ដើរលេង Archives - Kampuchea Thmey Daily

ចង់ជ្រមុជទឹកមើលផ្កាថ្ម ត្រូវដឹងពីរឿងទាំងនេះសិន

Boa Sokunveary — Fri, 09 Dec 2022 02:43:14 +0000

ការជ្រមុជទឹកមើលផ្កាថ្មគឺជារឿងមួយគួរឲ្យចាប់អារម្មណ៍សម្រាប់ធ្វើពេលទៅលេងសមុទ្រ តែអាចបង្កគ្រោះថ្នាក់ដល់ជីវិតមិនចាញ់ការឡើងភ្នំដែរ។ ដើម្បីធានាសុវត្ថិភាពអំឡុងពេលជ្រមុជទឹកមើលផ្កាថ្ម យើងត្រូវដឹងនិងធ្វើតាមវិធីខាងក្រោមនេះឲ្យបានត្រឹមត្រូវ៖

១. ត្រូវមានសុខភាពល្អ និងមានទំហំសមល្មម

អ្នកលើសគីឡូ ឬខ្វះគីឡូមិនគួរធ្វើការជ្រមុជទឹកទេ។ ក្នុងករណីមិនធ្លាប់ជ្រមុជទឹកពីមុនមក អ្នកគួរទៅពេទ្យឆែកសុខភាពនិងពិគ្រោះមុនមកជ្រមុជទឹក។

២. ស្ដាប់តាមអ្នកនាំជ្រមុជ

អ្នកដែលនាំផ្លូវត្រូវតែជាអ្នកជំនាញ ឬបទពិសោធន៍យូរឆ្នាំ រាល់ពាក្យបង្គាប់របស់គាត់អ្នកត្រូវយកចិត្តទុកដាក់ស្ដាប់និងធ្វើតាមជៀសវាងជួបបញ្ហា។

៣. ពិនិត្យមើលឧបករណ៍ឲ្យម៉ត់ចត់

បំពង់អុកស៉ីសែន ខោអាវ ឬឧបករណ៍ផ្សេងៗត្រូវមានគុណភាពមិនដាច់រហែកឬបែកបាក់។

៤. យកចិត្តទុកដាក់នឹងមនុស្សជុំវិញខ្លួន

ចុះទៅប៉ុន្មាននាក់ មើលជុំវិញខ្លួន កុំឲ្យមានបញ្ហាបាត់គ្នា។

៥. កុំបង្អត់ដង្ហើម

មុនចុះទឹក អ្នកជំនាញនឹងបង្រៀនអ្នកពីរបៀបដកដង្ហើម។

៦. ហឹងត្រចៀក

ស្រដៀងគ្នានឹងការជិះយន្តហោះដែរ នៅក្នុងទឹកផ្ដល់សម្ពាធឲ្យអ្នកខុសពីលើគោក ដូច្នេះការហឹងត្រចៀកគឺជារឿងធម្មតា។

៧. នៅក្បែរអ្នកនាំផ្លូវជានិច្ច

ទោះបីជាចុះទៅដើម្បីទស្សនាទេសភាពផ្កាថ្មក្ដី អ្នកមិនត្រូវខ្វះការយកចិត្តទុកដាក់ចំពោះអ្នកនាំផ្លូវទេ។

៨. ឧស្សាហ៍ពិនិត្យអុកស៉ីសែន

អ្នកនាំផ្លូវជំនាញប្រាកដជាឧស្សាហ៍សួរអ្នកពីបរិមាណអុកស៉ីសែនដែលនៅសល់។

៩. ហាមជ្រមុជទឹកមិនហួសជម្រៅកំណត់

មិនគួរជ្រមុជលើស ៤០ម៉ែត្រដាច់ខាត ណាមួយហួស ៤០ម៉ែត្រទៅក៏មិនមានអ្វីមើលដែរ។

១០. ហាមប៉ះពាល់អ្វីផ្ដេសផ្ដាស

ផ្កាថ្មភាគច្រើនមានសភាពរឹង ងាយធ្វើឲ្យមនុស្សរបួស ជួនកាលពុលក៏ថាបាន។

១១. ប្រាប់អ្នកនៅក្បែរខ្លួន បើមានអារម្មណ៍មិនស្រួល

ពេលថប់ដង្ហើម ពិបាកដកដង្ហើម ឬហត់ ត្រូវផ្ដល់សញ្ញាឲ្យអ្នកនាំផ្លូវភ្លាម។

១២. ហាមជិះយន្តហោះបន្ទាប់ពីជ្រមុជទឹកហើយក្រោម ២៤ម៉ោង

ការផ្លាស់ប្ដូរសម្ពាធលឿនពេកអាចបណ្ដាលឲ្យអ្នកឈឺ ដូច្នេះអ្នកគប្បីរង់ចាំ២៤ម៉ោងសិន មុននឹងឡើងទៅការផ្លាស់ប្ដូរសម្ពាធមួយទៀត។

បន្ទាប់ពីថ្ងៃជ្រមុជទឹក យល់ល្អគួរចំណាយពេលមួយថ្ងៃលំហែកាយនៅតាមឆ្នេរសមុទ្រឲ្យស្រឡះខួរក្បាលល្អសម្រាប់សុខភាពជាងទៅផ្ទះភ្លាម៕

ប្រែសម្រួលដោយ៖ វារី

ចុចអាន៖ កំហុសឆ្គង ៥យ៉ាង អ្នកដើរលេងឆ្លងឆ្នាំ ប្រព្រឹត្តដោយមិនដឹងខ្លួន

ចុចអាន៖ ៦ យ៉ាង ត្រូវត្រៀមជាស្រេច មុនពេលទៅលេងសមុទ្រ

The post ចង់ជ្រមុជទឹកមើលផ្កាថ្ម ត្រូវដឹងពីរឿងទាំងនេះសិន appeared first on Kampuchea Thmey Daily.

កំហុសឆ្គង ៥យ៉ាង អ្នកដើរលេងឆ្លងឆ្នាំ ប្រព្រឹត្តដោយមិនដឹងខ្លួន

Sonya — Fri, 31 Dec 2021 06:11:27 +0000

ដើរលេងដល់ណាក៏ដោយ ក៏អាចលែងសប្បាយវិញភ្លាមៗ ប្រសិនបើយើងនៅប្រព្រឹត្តកំហុសឆ្គងទាំង ៥ខាងក្រោម ជាពិសេសកំលុងពេលបុណ្យឆ្លងឆ្នាំសកលនេះ!

