បន្លែស្លឹក Archives - Kampuchea Thmey Daily

ARDB បន្តជំរុញការងារដាំដុះក្នុងផ្ទះសំណាញ់ ដើម្បីផ្គត់ផ្គង់បន្លែដល់ជនភៀសសឹក

Din Thary — Thu, 25 Dec 2025 08:07:50 +0000

លោក កៅ ថាច ប្រតិភូរាជរដ្ឋាភិបាលទទួលបន្ទុកជា អគ្គនាយក និងជាសមាជិកក្រុមប្រឹក្សាភិបាលនៃធនាគារ ARDB បានគូសបញ្ជាក់ថា បច្ចុប្បន្ននេះ កិច្ចការងារលើការដាំដុះ ក្រុមការងារបាននិងកំពុងធ្វើជាប់ជាប្រចាំដោយបានពង្រីកបន្ថែមនូវសកម្មភាព ក៏ដូចជាការជំរុញបន្ថែមនូវសកម្មភាពផ្ទះសំណាញ់ផ្សេងៗបង្កើនការដាំដុះបន្លែដើម្បីជួយផ្គត់ផ្គង់ទៅដល់ជនភៀសសឹក។

ថ្លែងប្រាប់ «កម្ពុជាថ្មី» លោក កៅ ថាច បានលើកឡើងថា ការងារដាំដុះបន្លែក្នុងផ្ទះសំណាញ់គម្រោងត្រូវបានធ្វើឡើងជាបន្តបន្ទាប់ ដែលយើងរុញទៅជាមួយសហគមន៍កសិកម្មទំនើប និងសហគមន៍កសិកម្មធម្មតា ក៏ដូចជាជាមួយនឹងវិស័យឯកជនមួយចំនួនផងដែរ ដើម្បីបង្កើនសកម្មភាពដាំដុះឱ្យកាន់តែបានច្រើនជាងមុន។

លោកបានបញ្ជាក់ថា «គោលដៅរបស់យើងគឺមិនមែនធ្វើសម្រាប់តែរយៈពេលខ្លះប៉ុណ្ណោះទេ គឺយើងត្រូវគិតគូរបន្ថែមទៀត ក្រោយពីជនភៀសសឹក តើត្រូវរៀបចំឱ្យមានអ្វីបន្ថែមទៀត ដែលការងារនេះភាគច្រើនគឺសហការណ៍ជាមួយសហគមន៍កសិកម្មទំនើប និងសហគមន៍កសិកម្មធម្មតា ដែលផ្តោតទៅលើការពង្រីកការងារដាំដុះ និងការពង្រីកផ្ទះសំណាញ់ឱ្យបានកាន់តែច្រើនបន្ថែម»។

លោក កៅ ថាច បានបញ្ជាក់ថា ក្នុងនោះសម្រាប់បន្លែដាំដុះនៅក្នុងផ្ទះសំណាញ់ភាគច្រើនសុទ្ធសឹងតែជាសមាជិកចាស់ដែលមានបទពិសោធន៍នៅក្នុងការដាំដុះ ជាពិសេសលើប្រភេទបន្លែស្លឹក និងបន្លែផ្លែ ដែលអាចប្រមូលផលបានក្នុងរយៈពេលខ្លី។

ជាមួយគ្នានេះ លោក ឈឹម វជិរ៉ា ប្រធានមន្ទីរកសិកម្ម រុក្ឋាប្រមាញ់ និងនេសាទ ខេត្តបាត់ដំបង បានឱ្យ«កម្ពុជាថ្មី» ដឹងដែរថា ឆ្លើយតបតាមអនុសាសន៍ណែនាំដ៏ខ្ពង់ខ្ពស់របស់សម្តេចធិបតី និងលោកជំទាវបណ្ឌិត មន្ទីរកសិកម្ម បាននិងកំពុងធ្វើការសហការជាមួយមណ្ឌលភាសសឹកទាំងអស់ដាំដុះបន្លែដែលមានរយៈពេលខ្លីសម្រាប់ប្រមូលផលផ្គត់ផ្គង់ទៅដល់ជនភៀសសឹកនៅតាមមណ្ឌលនីមួយៗទាំង ២៩ មណ្ឌល។

ក្នុងនោះដែរ គណៈអភិបាលខេត្តបានចាត់ចែងទៅតាមមណ្ឌលណាដែលមានលទ្ធភាពមានទីតាំងដីសម្រាប់ដាំដុះនៅតាមទីតាំងវត្តអារាម ក៏ដូចជាសាលារៀន ដើម្បីត្រៀមសម្រាប់ធ្វើការដាំដុះបន្លែដូចជា ត្រកួន ស្ពៃចង្កឹះ ស្ពៃតឿ ស្ពៃក្រញ៉ាញ់ និងស្ពៃហាងជាដើម ព្រោះភាគច្រើនយើងផ្តោតទៅលើប្រភេទបន្លែដែលមានអាយុកាលខ្លីអាចត្រឹម ២៥ថ្ងៃ ទៅ ៣០ ថ្ងៃ អាចប្រមូលផលបានដើម្បីយកទៅជួយសម្រួលដល់ប្រជាពលរដ្ឋភៀសសឹក ប្រសិនបើសង្គ្រាមនៅតែបន្តអូសបន្លាយក្នុងរយៈពេលយូតទៅទៀតដោយសារការឈ្លានពានរបស់ថៃឥតឈប់ឈរមកលើកម្ពុជា។

