ដំរី Archives - Kampuchea Thmey Daily

ដំរីក្នុងសួនសត្វប្រទេសហ្សំប៊ី ជាន់អ្នកទេសចរស្លាប់២នាក់

Bun sopheap — Sat, 05 Jul 2025 03:39:10 +0000

ស្ត្រីជាអ្នកទេសចរពីរនាក់គឺ Easton Taylor អាយុ៦៨ឆ្នាំមកពីចក្រភពអង់គ្លេសនិង Alison Taylor អាយុ ៦៧ ឆ្នាំមកពីនូវែលសេឡង់ត្រូវបានសម្លាប់ដោយសត្វដំរី ខណៈពេលកំពុងដើរលេងសួនសត្វក្នុងឧទ្យានជាតិ South Luangwa ប្រទេសហ្សំប៊ី។ នេះបើយោងតាមការចេញផ្សាយរបស់សារព័ត៌មានBBC នៅថ្ងៃទី០៥ខែកក្កដានេះ។

ដំរីនៅក្នុងសួនសត្វប្រទេសសំប៊ី (រូបភាព៖ AP)

ការវាយប្រហារនេះបានកើតឡើងកាលពីថ្ងៃព្រហស្បតិ៍ ពេលក្រុមទេសចរកំពុងដើរកាត់សួនសត្វ។ ប៉ូលិសបាននិយាយថា មេដំរីមួយក្បាលដែលមានកូនមួយ ស្រាប់តែរត់មករកពួកគេពីក្រោយ។ មគ្គុទ្ទេសក៍សួនសត្វបានព្យាយាមបន្លាចដំរីចេញដោយបាញ់ព្រមាន ប៉ុន្តែនៅតែមិនអាចរារាំងដំរីបាន។ ដំរីបានជាន់អ្នកទេសចរទាំង២នាក់ស្លាប់នៅនឹងកន្លែង។

ជនរងគ្រោះបានស្នាក់នៅក្នុងជុំរុំ Big Lagoon អស់រយៈពេល ៤ថ្ងៃ ហើយកំពុងស្ថិតក្នុងដំណើរការផ្លាស់ប្តូរទៅកាន់ជុំរុំមួយផ្សេងទៀត នៅពេលដែលការវាយប្រហារបានកើតឡើង។

អាជ្ញាធរបានគូសបញ្ជាក់ថា ដំរីដែលវាយប្រហារជាដំរីញីមានការការពារយ៉ាងខ្ពស់ចំពោះកូនរបស់វា ហើយបានណែនាំភ្ញៀវទេសចរឲ្យរក្សាចម្ងាយពីវាដើម្បីសុវត្ថិភាព។ មកដល់ពេលនេះការិយាល័យបរទេសអង់គ្លេសបានបញ្ជាក់ថាខ្លួនកំពុងជួយដល់គ្រួសារជនរងគ្រោះអង់គ្លេសនិងធ្វើការជាមួយមន្ត្រីក្នុងតំបន់។

គួររម្លឹកថាសោកនាដកម្មនេះក៏បានកើតឡើងបន្ទាប់ពីការវាយប្រហាររបស់សត្វដំរីដ៏សាហាវពីមុនមកលើអ្នកទេសចរនៅក្នុងប្រទេសហ្សំប៊ី ដែលធ្វើឱ្យមានការព្រួយបារម្ភជាបន្តបន្ទាប់អំពីសុវត្ថិភាពនៅក្នុងសួនសត្វ៕

(រូបភាព៖ Getty)

អត្ថបទ៖ ប៊ុន សុភាព

The post ដំរីក្នុងសួនសត្វប្រទេសហ្សំប៊ី ជាន់អ្នកទេសចរស្លាប់២នាក់ appeared first on Kampuchea Thmey Daily.

ដំរីយ៉ាងតិច៦ក្បាលងាប់ក្នុងគ្រោះថ្នាក់រថភ្លើងបុកនៅស្រីលង្កា

Bun sopheap — Fri, 21 Feb 2025 07:10:40 +0000

រថភ្លើងមួយខ្សែបានបុកហ្វូងដំរីនៅក្នុងប្រទេសស្រីលង្កាកាលពីយប់ថ្ងៃពុធ ដោយសម្លាប់សត្វដំរីក្នុងហ្វូងនោះយ៉ាងហោចណាស់៦ក្បាល។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី២១ខែកុម្ភៈនេះ។

សារព័ត៌មានរដ្ឋរបស់ប្រទេសស្រីលង្កា បានរាយការណ៍ថា មិនមានអ្នកដំណើរណាម្នាក់ក្នុងរថភ្លើងនោះបានរងរបួសទេ។ ហេតុការណ៍នេះបានកើតឡើងនៅចំងាយ ១៤០គីឡូម៉ែត្ររវាងស្ថានីយរថភ្លើង Minneriya និង Galoya នៅម៉ោងប្រហែល១១:៣០ យប់ថ្ងៃពុធ។

