បាល់ទាត់ Futsal Archives - Kampuchea Thmey Daily

ក្រុមបាល់ទាត់ Wild Cats ក្លាយជាជើងឯក CamEd Women’s Futsal 2025

Sina Noun — Tue, 03 Jun 2025 09:11:50 +0000

ក្រោយចំណាយពេលប្រហែលមួយខែមកនេះពានរង្វាន់បាល់ទាត់ក្នុងសាល CamEd Women’s Futsal Tournament 2025 រកឃើញម្ចាស់ជើងឯកហើយគឺលើក្រុម Wild Cats បន្ទាប់ពីយកឈ្នះវគ្គផ្ដាច់ព្រ័ត្រលើក្រុម Xiongmei FT។

ទិដ្ឋភាពប្រកួតវគ្គផ្ដាច់ព្រ័ត្រ

តំណាងក្រុម Wild Cats និស្សិត ឃុន ចន្ទរ៉ូសិកា បានឲ្យដឹងថា ពិតជារីករាយដែលបានចូលរួមប្រកួតពានរង្វាន់Futsal តាំងពីប្រកួតដំបូងរហូតវគ្គផ្ដាច់ព្រ័ត្រនេះ។ ចំណុចដែលខ្លួនចាប់អារម្មណ៍ការលេងពានមួយនេះគឺការយល់ចិត្ត និងភាពសហការគ្នាបើទោះជាសមាជិកក្រុមខ្លះមិនដែលបានលេងកីឡានោះក៏ដោយ ប៉ុន្តែពួកគេខំប្រឹងព្យាយាមរហូតអាចឈ្នះពាន។

ទិដ្ឋភាពបញ្ចប់ការប្រកួត

ចំណែកសមាជិកក្រុមផ្សេងទៀតលើកឡើងដែរថា ការប្រកួតពានរង្វាន់មួយនេះបានធ្វើឲ្យរូបគេបានជម្នះចំពោះខ្លួនឯងផង និងជាមួយអ្នកដទៃផង។ លើសពីនេះបានបង្កើនមិត្តភាព និងស្គាល់មិត្តភ័ក្ដិថ្មីៗដែលរៀននៅសាលាជាមួយគ្នាថែមទៀត។

ក្រុម Wild Cats

បញ្ជាក់ដែរថា ពានរង្វាន់ CamEd Women’s Futsal Tournament 2025 ផ្នែកនារីដែលរៀបចំឡើងដោយវិទ្យាស្ថានខេមអេដ បានបិទបញ្ចប់ហើយកាលពីល្ងាចថ្ងៃទី១ ខែមិថុនា ឆ្នាំ២០២៥ នៅសាលមជ្ឈមណ្ឌលហ្វឹកហ្វឺនកីឡានៃពហុកីឡដ្ឋានជាតិ។ ក្រុមឈ្នះជើងឯកបានទៅលើ Wild Cats ចំណាត់ថ្នាក់លេខ២ បានលើក្រុម Xiongmei FT លេខ៣ បានលើក្រុម Powerpuff Girls និងលេខ៤ បានលើក្រុម Supernova៕

ទិដ្ឋភាពបញ្ចប់ការប្រកួត

អត្ថបទដោយ៖ នួន ស៊ីណា

The post ក្រុមបាល់ទាត់ Wild Cats ក្លាយជាជើងឯក CamEd Women’s Futsal 2025 appeared first on Kampuchea Thmey Daily.

ក្រុមបាល់ទាត់កម្ពុជាខកចិត្តក្នុងព្រឹត្តិការណ៍អន្តរជាតិចំនួន៥ឆ្នាំ២០២៣

Pha Rothana — Sat, 21 Oct 2023 01:51:09 +0000

ក្រុមបាល់ទាត់កម្ពុជាជម្រើសជាតិទទួលបានលទ្ធផលមិនល្អប្រសើរទេសម្រាប់ការប្រកួតប្រជែងក្នុងឆ្នាំ២០២៣ ក្រោយពីក្រុមធំបានធ្លាក់ក្នុងវគ្គជម្រុះដំបូង ជើងឯកពិភពលោកឆ្នាំ២០២៦ ហើយទាំងក្រុម U23 និងក្រុមហ្វូតសាល ក៏សុទ្ធតែធ្វើមិនបានល្អ។

