ប្រជាពលរដ្ឋខ្មែរ Archives - Kampuchea Thmey Daily

ប្រជាពលរដ្ឋកោះកុង គាំទ្រយុទ្ធសាស្ត្ររាជរដ្ឋាភិបាលដែលមិនបាញ់តបតនឹង យោធាថៃ

អ៊ិន ពិសី — Fri, 03 Oct 2025 07:01:32 +0000

ប្រជាពលរដ្ឋលក់ដូរ និងអ្នករត់ម៉ូតូរស់នៅក្នុងក្រុងខេមរភូមិន្ទ ខេត្តកោះកុង នៅថ្ងៃទី ៣ ខែតុលា ឆ្នាំ ២០២៥ នេះ បានគាំទ្រចំពោះយុទ្ធសាស្ត្ររបស់រាជរដ្ឋាភិបាលកម្ពុជាដែលមិនបាញ់តបតនឹងយោធាថៃ ដោយសបញ្ជាក់ថា កម្ពុជាគោរពបទឈប់បាញ់ចូលជាធរមាន។

លោក ពូន រ៉ូន ជាអ្នកលក់ទឹកអំពៅ រស់នៅភូមិ ៤ សង្កាត់ដងទង់ បានលើកឡើងថា យុទ្ធសាស្ត្ររាជរដ្ឋាភិបាលមិនបាញ់តបតនឹងយោធាថៃ ទោះបីថៃប្រឹងប្រើប្រាស់សព្វាវុធមកលើកម្ពុជាមុនក៏ដោយ ដោយនេះជាការបង្ហាញថា កម្ពុជាជាប្រទេសចាស់ទុំ ហើយគោរពច្បាប់អន្តរជាតិ ពិសេសគឺបទឈប់បាញ់ជាធរមានចាប់តាំងពីថ្ងៃទី ២៨ ខែកក្កដា កន្លងទៅមក។

លោកបន្តថា សព្វថ្ងៃនេះមានក្តីព្រួយបារម្ភបន្តិចបន្តួចផងដែរអំពីជម្លោះបញ្ហាព្រំដែនជាមួយថៃ ក្នុងភូមិសាស្ត្រខេត្តកោះកុងជាមួយខេត្តត្រាត ប៉ុន្តែទោះយ៉ាងណាគាត់នៅតែជឿជាក់លើយន្តការដោះស្រាយដោយសន្តិវិធី និងផ្លូវច្បាប់អន្តរជាតិរបស់រាជរដ្ឋាភិបាលកម្ពុជា នាពេលបច្ចុប្បន្ន។

ចំណែកលោក ទូច រស់នៅភូមិ ១ សង្កាត់ស្មាច់មានជ័យ ជាអ្នករត់ម៉ូតូ ថ្លែងថា បញ្ហាព្រំដែនបានធ្វើឱ្យប៉ះពាល់ច្រើនដល់ជីវភាពរស់នៅ សេដ្ឋកិច្ច និងការអភិវឌ្ឍនានា ដូច្នេះលោកសូមជំរុញដល់អន្តរជាតិជួយដោះស្រាយបញ្ចប់វិបត្តិព្រំដែនកម្ពុជា និងថៃ ឱ្យបានឆាប់រហ័ស ចៀសវាងបន្តឱ្យនៅរ៉ាំរ៉ៃទៀត។

បើតាមលោក ទូច ករណីថៃនៅតែបន្តរំលោភបំពាន និងបាញ់មកលើកម្ពុជា ច្បាស់ជាលំបាកចំពោះការរត់ភៀសសឹកចោលផ្ទះសម្បែង រស់នៅគ្មានក្តីសុខសាន្ត បង្កវិនាសកម្មកាន់តែច្រើនឡើងៗ។ ដូច្នេះពលរដ្ឋចង់បានតែសន្តិភាព និងការអភិវឌ្ឍមួយគត់ ព្រោះខ្មែរឆ្លងកាត់សង្គ្រាមច្រើនមកហើយ ដោយមិនចង់ឱ្យអតីតកាលបន្តមករំខានសេចក្តីសុខរបស់កម្ពុជាទៀតទេ។

គិតមកទល់ម៉ោងនេះ ខេត្តកោះកុង នៅតែមានសភាពស្ងប់ស្ងាត់ល្អ មិនមានបាតុភាពអាក្រក់រឿងបញ្ហាព្រំដែនជាមួយភាគីថៃនោះទេ ពោលគឺមន្ត្រីរាជការ អាជីវករ និងសេវាករ កំពុងធ្វើការរកស៊ីធ្វើអាជីវកម្មជាធម្មតា មិនរត់ភៀសសឹកទៅណាឡើយ។ ម្យ៉ាងវិញទៀត ពួកគាត់តែងតែតាមដានព័ត៌មានជាប្រចាំអំពីសភាពការណ៍ព្រំដែនជាមួយនឹងអាជ្ញាធរ សមត្ថកិច្ច និងប្រព័ន្ធផ្សព្វផ្សាយដែលទុកចិត្ត៕

អត្ថបទ ៖ សិរីវឌ្ឍនៈ

The post ប្រជាពលរដ្ឋកោះកុង គាំទ្រយុទ្ធសាស្ត្ររាជរដ្ឋាភិបាលដែលមិនបាញ់តបតនឹង យោធាថៃ appeared first on Kampuchea Thmey Daily.

