កីឡា

វៀតណាម ផ្ទុះការតវ៉ា រឿង ថៃ ប្រើទង់ជាតិខុស ខណៈថៃចេញលិខិតសុំទោស

បានផុស

៦ ខែ មុន

នៅ

ថ្ងៃពុធ ២៩ តុលា ២០២៥

ដោយ

ម្ចាស់ផ្ទះថៃដែលរៀបចំពិធីចាប់ឆ្នោតជ្រើសរើសពូលពានរង្វាន់ហ្វូតសាលអាស៊ាន ASEAN U19 Boys’ Futsal Championship 2025 បានប្រើទង់ជាតិរបស់ប្រទេស វៀតណាម ខុសដោយប្រើទង់ជាតិរបស់ចិនទៅវិញ។

ការប្រើទង់ជាតិខុសរបស់ម្ចាស់ផ្ទះថៃបានធ្វើឲ្យមានការចាប់អារម្មណ៍យ៉ាងខ្លាំង។ ជាពិសេស ប្រទេសវៀតណាម បានផ្ទុះការតវ៉ា រហូតដល់ដាក់លិខិតតវ៉ាទៅសមាគមកីឡាបាល់ទាត់ថៃ និងសហព័ន្ធកីឡាបាល់ទាត់អាស៊ាន (AFF)។

កំហុសឆ្គងរបស់ប្រទេសថៃ ត្រូវបានវៀតណាមចាត់ទុកជា«បញ្ហាធ្ងន់ធ្ងរ និងមិនអាចទទួលយកបាន»។ នៅថ្ងៃទី២៨ ខែតុលា ឆ្នាំ ២០២៥ សហព័ន្ធកីឡាបាល់ទាត់វៀតណាម (VFF) បានសង្កត់ធ្ងន់ថា កំហុសនេះធ្វើឲ្យប៉ះពាល់មុខមាត់របស់វៀតណាម និងជះផលអវិជ្ជមានលើសហគមន៍អាស៊ាន។ វៀតណាមជំរុញឲ្យសហព័ន្ធកីឡាបាល់ទាត់អាស៊ានដោះស្រាយជុំវិញ ករណីនេះ និងឲ្យមានការប្រយ័ត្នខ្ពស់ទៅថ្ងៃអនាគត។

បន្ទាប់មក សមាគមកីឡាបាល់ទាត់ថៃបានចេញសេចក្តីថ្លែងជុំវិញកំហុសឆ្គងរបស់ខ្លួននៅលើផេកផ្លូវការ FA Thailand និងរៀបចំលិខិតសុំទោសជាផ្លូវការ។ លោកស្រី Nualphan Lamsam ប្រធានសមាគមកីឡាបាល់ទាត់ថៃ បានរៀបចំលិខិតសុំទោសពីរគឺ ទៅប្រទេសវៀតណាម និងសហព័ន្ធកីឡាបាល់ទាត់អាស៊ាន។ លោក Adisak Benjasiriwan អនុប្រធានកីឡាបាល់ទាត់ហ្វូតសាល និងបាល់ទាត់លើឆ្នេរខ្សាច់ នឹងធ្វើដំណើរទៅប្រទេសវៀតណាម នៅថ្ងៃទី២៩ ខែតុលានេះ ដើម្បីប្រគល់លិខិតសុំទោសជាផ្លូវការ៕