ក្រុមហ្វូតសាលកម្ពុជា

ពានរង្វាន់ AFC Futsal Asian Cup ត្រូវបានបង្កើតឡើងតាំងពីឆ្នាំ១៩៩៩ ដែលរហូតដល់ពេលនេះ១៧លើកហើយ។ ក្រុមហ្វូតសាលកម្ពុជាចូលរួម៦លើក។ កំណត់ត្រាល្អបំផុតរបស់ក្រុមហ្វូតសាលកម្ពុជាគឺឆ្លងផុតចូលទៅវគ្គចែកពូលក្នុងពានរង្វាន់ AFC Futsal Asian Cup កាលពីឆ្នាំ២០០៤។ ចាប់តាំងពីឆ្នាំ២០០៤ ក្រុមហ្វូតសាលកម្ពុជានៅតែមិនអាចឆ្លងផុតវគ្កជម្រុះដំបូងឡើយ។ ដោយឡែកក្នុងពានង្វាន់ AFC Futsal Asian Cup ឆ្នាំ២០២៤ ក្រុមហ្វូតសាលកម្ពុជាក៏បន្តធ្លាក់ក្នុងវគ្គជម្រុះដំបូង ក្រោយឆ្លងកាត់៣ប្រកួត។

ក្រុមបាល់ទាត់ជម្រើសជាតិកម្ពុជាជម្រុះជើងឯកពិភពលោក

ក្រុមបាល់ទាត់ជម្រើសជាតិបាល់ទាត់កម្ពុជា បានធ្វើឲ្យអ្នកគាំទ្រខកចិត្តយ៉ាងខ្លាំង បន្ទាប់ពីធ្លាក់ត្រឹមវគ្គជម្រុះបឋមក្នុងពានរង្វាន់ពិភពលោក ឆ្នាំ២០២៦ (FIFA World Cup 2026) ក្រោយចាញ់ក្រុមជម្រើសជាតិប៉ាគីស្ថាន ក្នុងការប្រកួតជើងទី២ ដោយលទ្ធផល ០-១ នៅទឹកដីប៉ាគីស្ថាន។ បរាជ័យវគ្គជម្រុះបឋមនេះជាលើកដំបូងគិតចាប់តាំងពីឆ្នាំ២០១៥ ខណៈកម្ពុជាធ្លាប់បានឡើងជុំទី២ពីរលើកជាប់គ្នាគឺជម្រុះជើងឯកពិភពលោកឆ្នាំ០១៨ និង២០២២។

U23 កម្ពុជា ក្នុងកីឡាស៊ីហ្គេម លើកទី៣២ ឆ្នាំ២០២៣

ក្នុងនាមជាម្ចាស់ផ្ទះ ក្រុមបាល់ទាត់ជម្រើសជាតិកម្ពុជាអាយុក្រោម២៣ឆ្នាំបានធ្លាក់ត្រឹមវគ្គសន្សំពិន្ទុក្នុងពូលនៃព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣។ កម្ពុជាស្ថិតនៅពូល A រកបាន៤ពិន្ទុពីការឈ្នះទីម័រខាងកើត ៤-០, ស្មើហ្វីលីពីន ១-១, ចាញ់ឥណ្ឌូណេស៊ី ១-២ និងចាញ់មីយ៉ាន់ម៉ា ០-១។

U23 កម្ពុជា ក្នុងពានរង្វាន់ AFF U23 Championship 2023

ក្នុងពានរង្វាន់ AFF U23 Championship នៅប្រទេសថៃ ក្រុមយុវជនកម្ពុជាធ្វើមិនបានល្អដែរ ដោយធ្លាក់ត្រឹមវគ្គជម្រុះក្នុងពូល។ ក្រុមកម្ពុជាស្ថិតក្នុងពូលA រួមមានក្រុមម្ចាស់ផ្ទះថៃ មីយ៉ាន់ម៉ា និង ប្រុយណេ។ ឆ្លងកាត់ការប្រកួត៣លើកកម្ពុជា ឈ្នះ១ ស្មើ១ និងចាញ់១ មាន៤ពិន្ទុឈរលេខ២ក្នុងពូល។

U23 កម្ពុជា ក្នុងវគ្គជម្រុះ AFC U23 Asian Cup 2024

ពានរង្វាន់ AFC U-23 Asian Cup 2024 វគ្គជម្រុះ ក្រុមយុវជនកម្ពុជាធ្វើមិនបានល្អទៀត ក្រោយធ្លាក់ត្រឹមវគ្គជម្រុះក្នុងពូល។ ក្រុមកម្ពុជាស្ថិតក្នុងពូលJ ជាមួយម្ចាស់ផ្ទះ អារ៉ាប៊ីសាអ៊ូឌីត, លីបង់ និងម៉ុងហ្គោលី។ ក្រោយឆ្លងកាត់ការប្រកួត៣លើក កម្ពុជា ឈ្នះ១ ស្មើ១ និងចាញ់១ មាន៤ពិន្ទុ ឈរលេខ២ក្នុងពូល៕

អត្ថបទ៖ ផា រតនា

The post ក្រុមបាល់ទាត់កម្ពុជាខកចិត្តក្នុងព្រឹត្តិការណ៍អន្តរជាតិចំនួន៥ឆ្នាំ២០២៣ appeared first on Kampuchea Thmey Daily.