អាជ្ញាធរខេត្តសៀមរាប ជំរុញអាជ្ញាធរមូលដ្ឋាន និងពលរដ្ឋ ចូលរួមត្រួតពិនិត្យ ស្តារប្រព័ន្ធធារាសាស្ត្រ បញ្ចៀសជំនន់ទឹកភ្លៀង

អ៊ិន ពិសី — Mon, 29 Sep 2025 03:24:53 +0000

អាជ្ញាធរខេត្តសៀមរាប បានណែនាំដល់អាជ្ញាធរមូលដ្ឋាន និងប្រជាពលរដ្ឋមានលំនៅឋានតាមដងផ្លូវដែលរងផលប៉ះពាល់ដោយជំនន់ទឹកភ្លៀង ត្រូវចូលរួមសម្អាត កម្ចាត់ការកកស្ទះក្នុងប្រព័ន្ធលូបង្ហូរទឹក ទំនប់ប្រឡាយសាធារណៈ ដើម្បីសម្រួលលំហូរទឹក ធានាមានលំហូរទឹកលឿនបំផុតនៅពេលភ្លៀងធ្លាក់ខ្លាំង ព្រមទាំងថែរក្សាប្រព័ន្ធធារាសាស្ត្របុរាណ និង ថ្មី ឲ្យដំណើរការល្អ សម្រាប់រំដោះទឹក បញ្ចៀសបញ្ហាជំនន់ទឹកភ្លៀងក្នុងមូលដ្ឋាន។

ក្នុងកិច្ចប្រជុំពិភាក្សា និងពិនិត្យលើស្ថានភាពប្រព័ន្ធធារាសាស្ត្រ ប្រព័ន្ធលូ និងប្រឡាយសាធារណៈ ដើម្បីរំដោះទឹក និងបញ្ចៀសបញ្ហាជំនន់ទឹកភ្លៀងនៅក្នុងភូមិសាស្ត្រប៉ែកខាងកើតក្រុងសៀមរាប និងភូមិសាស្ត្រស្រុកប្រាសាទបាគង នៅចុងសប្ដាហ៍ ខែកញ្ញា ឆ្នាំ ២០២៥ នេះ លោក អ៊ឹង គឹមលាង អភិបាលរងខេត្ត បានជំរុញឲ្យប្រជាពលរដ្ឋរងផលប៉ះពាល់ ចូលរួមដាក់លូថ្មី ឬពង្រីកលូដែលមានស្រាប់នៅតាមមុខផ្ទះ។ ការធ្វើដូច្នេះ គឺជាការបន្ថែមប្រព័ន្ធបង្ហូរទឹកភ្លៀង ឬទឹកដក់ឲ្យហូរចូលទៅក្នុងប្រព័ន្ធលូធំ ដើម្បីបង្កើនល្បឿន និងសមត្ថភាពរំដោះទឹក កុំឲ្យជន់លិចទីធ្លាសាធារណៈ ឬចូលក្នុងផ្ទះ។ តាមរយៈការដាក់លូនេះ អាចការពារផ្ទះសម្បែង ទ្រព្យសម្បត្តិ និងហេដ្ឋារចនាសម្ព័ន្ធផ្លូវ មិនឲ្យខូចខាតដោយសារទឹកជំនន់។

លោក អ៊ឹង គឹមលាង សង្កត់ធ្ងន់ថា ការដោះស្រាយបញ្ហាទឹកជំនន់ មិនមែនជាបន្ទុករបស់រដ្ឋាភិបាល ឬអាជ្ញាធរមូលដ្ឋានតែឯងនោះទេ តែគឺជាការងាររួម ដែលតម្រូវឲ្យប្រជាពលរដ្ឋចូលរួមទាំងកម្លាំងពលកម្ម ឬ ថវិកា និងជួយសម្របសម្រួលទីតាំង។ នៅពេលប្រជាពលរដ្ឋចូលរួមសហការដាក់លូនៅមុខផ្ទះខ្លួនឯង ពួកគាត់នឹងមានស្មារតីថែរក្សា និងការពារប្រព័ន្ធលូនោះមិនឲ្យកកស្ទះដោយសំរាម ឬសម្ភារៈផ្សេងៗ នាំឲ្យទឹកលិចឡើងវិញ។ បន្ថែមនេះ លោកបានជំរុញដល់មន្ទីរអង្គភាពជំនាញ និងអាជ្ញាធរក្រុង-ស្រុក ត្រូវពង្រឹងកិច្ចសហការរវាងអាជ្ញាធរពាក់ព័ន្ធ ដើម្បីធានាប្រសិទ្ធភាពការងារ។

លោកអភិបាលរងខេត្ត ក៏បានស្នើដល់អាជ្ញាធរពាក់ព័ន្ធ ត្រូវវាយតម្លៃឡើងវិញនូវស្ថានភាពលូ បំពង់បង្ហូរទឹក ប្រឡាយទឹក និងស្ថានីយបូមទឹកដែលមានស្រាប់ ថាតើមានបញ្ហាស្ទះ ខូចខាត ឬតម្រូវការជួសជុល និងពង្រីកកម្រិតណា កំណត់តំបន់ងាយរងគ្រោះដោយជំនន់ទឹកភ្លៀងខ្លាំងជាងគេ?។ ត្រូវដាក់ចេញនូវវិធានការអាទិភាព ដូចជា ការជីកស្តារប្រឡាយ និងការបំពាក់លូធំៗ ដើម្បីកាត់បន្ថយផលប៉ះពាល់ នៃជំនន់ទឹកភ្លៀងមកលើជីវភាពរស់នៅរបស់ប្រជាពលរដ្ឋ ហេដ្ឋារចនាសម្ព័ន្ធ និងសេដ្ឋកិច្ចក្នុងមូលដ្ឋាន៕

អត្ថបទ ៖ គឿន វេត

The post អាជ្ញាធរខេត្តសៀមរាប ជំរុញអាជ្ញាធរមូលដ្ឋាន និងពលរដ្ឋ ចូលរួមត្រួតពិនិត្យ ស្តារប្រព័ន្ធធារាសាស្ត្រ បញ្ចៀសជំនន់ទឹកភ្លៀង appeared first on Kampuchea Thmey Daily.

