តេជោលីគ Archives - Kampuchea Thmey Daily

លោក សូ សែម រំពឹងអំឡុងការសម្រាកប៉ុន្មានសប្ដាហ៍នេះ Penrose ហាត់សមត្រូវដៃជាមួយក្រុមត្រៀមជុំទី២

Sina Noun — Tue, 09 Jun 2026 07:56:13 +0000

គ្រូបង្វឹកក្រុមបាល់ទះស្នងការខេត្តស្វាយរៀង លោក សូ សែន រំពឹងអំឡុងការសម្រាករយៈពេលប៉ុន្មាននេះនឹងធ្វើឲ្យកីឡាករអាមេរិក Penrose ហាត់សមលេងត្រូវដៃគ្នាជាមួយក្រុមដើម្បីត្រៀមការប្រកួតជុំទី២ តេជោលីគ ថ្ងៃទី១៩ ខែមិថុនា ២០២៦។

កីឡាករបរទេសរបស់ស្វាយរៀង និងណារ៉ូ

លោក សូ សែម បានឲ្យដឹងថា អំឡុងប៉ុន្មានប្រកួតចុងក្រោយនៅជុំទី១ នេះកីឡាករអាមេរិក Penrose បង្ហាញទម្រង់លេងដូចជាមិនទាន់ត្រូវគ្នាជាមួយក្រុមនោះឡើយ។ នេះដោយសារតែរូបគេទើបតែមកចូលរួមភ្លាមៗ និងមានទម្រង់លេងខាងប៉ែកប្រទេសរបស់ខ្លួននោះខុសពីអាស៊ី ដូច្នេះហាក់មិនទាន់យល់ចិត្តទៅវិញទៅមកនោះឡើយ។

គ្រូបង្វឹករូបនេះបន្ថែមទៀតថា យ៉ាងណាអំឡុងពេលសហព័ន្ធឲ្យក្រុមទាំង៦ សម្រាកនៅពេលប៉ុន្មានសប្ដាហ៍នេះលោកសង្ឃឹមថាកីឡាករអាមេរិកខាងលើហាត់សមជាមួយមិត្តរួមក្រុមឆាប់យល់ចិត្តគ្នា និងលេងសហការគ្នាបានល្អត្រៀមការប្រកួតជុំទី២ នេះវិញ។ លោកនឹងខិតខំរៀបចំក្រុមឲ្យល្អដើម្បីប្រជែងជាមួយក្រុមខ្លាំងផ្សេងៗឡើងទៅជុំបន្ទាប់។

កីឡាករអាមេរិក Penrose

បញ្ជាក់ដែរថា ក្រុមបាល់ទះស្នងការខេត្តស្វាយរៀងជាក្រុមមួយក្នុងចំណោមក្រុមទាំង៦ ដែលបានឡើងមកជុំទី២ នៃវគ្គសន្សំពិន្ទុដើម្បីឈានទៅវគ្គ ៤ក្រុមចុងក្រោយតេជោលីគ ២០២៦ នេះ។ ស្វាយរៀងជាក្រុមមួយក្នុងចំណោមក្រុមធំៗ ៣ដែលបាននាំយកកីឡាករបរទេសមកជួយក្រុមក្នុងការប្រជែងពានតេជោលីគ។ ក្រុមបាល់ទះស្នងការខេត្តស្វាយរៀងមានកីឡាករបរទេស ៣រូប រួមទាំង Penrose ជនជាតិអាមេរិក។ យ៉ាងណាអំឡុងការរុះរើកីឡាករនៅតេជោលីគត្រៀមជុំទី២ នេះនៅមិនទាន់បញ្ចប់នោះឡើយ ដូច្នេះតាមក្រុមនិមួយៗអាចនឹងមានការប្រែប្រួលបន្តទៀត៕

លោក សូ សែន

អត្ថបទដោយ៖ នួន ស៊ីណា

The post លោក សូ សែម រំពឹងអំឡុងការសម្រាកប៉ុន្មានសប្ដាហ៍នេះ Penrose ហាត់សមត្រូវដៃជាមួយក្រុមត្រៀមជុំទី២ appeared first on Kampuchea Thmey Daily.

លោក សាន សុក្រិត គិតថា តេជោលីគជុំទី២ ស្នងការភ្នំពេញ ស្នងការកោះកុង អាចនឹងធ្លាក់

Sina Noun — Mon, 08 Jun 2026 02:06:30 +0000

លោក សាន សុក្រិត គ្រូបង្វឹកបាល់ទះមួយរូបនៅកម្ពុជា វិភាគថាជុំទី២ នៃការប្រកួតតេជោលីគ រដូវកាលទី៣ នេះក្រុមដែលមានហានិភ័យខ្ពស់នឹងអាចធ្លាក់ចេញទៅពីកម្មវិធីនោះគឺស្នងការរាជធានីភ្នំពេញ និងស្នងការខេត្តកោះកុង។