ល្ងាចនេះក្រុមហ្វូតសាលកម្ពុជាប៉ះក្រុមខ្លាំងអ៊ីរ៉ាក់ ក្នុងពាន AFC Futsal Cup 2024

Pha Rothana — Mon, 09 Oct 2023 03:42:15 +0000

ក្រុមបាល់ទាត់ហ្វូតសាលកម្ពុជាត្រូវប៉ះអ៉ីរ៉ាក់ ក្នុងព្រឹត្តិការណ៏ពានរង្វាន់ AFC Futsal Asian Cup 2024 វេលាម៉ោង៥ល្ងាច ថ្ងៃទី៩ ខែតុលា ឆ្នាំ២០២៣។

នេះជាការប្រកួតលើកទី២ក្នុងពូល G របស់ក្រុមកម្ពុជា ក្រោយការប្រកួតទី១ចាញ់អ៊ូបេគីស្ថាន ដោយលទ្ធផល ៦-១។ ស្របពេល អ៉ីរ៉ាក់ បានយកឈ្នះលើក្រុមអាស៊ាន ម៉ាឡេស៊ី ដោយលទ្ធផល ២-១។ ការប្រកួតជាមួយគ្នានេះ អ៊ូបេគីស្ថាន ប៉៉ះ ម៉ាឡេស៊ី។

ក្នុងព្រឹត្តិការណ៍ហ្វូតសាលអាស៊ីនេះ កាលពីឆ្នាំ២០០៤ ក្រុមកម្ពុជាបានបង្ហាញខ្លួននៅវគ្គសន្សំពិន្ទុក្នុងពូលជាលើកដំបូង ដោយឆ្លងកាត់ការប្រកួត៤លើក ឈ្នះ១ និងចាញ់៣។

អ៉ីរ៉ាក់នឹងកាន់តែធ្វើឲ្យកម្ពុជាធ្វើការងារធ្ងន់ ដោយសារពួកគេមានបទពិសោធច្រើនក្នុងការប្រកួត AFC Futsal Asian Cup។ កំណត់ត្រាល្អបំផុតកាលពីឆ្នាំ២០១៨ អ៉ីរ៉ាក់ ទទួលចំណាត់ថ្នាក់លេង៤ ក្រោយចាញ់អ៊ូបេគីស្ថានក្នុងបាល់ពិន័យ១១ម៉ែត្រដោយលទ្ធផល ១-២ ក្រោយស្មើគ្នា ៤-៤។

តារាងពិន្ទុក្នុងពូល G

-អ៊ូបេគីស្ថាន ឈរលេខ១ មាន៣ពិន្ទុ

-អ៉ីរ៉ាក់ ឈរលេខ២ មាន៣ពិន្ទុ

-ម៉ាឡេស៊ី ឈរលេខ៣ មាន០ពិន្ទុ

-កម្ពុជា ឈរលេខ៤ មាន០ពិន្ទុ

អត្ថបទ៖ ផា រតនា

The post ល្ងាចនេះក្រុមហ្វូតសាលកម្ពុជាប៉ះក្រុមខ្លាំងអ៊ីរ៉ាក់ ក្នុងពាន AFC Futsal Cup 2024 appeared first on Kampuchea Thmey Daily.

ដោនថោន វាយបកយកឈ្នះក្រុមព្រុយណេ បន្ទាប់ពីត្រូវបានគេនាំមុខមុនដល់ទៅ ២ដង

Kang Tola — Mon, 05 Sep 2022 12:48:36 +0000

ក្រុមតំណាងកម្ពុជា ដោនថោនស្ពត បានទទួលជ័យជម្នះប្រកួតដំបូងប្រចាំពូល A លើក្រុមរបស់ព្រុយណេ ក្នុងពានរង្វាន់ក្លិបបាល់ទាត់ហ្វូតសាលអាស៊ាន (AFF Futsal Cup 2022) ដែលធ្វើឡើងនៅថ្ងៃទី០៥ ខែកញ្ញា នៅប្រទេសថៃ។