មន្ត្រីរាជការ និងពលរដ្ឋ គាំទ្រយ៉ាងពេញទំហឹងនូវគោលជំហរ រាជរដ្ឋាភិបាលកម្ពុជា ឆ្លើយតបទៅភាគីថៃពាក់ព័ន្ធបិទព្រំដែន

អ៊ិន ពិសី — Mon, 30 Jun 2025 07:25:09 +0000

មន្ត្រីរាជការ និងប្រជាពលរដ្ឋ បានបង្ហាញការគាំទ្រគោលជំហររបស់រាជរដ្ឋាភិបាលកម្ពុជា ក្នុងការបន្តបិទព្រំដែន ដរាបណាភាគីថៃមិនព្រមបើកឱ្យត្រឡប់ទៅដូចដើមវិញកាលពីមុនថ្ងៃទី ០៧ ខែមិថុនា ឆ្នាំ ២០២៥ កន្លងទៅ។

មន្ត្រីរាជការ និងប្រជាពលរដ្ឋ លើកឡើងថា រាជរដ្ឋាភិបាលរបស់កម្ពុជា ជាមេដឹកនាំប្រកបដោយគតិបណ្ឌិត ប្រកបដោយការគិតគូរវែងឆ្ងាយណាស់ សម្រាប់ទំនាក់ទំនងប្រទេសជិតខាង សំដៅធ្វើយ៉ាងណាឱ្យមានការប្រាស្រ័យទាក់ទងល្អរវាងគ្នានិងគ្នា ដើម្បីចំណេញប្រយោជន៍សម្រាប់ប្រជាជន និងសង្គមជាតិ ក៏ប៉ុន្តែ ថ្នាក់ដឹកនាំកម្ពុជា ក៏មិនឱ្យប្រទេសណាមួយមកជាន់ឈ្លី ឬមាក់ងាយបានតាមតែអំពើចិត្តនោះដែរ។

ពួកគាត់បន្តលើកឡើងថា ទង្វើក្នុងនាមអ្នកជិតខាងរបស់ភាគីថៃ ជាទង្វើដែលមិនគប្បីសម្រាប់ប្រទេសកម្ពុជានោះឡើយ ព្រោះរាល់ពេលខ្លួនចង់បិទ ឬចង់បើកព្រំដែន តែងធ្វើឡើងឯកតោភាគី គ្មានពិភាក្សាយោបល់ជាមួយកម្ពុជានោះឡើយ ដូច្នេះហើយ រាជរដ្ឋាភិបាលកម្ពុជា មានសិទ្ធិគ្រប់គ្រាន់ក្នុងការឆ្លើយតបជាមួយភាគីថៃ តាមរូបភាពបិទព្រំដែន ក្នុងដែនអធិបតេយ្យភាពរបស់ខ្លួនបានដោយមិនគួរគិតថាជាទង្វើខុសឆ្គងសម្រាប់ថៃនោះឡើយ។

គួររំលឹកថា សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា កាលពីថ្ងៃទី ២៩ ខែមិថុនា ឆ្នាំ ២០២៥ ម្សិលមិញ បានចេញសារទៅភាគីថៃថា មិនចាំបាច់សុំការចរចាជាមួយកម្ពុជារឿងសុំបើកច្រកព្រំដែននោះទេ ព្រោះថៃខ្លួនឯងជាអ្នកតែងចង់បិទ ឬបើក ដោយឯកតោភាគីមករហូត។

សម្តេច សង្កត់ធ្ងន់ថា កូនសោនៅនឹងដៃថៃខ្លួនឯងទេ បើថៃចង់ឱ្យព្រំដែនប្រទេសទាំង ០២ វិលទៅសភាពដើមវិញ ភាគីថៃ ត្រូវបើកច្រកព្រំដែនរបស់ខ្លួនទាំងអស់ឱ្យវិលទៅដូចដើម ដូចមុនថ្ងៃទី ០៧ ខែមិថុនា ឆ្នាំ ២០២៥ ទៅ នោះ ភាគីកម្ពុជា នឹងពិនិត្យសម្រេចបើកច្រកព្រំដែនតាមក្រោយវិញហើយ៕

អត្ថបទ ៖ សុភា

The post មន្ត្រីរាជការ និងពលរដ្ឋ គាំទ្រយ៉ាងពេញទំហឹងនូវគោលជំហរ រាជរដ្ឋាភិបាលកម្ពុជា ឆ្លើយតបទៅភាគីថៃពាក់ព័ន្ធបិទព្រំដែន appeared first on Kampuchea Thmey Daily.