ក្រុមស្នងការរាជធានីភ្នំពេញ

លោក សាន សុក្រិត បានឲ្យដឹងថា តាមអ្វីដែលលោកមើលឃើញពីសមាសភាពកីឡាករ និងទម្រង់នៃការលេងកន្លងមកនេះក្រុមដែលមានហានិភ័យខ្ពស់អាចនឹងធ្លាក់នៅជុំទី២ នេះអាចស្នងការរាជធានីភ្នំពេញ និងស្នងការខេត្តកោះកុងតែម្ដង។ ការយល់ឃើញបែបនេះដោយសារស្នងការរាជធានីភ្នំពេញបាត់កីឡាករ HERRERA ដែលជាកម្លាំងសំខាន់របស់ក្រុម ស្របពេល រ៉ុន សុខជា បើទោះជាអាចមកជួយក្រុមវិញក៏ដោយតែត្រឹមលេងនៅតួនាទីខ្លួនវិញប៉ុណ្ណោះ។

គ្រូបង្វឹករូបនេះបន្ថែមទៀតថា ប្រសិនបើស្នងការរាជធានីភ្នំពេញអាចនាំយកបរទេសមកបំពេញនៅតំណែងខ្វះខាតនោះអាចនឹងមានឱកាសខ្ពស់ប្រជែងជាមួយក្រុមខ្លាំងផ្សេងៗទៀតបាន។ ស្នងការរាជធានីភ្នំពេញគឺមិនមានកីឡាករពេញល្អដូចជំនាន់លេងពានក្រឡាហោមនោះឡើយ។ ប៉ុន្តែលោកនៅតែសរសើរចំពោះសមត្ថភាពកីឡាកររបស់ស្នងការរាជធានីភ្នំពេញ។

ចំណែកក្រុមស្នងការខេត្តកោះកុងគឺក្រុមដែលប្រើប្រាស់កីឡាករខ្មែរសុទ្ធនាពេលកន្លងទៅនេះ ដូច្នេះសមត្ថភាពនៅមានកម្រិតនៅឡើយ។ ៤ ក្រុមទៀតនោះគឺមហាជនបានស្គាល់ និងដឹងពីទម្រង់លេងរួមទាំងសមត្ថភាពកីឡាកររួចរាល់ផងដែរជាក្រុមខ្លាំងមានភាគរយខ្ពស់ឡើងទៅវគ្គពាក់កណ្ដាលផ្ដាច់ព្រ័ត្របន្ត។

លោក សាន សុក្រិត

បញ្ជាក់ដែរថា ការប្រកួតវិលជុំសន្សំពិន្ទុជុំទី២ នៃកម្មវិធីតេជោលីគ រដូវកាលទី៣ ឆ្នាំ២០២៦ នេះនឹងចាប់ផ្ដើមពីថ្ងៃទី១៩ ខែមិថុនា ឆ្នាំ២០២៦។ ក្រុមទាំង៦ ដែលត្រូវប្រកួតសន្សំពិន្ទុជុំទី២ នេះរួមមាន សមាគមបាល់ទះវិសាខា បញ្ជាការដ្ឋានអង្គរក្ស ក្រសួងមហាផ្ទៃ ស្នងការរាជធានីភ្នំពេញ ស្នងការខេត្តកោះកុង ស្នងការខេត្តស្វាយរៀង។ នៅជុំទី២ នេះក្រុមដែលចំណាត់ថ្នាក់ទាបជាងគេពីលេខ ៥-៦ នឹងត្រូវធ្លាក់ចេញពីកម្មវិធី៕

អត្ថបទដោយ៖ នួន ស៊ីណា

The post លោក សាន សុក្រិត គិតថា តេជោលីគជុំទី២ ស្នងការភ្នំពេញ ស្នងការកោះកុង អាចនឹងធ្លាក់ appeared first on Kampuchea Thmey Daily.

ហេតុផលសហព័ន្ធបាល់ទះរាប់ពិន្ទុពីសូន្យឡើងវិញ តេជោលីគ ជុំទី២

Sina Noun — Fri, 05 Jun 2026 08:19:18 +0000

លោក អាំង សិរីពិសិដ្ឋ អគ្គលេខាធិការសហព័ន្ធបាល់ទះបានបញ្ជាក់ជុំវិញការប្រកួតជុំទី២ ត្រូវរាប់ពិន្ទុចាប់ពីសូន្យឡើងវិញនោះ ព្រោះដើម្បីទុកឱកាសឲ្យក្រុមដែលបានរុះរើកីឡាករនៅវគ្គនេះមានលទ្ធភាពប្រជែងជាមួយបណ្ដាក្រុមខ្លាំងផ្សេងៗដើម្បីឡើងទៅវគ្គពាក់កណ្ដាលផ្ដាច់ព្រ័ត្របន្ត។

ក្រុមបាល់ទះក្រសួងមហាផ្ទៃ

អគ្គលេខាធិការសហព័ន្ធបាល់ទះ លោក អាំង សិរីពិសិដ្ឋ បានឲ្យដឹងថា នៅជុំទី២ នេះក្រុមទាំង ៦ត្រូវប្រកួតវិលជុំ និងសន្សំពិន្ទុចាប់ពីសូន្យឡើងទៅវិញនេះគឺដោយសារតែជាការផ្ដល់ឱកាសដល់ក្រុមផ្សេងៗដែលបានរុះរើ ឬនាំយកកីឡាករល្អៗមកជួយក្រុមមានលទ្ធភាពអាចតាមពិន្ទុជាមួយក្រុមដទៃឈានទៅវគ្គបន្តទៀតបាន។ ប្រសិនសហព័ន្ធមិនធ្វើដូចនេះក្រុមដែលមានពិន្ទុខ្ពស់ ឬដាច់គេនៅជុំទី១ គឺអាចនឹងលេងមិនអស់ពីសមត្ថភាពដោយសារដឹងថាក្រុមខ្លួនឯងឡើងទៅហើយ។

