់សម្គាល់បែបនេះ អំឡុងពេលកិច្ចពិភាក្សានៅទីក្រុងប៉េកាំង ជាមួយរដ្ឋមន្ត្រីការបរទេសអូទ្រីស លោកស្រី Beate Meinl-Reisinger ខណៈភាគីទាំងពីរបានប្រារព្ធខួបលើកទី៥៥ នៃទំនាក់ទំនងការទូតចិន-អូទ្រីស។

រដ្ឋមន្ត្រីការបរទេសចិន លោក វ៉ាង យី ។ រូបភាព៖ AA

លោក វ៉ាង និយាយថា៖ « ការអភិវឌ្ឍជាលំដាប់នៃចំណងមិត្តភាពទ្វេភាគីក្នុងរយៈពេលប្រាំទសវត្សរ៍កន្លងមកនេះ ត្រូវបានដឹកនាំដោយការគោរពគ្នាទៅវិញទៅមក សមភាព ការបើកចំហ និងកិច្ចសហប្រតិបត្តិការដែលផ្តល់ផលប្រយោជន៍ទៅវិញទៅមក។ ភាពជាដៃគូយុទ្ធសាស្ត្រចិន-អូទ្រីស បង្ហាញថា ប្រទេសដែលមានប្រព័ន្ធសង្គម និងវប្បធម៌ខុសៗគ្នា ក៏អាចកសាងទំនាក់ទំនងដ៏រឹងមាំបាន»។

ថ្លែងទៅកាន់ទំនាក់ទំនងចិន-អឺរ៉ុប លោក វ៉ាង និយាយថា ទីក្រុងប៉េកាំងពេញចិត្ត ចំពោះវិធីសាស្រ្តសមហេតុផលនិងជាក់ស្តែងរបស់ប្រទេសអូទ្រីស ហើយសង្ឃឹមថា ទីក្រុង Vienna នឹងបន្តដើរតួនាទីស្ថាបនាក្នុងការលើកកម្ពស់ការសន្ទនា និងកិច្ចសហប្រតិបត្តិការរវាងភាគីទាំងពីរ។

ដោយឡែក លោកស្រី Beate Meinl-Reisinger បានបញ្ជាក់ជាថ្មីនូវការប្តេជ្ញាចិត្តរបស់ប្រទេសអូទ្រីស ចំពោះគោលនយោបាយចិនតែមួយ ហើយប្រទេសលោកស្រីបានយកចិត្តទុកដាក់យ៉ាងខ្លាំង ចំពោះទំនាក់ទំនងជាមួយទីក្រុងប៉េកាំង។

លោកស្រីបានសម្តែងការត្រៀមខ្លួនរួចជាស្រេច ដើម្បីពង្រីកកិច្ចសហប្រតិបត្តិការក្នុងវិស័យពាណិជ្ជកម្ម ការវិនិយោគ និងការអភិវឌ្ឍបៃតង ខណៈគាំទ្រដល់ការសន្ទនាដោយស្មោះត្រង់ ដើម្បីធានាបាននូវការអភិវឌ្ឍប្រកបដោយស្ថិរភាព និងមានសុខភាពល្អនៃទំនាក់ទំនងអឺរ៉ុប-ចិន៕

សម្រួល៖ ណឺ មិនា

The post លោក វ៉ាង យី លើកយោបល់ថា អឺរ៉ុបនិងចិនគួរតែជាដៃគូសហការ ជាជាងគូប្រជែង appeared first on Kampuchea Thmey Daily.