ពលរដ្ឋ បង្ហាញក្តីរីករាយចំពោះការសម្ពោធប្រើប្រាស់ជាផ្លូវការ ផ្លូវថ្មើរជើងចតុមុខ នាល្ងាចនេះ

អ៊ិន ពិសី — Sat, 21 Jun 2025 06:32:57 +0000

ប្រជាពលរដ្ឋ បានបង្ហាញការសប្បាយចិត្ត និងក្តីរីករាយ ចំពោះការសម្ពោធប្រើប្រាស់ជាផ្លូវការ ផ្លូវថ្មើរជើងចតុមុខ នៅល្ងាចថ្ងៃទី ២១ ខែមិថុនា ឆ្នាំ ២០២៥ នេះ។

ពិធីសម្ពោធឲ្យដំណើរការប្រើប្រាស់ជាផ្លូវការនៅល្ងាចនេះ នឹងធ្វើឡើងក្រោមអធិបតីភាពដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និង លោកជំទាវបណ្ឌិត ពេជ ចន្ទមុន្នី។

ជាក់ស្ដែងនាព្រឹកថ្ងៃទី ២១ មិថុនា នេះដែរ គេសង្កេតឃើញមានវត្តមាន លោក ឃួង ស្រេង អភិបាលរាជធានីភ្នំពេញ បានចុះត្រួតពិនិត្យការរៀបចំ តុបតែងលម្អ ជាស្រេច នូវសោភ័ណភាពនានា ផ្សេងៗ រួមទាំងការសម្អាតបរិស្ថានអនាម័យ ក៏ដូចជាការការពារសន្តិសុខ សណ្ដាប់ធ្នាប់ និងរបៀបរៀបរយសាធារណៈបានយ៉ាងល្អប្រសើរផងដែរ ដើម្បីជាការត្រៀមជាស្រេចសម្រាប់ពិធីសម្ពោធប្រើប្រាស់ជាផ្លូវការចូលមកដល់។

ប្រជាពលរដ្ឋ បានបង្ហាញនូវក្តីសប្បាយ រីករាយ និងសូមគាំទ្រចំពោះរាជរដ្ឋាភិបាលកម្ពុជា ដែលបានបង្កើតផ្លូវថ្មើរជើងថ្មីនេះឡើងមក អាចឲ្យពលរដ្ឋ ភ្ញៀវជាតិ-អន្តរជាតិ អញ្ជើញដើរលេងកម្សាន្តដោយសប្បាយរីករាយនៅរៀងរាល់ចុងសប្ដាហ៍។ ពួកគាត់ ក៏បានត្រៀមខ្លួនរួចរាល់សម្រាប់ការដើរលេងកម្សាន្តនៅល្ងាចនេះ ពិសេសការប៉ងជួប សម្តេចប្រមុខថ្នាក់ដឹកនាំ ផងដែរ។

សូមបញ្ជាក់ថា ផ្លូវថ្មើរជើងចតុមុខ (អតីត Walk Street) បានដាក់ឲ្យដំណើរការប្រើប្រាស់ជាបណ្ដោះអាសន្ន តាំងពីថ្ងៃទី ០១ ខែកុម្ភៈ ឆ្នាំ ២០២៥ មកម្ល៉េះ ដែលគិតមកត្រឹមពេលនេះ មានរយៈពេលជិត ០៥ ខែ មកហើយ ដោយផ្លូវថ្មើរជើងនេះ ទទួលបានការគាំទ្រយ៉ាងច្រើនកុះករបំផុតពីប្រជាពលរដ្ឋក្នុងប្រទេស ក៏ដូចជាភ្ញៀវអន្តរជាតិ។ ផ្លូវថ្មើរជើងនេះ ជាប់ចំណាត់ថ្នាក់លេខ ០២ នៅទូទាំងពិភពលោក ហើយក៏ត្រូវបានសកលលោកទទួលស្គាល់ថាជាផ្លូវមានភាពសប្បាយរីករាយច្រើនបំផុតនាពេលរាត្រី៕

អត្ថបទ ៖ សុភា

The post ពលរដ្ឋ បង្ហាញក្តីរីករាយចំពោះការសម្ពោធប្រើប្រាស់ជាផ្លូវការ ផ្លូវថ្មើរជើងចតុមុខ នាល្ងាចនេះ appeared first on Kampuchea Thmey Daily.

ពលរដ្ឋកម្ពុជាថ្កោលទោស ស៊ន តារា ដែលកំពុងវង្វេងប្រវត្តិសាស្រ្តដោយលើកឡើងថា “អាមេរិកមិនដែលទម្លាក់គ្រាប់បែកសម្លាប់ខ្មែរ”

Kang Tola — Wed, 05 Feb 2025 12:40:29 +0000

ភ្នំពេញ ៖ ពលរដ្ឋកម្ពុជា បានថ្កោលទោសលោក ស៊ន តារា អតីតសកម្មជនគណបក្សប្រឆាំងដែលកំពុងនិរទេសខ្លួននៅក្រៅប្រទេសតាមរយៈសំណេរមួយថា «អាមេរិកមិនដែលទម្លាក់គ្រាប់បែកសម្លាប់ខ្មែរទេ គឺទម្លាក់លើទ័ពយៀកកុងដែលប្រើទឹកដីខ្មែរសម្លាប់អាមេរិក» ដោយពលរដ្ឋចាត់ទុកស៊ន តារា កំពុងវង្វេងប្រវត្តិសាស្រ្តខ្លួនឯង។

លោក ទុយ កុសល ពលរដ្ឋមកពីខេត្តព្រៃវែងបាននិយាយថា «ខ្ញុំបានឃើញសំណេរស៊ន តារាដែរ ខ្ញុំគិតថា គាត់កំពុងវង្វេងប្រវត្តិសាស្រ្តខ្លួនឯង ព្រោះគាត់ជាអ្នកនយោបាយប្រឆាំងជ្រុលនិយមដែលកំពុងប្រើប្រាស់មូលដ្ឋានក្រៅប្រទេសវាយប្រហារលើរដ្ឋាភិបាលកម្ពុជាដែលកំពុងដឹកនាំប្រទេសដោយសម្ដេចបវរធិបតី ហ៊ុន ម៉ាណែត ហើយខ្ញុំសូមថ្កោលទោសការលើកឡើងរបស់ស៊ន តារា ដែលប្រមាថធ្ងន់ធ្ងរដល់ជនរងគ្រោះក្នុងសម័យអាមេរិកទម្លាក់គ្រាប់បែក»។

