ជំងឺថ្លើម Archives - Kampuchea Thmey Daily

មន្ទីរពេទ្យ ហ្លួង ម៉ែ បំពាក់ម៉ាស៊ីន Fibroscan ជំនាន់ចុងក្រោយ អាចវាស់សុខភាពថ្លើមបានយ៉ាងត្រឹមត្រូវ

Ken Malis — Thu, 02 Apr 2026 03:27:19 +0000

មន្ទីរពេទ្យ ហ្លួង ម៉ែ បានបំពាក់ម៉ាស៊ីន FibroScan ជំនាន់ចុងក្រោយ ពី Echosens ប្រទេសបារាំង មានភ្ជាប់ដោយបច្ចេកវិទ្យាឆ្លាតវៃ SmartExam អាចវាស់វែងសុខភាពថ្លើមបានយ៉ាងត្រឹមត្រូវ និងបង្ហាញលទ្ធផលជាលេខច្បាស់លាស់ ។

បើតាមមន្ទីរពេទ្យ ហ្លួង ម៉ែ CAP^TM វាស់ និងតាមដានជាតិខ្លាញ់ក្នុងថ្លើម (Liver Steatosis)៖ អ្នកជំងឺទឹកនោមផ្អែម អ្នកលើសទម្ងន់ និងអ្នកមានហានិភ័យជំងឺខ្លាញ់រុំថ្លើម។ LSM by VCTE^TM វាស់ភាពរឹងនៃថ្លើម (Liver Fibrosis)៖ អាចរកឃើញការប៉ះពាល់សាច់ថ្លើមនៅដំណាក់កាលដំបូង, តាមដានការវិវត្តនៃកម្រិតប៉ះពាល់សាច់ថ្លើម និងជួយវេជ្ជបណ្ឌិតសម្រេចចិត្តព្យាបាលបានត្រឹមត្រូវ។

បច្ចេកវិទ្យាចុងក្រោយនេះ ចំណាយពេលត្រឹមតែ ៥-១០ នាទី ដោយពុំមានការឈឺចាប់ និងទទួលបានលទ្ធផលភ្លាមៗ។

តើហេតុអ្វីត្រូវពិនិត្យសុខភាពថ្លើម? ព្រោះជំងឺរលាកថ្លើមដោយវីរុស (Viral Hepatitis), ស្រា ឱសថ និងមូលហេតុផ្សេងៗ។ ព្រមទាំងជំងឺខ្លាញ់រុំថ្លើម និងជំងឺក្រិនថ្លើម ជាដើម។ មន្ទីរពេទ្យ ហ្លួង ម៉ែ បានបញ្ជាក់ថា ជំងឺថ្លើម មិនបង្ហាញរោគសញ្ញានៅដំណាក់កាលដំបូងឡើយ៕

The post មន្ទីរពេទ្យ ហ្លួង ម៉ែ បំពាក់ម៉ាស៊ីន Fibroscan ជំនាន់ចុងក្រោយ អាចវាស់សុខភាពថ្លើមបានយ៉ាងត្រឹមត្រូវ appeared first on Kampuchea Thmey Daily.

ការសិក្សាបង្ហាញថា កូវីដ-១៩ អាចបំផ្លាញថ្លើមធ្ងន់ធ្ងរ និងបង្កជាអាប់សែ

Sonya — Wed, 18 Aug 2021 06:39:26 +0000

ជំងឺកូវីដ-១៩ជាជំងឺផ្លូវដង្ហើម ដែលអាចបំផ្លាញសួតធ្ងន់ធ្ងរ ហើយវាថែមទាំងអាចប៉ះពាល់ដល់សរីរាង្គដទៃទៀតនៃរាងកាយផងដែរ។ យោងតាមការស្រាវជ្រាវថ្មីៗនេះ បានបង្ហាញថាវីរុសកូរីដ១៩ ក៏មានសមត្ថភាពបំផ្លាញថ្លើមធ្ងន់ធ្ងរ និងបណ្ដាលឲ្យកើតជំងឺអាប់សែថ្លើមថែមទៀតផង។

