ព័ត៌មានជាតិ

លោក ឈឹម វជិរា៖ ត្បិតលែងនាំចូលពីថៃ ក៏ផលិតកម្មក្នុងស្រុកនៅតែអាចផ្គត់ផ្គង់បានគ្រប់គ្រាន់

បានផុស

១២ ខែ មុន

នៅ

ថ្ងៃអង្គារ ៥ សីហា ២០២៥

ដោយ

លោក ឈឹម វជិរា ប្រធានមន្ទីរកសិកម្មខេត្តបាត់ដំបង នៅព្រឹកថ្ងៃទី០៥ ខែសីហា ឆ្នាំ២០២៥ បានឱ្យ«កម្ពុជាថ្មី» ដឹងថា ពាក់ព័ន្ធនិងការផ្គត់ផ្គង់បន្លែនៅក្នុងស្រុកបើទោះបីជាបិទការនាំចូលពីប្រទេសថៃ ក៏ផលិតកម្មនៅក្នុងស្រុកនៅតែអាចផ្គត់ផ្គង់បានមិនមានបញ្ហាអ្វីនោះទេ ផ្ទុយទៅវិញកសិករមានតែសប្បាយចិត្ត ដោយពួកគេអាចដាំដុះ និងនាំយកទៅលក់នៅលើទីផ្សារបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឈឹម វជិរា មានប្រសាសន៍ថា បច្ចុប្បន្នការផ្គត់ផ្គង់បន្លែនៅក្នុងខេត្តមិនអ្វីជាបញ្ហាប្រឈមឡើយ គឺអាចផ្គត់ផ្គង់បានគ្រប់គ្រាន់ទៅតាមតម្រូវការទីផ្សារ ព្រោះកន្លងមកបន្លែនៅក្នុងខេត្តបាត់ដំបងគឺនាំចូលពីប្រទេសថៃក្នុងចំនួនមួយដែលតិចតួចប៉ុណ្ណោះ ផ្ទុយទៅវិញបន្លែភាគច្រើនគឺនាំចូលមកពីប្រទេសចិន និងប្រទេសវៀតណាមនោះទេ។

លោកក៏បានបញ្ជាក់ដែរថា៖ «អ្វីដែលយើងត្រូវការ ដូចជាប្រភេទការ៉ុត ដំឡូងបារាំងដែលកសិករនៅក្នុងស្រុកពិបាកនៅក្នុងការដាំដុះ និងប្រភេទខ្ទឹមបារាំងដែលយើងដាំបានតិចតួច ប៉ុន្តែសម្រាប់បន្លែស្លឹក ដូចជាប្រភេទស្ពៃក្រញាញ់ ស្ពៃតឿ ខាត់ណា ឬក៏ស្ពៃក្តោមជាដើមនោះ បច្ចុប្បន្នយើងងាកមកប្រើប្រាស់ផលិតផលក្នុងស្រុកជំនួសវិញ»។

ស្របទៅនិងការបិទលែងនាំចូលពីថៃ ក្នុងនាមប្រធានមន្ទីរលោកមើលឃើញថា នេះជាឱកាសសម្រាប់កសិករនៅក្នុងស្រុកដែលមានផ្ទៃដីសមស្របក្នុងការបង្កើនផលិតកម្មនៅក្នុងការដាំដុះឱ្យបានច្រើនបន្ថែមទៀត សម្រាប់លក់នៅក្នុងស្រុក ក៏ដូចជាលក់ទៅតាមបណ្តាខេត្តផ្សេងៗ។

ជាពិសេស កសិករក៏អាចជ្រើសរើសមុខដំណាំណាដែលទីផ្សារកំពុងខ្វះខាត បូកផ្សំជាមួយតាមបណ្តាក្រុម ឬមួយក៏សហគមន៍ដែលបានចងក្រងកន្លងមក គឺអាចរៀបចំផែនការនៅក្នុងការដាំដុះ ដើម្បីបញ្ចៀសបានការកកស្ទះ។

ប៉ុន្តែសម្រាប់ម៉ោងនេះ លោកគិតថា មិនមានការកកស្ទះនោះទេ ដោយយើងអាចមានតម្រូវការបន្ថែម ព្រោះថា បន្លែដែលដាំដុះបាននៅក្នុងខេត្តបាត់ដំបងមិនមែនផលិតបានសម្រាប់តែប្រើប្រាស់ក្នុងខេត្តទេ គឺអាចនាំចេញទៅតាមបណ្តាខេត្តផ្សេងៗទៀត ហើយខេត្តផ្សេងៗដាំដុះបានក៏អាចនាំចូលមកកាន់ខេត្តបាត់ដំបងវិញបានដូចគ្នា៕

ដោយ៖ ឌិន ថារី