ថៃ់ Archives - Kampuchea Thmey Daily

អាណោចអាធ័មណាស់! មនុស្ស៩នាក់ស្លាប់ក្នុងរថយន្តធ្លាក់ចូលប្រឡាយទឹកនៅថៃ

Rann Reuy — Wed, 03 Dec 2025 05:11:49 +0000

អនោចអធមខ្លាំងណាស់ មនុស្ស៩នាក់ត្រូវបានប្រទេសឃើញស្លាប់ក្នុងរថយន្តម៉ាក Toyota Fortuner បន្ទាប់ពីលិចចូលទៅក្នុងប្រឡាយក្នុងស្រុក Pak Tho ខេត្ត Ratchaburi ដែលស្ថិតនៅភាគខាងលិចរដ្ឋធានីបាងកក។

យោងសារព័ត៌មាន Thai Enquirer ប៉ូលិសនិងក្រុមសង្គ្រោះ កំពុងតែស៊ើបអង្កេតពេញលេញ ប្រមូលភស្តុតាងនៅកន្លែងកើតហេតុ និងសម្ពាសន៍ប្រជាពលរដ្ឋនៅជិតខាងនោះដើម្បីរកមូលហេតុដែលបានបណ្តាលឲ្យស្លាប់ទាំងក្រុមនោះ។

ខេត្ត Ratchaburi មិនស្ថិតនៅក្នុងចំណោមខេត្តដែលរងគ្រោះដោយសារទឹកជំនន់ធ្ងន់ធ្ងរនៅភាគខាងត្បូង មានទីក្រុងហាតយ៉ៃនោះទេ។

យោងតាមការចេញផ្សាយនោះ ប៉ូលិសនៅមិនទាន់សន្និដ្ឋានពីមូលហេតុដែលបានបណ្តាលឲ្យស្លាប់នោះទេ៕

The post អាណោចអាធ័មណាស់! មនុស្ស៩នាក់ស្លាប់ក្នុងរថយន្តធ្លាក់ចូលប្រឡាយទឹកនៅថៃ appeared first on Kampuchea Thmey Daily.

វៀតណាម ផ្ទុះការតវ៉ា រឿង ថៃ ប្រើទង់ជាតិខុស ខណៈថៃចេញលិខិតសុំទោស

chean virakbot — Wed, 29 Oct 2025 02:25:27 +0000

ម្ចាស់ផ្ទះថៃដែលរៀបចំពិធីចាប់ឆ្នោតជ្រើសរើសពូលពានរង្វាន់ហ្វូតសាលអាស៊ាន ASEAN U19 Boys’ Futsal Championship 2025 បានប្រើទង់ជាតិរបស់ប្រទេស វៀតណាម ខុសដោយប្រើទង់ជាតិរបស់ចិនទៅវិញ។

ការប្រើទង់ជាតិខុសរបស់ម្ចាស់ផ្ទះថៃបានធ្វើឲ្យមានការចាប់អារម្មណ៍យ៉ាងខ្លាំង។ ជាពិសេស ប្រទេសវៀតណាម បានផ្ទុះការតវ៉ា រហូតដល់ដាក់លិខិតតវ៉ាទៅសមាគមកីឡាបាល់ទាត់ថៃ និងសហព័ន្ធកីឡាបាល់ទាត់អាស៊ាន (AFF)។

កំហុសឆ្គងរបស់ប្រទេសថៃ ត្រូវបានវៀតណាមចាត់ទុកជា«បញ្ហាធ្ងន់ធ្ងរ និងមិនអាចទទួលយកបាន»។ នៅថ្ងៃទី២៨ ខែតុលា ឆ្នាំ ២០២៥ សហព័ន្ធកីឡាបាល់ទាត់វៀតណាម (VFF) បានសង្កត់ធ្ងន់ថា កំហុសនេះធ្វើឲ្យប៉ះពាល់មុខមាត់របស់វៀតណាម និងជះផលអវិជ្ជមានលើសហគមន៍អាស៊ាន។ វៀតណាមជំរុញឲ្យសហព័ន្ធកីឡាបាល់ទាត់អាស៊ានដោះស្រាយជុំវិញ ករណីនេះ និងឲ្យមានការប្រយ័ត្នខ្ពស់ទៅថ្ងៃអនាគត។

បន្ទាប់មក សមាគមកីឡាបាល់ទាត់ថៃបានចេញសេចក្តីថ្លែងជុំវិញកំហុសឆ្គងរបស់ខ្លួននៅលើផេកផ្លូវការ FA Thailand និងរៀបចំលិខិតសុំទោសជាផ្លូវការ។ លោកស្រី Nualphan Lamsam ប្រធានសមាគមកីឡាបាល់ទាត់ថៃ បានរៀបចំលិខិតសុំទោសពីរគឺ ទៅប្រទេសវៀតណាម និងសហព័ន្ធកីឡាបាល់ទាត់អាស៊ាន។ លោក Adisak Benjasiriwan អនុប្រធានកីឡាបាល់ទាត់ហ្វូតសាល និងបាល់ទាត់លើឆ្នេរខ្សាច់ នឹងធ្វើដំណើរទៅប្រទេសវៀតណាម នៅថ្ងៃទី២៩ ខែតុលានេះ ដើម្បីប្រគល់លិខិតសុំទោសជាផ្លូវការ៕

ប្រែសម្រួល៖ វីរបុត្រ

The post វៀតណាម ផ្ទុះការតវ៉ា រឿង ថៃ ប្រើទង់ជាតិខុស ខណៈថៃចេញលិខិតសុំទោស appeared first on Kampuchea Thmey Daily.