លោក អាំង សិរីពិសិដ្ឋ បន្ថែមទៀតថា មួយវិញទៀតនៅជុំទី២ នេះបានផ្ដល់ឱកាសដល់ក្រុមផ្សេងៗអាចរុះរើសមាសភាពកីឡាករបានឡើងវិញ។ ដូច្នេះបើរុះរើក្រុមឡើងវិញយ៉ាងណាក្ដី ប៉ុន្តែពិន្ទុចាញ់ដាច់ពីក្រុមដទៃនោះការរៀបចំក្រុមឡើងវិញនេះមានន័យអ្វីទៅ។

ការប្រកួតកន្លងទៅ

បញ្ជាក់ដែរថា ការប្រកួតវិលជុំសន្សំពិន្ទុជុំទី២ នេះនឹងធ្វើឡើងនៅថ្ងៃទី១៩ ខែមិថុនា ឆ្នាំ២០២៦ ខាងមុខនេះបន្ទាប់ពីសម្រាក និងផ្ដល់ឱកាសឲ្យក្រុមទាំង ៦រុះរើកីឡាកររបស់ខ្លួនហើយនោះ។ ការប្រកួតនឹងចាប់រាប់ពិន្ទុពីសូន្យឡើងទៅវិញ ដូច្នេះក្រុមដែលមានពិន្ទុខ្ពស់ជាងគេពីលេខ១ ដល់ ៤ បានឡើងទៅវគ្គពាក់កណ្ដាលផ្ដាច់ព្រ័ត្របន្តទៀតបាន៕

លោក អាំង សិរីពិសិដ្ឋ

អត្ថបទដោយ៖ នួន ស៊ីណា

The post ហេតុផលសហព័ន្ធបាល់ទះរាប់ពិន្ទុពីសូន្យឡើងវិញ តេជោលីគ ជុំទី២ appeared first on Kampuchea Thmey Daily.

ក្រុមបញ្ជាការដ្ឋានអង្គរក្ស គិតមកដល់ពេលនេះមានប្រាក់រង្វាន់ ៧លានរៀលក្នុងដៃហើយនៅតេជោលីគ

Sina Noun — Thu, 04 Jun 2026 07:45:18 +0000

ក្រុមខ្លាំងបញ្ជាការដ្ឋានអង្គរក្សជាប់ចំណាត់ថ្នាក់លេខ១ ប្រចាំជុំទី១ ដែលទើបបញ្ចប់កាលពីថ្ងៃទី២ ខែមិថុនា ឆ្នាំ២០២៦ នេះដោយឆ្លងកាត់ ៧ប្រកួតឈ្នះទាំង៧ ខណៈសរុបថវិកាដែលមានក្នុងដៃគឺឡើងដល់ ៧លានរៀលហើយនៅអំឡុងពេលនេះ។

ក្រុមបញ្ជាការដ្ឋានអង្គរក្ស

សម្រាប់ការប្រកួតនៅរដូវកាលទី៣ នេះគឺពិសេស និងមានទឹកប្រាក់ឡើងជាបន្តបន្ទាប់ផងដែរចំពោះបណ្ដាក្រុមដែលបានជាប់មកចូលរួមតេជោលីគ ២០២៦។ បញ្ជាក់ពីទឹកប្រាក់ដែលក្រុមខ្លាំងបញ្ជាការដ្ឋានអង្គរក្សមានក្នុងដៃនៅពេលនេះគឺ៖

ទឹកប្រាក់ ១លានរៀល៖ បានមកពីការចូលរួមនៅជុំទី១ (ក្រុមទាំង ៨ដែលមានឈ្មោះលេងនេះទទួលបានមួយក្រុម១លានរៀល)។

ទឹកប្រាក់ ៤លានរៀល៖ បានមកពីការជាប់ចំណាត់ថ្នាក់លេខ១ ប្រចាំជុំទី១។ ទឹកប្រាក់នេះលើកទឹកចិត្តចំពោះក្រុមដែលធ្វើបានល្អជាងគេដោយជាប់ចំណាត់ថ្នាក់លេខ១ ប្រចាំជុំនីមួយៗ។

ប្រាក់ ២លានរៀល៖ បានដោយសារតែក្រុមមួយនេះឡើងទៅលេងនៅវគ្គវិលជុំសន្សំពិន្ទុនៅជុំទី២ ដែលមានសរុប ៦ក្រុម។ ក្រុមដែលបានឆ្លងផុតពីមួយជុំទៅមួយជុំប្រាក់តម្លៃក្លឹបចូលរួមគឺគុណទ្វេដង ( x 2 )។ ដូច្នេះហើយក្រុមដែលបានទៅជុំបន្តបន្ទាប់គឺប្រាក់ក្លឹបកើនឡើងរហូតផងដែរ៕

គ្រូបង្វឹកក្រុមបញ្ជាការដ្ឋានអង្គរក្ស

អត្ថបទដោយ៖ នួន ស៊ីណា

The post ក្រុមបញ្ជាការដ្ឋានអង្គរក្ស គិតមកដល់ពេលនេះមានប្រាក់រង្វាន់ ៧លានរៀលក្នុងដៃហើយនៅតេជោលីគ appeared first on Kampuchea Thmey Daily.