ចិន ប្រតិកម្មប្រឆាំងគម្រោងដាក់ពង្រាយប្រព័ន្ធមីស៊ីលរបស់អាមេរិក លើទឹកដីជប៉ុន

Minea Neu — Tue, 23 Jun 2026 12:52:00 +0000

ប្រទេសចិន បានលើកឡើងថា ខ្លួនប្រឆាំងយ៉ាងម៉ឺងម៉ាត់ ចំពោះការដាក់ពង្រាយប្រព័ន្ធមីស៊ីលរយៈចម្ងាយមធ្យមរបស់សហរដ្ឋអាមេរិក នៅក្នុងប្រទេសអាស៊ី បន្ទាប់ពីមានរបាយការណ៍ថា យោធាសហរដ្ឋអាមេរិកមានគម្រោងដាក់ពង្រាយប្រព័ន្ធមីស៊ីល Typhon នៅឯមូលដ្ឋានទ័ពអាកាស Kanoya ក្នុងខេត្ត Kagoshima ប្រទេសជប៉ុន សម្រាប់សមយុទ្ធរួមគ្នារវាងសហរដ្ឋអាមេរិក និងជប៉ុន ចាប់ពីខែមិថុនាដល់ខែកញ្ញា។ នេះបើយោងតាមសារព័ត៌មាន China Daily ផ្សាយថ្ងៃទី២២ ខែមិថុនា ឆ្នាំ២០២៦ ។

អ្នកនាំពាក្យក្រសួងការបរទេសចិន លោក Guo Jiakun និយាយថា ប្រទេសចិនបានកត់សម្គាល់របាយការណ៍ពាក់ព័ន្ធ និងព្រួយបារម្ភម្តងហើយម្តងទៀតលើបញ្ហានៃការដាក់ពង្រាយនេះ។

លោក Guo Jiakun អ្នកនាំពាក្យក្រសួងការបរទេសចិន ។ រូបភាព៖ Reuters

លោក Guo និយាយក្នុងសន្និសីទសារព័ត៌មានប្រចាំថ្ងៃថា៖ « ប្រព័ន្ធមីស៊ីល Typhon គឺជាអាវុធវាយលុកជាយុទ្ធសាស្ត្រដែលធ្វើឱ្យប៉ះពាល់ដល់ផលប្រយោជន៍សន្តិសុខស្របច្បាប់របស់ប្រទេសដទៃ គំរាមកំហែងដល់សន្តិសុខជាយុទ្ធសាស្ត្រក្នុងតំបន់ បង្កើនហានិភ័យនៃការប្រឈមមុខដាក់គ្នាខាងយោធា និងការប្រណាំងប្រជែងសព្វាវុធ»។

លោកបន្ថែមថា៖ « ចលនាបែបនេះនឹងមិននាំមកនូវអ្វីក្រៅពីគ្រោះថ្នាក់ដល់សន្តិភាព និងស្ថិរភាពក្នុងតំបន់ឡើយ។ ប្រជាជននៅក្នុងប្រទេសអាស៊ីជាច្រើន រួមទាំងប្រទេសជប៉ុនផងដែរ បានសម្តែងការប្រឆាំងជាយូរមកហើយ ចំពោះការដាក់ពង្រាយបែបនេះ»។

លោក មានប្រសាសន៍ថា ចិនជំរុញឱ្យសហរដ្ឋអាមេរិក និងជប៉ុនយកចិត្តទុកដាក់ ចំពោះក្តីបារម្ភរបស់ប្រទេសក្នុងតំបន់ កែតម្រូវទិសដៅរបស់ពួកគេ និងចាត់វិធានការជាក់ស្តែងដែលរួមចំណែកជាវិជ្ជមានដល់សន្តិភាព និងស្ថិរភាពក្នុងតំបន់។

លោក Guo សង្កត់ធ្ងន់ថា ការដាក់ពង្រាយដែលបានគ្រោងទុកក៏ជាភស្តុតាងបន្ថែមទៀតនៃការបង្កើនល្បឿនយោធារបស់ជប៉ុនផងដែរ។

លោក ថា៖ « សញ្ញាផ្សេងៗបង្ហាញថា កងកម្លាំងស្តាំនិយមជប៉ុនកំពុងស្វែងរកការរៀបចំរចនាសម្ព័ន្ធឡើងវិញជារួមនៃសមត្ថភាពយោធារបស់ជប៉ុន និងការត្រៀមខ្លួនសម្រាប់សង្គ្រាមរយៈពេលវែង»។

លោក Guo បន្ថែមថា៖ « ជារួម ចលនាបែបនេះធ្វើឱ្យខូចដល់ការរឹតត្បិតដែលដាក់ដោយរដ្ឋធម្មនុញ្ញជប៉ុន ច្បាប់ និងបទប្បញ្ញត្តិអន្តរជាតិ និងក្នុងស្រុក ប្រឈមនឹងសណ្តាប់ធ្នាប់អន្តរជាតិក្រោយសង្គ្រាម និងផ្ទុយនឹងរូបភាពដែលជប៉ុនប្រកាសដោយខ្លួនឯងថាជាប្រទេសសន្តិភាព»។

