ថៃ Archives - Kampuchea Thmey Daily

លោក អានុទីន ថ្លឹងថ្លែងអំពីលទ្ធភាពរំលាយសភាមុនកំណត់៤ខែ ដោយសម្ពាធកើនឡើង

Rann Reuy — Mon, 03 Nov 2025 03:11:37 +0000

នាយករដ្ឋមន្ត្រីថៃ លោក អានុទីន ឆានវីរៈគុល (Anutin Charnvirakul) ទំនងត្រូវរំលាយសភាមុនកាលកំណត់ ដែលខ្លួនបានចុះកិច្ចព្រមព្រៀងជាមួយគណបក្សប្រជាជន (PP) ដែលគាំទ្រឲ្យធ្វើនាយករដ្ឋមន្ត្រី៤ខែ ដោយសារតែសម្ពាធកើនឡើងនៃការបោះឆ្នោតដកសេចក្តីទុកចិត្តពីសមាជិកសភាគណបក្សភឿថៃ។

នាយករដ្ឋមន្ត្រីថៃ លោក អានុទីន ឆានវីរៈគុល ពេលចូលរួមកិច្ចប្រជុំកំពូលអាស៊ានលើកទី៤៧នៅម៉ាឡេស៊ី។ REUTERS

នាយករដ្ឋមន្ត្រី អានុទីន ដែលទើបវិលត្រឡប់ពីកិច្ចប្រជុំកំពូលនៃវេទិកាកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) ជាទីដែលលោកបានជួបមេដឹកនាំពិភពលោក មាន លោក ដូណាល់ ត្រាំ ប្រធានាធិបតីសហរដ្ឋអាមេរិក លោក ស៊ី ជីនពីង ប្រធានាធិបតីចិន, លោក លី ជេយ៉ុង ប្រធានាធិបតីកូរ៉េខាងត្បូង ក៏ដូចប្រមុខរដ្ឋសំខាន់ៗដទៃទៀត ដែលធ្វើឲ្យលោក កសាងគុណសម្បត្តិក្នុងនាមមេដឹកនាំប្រទេសថៃដ៏កំពុងប្រឈមការផ្លាស់ប្តូរនយោបាយសដែលមិនអាចទាយទុកមុន។

តាមការចេញផ្សាយរបស់សារព័ត៌មានបាងកកប៉ុស្តិ៍ គណបក្សភឿថៃដែលទើបជ្រើសរើសមេដឹកនាំថ្មី ដោយគ្មានវត្តមានក្រុមគ្រួសារត្រកូលស៊ីណាវ៉ាត្រ បន្ទាប់ពីការលាលែងពីប្រធានគណបក្សរបស់ លោក ស្រី ផែថងថាន ស៊ីណាវ៉ាត្រ គ្រោងនឹងដាក់ញត្តិទៅកាន់សភាដើម្បីបោះឆ្នោតដកសេចក្តីទុកចិត្តលើរដ្ឋាភិបាលរបស់លោក អានុទីន។

ក្នុងករណីមានការបោះឆ្នោតដកសេចក្តីទុកចិត្តក្នុងសភាមែននោះ រដ្ឋាភិបាលរបស់លោកនាយករដ្ឋមន្ត្រី អានុទីន មិនអាចការពារខ្លួនបាននោះទេ ព្រោះថា រដ្ឋាភិបាលរបស់លោក អានុទីន បានដំណើរការដោយសំឡេងភាគតិច ហើយ គណបក្សប្រជាជនដែលបោះឆ្នោតគាំទ្របេក្ខភាពរបស់លោកអានុទីន មិនបានចូលរួមកាន់អំណាចក្នុងការដឹកនាំរដ្ឋាភិបាលឡើយ។

តាមសេចក្តីរាយការណ៍របស់សារព័ត៌មានថៃ Thai Examiner ក្រោយវិលត្រឡប់ពីប្រជុំកំពូល APEC កាលពីចុងសប្តាហ៍លោក អានុទីន កំពុងថ្លឹងថ្លែងដើម្បីរំលាយសភាមុនកាលកំណត់ ដែលនឹងបើកផ្លូវឲ្យមានការបោះឆ្នោតមុនកាលកំណត់នៅដើមឆ្នាំ២០២៦។

រដ្ឋាភិបាលរបស់លោក អានុទីន ក៏កំពុងប្រឈមការតវ៉ាពីក្រុមជាតិនិយម ក្រោយការចុះហត្ថលេខាលើកិច្ចព្រមព្រៀងសន្តិភាពជាមួយកម្ពុជានៅទីក្រុងកូឡាឡាំពួកាលថ្ងៃទី២៦ខែតុលា ដើម្បីឈានទៅបញ្ចប់អរិភាពជាមួយកម្ពុជាក្នុងជម្លោះព្រំដែន។ កិច្ចព្រមព្រៀងដែលធ្វើជាសាក្សីដោយប្រធានាធិបតីសហរដ្ឋអាមេរិក លោក ដូណាល់ ត្រាំ និង នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានទាក់ទាញការសាទរពីថ្នាក់ដឹកនាំជុំវិញពិភាពលោក។

លើសពីនោះ រដ្ឋាភិបាលរបស់លោក អានុទីន បានចុះហត្ថលេខាលើកិច្ចសហប្រតិបត្តិការរ៉ែកម្រជាមួយសហរដ្ឋអាមេរិក ក៏កំពុងញុះឲ្យមានការតវ៉ាផ្នែកនយោបាយនៅក្នុងប្រទេសថៃផងដែរ៕

រ៉ាន់ រើយ

The post លោក អានុទីន ថ្លឹងថ្លែងអំពីលទ្ធភាពរំលាយសភាមុនកំណត់៤ខែ ដោយសម្ពាធកើនឡើង appeared first on Kampuchea Thmey Daily.