មូលហេតុកីឡាករអាមេរិ Penrose ធ្វើមិនបានល្អជាមួយក្រុមស្នងការខេត្តស្វាយរៀង

Sina Noun — Thu, 04 Jun 2026 02:06:43 +0000

កីឡាករជនជាតិអាមេរិក Penrose ដែលក្រុមបាល់ទះស្នងការខេត្តស្វាយរៀងយកមកជួយក្រុមក្នុងតេជោលីគ រដូវកាលទី៣ ហាក់នៅមិនទាន់បានបញ្ចេញសមត្ថភាពឲ្យល្អខ្លាំងនៅឡើយទេប៉ុន្មានប្រកួតជុំទី១ កន្លងទៅនេះ ខណៈអ្នកគាំទ្រហាក់ឆ្ងល់លេងមិនខ្លាំងដូចតាមវីដេអូលើបណ្ដាញសង្គម។

កីឡាករអាមេរិក Penrose

ជុំវិញសមត្ថភាពកីឡាករអាមេរិក Penrose ម្នាក់នេះលោក សូ សែម គ្រូបង្វឹករបស់ស្នងការខេត្តស្វាយរៀង បានឲ្យដឹងថា ដោយសារបញ្ហាផ្លាស់ប្ដូរទីកន្លែងមិនទាន់សម្របបរិយាកាស និងម្ហូបអាហានៅកម្ពុជារហូតដល់រាគប៉ុន្មានថ្ងៃជាប់គ្នាទៀតផង។ ដោយសារបញ្ហាសុខភាពនេះទើបធ្វើឲ្យរូបគេមិនមានកម្លាំងក្នុងការជួយក្រុម ឬលេងឲ្យបានល្អពេញលេញនោះទេ។

គ្រូបង្វឹកខាងលើបន្ថែមទៀតថា មួយវិញទៀតរូបគេជាកីឡាករមកតំបន់ជឿលឿនខ្លាំងខាងបាល់ទះ និងមានទម្រង់លេងខុសពីអាស៊ាននេះ ដូច្នេះទើបធ្វើឲ្យរូបគេមិនទាន់អានលេងឲ្យត្រូវស៊ីសង្វាក់ជាមួយក្រុមភ្លាមៗបានឡើយ។ យ៉ាងណាអំឡុងពេលសម្រាកប្រហែល ២សប្ដាហ៍នេះលោកសង្ឃឹមថា Penrose អាចនឹងសម្របខ្លួនបានប្រសើរឡើងវិញទាំងបរិយាកាសរស់នៅ និងទម្រង់លេងជាមួយមិត្តរួមក្រុម។

កីឡាករអាមេរិក Penrose

បញ្ជាក់ដែរថា ក្រុមបាល់ទះស្នងការខេត្តស្វាយរៀង បាននាំយកកីឡាករអាមេរិក Penrose អំឡុងពាក់កណ្ដាលខែឧសភា ឆ្នាំ២០២៦ កន្លងទៅនេះដើម្បីមកជួយក្រុមក្នុងការប្រកួតតេជោលីគ រដូវកាលទី៣។ កីឡាករអាមេរិករូបនេះលេងក្នុងតំណែងស្មាត់ស្លាបឆ្វេង (Opposite Hitter) និងជាកីឡាករមានសេវាធ្ងន់ លឿន តាមរយៈការប្រកួតកន្លងទៅនេះ៕

អត្ថបទដោយ៖ នួន ស៊ីណា

The post មូលហេតុកីឡាករអាមេរិ Penrose ធ្វើមិនបានល្អជាមួយក្រុមស្នងការខេត្តស្វាយរៀង appeared first on Kampuchea Thmey Daily.

គ្រូបង្វឹកស្នងការខេត្តស្វាយរៀង ចាញ់អង្គរក្សម្សិលមិញកូនក្រុមលេងមិនត្រូវគ្នាសោះវាយមិនចេញបាំង

Sina Noun — Wed, 03 Jun 2026 02:24:49 +0000

គ្រូបង្វឹកក្រុមបាល់ទះស្នងការនគរបាលខេត្តស្វាយរៀង ថាជំនួបជាមួយបញ្ជាការដ្ឋានអង្គរក្សម្សិលមិញនេះកូនក្រុមលេងមិនត្រូវគ្នាសោះមិនដឹងមកពីហេតុអ្វី ស្របពេលកីឡាករវាយសេវាក៏ខូចច្រើនទៀតផងរហូតរងបរាជ័យនៅប្រកួតចុងក្រោយនេះ។