លោកបន្តថា «សំណេររបស់ស៊ន តារា បែបនេះ គឺជាចេតនាបំភ្លៃប្រវត្តិសាស្ត្រពិត និងជាការប្រមាថយ៉ាងធ្ងន់ធ្ងរទៅដល់ជនជាតិខ្មែរស្លូតត្រង់ ដែលបានស្លាប់បាត់បង់ជីវិត និងរងរបួស ធ្លាក់ខ្លួនពិការរាប់សែននាក់ បង្កឡើងដោយគ្រាប់បែកអាមេរិក ដែលបានទម្លាក់ស្រោចមកលើទឹកដីកម្ពុជាចន្លោះទស្សវត្សឆ្នាំ៦០ និង៧០»។

ពលរដ្ឋរូបនេះបានបង្ហាញពីការឈឺចាប់នូវអ្វីដែលកើតឡើងពីអតីតកាលបានក្លាយជាប្រវត្តិសាស្ត្រដ៏ជូរចត់សម្រាប់ខ្មែរទៅហើយ ប៉ុន្ដែអ្វីដែលរឹតតែឈឺចាប់ជាងនេះទៅទៀតនោះ គឺការបកស្រាយបំភ្លៃប្រវត្តិសាស្ត្រពិត និងចេតនាកេងចំណេញនយោបាយរបស់ពួកជ្រុលនិយម វារឹតតែធ្វើឱ្យខ្មែរមិនអាចទទួលយកបានទៀត។

លោក ស៊ូ ស៊ាម ពលរដ្ឋម្នាក់ទៀតមកពីខេត្តព្រៃវែងបានថ្លែងថា «ស៊ន តារា ពិតជាបានប្រមាថធ្ងន់ធ្ងរខ្លាំងណាស់ដល់អាយុជីវិតរបស់ប្រជាជនខ្មែរដែលស្លាប់និងរងគ្រោះដោយសារគ្រប់បែកដែលទម្លាក់ដោយអាមេរិក។ ដូច្នេះ ស៊ន តារា មិនគួរហៅខ្លួនឯងថាជាខ្មែរទៀតឡើយ ព្រោះអ្នកមិនសមនឹងកើតជាជាតិសាសន៍ដ៏ស្លូតត្រង់ និងសុច្ចរិតមួយនេះទេ»។

លោកបន្តថា ប្រវត្តិសាស្ត្រពិតបានចារយ៉ាងច្បាស់ និងត្រូវបានទទួលស្គាល់ដោយភាគីអាមេរិកខ្លួនឯងផងដែរថា អាមេរិកគឺពិតជាបានទម្លាក់គ្រាប់បែកមកលើកម្ពុជា ដោយមានគោលដៅទៅលើយោធាយៀកកុងមែន ប៉ុន្តែការទម្លាក់គ្រាប់បែកដ៏ច្រើនសន្ធឹកសន្ធាប់អស់រយៈពេលជាច្រើនឆ្នាំលើទឹកដីកម្ពុជាដ៏កម្សត់ គឺបានសម្លាប់ប្រជាជនកម្ពុជាចន្លោះពី ៥ម៉ឺន ទៅដល់ ១៥ម៉ឺននាក់។

លោកបន្ថែមថា ឥទ្ធិពលគ្រាប់បែកអាមេរិក បានបង្កឱ្យមានជនពិការរហូតមកដល់ពេលបច្ចុប្បន្ន និងបំផ្លាញភូមិដ្ឋានប្រជាជនខ្មែរព្រមទាំងហេដ្ឋារចនាសម្ព័ន្ធខ្ទេចខ្ទី។ សព្វថ្ងៃគ្រាប់បែកដែលសេសសល់នៅកប់ក្នុងដីច្រើនណាស់ ដែលបាននឹងកំពុងតែបន្តសម្លាប់ប្រជាជនខ្មែរស្លូតត្រង់ដែលមិនដឹងអីរហូតដល់សព្វថ្ងៃ។

ពលរដ្ឋម្នាក់ទៀតលោក អ៊ុន គិនសេរីរដ្ឋា អាយុជិត ៦០ឆ្នាំ រស់នៅខេត្តស្វាយរៀងបានលើកឡើងថា «ខ្ញុំមានការឈឺចាប់ខ្លាំងណាស់ដែលមានជនអគតិជ្រុលនិយមក្រៅប្រទេសមួយក្ដាបតូចនេះព្យាយាមបង្វែរប្រវត្តិសាស្រ្ត និងព្យាយាមការពារជនល្មើសដែលធ្វើឱ្យពលរដ្ឋខ្មែរស្លាប់ទាំងដែលមិនមានកំហុសអ្វីទាំងអស់។ ខ្ញុំសូមថ្កោលទោសបុគ្គល ស៊ន តារា ដែលដើរតាមផ្លូវនយោនបាយជ្រុលនិយមរបស់ទណ្ឌិត សម រង្ស៊ី»។

លោកបន្តថា ជាការពិតសោកនាដកម្មនេះ កូនខ្មែរត្រូវតែចងចាំ និងមិនអាចបំភ្លេចបានឡើយ ចៀសវាងជនឆ្លៀតឱកាស បំភ្លៃប្រវត្តិសាស្ត្រ និងបោកប្រាស់យុវជនខ្មែរជំនាន់ក្រោយបាន។ ការបង្ហោះសាររបស់ ស៊ន តារា គឺបង្ហាញថាជននេះកំពុងវង្វេងផ្លូវកាន់តែធ្ងន់ធ្ងរ ដែលប្រហែលជាមិនអាចមានអ្នកណាដាស់តឿនក្រើនរំលឹកបានឡើយ។