ដោនថោន បានយកឈ្នះលើកក្រុមរបស់ព្រុយណេ Pewira FC ដោយលទ្ធផល ៤-៨។ ខណៈក្នុងការប្រកួត ដោនថោន ត្រូវបានក្រុម Pewira FC នាំមុខមុនជារឿយៗ ដល់ទៅ២ដង ពោលគឺនៅនាទី១១ Pewira FC ទាត់ចូលមុនរួចក៏ដោនថោន តាមស្មើនៅនាទី១៨ ខណៈនៅនាទី១៩ ដោនថោន ទាត់នាំមុខ ប៉ុន្តែនៅនាទី២០ Pewira FC តាមស្មើវិញម្ដង រួចក៏នាំមុខជាថ្មីនៅនាទី២១ ប៉ុន្តែយ៉ាងណាមិញនៅនាទី២២ ដោនថោន ក៏តាមបានស្មើជាថ្មី ៣-៣។

ចូលដល់នាទីផ្សេងពីនេះដោនថោន ចាប់ផ្ដើមរកគ្រាប់បាល់បន្ថែមគ្រាប់ទី៤ នៅនាទី២៧ រួចថែមគ្រាប់ទី៥ នៅនាទី២៩ គ្រាប់ទី៦ នៅនាទី៣០ មុនពេលដែលក្រុម Pewira FC តាមពីក្រោយបានគ្រាប់ទី៤ របស់គេនៅនាទី៣៥ ខណៈ ២គ្រាប់ចុងក្រោយដោនថោន រកបានក្នុងនាទីជាមួយគ្នា ៤០ទាំងពីរគ្រាប់ ដើម្បីរក្សាលទ្ធផល ៤-៨ ដល់ចប់ការប្រកួតជាផ្លូវការ។

ជ័យជម្នះនេះធ្វើឱ្យដោនថោន ឡើងមកឈរលេខ៣ ក្នុងតារាង មាន ៣ពិន្ទុ ខណៈប្រកួតបន្ទាប់ និងជាប្រកួតចុងក្រោយរបស់ ដោនថោនស្ពត គឺត្រូវជួបក្រុមម្ចាស់ផ្ទះថៃ Hongyen Thakam នៅថ្ងៃទី០៦ សីហា ស្អែកនេះ នាវេលាម៉ោង ៥:០០នាទីល្ងាច៕

អត្ថបទ ៖ មន្នីរ័ត្ន

The post ដោនថោន វាយបកយកឈ្នះក្រុមព្រុយណេ បន្ទាប់ពីត្រូវបានគេនាំមុខមុនដល់ទៅ ២ដង appeared first on Kampuchea Thmey Daily.

ដោនថោន បង្ហាញមុខកីឡាករ ១៦ នាក់ ត្រៀមចេញទៅប្រកួតពានក្លិបបាល់ទាត់ហ្វូតសាលអាស៊ាន នៅថៃ

Sorn Phanith — Thu, 01 Sep 2022 06:08:50 +0000

ក្រុមម្ចាស់ជើងឯកពានរង្វាន់បាល់ទាត់ក្នុងសាលថ្នាក់ជាតិ ឆ្នាំ ២០២១ (Tiger 2021) ដោនថោនស្បត (Down Town Sport) បានបង្ហាញមុខកីឡាករ ១៦ នាក់ ត្រៀមតំណាងកម្ពុជា ប្រកួតពានក្លិបបាល់ទាត់ហ្វូតសាលអាស៊ាន (AFF Futsal Cup 2022) នៅថៃ។

ក្រុមនេះក៏ស្ថិតនៅក្រោមការដឹកនាំរបស់ លោក ចេត ច័ន្ទរចនា ដែលគ្រូបង្វឹកក្រុមជម្រើសជាតិហ្វូតសាលកម្ពុជា ខណៈសមាសភាពកីឡាករ ក៏មាន ៥ នាក់ ជាសមាជិកនៃក្រុមជម្រើសជាតិផងដែរ រួមមាន សារ៉ាយ ដានិទ្ធ, ព្រំ ឌីយ៉ាម៉ង់, រស់ ស៊ីចំរើន, តុង ច័ន្ទមុន្នី និង កែវ សុចិត្រា។

ក្រុមតំណាងកម្ពុជា ដោនថោនស្បត (Down Town Sport) ស្ថិតនៅពូល A ជាមួយម្ចាស់ផ្ទះថៃ Hongyen Thakam, Bintang Timur Surabaya របស់ឥណ្ឌូនេស៊ី និង MS ABDB របស់ព្រុយណេ នៃពានក្លិបបាល់ទាត់ហ្វូតសាលអាស៊ាន ឆ្នាំ ២០២២ (AFF Futsal Cup 2022) នៅថៃ ដែលនឹងចាប់ផ្ដើមពីថ្ងៃទី ០៤ ដល់ថ្ងៃទី ១០ ខែកញ្ញា ឆ្នាំ ២០២២ នៅខេត្តនគររាជសីមា។