តាមរយៈកិច្ចព្រមព្រៀងសន្តិភាព កម្ពុជានិងថៃយល់ព្រមបង្កើតក្រុមអង្កេតការណ៍អាស៊ានផ្លូវការ

Rann Reuy — Sun, 26 Oct 2025 07:24:31 +0000

តាមរយៈកិច្ចព្រមព្រៀងសន្តិភាពដែលបានចុះហត្ថលេខារវាង នាយករដ្ឋមន្ត្រីនៃព្រះរាជាណាចក្រកម្ពុជា និងនាយករដ្ឋមន្ត្រីនៃព្រះរាជាណាចក្រថៃ ភាគីទាំងពីរយល់ព្រមឲ្យបង្កើតក្រុមអ្នកអង្កេតការណ៍អាស៊ាន (AOT) ដែលភាគីថៃតែងតែជំទាស់ក្នុងពេលអនុវត្តបទឈប់បាញ់។

កិច្ចព្រមព្រៀងដែលធ្វើជាសាក្សីរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ និងនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ត្រូវបានចុះហត្ថលេខានៅក្នុងកិច្ចប្រជុំកំពូលអាស៊ានដែលបានជួបប្រជុំគ្នានៅទីក្រុងកូឡាឡាំពួ ប្រទេសម៉ាឡេស៊ី នៅថ្ងៃទី ២៦ ខែតុលា ឆ្នាំ ២០២៥។

យោងសេចក្តីប្រកាសរបស់សេតវិមាន កិច្ចព្រមព្រៀងសន្តិភាពត្រង់ចំណុច៣ក្នុងចំណោម៨ចំណុច បានចែងថា៖«យើងបានចុះហត្ថលេខាលើលក្ខខណ្ឌយោង (TOR) ស្តីពីការបង្កើតក្រុមអ្នកសង្កេតការណ៍អាស៊ាន (AOT) ដែលនឹងរួមបញ្ចូលបុគ្គលិកមកពីរដ្ឋសមាជិកអាស៊ាន ជាមួយនឹងគោលបំណងធានានូវការអនុវត្តពេញលេញ និងមានប្រសិទ្ធភាពនៃបទឈប់បាញ់។ យើងអំពាវនាវឱ្យរដ្ឋសមាជិកអាស៊ានផ្តល់ការគាំទ្រសមស្រប ដើម្បីធានាថា AOT អាចសម្រេចបាននូវគោលបំណងរបស់ខ្លួនដោយជោគជ័យ»។

ក្នុងពេលអនុវត្តត្រួតពិនិត្យបទឈប់បាញ់កន្លងមកនេះ ប្រធានអាសានដឹកនាំដោយប្រទេសម៉ាឡេស៊ី បានបង្កើតក្រុមអង្កេតការណ៍បណ្តោះអាសន្នអាស៊ាន ហៅកាត់ថា IOT ដែលដឹកនាំដោយយោធាម៉ាឡេស៊ី និងមានការចូលរួមពីប្រទេសឥណ្ឌូណេស៊ី ហ្វីលីពីន សិង្ហបុរី និង ប្រទេសប្រ៊ុយណេ ខណៈដែលក្រុមអង្កេតការណ៍បណ្តោះអាសន្ននេះធ្វើកិច្ចការមានកម្រិត ព្រោះតែភាគីថៃមិនចូលរួមអនុវត្តឲ្យបានពេញលេញនោះទេ៕

រ៉ាន់ រើយ

The post តាមរយៈកិច្ចព្រមព្រៀងសន្តិភាព កម្ពុជានិងថៃយល់ព្រមបង្កើតក្រុមអង្កេតការណ៍អាស៊ានផ្លូវការ appeared first on Kampuchea Thmey Daily.