លោក ក៏បានបន្ថែមថា ការដាំដុះបន្លែនេះ គោលបំណងទី១ គឺដាំដើម្បីជួយផ្គត់ផ្គង់ទៅដល់ពលរដ្ឋភាសសឹកទាំងអស់ បូករួមផ្សំជាមួយនឹងអំណោយពីខាងក្រៅ ហើយការដាំដុះរួមគ្នានេះក៏បង្ហាញពីស្មារតីនៃការចូលរួមរបស់អ្នកភៀសសឹកក្នុងការចូលរួមដាំដុះបន្លែ៕

The post ARDB បន្តជំរុញការងារដាំដុះក្នុងផ្ទះសំណាញ់ ដើម្បីផ្គត់ផ្គង់បន្លែដល់ជនភៀសសឹក appeared first on Kampuchea Thmey Daily.

ប្រជាកសិកររស់នៅក្នុងឃុំកូនសត្វ កំពុងរីករាយក្នុងការប្រមូលផលបន្លែ ខណៈតម្លៃលើទីផ្សារបានល្អ

Sokhom Khon — Tue, 25 Nov 2025 01:11:40 +0000

ប្រជាកសិករដាំដំណាំបន្លែនៅឃុំកូនសត្វ ស្រុកទឹកឈូ ខេត្តកំពត កំពុងរីករាយក្នុងការប្រមូលផលបន្លែទាំងបន្លែស្លឹក និងបន្លែផ្លែ ខណៈតម្លៃលក់នៅលើទីផ្សារក៏បានល្អ។

មន្ត្រីជំនាញកសិកម្ម និងកសិករដាំដំណាំបន្លែនៅឃុំកូនសត្វ ស្រុកទឹកឈូ បញ្ជាក់ថា រយៈពេល៣ខែមកនេះ តម្រូវការបន្លែ និងតម្លៃទីផ្សារល្អ ដោយសារមានការគាំទ្រពីអាជ្ញាធរ មន្ត្រីជំនាញ ពិសេសអ្នកទទួលទានក្នុងការជួយលើកកម្ពស់តម្លៃផលិតផលក្នុងស្រុក ធ្វើឲ្យកសិករចំណេញបានច្រើន។

លោក ស្រូន សារឿន កសិករដាំបន្លែច្រើនជាងគេនៅឃុំកូនសត្វ បានបញ្ជាក់ថា រដូវរំហើយមានពិធីការ និងបុណ្យទានផ្សេងៗច្រើន ធ្វើតម្រូវការទីផ្សារច្រើន ហើយតម្លៃក៏ហក់ឡើងខ្ពស់ កសិករដាំបន្លែនៅឃុំកូនសត្វ កំពុងសប្បាយចិត្ត ក្នុងការប្រមូលផល។ កសិកររូបនោះក៏បានបញ្ជាក់ដែរថា ចម្ការរបស់លោកកំពុងត្រូវការជ្រើសរើសកម្មករមានបទពិសោធជាច្រើននាក់ ដើម្បីជួយការងារដាំបន្លែឲ្យបានកាន់តែច្រើន ដោយលោកផ្តល់កន្លែងស្នាក់ អាហារហូបចុក និងប្រាក់ខែចាប់ពី៣០០ដុល្លាឡើង។

លោក មុី ភារ៉ា មន្ត្រីបច្ចេកទេសកសិកម្មឃុំកូនសត្វ បានបញ្ជាក់ឱ្យដឹងនៅថ្ងៃទី២៤វិច្ឆិកាថា ដោយមានការយកចិត្តទុកដាក់ពីអាជ្ញាធរ ជាពិសេស លោក អ៊ឺម សោធន អភិបាលស្រុកទឹកឈូដែលតែងតែជំរុញឲ្យប្រជាកសិករឲ្យមានការដាំដុះ និងចិញ្ចឹមសត្វ និងជួយស្វះស្វែងលើកកម្ពស់ទីផ្សារផងនោះ ទើបធ្វើឲ្យប្រជាកសិករនៅទូទាំងស្រុកនាំគ្នាងាកមកដាំបន្លែលក់កាន់តែច្រើន ហើយដោយមានការចុះជាប់ជាប្រចាំពីមន្ត្រីកសិកម្មឃុំ ដើម្បីណែនាំបច្ចេកទេសផងធ្វើឱ្យការចំណាយលើការដាំដុះត្រូវបានកាត់បន្ថយ គុណភាពបន្លែកាន់តែល្អតម្រូវការលើទីផ្សារបានច្រើន និងបានតម្លៃខ្ពស់សមរម្យ ខណៈប្រជាពលរដ្ខភាគច្រើននាំគ្នាជួយគាំទ្រ និងលើកកម្ពស់ផលិតផលក្នុងស្រុកយើងផងដែ៕

អត្ថបទ៖ សឹង រ៉ាត់

The post ប្រជាកសិកររស់នៅក្នុងឃុំកូនសត្វ កំពុងរីករាយក្នុងការប្រមូលផលបន្លែ ខណៈតម្លៃលើទីផ្សារបានល្អ appeared first on Kampuchea Thmey Daily.

