តិចនិក Archives - Kampuchea Thmey Daily

ការពិតទាំង ១០ យ៉ាង អំពីបណ្ដាញសង្គម TikTok

Saron Sela — Thu, 26 Jan 2023 01:15:00 +0000

TikTok ត្រូវបានគេស្គាល់សម្រាប់មាតិកាសម្រាប់ការបង្ហោះដោយវីដេអូចម្រៀង និងសម្ដែង ក៏ដូចជា រាំ ដែលកម្មវិធីនេះបំផុសគំនិតមនុស្សនិងជួយឱ្យអ្នកសប្បាយជាមួយវីដេអូបទច្រៀង និងក្បាចរាំ បន្ទាប់មកចែករំលែកជាមួយមិត្តភក្តិ និងពិភពលោក។ ប៉ុន្តែតើកម្មវិធីនេះស្រាប់តែលេចចេញពីណា ហើយហេតុអ្វីបានជាវាពេញនិយមម្ល៉េះ?

ខាងក្រោមនេះគឺជាការពិតចំនួន ១០ អំពីកម្មវិធី TikTok ៖

១ TikTok គឺជាកម្មវិធីមានអ្នកប្រើប្រាស់ច្រើនជាងគេនៅក្នុងឆ្នាំ ២០២០ និង ២០២១

TikTok ត្រូវបានគេទាញយកប្រើប្រាស់ជិត ១១៥ លានដងក្នុងខែ មីនា ឆ្នាំ ២០២០ ដែលវាធ្វើឱ្យក្លាយជាកម្មវិធីមានប្រើប្រាស់ច្រើនបំផុតដែលមិនធ្លាប់មានរហូតមកដល់បច្ចុប្បន្ន រហូតដល់ក្នុងកំឡុង ឆ្នាំ ២០២១ TikTok មានការទាញយកចំនួន ៦៥៦ លានដងដោយ Instagram ជាប់ចំណាត់ថ្នាក់ លេខ ២ ដែលមានការទាញយកចំនួន ៥៤៥ លានដង។

២ TikTok ត្រូវបានគេហៅថា Douyin នៅក្នុងប្រទេសចិន

កម្មវិធីដើមរបស់ TikTok ត្រូវបានបង្កើតឡើងក្នុងឆ្នាំ ២០១៦ ហើយត្រូវបានបង្កើតឡើងដោយក្រុមហ៊ុ ន Bytedance នៅក្នុងប្រទេសចិន។ ប្រជាជនចិនបានហៅកម្មវិធីនេះថា “Douyin” ហើយបន្ទាប់មក បានបើកដំណើរការវាទៅកាន់ទីផ្សារលោកខាងលិចក្នុងឆ្នាំ ២០១៧ ក៏ផ្តូលឈ្មោះជា TikTok ។

៣ ប្រហែល ៤១ ភាគនៃអ្នកប្រើប្រាស់ TikTok មានអាយុចន្លោះពី ១៦ ទៅ ២៤ ឆ្នាំ

TikTok ត្រូវបានរចនាឡើងដោយមានសម្រាប់មនុស្សទូទៅ កម្មវិធីនេះអនុញ្ញាត ឱ្យអ្នកប្រើបង្ហាញខ្លួនឯងតាមរយៈការការសម្តែង រាំ និងច្រៀង។ នៅឆ្នាំ ២០១៩ ការស្ទង់មតិមួយបានបង្ហាញថា ៤១ ភាគនៃអ្នកប្រើប្រាស់មានអាយុចន្លោះពី ១៦ ទៅ ២៤ ឆ្នាំ ហើយវាមិនគួរឱ្យភ្ញាក់ផ្អើលចំពោះរឿងមួយនេះ។

៤ TikTok បានទិញយកកម្មវិធី Musical.ly

Musical.ly ត្រូវបានបង្កើតឡើងក្នុងឆ្នាំ ២០១៤ ជាមួយនឹងអ្នកប្រើដែលបង្ហោះវីដេអូខ្លីៗអំពីខ្លួនពួកគេ ដោយផ្ទាល់ ជាមួយភាពកំប្លែង។ ទោះជាយ៉ាងណាក៏ដោយ វាបានផ្លាស់ប្តូរទៅជា TikTok នៅពេល ដែលកម្មវិធីទាំងពីរបានបញ្ចូលគ្នាក្នុងឆ្នាំ ២០១៧ ដោយក្រុមហ៊ុនចិន Bytedance ដែលជាស្ថាបនិក TikTok បានទិញ Musical.ly ក្នុងតម្លៃ ១ ពាន់លានដុល្លារ។

៥ TikTok ណែនាំអ្នកប្រើប្រាស់ឱ្យឈប់សម្រាកពីកម្មវិធី

នៅក្នុងឆ្នាំ ២០១៩ TikTok ជាផ្នែកមួយនៃស៊េរីមាតិកា “You’re in Control” ធ្វើយុទ្ធនាការដើម្បីជួយ អ្នកប្រើប្រាស់ TikTok បានបង្កើតការផ្សាយពាណិជ្ជកម្ម ដើម្បីរំលឹកអ្នកប្រើប្រាស់ឱ្យឈប់សម្រាក ពីកម្មវិធី។ យុទ្ធនាការនេះបានធ្វើការជាមួយនឹងតារាល្បី TikTok ដើម្បីលើកទឹកចិត្តអ្នកប្រើប្រាស់ ឱ្យផឹកទឹក ឬទទួលបានអាហារ ព្រោះពេលខ្លះអ្នកប្រើប្រាស់កម្មវិធីរហូតភ្លេចថែរក្សាខ្លួនឯង។

៦ ប្រទេសឥណ្ឌាហាមឃាត់មិនឲ្យប្រើប្រាស់ TikTok

គិតត្រឹមឆ្នាំ ២០២០ TikTok ត្រូវបានទាញយកសរុបជាង ៦១១ លានដងនៅក្នុងប្រទេសឥណ្ឌា ដែលស្មើនឹង ៣០ ភាគរយៈនៃការទាញយកសរុបទូទាំងពិភពលោក។ ទោះយ៉ាងណា នៅថ្ងៃទី ២៩ ខែ មិថុនា ឆ្នាំ ២០២០ ក្រសួងអេឡិចត្រូនិក និងបច្ចេកវិទ្យាព័ត៌មានបានទប់ស្កាត់ការប្រើប្រាស់ កម្មវិធីនៅក្នុងប្រទេសឥណ្ឌា។

៧ TikTok មានមុខងារគ្រប់គ្រងពេលវេលា

មុនពេលយុទ្ធនាការ “You’re in Control” កម្មវិធី TikTok មានមុខងារគ្រប់គ្រងក្នុងការកាត់បន្ថយ ម៉ោងប្រើប្រាស់។ យុទ្ធនាការនេះត្រូវបានណែនាំនៅក្នុងខែ មេសា ឆ្នាំ ២០១៩ និងបានលើកទឹក ចិត្តអ្នកប្រើប្រាស់ឱ្យឈប់សម្រាកពីការមើលអេក្រង់ទូរស័ព្ទជាបន្តបន្ទាប់។