ថៃលោតកញ្ចាញ់ចេក ក្រោយទូតចិនបង្ហាញជំហរគាំទ្រកម្ពុជាម៉ឺងម៉ាត់រក្សាការពារបូរភាពទឹកដី រីឯអព្យាក្រឹតជាមួយថៃ

Rann Reuy — Thu, 09 Oct 2025 10:10:31 +0000

ប្រជាជនថៃបានបង្ហាញការឈឺចិត្តស្អិតទ្រូង នៅពេលដែលឃើញ ឯកអគ្គរដ្ឋទូតចិនប្រចាំប្រទេសកម្ពុជាបង្ហោះសារគាំទ្រកម្ពុជាយ៉ាងម៉ឺងម៉ាត់ ខណៈទូតចិនប្រចាំទីក្រុងបាងកក បង្ហាញសារអព្យាក្រឹត្យក្នុងជម្លោះកម្ពុជានិងថៃ។ នេះយោងតាមការចេញផ្សាយរបស់សារព័ត៌មានថៃ Khaosod។

ស្របពេលជាមួយគ្នាដែលឯកអគ្គរដ្ឋទូតចិនប្រចាំទីក្រុងបាងកក លោក Zhang Jianwei បានធ្វើជំនួបទល់មុខ រដ្ឋមន្ត្រីការបរទេសថៃ លោក សីហស័ក្តិ ភួងកេតុកែវ (Sihasak Phuangketkeow) នៅទីក្រុងបាងកក ឯកអគ្គរដ្ឋទូតចិនប្រចាំប្រទេសកម្ពុជា លោក Wang Wenbin បានបង្ហោះសារលើបណ្តាញសង្គម ដែលមានខ្លឹមសារថា៖«ចិនគាំទ្រកម្ពុជាយ៉ាងម៉ឺងម៉ាត់ក្នុងការរក្សាការពារបូរណភាពជាតិ សន្តិសុខ និងផលប្រយោជន៍អភិវឌ្ឍន៍ និង នឹងជាដៃគូជាទីទុកចិត្តបានជាដរាបក្នុងការអភិវឌ្ឍរបស់កម្ពុជា»។

តាមរយៈការចេញផ្សាយរបស់សារព័ត៌មានថៃ គ្រាន់តែការបង្ហោះសារនេះ បានបណ្តាលឲ្យមានប្រតិកម្មយ៉ាងទូលំទូលាយពីសំណាក់ប្រជាជនថៃ។

កាលថ្ងៃទី៨ខែតុលានេះ ស្ថានទូតចិនប្រចាំទីក្រុងបាងកក បានបង្ហោះសារថា លោក Zhang Jianwei ឯកអគ្គរដ្ឋទូតសាធារណរដ្ឋប្រជាមានិតចិន ប្រចាំក្រុងបាងកក បានជួបពិភាក្សា ជាមួយ លោក សីហស័ក្តិ ភួងកេតុកែវ រដ្ឋមន្ត្រីក្រសួងការបរទេសថៃ ដោយក្នុងជំនួបនោះ ឯកអគ្គរដ្ឋទូតចិន បានបញ្ជាក់ជាថ្មីអំពីជំហអព្យាក្រឹតរបស់ចិនចំពោះជម្លោះកម្ពុជានិងថៃ និង បានបញ្ជាក់ជាថ្មីថា ចិនមិនបានផ្តល់អាវុធឲ្យកម្ពុជាសម្រាប់ជម្លោះជាមួយថៃនោះទេ។

រ៉ាន់ រើយ

The post ថៃលោតកញ្ចាញ់ចេក ក្រោយទូតចិនបង្ហាញជំហរគាំទ្រកម្ពុជាម៉ឺងម៉ាត់រក្សាការពារបូរភាពទឹកដី រីឯអព្យាក្រឹតជាមួយថៃ appeared first on Kampuchea Thmey Daily.

យោធាថៃបង្ហាញយោធាពលីត្រឹម១៥នាក់ ខណៈអ្នកនាំពាក្យយោធាថៃធ្លាប់ទទួលស្គាល់«វាលពិឃាដ» សម្រាប់យោធាថៃកន្លងមក

Rann Reuy — Fri, 05 Sep 2025 03:48:52 +0000

កងទ័ពជើងគោកថៃនៅថ្ងៃសុក្រទី៥ខែកញ្ញានេះ បានរៀបចំពិធីគោរពវិញ្ញាណក្ខន្ធទាហាន១៥នាក់ និងជនរងស៊ីវិល១៤នាក់ដែលរងគ្រោះក្នុងការប្រយុទ្ធគ្នាជាមួយកងទ័ពកម្ពុជាកាលថ្ងៃទី២៤ដល់ថ្ងៃទី២៨ខែកក្កដាកន្លងទៅ។

យោងសារព័ត៌មានទាន់ហេតុការណ៍របស់ថៃ Khaosod ការប្រារព្វកម្មវិធីគោរពវិញ្ញាណក្ខន្ធរបស់យោធានិងជនស៊ីវិលដែលបានស្លាប់នេះ បានរៀបចំឡើងនៅទីបញ្ជាការកងយោធពលភូមិន្ទថៃ ក្រោមវត្តមានរបស់ នាយឧត្តមសេនីយ៍ Songwit Noonpakdee នាយសេនាធិការការពារជាតិ ដោយមានមន្ត្រីយោធា មន្ត្រីរាជការ និងប្រជាពលរដ្ឋចូលរួមជាង ៤,៤៤០នាក់។

សេចក្តីរាយការណ៍នេះ មិនបានបញ្ជាក់ថាតើ ចំនួនយោធាថៃដែលស្លាប់ទាំងនេះជាចំនួនសរុបរបស់យោធាថៃក្នុងការប្រយុទ្ធគ្នាជាមួយយោធាកម្ពុជា ឬយ៉ាងណានោះទេ ឬក៏ថា មូលហេតុអ្វីបានជាយោធាដែលពលីទាំង១៥នាក់ ត្រូវបា្ររព្ធកម្មវិធីនៅពេលនេះនោះទេ?