លោក សូ សែម

លោក សូ សែម គ្រូបង្វឹកក្រុមបាល់ទះស្នងការខេត្តស្វាយរៀង បានឲ្យដឹងថា ម្សិលមិញនេះកូនក្រុមរបស់លោកលេងមិនសូវល្អ និងលេងមិនស៊ីសង្វាក់គ្នាសោះទើបមិនឈ្នះការប្រកួតជាមួយបញ្ជាការដ្ឋានអង្គរក្សបាន។ មួយវិញទៀតកីឡាករក្នុងក្រុមរបស់លោកសុទ្ធតែវ័យច្រើនទៅហើយ និងទើបចាប់ឲ្យលេងជាមួយគ្នា ស្របពេលកម្លាំងថ្មីមកពីបរទេសមានបញ្ហាសុខភាពទៅទៀត។

គ្រូបង្វឹករូបនេះបន្ថែមទៀតថា ខាងក្រុមបញ្ជាការដ្ឋានអង្គរក្សគឺលេងបានស៊ីសង្វាក់គ្នាល្អណាស់ម្សិលមិញនេះ។ លេងត្រូវហើយមិនសូវខូចសេវាទៀត។ ចំណែកកីឡាករបរទេសដែលនាំយកមកជួយក្រុមគឺឆាប់សម្របខ្លួនបានលឿនល្អណាស់ ស្របពេលជាកីឡាករក្នុងតំបន់អាស៊ានដែលមានបរិយាកាសប្រហាក់ហែលគ្នាគឺរឹតតែអំណោយផល។

បញ្ជាការដ្ឋានអង្គរក្ស

ចំណុចដែលពិបាកលេងតទល់ជាមួយអង្គរក្សម្សិលមិញនេះគឺការធ្វើរនាំងមិនសូវបានល្អនោះឡើយ។ កូនក្រុមរបស់លោកធ្វើរនាំងមិនសូវជិតល្អហើយនៅយឺតទៀត។ ចំណែកដៃគូវិញលេងស៊ីសង្វាក់គ្នាហើយការលោតធ្វើរនាំងបានជិតល្អណាស់ដែលនាំឲ្យក្រុមរបស់លោកពិបាកនិងម៉ាត់ផ្ដាច់។

ស្នងការខេត្តស្វាយរៀង

បញ្ជាក់ដែរថា ការប្រកួតលើកទី៧ និងជាជំនួបចុងបញ្ចប់ជុំទី១ របស់ក្រុមបាល់ទះស្នងការខេត្តស្វាយរៀងម្សិលមិញនេះបានចាញ់លើក្រុមខ្លាំងបញ្ជាការដ្ឋានអង្គរក្ស ដោយលទ្ធផល ៣-១ សិត។ ការប្រកួតតេជោលីគនៅជុំទី១ នេះបានបិទបញ្ចប់ហើយកាលពីម្សិលមិញនេះ ខណៈក្រុមលេខ១ បានលើបញ្ជាការដ្ឋានអង្គរក្ស ៧ប្រកួតឈ្នះទាំង៧ មាន២០ពិន្ទុ។ ក្រុមដែលត្រូវធ្លាក់ចេញមានចំនួន ២ក្រុមគឺស្នងការខេត្តព្រះសីហនុ និងក្រុមកងពលធំអន្តរាគមន៍លេខ៣៕

ស្នងការខេត្តស្វាយរៀង

អត្ថបទដោយ៖ នួន ស៊ីណា

The post គ្រូបង្វឹកស្នងការខេត្តស្វាយរៀង ចាញ់អង្គរក្សម្សិលមិញកូនក្រុមលេងមិនត្រូវគ្នាសោះវាយមិនចេញបាំង appeared first on Kampuchea Thmey Daily.

តេជោលីគ រកឃើញ ៦ ក្រុមចុងក្រោយ ខណៈ បញ្ជាការដ្ឋានអង្គរក្ស ប៉ះ ស្វាយរៀង កក្រើកថ្ងៃនេះ

chean virakbot — Tue, 02 Jun 2026 01:33:26 +0000

ការប្រកួតលីគបាល់ទះកំពូលកម្ពុជា «តេជោលីគ) រដូវកាលទី៣ នឹងបញ្ចប់ការប្រកួតជុំទី១ នៅថ្ងៃទី២ ខែមិថុនា ឆ្នាំ ២០២៦ នេះហើយ ប៉ុន្តែក៏រកឃើញក្រុមឡើងវគ្គ ៦ ក្រុមចុងក្រោយសម្រាប់ជុំទី២ និងក្រុមដែលត្រូវកាត់ចេញហើយដែរ។

ក្រុមបញ្ជាការដ្ឋានអង្គរក្ស កំពុងកាន់កំណត់ត្រាមិនទាន់ចាញ់ ដែលឈរនៅលើកំពូលតារាងជាមួយ ក្រុមលេខ ២ វិសាខា ក្រុមលេខ៣ ក្រសួងមហាផ្ទៃ ក្រុមលេខ៤ ស្នងការខេត្តស្វាយរៀង ក្រុមលេខ៥ ស្នងការរាជធានីភ្នំពេញ និងក្រុមលេខ៦ ស្នងការខេត្តកោះកុង បានជាប់ឡើងទៅជុំទី២ហើយ។