អ្នកបើករថភ្លើង បានឲ្យដឹងថា ហ្វូងដំរីជិត២០ក្បាលស្រាប់តែព្យាយាមឆ្លងកាត់ផ្លូវរថភ្លើងដោយនៅសល់តែចម្ងាយប្រហែល១០ម៉ែត្រប៉ុណ្ណោះពីរថភ្លើង។ ដូច្នេះ អ្នកបើកបរមិនអាចធ្វើអ្វីបានទេ។ សរុបមានដំរីនៅក្នុងហ្វូង៦ក្បាលបានងាប់និងរងរបួសជើងមួយក្បាល។ ទោះយ៉ាងណាការស៊ើបអង្កេតបន្ថែមលើឧប្បត្តិហេតុនេះកំពុងដំណើរការដើម្បីកំណត់ពីកាលៈទេសៈជុំវិញការប៉ះទង្គិចគ្នានេះ។

ឧប្បត្តិហេតុស្រដៀងគ្នានេះក៏បានកើតឡើងពីមុនផងដែរ។ កាលពីខែតុលា យ៉ាងហោចណាស់ដំរីពីរក្បាលបានងាប់ ដោយសាររថភ្លើងដឹកប្រេងបានបុកហ្វូងដំរីមួយនៅភាគពាយព្យនៃប្រទេសស្រីលង្កាក្នុងទីក្រុង Minneriya ចម្ងាយប្រហែល ២០០គីឡូម៉ែត្រពីរដ្ឋធានីកូឡុំបូ។

(រូបភាព៖ AP)

យោងតាមអង្គការមូលនិធិសត្វព្រៃពិភពលោក (WWF) ដំរីនៅស្រីលង្កាគឺជាដំរីដែលធំជាងគេ និងខ្មៅបំផុតក្នុងចំណោមដំរីអាស៊ី។ ទំហំហ្វូងរបស់ពួកគេមានចាប់ពី ១២ ទៅ២០ ក្បាល ហើយដំរីញីវ័យចំណាស់ជាងគេជាធម្មតាដឹកនាំហ្វូង។ ដំរីគឺជាសត្វទាក់ទាញទេសចរណ៍ដ៏ពេញនិយម និងមានសារៈសំខាន់ជានិមិត្តរូប វប្បធម៌ និងសេដ្ឋកិច្ចសម្រាប់ប្រទេសស្រីលង្កា ប៉ុន្តែការរួមរស់ជាមួយមនុស្សនៅតែបន្តជាបញ្ហា ខណៈជម្រកព្រៃឈើរបស់ពួកវាត្រូវបានកាប់ឆ្ការដើម្បីកសាងហេដ្ឋារចនាសម្ព័ន្ធមនុស្ស និងកសិកម្ម។

ការប៉ះទង្គិចគ្នារវាងរថភ្លើងនឹងសត្វដំរីក៏បានកើនឡើងក្នុងប៉ុន្មានឆ្នាំថ្មីៗនេះនៅក្នុងប្រទេសស្រីលង្កាផងដែរ ដោយដំរីព្រៃព្យាយាមឆ្លងកាត់ផ្លូវរថភ្លើងដើម្បីស្វែងរកអាហារ និងទឹក។ ពួកវាកាន់តែងាយរងគ្រោះដោយសារតែការបាត់បង់ និងការរិចរិលនៃជម្រកធម្មជាតិ ខណៈពួកវាខ្លះត្រូវបានសម្លាប់ដោយអ្នកប្រមាញ់ ឬកសិករដែលខឹងសម្បារនឹងការខូចខាតដំណាំរបស់ពួកគេ៕

(រូបភាព៖ Reuters)

អត្ថបទ៖ ប៊ុន សុភាព

The post ដំរីយ៉ាងតិច៦ក្បាលងាប់ក្នុងគ្រោះថ្នាក់រថភ្លើងបុកនៅស្រីលង្កា appeared first on Kampuchea Thmey Daily.

ដំរីផ្អើល ជាន់មនុស្សក្នុងពិធីបុណ្យសាសនានៅ ស្រីលង្កា

Bun sopheap — Mon, 08 Jul 2024 07:25:20 +0000

យោងតាមការចេញផ្សាយរបស់សារពត៌មាន CNA នៅថ្ងៃទី ០៨ ខែ កក្កដាបានឲ្យដឹងថា ពិធីបុណ្យសាសនាហិណ្ឌូនៅប្រទេសស្រីលង្កាបានបញ្ចប់ដោយភាពចលាចល បន្ទាប់ពីដំរីមួយក្បាលផ្អើលរត់ជាន់មនុស្ស បណ្ដាលឲ្យ១៣នាក់រងរបួស។

(រូបភាព៖ The Straits Times)

យោងតាមវីដេអូដែលគេចែករំលែកនៅលើប្រព័ន្ធផ្សព្វផ្សាយសង្គម បានបង្ហាញពីទម័កកំពុងព្យាយាមទាញដំរីមួយក្បាលដើម្បីបញ្ឈប់សកម្មភាពដ៏ឃោឃៅរបស់វា ស្របពេលអ្នកគោរពបូជានៅតាមដងផ្លូវប្រញាប់រត់គេចខ្លួន ខណៈមនុស្សចំនួន១៣នាក់ ត្រូវបានបញ្ជូនទៅមន្ទីរពេទ្យ។

គួរបញ្ជាក់ថា ដំរីត្រូវបានគេចាត់ទុកថាសត្វពិសិដ្ឋនៅក្នុងប្រទេសស្រីលង្កា ប៉ុន្តែច្បាប់ស្តីពីអំពើឃោរឃៅរបស់សត្វដំរីកម្រត្រូវបានអនុវត្តណាស់។ កំណត់ត្រាផ្លូវការបង្ហាញថា មានដំរីក្នុងស្រុកប្រហែល ២០០ក្បាលនៅក្នុងប្រទេសនេះ រួមជាមួយនឹងដំរីព្រៃប្រហែល ៧ ៥០០ក្បាល។