ចំណែកលោក សំ សឿន អ្នកឃ្លាំមើលការអភិវឌ្ឍន៍សង្គម និងនយោបាយបានថ្លែងថា «បើទោះបីជាខ្ញុំមិនបានសិក្សាស៊ីជម្រៅទៅលើចំណុចនេះ ប៉ុន្ដែខ្ញុំបានដឹងថា អាមេរិកបានទម្លាក់គ្រាប់បែកយ៉ាងច្រើនលើទឹកដីកម្ពុជាក្នុងអំឡុងសង្គ្រាមយៀកកុង និងសង្គ្រាមត្រួតត្រាខ្មែរ»។

ជាក់ស្តែងគ្រាប់បែកដែលទម្លាក់ពីយន្តហោះរបស់សហរដ្ឋអាមេរិក ក្នុងរដ្ឋបាលលោកប្រធានាធិបតី ចនសុន (Johnson) ចាប់ពីឆ្នាំ១៩៦៥ ដល់១៩៧៣ មកលើទឹកដីកម្ពុជាចំនួនប្រមាណ ៤៧៥ ៥១៥តោន(ជិតកន្លះលានតោន) និងនៅក្នុងរដ្ឋបាលលោកប្រធានាធិបតី រីឆាត និចសុន (Richard Nixon) ចាប់ពីឆ្នាំ១៩៦៩ បានបញ្ជាដាច់ណាត់ឱ្យទម្លាក់គ្រាប់បែកសម្លាប់អ្វីៗដែលមានជីវិត ដោយកុំឱ្យកងទ័ពខ្វល់ពីអ្វីទាំងអស់ រួមទាំងការចំណាយ។

លោកបន្តថា ការទម្លាក់គ្រាប់បែកក្នុងរដ្ឋបាលលោក Nisxon កាន់តែខ្លាំងក្លា ពោលគឺមានចំនួនប្រមាណជាង ២លានតោនក្នុងរយៈពេល៥ឆ្នាំ (១៩៦៩-១៩៧៣) នាំឱ្យទិន្នន័យសរុបមានចំនួនជាង ២លាន ជ៨សែនតោន ក្នុងរយៈពេលជាង៨ឆ្នាំ គឺពីថ្ងៃទី៤ ខែតុលា ឆ្នាំ១៩៦៥ ដល់ថ្ងៃទី១៥ ខែសីហា ឆ្នាំ១៩៧៣។ ក្នុងនោះមានកូនគ្រាប់បែកចង្កោមជាង ២៨លានគ្រាប់ និងគ្រាប់បែកគីមីថែមទៀតផង។

ដូច្នេះ លោក សំ សឿនបានចាត់ទុកការនិយាយថា “អាមេរិកមិនដែលទម្លាក់គ្រាប់បែកសម្លាប់ខ្មែរទេ”គឺជាការនិយាយភូតកុហកបោកប្រាស់ប្រជាពលរដ្ឋខ្មែរ ពោលមិនមែនជាការពិតឡើយ។ គ្រាប់បែកអាមេរិកបានសម្លាប់ប្រជាជនកម្ពុជា បំផ្លាញភូមិដ្ឋានប្រជាជន និងបង្កឲ្យមានមហន្តរាយធ្ងន់ធ្ងរ ដែលបណ្តាលឱ្យកម្ពុជាបានធ្លាក់ក្នុងភាពអស្ថិរភាពនយោបាយ និងជំរុញឱ្យខ្មែរក្រហមមានឱកាសដណ្តើមបានជ័យជន្នះគ្រប់គ្រងកម្ពុជា។ នេះជាការពិតដែលមិនអាចប្រកែកបាន៕

The post ពលរដ្ឋកម្ពុជាថ្កោលទោស ស៊ន តារា ដែលកំពុងវង្វេងប្រវត្តិសាស្រ្តដោយលើកឡើងថា “អាមេរិកមិនដែលទម្លាក់គ្រាប់បែកសម្លាប់ខ្មែរ” appeared first on Kampuchea Thmey Daily.

ប្រជាពលរដ្ឋនៅទូទាំងប្រទេសកម្ពុជា អបអរសាទរចំពោះការប្រារព្ធទិវាសន្តិភាពនៅកម្ពុជា

Kang Tola — Fri, 27 Dec 2024 14:19:15 +0000

ប្រជាពលរដ្ឋខ្មែរនៅទូទាំងប្រទេស បានអបអរសាទរចំពោះការប្រារព្ធទិវាសន្តិភាពដ៏មានតម្លៃមួយនេះ ដែលខិតខំរកមកយ៉ាងលំបាកក្រោមការដឹកនាំរបស់ អតីតនាយករដ្ឋមន្ត្រី សម្តេចអគ្គមហាសេនាបតីតេជោ ហ៊ុន សែន រហូតកម្ពុជាទទួលបានសន្តិភាពពេញលេញនៅថ្ងៃទី២៩ ខែធ្នូ ឆ្នាំ១៩៩៨ ក្រោយប្រទេសត្រូវបានហែកហួរដោយសារសង្គ្រាម និងអស្ថិរភាពប្រមាណ៥០០ឆ្នាំនៃប្រវត្តិសាស្ត្ររបស់ខ្លួន។

ជាពលរដ្ឋមានដើមកំណើតពីខេត្តតាកែវ លោកស្រី សុំ ចាន់ បានអបអរសាទរចំពោះការប្រារព្ធទិវាសន្តិភាពនៅកម្ពុជា ហើយលោកស្រីក៏មិនភ្លេចពីតម្លៃនៃសន្តិភាពឡើយ។