លទ្ធផលនៃការស្រាវជ្រាវ

បើតាមប្រភពពីមន្ទីរពេទ្យទីក្រុងដាលី បានបញ្ជាក់ថាអ្នកជំងឺកូវីដចំនួន១៤នាក់ដែលជាសះស្បើយពីជំងឺកូវីដ១៩ បានធ្វើរោគវិនិច្ឆ័យថាកើតជំងឺអាប់សែថ្លើមនៅក្នុងរយៈពេល២ខែចុងក្រោយនេះ។ លោកវេជ្ជបណ្ឌិតAnil Arora ប្រធានវិទ្យាស្ថានវិទ្យាសាស្ត្រថ្លើម ពោះវៀន និងលំពែងបានឲ្យដឹងថា នៅក្នុងរយៈពេល២២ថ្ងៃ ក្រោយជាសះស្បើយពីជំងឺកូវីដ-១៩ ក្លែបថ្លើមទាំងសងខាងរបស់អ្នកជំងឺដែលមានការឆ្លើយតបនឹងប្រព័ន្ធភាពស៊ាំ គឺពោរពេញដោយខ្ទុះនៅទីតាំងជាច្រើន។

រោគសញ្ញា មូលហេតុបង្ក និងការព្យាបាលអាប់សែថ្លើម

ពិតណាស់ ជំងឺអាប់សែថ្លើមជាជំងឺថ្លើមធ្ងន់ធ្ងរ ដែលធ្វើឲ្យថ្លើមរបស់អ្នកជំងឺមានគីសសុទ្ធតែខ្ទុះ។ ជាក់ស្ដែង ថ្លើមជាសរីរាង្គដ៏សំខាន់នៃរាងកាយ មានតួនាទីចម្បងនៅក្នុងប្រព័ន្ធរំលាយអាហារ និងជួយដល់មុខងារសំខាន់ៗដទៃទៀត។ ជាទូទៅ អាប់សែថ្លើមបង្កឡើងដោយការឆ្លងមេរោគដែលរាលដាលនៅសរីរាង្គដទៃទៀត។

ជំងឺនេះអាចព្យាបាលយ៉ាងងាយស្រួល ប្រសិនបើយើងធ្វើរោគវិនិច្ឆ័យទាន់ពេលវេលា។ ផ្ទុយទៅវិញ វានឹងក្លាយទៅជាជំងឺរ៉ាំរ៉ៃ ប្រសិនបើយើងមិនធ្វើការព្យាបាលឲ្យទាន់ពេលទេនោះ។ ក្នុងករណីដែលពុំមានការព្យាបាលអាប់សែថ្លើម វាអាចបណ្ដាលឲ្យការឆ្លងមេរោគពេញរាងកាយ ឬហៅថាជំងឺ Sepsis ដែលជាការឆ្លងមេរោគឈាមអាចគ្រោះថ្នាក់ដល់អាយុជីវិត។

រោគសញ្ញាទូទៅមួយចំនួនយើងគួរដឹង

ឈឺពោះ
ក្អកស្ងួត
ទឹកនោមក្រមៅ
រាករូស
ឈឺសាច់ដុំ ឬឈឺចាប់នៃសន្លាក់ឆ្អឹង
បាត់បង់ចំណង់អាហារ
ចង្អោរ
បែកញើស
លាមកប្ដូរពណ៌
រោគសញ្ញានៃជំងឺខាន់លឿងស្រួចស្រាល់

រោគសញ្ញាធ្ងន់ធ្ងរមួយចំនួន រួមមាន៖

ក្ដៅខ្លួន
ពិបាកដកដង្ហើម
ហត់ខ្លាំង
មមើមមាយ
វង្វេងស្មារតី៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ ក្រៅពីសួត នេះជាផលប៉ះពាល់ខួរក្បាលមួយចំនួនបណ្ដាលមកពីវីរុសកូវីដ-១៩

ចុចអាន៖ អ្វីជារោគសញ្ញាកូវីដ-១៩ រយៈពេលវែង? បង្កផលរំខានបែបណា?