លោក ឈឹម វជិរា៖ ត្បិតលែងនាំចូលពីថៃ ក៏ផលិតកម្មក្នុងស្រុកនៅតែអាចផ្គត់ផ្គង់បានគ្រប់គ្រាន់

Din Thary — Tue, 05 Aug 2025 04:54:59 +0000

លោក ឈឹម វជិរា ប្រធានមន្ទីរកសិកម្មខេត្តបាត់ដំបង នៅព្រឹកថ្ងៃទី០៥ ខែសីហា ឆ្នាំ២០២៥ បានឱ្យ«កម្ពុជាថ្មី» ដឹងថា ពាក់ព័ន្ធនិងការផ្គត់ផ្គង់បន្លែនៅក្នុងស្រុកបើទោះបីជាបិទការនាំចូលពីប្រទេសថៃ ក៏ផលិតកម្មនៅក្នុងស្រុកនៅតែអាចផ្គត់ផ្គង់បានមិនមានបញ្ហាអ្វីនោះទេ ផ្ទុយទៅវិញកសិករមានតែសប្បាយចិត្ត ដោយពួកគេអាចដាំដុះ និងនាំយកទៅលក់នៅលើទីផ្សារបាន។

លោក ឈឹម វជិរា មានប្រសាសន៍ថា បច្ចុប្បន្នការផ្គត់ផ្គង់បន្លែនៅក្នុងខេត្តមិនអ្វីជាបញ្ហាប្រឈមឡើយ គឺអាចផ្គត់ផ្គង់បានគ្រប់គ្រាន់ទៅតាមតម្រូវការទីផ្សារ ព្រោះកន្លងមកបន្លែនៅក្នុងខេត្តបាត់ដំបងគឺនាំចូលពីប្រទេសថៃក្នុងចំនួនមួយដែលតិចតួចប៉ុណ្ណោះ ផ្ទុយទៅវិញបន្លែភាគច្រើនគឺនាំចូលមកពីប្រទេសចិន និងប្រទេសវៀតណាមនោះទេ។

លោកក៏បានបញ្ជាក់ដែរថា៖ «អ្វីដែលយើងត្រូវការ ដូចជាប្រភេទការ៉ុត ដំឡូងបារាំងដែលកសិករនៅក្នុងស្រុកពិបាកនៅក្នុងការដាំដុះ និងប្រភេទខ្ទឹមបារាំងដែលយើងដាំបានតិចតួច ប៉ុន្តែសម្រាប់បន្លែស្លឹក ដូចជាប្រភេទស្ពៃក្រញាញ់ ស្ពៃតឿ ខាត់ណា ឬក៏ស្ពៃក្តោមជាដើមនោះ បច្ចុប្បន្នយើងងាកមកប្រើប្រាស់ផលិតផលក្នុងស្រុកជំនួសវិញ»។

ស្របទៅនិងការបិទលែងនាំចូលពីថៃ ក្នុងនាមប្រធានមន្ទីរលោកមើលឃើញថា នេះជាឱកាសសម្រាប់កសិករនៅក្នុងស្រុកដែលមានផ្ទៃដីសមស្របក្នុងការបង្កើនផលិតកម្មនៅក្នុងការដាំដុះឱ្យបានច្រើនបន្ថែមទៀត សម្រាប់លក់នៅក្នុងស្រុក ក៏ដូចជាលក់ទៅតាមបណ្តាខេត្តផ្សេងៗ។

ជាពិសេស កសិករក៏អាចជ្រើសរើសមុខដំណាំណាដែលទីផ្សារកំពុងខ្វះខាត បូកផ្សំជាមួយតាមបណ្តាក្រុម ឬមួយក៏សហគមន៍ដែលបានចងក្រងកន្លងមក គឺអាចរៀបចំផែនការនៅក្នុងការដាំដុះ ដើម្បីបញ្ចៀសបានការកកស្ទះ។

ប៉ុន្តែសម្រាប់ម៉ោងនេះ លោកគិតថា មិនមានការកកស្ទះនោះទេ ដោយយើងអាចមានតម្រូវការបន្ថែម ព្រោះថា បន្លែដែលដាំដុះបាននៅក្នុងខេត្តបាត់ដំបងមិនមែនផលិតបានសម្រាប់តែប្រើប្រាស់ក្នុងខេត្តទេ គឺអាចនាំចេញទៅតាមបណ្តាខេត្តផ្សេងៗទៀត ហើយខេត្តផ្សេងៗដាំដុះបានក៏អាចនាំចូលមកកាន់ខេត្តបាត់ដំបងវិញបានដូចគ្នា៕

ដោយ៖ ឌិន ថារី

The post លោក ឈឹម វជិរា៖ ត្បិតលែងនាំចូលពីថៃ ក៏ផលិតកម្មក្នុងស្រុកនៅតែអាចផ្គត់ផ្គង់បានគ្រប់គ្រាន់ appeared first on Kampuchea Thmey Daily.