៨ ជាមធ្យមដែលអ្នកប្រើប្រាស់នៅលើ TikTok គឺ ៥២ នាទីក្នុងមួយថ្ងៃ

យោងទៅតាម Statistics from Businessofapps s បានបង្ហាញថា ក្នុងឆ្នាំ ២០១៩ ពេលវេលាសរុប ជាមធ្យមដែលអ្នកប្រើប្រាស់នៅលើ TikTok គឺ ៥២ នាទីក្នុងមួយថ្ងៃ។ អ្នកប្រើប្រាស់ នឹងបើកកម្ម វិធីប្រាំបីដងក្នុងមួយថ្ងៃ ហើយចំណាយពេលប្រហែល ៦ទៅ៧ នាទីនៅលើកម្មវិធី។

៩ អ្នកប្រើប្រាស់ TikTok ជាង ៩០ ភាគរយៈប្រើប្រាស់កម្មវិធីច្រើនដងជារៀងរាល់ថ្ងៃ

តើអ្នកដឹងទេថា ៣ភាគ៤ នៃកម្មវិធីទាំងអស់ដែលបានទាញយកគឺត្រូវបានចូលប្រើតែម្តងប៉ុណ្ណោះ បន្ទាប់មកមិនប្រើម្តងទៀតទេ។ នេះធ្វើឱ្យ TikTok នៅក្នុងត្រីមាសដែលនៅសល់ ដោយមានអ្នក ប្រើប្រាស់ ៩០ ភាគរយប្រើប្រាស់កម្មវិធីនេះជារៀងរាល់ថ្ងៃ។

១០ គិតត្រឹមឆ្នាំ ២០២២TikTok មានតម្លៃប្រហែល ៧៥ ពាន់លានដុល្លារ

TikTok បានកើនឡើងទ្វេដងនូវប្រាក់ចំណូលប្រចាំឆ្នាំរបស់ខ្លួនក្នុងឆ្នាំ ២០១៩ នៅចុងឆ្នាំ ២០១៨ វាមានតម្លៃ ៧.៤ ពាន់លានដុល្លារ និងឈានដល់ ១៧ ពាន់លានដុល្លារនៅចុងឆ្នាំ ២០១៩ ។ ក៏ដូច ជាកម្មវិធីដែលរកប្រាក់ចំណេញបានដែរ តារា TikTok ជាមធ្យមអាចរកចំណូលបានចន្លោះពី ៥០,០០០ ដុល្លារ ទៅ ១៥០,០០០ ដុល្លារក្នុងមួយឆ្នាំ។

ប្រែសម្រួល៖នាងតូច

ចុចអាន៖រឿងព្រឺឆ្អឹងខ្នង ៥ យ៉ាងដ៏គួរឲ្យខ្លាចអំពីខ្មោច

The post ការពិតទាំង ១០ យ៉ាង អំពីបណ្ដាញសង្គម TikTok appeared first on Kampuchea Thmey Daily.

កំហុសធំៗ ៥ យ៉ាង នៅពេលជ្រើសរើស និងទិញគ្រឿងសង្ហារិមចូលផ្ទះ

សាង ស្រីល័ក្ខ — Tue, 23 Aug 2022 04:59:17 +0000

ការជ្រើសរើស និងទិញគ្រឿងសង្ហារិមសម្រាប់រស់នៅ មិនថាសាឡុង គ្រែ តុបរិភោគអាហារ ឬផ្នែកផ្សេងទៀតសម្រាប់មនុស្សមួយចំនួនគឺជារឿងសប្បាយរីករាយ និងរំភើបខ្លាំង។ ជាពិសេស ប្រសិនបើអ្នកមានផ្ទះជាលើកដំបូង ដូច្នេះអ្នកអាចមានសេរីភាពក្នុងការជ្រើសរើសគ្រឿងសង្ហារឹមណាក៏ដោយ ដែលអ្នកចង់បំពេញកន្លែងផ្ទាល់ខ្លួន។

ទោះជាយ៉ាងណាក៏ដោយ ដំណើរការនេះគឺមិនសាមញ្ញដូចដែលរៀបរ៉ាបខាងលើនោះទេ។ មានរឿងជាច្រើនដែលត្រូវពិចារណា ដើម្បីចៀសវាងការប្រព្រឹត្តខុស ដែលមិនត្រឹមតែធ្វើឲ្យអ្នកខាតបង់ប្រាក់ប៉ុណ្ណោះទេ ប៉ុន្តែថែមទាំងនាំឲ្យមានការសោកស្តាយផងដែរ។ នេះគឺជាកំហុសទាំង៥ ក្នុងការជ្រើសរើសគ្រឿងសង្ហារិម ដែលអ្នកគួរចៀសវាង។

១ មិនបានវាស់វាឲ្យត្រឹមត្រូវ

រឿងដំបូងនិងសំខាន់បំផុត ដែលត្រូវធ្វើគឺវាស់គ្រឿងសង្ហារិម ក៏ដូចជាកន្លែងសម្រាប់ដាក់របស់វា។ កុំវាស់គ្រឿងសង្ហារិមដែលត្រូវទិញតាមអារម្មណ៍នៃការមើលឃើញ។ ទោះបីជាគ្រឿងសង្ហារិមមួយដុំមើលទៅតូច នៅពេលដែលវានៅក្នុងហាងក៏ដោយ តែមិនប្រាកដថា អាចដាក់ចូលផ្ទះបានងាយស្រួលនោះទេ។ ការវាស់វែងត្រឹមត្រូវ នឹងជួយអ្នកសម្រេចចិត្តថាតើគ្រឿងសង្ហារិមប្រភេទណា ដែលអ្នកត្រូវការ។ មិនថាជាសាឡុង ឬគ្រែទេ ត្រូវប្រាកដថាវាមិនធំពេក ឬតូចពេកសម្រាប់បន្ទប់។

២ ទិញគ្រឿងសង្ហារឹមដែលមិនសមនឹងតម្រូវការរបៀបរស់នៅរបស់អ្នក

កំហុសទូទៅមួយទៀត គឺការទិញគ្រឿងសង្ហារិមដែលមិនសមនឹងតម្រូវការរបៀបរស់នៅរបស់អ្នក។ ជាឧទាហរណ៍ គ្រួសារដែលមានសត្វចិញ្ចឹម ឬកូននៅក្នុងនោះ គួរពិចារណាដោយប្រុងប្រយ័ត្ននូវសម្ភារៈនៃគ្រឿងសង្ហារិមខ្លាំងបំផុត។ ប្រសិនបើអ្នកទិញសាឡុង ចូរជ្រើសរើសសម្ភារៈប្រើប្រាស់បានយូរដែលទប់ទល់នឹងការធ្លាយទឹក និងក្រញាំមុតស្រួច។ ដូចគ្នានេះផងដែរ ត្រូវប្រាកដថា មិនត្រូវជ្រើសរើសពណ៌គ្រឿងសង្ហារិមភ្លឺពេក ដែលអាចងាយមានស្នាមប្រលាក់នៃពណ៌ឬការកំពប់ធ្វើឲ្យកខ្វក់។