The post ការសិក្សាបង្ហាញថា កូវីដ-១៩ អាចបំផ្លាញថ្លើមធ្ងន់ធ្ងរ និងបង្កជាអាប់សែ appeared first on Kampuchea Thmey Daily.

វ៉ាក់សាំងកូវីដ ៣ប្រភេទកំពុងមានវត្តមាននៅកម្ពុជា អាចចាក់ជូនអ្នកជំងឺថ្លើមបានដោយសុវត្ថិភាពនិងប្រសិទ្ធភាព

Sonya — Fri, 13 Aug 2021 09:12:53 +0000

វ៉ាក់សាំង ៣ ប្រភេទដែលកំពុងមានវត្តមានក្នុងប្រទេសកម្ពុជាបច្ចុប្បន្ន ត្រូវបានអ្នកជំនាញអះអាងថា អាចចាក់ជូនអ្នកកើតជំងឺថ្លើមបានដោយសុវត្ថិភាពនិងប្រសិទ្ធភាព។

បើយោងតាមការចុះផ្សាយពីគេហទំព័រ NSH របស់អង់គ្លេស ការចាក់វ៉ាក់សាំង AstraZeneca វ៉ាក់សាំង Moderna និងវ៉ាក់សាំង Pfizer ត្រូវបានអនុញ្ញាត្តឱ្យប្រើប្រាស់ចំពោះប្រជាជនទូទៅ បូករួមទាំងអ្នកដែលប្រឈមហានិភ័យខ្ពស់រួមមាន មនុស្សចាស់ និងអ្នកដែលមានជំងឺរ៉ាំរ៉ៃមួយចំនួនផងដែរ។ ក្នុងនោះអ្នកជំងឺថ្លើម ក៏មានឱកាសទទួលវ៉ាក់សាំងទាំង ៣នេះដូចគ្នា។

តាមការសិក្សាបង្ហាញថា ក្រុមអ្នកជំងឺរលាកថ្លើមប្រភេទB ប្រភេទC ពុំមានផលប៉ះពាល់ឬគ្រោះថ្នាក់ដល់អាយុជីវិតឡើយ។

ថ្វីត្បិតប្រសិទ្ធភាព និងសុវត្ថិភាពសម្រាប់អ្នកជំងឺថ្លើម ក្រោយចាក់ថ្នាំបង្ការទាំង ៣ខាងលើ នៅពុំទាន់មានការបញ្ជាក់ច្បាស់អំពីកម្រិតការពារក៏ដោយ ប៉ុន្តែប្រសិទ្ធភាពប្រឆាំងនឹងការចម្លងវីរុសកូវីដ-១៩ នៅតែមានចំពោះអ្នកជំងឺថ្លើមដែលចាក់ពីរដូសរួចរាល់។

ទោះយ៉ាងណា មុនទទួលការចាក់វ៉ាក់សាំងសម្រាប់ក្រុមអ្នកជំងឺថ្លើម តម្រូវឱ្យមានការពិនិត្យ និងពិភាក្សាជាមួយវេជ្ជបណ្ឌិតសិន ដើម្បីឱ្យច្បាស់ពីស្ថានភាពសុខភាពជាក់ស្ដែង។

គួរបញ្ជាក់ថា វ៉ាក់សាំងទាំង ៣ខាងលើ មានវត្តមាននៅកម្ពុជាហើយ ដែលវ៉ាក់សាំង Moderna និងវ៉ាក់សាំង Pfizer ត្រូវបានអនុញ្ញាតឱ្យនាំចូលដោយមន្ទីរពេទ្យឯកជនសម្រាប់ពលរដ្ឋដែលមានលទ្ធភាពចំណាយដោយខ្លួនឯង។ រីឯវ៉ាក់សាំង AstraZeneca របស់អង់គ្លេស កំពុងប្រើជាវ៉ាក់សាំងដូសទី៣ ឬដូសជំរុញ សម្រាប់អ្នកដែលប្រឈមហានិភ័យខ្ពស់៕

ប្រែសម្រួល៖ សន្យា

ចុចអាន៖ អ្នកមានជំងឺរ៉ាំរ៉ៃប៉ុន្មានមុខនេះ អាចចាក់វ៉ាក់សាំង Johnson & Johnson បានដោយសុវត្ថិភាព