(រូបភាព៖ X)

នៅខែសីហា ឆ្នាំ ២០២៣ អ្នកធ្វើធម្មយាត្រារាប់សិបនាក់បានលោតចូលទៅក្នុងបឹងមួយនៅកណ្តាលទីក្រុង Kandy ដើម្បីគេចចេញពីដំរីស្ទាវចំនួន ៥ ក្បាល ដែលបណ្ដាលឲ្យមនុស្សជាច្រើននាក់រងរបួស និងស្ត្រីម្នាក់ត្រូវបានគេបញ្ជូនទៅមន្ទីរពេទ្យ។ ចំណែកនៅឆ្នាំ ២០១៩ មនុស្សយ៉ាងតិច ១៧នាក់បានរងរបួសនៅពេលដំរីផ្អើលក្នុងពិធីបុណ្យមួយនៅទីក្រុងកូឡុំបូ៕

អត្ថបទ៖ ប៊ុន សុភាព

The post ដំរីផ្អើល ជាន់មនុស្សក្នុងពិធីបុណ្យសាសនានៅ ស្រីលង្កា appeared first on Kampuchea Thmey Daily.

ឥណ្ឌា ប្រើប្រាស់ AI ជួយបញ្ឈប់គ្រោះថ្នាក់រថភ្លើងបុកដំរី

Chheang — Tue, 21 May 2024 04:38:46 +0000

រដ្ឋ Tamil Nadu ដែលស្ថិតនៅភាគខាងត្បូងឥណ្ឌា បានដាក់ប្រើប្រាស់ប្រព័ន្ធឃ្លាំមើលភ្ជាប់ជាមួយបច្ចេកវិទ្យាបញ្ញាសិប្បនិម្មិត AI ដើម្បីបង្ការគ្រោះថ្នាក់សត្វដំរីនៅលើផ្លូវរថភ្លើង។ នេះបើយោងតាមការចុះផ្សាយរបស់សារព័ត៌មាន BBC នៅថ្ងៃទី២១ ខែឧសភា ឆ្នាំ២០២៤។

ក្នុងរយៈពេល១ទសវត្សចុងក្រោយ មានករណីងាប់សត្វដំរីចំនួន ៣៦ក្បាលនៅលើផ្លូវរថភ្លើងក្នុងរដ្ឋ Tamil Nadu។ ក្នុងចំណោមដំរីដែលងាប់ មាន១១ក្បាល បានជួបគ្រោះថ្នាក់នៅលើផ្លូវរថភ្លើងក្បែរទីក្រុង Madukkarai ដែលជាតំបន់ព្រៃឈើជាប់ព្រំប្រទល់រដ្ឋ Kerala។ ផ្លូវរថភ្លើងនៅតំបន់នោះ គឺជាផ្លូវប្រសព្វរបស់ហ្វូងដំរី ដែលត្រូវឆ្លងកាត់ចេញចូលពីតំបន់ព្រៃមួយទៅតំបន់ព្រៃមួយទៀត។

នៅក្នុងឆ្នាំ២០២១ តុលាការកំពូលនៅរដ្ឋ Tamil Nadu បានចេញបញ្ជាឲ្យនាយកដ្ឋានព្រៃឈើ និងរថភ្លើង ធ្វើយ៉ាងណាបង្ការឲ្យបាននូវករណីគ្រោះថ្នាក់សត្វដំរីបែបនេះទៀត។

មកទល់នឹងពេលនេះ នាយកដ្ឋានព្រៃឈើរដ្ឋ Tamil Nadu បានដំឡើងប៉មចំនួន ១២ អមនៅតាមផ្លូវរថភ្លើងក្រុង Madukkarai ហើយនៅលើប៉មនីមួយៗមានបំពាក់កាមេរ៉ាប្រើប្រាស់បច្ចេកវិទ្យា AI។ លោក Ashish Rajput អ្នកគ្រប់គ្រងគម្រោងនេះ បាននិយាយថា កាមេរ៉ា AI មានកម្មវិធីសម្គាល់ដឹងពីចលនាភាវៈមានជីវិត ដែលចូលមកក្បែរផ្លូវរថភ្លើង។ នៅពេលដំរីចូលមកបរិវេណខ្ទង់ ៣០ម៉ែត្រពីផ្លូវរថភ្លើង នោះសញ្ញាប្រកាសអាសន្ននឹងរោទិ៍ ហើយបញ្ជូនទៅកាន់បុគ្គលិករថភ្លើង និងមន្ត្រីព្រៃឈើ ដើម្បីសម្រួលឲ្យរថភ្លើងបន្ថយល្បឿន ព្រមទាំងបញ្ចៀសសត្វដំរីពីទិសដៅដែលមានគ្រោះថ្នាក់។