ប្រទេសចិន ទទូចបន្ថែមថា យោធានិយមថ្មីរបស់ជប៉ុនកំពុងក្លាយជាប្រភពនៃគ្រោះថ្នាក់កាន់តែខ្លាំងឡើង ហើយអាចក្លាយជាមូលហេតុចម្បងនៃភាពចលាចលក្នុងតំបន់ម្តងទៀត ដោយជំរុញឱ្យសហគមន៍អន្តរជាតិទាញយកមេរៀនពីប្រវត្តិសាស្ត្រ រក្សាការប្រុងប្រយ័ត្នខ្ពស់ និងធ្វើការរួមគ្នា ដើម្បីទប់ស្កាត់៕

សម្រួល៖ ណឺ មិនា

The post ចិន ប្រតិកម្មប្រឆាំងគម្រោងដាក់ពង្រាយប្រព័ន្ធមីស៊ីលរបស់អាមេរិក លើទឹកដីជប៉ុន appeared first on Kampuchea Thmey Daily.

ភ្នំពេញនឹងទទួលជំនួយកាមេរ៉ាសម្គាល់ទម្រង់មុខមនុស្សពីចិនជិត៥០០គ្រឿងដើម្បីលើកកម្ពស់សន្តិសុខ

hun sirivadh — Thu, 18 Jun 2026 03:05:53 +0000

រដ្ឋមន្ត្រីក្រសួងមហាផ្ទៃកម្ពុជា លោក ស សុខា បានចុះហត្ថលេខាលើកិច្ចព្រមព្រៀងមួយជាមួយចិនលើអនុវត្តន៍គម្រោងអភិវឌ្ឍន៍នគរបាលវៃឆ្លាត ដែលនឹងបំពាក់ប្រព័ន្ធដំណើរការ និងវិភាគវីដេអូ នៅរាជធានីភ្នំពេញ។ តាមគម្រោងនេះចិននឹងផ្ដល់កាមេរ៉ាដែលអាចសម្គាល់ទម្រង់មុខមនុស្ស និងស្លាកលេខយានយន្ត ៤៨៧គ្រឿង ដើម្បីបំពាក់នៅរាជធានីភ្នំពេញ។

ពិធីចុះហត្ថលេខាលើកិច្ចព្រមព្រៀងនេះធ្វើនៅក្រសួងមហាផ្ទៃកម្ពុជាកាលពីថ្ងៃទី១៦ ខែមិថុនា ឆ្នាំ២០២៦ រវាងរដ្ឋមន្ត្រីមហាផ្ទៃលោក ស សុខា និងអគ្គលេខាធិការនៃមជ្ឈមណ្ឌលកិច្ចសហប្រតិបត្តិការសន្តិសុខនិងសមាហរណកម្មអនុវត្តន៍ច្បាប់មេគង្គ-ឡានឆាង លោក យូ ស៊ាវវិន។

រដ្ឋមន្ត្រីក្រសួងមហាផ្ទៃលោក ស សុខា បានគូសបញ្ជាក់ថា ការដាក់ឱ្យដំណើរការប្រព័ន្ធ «នគរបាលវៃឆ្លាត» នេះគឺជាការអនុវត្តជាក់ស្ដែងនៃគោលនយោបាយសន្តិសុខរបស់រាជរដ្ឋាភិបាលកម្ពុជា ដើម្បីធានាបាននូវភាពសុខសាន្តជូនប្រជាពលរដ្ឋ និងភ្ញៀវទេសចរ។

គម្រោងអភិវឌ្ឍន៍នគរបាលឆ្លាតវៃនេះនឹងមកជាមួយមជ្ឈមណ្ឌលបញ្ជាការដែលមានសមត្ថភាពខ្ពស់ក្នុងការគ្រប់គ្រង និងឆ្លើយតបចំពោះស្ថានភាពអាសន្នបានទាន់ពេលវេលាមួយទៀតផងដែរ។