កាលពីថ្ងៃទី២ខែសីហា អ្នកនាំពាក្យកងទ័ពថៃលោកឧត្តមសេនីយ៍ទោ Winthai Suraree ប្រកាសទទួលស្គាល់ជាលើកដំបូងថា សមរភូមិនៅភ្នំ៣៥០ និងសមរភូមិ ប្រាសាទតាក្របី ជាវាលពិឃាតសម្រាប់កងទ័ពថៃ ខណៈដែលកងទ័ពថៃប៉ុនប៉ងដណ្តើមកាន់កាប់ជាច្រើនលើកប៉ុន្តែសុទ្ធតែបរាជ័យ។

សារព័ត៌មានដដែល បានផ្សាយនៅពេលនោះទេថា តំបន់ភ្នំ៣៥០ និងប្រាសាទតាក្របី ជាទីតាំងកម្ពុជាដ៏ខ្លាំង។ ការទទួលស្គាល់បែបនេះគឺជារឿងកម្ររបស់យោធាថៃដែលព្យាយាមលាក់ព័ត៌មាន អំពីការបាត់បង់ជីវិតយោធារបស់ខ្លួន។ ប៉ុន្តែនៅក្រោយៗ មកទៀត ពលទាហានខ្លះក្នុងខេត្តសុរិន្ទ ដ៏បានរត់ចោលជូរ យកអាវុធបាញ់រះទៅលើប្រជាជនស្លូតត្រង់ និងធ្វើអត្តឃាតខ្លួនឯង ដែលមេបញ្ជាការភូមិភាគ២ Boonsin Padklang បានទទួលស្គាល់ថា ពលទាហានកើតអារម្មណ៍តប់ប្រមល់ (Stress) ខ្លាំង៕

រ៉ាន់ រើយ

The post យោធាថៃបង្ហាញយោធាពលីត្រឹម១៥នាក់ ខណៈអ្នកនាំពាក្យយោធាថៃធ្លាប់ទទួលស្គាល់«វាលពិឃាដ» សម្រាប់យោធាថៃកន្លងមក appeared first on Kampuchea Thmey Daily.

ប្រធានអាស៊ានស្នើថៃនិងកម្ពុជាបញ្ឈប់ការបាញ់គ្នាជាបន្ទាន់ បញ្ចៀសអរិភាពបន្ថែមទៀត

Rann Reuy — Thu, 24 Jul 2025 15:07:13 +0000

នាយករដ្ឋមន្រ្តីម៉ាឡេស៊ីក្នុងនាមជាប្រធានប្តូរវេនអាស៊ាន លោក អាន់វ៉ា អ៊ីប្រាហ៊ីម បានជួបចរចាតាមទូរស័ព្ទត្រីភាគីជាមួយនាយករដ្ឋមន្ត្រីកម្ពុជា និង នាយករដ្ឋមន្ត្រីស្តីទីថៃ ដោយអំពាវនាវឱ្យភាគីជម្លោះកម្ពុជា និងថៃ ឈប់បាញ់គ្នាជាបន្ទាន់ បន្ទាប់ពីការប្រយុទ្ធគ្នាទ្រង់ទ្រាយធំមិនធ្លាប់មានរយៈពេល១ថ្ងៃ។

នាយករដ្ឋមន្ត្រីម៉ាឡេស៊ី ក្នុងនាមជាប្រធានអាស៊ាន បានសម្របសម្រួលជម្លោះកម្ពុជានិងថៃ។ Anwar

ក្នុងសារបង្ហោះក្នុងបណ្តាញសង្គមហ្វេសប៊ុកផ្ទាល់ខ្លួន នាយករដ្ឋមន្ត្រី អាន់វ៉ា បានសរសេរថា៖‍«ល្ងាចនេះ ខ្ញុំបានពិភាក្សាជាមួយនាយករដ្ឋមន្ត្រីនៃព្រះរាជាណាចក្រកម្ពុជា លោក ហ៊ុន ម៉ាណែត និងនាយករដ្ឋមន្ត្រីស្តីទីនៃព្រះរាជាណាចក្រថៃ លោក Phumtham Wechayachai ដោយបង្ហាញពីការព្រួយបារម្ភយ៉ាងខ្លាំងរបស់ប្រទេសម៉ាឡេស៊ីចំពោះការកើនឡើងនៃភាពតានតឹងនៅតាមព្រំដែនរបស់ពួកគេ»។