៣ កុំដើរទិញឥវ៉ាន់ដោយអន្ទះសារ

នៅពេលទិញគ្រឿងសង្ហារិម វត្ថុមួយដែលអ្នកពិតជាត្រូវការគឺ ចៀសវាងការទិញវាដោយអន្ទះសារ។ គិតនិងពិចារណាដោយប្រុងប្រយ័ត្ន។ ព្យាយាមចាយក្នុងថវិកាដែលបានគ្រោងទុក។ គ្រឿងសង្ហារិមគឺជាផ្នែកសំខាន់មួយនៃផ្ទះ ដូច្នេះមុខងាររបស់វា ត្រូវតែផ្គូផ្គងនឹងការតុបតែង ការរចនាខាងក្នុងនិងរបស់ផ្សេងៗទៀត។ ការទិញគ្រឿងសង្ហារិមទាមទារវិធីសាស្ត្រដ៏ទូលំទូលាយ និងការសម្រេចចិត្តប្រកបដោយតុល្យភាព។ ដូច្នេះ ធ្វើការទិញនៅពេលដែលអ្នកប្រាកដជាច្បាស់ ហើយចៀសវាងការសម្រេចចិត្តដោយប្រញាប់ប្រញាល់។

៤ ជ្រើសរើសរូបរាងមានផាសុកភាព ជាងល្អតែខាងក្រៅ

ជាមួយនឹងរចនាប័ទ្ម និងការរចនាជាច្រើនសម្រាប់ជ្រើសរើសសម្រាប់សាឡុង គ្រែ ទូខោអាវ ឬសូម្បីតែតុបរិភោគអាហារ វាកាន់តែងាយស្រួល សម្រាប់មនុស្សភាគច្រើនក្នុងការសម្រេចចិត្តទិញអ្វីមួយ ដែលមើលទៅអស្ចារ្យ និងទាន់សម័យ។ ជាការពិត បើប្រៀបធៀបទៅនឹងការរចនា ការលួងលោមនៃគ្រឿងសង្ហារិមម គឺសំខាន់។ មិនថាអ្នកចង់ឲ្យគេហដ្ឋានរបស់អ្នកមានការរចនាខាងក្នុងស្រស់ស្អាតប៉ុណ្ណានោះទេ ចូរចងចាំថា ត្រូវជ្រើសរើសភាពសុខស្រួលជាងភាពស្រស់ស្អាត។ គ្រឿងសង្ហារិមដែលបានជ្រើសរើសត្រូវតែសមរម្យសម្រាប់ការប្រើប្រាស់ប្រចាំថ្ងៃ និងបម្រើគោលបំណងរបស់វា។ ទោះបីជាវាមើលទៅគួរឲ្យទាក់ទាញខ្លាំងក៏ដោយ កុំជ្រើសរើសគ្រឿងសង្ហារឹមបែបនេះ លុះត្រាតែវាផ្តល់នូវផាសុកភាពល្អបំផុត។

៥ មិនអើពើការចំណាយលើការថែទាំ

សូមគិតពីរដងមុននឹងជ្រើសរើសគ្រឿងសង្ហារិមណាមួយ។ វិភាគកិច្ចខិតខំប្រឹងប្រែង ឬការថែទាំណាមួយដែលអាចចំណាយអស់អ្នកច្រើន។ ពិចារណាអំពីគ្រឿងផ្សំ និងថាតើត្រូវការការថែទាំប៉ុន្មាន។ ប្រសិនបើអ្នកមិនមានពេលសម្រាប់ការជួសជុលនោះ សូមជ្រើសរើសជម្រើសមួយផ្សេងទៀត។ ការថែរក្សាគ្រឿងសង្ហារិមមិនមែនជាកិច្ចការងាយស្រួលនោះទេ។ អ្នកត្រូវតែការពារវាសម្រាប់ពេលនេះ និងនៅពេលក្រោយទៀត។

គ្រឿងសង្ហារិមល្អ គឺជាវត្ថុដែលអាចផ្តល់នូវផាសុកភាព និងអាចប្រើប្រាស់បានយូរនៅផ្ទះ។ ចងចាំថា ត្រូវរៀបចំផែនការជាមុន គិតអំពីវា ពិនិត្យមើលការវាស់វែង វាយតម្លៃរបៀបរស់នៅ ពិនិត្យមើលសម្ភារៈ ពណ៌ និងចំណាយពេលរបស់អ្នកជំនួសឲ្យការទិញតាមអំពើចិត្ត៕

អត្ថបទ៖ សាង ស្រីល័ក្ខ

ចុចអាន៖ចំណុចពិសេស ៨ យ៉ាង ពីសត្វសេះសមុទ្រស្មោះស្នេហ៍

The post កំហុសធំៗ ៥ យ៉ាង នៅពេលជ្រើសរើស និងទិញគ្រឿងសង្ហារិមចូលផ្ទះ appeared first on Kampuchea Thmey Daily.

វិធីសងបំណុលបានរហ័ស និងចាប់ផ្ដើមជីវិតភ្លឺស្វាងសាជាថ្មី

សាង ស្រីល័ក្ខ — Tue, 18 May 2021 03:17:58 +0000

គ្រប់គ្នាចង់រៀបចំខ្លួនឲ្យរួចផុតពីបំណុល និងចាប់ផ្ដើមជីវិតភ្លឺស្វាងសាជាថ្មីផង ប៉ុន្តែមិនដឹងថាត្រូវចាប់ផ្ដើមតាមជំហានអ្វីខ្លះ។

ត្រៀមខ្លួនរួចជាស្រេចឬនៅ?

ហើយនេះជាវិធីដែលមហាសេដ្ឋីជាច្រើនធ្លាប់រំដោះខ្លួនពួកគេពីបំណុលពីអតីតកាល នឹងឈានទៅរកជីវិតដ៏ជោគជ័យផ្នែកហិរញ្ញវត្ថុបាន៖

១ កុំបង្កើតបំណុលថ្មី

ច្បាប់ដំបូងមួយដែលបញ្ជាក់ពីការតាំងចិត្តរបស់យើង គឺកុំបង្កើតបំណុលថ្មីឲ្យសោះ លើកលែងតែចាំបាច់ពាក់ព័ន្ធនឹងការស្លាប់រស់។

ស្តាប់មើលទៅហាក់ដូចជាធ្វើមិនបានមែនទេ? មិនពិបាកទេ! គឺកុំទិញផ្ទះបន្ថែម ឬដើរទៅទៅទិញឥវ៉ាន់ដែលគេលួងលោមដោយការព្យឬស្លាកថា បញ្ចុះតម្លៃ។ល។

ជៀសវាងជំពាក់បំណុលបន្ថែមទៀតដោយវិធីរៀនរស់នៅ តាមលទ្ធភាពហោប៉ៅរបស់អ្នក។

២ ធ្វើយ៉ាងណារស់នៅសប្បាយចិត្តតាមទឹកលុយដែលយើងមាន?