លោកស្រី សុំ ចាន់ បានគូសបញ្ជាក់ថា “អរគុណសន្តិភាពដែលបានឱ្យខ្ញុំរស់នៅសុខសាន្ត ជួបជុំគ្រួសារបងប្អូន និងផ្តល់ឱកាសការងារ ឱ្យខ្ញុំរកប្រាក់ចំណូលចិញ្ចឹមគ្រួសារបានយ៉ាងស្រួល ហើយនឹងអាចឱ្យខ្ញុំរស់នៅដោយគ្មានការភិតភ័យ រស់នៅដោយសុខសប្បាយ មានអ្វីៗគ្រប់យ៉ាង មានរបស់របរគ្រប់បែបយ៉ាង”។

មិនខុសពីពលរដ្ឋនៅខេត្តតាកែវ លោក អ៊ឹង ម៉េងថុង ដែលជាប្រជាពលរដ្ឋមានដើមកំណើតនៅខេត្ត កំពង់ចាម ក៏បានអះអាងថា តម្លៃនៃសន្តិភាពបានផ្តល់ឱកាសដល់ប្រជាពលរដ្ឋគ្រប់រូបឱ្យមានការងារធ្វើ មានការជួបជុំគ្រួសារដែលជាសេចក្តីសុខរបស់ប្រជាជាតិកម្ពុជាចង់បាន។

លោក អ៊ឹង ម៉េងថុង បន្ថែមថា “ខ្ញុំអរគុណសន្តិភាពដ៏ធំធេងបំផុត ដែលមានសន្តិភាពនេះដែលបានផ្តល់ឱ្យខ្ញុំមានឱកាសបានធ្វើការងារ ជួបជុំគ្រួសារ ហើយនឹងធ្វើឱ្យពួកយើងមិនមានសេចក្តីសុខ ហើយខ្ញុំមានឱកាសធ្វើការនៅក្នុងរោងចក្រ មានប្រាក់ខែសមរម្យដែលអាចចិញ្ចឹមជីវភាពគ្រួសាររបស់ខ្ញុំបាន”។

ទន្ទឹមនឹងនេះ លោកស្រី ហូយ រំដួល ដែលជាប្រជាពលរដ្ឋនៅខេត្តកំពង់ចាមដែរនោះ បានរំលឹកពីសន្តិភាពដែលធ្វើឱ្យក្រុមគ្រួសាររបស់គាត់មានជីវភាពកាន់តែសម្បូរសប្បាយនិងរីកចម្រើនដោយសារសន្តិភាពរបស់សម្តេចតេជោដែលលោកបានលះបង់សម្រាប់ប្រជាជាតិកម្ពុជា។

លោកស្រីបញ្ជាក់ថា៖ “ខ្ញុំអរគុណសន្តិភាព ដែលអាចឱ្យពួកខ្ញុំមានដល់ថ្ងៃនេះ មានការងារធ្វើ មានរបស់របរប្រើប្រាស់ប្រចាំថ្ងៃ មានឡាន មានម៉ូតូ ហើយមានផ្ទះទ្រនំរៀងគ្រាន់បើដែរ អត់មានភ័យខ្លាចថាអត់មានសន្តិភាព”។

សម្រាប់ប្រជាពលរដ្ឋមកពីខេត្តកំពង់ស្ពឺវិញ លោក ទូច សំអេង បានកត់សម្គាល់ចំពោះតម្លៃសន្តិភាពថា ដោយសារតែសន្តិភាពនេះហើយទើបប្រជាពលរដ្ឋមានឱកាសធ្វើការងារ ឬប្រកបរបររកស៊ី ដើម្បីរកចំណូលសម្រាប់ចិញ្ចឹមជីវភាពគ្រួសារ ហើយលោកបានថ្លែងអំណរគុណដល់រដ្ឋាភិបាលកម្ពុជាដែលបានផ្តល់សន្តិភាព សុខសុវត្ថិភាព សណ្តាប់ធ្នាប់សង្គមជូនពលរដ្ឋបានយ៉ាងល្អ។

លោក ទូច សំអេង សង្កត់ធ្ងន់ថា “ខ្ញុំសូមអរគុណសន្តិភាពដែលជួយឱ្យរូបខ្ញុំ និងក្រុមគ្រួសារមានការភាពរីកចម្រើន និងរកស៊ីថ្កុំថ្កើន ហើយនិងប្រកបរបរអ្វីក៏ដំណើរការល្អ ហើយខ្ញុំសព្វថ្ងៃដើរហើរទៅណា គ្មានផលវិបាក ឬអ្វីទេ ដោយសារ ខ្ញុំអរគុណសន្តិភាពដែលធ្វើឱ្យខ្ញុំគេចផុតពីសង្គ្រាមទាំងឡាយ”។

គួរបញ្ជាក់ថា ទិវាសន្តិភាពនៅកម្ពុជាត្រូវបានបង្កើតដោយរាជរដ្ឋាភិបាលដែលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា តាមរយៈការចុះអនុក្រឹត្យ កាលពីថ្ងៃទី១ ខែមករា ឆ្នាំ២០២៤ ដោយកំណត់យកថ្ងៃទី២៩ ខែធ្នូ ជាថ្ងៃប្រារព្ធទិវាសន្តិភាពនៅកម្ពុជា ដើម្បីរំលឹកដល់ការសម្រេចបាននូវការបញ្ចប់សង្គ្រាមទាំងស្រុង និងទទួលបានសន្តិភាព ឯកភាពជាតិពេញលេញ ដោយនយោបាយឈ្នះ ឈ្នះ និងជាការរំលឹកដល់ការលះបង់ តស៊ូ របស់វីរបុរស និងវីរនារីស្នេហាជាតិរបស់កម្ពុជា រហូតដល់បានបញ្ចប់សង្គ្រាម និងទទួលបានសុខសន្តិភាពពាសពេញផ្ទៃប្រទេស។