អ្នកស្រី Supriya Sahu លេខាធិការនៃនាយកដ្ឋានព្រៃឈើ Tamil Nadu បានប្រាប់ឲ្យដឹងថា គម្រោងប្រើ AI នេះ បានលេចចេញជារូបរាងកាលពីខែកុម្ភៈ ឆ្នាំ២០២៤ ដោយចាយអស់ថវិកាចំនួនជាង ៨៦ម៉ឺនដុល្លារ។ សម្រាប់ការអនុវត្តរយៈពេលប៉ុន្មានខែកន្លងមក ប្រព័ន្ធ AI បានចាប់ដឹងពីវត្តមាននៃដំណើរសត្វដំរីចំនួន ៤០០ក្បាល ដែលចូលមកកៀកផ្លូវរថភ្លើង ហើយបង្ការករណីគ្រោះថ្នាក់បានយ៉ាងជោគជ័យ៕

ដោយ៖ ឈាង

The post ឥណ្ឌា ប្រើប្រាស់ AI ជួយបញ្ឈប់គ្រោះថ្នាក់រថភ្លើងបុកដំរី appeared first on Kampuchea Thmey Daily.

ដំរីព្រៃចុះប្រេងនៅខេត្តត្រាត កំពុងបង្កការភ័យខ្លាចដល់ប្រជាពលរដ្ឋ

Sophal Tuon — Mon, 06 Nov 2023 03:02:35 +0000

សត្វដំរីព្រៃប្រមាណ ១០ ក្បាល ដែលមានខ្លះកំពុងចុះប្រេង បានកំពុងអុកឡុកទៅលើផលដំណាំ និងប្រជាពលរដ្ឋនៅតាមភូមិ ដែលធ្វើឲ្យមានការភ័យខ្លាចរហូតមិនហ៊ានចេញពីផ្ទះទៅធ្វើការងារទោះពេលថ្ងៃឬយប់ក៏ដោយ។
យោងតាមការផ្សាយរបស់គេហទំព័រ Thai PBS បានបញ្ជាក់ថា មានរយៈពេល ២ ថ្ងៃហើយដោយចាប់ពីថ្ងៃទី ៥ និងទី ៦ ខែវិច្ឆិកា ឆ្នាំ ២០២៣ នេះ មានសត្វដំរីព្រៃចំនួន ១០ ក្បាល និងកូនតូចដែលទើបនឹងកើតប្រមាណមួយសប្តាហ៍ចំនួន ១ ក្បាលផងដែរ បានធ្វើដំណើរចេញពីព្រៃចូលមកអុកឡុកផលដំណាំនៅក្នុងចម្ការស្ថិតក្នុងស្រុកបររ៉ៃ ខេត្តត្រាត ប្រទេសថៃ ដែលស្ថិតនៅជាប់នឹងព្រំដែនខេត្តកោះកុង បានបង្កឲ្យប្រជាពលរដ្ឋនៅក្នុងតំបន់នោះមានការភ័យខ្លាចយ៉ាងខ្លាំងរហូតដល់ពួកគាត់ មិនហ៊ានចេញទៅប្រកបរបររកស៊ីឬធ្វើការងារអ្វីនោះឡើយដោយសារតែសត្វដំរីទាំងនេះបានអុកឡុកទាំងថ្ងៃទាំងយប់។

គេហទំព័របានបន្តថា នៅក្នុងចំណោមសត្វដំរីព្រៃទាំង ១០ ក្បាលនេះ គឺមានពីរក្បាល ដែលកំពុងចុះប្រេងបានមកបំផ្លិចបំផ្លាញ ទ្រព្យសម្បត្តិរបស់ប្រជាពលរដ្ឋផលដំណាំកសិកម្ម និងបង្គោលភ្លើងនានា ដែលដាក់បំភ្លឺផ្លូវនៅតាមភូមិធ្វើឲ្យបាក់អស់ជាច្រើនបង្គោល។
ប្រជាពលរដ្ឋមួយចំនួនបាននិយាយថា បើទោះបីជាបច្ចុប្បន្នជ័រកៅស៊ូឆៅមានតម្លៃខ្ពស់ក៏ដោយក៏ពួកគាត់មិនហ៊ានចេញទៅចម្ការកៅស៊ូឡើយ ព្រោះដោយសារតែខ្លាចសត្វដំរីចុះប្រេងទាំងនេះព្រោះវាមានភាពកាចសាហាវដោយពួកវាបានបំផ្លាញរបស់របរ និងទ្រព្យសម្បត្តិរបស់ពួកគាត់ជាច្រើន។ ដោយឡែកខាងអាជ្ញាធរពាក់ព័ន្ធ និងកម្លាំងឧទ្យានជាតិ ណាំតុកខ្លងកែវ ក៏បានចេញអន្តរាគមន៍ដោយរកវិធីសាស្រ្តធ្វើយ៉ាងណាកៀងសត្វដំរីទាំងនេះឱ្យត្រឡប់ចូលទៅក្នុងព្រៃជ្រៅវិញចៀសវាងបង្កបញ្ហាដល់អាយុជីវិតរបស់ប្រជាពលរដ្ឋ៕

អត្ថបទ: សោ និយមរ័ត្ន

The post ដំរីព្រៃចុះប្រេងនៅខេត្តត្រាត កំពុងបង្កការភ័យខ្លាចដល់ប្រជាពលរដ្ឋ appeared first on Kampuchea Thmey Daily.