ប្រភេទបន្លែស្លឹក ចាល់លើផ្សារ ធ្លាក់ថ្លៃមកនៅត្រឹម ៨០០រៀល ក្នុងមួយគីឡូក្រាម

Din Thary — Tue, 15 Jul 2025 05:43:00 +0000

លោក ហ៊ុន វុត្ថា ប្រធានសហគមន៍កសិកម្មពន្លឺថ្មីពេជ្រចិន្តា ខេត្តបាត់ដំបង បានឱ្យដឹងថា ទាក់ទងទៅនិងការផ្គត់ផ្គង់បន្លែនាពេលបច្ចុប្បន្ននេះមិនមានការកើនឡើងនោះទេ មានតែថយចុះ ក្នុងនោះប្រភេទបន្លែស្លឹក ស្ពៃក្រញាញ់ ស្បៃតឿ លក់បានត្រឹមតម្លៃ ៨០០រៀលប៉ុណ្ណោះក្នុងមួយគីឡូក្រាម។

ប្រាប់«កម្ពុជាថ្មី» នៅព្រឹកថ្ងៃទី១៥ ខែកក្កដា ឆ្នាំ២០២៥ នេះ លោក ហ៊ុន វត្ថា បានលើកឡើងថា ការនាំចេញបន្លែទៅកាន់ទីផ្សាររបស់សហគមន៍នាពេលបច្ចុប្បន្ននេះ មិនមានការកើនឡើងទេ មានតែថយចុះ ដោយពីមុននៅក្នុងសហគមន៍អាចនាំចេញបន្លែចន្លោះពី ១ តោន កន្លះ ទៅ ២ តោនក្នុងមួយថ្ងៃ តែសព្វថ្ងៃធ្លាក់នៅត្រឹម ១ តោនប៉ុណ្ណោះក្នុងមួយថ្ងៃ។ ក្នុងនោះ ពពួកបន្លែស្លឹក ដូចជា ស្ពៃក្រញាញ់ ស្ពៃតឿ ជាដើម ចាល់នៅលើទីផ្សារ និងធ្លាក់ថ្លៃ ដែលធ្វើឱ្យកសិករក៏ពិបាកទទួលយក។

«តាមការសង្កេតមើល សព្វថ្ងៃនេះ នៅក្នុងផ្សារមួយបោះដុំបន្លៃធំៗមួយចំនួនក្នុងខេត្តបាត់ដំបង អាចដោយសារតែបន្លែនាំចូលបន្លែពីខាងកើតមកច្រើន ដូច្នេះធ្វើឱ្យប្រភេទបន្លែស្លឹកនៅក្នុងស្រុករបស់យើងមានការថយចុះ ម្យ៉ាងវិញទៀត ប្រភេទបន្លែស្លឹកនេះក៏មានការដាំដុះច្រើនទាំងក្នុងសហគមន៍ផ្ទាល់ និងនៅខាងក្រៅ ហើយមកទល់ពេលបច្ចុប្បន្នប្រជាកសិករក៏នៅមិនទាន់កាត់អស់ដែរ»។ លោក ហ៊ុន វត្ថា បន្ថែមបែបនេះ។

លោកវត្ថា បានអះអាង មកទល់ពេលបច្ចុប្បន្ននេះ បន្លែស្លឹកមានការធ្លាក់ថ្លៃ ដោយស្ពៃក្រញាញ់ ធ្លាក់មកនៅត្រឹម ៨០០ រៀលតែប៉ុណ្ណោះ ក្នុងមួយគីឡូក្រាម ហើយតម្លៃបែបនេះ សម្រាប់កសិករដាំក្នុងផ្ទះសំណាញ់ គឺមិនអាចរួចថ្លៃដើមផលិតនោះទេ ខុសប្លែកពីខែមិថុនា ស្ពៃក្រញាញ់ និងស្បៃតឿ មានតម្លៃខ្ពស់ដល់ ៣ ពាន់រៀលក្នុងមួយគីឡូក្រាម។

ទន្ទឹមនេះ លោក ក៏បានបញ្ជាក់ដែរថា តម្លៃលើទីផ្សារមានការធ្លាក់ចុះ និងចាល់លើទីផ្សារតែប្រភេទបន្លែប៉ុន្មានមុខប៉ុណ្ណោះ ក្នុងនោះប្រទេសផ្កាខាត់ណាសរ, ខាត់ណាព័រណ៍ខៀវ ឬស្បៃក្ដោបនោះ នៅតែមានតម្រូវការច្រើនដដែល។