ចំណែកក្រុម កងពលអន្តរាគមន៍លេខ៣ និងក្រុមស្នងការខេត្តព្រះសីហនុ បានធ្លាក់ហើយ បន្ទាប់ពីចាញ់ ៦ ប្រកួត បើទោះបីជានៅសល់ ១ ប្រកួតទៀតក៏ដោយ។

សម្រាប់ការប្រកួតចុងក្រោយនៅជុំទី១នេះ គូគួរឲ្យចាប់អារម្មណ៍ គឺ ការប៉ះគ្នារវាង ក្រុមបញ្ជាការដ្ឋានអង្គរក្ស និងស្នងការខេត្តស្វាយរៀង។ បញ្ជាការដ្ឋានអង្គរក្ស មិនទាន់មានក្រុមណាអាចបញ្ឈប់ដំណើរពួកគេឡើយ ពីការប្រកួត ៦ លើកកន្លងមកគឺឈ្នះទាំងអស់។

ជាមួយគ្នានេះ ក្រុមស្នងការខេត្តស្វាយរៀង បានឈ្នះ ៤ និងចាញ់ ២ ប៉ុន្តែពីរប្រកួតចុងក្រោយពួកគេមានកីឡាករផ្តាច់ពេញដៃល្អ ដែលធ្វើឲ្យពួកគេឈ្នះ២ប្រកួតចុងក្រោយ ដូច្នេះពួកគេកំពុងឡើងដៃល្អ ហើយអាចនឹងបង្កការលំបាកច្រើនដល់បញ្ជាការដ្ឋានអង្គរក្ស។

គូប្រកួតថ្ងៃទី២ ខែមិថុនា

ស្នងការខេត្តព្រះសីហនុ vs កងពលធំលេខ៣ (ម៉ោង ១២ ថ្ងៃត្រង់)
ស្នងការរាជធានីភ្នំពេញ vs ស្នងការខេត្តកោះកុង (ម៉ោង ២ រសៀល)
បញ្ជាការដ្ឋានអង្គរក្ស vs ស្នងការខេត្តស្វាយរៀង (ម៉ោង ៤ រសៀល)
វិសាខា vs ក្រសួងមហាផ្ទៃ (ម៉ោង ៦ ល្ងាច)

តារាងចំណាត់ថ្នាក់

បញ្ជាការដ្ឋានអង្គរក្ស មាន ១៧ ពិន្ទុ ពីឈ្ការនះ ៦ ប្រកួត
វិសាខា មាន ១៦ ពិន្ទុ ពីការឈ្នះ ៥ និងចាញ់១
ក្រសួងមហាផ្ទៃ មាន ១២ ពិន្ទុ ពីការឈ្នះ ៤ និងចាញ់ ២
ស្នងការខេត្តស្វាយរៀង មាន ១១ ពិន្ទុ ពីការឈ្នះ ៤ និងចាញ់ ២
ស្នងការរាជធានីភ្នំពេញ មាន ៩ ពិន្ទុ ពីការឈ្នះ ៣ និងចាញ់ ៣
ស្នងការខេត្តកោះកុង មាន ៦ ពិន្ទុ ពីការឈ្នះ ២ និងចាញ់ ៤
កងពលធំលេខ៣ មាន ១ ពិន្ទុ ពីការចាញ់ ៦
ស្នងការខេត្តព្រះសីហនុ មាន ០ពិន្ទុ ពីការចាញ់ ៦

សូមបញ្ជាក់ថា ការប្រកួតជុំទី២ ដែលជាវគ្គ ៦ ក្រុមចុងក្រោយ គឺជាការប្រកួតវិលជុំសន្សំពិន្ទុសាជាថ្មី ដោយក្រុមទាំង ៦ ត្រូវប៉ះគ្នាទាំងអស់ ហើយពិន្ទុកាលពីជុំទី១គឺមិនរាប់ចូលទេដោយចោលទាំងអស់៕

អត្ថបទ៖ វិរបុត្រ

The post តេជោលីគ រកឃើញ ៦ ក្រុមចុងក្រោយ ខណៈ បញ្ជាការដ្ឋានអង្គរក្ស ប៉ះ ស្វាយរៀង កក្រើកថ្ងៃនេះ appeared first on Kampuchea Thmey Daily.

អ្នកប៉ះសេ ៥ នាក់គួរឲ្យចាប់អារម្មណ៍ក្នុងពានតេជោលីគ លើកទី៣

chean virakbot — Wed, 27 May 2026 08:19:28 +0000

ការប្រកួតតេជោលីគ រដូវកាលទី៣ ដែលមានក្រុមចំនួន ៨ ចូលរួមប្រកួត ដំណើរការបាន ៤ ប្រកួតហើយ ក្នុងនោះ ក្រុមបញ្ជាការដ្ឋានអង្គរក្ស ធ្វើបានល្អជាងគេពោលគឺឈ្នះទាំង ៤ ប្រកួត។ អ្នកប៉ះសេដែលជាអ្នកលើកបាល់ជាតួដ៏សំខាន់ក្នុងការជួយឲ្យកីឡាករប្រយុទ្ធផ្តាច់យកពិន្ទុ។ ក្នុងចំណោមក្រុមទាំង ៨ សូមលើកយកអ្នកប៉ះសេចំនួន ៥ នាក់មកពីក្រុម ៥ ផ្សេងគ្នាដែលអាចនឹងជួយក្រុមរបស់ពួកគេឈានដល់វគ្គពាក់កណ្តាលផ្តាច់ព្រ័ត្រ ឬវគ្គផ្តាច់ព្រ័ត្រ។