ដំរី ផ្អើលរត់ជាន់ហ្វូងមនុស្សក្នុងពិធីបំបួសកូននាគ រងរបួសជាច្រើននាក់

Sophal Tuon — Sun, 18 Dec 2022 07:42:02 +0000

ប្រទេសថៃ ÷ មនុស្សចំនួនជាង ១០នាក់ ក្នុងចំណោមរាប់ពាន់នាក់ បានរងរបួសធ្ងន់ស្រាល ដោយសារដំរីផ្អើលរត់ជាន់ ក្នុងពិធីបំបួសកូននាគ នៅខេត្តបុរីរ៉ាំ ប្រទេសថៃ។

ហេតុការណ៍នេះបានកើតឡើងនៅវេលាម៉ោង៥ ល្ងាចថ្ងៃទី ១៧ ខែធ្នូ ឆ្នាំ២០២២ ក្នុងភូមិណងវេវ ឃុំមឿងហ្វែក ខេត្តបុរីរ៉ាំ ប្រទេសថៃ គឺនៅក្នុងពិធីបំបួសនាគ ដោយសារតែនៅក្នុងតំបន់នោះ មានទំនៀមទម្លាប់ត្រូវឱ្យកូននាគ ជិះលើខ្នងដំរី ហើយធ្វើការបាចទានទៅលើហ្វូងមនុស្សដែលបានចូលរួមកំសាន្ត។

មុននិងចាប់ផ្តើមកម្មវិធី គណៈកម្មការបានប្រកាសជាញឹកញាប់ដោយហាមមិនឱ្យមនុស្សចូលទៅក្បែជើងដំរីជាដាច់ខាត ។ លុះពេលកម្មវិធីបានចាប់ផ្តើម មនុស្សម្នាបានរត់ចូលទៅរើសទានប្រសេចប្រសាច ដោយឡែកក្រុមក្មេងៗ បានចូលទៅរើសកៀកៗនិងដំរី ហើយខ្លះក៏បានរត់ចូលទៅរើសនៅក្រោមពោះដំរីថែមទៀត ធ្វើឱ្យសត្វដំរីឈ្មោលមួយក្បាល ដែលមានអាយុ៥ឆ្នាំ ហាក់មួរម៉ៅ បានស្ទុះរត់កាត់ហ្វូងមនុស្ស បង្កឱ្យជាច្រើននាក់។

ភ្លាមៗនោះដែរ សមត្ថកិច្ចថៃបានដឹកបញ្ជូនជនរងគ្រោះទាំងអស់ ទៅកាន់មន្ទីរពេទ្យ ព្រមទាំងបានហៅម្ចាស់កម្មវិធីមកសម្របសម្រួលដោយចរចារកដំណោះស្រាយទៅលើអ្នករបួសទាំងនោះ ដើម្បីបញ្ចប់បញ្ហា៕ អត្ថបទ : សោ និយមរ័ត្ន

The post ដំរី ផ្អើលរត់ជាន់ហ្វូងមនុស្សក្នុងពិធីបំបួសកូននាគ រងរបួសជាច្រើននាក់ appeared first on Kampuchea Thmey Daily.

បច្ចប្បន្ន កម្ពុជាមានដំរីអាស៊ី ចន្លោះពី ៤០០ ទៅ ៦០០ក្បាល

KC Virak — Fri, 25 Nov 2022 10:19:54 +0000

ថ្លែងក្នុង វគ្គបណ្តុះបណ្តាលជំនាញស្តីពី វិធីសាស្ត្របច្ចេកទេសបំពាក់ប្រឡៅកដំរីដើម្បីតាមដានបំលាស់ទីរបស់សត្វនេះ ដែលរៀបចំឡើង ចាប់ពីថ្ងៃទី១៤ ដល់ថ្ងៃទី២៤ ខែវិច្ឆិកា ឆ្នាំ២០២២នេះ នៅក្នុងដែនជម្រកសត្វព្រៃស្រែពក និងនៅទីតាំងនៃគម្រោង Elephant Valley Project ក្នុងខេត្តមណ្ឌលគិរី លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យ ក្រសួងបរិស្ថាន លើកឡើងថា បច្ចប្បន្នកម្ពុជាមានដំរីអាស៊ីចន្លោះពី ៤០០ ទៅ ៦០០ក្បាល ដែលកំពុងរស់នៅតំបន់ជួរភ្នំក្រវាញ តំបន់ព្រៃឡង់ និងតំបន់ខ្ពង់រាបភាគខាងកើត ក្នុងខេត្តមណ្ឌលគីរី ខេត្តរតនគិរី។ ចំណែកដំរីស្រុកមានប្រមាណ ៧០ក្បាល។ ក្រសួងបរិស្ថានប្ដេជ្ញាថា នឹងការពារសត្វដំរីក្នុងប្រទេសកម្ពុជាពីគំរាមរបស់មនុស្ស ដោះស្រាយជម្លោះរវាងមនុស្ស និងដំរី និងការពារព្រៃ អភិរក្សតំបន់ការពារធម្មជាតិ ដើម្បីផ្ដល់ជម្រកសុវត្ថិភាពសម្រាប់សត្វដំរីអាស៊ី។