អគ្គលេខាធិការនៃមជ្ឈមណ្ឌលកិច្ចសហប្រតិបត្តិការសន្តិសុខនិងសមាហរណកម្មអនុវត្តន៍ច្បាប់មេគង្គ-ឡានឆាង លោក យូ ស៊ាវវិន បានសន្យាថាចិននឹងបន្តពង្រីកវិសាលភាពនៃការបំពាក់កាមេរ៉ា និងបណ្ដុះបណ្ដាលមន្ត្រីនគរបាលកម្ពុជាលើផ្នែកបច្ចេកវិទ្យាឌីជីថល សំដៅរួមចំណែកក្នុងការពង្រឹងវិស័យសន្តិសុខនៅកម្ពុជាបន្ថែមទៀត។

ប្រធានវិទ្យាស្ថានប្រជាធិបតេយ្យកម្ពុជាលោកបណ្ឌិត ប៉ា ច័ន្ទរឿន បានបង្ហាញការយល់ឃើញថាការបំពាក់ប្រព័ន្ធកាមេរ៉ាទំនើបនេះអាចជួយសម្រួលដល់ការងាររបស់នគរបាលរៀបចំសណ្ដាប់ធ្នាប់ កាត់បន្ថយបទល្មើស ងាយស្រួលស្វែងរកជនសង្ស័យ និងគ្រោះថ្នាក់ចរាចរណ៍ជាដើម។ ទោះជាយ៉ាងណាលោកក៏បានបង្ហាញក្ដីបារម្ភផងដែរ ទាក់ទងសិទ្ធិសេរីភាព និងឯកជនភាពរបស់ប្រជាពលរដ្ឋ ហើយប្រសិនជាការគ្រប់គ្រងខ្វះចន្លោះណាមួយទិន្នន័យដែលនគរបាលមានអាចធ្លាក់ទៅជនទី៣ ដែលអាចបង្កបញ្ហាបាន។

លោកថា៖ «សម្រាប់ខ្ញុំៗមិនយល់ទាស់ទេចំពោះការប្រើប្រាស់បច្ចេកវិទ្យាកាមេរ៉ា AI ដើម្បីបង្កើនកិច្ចការងារធានាសន្តិសុខសង្គម ប៉ុន្ដែដូចខ្ញុំបានលើកអ៊ីចឹងថាឧបករណ៍អេឡិចត្រូនិក AI នេះជាអាវុធមុខ២ សំខាន់យើងត្រូវបានប្រើប្រាស់វាឱ្យបានត្រឹមត្រូវ»។

លោកបានផ្ដល់អនុសាសន៍ថា ក្នុងពេលដែលមានរៀបចំនេះរដ្ឋាភិបាលគួរបង្កើតច្បាប់ការពារទិន្នន័យផ្ទាល់ខ្លួនរបស់ពលរដ្ឋ និងត្រូវធានាពីតម្លាភាព គណនេយ្យភាពរបស់នគរបាលដោយមិនត្រូវប្រើប្រាស់ដើម្បីគំរាមកំហែងឬកៀបសង្កត់ដល់ការអនុវត្តន៍សិទ្ធិរបស់ប្រជាជននោះទេ ជាមួយគ្នានេះការដាក់ស្លាកសញ្ញាឱ្យពលរដ្ឋដឹងថាមានបំពាក់កាមេរ៉ាចាប់ផ្ទៃមុខក៏សំខាន់ផងដែរ។ អ្វីដែលសំខាន់នោះគឺរដ្ឋត្រូវធានាថា ប្រព័ន្ធគ្រប់គ្រងកាមេរ៉ាចាប់ផ្ទៃមុខ និងស្លាកលេខយានយន្តនេះមិនត្រូវស្ថិតក្រោមការគ្រប់គ្រងពីបរទេសណាមួយឡើយ ដើម្បីធានានូវអធិបតេយ្យភាពទិន្នន័យ និងសន្តិសុខជាតិទាំងមូលផងដែរ៕

អត្ថបទដោយ ហ៊ុន សិរីវឌ្ឍន៍

The post ភ្នំពេញនឹងទទួលជំនួយកាមេរ៉ាសម្គាល់ទម្រង់មុខមនុស្សពីចិនជិត៥០០គ្រឿងដើម្បីលើកកម្ពស់សន្តិសុខ appeared first on Kampuchea Thmey Daily.