គួររំលឹកថា ដោនថោនស្បត ធ្លាប់តំណាងកម្ពុជា ទៅចូលរួមពានរង្វាន់ដដែលខាងលើកាលពីឆ្នាំ ២០១៩ ពេលនោះបញ្ចប់ទៅដោយឈរនៅលេខ ៤ ដែលជាកំណត់ត្រាល្អបំផុតមិនធ្លាប់មានសម្រាប់បាល់ទាត់ក្លិបហ្វូតសាលកម្ពុជា បានឡើងដល់វគ្គពាក់កណ្ដាលផ្ដាច់ព្រ័ត្រ ចាប់តាំងពីចូលរួមលើកដំបូង នៅឆ្នាំ ២០១៨ (កាលនោះ ក្លិបកំចាយមារ តំណាងកម្ពុជា)៕

អត្ថបទ៖ មន្នីរ័ត្ន

The post ដោនថោន បង្ហាញមុខកីឡាករ ១៦ នាក់ ត្រៀមចេញទៅប្រកួតពានក្លិបបាល់ទាត់ហ្វូតសាលអាស៊ាន នៅថៃ appeared first on Kampuchea Thmey Daily.

ក្លិបតំណាងកម្ពុជា កំពុងត្រៀមខ្លួនប្រកួតពានក្លិបបាល់ទាត់ហ្វូតសាលអាស៊ាន នៅថៃ

Sophal Tuon — Sun, 21 Aug 2022 04:54:35 +0000

ក្រុមម្ចាស់ជើងឯកពានរង្វាន់បាល់ទាត់ក្នុងសាលថ្នាក់ជាតិ ឆ្នាំ២០២១ (Tiger 2021) ដែលឈ្មោះដើម ឌឺប្លូរវើរីស (The Blue Warriors) ក្រោមមកបានប្រកាសផ្លាស់ប្តូរឈ្មោះជាផ្លូវការទៅជា ដោនថោនស្បត (Down Town Sport) វិញនោះ នឹងត្រៀមតំណាងកម្ពុជា ប្រកួតពានក្លិបបាល់ទាត់ហ្វូតសាលអាស៊ាន (AFF Futsal Cup 2022) នៅថៃ។

ពានរង្វាន់នេះ គ្រោងនឹងចាប់ផ្ដើមនៅខែកញ្ញា ពីថ្ងៃទី០៤ ដល់ថ្ងៃទី១០ ខែកញ្ញា ឆ្នាំ២០២២ នៅខេត្តនគររាជសីមា ដោយមានក្រុមចំនួន ៧ចូលរួម។

ក្រុមទាំង៧នោះរួមមាន Hongyen Thakam របស់ថៃ, Sahako FC របស់វៀតណាម, Mac Selangor របស់ម៉ាឡេស៊ី, MS ABDB របស់ព្រុយណេ, Bintang Timur Surabaya របស់ឥណ្ឌូនេស៊ី និង Ramelau FC របស់ទីម័រខាងកើត។ ដោយឡែកក្រុមរបស់ប្រទេសមីយ៉ាន់ម៉ា, ឡាវ, សិង្ហបុរី និងហ្វីលីពីន មិនមានតំណាងចូលរួមឡើយ។

គួររំលឹកថា ដោនថោនស្បត ធ្លាប់តំណាងកម្ពុជា ទៅចូលរួមពានរង្វាន់ដដែលខាងលើកាលពីឆ្នាំ២០១៩ ពេលនោះបញ្ចប់ទៅដោយឈរនៅលេខ៤ ដែលជាកំណត់ត្រាល្អបំផុតមិនធ្លាប់មានសម្រាប់បាល់ទាត់ក្លិបហ្វូតសាលកម្ពុជា បានឡើងដល់វគ្គពាក់កណ្ដាលផ្ដាច់ព្រ័ត្រ ចាប់តាំងពីចូលរួមលើកដំបូង នៅឆ្នាំ២០១៨ (កាលនោះ ក្លិបកំចាយមារ តំណាងកម្ពុជា)។

ដោនថោន ពេលនោះស្ថិតនៅពូល B ជាមួយ MIU របស់មីយ៉ាន់ម៉ា និង Melaka United របស់ម៉ាឡេស៊ី ជាលទ្ធផលប្រកួតដំបូងបានឈ្នះ Melaka United ៥-៤ ប្រកួតទី២ បានចាញ់ MIU ៩-៣ តែក៏នៅបានកៅអីឡើងវគ្គពាក់កណ្ដាលផ្ដាច់ព្រ័ត្រជួប PTT Chonburi Bluewave របស់ថៃ ប៉ុន្តែចាញ់ធ្ងន់ដៃ ១៧-០ រួចក៏ត្រូវប្រកួតដណ្ដើមចំណាត់ថ្នាក់លេខ៣ ជួប MIU ជាថ្មី បន្តចាញ់ ៩-៥ បានត្រឹមចំណាត់ថ្នាក់លេខ៤ ក្នុងពានរង្វាន់។