នោះមានន័យថាប្រកាន់ខ្ជាប់នូវការទូទាត់កាត់បន្ថយការចំណាយណាដែលមិនចាំបាច់តាមដែលអាចធ្វើទៅបាន ហើយសងបំណុលឲ្យបានលឿន។

៣ ចាប់ផ្តើមប្រាក់សន្សំសម្រាប់សង្គ្រោះបន្ទាន់

ប្រសិនបើយើងមិនមានប្រាក់សន្សំសម្រាប់ពេលណាដែលត្រូវការជាបន្ទាន់ ហើយរំពឹងខ្ចីប្រាក់ពីមិត្តភក្តិឬសមាជិកគ្រួសារ នោះមានន័យថា ជាជីវិតមួយដែលត្រៀមទតែនឹងទទួលយកបំណុលកាន់តែច្រើនឡើងៗ។

អ្នកជំនាញហិរញ្ញវត្ថុណែនាំថា ការសន្សំប្រាក់អាចជួយការពារយើងពីការចំណាយណាដែលមិនបានគ្រោងទុក ហើយពិតជាអាចជួយឲ្យសងបំណុលបានលឿនជាងមុនផង។

៤ ព្យាយាមធ្វើការទូទាត់អប្បបរមាលើបំណុលទាំងអស់

ការទូទាត់អប្បបរមាតាមពេលវេលាជាប្រចាំសម្រាប់រាល់ប្រាក់កម្ចីជាការចាប់ផ្តើមដ៏ល្អនូវវិធីរស់នៅថ្មី ការប្រាក់កាន់តែតិច អ្នកនឹងសន្សំបានកាន់តែច្រើន។ ប្រសិនបើអ្នកអាចមានលទ្ធភាពចំណាយច្រើនជាងការទូទាត់អប្បបរមាសូមប្តេជ្ញាបង់ប្រាក់បន្ថែមជារៀងរាល់ខែដូច្នេះអ្នកអាចសន្សំប្រាក់បានទាន់ពេលវេលានិងសងបំណុលលឿន។

ឧទាហរណ៍ថា ការទូទាត់ប្រាក់កម្ចីអប្បបរមាប្រហែល ៣០% នៃប្រាក់ចំណូលប្រចាំខែ ហើយបើយើងសំរេចចិត្តដាក់សងបន្ថែម ៥% រៀងរាល់ខែបានន័យថាយើងនឹងឆាប់រួចបំណុល។

៥ បង់ប្រាក់ដែលមាន(ការ %)ឲ្យរួចមុនបំណុលដទៃ

ប្រសិនបើមានបំណុលនឹងការប្រាក់រួម (ដូចជាបំណុលកាតឥណទាន) បំណុលប្រាក់កម្ចី សូមព្យាយាមទូទាត់កាតឥណទានរជាមុនសិនព្រោះកម្រិតការនិងសេវាកម្មវាបានលេបលុយចំណូលយើងធំនិងលឿនជាងអត្រាការប្រាក់ធម្មតា ។

ប្រែសម្រួល៖ សុភា

ប្រភព៖simple

ចុចអាន៖ចង់សងបំណុលយ៉ាងណា ឲ្យបានលឿន?

ចុចអាន៖សញ្ញាសម្គាល់ បុគ្គលិកដែលកំពុងបន្លំកឹបកេងលុយក្រុមហ៊ុន

The post វិធីសងបំណុលបានរហ័ស និងចាប់ផ្ដើមជីវិតភ្លឺស្វាងសាជាថ្មី appeared first on Kampuchea Thmey Daily.

ក្លាយខ្លួនជាមនុស្សឧស្សាហ៍ធ្វើការតាមវិធីទាំង ៨ នេះ

សាង ស្រីល័ក្ខ — Sat, 20 Mar 2021 01:50:39 +0000

ការងារគឺជាអាជីពសំខាន់ណាស់សម្រាប់ជីវិតមនុស្សម្នាក់ៗ។ ការងារជោគជ័យឬបរាជ័យអាស្រ័យលើបុគ្គលនោះជាមនុស្សឧស្សាហ៍ព្យាយាម ឬជាមនុស្សខ្ជិល ហើយឆាប់បោះបង់នោះឯង។

៨ ចំណុចខាងក្រោមនេះ ជាក្បួនដើម្បីក្លាយជាអ្នកឧស្សាហ៍ធ្វើការងារឲ្យទទួលបានផ្លែផ្កាល្អ៖

១. ស្នើសុំជំនួយ បើសិនជាមិនយល់អ្វីមួយត្រូវតែសួរ និងទទួលការជួយពីអ្នកដទៃ ឬក៏ការណែនាំពីមិត្តរួមការងារ។ បើសិនជាអ្នកដទៃត្រូវការជំនួយពីយើង ក៏គួរគប្បីជួយគេវិញទៅតាមលទ្ធភាព។

២. កុំអាត្មានិយម បើសិនជាយើងជាមនុស្សអាត្មានិយម យើងនឹងមិនអាចក្លាយជាមនុស្សឧស្សាហ៍ធ្វើការបានទេ។ យើងគួរតែគិតដល់អ្នកជុំវិញ និងចេះយកអាសារគេផង នៅពេលកំពុងធ្វើការជាមួយគ្នា។

៣. ព្យាយាមម្ដងហើយម្ដងទៀត យើងគួរតែជាមនុស្សព្យាយាម មិនត្រូវបោះបង់អ្វី ដោយងាយៗនោះទេ ពីព្រោះវាជាផ្នែកដ៏ធំមួយដើម្បីឲ្យយើងកា្លយជាមនុស្សឧស្សាហ៍ធ្វើការ។ ឲ្យតែយើងជាមនុស្សឧស្សាហ៍ គឺមិនពិបាកបរាជ័យណាស់។ យើងត្រូវតែគិតនៅក្នុងចិត្តជានិច្ចថា “ខ្ញុំអាចធ្វើបាន” រាល់អ្វីដែលយើងកំពុងធ្វើ។

៤.ចែករំលែកគំនិត ក្នុងករណីដែលយើងមានគំនិតពីគម្រោងអ្វីមួយ គួរតែចែករំលែកវា។ មនុស្សដែលឧស្សាហ៍តែងតែធ្វើការចែករំលែកនូវគំនិតថ្មីៗ ព្រោះគំនិតរបស់យើងអាច ដឹកនាំអ្វីមួយដែលមិនគួរឲ្យជឿ ហើយក៏អាចបង្កើនការគិតបានទៀតផង។

៥. មើលគម្រូអ្នកដទៃ មានមនុស្សដែលឧស្សាហ៍ព្យាយាមច្រើនណាស់នៅជុំវិញខ្លួនយើង។ យើងគួរព្យាយាមធ្វើសកម្មភាពឲ្យស្រដៀងទៅនឹងនរណាម្នាក់ដែលគិតថា គេជាមនុស្សដែលឧស្សាហ៍ធ្វើការ។ ធ្វើបែបនេះយើងនឹងរៀនពីគេនូវចំណុចដែលខ្លួនមិនទាន់មាន។