១. គេងមិនគ្រប់គ្រាន់

អ្នកណាក៏ដូចអ្នកណា ឲ្យតែពេលបានទៅដើរលេង ដឹងតែសប្បាយចិត្តពេក រហូតខ្លះគេងមិនលក់ក៏មាន។ ការគេងមិនបានគ្រប់គ្រាន់អាចធ្វើឲ្យយើងញ៉ាំច្រើន វិលមុខ ពុលឡាន និងអាចប៉ះពាល់ដល់អារម្មណ៍បាន។ ពេលយប់មុនដើរ យើងគួរគេងឲ្យបាន ៦-៩ម៉ោង ឬបើគេងមិនបានច្រើនពេលយប់ យើងអាចសម្រាកនៅតាមផ្លូវជំនួសក៏បាន។

២. អត់អាហារពេលព្រឹក

ពេលធ្វើដំណើរតាមផ្លូវទៅដល់គោលដៅ យើងមិនសូវខ្វាយខ្វល់នឹងអាហារដែលយើងញ៉ាំទេ ភាគច្រើនគិតថា ញ៉ាំអីក៏បានឲ្យឆ្អែតៗពោះទៅ ជាពិសេសអាហារពេលព្រឹក។ តែយើងត្រូវដឹងថា អាហារពេលព្រឹកជាអាហារសំខាន់ជាងគេក្នុងមួយថ្ងៃៗ ហេតុនេះ គួរញ៉ាំអាហារពេលព្រឹកល្អៗ ជួយផ្ដល់ថាមពល ដើម្បីកុំឲ្យយើងឆាប់អស់កម្លាំងតាមផ្លូវ។

៣. មិនកក់កន្លែងសម្រាក

ដើរលេង ចេះតែដើរពេកមិនល្អទេ ហោចណាស់មានគោលដៅឱ្យបានស្រួលបួលបន្តិច ជាពិសេសកន្លែងសម្រាកតែម្ដង។ ប្រសិនបើយើងដើរលេងព្រៃភ្នំដោយការបោះតង់ វាមិនថ្វីទេ។ ផ្ទុយទៅវិញ ដើរលេងសមុទ្រ ឬរមណីយដ្ឋាននានា ដែលមិនអាចសម្រាកតង់បាន បើមិនឆែកន្លែងឬកក់ទុកជាមុនទេ ប្រយ័ត្នគេងតាមផ្លូវទៅ។

៤. គ្មានថ្នាំសង្កូវតាមកាបូប

សម្ភារវេជ្ជសាស្ត្រ និងថ្នាំសង្កូវមួយចំនួនដូចជា ស្រៃយ៍បាញ់មូស ប៉ារ៉ាសេតាម៉ុល ថ្នាំបំបាត់ឈឺក្បាល ថ្នាំរាក ឧបករណ៍វាស់កម្ដៅជាដើម ចាំបាច់បំផុតត្រូវតែដាក់តាមកាបូបពេលដើរលេង។ បើគ្មានពួកវាទេ ឈឺថ្កាត់យប់ព្រលប់ មុខតែពិបាក រត់រកពេទ្យ។ ម្យ៉ាងកំលុងពេលនេះ ជាវិបត្តិនៃជំងឺកូវីដរាតត្បាត ដូច្នេះត្រូវមានអាល់កុល ឬជែល កុំខានឱ្យសោះ។

៥. អនឡាញមិនឈប់

ដើរលេង ពេលខ្លះប្រាកដជាត្រូវការអ៊ីនធើណិត បង្ហោះរូប ឬមើលផែនទីជាដើម ទើបកាន់តែងាយស្រួល។ បើមើល ក៏មើលទៅ តែបើដើរលេងបណ្ដើរ អនឡាញឆាតបណ្ដើរ ដូចមិនដើរលេងអ៊ីចឹងដែរ។ គួរបិទអ៊ីនធើណិតខ្លះ នោះជាការល្អជាង។

បិទអនឡាញ ដើម្បីទទួលព័ត៌មាន សេចក្តីជូនដំណឹងផ្សេង ធ្វើឲ្យយើងដើរលេងទទួលបានបទពិសោធន៍រីករាយច្រើន មានអារម្មណ៍យកចិត្តទុកដាក់ ពោល មិនរវល់នឹងសាររំខានផ្សេងៗ ជាហេតុធ្វើឲ្យអារម្មណ៍រីករាយ សុខភាពផ្លូវចិត្ត ក៏ល្អទៅតាមនឹងដែរ៕

អត្ថបទ៖ សន្យា

ចុចអាន៖ ដោយសារគុណសម្បត្តិ ៧នេះហើយ ទើបគេនិយមដើរលេងជួបជុំគ្រួសារ

ចុចអាន៖ ចាយតិចដើរបានច្រើនកន្លែង ឲ្យតែចេះតិចនិកនេះ ធានា សប្បាយយកទៅណាអស់

The post កំហុសឆ្គង ៥យ៉ាង អ្នកដើរលេងឆ្លងឆ្នាំ ប្រព្រឹត្តដោយមិនដឹងខ្លួន appeared first on Kampuchea Thmey Daily.

ចង់ធ្វើដំណើរកម្សាន្តទាំងមានផ្ទៃពោះ ត្រូវដើរមុនថ្ងៃសម្រាលប៉ុន្មានសប្ដាហ៍ទើបល្អ?

Sonya — Fri, 31 Dec 2021 04:19:00 +0000

អ្នកមានផ្ទៃពោះបើចង់ដើរលេងបានអត់? លោកវេជ្ជបណ្ឌិត ចាន់ ស៊ីណេត បានឲ្យដឹងថា បើចង់ដើរលេងប្រាកដជាបាន តែសម្រាប់អ្នកកៀកថ្ងៃសម្រាលមិនបានឡើយ យ៉ាងហោចណាស់ក៏មុនសប្ដាហ៍ ៣៦ដែរ។

លោកបានបន្តទៀតថា មុន៣៦ សប្ដាហ៍ដើរលេងបាន ព្រោះក្រោយ ៣៦ សប្ដាហ៍គឺជាវេលាគ្រប់ខែ កូនអាចសម្រាលក្នុងពេលណាមួយដែលយើងមិនដឹងមុន។ ប្រធានផ្នែកសម្ភព និងរោគស្ត្រីនៃមន្ទីរពេទ្យមិត្តភាពកម្ពុជា-ចិន សែនសុខ បានបញ្ជាក់ថា ការធ្វើដំណើរកម្សាន្តនេះទៀតសោត គឺសម្រាប់ម៉ាក់ៗ និងកូនក្នុងផ្ទៃមានសុខភាពប្រក្រតីប៉ុណ្ណោះ ចំណែកឯការដើរកម្សាន្តទៀត ក៏មិនមែនជាឡើងភ្នំ ចូលព្រៃ ដែលស្ថានភាពផ្លូវពិបាក និងដាច់ស្រយាលឡើយ។

