ព័ត៌មានអន្ដរជាតិ

កូរ៉េខាងជើង សន្យារឹតបន្តឹងចំណងមិត្តភាពជាមួយចិនឱ្យរឹងមាំជាងពេលណាទាំងអស់

បានផុស

១២ វិនាទី មុន

នៅ

ថ្ងៃពុធ ១ កក្កដា ២០២៦

ដោយ

មេដឹកនាំកូរ៉េខាងជើង លោក គីម ជុងអ៊ុន សន្យាថានឹងបន្តពង្រឹងចំណងមិត្តភាពជាមួយប្រទេសចិន ហើយបានពិពណ៌នាអំពីកិច្ចប្រជុំកំពូលថ្មីៗនេះជាមួយប្រធានាធិបតីចិន លោក ស៊ី ជីនពីង ថាជាឱកាសប្រវត្តិសាស្ត្រក្នុងការជំរុញទំនាក់ទំនងជាមួយប្រទេសជិតខាងដ៏ធំរបស់លោក។

លោក គីម ជុងអ៊ុន និង លោក ស៊ី ជីនពីង។ រូបភាព៖ KCNA

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសារអបអរសាទរមួយផ្ញើជូន លោក ស៊ី ក្នុងឱកាសខួបលើកទី១០៥ នៃការបង្កើតបក្សកុម្មុយនីស្តចិន លោក គីម និយាយថា ជំហររបស់ទីក្រុងព្យុងយ៉ាង គឺដើម្បីអភិវឌ្ឍទំនាក់ទំនងជាមួយទីក្រុងប៉េកាំងជាបណ្តើរៗ។ នេះបើយោងតាមរបាយការណ៍របស់ទីភ្នាក់ងារសារព័ត៌មានកណ្តាលកូរ៉េ (KCNA) នៅថ្ងៃពុធ។

លោក គីម លើកឡើងក្នុងសារនោះថា៖ « វាគឺជាជំហរដ៏រឹងមាំរបស់គណបក្ស និងរដ្ឋាភិបាលរបស់យើង ក្នុងការអភិវឌ្ឍទំនាក់ទំនងមិត្តភាពរវាងកូរ៉េខាងជើង និងចិន ដោយមានឫសគល់យូរអង្វែង និជាប្រវត្តិសាស្ត្រ ព្រមទាំងបណ្តុះលទ្ធិសង្គមនិយមជាស្នូល។ កិច្ចប្រជុំកំពូលទីក្រុងព្យុងយ៉ាងថ្មីៗនេះ គឺជាឱកាសប្រវត្តិសាស្ត្រមួយ នៃការពង្រឹងមិត្តភាព និងការជឿទុកចិត្តគ្នារវាងយើងទាំងពីរ»។

អំឡុងពេលកិច្ចប្រជុំកំពូលរបស់ លោក ស៊ី ជាមួយ លោក គីម នៅកូរ៉េខាងជើង មេដឹកនាំទាំងពីរបានអនុម័តផែនការដ៏វែងឆ្ងាយសម្រាប់ពង្រឹងទំនាក់ទំនងដ៏មានឥទ្ធិពល និងជាយុទ្ធសាស្ត្របំផុត។

យោងតាមប្រព័ន្ធផ្សព្វផ្សាយរដ្ឋចិន លោក ស៊ី បានជំរុញឱ្យមានកិច្ចសហប្រតិបត្តិការការទូត ការអនុវត្តច្បាប់ និងយោធាកាន់តែជិតស្និទ្ធជាមួយកូរ៉េខាងជើង អំឡុងពេលដំណើរទស្សនកិច្ចនោះ៕

សម្រួល៖ ណឺ មិនា