យ៉ាងណាមិញដើម្បីដោះស្រាយបញ្ហានេះ ក្នុងនាមប្រធានសហគមន៍ លោកក៏បានឱ្យប្រជាកសិករត្រៀមក្នុងការដាំដុះនូវប្រភេទបន្លែមួយចំនួនដែលពីខាងក្រៅពិបាកនៅក្នុងការដាំដុះ ដើម្បីកុំឱ្យចាល់ទីផ្សារ និងខ្វះខាតនៅក្នុងការផ្គត់ផ្គង់។ ព្រោះប្រភេទបន្លែស្លឹកងាយស្រួលនៅក្នុងការដាំដុះ មិនសូវប្រឈមជំងឺច្រើន ងាយហុចផល ដែលពលរដ្ឋខាងក្រៅ និងសហគមន៍ផ្សេងទៀតក៏អាចដាំដុះបាន មិនដូចប្រភេទស្ពៃក្តោប ឬផ្សារស្ពៃ ពិបាកនៅក្នុងការថែទាំ។

សហគមន៍កសិកម្មពន្លឺថ្មីពេជ្រចិន្តា មានទីតាំងស្ថិតក្នុងភូមិ ភ្នំតូច ឃុំពេជ្រចិន្តា ស្រុកភ្នំព្រឹក ខេត្តបាត់ដំបង សព្វថ្ងៃ ធ្វើការនាំចេញបន្លែចម្រុះប្រមាណជាង ១០ មុខ ដែលមានដាំក្នុងសំណាញ់ ដូចជា ស្ពៃក្តោប ខាត់ណាដើម ផ្កាខាត់ណាស, ផ្កាខាត់ណាខៀវ ស្ពៃក្រញាញ់ ស្ពៃតឿ ជាដើម ក្នុងនោះសព្វថ្ងៃលក់លើទីផ្សារប្រមាណ ១ តោន ប៉ុណ្ណោះក្នុងមួយថ្ងៃ៕

The post ប្រភេទបន្លែស្លឹក ចាល់លើផ្សារ ធ្លាក់ថ្លៃមកនៅត្រឹម ៨០០រៀល ក្នុងមួយគីឡូក្រាម appeared first on Kampuchea Thmey Daily.

អ្នកនាំពាក្យ៖ កម្ពុជាមានសមត្ថភាពគ្រប់គ្រាន់ក្នុងការផ្គត់ផ្គង់បន្លែផ្លែឈើ ក្រោយបិទការនាំចូលពីថៃ

deth leng — Tue, 17 Jun 2025 08:41:28 +0000

លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ស្របពេលដែលមានការបិទការនាំចូលបន្លែផ្លែឈើពីប្រទេសថៃ កម្ពុជាមានសមត្ថភាពផលិតគ្រប់គ្រាន់ដើម្បីធានាដល់តម្រូវការសន្តិសុខស្បៀង ហើយរាល់ការនាំចូលបន្លែ ផ្លែឈើ និងធាតុចូលកសិកម្មដទៃទៀត សុទ្ធតែអាចជំនួសបានទាំងស្រុងដោយផលិតកម្មក្នុងស្រុក និងប្រភពនាំចូលដទៃទៀតបាន។

ក្រសួងកសិកម្ម បានត្រៀមលក្ខណៈរួចជាស្រេច ដើម្បីធានានិរន្តភាពនៃដំណើរការផលិតកម្មកសិកម្ម និងរក្សាឱ្យបាននូវស្ថិរភាពនៃខ្សែច្រវ៉ាក់ផ្គត់ផ្គង់នៅក្នុងប្រទេស។

កម្ពុជាបានសម្រេចបិទការនាំចូលបន្លែ ផ្លែឈើពីប្រទេសថៃ នៅថ្ងៃទី ១៧ ខែមិថុនា ឆ្នាំ ២០២៥ បន្ទាប់ពីយោធាថៃ បានបិទព្រំដែនជាឯកតោភាគី។

យោងតាមអគ្គនាយកដ្ឋានគយ និងរដ្ឋាករកម្ពុជា នៅក្នុងរយៈពេល ៥ ខែ (មករា-ឧសភា) ឆ្នាំ ២០២៥ ការដោះដូរទំនិញរវាងកម្ពុជា-ថៃ មានទំហំទឹកប្រាក់ជិត ១,៨៨ ពាន់លានដុល្លារ ខណៈកម្ពុជានាំចេញទៅថៃ ៣៩៦ លានដុល្លារ កើន ១,១% ចំណែកឯថៃនាំទំនិញចូលមកវិញ មានទំហំទឹកប្រាក់ ១,៤៨ ពាន់លានដុល្លារ កើនឡើង ១០,៤%។

កម្ពុជានាំចេញផលិតផលកសិម្មទៅប្រទេសថៃដូចជា ដំឡូងមី ពោត ម្រេច សណ្ដែក និងស្វាយ ខណៈថៃនាំមកវិញនូវសម្ភារៈសំណង់ គ្រឿងអេឡិកត្រូនិក គ្រឿងយន្តកសិកម្ម ភេសជ្ជៈ បន្លែ ផ្លែឈើ។

យោងក្រសួងពាណិជ្ជកម្ម នៅក្នុងឆ្នាំ ២០២៤ ពាណិជ្ជកម្មទ្វេភាគីកម្ពុជា-ថៃ សម្រេចបានជាង ៤,២៨ ពាន់លានដុល្លារ កើនឡើង ១៥,៥% ក្នុងនោះកម្ពុជានាំចេញទៅថៃបានជិត ៨៤៥ លានដុល្លារ ចំណែកថៃនាំចូលមកវិញ ៣,៤៤ ពាន់លានដុល្លារ កើន ១៨,៩ ភាគរយ៕

The post អ្នកនាំពាក្យ៖ កម្ពុជាមានសមត្ថភាពគ្រប់គ្រាន់ក្នុងការផ្គត់ផ្គង់បន្លែផ្លែឈើ ក្រោយបិទការនាំចូលពីថៃ appeared first on Kampuchea Thmey Daily.