ចុចអាន៖ អ្នកជំងឺមហារីកដែលចាក់វ៉ាក់សាំង Pfizer ពេញ ២ ដូស ដុះអង់ទីគ័រប្រឆាំងកូវីដមិនគួរឲ្យជឿ

The post វ៉ាក់សាំងកូវីដ ៣ប្រភេទកំពុងមានវត្តមាននៅកម្ពុជា អាចចាក់ជូនអ្នកជំងឺថ្លើមបានដោយសុវត្ថិភាពនិងប្រសិទ្ធភាព appeared first on Kampuchea Thmey Daily.

សញ្ញាព្រមានទាំង៦ បញ្ជាក់ថាថ្លើមពោរពេញដោយជាតិពុល

Sonya — Tue, 13 Jul 2021 01:16:37 +0000

ថ្លើមមានមុខងារសំខាន់ៗជាច្រើននៅក្នុងរាងកាយរបស់យើង ដូចជាជួយកំណត់កម្រិតជាតិគីមីភាគច្រើននៅក្នុងឈាម និងបញ្ចេញចោលទឹកប្រមាត់ ដើម្បីជួយកម្ចាត់កាកសំណល់។ រាល់ឈាមចេញពីក្រពះ និងពោះវៀននឹងឆ្លងកាត់ថ្លើម ហើយថ្លើមបានបំបែក ធ្វើឲ្យឈាមមានតុល្យភាព ក៏ដូចជាបង្កើតសារធាតុចិញ្ចឹមនៅក្នុងរាងកាយទាំងមូល។

ដូច្នេះហើយ ការថែទាំថ្លើមឲ្យមានសុខភាពល្អ គឺជារឿងចាំបាច់បំផុត ហើយការសង្កេតមើលពីសញ្ញាព្រមានដែលទាក់ទងនឹងថ្លើម ក៏ជារឿងដែលយើងមិនគួរមើលរំលងដែរ។ សញ្ញាព្រមានទាំង៦នេះ បញ្ជាក់ថាថ្លើមរបស់យើងកំពុងតែមានបញ្ហាហើយ។

១. ការឈឺចាប់នៅបរិវេណថ្លើម

ការឈឺចាប់នៅបរិវេណខាងស្ដាំផ្នែកខាងលើនៃពោះគឺជាសញ្ញាបង្ហាញថាថ្លើមរបស់យើងកំពុងតែមានបញ្ហា។ ជាក់ស្ដែង ថ្លើមមានមុខងារបន្សាបជាតិពុល និងជួយឲ្យរាងកាយច្រោះកាកសំណល់ ក៏ដូចជាជួយរាងកាយបំប្លែងអាហារទៅជាសារធាតុចិញ្ចឹម។ នៅពេលដែលថ្លើមមានជំងឺ វាមិនអាចដំណើរការប្រកបដោយប្រសិទ្ធភាព ហើយវានឹងមានអាការៈហើម ព្រមទាំងឈឺចាប់។

២. ហើមជើង និងកជើង

ជាមួយគ្នានេះដែរ ថ្លើមព្យាយាមជួសជុលខ្លួនឯងដោយបង្កើតជាជាលិកាស្លាកស្នាម ។ ជាលិកាស្លាកស្នាមកាន់តែច្រើន មានន័យថាថ្លើមប្រឹងប្រែងបំពេញមុខងារកាន់តែខ្លាំង ហើយជាលទ្ធផល វានឹងបណ្ដាលឲ្យយើងកើតសម្ពាធឈាមនៅសរសៃឈាមវ៉ែនផូក ។ សារធាតុរាវនឹងកកកុញនៅលើជើង ដែលនាំឲ្យកើតមានអាការៈហើមនៅជើង កំភួនជើង ឬលើភ្លៅទាំងសងខាង។