លោក អាន់វ៉ា បានបន្ថែមថា៖«ក្នុងតួនាទីរបស់ម៉ាឡេស៊ីក្នុងឋានៈជាប្រធានអាស៊ានសម្រាប់ឆ្នាំ ២០២៥ ខ្ញុំបានអំពាវនាវដោយផ្ទាល់ទៅកាន់មេដឹកនាំទាំងពីរឱ្យមានបទឈប់បាញ់ជាបន្ទាន់ដើម្បីរារាំងអរិភាពបន្ថែមទៀត និងដើម្បីបង្កើតកន្លែងសម្រាប់ការសន្ទនាដោយសន្តិវិធី និងដំណោះស្រាយការទូត»។

លោក អាន់វ៉ា បានប្រកាសស្វាគមន៍ចំពោះសញ្ញាវិជ្ជមាន និងឆន្ទៈដែលបង្ហាញដោយទីក្រុងបាងកក និងទីក្រុងភ្នំពេញ ដើម្បីពិចារណាលើផ្លូវឆ្ពោះទៅមុខ។ ម៉ាឡេស៊ីត្រៀមខ្លួនជាស្រេចដើម្បីជួយ និងសម្របសម្រួលដំណើរការនេះក្នុងស្មារតីឯកភាពអាស៊ាន និងការទទួលខុសត្រូវរួម។

លោក អាន់វ៉ា បញ្ជាក់ចុងក្រោយថា៖‍«ខ្ញុំជឿជាក់យ៉ាងមុតមាំថា កម្លាំងរបស់អាស៊ានស្ថិតនៅលើសាមគ្គីភាពរបស់ខ្លួន ហើយសន្តិភាពត្រូវតែជាជម្រើសសមូហភាព និងមិនផ្លាស់ប្តូររបស់យើងជានិច្ច»៕

The post ប្រធានអាស៊ានស្នើថៃនិងកម្ពុជាបញ្ឈប់ការបាញ់គ្នាជាបន្ទាន់ បញ្ចៀសអរិភាពបន្ថែមទៀត appeared first on Kampuchea Thmey Daily.

ចិន ចង់ឃើញកម្ពុជា និងថៃ ដោះស្រាយបញ្ហាព្រំដែនដោយសន្តិវិធី និងស្ម័គ្រខ្លួនចង់ជួយសម្របសម្រួលដោយយុត្តិធម៌

vann sokunthea — Fri, 11 Jul 2025 05:43:19 +0000

ប្រទេសចិន បានអំពាវនាវដល់ប្រទេសថៃ និងកម្ពុជា ឱ្យដោះស្រាយបញ្ហាជម្លោះព្រំដែននៃប្រទេសទាំងពីរតាមរយៈការជជែកគ្នាដោយសន្តិវិធី និងបានបង្ហាញពីឆន្ទៈចង់ចូលខ្លួនជួយសម្របសម្រួល ដោយឈរលើការពិតនៃបញ្ហា និងយុត្តិធម៌ មិនលម្អៀងទៅភាគីណាមួយឡើយ។ នេះបើតាមការបញ្ជាក់ឱ្យដឹងរបស់ក្រសួងការបរទេសចិន និងត្រូវបានយកមកចុះផ្សាយបន្តដោយសារព័ត៌មាន Reuters នៅថ្ងៃទី១១ ខែកក្កដា ឆ្នាំ២០២៥នេះ។

រដ្ឋមន្រ្តីការបរទេចិន លោក Wang Yi បានអំពាវនាវឱ្យប្រទេសថៃ និងកម្ពុជាដោះស្រាយគ្នារឿងព្រំដែនដោយសន្តិវិធីនេះ នៅក្នុងជំនួបមួយជាមួយរដ្ឋមន្រ្តីការបរទេសថៃ លោក Maris Sangiampongsa នៅក្រៅកិច្ចប្រជុំរដ្ឋមន្រ្តីការបរទេសអាស៊ាន នៅប្រទេសម៉ាឡេស៊ី កាលពីថ្ងៃទី១០ ខែកក្ដដា ឆ្នាំ២០២៥។ នៅចំពោះមុខរដ្ឋមន្រ្តីការបរទេសថៃ លោក Wang Yi បាននិយាយថា ប្រទេសចិន ប្រកាន់ជំហរឈរលើការពិត និងស្មើភាពចំពោះភាគីទាំងពីរ និងចង់ដើរតួនាទីជាអ្នកសម្របសម្រួលសម្រាប់ការរួមរស់ប្រកបដោយសុខដុមរមនារវាងប្រទសថៃ និងប្រទសកម្ពុជា។ នេះបើតាមការចុះផ្សាយរបស់សារព័ត៌មាន Reuters។