បន្លែពីសហគមន៍កសិកម្មទំនើប នឹងដឹកមកលក់នៅភ្នំពេញ ៣ តោន ក្នុងមួយថ្ងៃឆាប់ៗនេះ

deth leng — Wed, 21 Aug 2024 03:09:01 +0000

លោក ឃឹម ហ្វីណង់ អ្នកនាំពាក្យក្រសួងកសិកម្មរុក្ខាប្រមាញ់ និងនេសាទ ប្រាប់កម្ពុជាថ្មីនៅថ្ងៃទី ២១ ខែសីហា ឆ្នាំ ២០២៤ នេះថា បន្លែចម្រុះរបស់កសិករនៅស្រុកត្រាំកក់ មាន៤ប្រភេទផ្សេងគ្នា ដែលផលិតក្រោមឆ័ត្រ «សហគមន៍កសិកម្មទំនើប» នឹងត្រូវដាក់លក់ចែកចាយ ផ្ទាល់នៅរាជធានីភ្នំពេញជារៀងរាល់ថ្ងៃក្នុងម្លៃ ២ ៥០០ រៀលក្នុងមួយគីឡូក្រាម ចាប់ពីដើមខែកញ្ញា ឆ្នាំ ២០២៤ ខាងមុខនេះ។

ក្រុមហ៊ុន Kerry Worldbridge Logistics សហការជាមួយសហគមន៍ ក្នុងការដឹកជញ្ជូនមកដល់រាជធានីភ្នំពេញ ហើយសម្រាប់អ្នកចង់ទិញអាចប្រាប់ទីតាំងនោះក្រុមហ៊ុននឹងដឹកដល់ទីតាំង។ ការផ្គត់ផ្គង់បន្លែចម្រុះនឹងចាប់ផ្ដើមនៅដើមខែកញ្ញា ខាងមុខនេះ ក្នុងទំហំប្រមាណ ៣ តោន ក្នុងមួយថ្ងៃ។

រាជរដ្ឋាភិបាលបានដាក់ចេញគោលនយោបាយការអភិវឌ្ឍសហគមន៍កសិកម្មទំនើប ក្នុងការអនុវត្តផលិតកម្មកសិកម្មរួមគ្នាក្នុងទ្រង់ទ្រាយធំនៅក្នុងវិស័យកសិកម្ម និងមានគោលបំណងប្រែក្លាយវិស័យកសិកម្មកម្ពុជាពីលក្ខណៈគ្រួសារឱ្យទៅជាសហគ្រាសសេដ្ឋកិច្ចកសិកម្មដ៏រឹងមាំ។

កម្មវិធីគោលនយោបាយនេះ ត្រូវបានរំពឹងទុកថា នឹងជួយលើកកម្ពស់កម្រិតជីវភាពប្រជាកសិករ ក៏ដូចជានឹងបង្កើនប្រសិទ្ធភាពផលិតកម្មប្រកបដោយភាតរបរិស្ថាន និងចីរភាព៕

អត្ថបទ៖ ឡេង ដេត

The post បន្លែពីសហគមន៍កសិកម្មទំនើប នឹងដឹកមកលក់នៅភ្នំពេញ ៣ តោន ក្នុងមួយថ្ងៃឆាប់ៗនេះ appeared first on Kampuchea Thmey Daily.

តាំងអោ បន្លែល្អចំពោះសុខភាព គួរញ៉ាំឲ្យបានញឹកញាប់

សាង ស្រីល័ក្ខ — Fri, 04 Mar 2022 08:45:19 +0000

តាំងអោជាបន្លែពណ៌បៃតងដែលងាយឆ្អិន ស្រួយ និងមានរសជាតិល្វីងតិចតួចលាយផ្អែមឡែមៗ ហើយថែមទាំងសម្បូរទៅដោយសារធាតុរ៉ែ និងវីតាមីនដែលផ្តល់អត្ថប្រយោជន៍ច្រើនដល់សុខភាពយើង។ តើតាំងអោជួយសុខភាពយើងបែបណាខ្លះ?