មេបក្សប្រឆាំងថៃ បង្ហាញក្តីកង្វល់ដែលលោកអានុទីន មិនគ្រប់គ្រងការចាក់សំឡេងរំខានប្រជាជនកម្ពុជា

Rann Reuy — Tue, 14 Oct 2025 04:49:21 +0000

ប្រធានគណបក្សប្រជាជនថៃ (People’s Party) ដែលជាគណបក្សឈ្នះឆ្នោត និងជាប្រឆាំងធំបំផុតនៅក្នុងប្រទេសថៃកំពុងដាក់សម្ពាធលើនយោបាយរដ្ឋមន្ត្រីត្រឹម៤ខែ លោក អានុទីន ចានវីរៈគុល (Anutin Chanvirakul) និងឧបនាយករដ្ឋមន្ត្រី រដ្ឋមន្ត្រីក្រសួងការបរទេសថៃ ដែលបង្ហាញការគាំទ្រ លោក Kun Jom Palang ដែលបង្កហេតុចាក់សំឡេងរំខានដល់ប្រជាជនកម្ពុជា និងនាំទៅដល់បាត់បង់កិត្តិយសក្នុងឆាកអន្តរជាតិ។

លោក Natthapong Ruangpanyawut មេបក្សប្រឆាំងថៃបានបង្ហាញក្តីកង្វល់លើកដំបូង។

តាមការចេញផ្សាយរបស់សារព័ត៌មានថៃ Khaosod ប្រធានគណបក្សប្រជាជន លោក Natthapong Ruangpanyawut បានលើកឡើងថា វាជាកាតព្វកិច្ចផ្ទាល់របស់រដ្ឋាភិបាល និងនាយករដ្ឋមន្ត្រី ក្នុងការគ្រប់គ្រងស្ថានការណ៍ ដើម្បីឱ្យសាធារណជនគ្រប់វិស័យ រួមទាំងលោក Kun Jom Palang ដែលចង់ជួយប្រជាជនថៃ ធានាថា ថៃទទួលបានផលប្រយោជន៍ពីកម្ពុជា ឬជួយដោះស្រាយបញ្ហានេះ។

ជុំវិញរឿងដែលថា លោក Kun Jom Palang ដែលជាជនបង្ករឿងនោះ បាននាំយកឧបករណ៍សំឡេងទៅចាក់សំឡេងខ្មោច និងសំឡេងយន្តហោះចម្បាំង និងសកម្មភាពផ្សេងៗទៀតដែលនឹងធ្វើឲ្យប្រទេសថៃបាត់បង់កិត្តិយសក្នុងឆាកអន្តរជាតិ ដែលរដ្ឋាភិបាលថៃត្រូវទទួលខុសត្រូវ។ លោកបញ្ជាក់ថា លោកជឿជាក់ថា ពលរដ្ឋថៃគ្រប់រូបចង់ជួយដោះស្រាយបញ្ហាព្រំដែនកម្ពុជា-ថៃ។

លោក Kun Jom Palang មេផ្តួចផ្តើមចាក់សំឡេងរំខានប្រជាជនកម្ពុជានៅតាមព្រំដែន។ The Examiner

តាមការដកស្រង់សម្តី លោក Natthapong និយាយថា៖ «វាជាកាតព្វកិច្ចរបស់នាយករដ្ឋមន្ត្រី និងរដ្ឋាភិបាលក្នុងការគ្រប់គ្រង ដើម្បីឱ្យគ្រប់ទម្រង់នៃជំនួយលើកកំពស់ និងពង្រឹងប្រទេសថៃ ជាជាងធ្វើឱ្យប្រទេសថៃជួបការលំបាក ឬបាត់បង់មូលដ្ឋាននៅលើឆាកពិភពលោក»។

ក្នុងរយៈពេលប៉ុន្មានថ្ងៃចុងក្រោយនេះ លោក Kun Jom Palang ដែលជាអ្នកផ្តួចផ្តើមចាក់សំឡេងរំខានដល់ប្រជាជនកម្ពុជានៅភូមិព្រៃចាន់ បានបង្កឲ្យមានការចាប់អារម្មណ៍យ៉ាងខ្លាំងក្នុងសកម្មភាពអសីលធម៌របស់ប្រជាជនថៃ និងនាំទៅដល់ការរំលោភសិទ្ធិមនុស្សទៀតផង។ ផ្ទុយទៅវិញ លោក អានុទីន ដែលជានាយករដ្ឋមន្ត្រីកំពុងទាញប្រជាប្រិយភាពសម្រាប់ត្រៀមការបោះឆ្នោតនៅខែមេសាខាងមុខ ហាក់បានបង្ហាញជំហរគាំទ្រក្រុមអសីលធម៌នោះទៅវិញ ដែលផ្ទុយពីជំហរស្វែងរកដំណោះស្រាយ និងការស្តារសន្តិភាពជាមួយប្រទេសជិតខាង៕

លោក អានុទីន នាយករដ្ឋមន្ត្រីថៃមានសិទ្ធិត្រឹម៤ខែ។

The post មេបក្សប្រឆាំងថៃ បង្ហាញក្តីកង្វល់ដែលលោកអានុទីន មិនគ្រប់គ្រងការចាក់សំឡេងរំខានប្រជាជនកម្ពុជា appeared first on Kampuchea Thmey Daily.