ចិននឹងផ្តល់ជំនួយមនុស្សធម៌ដល់អ៊ីរ៉ង់ និងលីបង់ ខណៈភាគីជម្លោះព្យាយាមបញ្ចប់សង្គ្រាម

Minea Neu — Wed, 17 Jun 2026 12:52:00 +0000

ពន្លឺក្តីនៃសង្ឃឹមសម្រាប់មជ្ឈិមបូព៌ា កំពុងកើតឡើងបណ្តើរៗ បន្ទាប់ពីសហរដ្ឋអាមេរិក ជប៉ុននិងចិនជាដើម បានសន្យាថា នឹងជួយស្តារប្រទេសអ៊ីរ៉ង់ឡើងវិញ។

ប្រទេសចិន បានប្រកាសនៅថ្ងៃពុធ នេះ ថាខ្លួននឹងផ្តល់ជំនួយមនុស្សធម៌ដល់អ៊ីរ៉ង់និងលីបង់ ខណៈសហរដ្ឋអាមេរិកនិងអ៊ីរ៉ង់កំពុងឈានទៅរកការបញ្ចប់សង្គ្រាម ដោយការចុះហត្ថលេខាលើកិច្ចព្រមព្រៀងសន្តិភាព នៅថ្ងៃសុក្រខាងមុខនេះ។

អ្នកនាំពាក្យក្រសួងការបរទេសចិន លោក Lin Jian ប្រាប់អ្នកយកព័ត៌មាននៅទីក្រុងប៉េកាំងនៅថ្ងៃនេះ ថា៖ « ប្រទេសចិនមានការសោកសៅយ៉ាងខ្លាំង ចំពោះគ្រោះមហន្តរាយមនុស្សធម៌បណ្តាលមកពីជម្លោះអ៊ីរ៉ង់ និងការរីករាលដាលនៃជម្លោះនេះ»។

អ្នកនាំពាក្យក្រសួងការបរទេសចិន លោក Lin Jian ។ រូបភាព៖ Reuters

លោក Lin បន្ថែមថា៖ « ដោយពិចារណាលើស្ថានភាពជាក់ស្តែង នៅក្នុងប្រទេសពាក់ព័ន្ធ ប្រទេសចិនបានសម្រេចចិត្តផ្តល់ជំនួយមនុស្សធម៌ដល់អ៊ីរ៉ង់និងលីបង់[…] ដើម្បីជួយដល់ប្រជាជនបន្ថែមទៀត ដើម្បីការស្តារសេដ្ឋកិច្ច និងការកសាងប្រទេស ក៏ដូចជាការកែលម្អ ជីវភាពរស់នៅរបស់ប្រជាជនឡើងវិញ»។

ការផ្តល់ជំនួយនេះជាលើកទីពីរហើយ ចាប់តាំងពីសហរដ្ឋអាមេរិកនិងអ៊ីស្រាអែលចាប់ផ្តើមសង្គ្រាមប្រឆាំងនឹងអ៊ីរ៉ង់ នៅថ្ងៃទី២៨ ខែកុម្ភៈ ទីក្រុងប៉េកាំងបានផ្តល់ជំនួយដល់ទីក្រុងតេហេរ៉ង់។

ប្រទេសចិនធ្លាប់បានបញ្ជូនជំនួយទៅអ៊ីរ៉ង់ពីមុនម្តង កាលពីខែមីនា។

ការសម្រេចចិត្តបញ្ជូនជំនួយទៅកាន់ប្រទេសទាំងពីរ កើតឡើងពេលសហរដ្ឋអាមេរិក និងអ៊ីរ៉ង់បានយល់ព្រមលើកិច្ចព្រមព្រៀងសន្តិភាពដំបូងសម្របសម្រួលដោយប៉ាគីស្ថាន ហើយទីក្រុងអ៊ីស្លាម៉ាបាដគ្រោងនឹងរៀបចំពិធីចុះហត្ថលេខាថ្ងៃសុក្រ ទី១៩ នៅឯប្រទេសស្វីស។