៦. ត្រូវបន្តធ្វើជានិច្ច ខណៈពេលចាប់ផ្តើមធ្វើការ ហើយដល់ចំណុចមួយដែលពិបាកបំផុតនោះត្រូវព្យាយាមបន្តទៀត។ ត្រូវជម្នះការងារដែលគិតថាលំបាកនោះឲ្យប្រសើរឡើង ហើយខិតខំបន្ថែមទៀត នោះយើងនឹងបានសម្រេច។

៧. ជឿជាក់លើខ្លួនឯង អ្វីដែលយើងគួរដឹងនោះគឺ មនុស្សម្នាក់ៗអាចកើតមកជាមនុស្សឧស្សាហ៍ធ្វើការបានគ្រប់ៗគ្នា។ ក្នុងខ្លួនមនុស្សម្នាក់ៗសុទ្ធតែមានបញ្ញា និងការគិតខុសប្លែកពីគ្នា ប៉ុន្តែពួកគេអាចសម្រេចជោគជ័យដ៏អស្ចារ្យបានដូចគ្នា។

៨. ប្រើបញ្ញាស្មារតី អ្នកឧស្សាហ៍រមែងប្រើកម្លាំងធ្វើការ បូករួមជាមួយគំនិតបញ្ញា ទើបគេហៅថា ធ្វើការដោយឆ្លាតវៃ៕

ប្រែសម្រួល៖ សន្យា

ប្រភព៖ Business Insider

ចុចអាន៖ជោគជ័យស្រមោលដែលក្រោយមកធ្វើឲ្យ «បាក់ទឹកចិត្ត»ឈានដល់ក្រោកលែងរួច

ចុចអាន៖កាយវិការចំនួន ៥ ដែលចេះជាប់ខ្លួនកាលណា ទៅធ្វើការផ្នែកអ្វីក៏មិនចេះទ័ល

The post ក្លាយខ្លួនជាមនុស្សឧស្សាហ៍ធ្វើការតាមវិធីទាំង ៨ នេះ appeared first on Kampuchea Thmey Daily.

តើអាជីវកម្មមួយគួរបន្ត ឬឈប់ សម្រេចចិត្តដោយមើលលើចំណុចណាខ្លះ?

សាង ស្រីល័ក្ខ — Thu, 18 Mar 2021 02:29:34 +0000

ពេលខ្លះពេលវេលាហាក់កំពុងពិបាកខ្លាំងទាមទារការសម្រេចចិត្ត ព្រោះអាជីវកម្មឃើញលទ្ធផលតិចតួចពេកឬគ្មានលទ្ធផលសោះតែម្ដង។

គួរតែបោះបង់ឬរុញមួយទំហឹងទៀត ជាសំណួរពិបាករកចម្លើយ។

តើអ្នកណាអាចដឹងដោយរបៀបណាបាន ថាការរកស៊ីមួយនេះ កំពុងតែឈានដល់ទីបញ្ចប់ឬគ្រាន់តែធ្វើមិនទាន់ត្រូវ?

១ មិនឃើញរកបានប្រាក់ចំណេញទេ

លំហូរសាច់ប្រាក់នេះជារឿងធម្មតានៅក្នុងសហគ្រិនខ្នាតតូច។ អាជីវកម្មរបស់យើងគឺដូចទារកដែលយើងចិញ្ចឹមបីបាច់ពីការចាប់ផ្តើមដ៏តូចយើងក្រោកពីព្រលឹមមើលការរីកលូតលាស់យើងឈឺចាប់បើបោះបង់ទារកចោល។

ប្រសិនបើសហគ្រាសងាយស្រួលនោះ អ្នកណាក៏ជាសហគ្រិនដែរ។

ប្រសិនបើកំពុងប្រឈមមុខនឹងសេណារីយ៉ូនោះ ចម្លើយនឹងថ្លែងរវាងថា អាជីវកម្មនេះដំបូងបង្កើតមកដើម្បីអ្វី? យើងចង់បានវាបណ្តោះអាសន្នឬជាអចិន្ត្រៃយ៍។ ឥឡូវនេះអាជីវកម្មកំពុងតែខាតបង់តើជាការខាតបង់ដែលត្រៀមចិត្តមកហើយឬក៏អត់ទេ?

ជារឿយៗមានកាលវិភាគរវាងពេលវេលាដែលយើងចាប់ផ្តើមគិតតាំងពីមុនធ្វើការវិនិយោគ។ នៅពេលយើងឃើញផ្លែផ្កានៃការខិតខំរបស់យើងឧទាហរណ៍ យើងកំពុងអភិវឌ្ឍផលិតផលហើយយើងត្រូវចែកចាយ គ្រាន់តែមិនទាន់ដល់ពេល ទើបមិនឃើញទទួលបានលុយពីវា ឬដល់ពេលហើយតែគ្រប់យ៉ាងមិនបានការខូចអសារ ?បើដូច្នោះមែន យើងគួរសម្រេចចិត្តលើសំណួរថ្មី ប្ដូរទៅផលិតផលិតផលណាផ្សេងទៀតវិញ ឬបិទចោលតែម្តង។

២ គ្មានគេស្គាល់

ការកសាងទីផ្សារ ជាចំណុចស្នូល ដើម្បីធ្វើឲ្យអាជីវកម្មណាមួយដំណើរការ និងកសាងយីហោខ្លួន។តើអ្នកបានដាក់លុយយ៉ាងហោច៣០ភាគរយនៃការវិនិយោគរួម លើការកសាងស្លាកសញ្ញាទេ? ទោះជាផលិតផលសេវាកម្មរបស់យើង ល្អប៉ុនណាក្តី គ្រប់គ្នា ត្រូវការការជំរុញដំបូងគឺ ការធ្វើទីផ្សារ ដើម្បីទទួលបានការចាប់ផ្តើមស្គាល់និងតាមដាន។

៣ ការខាតបង់ជាអចិន្រ្តៃយ៍?

គឺនៅពេលដែលការចំណាយទំនងជាមិនធ្លាក់ចុះហើយប្រាក់ចំណូលមិនមាន ការកើនឡើងឬគ្មានសោះ នោះហើយជាពេលដែលទំនាក់ទំនងផ្លូវចិត្តលើអាជីវកម្មអាចប្រែពីវិជ្ជមានទៅជាអវិជ្ជមានបំផ្លាញសុខភាពរាងកាយនិងផ្លូវចិត្ត។

សំណួរសំខាន់ត្រង់ណេះ? ពីដំបូងយើងបង្កើតឡើងមកដើម្បីប្រាក់ចំណេញ ឬជាផ្នែកមួយសម្រាប់គាំទ្រអាជីវកម្មផ្សេងទៀត? តើតម្លៃចំណាយពេលវេលានិងធនធាន ជាការសម្រេចចិត្តត្រឹមត្រូវទេ?

លើកលែងតែយើងច្បាស់ខ្លួនឯង ពុំនោះសោតយើងនឹងតែងតែមានបញ្ហា។ យើងត្រូវច្បាស់ថាយើងចង់បានបន្តឬ ក៏មិនចង់? ដូច្នេះតើយើងអាចធ្វើអ្វីបានបន្ទាប់ពីសម្រេចចិត្តមក?