មេបក្សប្រឆាំងធំបំផុតនៅថៃ មិនគាំទ្រការធ្វើប្រជាមតិលុប MOUs ជាមួយកម្ពុជា

Rann Reuy — Mon, 06 Oct 2025 10:12:27 +0000

ប្រធានគណបក្សប្រឆាំងនៅក្នុងប្រទេសថៃជំរុញឲ្យរដ្ឋាភិបាលលុបចោលផែនការធ្វើប្រជាមតិដើម្បីលុបចោលអនុស្សារណៈយោគយល់គ្នា (MOUs) ស្តីពីបញ្ហាព្រំដែនជាមួយកម្ពុជា ខណៈរដ្ឋាភិបាលរបស់លោក អានុទីន ចានវីរៈគុល ធ្លាប់បានបង្ហាញបំណងធ្វើប្រជាមតិនៅថ្ងៃបោះឆ្នោតសកលដែលគ្រោងធ្វើឡើងនៅក្នុងខែមេសាឆ្នាំ២០២៦។

លោក Natthaphong Ruengpanyawut (កណ្តាល) ពេលប្រជុំសភាកន្លងមក។

សារព័ត៌មានថៃ The Nation បានផ្សាយថា ប្រធានគណបក្សប្រជាជនថៃ (People’s Party) លោក Natthaphong Ruengpanyawut នៅថ្ងៃចន្ទនេះ បានជំរុញរដ្ឋាភិបាលឲ្យលុបចោលផែនធ្វើប្រជាមតិលើការលុបចោលអនុស្សារណៈយោគយល់គ្នា (MOUs) ស្តីពីបញ្ហាព្រំដែនជាមួយកម្ពុជា។

តាមការចេញផ្សាយដដែល លោក Natthaphong បាននិយាយថា លោកគោរពចំពោះមតិភាគច្រើន ប៉ុន្តែលោកមិនយល់ស្របជាមួយផែនការធ្វើប្រជាមតិនោះទេ ដោយលោកផ្តល់ការជំទាស់ថា ប្រជាជនភាគច្រើនមិនយល់ដឹងពេញលេញនូវបញ្ហាព្រំដែនដ៏ស្មុគស្មាញនោះទេ។

ក្រោយការស្បថចូលកាន់តំណែងនាយករដ្ឋមន្ត្រី នាយករដ្ឋមន្ត្រីថៃ លោក អានុទីន ចានវីរៈគុល បានបង្ហាញបំណងធ្វើប្រជាមតិលុបចោលអនុស្សារណៈយោគយល់គ្នា (MOUs) ស្របពេលមានការជំរុញពីក្រុមជាតិនិយមមួយចំនួនទាមទារឲ្យរដ្ឋាភិបាលរបស់លោកធ្វើបែបនេះ។

លោក អានុទីន ធ្លាប់បានលើកឡើងថា ការធ្វើប្រជាមតិនោះអាចធ្វើឡើងស្របគ្នាជាមួយការបោះឆ្នោតសកលដែលប្រទេសថៃនឹងត្រូវរៀបចំឡើងនៅក្នុងខែមេសា ក្រោយពីការរំលាយសភានៅចុងខែមករាឆ្នាំ២០២៦ ដែលរដ្ឋាភិបាលរបស់លោក អានុទីន បានសន្យាជាមួយគណបក្សប្រឆាំង ជាថ្នូរនឹងការគាំទ្រឲ្យលោកក្លាយជានាយករដ្ឋមន្ត្រីរយៈពេល៤ខែនោះ៕

រ៉ាន់ រើយ

The post មេបក្សប្រឆាំងធំបំផុតនៅថៃ មិនគាំទ្រការធ្វើប្រជាមតិលុប MOUs ជាមួយកម្ពុជា appeared first on Kampuchea Thmey Daily.

លោក ថាក់ស៊ីន បង្ហាញវត្តមានដំបូង បញ្ចប់ពាក្យចចាមអារ៉ាម ថា គាត់រត់គេចខ្លួនទៅក្រៅប្រទេស

Rann Reuy — Wed, 28 May 2025 03:40:01 +0000

ការបង្ហាញខ្លួនដ៏គួរឲ្យចាប់អារម្មណ៍របស់អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រ នៅរសៀលថ្ងៃទី២៧ ខែឧសភា ឆ្នាំ២០២៥ នេះ គឺក្នុងនាមជាវាគ្មិនថ្លែងសុន្ទរកថាពិសេសមួយនៅការិយាល័យគណៈកម្មាធិការប្រយុទ្ធប្រឆាំងគ្រឿងញៀនក្រោមប្រធានបទស្តីពីបញ្ហា «គ្រឿងញៀននិងឧក្រិដ្ឋកម្មឆ្លងដែន ទស្សនវិស័យ និងបញ្ហាប្រឈមសម្រាប់ដំណោះស្រាយប្រកបដោយនិរន្តរភាព»។

លោក ថាក់ស៊ីន ស៊ីណាវ៉ាត្រ អតីតនាយករដ្ឋមន្ត្រីថៃ ពេលបង្ហាញមុខជាសាធារណៈ ក្រោយកើតឡើងពាក្យចរាមអារ៉ាមថាលោករត់គេចទៅក្រៅប្រទេស។ Khaosod

នេះជាការបង្ហាញខ្លួនជាសាធារណៈលើកដំបូងរបស់លោក ថាក់ស៊ីន ស៊ីណាវ៉ាត្រ អតីតនាយករដ្ឋមន្ត្រីថៃ បន្ទាប់ពីតុលាការកំពូលផ្នែកព្រហ្មទណ្ឌសម្រាប់អ្នកកាន់មុខតំណែងនយោបាយបានកំណត់ថ្ងៃណាត់ជួបនិងបើកសវនាការសាកសួរនៅថ្ងៃទី១៣ខែមិថុនាខាងមុខ ជុំវិញសំណុំរឿងសម្រាកព្យាបាលជំងឺនៅជាន់ទី១៤របស់មន្ទីរពេទ្យប៉ូលិសក្រុងបាងកក និងបន្ទាប់ពីមានព័ត៌មានចចាមអារ៉ាមថា រូបលោកបានរត់គេចខ្លួនចេញទៅក្រៅប្រទេសដើម្បីគេចពីការណាត់ជួបសាកសួរនេះ។