បើតាមសារព័ត៌មាន Reuters ដដែល ជំហររបស់ចិនលើបញ្ហាជម្លោះព្រំដែនថៃ និងកម្ពុជានេះ ក៏ត្រូវបានប្រមុខការទូតចិន លោក Wang Yi លើកមកនិយាយជាមួយលោក ប្រាក់ សុខុន រដ្ឋមន្រ្តីការបរទេសកម្ពុជាផងដែរនៅក្នុងកិច្ចប្រជុំដាច់ដោយឡែក តែធ្វើនៅក្នុងថ្ងៃតែមួយដូចគ្នានៅក្នុងប្រទេសម៉ាឡេស៊ី។

គួរជម្រាបជូនថា ពាក់ព័ន្ធនឹងបញ្ហាព្រំដែនកម្ពុជា-ថៃនេះ កាលពីថ្ងៃទី០៨ ខែកក្កដា កន្លងទៅ នៅក្នុងប្រទេសម៉ាឡេស៊ី រដ្ឋមន្រ្តីការបរទេសវៀតណាម លោក Bui Thanh Son ក៏បានគូសបញ្ជាក់ប្រាប់លោក Maris Sangiampongsa រដ្ឋមន្រ្តីការបរទេសថៃថា រដ្ឋាភិបាលវៀតណាម បាន និងកំពុងឃ្លាំមើលយ៉ាងយកចិត្តទុកដាក់អំពីការវិវត្តថ្មីៗនៃស្ថានភាពព្រំដែនកម្ពុជា-ថៃ។ លោក Bui Thanh Son បានប្រាប់លោក Maris Sangiampongsa ទៀតថា វៀតណាមសង្ឃឹមថា ប្រទេសទាំងពីរថៃ-កម្ពុជា នឹងបញ្ជៀសការបង្កភាពតានតឹង និងឆាប់ដោះស្រាយបញ្ហាតាមរយៈការសន្ទនាដោយសន្តិវិធី និងមិត្តភាព ដែលវាជាការរួមចំណែកក្នុងការកសាងសហគមន៍អាស៊ានដ៏រឹងមាំ ក៏ដូចជា កសាងបាននូវតំបន់សន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍ។

បន្ទាប់ពីជជែកជាមួយរដ្ឋមន្រ្តីការបរទេសថៃ លោក Bui Thanh Son ក៏បានលើកបញ្ហាដូចគ្នានេះជជែកជាមួយរដ្ឋមន្រ្តីការបរទេសកម្ពុជា លោក ប្រាក់ សុខុន ផងដែរ។ នៅចំពោះមុខលោក ប្រាក់ សុខុន លោក Bui Thanh Son បានអះអាងថា វៀតណាម សង្ឃឹមថា ប្រទេសកម្ពុជា និងថៃ នឹងដោះស្រាយបញ្ហាព្រំដែន ដោយសន្តិវិធី ដែលជាការចូលរួមជួយពង្រឹងសាមគ្គីភាពរបស់អាស៊ាន និងកសាងសហគមន៍អាស៊ានដ៏រឹងមាំ ដើម្បីតំបន់សន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍ៕

The post ចិន ចង់ឃើញកម្ពុជា និងថៃ ដោះស្រាយបញ្ហាព្រំដែនដោយសន្តិវិធី និងស្ម័គ្រខ្លួនចង់ជួយសម្របសម្រួលដោយយុត្តិធម៌ appeared first on Kampuchea Thmey Daily.

សមាគមធនាគារ និង មីក្រូហិរញ្ញ៖ រហូតមកទាល់បច្ចុប្បន្នពុំទាន់មានពលករចំណាកស្រុកពីថៃដាក់ពាក្យស្នើសុំរៀបចំឥណទានឡើងវិញនៅឡើយទេ

May Kunmakara — Wed, 02 Jul 2025 01:34:21 +0000

សមាគមធនាគារនៅកម្ពុជា (ABC) និងសមាគមមីក្រូហិរញ្ញវត្ថុកម្ពុជា (CMA) កំពុងបានការតាមដាននូវការការត្រឡប់មកវិញនៃពលករចំណាកស្រុកពីថៃ ខណៈពុំទាន់ទទួលបានរបាយការណ៍នៃការដាក់ពាក្យស្នើសុំរៀបចំឥណទានពីក្រុមគ្រួសារដែលរងផលប៉ះពាល់នៅឡើយទេ។

កាលពីចុងខែឧសភា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអំពានាវដល់សមាគមធនាគារនៅកម្ពុជា (ABC) និងសមាគមមីក្រូហិរញ្ញ វត្ថុកម្ពុជា (CMA) ពិនិត្យលទ្ធភាពក្នុងការ ជួយសម្រាលបន្ទុកហិរញ្ញវត្ថុសម្រាប់បងប្អូនប្រជាពលករដែលត្រលប់មកពីប្រទេសថៃវិញ ចំពោះអ្នក ដែលមានជាប់ជំពាក់កម្ចីជាមួយធនាគារ ឬគ្រឹះស្ថានមីក្រូហិរញ្ញវត្ថុ ទៅតាមលទ្ធភាព ឬ ក្នុងមួយរយៈ ពេលកំណត់ណាមួយដែលអាចធ្វើទៅបាន។