ការដើរកម្សាន្តពិតជាជួយឲ្យអារម្មណ៍ស្ត្រីមានផ្ទៃពោះដែលកំពុងតែធុញថប់ ហត់នឿយ និងទន្ទឹងចាំមើលមុខកូនយូរ បានធូរស្រាលរីករាយឡើងវិញបានមែន ហើយកូនក្នុងផ្ទៃក៏មានសុខភាពល្អទៅតាមនោះដែរ។ ប៉ុន្តែបើកន្លែង និងកត្តាសុខភាពផ្ទាល់ខ្លួនមិនល្អ ថែមទាំងកន្លែងដាច់ស្រយាល ក្នុងករណីមានបញ្ហាណាមួយ មណ្ឌលសុខភាព រួមទាំងគ្រូពេទ្យនៅទីនោះ គ្មានឧបករណ៍ ឬដឹងស្ថានភាពសុខភាពយើង និងកូនកន្លងមក ច្បាស់ជានាំគ្រោះថ្នាក់។

រឿងមួយចាំបាច់ដែលស្រ្តីពពោះគ្រប់រូបត្រូវដឹង គឺថាការកើតកូនមិនគ្រប់ខែមុន ៣៦ សប្ដាហ៍ក៏អាចកើតឡើងបានគ្រប់ពេល ដូចនេះបើទៅផ្លូវឆ្ងាយ បែកទឹកភ្លោះ ឈឺពោះសម្រាល ទាំងគ្មានត្រៀមសម្ភារៈ កូន និងម៉ាក់គិតយ៉ាងម៉េចទៅ?

ម្យ៉ាងទៀតអ្នកទើបមានផ្ទៃពោះដំបូងៗក៏រឹតតែប្រយ័ត្នប្រយែងក្នុងការធ្វើដំណើរ ប្រសិនបើមានធ្លាក់ឈាម ឬឈឺចុកចាប់នោះ អាចរលូតកូនក៏មាន មូលហេតុព្រោះការធ្វើដំណើរផ្លូវឆ្ងាយមានរយៈពេលវែង ហើយបើបូករួមផ្លូវពិបាករលាក់រលើទៀតនោះ ពិតជាប៉ះពាល់មិនខាន៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ ដោយសារគុណសម្បត្តិ ៧នេះហើយ ទើបគេនិយមដើរលេងជួបជុំគ្រួសារ

ចុចអាន៖ ដឹងគុណសម្បត្តិមួយនេះ អ្នកខ្ជិលសមាធិនឹងភ្ញាក់ខ្លួនមិនខាន

The post ចង់ធ្វើដំណើរកម្សាន្តទាំងមានផ្ទៃពោះ ត្រូវដើរមុនថ្ងៃសម្រាលប៉ុន្មានសប្ដាហ៍ទើបល្អ? appeared first on Kampuchea Thmey Daily.

ដោយសារគុណសម្បត្តិ ៧នេះហើយ ទើបគេនិយមដើរលេងជួបជុំគ្រួសារ

Sonya — Fri, 31 Dec 2021 01:55:00 +0000

គន្លឹះមួយក្នុងការធ្វើឱ្យជីវិតគូ និងគ្រួសារមានសុភមង្គល គឺការរស់នៅឲ្យមានអត្ថន័យបំផុតតាមរយៈសកម្មភាពប្រចាំថ្ងៃ។ ក្នុងនោះ ដំណើរកម្សាន្តជាសកម្មភាពមួយដែលមិនអាចខ្វះបាននោះទេ សម្រាប់គ្រួសារទូទៅ។

ហេតុនេះ ទាន់នៅមានពេល គួរដើរលេង និងសាងពេលវេលាល្អៗជាមួយគ្នាឱ្យបានច្រើន។ ខាងក្រោមនេះជាហេតុផលទាំង ៧ ដែលគួរមានដំណើរកម្សាន្តជាមួយគ្រួសារ៖

១. បង្កើតអនុស្សាវរីយ៍ល្អៗជាមួយគ្នា

ការធ្វើដំណើរកម្សាន្តជាមួយសមាជិកគ្រួសារ តែងតែបង្កើតឱ្យមានអនុស្សាវរីយ៍ទៅថ្ងៃក្រោយ ទោះបីពេលខ្លះជាអនុស្សាមិនសូវល្អ ប៉ុន្តែវានឹងធ្វើឲ្យចងចាំគ្នា។ មិនចាំបាច់ទាល់តែធ្វើដំណើរទៅបរទេស ទើបហៅថា ជាដំណើរកម្សាន្តនោះទេ ត្រឹមតែដើរលេងក្នុងស្រុកក៏គ្រប់គ្រាន់បាត់ទៅហើយ។

២. រឹតចំណងគ្រួសារកាន់តែល្អ

ដំណើរកម្សាន្តជាមួយក្រុមគ្រួសារ អាចបង្កើនភាពស្និតស្នាល និងទំនាក់ទំនងកាន់តែស្អិតរមួតជាមួយចំណងចិត្តរឹងមាំរវាងគ្នានិងគ្នា។

៣. បង្កើតភាពសប្បាយរីករាយ

ការដើរលេងពិតជាអាចជួយឲ្យអារម្មណ៍ស្រស់ស្រាយ និងអាចកាត់បន្ថយភាពតានតឹងបានច្រើនបំផុត។ មិនត្រឹមតែប៉ុណ្ណោះ តាមការសិក្សាប្រាប់ថា ប្រសិនបើមនុស្សអាចសប្បាយចិត្តពេលខ្លួននៅវ័យក្មេង ពួកគេនឹងនៅតែសប្បាយរីករាយនៅ ២០ ឆ្នាំក្រោយជាមួយការចងចាំពីដំណើរកាលពីពេលនៅក្មេង ហើយការចងចាំនោះនឹងដិតដាមជាបទពិសោធន៍ពេញមួយជីវិតរបស់ពួកគេ។