លោក ថាក់ស៊ីន ស៊ីណាវ៉ាត្រ បានវិលចូលមាតុប្រទេសវិញកាលខែសីហាឆ្នាំ២០២៣ គឺនៅមុនថ្ងៃដែលសភាថៃបោះឆ្នោតជ្រើសរើសបេក្ខជននាយករដ្ឋមន្ត្រីចេញពីគណបក្សភឿថៃ ហើយត្រូវវបានតុលាការកំពូលកាត់ទោសឲ្យជាប់ពន្ធធនាគារ ១ឆ្នាំ ហើយលោកក៏ត្រូវចូលសម្រាកព្យាបាលនៅមន្ទីរពេទ្យប៉ូលិសនៅទីក្រុងបាងកក ដែលជាពេទ្យរបស់ពន្ធធាគារដោយសាររូបលោកជាពិរុទ្ធជន (អ្នកទោស) ដែលត្រូវអនុវត្តទោសរយៈពេល១២០ថ្ងៃក្នុងពន្ធធាគារ។

ក្នុងពេលបង្ហាញខ្លួនលើកដំបូងកាលថ្ងៃទី២៧ខែឧសភា យោងសារព័ត៌មានថៃ naewna លោក ថាក់ស៊ីន ស៊ីណាវ៉ាត្រ ក៏បាននិយាយទៅកាន់អ្នកសារព័ត៌មានផងដែរថា រូបលោកមានអាយុជាង៧០ឆ្នាំទៅហើយ ប៉ុន្តែការរស់នៅហូបចុកសុខសប្បាយជាធម្មតាទេ មិនបានគេចខ្លួនទៅណាដូចពាក្យចចាមអារ៉ាមនោះទេ និងបានផ្តាំផ្ញើទៅកាន់អ្នកដែលបញ្ចេញព័ត៌មានចចាមអារ៉ាមទាំងអស់ធ្វើចិត្តឱ្យត្រជាក់ៗ។

លោកថាក់ស៊ីន បន្តថា អ្នកដែលបញ្ចេញព័ត៌មានចចាមអារ៉ាមនេះមានមិនច្រើននាក់នោះទេ ពោលគឺតែម្នាក់ពីរនាក់ប៉ុណ្ណោះ៕

ដោយ ភ្នាក់ងារ

The post លោក ថាក់ស៊ីន បង្ហាញវត្តមានដំបូង បញ្ចប់ពាក្យចចាមអារ៉ាម ថា គាត់រត់គេចខ្លួនទៅក្រៅប្រទេស appeared first on Kampuchea Thmey Daily.

យីងឡាក់រួចផុតសំណង៣៥ពាន់លានបាត ប៉ុន្តែជាប់សំណងពុករលួយជាង១០ពាន់លានបាត

Rann Reuy — Fri, 23 May 2025 03:34:30 +0000

សារព័ត៌មានថៃ matichon បានផ្សាយនៅរសៀលថ្ងៃទី២២ ខែឧសភា ឆ្នាំ២០២៥ ឲ្យដឹងថា តុលាការរដ្ឋបាលកំពូលនៃព្រះរាជាណាចក្រថៃ បានបង្គាប់ឱ្យលោកស្រី យីងឡាក់ ស៊ីណាវ៉ាត្រ អតីតនាយករដ្ឋមន្ត្រីដែដឹកនាំចន្លោះឆ្នាំ ២០១៣និង២០១៤ សងសំណងខូចខាតនូវចំនួនទឹកប្រាក់ជាង១០ពាន់លានបាត (ប្រមាណ៣០៥លានដុល្លារ) ក្នុងសំណុំរឿងអំពើពុករលួយគម្រោងទិញស្រូវនេះ ប៉ុន្តែមិនមែនសំណងទាមទារប្តឹងដោយក្រសួងសេដ្ឋកិច្ចនិងហិរញ្ញវត្ថុជាង៣៥ពាន់លានបាននោះទេ។

តុលាការរដ្ឋបាលកំពូលរបស់ថៃ បានបើកសវនាការអានសាលក្រមសម្រេចក្នុងសំណុំរឿងដែលក្រសួងហិរញ្ញវត្ថុថៃក្រោមការដឹកនាំរបស់រដ្ឋាភិបាល ប្រាយុធ ចាន់អូចា បានប្តឹងសាទុក្ខសាលក្រមរបស់តុលាការរដ្ឋបាលកណ្តាលដែលបានបង្គាប់ឱ្យលុបចោលដីកាលេខ ១៣៥/២០១៦ ចុះថ្ងៃទី១៣ ខែតុលា ឆ្នាំ២០១៦ របស់ក្រសួងហិរញ្ញវត្ថុដែលបានបង្គាប់ឱ្យអតីតនាយករដ្ឋមន្ត្រីលោកស្រី យីងឡាក់ ស៊ីណាវ៉ាត្រ ត្រូវសងសំណងខូចខាតសរុបទឹកប្រាក់ចំនួនជាង៣៥ពាន់លានបាតជុំវិញអំពើពុករលួយក្នុងគម្រោងទិញស្រូវ និងធ្វេសប្រហែសក្នុងការទប់ស្កាត់ការខូចខាតរបស់រដ្ឋ។