អ្នកប៉ះសេ Fahril Setawan របស់ បញ្ជាការដ្ឋានអង្គរក្ស

អ្នកប៉ះសេឥណ្ឌូណេស៊ី កម្ពស់ ១.៨៤ ម៉ែត្រ បានដើរតួនាទីយ៉ាងសំខាន់ឲ្យខ្សែប្រយុទ្ធស្លាប់ឆ្វេង និងអ្នកវាយកណ្តាល ៣ ម៉ែត្រ Luvi និងស្លាប់ស្តាំ ស៊ុយ ខន ដែលបានជួយឲ្យ បញ្ជាការដ្ឋានអង្គរក្ស ឈ្នះ ៤ ប្រកួតជាប់គ្នានៅក្នុងពានរង្វាន់តេជោលីគ។

កីឡាករ Fahril អាយុទើប ១៩ ឆ្នាំ បានលេងឲ្យក្រុមជាច្រើននៅប្រទេសឥណ្ឌូណេស៊ី ដូចជាក្រុមយុវជនអាយុ១៥ ឆ្នាំ PPLOP Voli Jaateng Academy ក្រុម DPPR Rafabinar ក្រុម Jakarta Garuda Jaya, ក្រុម Kalsel និងក្រុម Jakarta Bhayangkara មុនពេលចូលរួមជាមួយ បញ្ជាការដ្ឋានអង្គរក្ស។

អ្នកប៉ះសេ Retamar របស់ វិសាខា

កីឡាករ Joshua Retamar បានចូលរួមជាមួយ វិសាខា ជាលើកទី២ បន្ទាប់ពីបានចូលរួមលើកទី១ក្នុងពានរង្វាន់សម្តេចក្រឡាហោម ស ខេង។ រូបគេបំពេញការងារយ៉ាងល្អក្នុងការលើកបាល់ឲ្យមិត្តរួមក្រុមផ្តាច់រកពិន្ទុគឺ ពិន សារ៉ុន, គួន ម៉ុម និងកីឡាករអ៉ីរ៉ង់ Salamani Bohlouli សម្រាប់ជ័យជម្នះ ៣ លើក និង ចាញ់ ១ លើកក្នុងតេជោលីគ។

អ្នកប៉ះសេសញ្ជាតិហ្វីលីពីន អាយុ ២៦ឆ្នាំ កម្ពស់ ១.៨២ ម៉ែត្រ រូបនេះមានបទពិសោធច្រើនទាំងជម្រើសជាតិ និងក្លិប។ រូបគេធ្លាប់លេងឲ្យក្រុមមួយចំនួននៅប្រទេសហ្វីលីពីនដូចជា ក្រុម Cignal HD Spikers, NU Bulldogs, Sta Eleng Ball Hammers, និង Rebisco RP។

អ្នកប៉ះ សួន ចាន់ណារ៉ូ របស់ ស្នងការខេត្តស្វាយរៀង

សួន ចាន់ណារ៉ូ នៅតែអាចចាត់ទុកជាអ្នកប៉ះសេដ៏ល្អនៅក្នុងប្រទេសកម្ពុជានាពេលបច្ចុប្បន្ន បើទោះជារូបគេមានវ័យកាន់តែច្រើន។ ឆ្លងកាត់ ៤ ប្រកួតកន្លងទៅនៅក្នុងតេជោលីគ កីឡាករអាយុជាង ៣០ឆ្នាំ កម្ពស់ ១.៩០ ម៉ែត្រ នៅតែបង្ហាញសមត្ថភាពយ៉ាងល្អ ដែលបានជួយក្រុមស្នងការខេត្តស្វាយរៀង ទទួលបានជ័យជម្នះ ២ លើក និងចាញ់ ២ លើក។

ទោះបីជាយ៉ាងណា រូបគេមិនសូវបានលេចពេញម៉ោងទេ ដោយត្រូវផ្លាស់ប្តូរគ្នាលេងជាមួយអ្នកប៉ះសេ ប៊ន ណារិទ្ធ។ ការប្រកួតសប្តាហ៍បន្ទាប់ ក្រុមស្នងការខេត្តស្វាយរៀង ត្រូវបានគេរំពឹងគិតថា នឹងធ្វើបានកាន់តែល្អ បន្ទាប់ពីបានហ្វឹកហាត់ច្រើនថ្ងៃជាមួយស្មាត់អាមេរិក Jalen Penrose និងកីឡាករឥណ្ឌា Praful។