៤. យល់ដឹងបន្ថែមពីការរស់នៅបែបថ្មីៗ

កាលណាមានដំណើរកម្សាន្តជាមួយគ្រួសារ នោះឱកាសបានឃើញនិងស្គាល់នូវវប្បធម៌ថ្មីៗ ការគិតបែបថ្មី ផ្នត់គំនិតថ្មី ការរស់នៅសម័យថ្មី ដែលវាពិតជាមានឥទ្ធិពលខ្លាំងណាស់នៅក្នុងការផ្លាស់ប្តូរការយល់ដឹងរបស់សមាជិកម្នាក់ៗ។ ពិសេសគ្រប់គ្នាអាចមើលឃើញតម្រូវការផ្សេងទៀតនៅជុំវិញពិភពលោក ហើយវាពិតជាមានសារៈសំខាន់ណាស់សម្រាប់ក្មេងៗ។

៥. បង្កើតការទទួលខុសត្រូវចំពោះសមាជិក

ការនាំគ្នាដើលេងនៅខាងក្រៅជួយធ្វើឱ្យសមាជិកគ្រួសារ ជាពិសេសកូនៗអាចចាកចេញពីទម្លាប់ធម្មតាដដែលៗ និងផ្តល់នូវឱកាសថ្មីៗដើម្បីទម្លាប់និងបណ្តុះភាពទទួលខុសរបស់កូនៗពេលគេធំឡើងរួមមាន រៀបវ៉ាលី យកឥវ៉ាន់ទុកដាក់ និងត្រៀមអាហារជាដើម។

៦. បង្វែរអារម្មណ៍ពីការញៀនបច្ចេកវិទ្យា

មិនថាមនុស្សចាស់ ឬក្មេងៗទេ គ្រប់គ្នានឹងមិនសូវញៀនបច្ចេកវិទ្យា បើបាននៅជុំវិញអ្វីដែលថ្មីៗ ដែលអាចនាំពួកគេចចេញពីអេក្រង់។ ជាពិសេសគ្រប់គ្នានឹងចេះស្រឡាញ់បរិស្ថាន និងធម្មជាតិដែលនៅជុំវិញខ្លួន។

៧. ទទួលបានបទពិសោធន៍ថ្មីៗ

ការធ្វើដំណើរកម្សាន្តជិតឬឆ្ងាយក្ដី សុទ្ធតែអាចធ្វើឱ្យគ្រួសារទទួលបានបទពិសោធថ្មីៗ ជាមួយនឹងរសជាតិនៃអាហារថ្មីៗ ទេសភាពថ្មី កន្លែងថ្មី ក្លិនថ្មី ហើយពេលខ្លះសូម្បីភាសាក៏ថ្មីដែរ ។ ទាំងនេះជាការតភ្ជាប់ទំនាក់ទំនងថ្មីៗនៅក្នុងខួរក្បាលរបស់មនុស្ស និងផ្តល់នូវបទពិសោធន៍ថ្មីៗកាន់តែច្រើនដល់កូនៗថែមទៀតផង៕

ប្រែសម្រួល៖ សន្យា

ចុចអាន៖ វត្ថុ ៥យ៉ាង មិនគួរទុកក្នុងកាបូបលុយ ពេលដើរលេងផ្លូវឆ្ងាយ

The post ដោយសារគុណសម្បត្តិ ៧នេះហើយ ទើបគេនិយមដើរលេងជួបជុំគ្រួសារ appeared first on Kampuchea Thmey Daily.

៦ យ៉ាង ត្រូវត្រៀមជាស្រេច មុនពេលទៅលេងសមុទ្រ

Sonya — Wed, 22 Dec 2021 08:02:30 +0000

អត្ថបទនេះ ប្រហែលមិនជួយអ្វីច្រើនសម្រាប់អ្នកទៅលេងសមុទ្រញឹកញាប់នោះទេ តែវាអាចមានប្រយោជន៍ចំពោះអ្នកទើបទៅលេងសមុទ្រដំបូងៗ ហើយក៏អាចជាការរំលឹកសម្រាប់អ្នកខានទៅសមុទ្រជាយូរផងដែរ។

ខាងក្រោមជារឿង ៦យ៉ាង គួរត្រៀមជាស្រេច មុនពេលទៅលេងសមុទ្រ៖

១. ឡេឬគ្រីមការពារកម្តៅថ្ងៃ

កុំអាងថា ទៅលេងឆ្នេរ ងូតទឹកសមុទ្រត្រជាក់ៗ ស្បែកនឹងមិនអី គិតខុសហើយ។ ទឹកប្រៃមិនដូចទឹកសាបទេ ទោះបីមេឃស្រទុំក៏ដោយ ក៏អាចបណ្ដាលឱ្យស្បែករបស់យើងជាំបាន ដោយមិនដឹងខ្លួនដែរ។ ដូច្នេះត្រូវមានឡេឬគ្រីមការពារកម្ដៅថ្ងៃ ទុកក្នុងកាបូបជាស្រេច គ្រាន់នឹងប្រើលាបការពារស្បែក មិនថាដើរឆ្នេរ ឬមុជទឹក។

ម្យ៉ាងទៀតកុំចាំដល់សមុទ្រហើយ ទើបស្រវេស្រវាទិញឡេការពារកម្ដៅថ្ងៃមកលាប ព្រោះតម្លៃអាចខ្ពស់ជាងតម្លៃនៅលើទីផ្សារទូទៅ។

២. វ៉ែនតាខ្មៅ និងមួក

កម្រមាននរណាដែលថាទៅលេងសមុទ្រហើយ បែរជាអត់មានវ៉ែនតាខ្មៅពាក់ ព្រោះថាវាអាចជួយការពារភ្នែកពីកម្ដៅព្រះអាទិត្យ និងជួយលើកសម្រស់ពេលថតរូបទៀតផង។ ក្រៅពីវ៉ែនតាខ្មៅ មួកក៏ចាំបាច់ដែរ វាអាចការពារកម្ដៅថ្ងៃបានល្អ ប្រសិនត្រូវជិះទូក ស្ទូចត្រី ឬដើរលំហែតាមឆ្នេររយៈពេលយូរ។

៣. កាបូបប្លាស្ទិកដាក់ទូរសព្ទដៃ

កាបូបប្លាស្ទិក មិនអាចអត់បានទេ បើយើងជាអ្នកដើរលេងឆ្នេរ ឬជាអ្នកចូលចិត្តមុជទឹកលេង។ វាអាចដាក់សម្ភារសំខាន់ៗមិនឱ្យសើម ឬខូចដោយសារទឹក ជាពិសេសទូរសព្ទដៃតែម្ដង។ ក្រៅពីនោះ កាបូបប្លាស្ទិកអាចការពារពេលទឹកខ្ទាតសើមពេលជិះទូក ឬពេលមានភ្លៀងធ្លាក់ដោយចៃដន្យ មិនឱ្យបង្ខូចទូរសព្ទ កាត និងលុយជាដើម។