លោកស្រី យីងឡាក់ ចុះជួបកសិករពេលនៅកាន់អំណាច។ FB

តាមរយៈសាលក្រមនោះ ចៅក្រមតុលាការរដ្ឋបាលកំពូលក្រុងបាងកក យល់ឃើញថា គម្រោងទិញស្រូវដែលត្រូវបានអនុម័តដោយគណៈរដ្ឋមន្ត្រីនាពេលនោះស្របតាមគោលនយោបាយដែលត្រូវអនុវត្តតាមបទប្បញ្ញត្តិរបស់រដ្ឋធម្មនុញ្ញនៃព្រះរាជាណាចក្រថៃដែលចូលជាធរមានស្របតាមគោលនយោបាយរបស់រដ្ឋាភិបាល ពោលគឺមិនមែនមានតែនាយករដ្ឋមន្ត្រីតែម្នាក់អាចលុបចោលនូវសេចក្តីសម្រេចរបស់គណៈរដ្ឋមន្ត្រីបាននោះទេ ពោលគឺនាយករដ្ឋមន្ត្រីត្រូវតែអនុវត្តតាមគោលនយោបាយដែលរដ្ឋាភិបាលបានប្រកាសចំពោះរដ្ឋសភា។

តុលាការរដ្ឋបាលកំពូលថៃ បានឲ្យដឹងថា ជនជាប់ចោទទី១ (លោកស្រី យីងឡាក់) គ្មានចំណែកក្នុងការទទួលខុសត្រូវនោះទេ ពីព្រោះជាការអនុវត្តអំណាចតាមផ្លូវច្បាប់ដើម្បីឱ្យសម្រេចបាននូវលទ្ធផលតាមគោលនយោបាយកិច្ចសន្យាទទួលទិញស្រូវពីប្រជាកសិករ ដែលជាការអនុវត្តតាមអំណាចរបស់រដ្ឋាភិបាល មិនមែនជាទង្វើនយោបាយនោះទេ។

ក្នុងដីកាដែលអាននៅថ្ងៃទី២២ខែឧសភា តុលាការរដ្ឋបាលកំពូលមិនអាចទទួលយកតាមដីកាលេខ ១៣៥/២០១៦ ចុះថ្ងៃទី១៣ ខែតុលា ឆ្នាំ២០១៦ របស់ក្រសួងហិរញ្ញវត្ថុបាននោះទេ ដោយសារតុលាការរដ្ឋបាលកំពូលយល់ឃើញថា នេះជាការអនុវត្តស្របតាមបទប្បញ្ញត្តិច្បាប់ទាំងអស់ ប៉ុន្តែជាអំពើពុករលួយនៅកម្រិតអ្នកអនុវត្តប៉ុណ្ណោះ ពោលគឺអតីតនាយករដ្ឋមន្ត្រី «យីងឡាក់ ស៊ីណាវ៉ាត្រ» មិនមានចេតនា ឬការធ្វេសប្រហែសទាំងស្រុងនោះទេ។

ក្នុងសេចក្តីសម្រេចនោះ តុលាការរដ្ឋបាលកំពូលបានប្រកាសាលក្រមបង្គាប់ឱ្យលោកស្រី យីងឡាក់ ស៊ីណាវ៉ាត្រ មិនចាំបាច់ត្រូវសងសំណងខូចខាតចំនួនជាង៣៥ពាន់លានបាតតាមដីកាលេខ ១៣៥/២០១៦ ចុះថ្ងៃទី១៣ ខែតុលា ឆ្នាំ២០១៦ តាមការទាមទាររបស់ក្រសួងហិរញ្ញវត្ថុនោះទេ ប៉ុន្តែតុលាការរដ្ឋបាលកំពូលបានបង្គាប់ឱ្យលោកស្រីសងសំណងខូចខាតនូវចំនួនទឹកប្រាក់ត្រឹមតែ១០០២៨លានបាតប៉ុណ្ណោះ ក្នុងសំណុំរឿងអំពើពុករលួយគម្រោងទិញស្រូវនេះ៕

ដោយ ភ្នាក់ងារ

អតីតនាយករដ្ឋមន្ត្រី យីងឡាក់ ស៊ីណាវ៉ាត្រ ចុះជួបកសិករ ពេលនៅមានអំណាច។ FB

The post យីងឡាក់រួចផុតសំណង៣៥ពាន់លានបាត ប៉ុន្តែជាប់សំណងពុករលួយជាង១០ពាន់លានបាត appeared first on Kampuchea Thmey Daily.

ត្រឹម១សប្តាហ៍ ទីក្រុងបាងកករកឃើញអ្នកជំងឺកូវីដ១៩ ជិត៣០០០នាក់

Rann Reuy — Fri, 09 May 2025 07:21:37 +0000

អាជ្ញាធរក្រុងបាងកកប្រទេសថៃបានរកឃើញករណីអ្នកឆ្លងជំងឺកូវីដ១៩ថ្មីចំនួន២៩៦៧នាក់ក្នុងរយៈពេលមួយសប្តាហ៍។ នេះបើយោងតាមការចេញផ្សាយរបស់សារព័ត៌មានថៃ thairath។ ទន្ទឹមគ្នានេះអាជ្ញាធរក៏បានបង្ហាញការបារម្ភចំពោះស្ថានភាពរបស់មនុស្សចាស់និងកុមារតូចៗផងដែរ ខណៈដែលសាលារៀនជិតដល់ថ្ងៃបើកបវេសនកាលវិញក្នុងពេលឆាប់ៗខាងមុខនេះ។

លោក វេជ្ជបណ្ឌិត Sunthorn Sunthornchat អភិបានរងក្រុងបាងកក។ The Nation

នៅថ្ងៃទី៨ខែឧសភា ឆ្នាំ២០២៥ លោក វេជ្ជបណ្ឌិត Sunthorn Sunthornchat អភិបានរងក្រុងបាងកក បាននិយាយអំពីស្ថានការណ៍ជំងឺឆ្លងកូវីដ១៩ នៅតំបន់ក្នុងទីក្រុងបាងកកដោយយោងតាមទិន្នន័យការិយាល័យជំងឺឆ្លងនៃមន្ទីរសុខាភិបាលក្រុងបាងកក ដែលបានរកឃើញថា ក្នុងរយៈពេលមួយសប្តាហ៍ ពោលគឺចន្លោះពីថ្ងៃទី២៧ ខែមេសា ដល់ថ្ងៃទី៣ខែឧសភា ឆ្នាំ២០២៥ មានអ្នកឆ្លងជំងឺកូវីដ១៩ថ្មីចំនួន២៩៦៧នាក់ ក្នុងនោះ២៣៨១នាក់ជាជនជាតិថៃ និង៥៨៦នាក់ជាជនបរទេស ប៉ុន្តែមិនមានអ្នកស្លាប់នោះទេ។