សូមបញ្ជាក់ថា ក្រុមចុងក្រោយដែលតំណាងកម្ពុជា ក្នុងពាននេះ គឺក្រុមមហាហង្ស ប្រកួតក្នុងឆ្នាំ២០២១ ក្រោយវិបត្តកូវីដ-១៩ បានធូរស្រាល៕ អត្ថបទ៖ មន្នីរ័ត្ន

The post ក្លិបតំណាងកម្ពុជា កំពុងត្រៀមខ្លួនប្រកួតពានក្លិបបាល់ទាត់ហ្វូតសាលអាស៊ាន នៅថៃ appeared first on Kampuchea Thmey Daily.

ពានរង្វាន់ហ្វូតសាល ជិតរកឃើញក្រុមតំណាងកម្ពុជា ទៅប្រកួតពានក្លិបហ្វូតសាលអាស៊ាន នៅថៃ

Kang Tola — Mon, 30 May 2022 15:46:52 +0000

ពានរង្វាន់បាល់ទាត់ក្នុងសាលកម្ពុជា ឆ្នាំ២០២១ បានបញ្ចប់ការប្រកួតដំណាក់កាលទី២ ជាផ្លូវការហើយ កាលពីចុងសប្ដាហ៍កន្លងទៅ ខណៈការប្រកួតដំណាក់កាលទី៣ ក៏ជិតចាប់ផ្ដើមដូចគ្នា។

ការប្រកួតក្នុងដំណាក់កាលទី១ ដែលបានចាប់ផ្ដើមពីថ្ងៃទី១២ ខែមីនា មានក្រុមចំនួន ២៥ចូលរួម ហើយត្រូវបានបែងចែកចេញជា ៥ពូល ក្នងនោះពូលនីមួយៗមានក្រុមចំនួន៤ ដែលត្រូវប្រកួតប្រជែងគ្នា ហើយជាលទ្ធផលរកឃើញក្រុម ៦ឡើងទៅប្រកួតដំណាក់កាលទី២។

ក្រុមទាំង៦ ដែលបានឡើងទៅដំណាក់កាលទី២ មានលេខ១ មកពីពូលទាំង ៥រួមមាន ឪម៉ាល់អែហ្វស៊ី (Ov Mal FC), ប៊ីអែហ្វ៊សី (Bees FC), យាំងហ្គានអែហ្វធី (Young Gun FT), ឌឺប្លូរវើរីស (The Blue Warriors FC), ខ្មែរនគរ (Khmer Nokor FC) ខណៈមានក្រុមលេខ២ មួយក្រុមគឺ ធៃជីអែហ្វធី (Tai Chi FT)។ ក្រុមទាំង ៦នេះបានប្រកួតវិលជុំសន្សំពិន្ទុ តែមួយជុំ ដើម្បីយក្រុមលេខ១ ដល់លេខ៤ ប្រកួតនៅដំណាក់កាលទី៣ ឬហៅថាដំណាក់កាលចុងក្រោយ ជាចុងក្រោយក្រុមដែលត្រូវឡើងទៅដំណាក់កាលចុងក្រោយ គឺរួមមាន លេខ១. ឌឺប្លូរវើរីស (The Blue Warriors FC), លេខ២. ធៃជីអែហ្វធី (Tai Chi FT), លេខ៣. ឪម៉ាល់អែហ្វស៊ី (Ov Mal FC) និងលេខ៤ ខ្មែរនគរ (Khmer Nokor FC)។

ដូច្នេះការប្រកួតនៅដំណាក់កាលចុងក្រោយគឺ ក្រុមលេខ៣ (ឪម៉ាល់អែហ្វស៊ី) ប៉ះក្រុមលេខ៤ (ខ្មែរនគរ ) ហើយក្រុមដែលឈ្នះ គឺឡើងទៅជួបក្រុមលេខ២ (ធៃជីអែហ្វធី) ក្នុងវគ្គពាក់កណ្ដាលផ្ដាច់ព្រ័ត្រ និងចុងក្រោយក្រុមឈ្នះវគ្គពាក់កណ្ដាលផ្ដាច់ព្រ័ត្រនេះ ត្រូវឡើងទៅជួប ក្រុមលេខ១ (ឌឺប្លូរវើរីស) នៅវគ្គផ្ដាច់ព្រ័ត្រ ដើម្បីសម្រេចសេចក្ដីក្រុមជើងឯក។