នៅក្នុងបទសម្ភាសជាមួយ«កម្ពុជាថ្មី» លោក តូច ចៅចេក បានមានប្រសាសន៍ថា ពាក់ព័ន្ធទៅនិងការវិលត្រឡប់មកវិញរបស់ពលករចំណាកស្រុកពីថៃ ឃើញថា ក្នុងមួយថ្ងៃអាចមានក្នុងរង្វង់ពី ៨០០-១០០០ នាក់ ក្នុងនោះពលករមួយចំនួនក៏មានសំណាងដែរ ដោយត្រឡប់មកវិញភ្លាម មានការងារធ្វើភ្លាម និងមួយចំនួនទៀត ក៏មិនទាន់អាចជួបការលំបាកអ្វីដែរ ដោយសារពួកគេអាចសល់នូវថវិកាមួយចំនួនដើម្បីផ្គត់ផ្គង់ជីវភាពគ្រួសារ។

លោកបានសង្កត់ធ្ងន់ថា៖«រហូតមកដល់ពេលបច្ចុប្បន្ននេះយើងនៅមិនទាន់មានចំណុចណាដែលគួរឱ្យចាប់អារម្មណ៍ថា ពលករដែលត្រឡប់មកពីថៃវិញពិបាកសង ឬក៏មកសុំកម្មវិធីជំនួយពីធនាគារ គឺនៅមិនទាន់មាននៅឡើយទេ។ ប៉ុន្តែធនាគារក៏មានយន្តការរួចជាស្រេច ដូច្នេះប្រសិនបើមានពលរដ្ឋស្នើសុំយន្តការណាមួយពីធនាគារ នោះយើងនឹងចុះទៅវិភាគ និងពិនិត្យជាក់ស្តែង ប្រសិនបើពួកគេពិតជាពលករដែលទើបត្រឡប់មកពីថៃវិញមែន និងជួបការលំបាកពិតមែន នោះធនាគារនឹងមានយន្តការនៅការបន្ធូរបន្ថយណាមួយ»។

លោកថា «ជារួមកម្មករដែលទៅធ្វើការចំណាកស្រុកនៅប្រទេសថៃនោះ ភាគច្រើនជាកម្មករពេញកម្លាំង ដូច្នេះអ្នកដែលខ្ចីឥណទានភាគច្រើនគឺជាសាច់ញាតិរបស់គាត់នៅស្រុកខ្មែរ ចឹងគាត់ក៏មិនមែនមានចំណូលតែពីក្រៅស្រុកមួយដែរ គាត់ក៏មានចំណូលក្នុងស្រុកដែរ គិតមកដល់ពេលនេះ រយៈពេល ១ ខែ នេះ យើងគិតថា ឱ្យមានផលវិបាកណាស់ណានៅមិនទាន់មានគួរឱ្យកត់សម្គាល់នោះទេ»។

ទន្ទឹមនេះ លោក តូច ចៅចេក ក៏បានបន្ថែមដែរ ឆ្លើយតបទៅនិងសំណើរបស់រាជរដ្ឋាភិបាលកម្ពុជា ក្នុងការជួយសម្រួលដល់ពលករចំណាកស្រុកពីថៃ នេះដែរ សមាគមធនាគារនៅកម្ពុជា ក៏ដូចជាសមាគមមីក្រូហិរញ្ញវត្ថុក៏បានគាំទ្រដល់សំណើនេះ ហើយក៏មានយន្តការមួយចំនួនដើម្បីជួយសម្រួលដល់ពលករចំណាកស្រុកចូលមកកម្ពុជាវិញ។

យោងតាមលោក កាំង តុងងី អ្នកនាំពាក្យសមាគមគ្រឹះស្ថានមីក្រូហិរញ្ញវត្ថុកម្ពុជាថ្លែងមកកាន់កម្ពុជាថ្មីនៅថ្ងៃទី១ ខែកក្កដាមកថា រហូតមកទាល់ពេលនេះពុំទាន់មានរបាយការណ៍ជាក់ស្តែងនៃពលករដែលបានដាក់ពាក្យសុំការជួយសម្រួលបន្ទុកនៃការបង់ប្រាក់តាមរយៈយន្តការរៀបចំឥណទានឡើងវិញឡើយ។ លោកថា រាល់សមាជិកសមាគមស្វាគមន៍ចំពោះពលករដែលបានដាក់ពាក្យស្នើសុំ។

លោកបានថ្លែងបញ្ចាក់ថា៖«គិតត្រឹមខែឧសភាឆ្នាំ២០២៥ វិស័យមីក្រូហិរញ្ញវត្ថុបានរៀបចំឥណទានឡើងវិញជូនអតិថិជនរហូតដល់១៦ម៉ឺននាក់ឬ១០ ភាគរយនៃអតិថិជនសរុបក្នុងវិស័យ ដែលគិតជាទំហំឥណទានសរុបចំនួនជាង៦៣០លានដុល្លារ ឬ ជាង១០ភាគរយនៃទំហំឥណទានសរុបជាង៥ពាន់លានដុល្លារ»។