តាមសេចក្តីរាយការណ៍ដែលស្រង់សម្តីរបស់អភិបាលរងក្រុងបាងកក ចំនួនអ្នកឆ្លងបើគិតចាប់តាំងពីថ្ងៃទី១ខែមករា ឆ្នាំ២០២៥រហូតមកមានចំនួន១៥០៥៥នាក់ ក្នុងនោះ១១៧០០នាក់ជាជនជាតិថៃ និង៣៣៥៥នាក់ជាជនបរទេស និងមានអ្នកស្លាប់១នាក់ចាប់តាំងពីថ្ងៃទី១ ខែមករា ឆ្នាំ២០២៥។

សារព័ត៌មានថៃ thairath ដដែលបានរាយការណ៍ដោយយោងតាមការត្រួតពិនិត្យនិងតាមដានរបស់ការិយាល័យជំងឺឆ្លងនៃមន្ទីរសុខាភិបាលក្រុងបាងកកថា ស្ថានការណ៍នៃការឆ្លងរាតត្បាតជំងឺកូវីដ១៩ជាថ្មីនេះបានកើនឡើងចាប់ពីខែមេសា ជាពិសេសក្រោយបុណ្យចូលឆ្នាំថ្មី ដោយសារមានការប្រមូលផ្តុំគ្នាច្រើនកុះករបន្តរហូតដល់ខែឧសភា គួបផ្សំនឹងអាកាសធាតុប្រែប្រួលពីរដូវក្តៅចូលរដូវវស្សានេះផង ដែលធ្វើឱ្យជំងឺកូវីដ១៩ងាយនឹងឆ្លងជាងជំងឺផ្តាសាយទៅទៀត។

ប៉ុន្តែទោះជាយ៉ាងណាក៏ដោយ ប្រសិនបើប្រៀបធៀបពីចំនួនអ្នកឆ្លងក្នុងអំឡុងពេលដូចគ្នាក្នុងឆ្នាំ២០២៤ និងឆ្នាំ២០២៣ មិនមានអ្វីជាការព្រួយបារម្ភនោះទេ ដោយសារចំនួនអ្នកឆ្លងនេះនៅតែទាបជាងពេលកន្លងទៅ។ សម្រាប់ នៅតំបន់ក្នុងទីក្រុងបាងកកអាជ្ញាធរសុខាភិបាលបានអំពាវនាវឱ្យប្រជាជនពាក់ម៉ាស់គ្រប់ពេលវេលាដើម្បីការពារការឆ្លង ជាពិសេសនៅពេលចូលទៅក្នុងសហគមន៍ណាមួយ ឬកន្លែងដែលមានមនុស្សច្រើនកុះករ។ ប្រសិនបើមានការប៉ះពាល់ជាមួយអ្នកជំងឺដោយផ្ទាល់ត្រូវពាក់ម៉ាសនិងលាងដៃជាប្រចាំ ឬប្រើជែលនិងអាល់កុល៕

ដោយ ភ្នាក់ងារ

អាជ្ញាធរថៃចែកម៉ាសមុខដោយមិនគិតថ្លៃដល់ប្រជាជនក្នុងអំឡុងពេលនៃការរីករាលខ្លាំងកាលពីប៉ុន្មានឆ្នំាមុន។ Bangkok Post

The post ត្រឹម១សប្តាហ៍ ទីក្រុងបាងកករកឃើញអ្នកជំងឺកូវីដ១៩ ជិត៣០០០នាក់ appeared first on Kampuchea Thmey Daily.

តបនឹងការផ្សាយថារកឃើញខ្មែរម្នាក់ទៀតស្លាប់ព្រោះរញ្ជួយដីនៅថៃ អ្នកនាំពាក្យថា ថៃមិនទាន់បញ្ជាក់ថាជាខ្មែរ ឬជនជាតិណាទេ ព្រោះត្រូវផ្ទៀងផ្ទាត់DNAសិន

Ngoeul Narath — Mon, 05 May 2025 07:54:16 +0000

ថ្មីៗនេះ មានការផ្សាយថា រកឃើញសពពលករខ្មែរម្នាក់ទៀតស្លាប់ក្នុងហេតុការណ៍គ្រោះរញ្ជួយដីនៅប្រទេសថៃ ដែលកើតឡើងកាលពីខែមីនា កន្លងទៅ។ ជុំវិញករណីនេះ អ្នកនាំពាក្យក្រសួងការងារ លោក ស៊ុន មេសា ឆ្លើយតបថា ភាគីថៃ មិនទាន់អាចបញ្ជាក់បានថា សពដែលទើបរកឃើញនោះ ជាជនជាតិថៃ ឬខ្មែរ ឬក៏ជាភូមានៅឡើយ អ្វីៗត្រូវការការពិនិត្យDNA ជាមុនសិន ទើបអាចបញ្ជាក់បាន។