អ្នកប៉ះ យ៉ុន ខេមរៈ របស់ ស្នងការរាជធានីភ្នំពេញ

កីឡាករ យ៉ុន ខេមរៈ ជាអ្នកប៉ះសេម្នាក់ដែលមិនសូវមានកេរ្តិ៍ឈ្មោះបោះសំឡេងខ្លាំងទេ ប៉ុន្តែត្រូវបានកីឡាកររួមអាជីពចាត់ទុកជាតួសំខាន់ដែលអាចបន្តវេនពី សួន ចាន់ណារ៉ូ។ រូបគេបានរួមចំណែកយ៉ាងធំធេងជួយឲ្យ ក្រុមស្នងការរាជធានីភ្នំពេញ ឈ្នះជើងឯកពានរង្វាន់សម្តេចក្រឡាហោម ស ខេង ឆ្នាំ ២០២៦។

ចូលដល់តេជោលីគ ក៏ យ៉ុន ខេមរៈ នៅតែរួមចំណែកដ៏សំខាន់ជួយដល់ស្មាត់ ចាន់ វាសនា និង វ៉ន ម៉នណូ ដែលជាអ្នកផ្តាច់រកពិន្ទុនៅស្លាបឆ្វេងស្តាំ។ នៅរដូវកាលនេះ ក្រុមស្នងការរាជធានីភ្នំពេញ អាចនឹងពិបាកក្នុងការប្រជែងជើងឯកតេជោលីគ បន្ទាប់ពីស្មាត់គុយបា Herrera បានចាកចេញទៅប្រទេសរុស្ស៊ី។

អ្នកប៉ះ កែវ ស្រេងលីហ៊ួរ របស់ ក្រសួងមហាផ្ទៃ

អ្នកប៉ះសេកម្ពុជាក្រៅពី យ៉ុន ខេមរៈ គឺមាន កែវ ស្រេងលីហ៊ួរ ដែលត្រូវបានមិត្តរួមអាជីពមើលឃើញពីសមត្ថភាពអាចជំនួស សួន ចាន់ណារ៉ូ ក្នុងក្រុមជម្រើសជាតិកម្ពុជា។ កែវ ស្រេងលីហ៊ួរ អាយុ ២១ ឆ្នាំ កម្ពស់ ១.៩២ ម៉ែត្រ ពេញកំពុងមានសមត្ថភាពល្អ និងជាចំណែកដ៏សំខាន់ជួយដល់ស្មាត់ ធី ម៉េងហួង និង មឿន ម៉េងឡាយ សម្រាប់ក្រុមបាល់ទះក្រសួងមហាផ្ទៃ។ រូបគេនឹងកាន់តែទទួលបានការចាប់អារម្មណ៍ខ្លាំង ប្រសិនបើមានស្មាត់ឆ្នើមៗបន្ថែមទៀត ជាពិសេសកីឡាករបរទេសដើម្បីជួយដល់ ម៉េងហួង និង ម៉េងឡាយ៕

អត្ថបទ៖ វិរបុត្រ

The post អ្នកប៉ះសេ ៥ នាក់គួរឲ្យចាប់អារម្មណ៍ក្នុងពានតេជោលីគ លើកទី៣ appeared first on Kampuchea Thmey Daily.

តេជោលីគ Archives - Kampuchea Thmey Daily

លោក​ សាន​ សុក្រិត​ គិត​ថា ​តេជោលីគជុំ​ទី២​ ស្នងការភ្នំពេញ ​ស្នងការ​កោះកុង​ អាច​នឹង​ធ្លាក់​

​ហេតុ​ផល​សហព័ន្ធ​បាល់​ទះ​រាប់​ពិន្ទុ​ពី​សូន្យ​ឡើង​វិញ​ តេជោលីគ ជុំ​ទី២​​

មូលហេតុកីឡាករអាមេរិ Penrose ធ្វើមិនបានល្អជាមួយក្រុមស្នងការខេត្តស្វាយរៀង​

តេជោលីគ រកឃើញ​ ៦ ក្រុម​ចុង​ក្រោយ ខណៈ បញ្ជាការដ្ឋាន​អង្គរក្ស ប៉ះ ស្វាយរៀង កក្រើក​ថ្ងៃ​នេះ

អ្នក​ប៉ះ​សេ​ ៥ នាក់​គួរ​ឲ្យ​ចាប់​អារម្មណ៍​ក្នុង​ពាន​តេជោលីគ លើក​ទី​៣

លោក សាន សុក្រិត គិតថា តេជោលីគជុំទី២ ស្នងការភ្នំពេញ ស្នងការកោះកុង អាចនឹងធ្លាក់

ហេតុផលសហព័ន្ធបាល់ទះរាប់ពិន្ទុពីសូន្យឡើងវិញ តេជោលីគ ជុំទី២

មូលហេតុកីឡាករអាមេរិ Penrose ធ្វើមិនបានល្អជាមួយក្រុមស្នងការខេត្តស្វាយរៀង

តេជោលីគ រកឃើញ ៦ ក្រុមចុងក្រោយ ខណៈ បញ្ជាការដ្ឋានអង្គរក្ស ប៉ះ ស្វាយរៀង កក្រើកថ្ងៃនេះ

អ្នកប៉ះសេ ៥ នាក់គួរឲ្យចាប់អារម្មណ៍ក្នុងពានតេជោលីគ លើកទី៣