សូមបញ្ជាក់ថា ក្រុមជើងឯកពានរង្វាន់បាល់ទាត់ក្នុងសាលកម្ពុជា ឆ្នាំ២០២១ (ដែលលើកមកលេងក្នុងឆ្នាំ២០២២) នេះ នឹងតំណាងកម្ពុជា ចូលរួមប្រកួតពានរង្វាន់ក្លិបបាល់ទាត់ហ្វូតសាលអាស៊ីអាគ្នេយ៍ (AFF Futsal Club Championship 2022) ដែលគ្រោងធ្វើនៅប្រទេសថៃ ពីថ្ងៃទី២២-២៨ ខែសីហា ឆ្នាំ២០២២ ខាងមុខផងដែរ៕

អត្ថបទ ៖ មន្នីរ័ត្ន

The post ពានរង្វាន់ហ្វូតសាល ជិតរកឃើញក្រុមតំណាងកម្ពុជា ទៅប្រកួតពានក្លិបហ្វូតសាលអាស៊ាន នៅថៃ appeared first on Kampuchea Thmey Daily.

គ្រូជម្រើសជាតិបាល់ទាត់ក្នុងសាលកម្ពុជា លើកឡើងពីចំណុចដែលគួរកែប្រែ ដើម្បីឲ្យកាន់តែអាជីព

vann sokunthea — Sat, 09 Apr 2022 02:29:19 +0000

កាលពីពេលថ្មីៗនេះ ក្រុមជម្រើសជាតិបាល់ទាត់ក្នុងសាលកម្ពុជា បានបញ្ចប់បេសកកម្មរបស់ខ្លួនក្នុងពានរង្វាន់បាល់ទាត់ក្នុងសាល ប្រចាំតំបន់អាស៊ីអាគ្នេយ៍ (AFF Futsal Championship 2022) នៅប្រទេសថៃ ជាមួយលទ្ធផលពុំគាប់ប្រសើរ។

កម្ពុជា រកបាន១ពិន្ទុពីការប្រកួត ៣ដងក្នុងពូល A ពោល គឺប្រកួតបើកឆាកចាញ់ ម៉ាឡេស៊ី ៧-៦ ប្រកួតទី២ ចាញ់ម្ចាស់ផ្ទះថៃ ១៦-០ បន្ទាប់មកស្មើជាមួយ ព្រុយណេ ២-២ និងចុងក្រោយចាញ់ឥណ្ឌូនេស៊ី ១១-២។ ជុំវិញលទ្ធផលនេះ លោក ចេត ច័ន្ទរចនា ដែលជាគ្រូបង្វឹកក្រុមជម្រើសជាតិបាល់ទាត់ក្នុងសាលកម្ពុជា ក៏បានបង្ហើបពីមេរៀនដែលទទួលបាន ក៏ដូចជាចំណុចខ្សោយដែលនាំឲ្យធ្វើពុំសូវបានល្អផងដែរ។

លោក ចេត ច័ន្ទរចនា បានឲ្យដឹងថា៖ «ការចូលរួម AFF Futsal នេះ យើងអាចនិយាយបានថា យើងបានមេរៀនក្រាស់ក្រែលដែលទាក់ទងនឹងហ្វូតសាល យើងដឹងថាយើងនៅខ្វះខាតច្រើនចំនុចដែលយើងគួរបំពញបន្ថែមដើម្បីយើងទៅលេងជាមួយគេវិញ ការខ្វះខាតរបស់យើងវាមានទាក់ទងនឹងកម្លាំង មានន័យថា Fitness មាន Power Speed មាន Work Team ហើយនឹងបុគ្គលទៀត។ វាមានច្រើនចំនុចទៀត នេះបើយើងនិយាយថាដើម្បីយើងបំពេញឲ្យយើងទៅលេងជាមួយគេកើតទាល់តែយើងបំពេញច្រើនចំនុច ហើយយើងទាមទារពេលវេលាទៀត»។