លោក ស៊ុន មេសា ឆ្លើយតបបែបនេះ៖«ម្សិលមិញនេះ មានការផ្សាយលើបណ្តាញសង្គមហ្វេសប៊ុកថា រកឃើញសពជនជាតិខ្មែរនៅបាក់រលំក្នុងទីក្រុងបាងកក។ ការពិតនៃរឿងនេះ គឺអាជ្ញាធរថៃបានរកឃើញសពម្នាក់ដែលមើលមិនស្គាល់អត្តសញ្ញាណ ហើយបានឃើញឯកសាររបស់ពលករខ្មែរនៅទីតាំងក្បែរៗគ្នានោះដែលមានឈ្មោះថា គិម សី ប៉ុន្តែអាជ្ញាធរថៃ មិនទាន់បញ្ជាក់ថាជាជនជាតិថៃ ភូមា ឬខ្មែរនៅឡើយទេ ដោយអាជ្ញាធរថៃត្រូវការពិនិត្យ និងផ្ទៀងផ្ទាត់ DNA ទើបអាចបញ្ជាក់បាន។ »។

អ្នកនាំពាក្យក្រសួងការងារ អះអាងថា ក្រសួង បាននិងកំពុងតាមដាន និងយកចិត្តទុកដាក់ ព្រមទាំងសម្របសម្រួលជាប្រចាំតាមការចាំបាច់ក្នុងជួយសម្រួលសាច់ញាតិពលករទាំងការធ្វើដំណើរ និងសម្រួលឯកសារជាដើម។

លោក ស៊ុន មេសា ចាត់ទុកគ្រោះរញ្ជួយដីនេះ ជាការរឿងគ្រោះធម្មជាតិ គួរឱ្យសង្វែកមិនថាទាំងខ្មែរ ថៃ និងភូមាទេ។ អ្នកនាំពាក្យក្រសួងការងារ បន្តអំពាវនាវដល់ប្រជាពលរដ្ឋមេត្តាបន្តទុកចិត្ត និងជឿជាក់លើក្រសួងការងារ និងស្ថានទូតខ្មែរប្រចាំនៅថៃលើករណីនេះ និងតាមដានព័ត៌មានជាក់លាក់ និងត្រឹមត្រូវពីក្រសួងការងារ តាមរយៈទំព័រហ្វេសប៊ុកក្រសួងការងារ និងបណ្តុះបណ្តាលវិជ្ជាជីវៈ, រដ្ឋមន្ត្រីក្រសួងការងារ និងអ្នកនាំពាក្យក្រសួង។

ទន្ទឹមនឹងការអំពាវពាវឱ្យពលរដ្ឋជឿជាក់ លោក ស៊ុន មេសា អះអាងបែបនេះ៖« មន្ត្រីយើងយកចិត្តទុកដាក់ណាស់ មិនទុកប្រជាជនចោលដោយមិនទទួលខុសត្រូវឡើយ។ »។

គិតត្រឹមដើមខែឧសភានេះ ក្រសួងការងារកម្ពុជា រកឃើញពលករខ្មែរ៣នាក់រងគ្រោះ ក្នុងហេតុការណ៍គ្រោះរញ្ជួយដីនៅប្រទេសថៃ ក្នុងនោះម្នាក់រងរបួសបាក់ជើង និង២នាក់ផ្សេងទៀត គឺលោក មាស សាវ៉ាង និងលោក ផល្លា រតនា ស្លាប់។

ប្រមុខរដ្ឋាភិបាលកម្ពុជា សម្ដេចធិបតី ហ៊ុន ម៉ាណែត និងលោកជំទាវ និងក្រសួងការងារ ក៏បានឧបត្ថម្ភថវិកាសម្រាប់ព្យាបាលជនរងរបួស និងចូលជាបច្ច័យដល់ក្រុមគ្រួសារដែលបាត់ជីវិត និងចូលរួមរំលែកទុក្ខផងដែរ៕

The post តបនឹងការផ្សាយថារកឃើញខ្មែរម្នាក់ទៀតស្លាប់ព្រោះរញ្ជួយដីនៅថៃ អ្នកនាំពាក្យថា ថៃមិនទាន់បញ្ជាក់ថាជាខ្មែរ ឬជនជាតិណាទេ ព្រោះត្រូវផ្ទៀងផ្ទាត់DNAសិន appeared first on Kampuchea Thmey Daily.

ខេត្តថៃជាង៤០ចាប់ពីភាគកណ្តាលទៅភាគខាងជើងនឹងជួបព្យុះនិងភ្លៀងរយៈពេល៣ថ្ងៃ

Rann Reuy — Wed, 30 Apr 2025 04:12:54 +0000

ខេត្តទាំងឡាយក្នុងប្រទេសថៃយ៉ាងហោចណាស់ជាង៤០ នៅតំបន់ភាគកណ្តាល ភាគឦសាន និងភាគខាងជើង នឹងទទួលរងឥទ្ធិពលពីខ្យល់ព្យុះរដូវក្ដៅលាយឡំនឹងភ្លៀងធ្លាក់ខ្លាំងចាប់ពីថ្ងៃទី២៩ ខែមេសា ដល់ថ្ងៃទី១ ខែឧសភា ឆ្នាំ២០២៥។ យោងការចុះផ្សាយរបស់សារព័ត៌មាន naewna។

អ្នកស្រុកថៃឈរក្បែរបង្គោលភ្លើងដែលរលំបាក់ដោយសារព្យុះកំបុតត្បូងកាលពីថ្ងៃចន្ទ។ matichon.