ចុចអាន៖៤ វិធីដែលរហ័សទាន់ចិត្ត នឹងរកស៊ីអនឡាញឲ្យមានគេទទួលស្គាល់ច្រើន

ចុចអាន៖៨ យ៉ាងត្រូវគិតមុនសម្រេចចិត្តបើកហាងកាហ្វេ

The post តើអាជីវកម្មមួយគួរបន្ត ឬឈប់ សម្រេចចិត្តដោយមើលលើចំណុចណាខ្លះ? appeared first on Kampuchea Thmey Daily.

វិធីកម្ចាត់មូសចេញពីក្នុងផ្ទះ ដោយប្រើវិធីធម្មជាតិងាយៗ

សាង ស្រីល័ក្ខ — Tue, 02 Mar 2021 04:03:59 +0000

មូសគឺជាសត្វល្អិតមួយដែលរំខាននិងបង្កជារោគផ្សេងៗលើកុមារនិងមនុស្សចាស់។ ណាមួយអាកាសធាតុប្រែម្រួលមិនទៀងទាត់ ជាឱកាសមួយដែលមូសតាំងជម្រកនៅក្បែរៗផ្ទះយើងបានដែរ។

ខាងក្រោមនេះជាវិធីកម្ចាត់មូសឲ្យចេញឆ្ងាយពីក្នុងផ្ទះ តាមគន្លឹះទាំងនេះ៖

១. បង្កើតទឹកខ្ទឹមសបាញ់

តើយើងមានដឹងទេថាខ្ទឹមសមានលក្ខណៈសម្បត្តិច្រើនយ៉ាង ក្នុងការកម្ចាត់សត្វល្អិត ជាពិសេសគឺពពួកមូស។ យើងក៏អាចអាចយកខ្ទឹមសពីរបីខ្ទឹម បន្ថែមដាក់ក្នុងឆ្នាំងជាមួយទឹកដែលដាំពុះរយៈពេល ១០ ទៅ ១៥ នាទី។

រួចរាល់ហើយ ទុកទឹកត្រជាក់ រួចចាក់ទឹកចូលក្នុងដបបាញ់។ បន្ទាប់មកបាញ់ទឹកនោះពាសពេញផ្ទះ កន្លែងដែលមានមូសឬនៅជុំវិញ។

២. កាហ្វេឬកាកកាហ្វេ

ទឹកដកគឺជាកន្លែងដែលទាក់ទាញមូសយ៉ាងខ្លាំង ព្រោះវាបង្កាត់ពូជនៅទីនេះបានលឿននិងរហ័ស។ ដូច្នេះដើម្បីកម្ចាត់សត្វបង្កជាជំងឺនេះ ចូរយកកាកកាហ្វេឬកាហ្វេខ្លះៗទៅប្រោះចូលទៅក្នុងរណ្ដៅមួយ ដែលយើងបានជីកនៅក្បែរផ្ទះ។ សារជាតិនៃក្លិនកាហ្វេនិងសម្លាប់ពងរបស់មូសមិនឲ្យសល់។

៣. អាល់កុលឬស្រាបៀរ

មានដែរលួចឆ្ងល់ឬអត់ថានៅក្នុងបារកម្រមានបញ្ហាមូសណាស់។ នេះក៏ព្រោះតែពពួកសត្វល្អិតនោះស្អប់ក្លិនស្រាបៀនិងស្រាជាខ្លាំង។ អ្វីដែលត្រូវធ្វើគឺដាក់ស្រាបៀឬអាល់កុលមួយកែវនៅក្នុងបន្ទប់ឬក្នុងផ្ទះ ធានាថាមូសនិងលែងហ៊ានបង្កើតជម្រកក្នុងបរិវេណផ្ទះយើងទៀតហើយ។

៤. ប្រេងស្លឹកអូលីវ

ប្រេងស្លឹកអូលីវមានលក្ខណៈសម្បត្តិប្រឆាំងនឹងមេរោគ និងប្រឆាំងនឹងបាក់តេរីដោយគ្រាន់តែដាក់ទឹកនោះពីរបីដំណក់នៅជុំវិញបន្ទប់ឬផ្ទះ។ ឬក៏អាចបន្ថែមប្រេងបន្តក់ពីរបីដំណក់ចូលទៅក្នុងដបបាញ់ទឹក ហើយបាញ់ជុំវិញផ្ទះរបស់យើងជាការស្រេច។ ត្រូវបាញ់របៀបនេះជារាល់ថ្ងៃរហូតដល់មូសបាត់អស់។

៥. ទៀន Citronella

ទៀន Citronella មានប្រជាប្រិយភាពជាខ្លាំងសម្រាប់ការប្រើប្រាស់ជាទូទៅ ពេលយើងមានដំណើរកម្សាន្តទៅក្រៅឬបោះតង់តាមព្រៃភ្នំជាដើម។ គ្រាន់តែដាក់ទៀន Citronella នៅជុំផ្ទះរបស់យើង ហើយទុកឲ្យវាឆេះឡើងមក។

ក្លិនក្រអូបមិនជាបញ្ហាអ្វីសម្រាប់មនុស្សឡើយ ប៉ុន្តែក្លិនក្រអូបនៃទៀននេះ នឹងដេញមូសមិនឲ្យហើរមកជិតយើងបានឡើយ។

៦. ជីរអង្កាម

ជីរអង្កាមមានក្លិនមុតស្រួចនិងស្ងួត ហើយអាចប្រើបានទាំងប្រេងនិងរុក្ខជាតិថែមទៀតផង។ ប្រសិនបើយើងមានរុក្ខជាតិនេះដាំនៅក្នុងផ្ទះ សូមបេះស្លឹកពីរបី ហើយញីឲ្យមុតនៅចន្លោះដៃដើម្បីបញ្ចេញប្រេងឡើងមក រួចយកមកលាបលើខ្លួនបាន។ ជម្រើសមួយទៀតគឺបង្កើតថ្នាំបាញ់ជីរអង្កាម ដើម្បីធ្វើឲ្យផ្ទះរបស់យើងប្រែជាស្រស់ថ្លានិងបាត់មូស៕

ប្រែសម្រួល ៖ សាង ស្រីល័ក្ខ

ប្រភព៖dumblittleman

ចុចអាន៖អ្នកពូកែសន្សំប្រាក់តែងប្រើវិធីនេះពេលដើរទិញទំនិញ

ចុចអាន៖យុវវ័យណាប្រកាន់បាន៣ យ៉ាងនេះនឹងទទួលជោគជ័យក្នុងជីវិត

The post វិធីកម្ចាត់មូសចេញពីក្នុងផ្ទះ ដោយប្រើវិធីធម្មជាតិងាយៗ appeared first on Kampuchea Thmey Daily.