៤. អាហារសម្រន់

ពន្លឺព្រះអាទិត្យ បូករួមនឹងទឹកប្រៃ ជាកត្តារួមចំណែកធ្វើឱ្យឆាប់ឃ្លាន ខុសធម្មតា។ ធម្មតាទេ ដើរលេងទីណា ក៏គួរមានអាហារសម្រន់ ត្រៀមសម្រាប់ឃ្លានភ្លាមៗ ក៏ដូចជាកំដរមាត់ ពេលជិះទូក ឬអានសៀវភៅមាត់ឆ្នេរ។ល។ យ៉ាងណាមិញ អាហារសម្រន់ អាចមានឬគ្មាន អាស្រ័យចំណូលចិត្តដែរ ព្រោះអ្នកខ្លះ ពេលឃ្លានភ្លាមៗ និយមកុម្មង់អាហារសមុទ្រញ៉ាំភ្លែតអ៊ីចឹងទៅ។

៥. ឈុតហែលទឹក

ទោះបីជាទៅតែមួយថ្ងៃ ឬពីរថ្ងៃក៏ដោយ យើងភាគច្រើនប្រាកដជាចុះហែលទឹកសមុទ្រលេង ឬយ៉ាងហោចណាស់ក៏មុជទឹកលេងនៅអាងហែលទឹកដែរ។ ហេតុនេះ យើងមិនអាចមុជទឹកដោយស្លៀករ៉ូប ឬសម្លៀកបំពាក់ដំណើរកម្សាន្តទូទៅបានទេ។ អ៊ីចឹងហើយ មុនឡើងឡានដល់ឆ្នេរ ត្រូវមានឈុតហែលទឹកមួយឈុតយ៉ាងតិចទៅជាមួយដែរ។

៦. ម្សៅទារក

ដើម្បីការពារពងជើងដោយសារដីខ្សាច់ ឬមានខ្សាច់ជាប់ប្រតាកជើង ក្រោយពីដើរលើឆ្នេរ គួរមានម្សៅកូនង៉ាតាមខ្លួនដែរ ទុកសម្រាប់លាបលើបាតជើង ដើម្បីជម្រះខ្សាច់បានល្អ និងការពារបាតជើងមិនឱ្យសង្កៀរ៕

ប្រែសម្រួល៖ សន្យា

ចុចអាន៖ ចង់ដើរលេងបានសប្បាយ ឈប់ប្រព្រឹត្តទង្វើទាំង ៥ នេះទៀត

ចុចអាន៖ វត្ថុ ៥យ៉ាង មិនគួរទុកក្នុងកាបូបលុយ ពេលដើរលេងផ្លូវឆ្ងាយ

The post ៦ យ៉ាង ត្រូវត្រៀមជាស្រេច មុនពេលទៅលេងសមុទ្រ appeared first on Kampuchea Thmey Daily.

វត្ថុ ៥យ៉ាង មិនគួរទុកក្នុងកាបូបលុយ ពេលដើរលេងផ្លូវឆ្ងាយ

Sonya — Mon, 20 Dec 2021 07:55:43 +0000

ដើម្បីបង្ការហានិភ័យផ្ទាល់ខ្លួន នៅពេលបាត់កាបូបលុយ មានរបស់មួយចំនួនយើងមិនគួរដាក់ក្នុងកាបូបលុយទេ ជាពិសេសរាល់ពេលមានដំណើរកម្សាន្តឆ្ងាយៗ។

១. ស្មាតហ្វូន ៖ បច្ចុប្បន្នស្មាតហ្វូនមានស្ទើរតែគ្រប់គ្នា ហើយអ្វីដែលរឹតតែថ្មីសន្លាងនោះគឺកាបូបលុយសព្វថ្ងៃមានកន្លែងដាក់ទូរសព្ទដៃងាយស្រួលថែមទៀត។ ប្រសិនបើយើងដាក់ស្មាតហ្វូនក្នុងកាបូបលុយ ពេលបាត់វាច្បាស់ជាវីវរ ព្រោះឯកសារ រូបភាព វីដេអូ សុទ្ធតែរក្សាទុកក្នុងទូរសព្ទទាំងអស់។

២. កាតធនាគារ ៖ ប្រសិនបើមិនចាំបាច់ប្រើកាតជាប់លាប់ដើម្បីដកឬដាក់លុយទេ គួររក្សាទុកនៅផ្ទះល្អជាង កុំរក្សាទុកវាជាប់លាប់ក្នុងកាបូបអី។ ជាការពិត នៅពេលបាត់កាតធនាគារ យើងអាចសុំខាងធនាគារធ្វើកាតថ្មីឱ្យវិញបាន តែវានាំឱ្យខាតពេលធ្វើការងាររកស៊ីជាដើម។ ប៉ុន្តែបើចាំបាច់ត្រូវយកវាតាមខ្លួនរាល់ថ្ងៃ គួរមានកន្លែងសាគួរផ្សេងសម្រាប់ដាក់កាត ជាជាងដាក់ក្នុងកាបូបលុយ។

៣. សន្លឹកបង្កាន់ដៃធនាគារ ៖ សន្លឹកបង្កាន់ដៃធនាគារផ្ទុកព័ត៌មានផ្ទាល់ខ្លួន បើបាត់ធ្លាក់ក្នុងដៃជនខិលខូច ពួកគេនឹងដឹងខ្ទេចអស់ពីស្ថានភាពហិរញ្ញវត្ថុ និងដឹងទីកន្លែងស្នាក់នៅរបស់យើងច្បាស់ដូចថ្ងៃ។ ដូច្នេះគួររក្សាវាក្នុងកន្លែងមានសុវត្ថិភាពនៅផ្ទះ ជាជាងដាក់កាបូបយកតាមខ្លួន។

៤. សៀវភៅធនាគារ ៖ បើបាត់សៀវភៅធនាគារ វានឹងងាយស្រួលឱ្យពួកចោរក្លែងឯកសារ និងព័ត៌មានចំណាយលុយធនាគាររបស់យើងយ៉ាងងាយស្រួល។