ផ្អែកតាមការផ្សាយនោះ នៅព្រឹកថ្ងៃទី២៩ ខែមេសា ឆ្នាំ២០២៥ នាយកដ្ឋានឧតុនិយមថៃបានចេញសេចក្តីប្រកាសមួយដែលជូនដំណឹងអំពីខ្យល់ព្យុះរដូវក្ដៅនិងភ្លៀងធ្លាក់នៅតំបន់ភាគកណ្តាល ភាគឦសាន និងភាគខាងជើង នឹងទទួលឥទ្ធិពលរងផលប៉ះពាល់ចាប់ពីថ្ងៃទី២៩ ខែមេសា ដល់ថ្ងៃទី១ ខែឧសភា ឆ្នាំ២០២៥។

សារព័ត៌មានថៃ naewna ដែលបានយោងនាយកដ្ឋានឧតុនិយមថៃ បានរាយការណ៍ថា ភាគខាងជើងនៃប្រទេសថៃនឹងទទួលរងឥទ្ធិពលពីព្យុះរដូវក្តៅលាយឡំនឹងភ្លៀងផ្គររន្ទះ មានធ្លាក់ព្រិល និងភ្លៀងខ្យល់ខ្លាំងនៅតំបន់មួយចំនួន ដោយសាររងឥទ្ធិពលពីតំបន់សម្ពាធខ្ពស់កម្រិតមធ្យមពីប្រទេសចិនរាលដាលមកគ្របដណ្ដប់លើប្រទេសវៀតណាមនិងសមុទ្រចិនខាងត្បូង ហើយបណ្តាលឱ្យខ្សែបន្ទាត់នៃខ្យល់បក់បោកពីទិសអាគ្នេយ៍ និងនិរតីបក់បោកមកលើតំបន់ភាគខាងជើងនៃប្រទេសថៃ។

ទន្ទឹមនឹងនេះ នៅតំបន់ភាគខាងជើងថៃក៏នឹងពើបប្រទះអាកាសធាតុក្តៅ គួបផ្សំនឹងរលកខ្យល់បក់បោកពីប្រទេសមីយ៉ាន់ម៉ាមកលើតំបន់ភាគខាងជើងនិងភាគឦសាននៃប្រទេសថៃផងដែរ។

សេចក្តីប្រកាសដដែលក៏បានអំពាវនាវឱ្យប្រជាជននៅតំបន់ភាគខាងជើងមានការប្រុងប្រយ័ត្នចំពោះគ្រោះថ្នាក់ដែលបណ្តាលមកពីខ្យល់ព្យុះនិងភ្លៀងធ្លាក់ខ្លាំងដែលអាចកើតឡើង ដោយឱ្យប្រជាជនគួរជៀសវាងនៅកន្លែងល្ហល្ហេវ ក្រោមដើមឈើធំៗ អគារកំពុងសាងសង់ និងផ្ទាំងប៉ាណូធំៗ។ល។ ចំណែកប្រជាកសិករឱ្យប្រយុងប្រយ័ត្ននិងការពារដើមឈើហូបផ្លែដើម្បីត្រៀមបង្ការការខូចខាតដែលអាចកើតមានចំពោះផលិតផលកសិកម្ម និងសត្វចិញ្ចឹម៕

ដោយភ្នាក់ងារ

The post ខេត្តថៃជាង៤០ចាប់ពីភាគកណ្តាលទៅភាគខាងជើងនឹងជួបព្យុះនិងភ្លៀងរយៈពេល៣ថ្ងៃ appeared first on Kampuchea Thmey Daily.

ថៃ​ Archives - Kampuchea Thmey Daily

​លោក អានុទីន ​ថ្លឹងថ្លែង​​អំពីលទ្ធភាព​​រំលាយសភា​មុន​​​​កំណត់​​៤ខែ​ ដោយសម្ពាធ​កើន​ឡើង​​

​​មេបក្ស​ប្រឆាំងធំបំផុត​នៅថៃ​ មិនគាំទ្រ​​​ការ​ធ្វើប្រជាមតិលុប​ MOUs ជាមួយកម្ពុជា​​​

លោក ថាក់ស៊ីន បង្ហាញ​វត្តមាន​ដំបូង​ បញ្ចប់​ពាក្យ​ចចាមអារ៉ាម ថា គាត់​រត់គេចខ្លួនទៅក្រៅប្រទេស

យីងឡាក់​រួចផុត​​សំណង៣៥​ពាន់​លានបាត ​ប៉ុន្តែ​ជាប់សំណង​ពុករលួយជាង​១០​ពាន់​លានបាត​​​

​ត្រឹម១សប្តាហ៍​ ​ទីក្រុង​បាងកក​រកឃើញ​អ្នក​ជំងឺកូវីដ១៩ ជិត​​៣០០០​នាក់​

ខេត្តថៃ​​​​ជាង​៤០​ចាប់​ពី​ភាគកណ្តាលទៅ​ភាគខាងជើងនឹង​ជួប​ព្យុះ​និង​ភ្លៀង​​​រយៈពេល៣ថ្ងៃ​​

ថៃ Archives - Kampuchea Thmey Daily

លោក អានុទីន ថ្លឹងថ្លែងអំពីលទ្ធភាពរំលាយសភាមុនកំណត់៤ខែ ដោយសម្ពាធកើនឡើង

មេបក្សប្រឆាំងធំបំផុតនៅថៃ មិនគាំទ្រការធ្វើប្រជាមតិលុប MOUs ជាមួយកម្ពុជា

លោក ថាក់ស៊ីន បង្ហាញវត្តមានដំបូង បញ្ចប់ពាក្យចចាមអារ៉ាម ថា គាត់រត់គេចខ្លួនទៅក្រៅប្រទេស

យីងឡាក់រួចផុតសំណង៣៥ពាន់លានបាត ប៉ុន្តែជាប់សំណងពុករលួយជាង១០ពាន់លានបាត

ត្រឹម១សប្តាហ៍ ទីក្រុងបាងកករកឃើញអ្នកជំងឺកូវីដ១៩ ជិត៣០០០នាក់

ខេត្តថៃជាង៤០ចាប់ពីភាគកណ្តាលទៅភាគខាងជើងនឹងជួបព្យុះនិងភ្លៀងរយៈពេល៣ថ្ងៃ