ព្រោះតែទម្លាប់ទាំងនេះកុំព្យូទ័រយួរដៃនិងឆាប់ខូចមុនកំណត់

សាង ស្រីល័ក្ខ — Wed, 13 Jan 2021 09:11:49 +0000

កុំព្យូទ័រយួរដៃយើងប្រើប្រាស់បានយូរ ឬងាយខូចខាតរហ័សអាស្រ័យលើទម្លាប់ប្រចាំថ្ងៃ ដូច្នេះសង្កេតមើលប៉ុន្មានចំណុចខាងក្រោម ដែលសុទ្ធសឹងជារបៀបប្រើដែលបណ្ដាលឲ្យកុំព្យូទ័រខូចក្នុងរយៈពេលខ្លី។

បិទ ឬបើកកុំព្យូទ័រខ្លាំងៗ

ការយួរកុំព្យូទ័រយួរដៃទាំងនៅបើកអេក្រង់ បណ្ដាលឲ្យងាយខូចឧបករណ៍ទាំងមូល។ ជាពិសេសប្រសិនបើកាន់តែជ្រុងម្ខាង នឹងធ្វើឱ្យមានសម្ពាធលើផ្នែកនោះ ដោយអាចបណ្តាលឱ្យពត់ ឬខូចទ្រង់ទ្រាយ។ ដូច្នេះគួរបើក និងបិទថ្នមៗដោយរុញ ឬទាញវានៅចំកណ្តាល។

ដោតសាកថ្មជាប់ពេញមួយថ្ងៃ

តាមបច្ចេកទេស យើងមិនអាចទុកសាកថ្មកុំព្យូទ័រយួរដៃពេញហើយទុកចោលឡើយ ពីព្រោះធ្វើឲ្យឧបករណ៍ទប់ភ្លើងដែលរក្សាថ្មពីការបញ្ចូលភ្លើងអាចខូច។ មួយវិញទៀតបន្ទុកថាមពលដែលរត់ចូលនឹងធ្វើឱ្យថ្មឡើងកម្តៅខ្លាំង។

មិនប្រើបន្ទះត្រជាក់ជាមួយកុំព្យូទ័រ

តុ ឬពូកក្ដីដែលតែងដាក់ប្រើទ្រាប់ក្រោមកុំព្យូទ័រមិនមែនជាកន្លែងល្អនោះទេ ខណៈយើងត្រូវប្រើវាយូរៗ ព្រោះវាអាចរារាំងបំពង់ខ្យល់ក្តៅ ហើយទីបំផុតនាំឱ្យថ្មឡើងកម្តៅ។ ហេតុនេះគួរប្រើបន្ទះត្រជាក់ជំនួសឲ្យការដាក់ផ្ទាល់ទៅលើតុ ឬកន្លែងផ្សេងទៀត។

ការដកខ្សែសាកចេញ

ទម្លាប់ដកឌុយសាកដោយប្រញ៉ាប់ពេក ឬកញ្ឆក់លឿនៗ អាចបណ្តាលឱ្យខូចឌុយ និងបណ្តាលឱ្យមានបញ្ហាសាកមិនចូល ឬខូចតែម្តង។

រមូខ្សែមិនបានត្រឹមត្រូវ

ខ្សែសម្រាប់ភ្ជាប់កុំព្យូទ័រទៅឧបករណ៍ផ្សេងៗត្រូវបានផលិតឡើងតូច និងស្រាល។ ហេតុនេះ បើកាលណាប្រើវាដោយរមួលខ្លាំង វាអាចខូចទ្រង់ទ្រាយ និងបណ្តាលឲ្យការបញ្ជូនទិន្នន័យយឺត ឬសាកកុំព្យូទ័រមិនចូល។ល។

មិនប្រើស្រោមការពារ

មិនទម្លាប់ប្រើស្រោមការពារ ឬកាបូបដែលមានភាពទន់ បើចៃដន្យធ្លាក់ ឬប៉ះទង្គិចដោយប្រការណាមួយ វាអាចឆ្កូត ឬខូចយ៉ាងងាយ។

គ្មានការប្រុងប្រយ័ត្នពេលសម្អាតអេក្រង់

កុំព្យូទ័រយួរដៃមិនអាចប្រើទឹក និងក្រណាត់ធម្មតាដើម្បីសម្អាតអេក្រង់បានទេ។ ដើម្បីថែវាឲ្យនៅបានយូរ ត្រូវប្រើ microfiber និងក្រដាសសម្អាត ហើយកុំសង្គត់ធ្ងន់ដៃ ឬរុញខ្លាំងពេក ព្រោះអេក្រង់ស្តើងណាស់។

មិនបិទទុកពេលរួចការងារ

ការធ្វើការងារជាមួយកុំព្យូទ័រយួរដៃច្រើនម៉ោងមិនសម្រាក អាចធ្វើឱ្យមានបញ្ហាដល់ផ្នែករឹង ហេតុនេះត្រូវតែបិទវាទុក ពេលធ្វើការងារចប់សព្វគ្រប់ហើយ។

ដាក់កែវទឹកក្បែរកុំព្យូទ័រយួរដៃ

កុំព្យូទ័រយួរដៃនិងវត្ថុរាវមិនត្រូវធាតុគ្នាទេ។ ទឹក ឬភេជ្ជៈអាចបង្កឱ្យខូចម៉ាស៊ីនកុំព្យូទ័រ បានយ៉ាងងាយប្រសិនបើកំពប់លើ។ ដើម្បីកុំឲ្យឆាប់ខូច ចៀសវាងកុំទុកកែវទឹកក្បែរកុំព្យូទ័រ។

ផ្លាស់ទីកុំព្យូទ័រយួរដៃមិនបានពិនិត្យមុន

ផ្លាស់ទីកុំព្យូទ័រដៃ ទាំងមានដោតអង្គផ្ទុកទិន្ន័យ Hard Disk ដែលបង្កឲ្យបាត់បង់ទិន្នន័យ ទាំងអស់បាន៕

ប្រែសម្រួល៖ សន្យា

ប្រភព៖ Lifehack

ចុចអាន៖របៀបរកលុយខ្ទង់លានដុល្លាររបស់ YouTuber ស្រីដ៏ល្បីនៃប្រទេសចិន

ចុចអាន៖មុនពេលចង់ធ្វើជាអ្នកគ្រប់គ្រងនៅ front desk អានសិន!

The post ព្រោះតែទម្លាប់ទាំងនេះកុំព្យូទ័រយួរដៃនិងឆាប់ខូចមុនកំណត់ appeared first on Kampuchea Thmey Daily.