លោក Lin និយាយថា៖ « ក្នុងនាមជាមិត្តល្អរបស់បណ្តាប្រទេសនៅមជ្ឈិមបូព៌ា ប្រទេសចិននឹងបន្តផ្តល់ការគាំទ្រ […] នឹងខិតខំប្រឹងប្រែងបន្ថែមទៀតសម្រាប់ការចរចាសន្តិភាព និងបន្តដើរតួនាទីវិជ្ជមានក្នុងការស្តារសន្តិភាព និងភាពស្ងប់ស្ងាត់ (នៅមជ្ឈិមបូព៌ា) ឡើងវិញ»។

គួរបញ្ជាក់ថា កិច្ចព្រមព្រៀងនេះក៏អំពាវនាវឱ្យបញ្ចប់ការវាយប្រហាររបស់អ៊ីស្រាអែលក្នុងប្រទេសលីបង់ ដែលមានមនុស្សជិត ៣ ៨០០នាក់ ត្រូវសម្លាប់ ចាប់តាំងពីសង្គ្រាមចាប់ផ្តើម៕

សម្រួល៖ ណឺ មិនា

The post ចិននឹងផ្តល់ជំនួយមនុស្សធម៌ដល់អ៊ីរ៉ង់ និងលីបង់ ខណៈភាគីជម្លោះព្យាយាមបញ្ចប់សង្គ្រាម appeared first on Kampuchea Thmey Daily.

ចិន Archives - Kampuchea Thmey Daily

កូរ៉េខាង​ជើង​ សន្យា​រឹត​បន្តឹង​ចំណង​មិត្ត​ភាព​ជាមួយ​ចិនឱ្យ​រឹង​មាំ​ជាង​ពេលណា​ទាំង​អស់​

រុស្ស៊ី​​អនុម័ត​ការហ្វឹកហ្វឺន​យោធា​យ៉ាង​​​សម្ងាត់​​​ជា​មួយ​​ចិន ដើម្បី​វាយ​អ៊ុយ​ក្រែន​

អាមេរិកបន្ថែមទំនិញបច្ចេកវិទ្យាចិនទៅក្នុងបញ្ចីហាមឃាត់ការនាំចូល ជុំវិញកង្វល់សន្ដិសុខជាតិ​

លោក​ វ៉ាង​ យី​​​ លើក​យោបល់ថា​ អឺរ៉ុប​និង​ចិន​គួរ​តែ​ជា​ដៃ​គូ​សហការ​ ជា​ជាងគូ​ប្រជែង​​

ចិន ​ប្រតិកម្ម​ប្រឆាំង​​​គម្រោងដាក់ពង្រាយ​​ប្រព័ន្ធមីស៊ីលរបស់​អាមេរិក​ លើ​ទឹក​ដី​ជប៉ុន​

ចិននឹង​​ផ្តល់​ជំនួយមនុស្សធម៌​ដល់​អ៊ីរ៉ង់ និងលីបង់ ខណៈភាគី​ជម្លោះ​​ព្យាយាម​បញ្ចប់​សង្គ្រាម​

កូរ៉េខាងជើង សន្យារឹតបន្តឹងចំណងមិត្តភាពជាមួយចិនឱ្យរឹងមាំជាងពេលណាទាំងអស់

រុស្ស៊ីអនុម័តការហ្វឹកហ្វឺនយោធាយ៉ាងសម្ងាត់ជាមួយចិន ដើម្បីវាយអ៊ុយក្រែន

អាមេរិកបន្ថែមទំនិញបច្ចេកវិទ្យាចិនទៅក្នុងបញ្ចីហាមឃាត់ការនាំចូល ជុំវិញកង្វល់សន្ដិសុខជាតិ

លោក វ៉ាង យី លើកយោបល់ថា អឺរ៉ុបនិងចិនគួរតែជាដៃគូសហការ ជាជាងគូប្រជែង

ចិន ប្រតិកម្មប្រឆាំងគម្រោងដាក់ពង្រាយប្រព័ន្ធមីស៊ីលរបស់អាមេរិក លើទឹកដីជប៉ុន

ចិននឹងផ្តល់ជំនួយមនុស្សធម៌ដល់អ៊ីរ៉ង់ និងលីបង់ ខណៈភាគីជម្លោះព្យាយាមបញ្ចប់សង្គ្រាម