សមាគមទាំងពីរ នឹងបន្តសហការជាមួយធនាគារជាតិនៃកម្ពុជា និងភាគីពាក់ព័ន្ធ ដើម្បីធានាថា គ្រឹះស្ថានហិរញ្ញវត្ថុនៅតែចូលរួមយ៉ាងពេញលេញនិងទូលំទូលាយក្នុងការគាំទ្រដល់ការអភិវឌ្ឍសង្គម-សេដ្ឋកិច្ចជាតិ និងលើកស្ទួយជីវភាពរបស់ប្រជាជន ទៅតាមលទ្ធភាពជាក់ស្តែង និងការដឹកនាំចង្អុល បង្ហាញរបស់ធនាគារជាតិ នៃកម្ពុជា និងរាជរដ្ឋាភិបាល»។ នេះបើយោងតាមសេចក្តីថ្លែងការណ៍នេះ។

យោងតាមរបាយការណ៍របស់ក្រសួងការងារ និងបណ្ដុះបណ្ដាលវិជ្ជាជីវៈ បច្ចុប្បន្នមានពលករកម្ពុជា ប្រមាណ១លាន៣សែន៨ម៉ឺននាក់ កំពុងបម្រើការងារនៅតាមប្រទេសនានា ចំនួន៧ ដោយពួកគេបានផ្ញើថវិកាមកសាច់ញាតិនៅកម្ពុជា ជាមធ្យមប្រមាណជិត៣ពាន់លានដុល្លារក្នុង១ឆ្នាំ។ ក្នុងនោះ ថៃ បានក្លាយជាប្រទេសដែលស្រូបទាញកម្លាំងពលកម្មពីកម្ពុជា ច្រើនជាងគេ ដែលបច្ចុប្បន្នមានរហូតដល់ជាង១លាន២សែននាក់ និងបានផ្ញើថវិកាត្រឡប់មកប្រទេសកម្ពុជាវិញ ជាមធ្យមប្រមាណា២ពាន់១រយលានដុល្លារក្នុង១ឆ្នាំ៕

The post សមាគមធនាគារ និង មីក្រូហិរញ្ញ៖ រហូតមកទាល់បច្ចុប្បន្នពុំទាន់មានពលករចំណាកស្រុកពីថៃដាក់ពាក្យស្នើសុំរៀបចំឥណទានឡើងវិញនៅឡើយទេ appeared first on Kampuchea Thmey Daily.

ថៃ់ Archives - Kampuchea Thmey Daily

​​អាណោចអាធ័ម​​ណាស់! មនុស្ស​៩នាក់​​ស្លាប់​ក្នុងរថយន្ត​​​ធ្លាក់ចូល​ប្រឡាយ​ទឹកនៅថៃ​​

វៀតណាម ផ្ទុះ​ការតវ៉ា រឿង​ ថៃ ប្រើ​​​ទង់​ជាតិ​ខុស ខណៈ​ថៃ​​ចេញលិខិត​សុំ​ទោស

តាមរយៈកិច្ច​ព្រម​ព្រៀងសន្តិភាព​​ កម្ពុជានិង​ថៃ​​យល់​ព្រម​បង្កើតក្រុមអង្កេតការ​ណ៍​អាស៊ាន​​ផ្លូវការ​

​ប្រធានអាស៊ាន​​​ស្នើ​ថៃ​និង​កម្ពុជា​​​បញ្ឈប់ការ​បាញ់​គ្នា​ជាបន្ទាន់​​​ បញ្ចៀស​អរិភាពបន្ថែមទៀត​​

ចិន ចង់ឃើញកម្ពុជា និងថៃ ដោះស្រាយបញ្ហាព្រំដែនដោយសន្តិវិធី និងស្ម័គ្រខ្លួនចង់ជួយសម្របសម្រួលដោយយុត្តិធម៌

អាណោចអាធ័មណាស់! មនុស្ស៩នាក់ស្លាប់ក្នុងរថយន្តធ្លាក់ចូលប្រឡាយទឹកនៅថៃ

វៀតណាម ផ្ទុះការតវ៉ា រឿង ថៃ ប្រើទង់ជាតិខុស ខណៈថៃចេញលិខិតសុំទោស

តាមរយៈកិច្ចព្រមព្រៀងសន្តិភាព កម្ពុជានិងថៃយល់ព្រមបង្កើតក្រុមអង្កេតការណ៍អាស៊ានផ្លូវការ

ប្រធានអាស៊ានស្នើថៃនិងកម្ពុជាបញ្ឈប់ការបាញ់គ្នាជាបន្ទាន់ បញ្ចៀសអរិភាពបន្ថែមទៀត