សក់ដុះក្រាស់ពេញដៃឡើងវិញ ត្រឹម២សប្តាហ៍ដោយវិធីនេះ

សាង ស្រីល័ក្ខ — Thu, 31 Dec 2020 02:13:51 +0000

ស៊ុតនិងខ្ទឹម ដែលអាចរកបានយ៉ាងងាយស្រួល គឺអាចជាដំណោះស្រាយដែលមានតំលៃថោកនិងដ៏អស្ចារ្យចំពោះបញ្ហាទាំងអស់ដែលទាក់ទងនឹងសក់។ គុណសម្បត្តិខ្លះនៃស៊ុតលើសក់អាចជា៖

គាំទ្រដល់ការលូតលាស់សក់
ស៊ុតផ្នែកស មានប្រូតេអ៊ីនច្រើនដែលមានតួនាទីជាអាហារបំប៉នសម្រាប់សក់ជំរុញការលូតលាស់កំណើនសក់ថ្មីដែលមានសុខភាពល្អ ជួយរឹតត្បិតការជ្រុះ មានជាតិប្រូតេអ៊ីនជួយធ្វើឲ្យឫសសក់កាន់តែរឹងមាំ រំញោចស្បែកក្បាលពង្រឹងឫសសក់មិនបែកនិងជ្រុះទៀតទេ។

សក់មនុស្សយើងត្រូវបានលូតលាស់ឡើងដោយសារជាំតិប្រូតេអ៊ីនភាគច្រើន។ ប្រូតេអ៊ីនដែលមាននៅក្នុងស៊ុតជួយបង្កើតនិងស្តាររចនាសម្ព័ន្ធសក់ខូច ធ្វើឲ្យកាន់តែក្រាស់លែងផុយ លែងស្រួយ

អ្នកណាដែលមានសក់ស្តើងនិងគ្មានទម្ងន់ មើលទៅមិនរលាស់ដូចមានជីវិតជីវ៉ានឹងគេអាចទទួលបានអត្ថប្រយោជន៍ជាពិសេសពីការប្រើប្រាស់ស៊ុតក្នុងវិធីខាងក្រោម៖

១ ផ្នែកនៃស៊ុត

ពណ៌សនៃស៊ុតអាចសមនឹងសក់ដែលមានខ្លាញ់ច្រើន ខណៈពេលដែលផ្នែកក្រហមអាចមានអត្ថប្រយោជន៍សម្រាប់សក់ស្ងួត។ ទោះជាយ៉ាងណាក៏ដោយការលាបពងមាន់ទាំងមូលអាចឲ្យសក់យើងទាញបានអត្ថប្រយោជន៍ភ្លោះ ទាំងផ្នែកពណ៌លឿងនិងស។

ស៊ុតសមានផ្ទុកនូវកម្រិតប្រូតេអ៊ីនខ្ពស់បំផុតរួមជាមួយសារធាតុរ៉ែផ្សេងៗទៀតដូចជានីណូលីន ប៉ូតាស្យូម ម៉ាញេស្យូម សូដ្យូមដែលសារធាតុចិញ្ចឹមទាំងអស់នេះជួយក្នុងការជំរុញកំណើនសក់។ អត្ថប្រយោជន៍នៃស៊ុតពណ៌ស លើសក់អាចរាប់បញ្ចូលទាំងបទប្បញ្ញត្តិនៃការផលិតប្រេងលើសមុនចិញ្ចឹមសសៃសក់ឲ្យធំ ស្រដៀងគ្នានេះដែរអត្ថប្រយោជន៍នៃស៊ុតពណ៌លឿងរួមមានអាស៊ីតហ្វូលិក និងវីតាមីនប៊ី ដែលជាធាតុផ្សំត្រជាក់ដ៏ល្អសម្រាប់សក់ស្តើង។ ដោយសារការប្រើប្រាស់ស៊ុតទាំងមូលមានសារៈប្រយោជន៍ចូរមានស៊ុតមួយមក ដើម្បីលាយវាជាមួយធម្មជាតិផ្សេងទៀត។

២ នីតិវិធីលាយ

ចាក់ប្រេងអូលីវ និងស៊ុតទាំងមូលវាយចូលគ្នា នៅក្នុងចានមួយរហូតដល់បញ្ចូលគ្នាឲ្យបានត្រឹមត្រូវ កិនយកទឹកខ្ទឹមក្រហមមួយមើមធំ មកលាយទៀត ។ អាចបន្ថែម ថ្នាំអូមេហ្គា៣មួយគ្រាប់ឬពីរ មកលាយចូលគ្នា ទៀត ។ តមក លាបល្បាយលើសក់ឲ្យសព្វ និងរាបស្មើសក់ដល់ស្បែកក្បាល។
ទុកផ្អាប់ចោល ដោយគ្របក្រណាត់ផ្អាប់សក់។ បន្ទាប់ពី 30 នាទីលាងសក់ប្រើទឹកត្រជាក់ជំនួសទឹកក្តៅ។ហើយនឹងប្រហែលជាពិបាកក្នុងការកម្ចាត់ក្លិនស៊ុតចេញ តែធានាថាសក់នឹងរលាស់ស្អាតប្រសិនធ្វើបាន៦ដងក្នុងពេល២សប្តាហ៍ជាប់ៗគ្នា សក់នឹងក្រាស់ក្ដាប់ពេញដៃ។

ហេតុអ្វីល្បាយនេះដំណើរការ?

ការផ្អាប់ពងមាន់លើសក់ មិនត្រឹមតែធ្វើឲ្យសក់មានសុខភាពល្អប៉ុណ្ណោះ ថែមទាំងជួយក្នុងការក្សាតុល្យភាពប្រេងរបស់ស្បែកក្បាលផងដែរ។ ស៊ុតផ្ដល់សារធាតុចិញ្ចឹមដល់ឫសសក់និងសក់ដែលអាចធ្វើឲ្យប្រសើរឡើងនូវវាយនភាពសក់ សម្រួលដល់ការលូតលាស់ សុខភាពល្អ បញ្ចៀសការស្ងួតសក់ដោយពន្លឺថ្ងៃឬ ម៉ាស៊ីនត្រជាក់៕

ប្រែសម្រួល ៖ សុភា

ចុចអាន៖មិនបាច់ចាយលុយច្រើនលើផលិតផល សាកវិធីធ្វើឲ្យសក់ដុះលឿន តាមបែបធម្មជាតិក៏អាចធ្វើបាន

ចុចអាន៖វិធីរក្សាបន្លែផ្លែឈើឲ្យនៅស្រស់បានយូរ និងជួយសន្សំសំចៃប្រាក់មិនទិញច្រើនដង

The post សក់ដុះក្រាស់ពេញដៃឡើងវិញ ត្រឹម២សប្តាហ៍ដោយវិធីនេះ appeared first on Kampuchea Thmey Daily.

តិចនិក Archives - Kampuchea Thmey Daily

ការពិតទាំង ១០ យ៉ាង អំពីបណ្ដាញសង្គម TikTok

កំហុសធំៗ ៥ យ៉ាង នៅពេលជ្រើសរើស និងទិញគ្រឿងសង្ហារិមចូលផ្ទះ

វិធី​សង​បំណុល​បាន​រហ័ស ​និង​ចាប់ផ្ដើម​ជីវិត​ភ្លឺស្វាង​សាជាថ្មី

ក្លាយ​ខ្លួន​ជា​មនុស្ស​ឧស្សាហ៍​ធ្វើការ​តាម​វិធី​ទាំង ​៨ នេះ

តើ​អាជីវកម្ម​មួយ​គួរ​បន្ត ឬ​ឈប់ សម្រេចចិត្ត​ដោយ​​មើល​លើ​ចំណុច​ណា​ខ្លះ?

វិធី​កម្ចាត់​មូស​ចេញ​ពី​ក្នុង​ផ្ទះ​ ដោយ​ប្រើ​វិធី​ធម្មជាតិ​ងាយ​ៗ