ការញុំាតាំងអោញឹកញាប់ជួយសុខភាពយើងដូចខាងក្រោម៖

១. ជួយសម្រកទម្ងន់

តាំងអោមានផ្ទុកអាស៊ីដ chlorogenic ដែលអាចពន្យឺតការបញ្ចេញជាតិគ្លុយកូសចូលក្នុងចរន្តឈាមបន្ទាប់ពីអាហារត្រូវបានបំប្លែង។ លើសពីនេះទៀតតាំងអោមានកាឡូរីទាប ដោយតាំងអោ ១០០ ក្រាមមានកាឡូរីតែ ២២ ប៉ុណ្ណោះ។

ម្យ៉ាងទៀត តាំងអោសម្បូរទៅដោយជាតិសរសៃ និងមានជាតិខ្លាញ់ទាបដែលជួយដល់ដំណើរការរំលាយអាហារ និងជួយឱ្យយើងស្រកទម្ងន់។

២. ប្រឆាំងរ៉ាឌីកាល់សេរី

បន្ថែមពីលើអត្ថប្រយោជន៍ជួយសម្រកទម្ងន់ អាស៊ីដ chlorogenic ដែលមាននៅក្នុងតាំងអោអាចជួយរាងកាយយើងប្រឆាំងនឹងអុកស៊ីតកម្ម។

តាំងអោកក៏ផ្ទុកទៅដោយសារធាតុប្រឆាំងអុកស៊ីតកម្មផ្សេងទៀតដូចជា flavonoids វីតាមីន និង carotenoids ។ សារធាតុប្រឆាំងអុកស៊ីតកម្ម ទាំងនេះអាចស្រូបយករ៉ាឌីកាល់សេរី និងម៉ូលេគុលបំផ្លាញសុខភាពផ្សេងទៀត ដែលពពួកម៉ូលេគុលទាំងនោះធ្វើឱ្យយើងមានជំងឺបេះដូង មានស្នាមជ្រួញ ចាស់មុនអាយុ កើតមហារីក និងមានជំងឺផ្សេងៗទៀតជាច្រើន។

៣. ជួយសុខភាពទូទៅ

ក្នុងតាំងអោ ១០០ ក្រាមមានផ្ទុកប៉ូតាស្យូម ២៧០ មិល្លីក្រាមដែលច្រើនជាងប៉ូតាស្យូមដែលមានក្នុងចេក ១០០ ក្រាមដល់ទៅ ៣០%។

ប៉ូតាស្យូមអាចជួយយើងប្រឆាំងនឹងជំងឺលើសសម្ពាធឈាម គ្រោះថ្នាក់សរសៃឈាមខួរក្បាល គ្រួសក្នុងតម្រងនោម ហើមពោះ ការឡើងខ្លាញ់នៅក្រោមស្បែក និងការពារការបាត់បង់កំហាប់ឆ្អឹង។

៤. កាត់បន្ថយហានិភ័យកើតមហារីកសួត

តាមការសិក្សាដែលបានបោះពុម្ពផ្សាយនៅក្នុង Asia-Pacific Journal of Clinical Nutrition ក្នុងឆ្នាំ ២០០៧ ដែលអង្កេតការផ្សារភ្ជាប់គ្នារវាងរបបអាហារដែលសម្បូរទៅដោយវីតាមីន A (ក្នុងទម្រង់ជា carotene) និងហានិភ័យនៃជំងឺមហារីកសួតក្នុងចំណោមអ្នកចូលរួមសិក្សាជនជាតិតៃវ៉ាន់បានឱ្យដឹងថា ការញុំាបន្លែដែលផ្ទុកទៅដោយវីតាមីន A ខ្ពស់អាចកាត់បន្ថយហានិភ័យកើតមហារីកសួត។

ក្នុងការសិក្សានោះបានឱ្យដឹងថា តាំងអោ និងដំឡូងជ្វាសម្បូរទៅដោយវីតាមីន A (ក្នុងទម្រង់ជា carotene) ខ្ពស់។

៥. ជំនួយឆ្អឹង និងធ្មេញ

ក្នុងតាំងអោ ១០០ ក្រាមមានផ្ទុកកាល់ស្យូម ១១៧ មិល្លីក្រាមដែលស្មើនឹង ១២% នៃតម្លៃកាល់ស្យូមសរុបប្រចាំថ្ងៃដែលបានណែនាំសម្រាប់មនុស្សពេញវ័យ។

កាល់ស្យូមជួយឱ្យឆ្អឹង និងធ្មេញយើងរឹងមាំ និងមានសុខភាពល្អ។ លើសពីនេះទៅទៀត កាល់ស្យូមក៏ជួយឱ្យយើងមានកម្លាំង និងជួយឱ្យសាច់ដុំកន្រ្តាក់ និងមានចលនាល្អ។

៦. ជួយបង្កើនគ្រាប់ឈាមក្រហម

ក្នុងតាំងអោ ១០០ ក្រាមមានផ្ទុកជាតិដែក ២,២៩ មិល្លីក្រាមដែលស្មើនឹង ១៣% នៃបរិមាណជាតិដែកសរុបប្រចាំថ្ងៃដែលត្រូវបានណែនាំសម្រាប់មនុស្សពេញវ័យ។

ជាតិដែកជួយបំប្លែងជាតិស្ករក្នុងឈាមទៅជាថាមពល ផលិតកោសិកាឈាមក្រហម ដឹកនាំអុកស៊ីសែនចែកចាយពេញរាងកាយ ផលិតអង់ស៊ីមដែលជួយដល់ការផលិតកោសិកាថ្មី អាស៊ីដអាមីណូ និងអ័រម៉ូន។ ម្យ៉ាងទៀត ជាតិដែកក៏ជួយយើងកាត់បន្ថយភាពនឿយហត់ និងអស់កម្លាំងដែរ៕

អត្ថបទផ្ដល់ដោយ៖ Hello Krupet

ចុចអាន៖ពិតទេ! ការទទួលទានចេក ក្នុងពេលពោះទទេ អាចបង្កគ្រោះថ្នាក់ដល់សុខភាព?