៣. ឡើងទម្ងន់

នៅពេលដែលថ្លើមមិនអាចទប់ទល់នឹងជាតិពុលពីគ្រឿងស្រវឹង ភេសជ្ជៈដែលមានជាតិស្ករសិប្បនិម្មិត អាហារដែលមានជាតិខ្លាញ់ខ្ពស់ និងថ្នាំមួយចំនួនទេនោះ វាអាចនឹងផ្ទុកជាតិពុលមិនរលាយនៅក្នុងកោសិកាខ្លាញ់។

៤. អាឡ័កស៊ី

ជាញឹកញាប់ អាលែកហ្ស៊ីបណ្ដាលមកពីថ្លើមមិនសូវសកម្ម និងដំណើរការហួសកម្រិត។ នៅពេលដែលមានសារធាតុច្រើនជ្រុលចូលទៅក្នុងចរន្តឈាម ខួរក្បាលនឹងចាត់ទុកថាវាជាភ្នាក់ងារបង្កជាអាលែកហ្ស៊ី រួចបញ្ចេញអង់ទីករ និងសារធាតុគីមី ដែលបង្កឲ្យមានកន្ទួលរមាស់។

៥. ភ្នែក និងស្បែកពណ៌លឿង

អាការៈភ្នែក និងស្បែកឡើងពណ៌លឿង ជារោគសញ្ញានៃការខូចមុខងារណាមួយ។ ជាទូទៅ ថ្លើមដែលមានជំងឺនឹងធ្វើឲ្យប្រព័ន្ធរាងកាយមានសារធាតុbilirubin ច្រើន ហើយវាជាសារធាតុពណ៌លឿនដែលបានបង្កើតឡើងដោយការបំផ្លាញនៃកោសិកាឈាមក្រហមដែលងាប់នៅក្នុងថ្លើម។ នៅពេលដែលថ្លើមមិនអាចកម្ចាត់ចោលសារធាតុbilirubin ជាមួយនឹងកោសិកាឈាមក្រហមចាស់ៗទេនោះ ភ្នែក និងស្បែករបស់យើងនឹងប្រែទៅជាពណ៌លឿង៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ កុំចេះតែឲ្យកូនលេបថ្នាំផ្ដេសផ្ដាស ប្រយ័ត្នពុលថ្នាំខូចថ្លើម តម្រងនោម

ចុចអាន៖ ការរលាកថ្លើមធ្ងន់ធ្ងរដោយសារគ្រឿងស្រវឹង!

The post សញ្ញាព្រមានទាំង៦ បញ្ជាក់ថាថ្លើមពោរពេញដោយជាតិពុល appeared first on Kampuchea Thmey Daily.

អ្នកមានជំងឺថ្លើមអាចចាក់វ៉ាក់សាំងកូវីដ៣ប្រភេទនេះ

Sonya — Sat, 12 Jun 2021 04:38:00 +0000

កាលពីខែមីនា ឆ្នាំ ២០២១ នេះ ចក្រភពអង់គ្លេសបានអនុម័តឱ្យអ្នកមានជំងឺថ្លើមអាចចាក់វ៉ាក់សាំងការពារវីរុសកូវីដ-១៩ ដូចទៅនឹងបុគ្គលទូទៅដែរ។

បើយោងតាមការចុះផ្សាយពីគេហទំព័រ NSH របស់អង់គ្លេស ការចាក់វ៉ាក់សាំង AstraZeneca វ៉ាក់សាំង Moderna និងវ៉ាក់សាំង Pfizer ត្រូវបានអនុញ្ញាត្តឱ្យប្រើប្រាស់ចំពោះប្រជាជនទូទៅ បូករួមទាំងអ្នកដែលប្រឈមហានិភ័យខ្ពស់រួមមាន មនុស្សចាស់និងអ្នកដែលមានជំងឺរ៉ាំរ៉ៃមួយចំនួនផងដែរ។ ក្នុងនោះអ្នកជំងឺថ្លើម ក៏មានឱកាសទទួលវ៉ាក់សាំងដូចគ្នា។

