ព័ត៌មានអន្ដរជាតិ

មេបក្សប្រឆាំងធំបំផុតនៅថៃ មិនគាំទ្រការធ្វើប្រជាមតិលុប MOUs ជាមួយកម្ពុជា

បានផុស

៩ ខែ មុន

នៅ

ថ្ងៃចន្ទ ៦ តុលា ២០២៥

ដោយ

ប្រធានគណបក្សប្រឆាំងនៅក្នុងប្រទេសថៃជំរុញឲ្យរដ្ឋាភិបាលលុបចោលផែនការធ្វើប្រជាមតិដើម្បីលុបចោលអនុស្សារណៈយោគយល់គ្នា (MOUs) ស្តីពីបញ្ហាព្រំដែនជាមួយកម្ពុជា ខណៈរដ្ឋាភិបាលរបស់លោក អានុទីន ចានវីរៈគុល ធ្លាប់បានបង្ហាញបំណងធ្វើប្រជាមតិនៅថ្ងៃបោះឆ្នោតសកលដែលគ្រោងធ្វើឡើងនៅក្នុងខែមេសាឆ្នាំ២០២៦។

លោក Natthaphong Ruengpanyawut (កណ្តាល) ពេលប្រជុំសភាកន្លងមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មានថៃ The Nation បានផ្សាយថា ប្រធានគណបក្សប្រជាជនថៃ (People’s Party) លោក Natthaphong Ruengpanyawut នៅថ្ងៃចន្ទនេះ បានជំរុញរដ្ឋាភិបាលឲ្យលុបចោលផែនធ្វើប្រជាមតិលើការលុបចោលអនុស្សារណៈយោគយល់គ្នា (MOUs) ស្តីពីបញ្ហាព្រំដែនជាមួយកម្ពុជា។

តាមការចេញផ្សាយដដែល លោក Natthaphong បាននិយាយថា លោកគោរពចំពោះមតិភាគច្រើន ប៉ុន្តែលោកមិនយល់ស្របជាមួយផែនការធ្វើប្រជាមតិនោះទេ ដោយលោកផ្តល់ការជំទាស់ថា ប្រជាជនភាគច្រើនមិនយល់ដឹងពេញលេញនូវបញ្ហាព្រំដែនដ៏ស្មុគស្មាញនោះទេ។

ក្រោយការស្បថចូលកាន់តំណែងនាយករដ្ឋមន្ត្រី នាយករដ្ឋមន្ត្រីថៃ លោក អានុទីន ចានវីរៈគុល បានបង្ហាញបំណងធ្វើប្រជាមតិលុបចោលអនុស្សារណៈយោគយល់គ្នា (MOUs) ស្របពេលមានការជំរុញពីក្រុមជាតិនិយមមួយចំនួនទាមទារឲ្យរដ្ឋាភិបាលរបស់លោកធ្វើបែបនេះ។

លោក អានុទីន ធ្លាប់បានលើកឡើងថា ការធ្វើប្រជាមតិនោះអាចធ្វើឡើងស្របគ្នាជាមួយការបោះឆ្នោតសកលដែលប្រទេសថៃនឹងត្រូវរៀបចំឡើងនៅក្នុងខែមេសា ក្រោយពីការរំលាយសភានៅចុងខែមករាឆ្នាំ២០២៦ ដែលរដ្ឋាភិបាលរបស់លោក អានុទីន បានសន្យាជាមួយគណបក្សប្រឆាំង ជាថ្នូរនឹងការគាំទ្រឲ្យលោកក្លាយជានាយករដ្ឋមន្ត្រីរយៈពេល៤ខែនោះ៕

រ៉ាន់ រើយ