៥. សៀវភៅមូលប្បទានបត្រ ៖ ប្រសិនបាត់សៀវភៅមូលប្បទានបត្រ ពួកជនខិលខូចងាយនឹងយកវាទៅប្រើយ៉ាងស្រួល។ ទោះបីព័ត៌មាននិងលេខកូដគណនីរបស់យើងអាចបញ្ជារទៅខាងធនាគាឲ្យរបិទបានស្រួលក៏ដោយ ប៉ុន្តែគួរកុំដាក់វាក្នុងកាបូបលុយល្អជាង ដូចពាក្យចាស់ពោលថា “ការពារប្រសើរជាងព្យាបាល”៕

ប្រែសម្រួល៖ សន្យា

ចុចអាន៖ ចង់ដើរលេងបានសប្បាយ ឈប់ប្រព្រឹត្តទង្វើទាំង ៥ នេះទៀត

ចុចអាន៖ គុណប្រយោជន៍ល្អៗពីការដើរលេង មិនមែនត្រឹមតែកម្សាន្តសប្បាយប៉ុណ្ណោះទេ

The post វត្ថុ ៥យ៉ាង មិនគួរទុកក្នុងកាបូបលុយ ពេលដើរលេងផ្លូវឆ្ងាយ appeared first on Kampuchea Thmey Daily.

អត់លុយដើរលេងឆ្ងាយពេលបុណ្យអុំទូក សាកវិធីនេះវិញ ធានាសប្បាយដូចគ្នា

Sonya — Wed, 17 Nov 2021 01:21:07 +0000

ការដើរកម្សាន្តក្នុងថ្ងៃឈប់សម្រាកជាបំណងប្រាថ្នានៃមនុស្សទូទៅ ដើម្បីលំហែខួរក្បាលពីការនឿយហត់ក្នុងការងារ ការសិក្សា ឬកិច្ចការផ្សេងៗ។ ជាទូទៅថ្ងៃសម្រាកធំដូចជាបុណ្យអុំទូកជាដើម មនុស្សម្នាតែងមានគម្រោងលំហែកម្សាន្តតាមតំបន់នានាតាមលទ្ធភាព និងចំណូលចិត្តរបស់ពួកគេ។ ប៉ុន្តែបើអត់លុយ តើឲ្យទៅណារួច? អ៊ីចឹងមានតែគេងផ្ទះហើយមែនទេ? KPT Plus សូមណែនាំប្រិយមិត្តនូវគន្លឹះខ្លះៗ ទោះជាអ្នកមិនមានលុយសម្រាប់ដំណើរកម្សាន្តឆ្ងាយៗ តែអ្នកក៏អាចលំហែនិងទទួលនូវភាពសប្បាយរីករាយបានដែរ។ ជាអ្វីខ្លះទៅ?

អានសៀវភៅ

មានវិធីជាច្រើនដើម្បីអានសៀវភៅដូចជា ខ្ចីសៀវភៅពីមិត្តភក្ដិ ទៅបណ្ណាល័យ ឬអានតាម Internet ព្រោះថានៅលើ Internet មានសៀវភៅជាច្រើនដែលមានដាក់ឲ្យអានដោយមិនគិតថ្លៃ។ យើងអាចជ្រើសរើសអានសៀវភៅដែលជាចំណូលចិត្តរបស់ខ្លួនមិនថាជាសៀវភៅទស្សនៈវិជ្ជាអប់រំ សៀវភៅលើកទឹកចិត្ត ឬប្រលោមលោកជាដើម សុទ្ធតែអាចជួយយើងឲ្យរកឃើញអ្វីដែលថ្មីតិចឬច្រើនជាក់ជាមិនខាន។ តើជឿទេថា ការអានសៀវភៅធ្វើឲ្យអារម្មណ៍ល្អ? ទោះបីមិនបានទៅណាឆ្ងាយក៏ដោយ តែសៀវភៅអាចនាំយើងទៅបានឆ្ងាយជាងអ្វីដែលយើងគិតទៅទៀត។

ផឹកកាហ្វេ

ហាងកាហ្វេជាកន្លែងពេញនិយមបំផុតសម្រាប់មនុស្សស្ទើរតែគ្រប់វ័យក្នុងពេលបច្ចុប្បន្ននេះ។ បើមិនបានទៅណាឆ្ងាយទេ ហាងកាហ្វេជាកន្លែងល្អមួយដែលយើងអាចទៅតែឯង ឬណាត់មិត្តភក្ដិម្នាក់ពីរនាក់ដើម្បីជជែកគ្នាលេង។ ប្រហែលជាយើងខកខានជួបជជែកជាមួយមិត្តជាយូរហើយក៏មិនដឹង។ ដូច្នេះវាជាឱកាសល្អដែលអាចជួបជុំដើម្បីចែករំលែកពេលវេលាល្អៗជាមួយគ្នា។

នៅផ្ទះជួបជុំគ្រួសារ

យូរប៉ុណ្ណាហើយដែលយើងមិនបាននៅផ្ទះជួបជុំសមាជិកគ្រួសារ? មិនបានទៅណាឆ្ងាយ យើងក៏អាចបង្កើតក្ដីសុខជាមួយសមាជិកគ្រួសារ ដោយជួយរៀបចំផ្ទះសម្បែង បំបាត់អផ្សុក ជាពិសេសវាជាឱកាសដែលត្រូវបញ្ចេញស្នាដៃធ្វើម្ហូបឲ្យគ្រួសារម្ដងហើយ។ ការបរិភោគអាហារជុំគ្នា ក៏អាចបង្កើតបរិយាកាសរីករាយ និងទទួលបានក្ដីសុខធំៗបានដែរ។ ដូច្នេះមិនបាច់ច្រណែនអ្នកបានដើរលេងញ៉ាំអាហារដោយចុងភៅចំណានៗទេ យើងក៏ជាចុងភៅដ៏ចំណាប់ម្នាក់ដែរ។

មើលកុន

មើលកុនហាក់ដូចជាសាមញ្ញ តែវាល្អសម្រាប់អ្នកអត់លុយដើរលេងដូចយើង។ រោងកុនមានរឿងជាច្រើនគ្រប់រសជាតិសម្រាប់ទស្សនិកជន។ ដូច្នេះយើងអាចជ្រើសរើសមើលរឿងប្រភេទណាក៏បានដែលខ្លួនចូលចិត្ត។ ទៅទស្សនាម្នាក់ឯងក៏មិនមានបញ្ហា បើទៅជាមួយគូស្នេហ៍ក៏កាន់តែកក់ក្ដៅ ឬទៅជាមួយមិត្តភក្ដិក៏ល្អម្យ៉ាង បើបានទៅជាមួយគ្រួសារក៏រឹតតែពិសេស។ មើលកុន មិនចំណាយច្រើនពេកទេ! វាសក្ដិសមសម្រាប់អ្នកនៅផ្ទះអត់លុយដើរលេងឆ្ងាយ។