The post តាំងអោ បន្លែល្អចំពោះសុខភាព គួរញ៉ាំឲ្យបានញឹកញាប់ appeared first on Kampuchea Thmey Daily.

អ្នកជំនាញ៖ បន្លែស្លឹកប៉ុន្មានមុខនេះមានជាតិគីមីតិចតួចបំផុត

សាង ស្រីល័ក្ខ — Sat, 02 Oct 2021 01:02:00 +0000

ស្ត្រីមេផ្ទះហាក់ខ្លាចរអានឹងបន្លែផ្លែឈើដែលមានលក់នៅលើទីផ្សារ បច្ចុប្បន្នពិបាកនឹងរករបស់ធម្មជាតិខ្លាំងណាស់។ ងាកទៅបន្លែក៏មានគីមី ផ្លែឈើក៏គីមី ទិញមិនស្រួលប៉ះគីមីទាំងអស់ក៏ថាបាន ព្រោះបន្លែផ្លែឈើដែលមានជាតិគីមីពិបាកសម្គាល់ដោយភ្នែកទទេ ឯមួយចំនួននាំចូលពីប្រទេសជិតខាងទៀត។

ខណៈពលរដ្ឋ ពិសេសស្រ្តីមេផ្ទះយើងជួបការលំបាកក្នុងការសម្គាល់បន្លែផ្លែឈើដែលមានគីមី ឬអត់នោះ អ្នកជំនាញខាងវិទ្យាសាស្រ្តកសិកម្ម ដែលមានបទពិសោធជាច្រើនឆ្នាំលើគម្រោងកសិកម្មជាមួយអង្គការក្រៅរដ្ឋាភិបាល លោក ភុន រតនា បានប្រាប់ពីប្រភេទបន្លែស្លឹកមួយចំនួនដែលមិនមាន ឬមានគីមីតិចតួចបំផុត។ បន្លែបៃតងទាំងនោះ រួមមាន៖

សាលាដ៖ ជាតិជ័រក្នុងសាលាដ អាចបង្ការពីសត្វល្អិតស៊ី ដូច្នេះហើយកសិករក៏មិនសូវប្រើថ្នាំគីមីប៉ុន្មានដែរ។

ត្រកួនចិន៖ ដូចគ្នានឹងសាលាដ៍ដែរ ត្រកួនជាពពួកបន្លែងាយដាំ និងថែទាំ មិនចាំបាច់ប្រើថ្នាំបង្ការសត្វល្អិត ក៏អាចទទួលបានផលដែរ។

ស្លឹកបាស់ ស្លឹកម្រុំ៖ កម្រមានកសិករបាញ់ថ្នាំកម្ចាត់សត្វល្អិតការពារបន្លែវល្លិ និងស្លឹកទាំង ២ មុខនេះណាស់ លើកលែងតែចម្ការធំៗប៉ុណ្ណោះ។

តាមការបញ្ជាក់របស់លោក ភុន រតនា បន្លែស្លឹកប្រឈមនឹងការបំផ្លាញពីសត្វល្អិតជាងគេ ពិសេសនៅរដូវភ្លៀងធ្លាក់ និងរដូវក្តៅ ម្ល៉ោះហើយកសិករចាំបាច់ត្រូវតែបាញ់ថ្នាំសម្លាប់សត្វល្អិតការពារ ទើបបន្លែនោះបានផល។ ប្រសិនបើកសិករធ្វើបានត្រឹមត្រូវតាមអាយុកាលរបស់ថ្នាំសម្លាប់សត្វល្អិត រួចទើបប្រមូលផលនោះមិនមានផលប៉ះពាល់ដល់សុខភាពអ្នកញ៉ាំទេ តែសំណួរសួរថា តើមានប៉ុន្មាននាក់ខ្វល់ពីបញ្ហានេះ?

អត្ថបទផ្ដល់ដោយ៖ Hello Krupet

ចុចអាន៖ហូបបែបនេះឲ្យទៀង ដឹងតែមិនងាយឈឺ

ចុចអាន៖ឃើញអាហារចង់តែហូបច្រើន មិនរើសពេល តើគួរដោះស្រាយបែបណា?

The post អ្នកជំនាញ៖ បន្លែស្លឹកប៉ុន្មានមុខនេះមានជាតិគីមីតិចតួចបំផុត appeared first on Kampuchea Thmey Daily.