រដ្ឋលេខាធិការក្រសួងបរិស្ថានរូបនេះ អះអាងថា៖ “យោងតាមទិន្នន័យពីម៉ាស៊ីនថតស្វ័យប្រវត្តិ ក្នុងតំបន់ការពារធម្មជាតិនានា ដំរីអាស៊ីបានរស់នៅជាហ្វូងនៅក្នុងតំបន់ការពារធម្មជាតិរបស់កម្ពុជា ហើយមានឃើញកូនតូចៗជាច្រើនថែមទៀត។ វត្តមានកូនដំរីតូចៗដែលទើបនឹងកើតនៅក្នុងហ្វូងដំរីធំៗ គឺជាក្តីសង្ឃឹមរបស់ក្រុមអ្នកអភិរក្សនិងក្រុមអ្នកបរិស្ថាន”។

តាមការសិក្សាស្រាវជ្រាវរបស់អ្នកជំនាញយៈពេល ៦០ ទៅ ៧០ឆ្នាំចុងក្រោយនេះ ចំនួនដំរីអាស៊ីនៅលើពិភពលោកបានថយចុះប្រហែល ៥០ភាគរយ។ ចំណែកឯទីជម្រករបស់វាបានបាត់បង់អស់ជាច្រើនផងដែរ។ ក្នុងចំណោមដំរីអាស៊ីសរុបប្រមាណពី ៣៩ ៤៦៣ ទៅ ៤៧ ៤២៧ក្បាល ដែលកំពុងរស់នៅក្នុងព្រៃសត្វថ្ងៃ ក្នុងនោះប្រហែល ៧៥ ភាគរយរស់នៅក្នុងប្រទេសឥណ្ឌា និងស្រីលង្កា។

ចំពោះមុខនៃការគំរាមកំហែងនេះ លោក នេត្រ ភក្ត្រា បានថ្លែងថា រាជរដ្ឋាភិបាលកម្ពុជា តាមរយៈក្រសួងបរិស្ថាន បានខិតខំរៀបចំផែនការសកម្មភាពដើម្បីអភិរក្សសត្វដំរីអាស៊ី។ លោក ថ្លែងថា ក្រុមអភិរក្សដំរីព្រៃនៅកម្ពុជា (CECG) ត្រូវបានបង្កើតឡើងនៅឆ្នាំ២០០៥ ដោយមានការចូលរួមពីក្រសួងបរិស្ថាន រដ្ឋបាលព្រៃឈើ និងអង្គការសត្វព្រៃ និងរុក្ខជាតិអន្តរជាតិ ដើម្បីអភិរក្សដំរីអាស៊ីនៅកម្ពុជា តាមរយៈការរក្សាស្ថិរភាព និងជំរុញឱ្យមានកំណើនចំនួនប្រភេទនេះនៅក្នុងព្រៃ នៃប្រទេសកម្ពុជា ហើយផែនការសកម្មភាពដើម្បីអភិរក្សសត្វដំរីអាស៊ីឱ្យនៅគង់វង្ស ត្រូវបានរៀបចំឡើងសម្រាប់រយៈពេល ១០ឆ្នាំ គឺពីឆ្នាំ២០២០ ដល់ឆ្នាំ២០២៩ ដោយបានកំណត់នូវបញ្ហាអាទិភាពចំនួន ៦។

ក្នុងនោះរួមមាន ១. ការកាត់បន្ថយការបាត់បង់ទីជម្រក ២. អភិរក្សនិងតភ្ជាប់ច្រករបៀង និងហ្វូងដំរីព្រៃឡើងវិញ ៣. ពង្រឹងការអនុវត្តច្បាប់ ៤. បង្ការមិនឱ្យមានការចាប់ដំរីព្រៃមកចិញ្ចឹម ៥. បន្ធូរបន្ថយជម្លោះរវាងសត្វដំរីព្រៃ និងមនុស្ស ៦. អប់រំផ្សព្វផ្សាយ និងដាក់ចេញសកម្មភាពយុទ្ធសាស្ត្រសម្រាប់ដោះស្រាយបញ្ហាទាំងនោះ។

យោងតាមការប៉ាន់ស្មានផែនការសកម្មភាពរយៈពេល ១០ ឆ្នាំដើម្បីអភិរក្សសត្វដំរីព្រៃអាស៊ីនេះ ត្រូវការថវិកាចំនួន ៤០,៥ លានដុល្លារសហរដ្ឋអាមេរិក ដែលជាគម្រោងថវិការំពឹងថា នឹងបានមកពីប្រភពរួមបញ្ចូលគ្នាទាំងកញ្ចប់ថវិការាជរដ្ឋាភិបាល អង្គការមិនមែនរដ្ឋាភិបាល និងដៃគូអភិវឌ្ឍន៍នានា។

គួរបញ្ជាក់ថា វគ្គបណ្តុះបណ្តាលជំនាញស្តីពី វិធីសាស្ត្របច្ចេកទេសបំពាក់ប្រឡៅកដំរីដើម្បីតាមដានបំលាស់ទីរបស់សត្វនេះ មាន សមាសភាពសិក្ខាកាមដែលបានចូលរួមក្នុងវគ្គបណ្តុះបណ្តាលនេះមាន មន្ត្រីជំនាញស្រាវជ្រាវសត្វព្រៃ នៃក្រសួងបរិស្ថាន អ្នកតំណាងមកពីមន្ទីរបរិស្ថានខេត្ត ក្រុមស្រាវជ្រាវសហគមន៍ អង្គការWWFកម្ពុជា អង្គការWWFវៀតណាម អង្គការWCS និងមកពីសាកលវិទ្យាល័យភូមិន្ទកសិកម្មផងដែរ។ សិក្ខាកាមទាំងអស់បានទទួលការបណ្តុះបណ្តាលទាំងផ្នែកទ្រឹស្តី និងការអនុវត្តផ្ទាល់ដោយមានការយកចិត្តទុកដាក់ខ្ពស់ពីក្រុមគ្រូបង្គោលដោយផ្តោតលើគ្រប់ទិដ្ឋភាពបច្ចេកទេស និងកត្តាសុវត្ថិភាពចាំបាច់ទាំងសម្រាប់សត្វដំរី និងអ្នកស្រាវជ្រាវ ពោលគឺចាប់តាំងពីដំណាក់កាល នៃការរៀបចំផែនការ រហូតដល់ការចុះអនុវត្តវិធីសាស្ត្របំពាក់ប្រឡៅកដំរីជាជំហ៊ានៗ៕