ដោយឡែកអ្នកជំងឺមហារីកថ្លើម អ្នកប្តូរសរីរាង្គថ្លើម អ្នកជំងឺក្រិនថ្លើម អ្នកជំងឺរលាកថ្លើម ដែលមានប្រព័ន្ធការពារចុះខ្សោយ ក៏ត្រូវបានអនុញ្ញាតឱ្យទទួលការចាក់វ៉ាក់សាំងបានដែរ ដោយសារក្រុមអ្នកជំងឺទាំងនេះ អាចវិវត្តកាន់តែធ្ងន់ធ្ងរ ប្រសិនពួកគាត់ឆ្លងកូវីដ-១៩។ យ៉ាងណាមិញ ប្រសិទ្ធភាពនិងសុវត្ថិភាពសម្រាប់អ្នកជំងឺថ្លើម ក្រោយចាក់ថ្នាំបង្ការ នៅពុំទាន់មានការបញ្ជាក់ច្បាស់ថា អាចការពារបានកម្រិតណាទេ។ ប៉ុន្តែប្រសិទ្ធភាពការពារការចម្លងវីរុសកូវីដ-១៩ នៅតែមានចំពោះអ្នកជំងឺថ្លើមដដែល។

ទោះយ៉ាងណា មុនទទួលការចាក់វ៉ាក់សាំងសម្រាប់ក្រុមអ្នកជំងឺថ្លើម តម្រូវឱ្យមានការពិនិត្យនិងពិភាក្សាជាមួយវេជ្ជបណ្ឌិតសិន ដើម្បីឱ្យច្បាស់ពីស្ថានភាពជាក់ស្ដែង។ មួយវិញទៀត វ៉ាក់សាំងទាំង៣ខាងលើ កម្ពុជានៅមិនទាន់បញ្ជារទិញមកប្រើប្រាស់នៅឡើយ៕

ប្រែសម្រួល៖ សន្យា

ប្រភព៖ NSH

ចុចអាន៖ ៣ សំណួរពាក់ព័ន្ធអ្នកជំងឺទឹកនោមផ្អែមនិងការចាក់វ៉ាក់សាំងកូវីដ-១៩

ចុចអាន៖ កុំប្រហែស! ទោះចាក់វ៉ាក់សាំងហើយ ក៏នៅតែអាចឆ្លងកូវីដដែរ

The post អ្នកមានជំងឺថ្លើមអាចចាក់វ៉ាក់សាំងកូវីដ៣ប្រភេទនេះ appeared first on Kampuchea Thmey Daily.

គ្រោះថ្នាក់លាក់មុខ ដែលបង្កពីជំងឺរលាកថ្លើមដោយមេរោគប្រភេទ”សេ”!

Sorn Phanith — Wed, 06 Jan 2021 01:27:49 +0000

ជំងឺរលាកថ្លើមដោយមេរោគប្រភេទ សេ (Hépatite C) គឺជាជំងឺមួយដែលយើងទាំងអស់គ្នាតែងតែបានដឹង និងបានជួបប្រទះជាញឹកញាប់ ហើយនៅពេលខ្លះជំងឺមួយនេះ ក៏អាចបណ្តាលឲ្យមានផលប៉ះពាល់ជាច្រើនដល់សុខភាព និងអាយុជីវិត ផងដែរ។

រោគសញ្ញា ដែលកើតអាចមាននៅលើអ្នកជំងឺ គឺអាស្រ័យទៅលើកម្រិតនៃការរលាក និងសភាពរបស់សាច់ថ្លើមរបស់អ្នកជំងឺ ផងដែរ (សាច់ថ្លើមនៅទន់ធម្មតាគ្រាន់តែមានការរលាក, សាច់ថ្លើមរឹងនិងថ្លើមក្រិន)។ នៅខាងក្រោមនេះ គឺជាសញ្ញាមួយចំនួន ដើម្បីអាចឲ្យយើងបានគិតទៅដល់ជំងឺរលាកថ្លើម៖ មានការហេវហត់ ចុះខ្សោយកម្លាំង និងសុខភាពដោយមិនមានមូលហេតុច្បាស់លាស់, ឡើងលឿងភ្នែក និងស្បែក, មានរោគសញ្ញាស្រដៀងនឹងជំងឺផ្ដាសាយធំ, មានការហើមជើងជាដើម…។ គួរកត់សំគាល់ផងដែរថា ជាង ៨០% នៃអ្នកជំងឺរលាកថ្លើម គឺមិនមានរោគសញ្ញាអ្វីច្បាស់លាស់នោះឡើយ ដូច្នេះមានតែការពិនិត្យឈាម ដើម្បីរកវត្តមានរបស់អង្គបដិប្រាណវីរុសសេ Anticorp HCV និងរាប់មេរោគ (PCR HCV) ទេ ដែលអាចកំណត់រោគវិនិច្ឆ័យនៃជំងឺប្រភេទនេះបាន ។