លោក ចេត ច័ន្ទរចនា បានបន្តទៀតថា៖ «សម្រាប់ការមកវិញនេះខ្ញុំបានគិតទុកហើយៗ យើងត្រូវមានការអភិវឌ្ឍវិស័យហ្វូតសាលនៅប្រទេសកម្ពុជាយើង យើងត្រូវផ្លាស់ប្ដូរច្រើនណាស់ យើងត្រូវផ្លាស់ប្ដូរទាំងបុគ្គល ហើយកម្រិតរបស់យើង យើងនិយាយថាយើងពាក់កណ្ដាលអាជីពទៅលេងជាមួយអាជីពវាខុសគ្នា សាកស្រមៃវាដូចតារាងធំអ្នកអាជីព និងអ្នកពាក់កណ្ដាលអាជីពលេងជាមួយគ្នាអ៊ីចឹង ហើយបំពេញទៅលើលីគហ្វុតសាលយើង ជារឿងសំខាន់បំផុត អ៊ីចឹងទាល់តែយើងអាភិវឌ្ឍន៍លីគហ្វូតសាល ខ្ញុំឃើញមហាជនមួយចំនួនគាត់បានបកស្រាយ ឬក៏មានការស្ថាបនាគឺចូលរួមច្រើន បើកន្លែងខ្លះយើងអភិវឌ្ឍន៍មិនទាន់ដល់ យើងគួរតែដឹងកន្លែងណាដែលយើងត្រូវបំពេញទៅលើបុគ្គលផ្ទាល់ នៃកីឡាកររបស់ជម្រើសជាតិ»។

គ្រូបង្វឹករបស់ក្លិបដោនថោនស្បតនៃពានរង្វាន់បាល់ទាត់ក្នុងសាលកម្ពុជាដដែលរូបនេះបាននិយាយពីចំណុចដែលគួរកែប្រែបាល់ទាត់ក្នុងសាលកម្ពុជា ដោយពឹងផ្អែកលើច្រើនចំណុច ខណៈចំណុចនីមួយៗសុទ្ធតែជាធាតុផ្សំដែលអាចរួមចំណែកឲ្យបាល់ទាត់ក្នុងសាលកម្ពុជា កាន់តែដើរទៅមុខ។

«មុននឹងស្ថាបនាក្រុមមួយឲ្យទៅជាអាជីពមានន័យថាវាទាក់ទងនឹងលីគ លីគហ្វូតសាលយើង ហើយដើម្បីបង្កើតលីគហ្វូតសាលឲ្យទៅជាអាជីពបានទាល់តែមានប្រាក់ចំណូលទៅលើកីឡាករ ទៅលើក្លិបមាន sponsor ទៅលើក្លិប ហើយនឹងទស្សនិកជនដែលអាចមើល ហើយនឹងត្រូវការទីលានស្ដង់ដាដែលយើងត្រូវលេង វានៅច្រើនកម្រិត តែឥលូវយើងកំពុងតែចង់កែម្ដងបន្តិចទាក់ទងនឹងចំនុចហ្នឹង ហើយបើយើងចង់លេងជាមួយគេហើយយើងនៅមានកម្រិតយើងគួរតែអភិវឌ្ឍនបុគ្គល ដូចជាកីឡាករជម្រើសជាតិឲ្យដូចកីឡាករអាជីពដើម្បីគាត់ត្រៀមលេងជាមួយគេបាន»។ នេះ គឺជាការបញ្ជាក់របស់លោក ចេត ច័ន្ទរចនា។

គួរបញ្ជាក់ថា បាល់ទាត់ក្នុងសាលកម្ពុជា ទើបតែចាប់ផ្ដើមមានសកម្មភាពផុសផុលឡើងវិញកាលពីអំឡុងឆ្នាំ២០១៧ ខណៈនៅឆ្នាំ២០១៨ បានត្រឡប់ចូលរួមការប្រកួតលើឆាកអន្តរជាតិក្នុងពានរង្វាន់ដដែលខាងលើ។ បាល់ទាត់ក្នុងសាល ក៏ស្ថិតនៅក្នុងមុខព្រួញទាំង ១២របស់សហព័ន្ធកីឡាបាល់ទាត់កម្ពុជាផងដែរ ដែលបានដាក់ចេញក្នុងមហាសន្និបាតប្រចាំឆ្នាំ២០២២ របស់សហព័ន្ធ កាលពីថ្ងៃទី០៥ ខែមីនា ឆ្នាំ២០២២ កន្លងទៅថ្មីៗនេះ៕

អត្ថបទ៖ មន្នីរ័ត្ន

The post គ្រូជម្រើសជាតិបាល់ទាត់ក្នុងសាលកម្ពុជា លើកឡើងពីចំណុចដែលគួរកែប្រែ ដើម្បីឲ្យកាន់តែអាជីព appeared first on Kampuchea Thmey Daily.

បាល់ទាត់ Futsal Archives - Kampuchea Thmey Daily

ក្រុម​បាល់ទាត់​ Wild Cats ក្លាយ​ជា​ជើងឯក​ CamEd Women’s Futsal 2025