The post បច្ចប្បន្ន កម្ពុជាមានដំរីអាស៊ី ចន្លោះពី ៤០០ ទៅ ៦០០ក្បាល appeared first on Kampuchea Thmey Daily.

ប្រទះឃើញដំរីមួយហ្វូង នៅក្នុងតំបន់ដែនជម្រកសត្វព្រៃស្រែពក ក្នុងខេត្តមណ្ឌលគិរី

Kang Tola — Wed, 16 Mar 2022 15:06:52 +0000

មណ្ឌលគិរី ៖ កាលពីរសៀលថ្ងៃទី១៦ ខែមីនា ឆ្នាំ២០២២ នេះ អំឡុងពួកគេដើរល្បាត និងចុះសិក្សាស្រាវជ្រាវជីវៈចម្រុះក្នុងដែនជម្រកសត្វព្រៃស្រែពក។

អមជាមួយនឹងក្តីរំភើបរីករាយឥតឧបមា ក្រុមអ្នកវិទ្យាសាស្ត្រផ្នែកស្រាវជ្រាវសត្វព្រៃនៃមន្ទីរបរិស្ថានខេត្តមណ្ឌលគីរី និងអង្គការWWF បានផ្តល់របាយការណ៍នៅថ្ងៃទី១៦ ខែមីនា ឆ្នាំ២០២២ នេះ ដោយបញ្ជាក់ថាពួកគេបានប្រទះឃើញហ្វូងសត្វដំរីអាស៊ីសរុបចំនួន ០៨ ក្បាល (Asian elephant ) Elephas maximus ខណៈពេលដែលពួកគេបានចុះតាមដាន និងកត់ត្រាទិន្នន័យបន្ទាត់ត្រង់សិក។ ការសិក្សាស្រាវជ្រាវនេះ នៅក្នុងដែនជម្រកធម្មជាតិនៃតំបន់ស្រែពក។

សកម្មភាពតាមដាន សិក្សានេះ ជាផ្នែកមួយនៃកម្មវិធីស្រាវជ្រាវអំពីសត្វដំរីអាស៊ីនៃគម្រោងកាំប៉ាស(CAMPAS) ដឹកនាំដោយក្រសួងបរិស្ថាន ហើយមានការរួមថវិកាបន្ថែមពី អង្គការWWF ។

ស្ថិតក្រោមលក្ខខណ្ឌអាកាសធាតុដ៏លំបាក ហើយផ្គួបជាមួយនឹងភាពអត់ធ្មត់ខ្ពស់ គំហើញនៃសត្វដ៏កម្រមួយប្រភេទនេះ ត្រូវបានកត់ត្រាទុកនៅទីតាំងស្រាវជ្រាវមួយដែលអ្នកវិទ្យាសាស្ត្រធ្លាប់បានប្រមូលលាមក និងដានជើងរបស់វាកាលពីអំឡុងរដូវប្រាំងឆ្នាំមុន។ ហ្វូងសត្វដំរីទាំងនេះ បច្ចុប្បន្នកំពុងរស់នៅដោយសុវត្ថិភាពនៅក្នុង ទីជម្រក ធម្មជាតិរបស់ពួកវា ក្រោមការការពារយ៉ាងតឹងរ៉ឹងដោយ មន្ត្រីឧទ្យានុរក្សនៃដែនជម្រកសត្វព្រៃស្រែពកនៃខេត្តមណ្ឌលគិរី។

ដំរីអាស៊ីជាប្រភេទជិតផុតពូជ និងបានចុះបញ្ជីក្រហម IUCN (EN) ជាប្រភេទសត្វដែលជិតផុតពូជនៅលើពិភពលោក។ ដំរីនៅអាស៊ីត្រូវបានគេចាត់ថ្នាក់នៅក្នុងបញ្ជីឧបសម្ព័ន្ធIនៃ អនុសញ្ញាសាយតេស។