ការចម្លងរបស់មេរោគថ្លើមប្រភេទ សេ នេះគឺវាអាចឆ្លងបានតាមរយៈ ការប៉ះពាល់ជាមួយនឹងឈាម ទឹករងៃ ការមុតដាច់ស្បែក ការរួមភេទដោយមិនមានប្រើប្រាស់ស្រោមអនាម័យ ការប្រើប្រាស់វត្ថុមុតស្រួចចាក់ឆ្លងកាត់ស្បែក…។

វិធានការក្នុងការបង្ការជំងឺនេះ គឺជៀសវាងរាល់ការបះពាល់ឈាម និងទឹករងៃរបស់អ្នកជំងឺ រួមភេទដោយប្រើប្រាស់ស្រោមអនាម័យឲ្យបានត្រឹមត្រូវ ជៀសវាងការប្រើវត្ថុមុតស្រួចរួមគ្នា។ គួរសំគាល់ផងដែរថា យើងមិនមានវ៉ាក់សាំងសម្រាប់ចាក់ការពារមេរោគប្រភេទនេះ នៅឡើយទេ។

ការពិនិត្យសុខភាព និង ការធ្វើរោគវិនិច្ឆ័យទាន់ពេលវេលានៅដំណាក់កាលដំបូងជាមួយគ្រូពេទ្យជំនាញនៃមន្ទីរពេទ្យកាល់ម៉ែត (ថ្លើមមិនទាន់ក្រិន ឫ មិនមានដុំមហារីក) របស់ជំងឺរលាកថ្លើមប្រភេទ សេ នេះគឺអាចអនុញ្ញាតឲ្យគ្រូពេទ្យធ្វើការព្យាបាលបានជាសះស្បើយទាន់ពេលវេលានិងដើម្បីជៀសវាងរាល់ផលវិបាករបស់ជំងឺនេះផងដែរ (ការរលាករាំរៃ, ក្រិនថ្លើម, ដុំមហារីកថ្លើម, ទាចទឹកជាដើម…)៕

អត្ថបទ៖ រស្មី

សូមចុចអាន៖ តើ”ក្អកឈាម” បណ្តាលមកពីអ្វី?

The post គ្រោះថ្នាក់លាក់មុខ ដែលបង្កពីជំងឺរលាកថ្លើមដោយមេរោគប្រភេទ”សេ”! appeared first on Kampuchea Thmey Daily.

ជំងឺថ្លើម Archives - Kampuchea Thmey Daily

មន្ទីរពេទ្យ ហ្លួង ម៉ែ បំពាក់ម៉ាស៊ីន​ Fibroscan ជំនាន់ចុងក្រោយ អាចវាស់សុខភាពថ្លើមបានយ៉ាងត្រឹមត្រូវ

ការសិក្សាបង្ហាញ​ថា កូវីដ-១៩ ​អាច​បំផ្លាញ​ថ្លើម​ធ្ងន់ធ្ងរ​ និង​បង្ក​ជា​អាប់សែ

លទ្ធផល​នៃ​ការ​ស្រាវជ្រាវ​

រោគ​សញ្ញា​ មូលហេតុ​បង្ក​ និង​ការ​ព្យាបាល​អាប់សែ​ថ្លើម

រោគ​សញ្ញា​ទូទៅ​មួយ​ចំនួន​យើង​គួរ​ដឹង​

​​​​រោគ​សញ្ញា​ធ្ងន់ធ្ងរ​មួយ​ចំនួន​ រួម​មាន​៖