ថតរូបស្អាតៗ

ការថតរូប ជាការបន្សល់នូវអនុស្សាវរីយ៍ល្អៗទុកនៅថ្ងៃក្រោយ។ ថតរូបមិនត្រឹមតែបានសប្បាយចិត្តពេលឃើញរូបរបស់ខ្លួនឯងស្អាតៗប៉ុណ្ណោះទេ ថែមទាំងចំណេញបានដើរលេងមើលទេសភាពស្អាតក្នុងក្រុងឬជាយក្រុងទៀតផង។ ជាពិសេសវាចំណាយតិច ដោយគ្រាន់តែមានដៃគូទៅជាមួយដើម្បីជួយថតរូបឲ្យគ្នាប៉ុណ្ណោះ។ នៅក្នុងក្រុងមានកន្លែងថតរូបស្អាតៗជាច្រើនដូចជា ស្ថានីយរថភ្លើង មុខព្រះបរមរាជវាំង សារមន្ទីរ ។ល៕

ឈប់ខូចចិត្តទៅ! អត់លុយក៏អាចសប្បាយបានដែរ!

អត្ថបទ៖ សន្យា

The post អត់លុយដើរលេងឆ្ងាយពេលបុណ្យអុំទូក សាកវិធីនេះវិញ ធានាសប្បាយដូចគ្នា appeared first on Kampuchea Thmey Daily.

មូលហេតុ ៥យ៉ាង ឪពុកម្ដាយគួរឧស្សាហ៍នាំកូនដើរលេងក្រៅផ្ទះ

Sonya — Mon, 08 Nov 2021 06:15:00 +0000

បច្ចុប្បន្នកុមារជាច្រើនកំពុងតែវក់ជាមួយនឹងទូរសព្ទ សម្ភារៈអេឡិចត្រូនិក ឬឧបករណ៍កម្សាន្តជាច្រើនផ្សេងទៀត ដែលមាននៅក្នុងផ្ទះ ដែលនេះជាហេតុធ្វើឲ្យក្មេងៗមិនមានសកម្មភាពច្រើនឡើយ។ ដោយសកម្មភាពទាំងនេះ ហើយក្មេងៗអាចប្រឈមមុខជាខ្លាំងជាមួយនឹងបញ្ហាសុខភាពដូចជា កើនទម្ងន់ បញ្ហាសាច់ដុំ និងឆ្អឹង ហើយនឹងបញ្ហាទំនាក់ទំនងក្នុងការចូលរួមក្នុងសង្គមទៀតផង។ អត្ថបទខាងក្រោមនេះ បង្ហាញពីអត្ថប្រយោជន៍ចំនួន៥ ដែលម៉ាក់ប៉ាទាំងឡាយ គួរបណ្ដោយកូនឲ្យលេងខាងក្រៅផ្ទះឲ្យបានច្រើន។

១- ជួយឲ្យសារពាង្គកាយកុមាររឹងមាំ

សួនកំសាន្តខាងក្រៅផ្ទះគឺជាកន្លែងល្អបំផុត ដែលកុមារអាចរត់លេងបានយ៉ាងប្រសើរ។ ក្មេងៗអាចមានសកម្មភាពជាច្រើននៅខាងក្រៅដូចជា លោត រត់ តោង រុញវត្ថុអ្វីមួយ ឬ លេងបាល់ជាដើម។ រាល់សកម្មភាពទាំងនេះ គឺមិនត្រឹមតែដូចជាការហាត់ប្រាណប៉ុណ្ណោះទេ ប៉ុន្តែវាថែមទាំងអាចជួយពួកគេបង្កើនជំនាញផ្សេងៗទៀតផង។ ការលេងនៅខាងក្រៅនេះ នឹងជួយកូនយើងឲ្យដុតកាល់ឡូរីបានច្រើន ធ្វើឲ្យកូនចៀសផុតពីការធាតុឡើងទម្ងន់ខ្លាំង និងជួយឲ្យឆ្អឹង និងសាច់ដុំកាន់តែរឹងមាំទៀតផង។

ការលេងនៅខាងក្រៅពេលថ្ងៃ គឺកុមារនឹងបានទទួលពន្លឺព្រះអាទិត្យបានកាន់តែច្រើន នាំឲ្យរាងកាយផលិតវីតាមីន D បានកាន់តែច្រើន ដែលវីតាមីននេះគឺមានប្រយោជន៍យ៉ាងច្រើនចំពោះឆ្អឹង និងសាច់ដុំ ហើយអាចជួយឲ្យចៀសផុតពីជំងឺរ៉ាំរ៉ៃមួយចំនួនទៀតផង។

២-បង្កើនទំនាក់ទំនងល្អក្នុងសង្គម

កុមារដែលលេងនៅខាងក្រៅ ច្រើនមានទំនាក់ទំនងល្អ និងសប្បាយរីករាយច្រើននៅក្នុងសង្គម។ នៅខាងក្រៅកូនយើង អាចលេងល្បែងជាមួយនឹងកុមារដទៃ ហើយអាចចែករំលែក និងអាចអភិវឌ្ឍអត្តចរិតបានល្អ ។ ក្មេងៗអាចរៀនពីពិភពខាងក្រៅនៅជុំវិញខ្លួនរបស់គេ ហើយបង្កើតឬស្វែងរកអ្វី ដែលថ្មីដើម្បីអាចអភិវឌ្ឍខ្លួនកាន់តែប្រសើរទៅមុខ។

ក្នុងការសិក្សាមួយ បានរកឃើញថា កុមារដែលលេងនៅខាងក្រៅច្រើន ភាគច្រើនគឺមានទំនាក់ទំនងល្អ ហើយភាគច្រើនគឺអាចរៀនដល់មហាវិទ្យាល័យ និងភាគតិចដែលឈានដល់ប្រើប្រាស់គ្រឿងញៀន ធាត់លើសទម្ងន់ និងប្រព្រឹត្តអំពើហិង្សា។