ភិនភាគ៖ ដំរីជាប្រភេទសត្វចតុបាទដែលមានមាឌធំជាងគេបំផុត។ វាមានប្រមោយវែងមានស្បែកកក្រាស់ពណ៌ប្រផេះ និងមានរោមរឹងៗ ស្លឹកត្រចៀកមានរាងដូចផ្លិតតែស្តើង ដំរីមានក្រចកម្រាមជើង១៨ គឺនៅជើងមុខនីមួយៗមានក្រចកម្រាមជើង៥ ឯក្រចកជើងក្រោយនីមួយៗមានម្រាម៤ តែក៏មានដំរីខ្លះមានក្រចកម្រាមជើងដល់ទៅ២០ដែរ។ ដំរីញីមានភ្លុក “ចែ” ដែរ តែវាមិនបញ្ចេញឲ្យឃើញច្បាស់ដូចដំរីឈ្មោលពេញវ័យទេ។ ភ្លុកដំរីធំ ឈ្មោលមួយចំនួនមានប្រវែងរហូតដល់ទៅ១ម៉ែត្រ។ ដំរីនៅតំបន់អាស៊ីខុសពីដំរីនៅតំបន់អាហ្វ្រិកដោយសារមាឌនិងស្លឹកត្រចៀកមានទំហំតូចជាង។ដំរីអាស៊ីមានខ្នងស្ទើររាបស្មើ ឯដំរីអាហ្វ្រិកមានខ្នងកោងជាទួលខ្ពស់ឡើងលើ។

ជីវសាស្ត្រ៖ ដំរីច្រើនរស់នៅតាមព្រៃល្បោះ វាលស្មៅ ព្រៃឫស្សី ព្រៃជាំទឹក តាមដងអូរ ព្រៃពាក់កណ្តាលស្រោង និងព្រៃស្រោង។ វាស៊ីសំបកឈើ ស្លឹកឈើ មើមឈើ ឬសឈើខ្ចីៗ ទំពាំងឫស្សី ផ្តៅ និងវល្លិ៍ជាដើម។ ចំពោះការចិញ្ចឹមក្នុងសួនសត្វ ដំរីអាចស៊ីផ្លែឈើ អំពៅ ចេក។ល។ វាផឹកទឹករហូតដល់ ២០០លីត្រ ក្នុងមួយថ្ងៃ (នៅកន្លែងសំបូរទឹក)។ ដំរីច្រើនផ្តល់កំណើតកូនក្នុងខែកក្កដា-សីហា កូនម្តងបាន១ក្បាល ឬភ្លោះក៏មានដែរ ប៉ុន្តែកម្រណាស់បន្ទាប់ពីពពោះរយៈពេល២១ខែ (យូរបំផុត២៥ខែ)។ ដំរីមេអាចបង្កើតកូនបាន ៤ ឬ៥ដង ហើយអាចមានកូនរហូតដល់៥០-៧០ឆ្នាំ។ គេអាចសម្គាល់ដំរីឈ្មោលចុះប្រេងនៅពេលដែលគេឃើញមានសារធាតុរាវម្យ៉ាងហូរចេញពីរន្ធមួយនៅចន្លោះត្រចៀក និងភ្នែក ដែលជាទូទៅនៅចន្លោះខែវិច្ឆិកា និងខែធ្នូ។

រប៉ាយរស់នៅ៖ ដំរីមានតិចតួចនៅក្នុងប្រទេសកម្ពុជា ដែលស្ថិតនៅតំបន់មួយចំនួនដូចជាភូមិភាគឦសាន និរតី និងភូមិភាគខាងជើង។ ដំរីមានរប៉ាយនៅប្រទេសឥណ្ឌា រហូតដល់អាស៊ីអាគ្នេហ៍ កោះស៊ូម៉ាត្រា និងនៅភាគខាងជើងនៃកោះបរណេអូ។ ចំនួនសត្វដំរីបានថយចុះដោយសារការប្រមាញ់យកភ្លុក និងការបាត់បង់ទីជម្រក។

សូមអរគុណដល់មន្ត្រី ឧទ្យានុរក្សមន្ទីរបរិស្ថានខេត្តមណ្ឌលគិរី ដែលខិតខំប្រឹងប្រែងទប់ស្កាត់បទល្មើស ធនធម្មជាតិ និងក្រុមសិក្សាស្រាវជ្រាវជីវៈចម្រុះ ដែលការពារថែរក្សាធនធានធម្មជាតិជាពិសេសសត្វព្រៃ ដែលកម្រនិងជិតផុតពូជ ឲ្យនៅគង់វង្ស សម្រាប់មនុស្សជំនាន់ក្រោយ៕

The post ប្រទះឃើញដំរីមួយហ្វូង នៅក្នុងតំបន់ដែនជម្រកសត្វព្រៃស្រែពក ក្នុងខេត្តមណ្ឌលគិរី appeared first on Kampuchea Thmey Daily.

ដំរី Archives - Kampuchea Thmey Daily

ដំរីក្នុងសួនសត្វប្រទេសហ្សំប៊ី ជាន់​អ្នកទេសចរស្លាប់​២នាក់

ដំរី​យ៉ាងតិច​៦​ក្បាល​​ងាប់​ក្នុងគ្រោះថ្នាក់​​​រថភ្លើង​​បុក​​​នៅស្រីលង្កា​​​

ដំរីផ្អើល ជាន់មនុស្សក្នុងពិធីបុណ្យសាសនានៅ ស្រីលង្កា

ឥណ្ឌា ​ប្រើប្រាស់ AI ជួយ​បញ្ឈប់​​គ្រោះថ្នាក់​រថភ្លើង​បុក​ដំរី

ដំរីព្រៃចុះប្រេងនៅខេត្តត្រាត កំពុងបង្កការភ័យ​ខ្លាចដល់ប្រជាពលរដ្ឋ

ដំរី ផ្អើលរត់ជាន់ហ្វូងមនុស្សក្នុងពិធីបំបួស​កូននាគ រងរបួសជាច្រើននាក់