៣- បង្កើនរូបារម្មណ៍របស់កុមារ

ក្នុងការសិក្សាមួយដែលផ្ដោតលើចក្ខុញាណរបស់កុមារ បានរកឃើញថា កុមារដែលច្រើនលេងនៅខាងក្រៅ គឺមានការមើលឃើញប្រសើរជាងកុមារដែលលេងតែនៅក្នុងផ្ទះ។ មួយវិញទៀតកុមារដែលហៀបនឹងចូលរៀន គឺអាចរៀនអ្វីដែលថ្មីតាមរយៈអារម្មណ៍របស់ពួកគេ។ ក្មេងនឹងបង្កើនការមើលឃើញតាមរយៈមើលសត្វដែលនៅជុំវិញ ឈប់កាន់នឹងហិតក្លិនផ្កា ឮសំឡេងផ្សេងៗ ដូចជាដំណក់ទឹកធ្លាក់ និងអាចបេះញ៉ាំផ្លែឈើផ្សេងៗ។ ផ្ទុយទៅ វិញ ចំពោះ កុមារដែលនៅក្នុងផ្ទះ ញាណដែលពួកគេទទួលបាន គឺមានតែស្ដាប់ និងមើលប៉ុណ្ណោះ។

៤- បង្កើនការយកចិត្តទុកដាក់

ក្មេងៗដែលលេងនៅខាងក្រៅជាប្រចាំ គឺច្រើនចង់ដឹងចង់ឃើញដោយខ្លួនឯង ហើយទំនងជានៅជាប់នឹងការងារដែលចង់ដឹងឮនេះរយៈពេលយូរទៀត។ ផ្ទុយទៅវិញ កុមារដែលចំណាយពេលភាគច្រើននៅក្នុងផ្ទះជាមួយការប៉ះពាល់តិចតួចទៅនឹងសកម្មភាពខាងក្រៅ ហើយពួកគេអាចមានសកម្មភាពដោយចម្លងតាមអ្វីដែលពួកគេមើលឃើញតាម ការបង្ហាញតាមទូរទស្សន៍ឬអ៊ីនធឺណេតប៉ុណ្ណោះ ពួកគេមិនអាចបង្កើត ឬរកឃើញសកម្មភាពថ្មីដែលមាននៅខាងក្រៅឡើយ។

៥-លូតលាស់ដោយសប្បាយរីករាយ និងមានប្រព័ន្ធភាពស៊ាំខ្លាំង

ពន្លឺនៅខាងក្រៅជួយរំញោចក្រពេញ Pineal ដែលជា ផ្នែកនៃខួរក្បាលមានសារៈសំខាន់ណាស់ក្នុងការធ្វើឱ្យប្រព័ន្ធភាពស៊ាំរបស់យើងរឹងមាំ និងធ្វើឱ្យយើងមានអារម្មណ៍រីករាយ។ ការចំណាយពេលក្នុងធម្មជាតិ ក៏ជួយកុមារមានអារម្មណ៍រីករាយកាន់តែច្រើន ហើយក្មេងក៏អាចយល់ពីបរិស្ថាននៅជុំវិញ ហើយពេលពួកគេធំឡើងនឹងអាចមានអារម្មណ៍ស្រលាញ់ធម្មជាតិផងដែរ៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ ស្មុគការងារផ្ទះ ថែទាំកូនខ្លាំង វិធីសាស្ត្រទាំងនេះ អាចជួយបាន

ចុចអាន៖ កូនធំឡើងជាមនុស្សល្អ និងស្ដាប់បង្គាប់ ឪពុកម្ដាយត្រូវដឹងរឿងទាំងនេះ

The post មូលហេតុ ៥យ៉ាង ឪពុកម្ដាយគួរឧស្សាហ៍នាំកូនដើរលេងក្រៅផ្ទះ appeared first on Kampuchea Thmey Daily.

ដើរលេង Archives - Kampuchea Thmey Daily

ចង់ជ្រមុជទឹកមើលផ្កាថ្ម ត្រូវដឹងពីរឿងទាំងនេះសិន

កំហុសឆ្គង ៥យ៉ាង អ្នកដើរលេងឆ្លងឆ្នាំ ប្រព្រឹត្តដោយមិនដឹងខ្លួន

ចង់ធ្វើដំណើរកម្សាន្តទាំងមានផ្ទៃពោះ ត្រូវដើរមុនថ្ងៃសម្រាលប៉ុន្មានសប្ដាហ៍ទើបល្អ?

ដោយសារគុណសម្បត្តិ ៧នេះហើយ ទើបគេនិយមដើរលេងជួបជុំគ្រួសារ

៦ យ៉ាង ត្រូវត្រៀមជាស្រេច មុនពេលទៅលេងសមុទ្រ

វត្ថុ ៥យ៉ាង ​មិនគួរទុកក្នុងកាបូបលុយ ពេលដើរលេងផ្លូវឆ្ងាយ

អត់លុយដើរលេងឆ្ងាយពេលបុណ្យអុំទូក សាកវិធីនេះវិញ ធានាសប្បាយដូចគ្នា

មូលហេតុ​ ៥យ៉ាង ឪពុកម្ដាយ​គួរ​ឧស្សាហ៍​នាំកូន​ដើរលេងក្រៅ​ផ្ទះ

១- ជួយ​ឲ្យ​សារពាង្គ​កាយ​កុមារ​រឹង​មាំ

២-បង្កើន​ទំនាក់ទំនង​ល្អក្នុង​សង្គម

៣- បង្កើន​រូបារម្មណ៍​របស់​កុមារ

៤- បង្កើន​ការ​យក​ចិត្ត​ទុក​ដាក់

៥-លូត​លាស់​ដោយ​សប្បាយ​រីក​រាយ និងមាន​ប្រព័ន្ធ​ភាព​ស៊ាំ​ខ្លាំង

វត្ថុ ៥យ៉ាង មិនគួរទុកក្នុងកាបូបលុយ ពេលដើរលេងផ្លូវឆ្ងាយ

មូលហេតុ ៥យ៉ាង ឪពុកម្ដាយគួរឧស្សាហ៍នាំកូនដើរលេងក្រៅផ្ទះ

១- ជួយឲ្យសារពាង្គកាយកុមាររឹងមាំ

២-បង្កើនទំនាក់ទំនងល្អក្នុងសង្គម

៣- បង្កើនរូបារម្មណ៍របស់កុមារ

៤- បង្កើនការយកចិត្តទុកដាក់

៥-លូតលាស់ដោយសប្បាយរីករាយ និងមានប្រព័ន្ធភាពស៊ាំខ្លាំង