យ៉ាងណាក៏ដោយ ទន្ទឹមនឹងការអបអរសាទរយ៉ាងអឺងកងពីសំណាក់ប្រជាពលរដ្ឋនៅទូទាំងប្រទេសចំពោះការប្រារព្ធទិវាសន្តិភាពនៅកម្ពុជា ពលរដ្ឋក៏បានប្តេជ្ញាចិត្ត និងអំពាវនាវដល់ពលរដ្ឋទាំងអស់ឱ្យថែរក្សាសុខសន្តិភាព និងស្ថិរភាពរបស់កម្ពុជា ដោយមិនត្រូវបណ្តោយខ្លួនឱ្យធ្លាក់ចូលក្នុងការញ៉ុះញង់ ឬនយោបាយប្រជាភិថុតិពីមជ្ឈដ្ឋានណាមួយដែលចង់បង្កភាពចលាចល និងចង់បំផ្លាញសុខសន្តិភាពនិងស្ថិរភាពរបស់កម្ពុជានោះឡើយ៕

The post ប្រជាពលរដ្ឋនៅទូទាំងប្រទេសកម្ពុជា អបអរសាទរចំពោះការប្រារព្ធទិវាសន្តិភាពនៅកម្ពុជា appeared first on Kampuchea Thmey Daily.

តម្លៃសន្តិភាព ជាអ្វីដែលពលរដ្ឋកម្ពុជាគ្រប់រូបត្រូវចងចាំ និងការពារ ខណៈពិភពលោកកំពុងជួបសង្គ្រាម

Thoeun Vansong — Fri, 27 Dec 2024 10:27:49 +0000

«ខ្ញុំស្រលាញ់សន្តិភាព ខ្ញុំចង់បានសន្តិភាព ខ្ញុំអត់ចង់បានសង្គ្រាមដូចប្រទេសដទៃទេ។ សន្តិភាព គឺសំខាន់ណាស់ បើអត់មានសន្តិភាពយើងមិនអាចដើរហើរមកធ្វើការទៅនេះទៅនោះបានទេ។ សន្តិភាព មានតម្លៃកាត់ថ្លៃមហាសាលគ្មានអ្វីដែលអាចកាត់ថ្លៃបានទេ បើគ្មានសន្តិភាពគឺគ្មានការអភវឌ្ឍអ្វីទាំងអស់»។

នេះជាការលើកឡើងរបស់ប្រជាពលរដ្ឋនៅរាជធានីភ្នំពេញ និងខេត្តកណ្តាល ដែលបានបង្ហាញការសប្បាយរីករាយ និងក្ដីស្រលាញ់ផ្តល់តម្លៃសន្តិភាព ដែលកម្ពុជាទទួលបានពេញលេញរាប់ចាប់ពីថ្ងៃទី២៩ ខែធ្នូ ឆ្នាំ១៩៩៨ មកដល់ថ្ងៃទី២៩ ខែធ្នូ ឆ្នាំ២០២៤នេះ មានរយៈពេល២៦ឆ្នាំ ជារយៈពេលវែងបំផុតមិនធ្លាប់មានលើទឹកដីកម្ពុជាក្នុងរយៈប្រមាណ៥០០ឆ្នាំមកនេះ។

យ៉ាងណាក៏ដោយ គេនៅចាំថានៅមុនឆ្នាំ១៩៩៨ ប្រទេសកម្ពុជាបានហែកហួរដោយសារសង្គ្រាមផ្ទៃក្នុង រួមទាំងសង្គ្រាមពីខាងក្រៅផង។ ប្រជាជនស្លាប់រាប់លាននាក់ សេដ្ឋកិច្ចអន់ថយដល់កម្រិតសូន្យ ប្រទេសត្រូវបានបែងចែកតំបន់ត្រួតត្រាផ្សេងៗគ្នា ពលរដ្ឋមានតែការរងទុក្ខលំបាកវេទនារស់នៅក្នុងភាពភ័យខ្លាច។

លោក យ៉ោក សុទ្ធី នាយកវិទ្យាស្ថានជាតិបណ្តុះបណ្តាលបច្ចេកទេស គឺជាប្រជាពលរដ្ឋដែលធ្លាប់បានឆ្លងកាត់សម័យសង្គ្រាមតាំងពីឆ្នាំ១៩៧០ បានលើកឡើងថា សង្គ្រាមមិនដែលបានផ្តល់សុភមង្គល ភាពរីកចម្រើន ការជួបជុំគ្រួសារដូចសម័យមានសន្តិភាពនេះទេ។ ទន្ទឹមគ្នានោះ ប្រជាពលរដ្ឋនៅរាជធានីភ្នំពេញ និងខេត្តកណ្តាល ក៏បានប្រាប់ផងដែ ថា សង្គ្រាមមានតែធ្វើឱ្យពួកគាត់ឈឺចាប់ខ្លោចផ្សាមិនអាចគណនាបាន។

លោក យ៉ោក សុទ្ធី ថា៖ «គិតតែពីគេចតែគ្រាប់ផ្លោង គេចតែកាំភ្លើងស្នូរ នេះហើយគឺជាប្រទេសមានសង្គ្រាម»។

លោក កាន់ ស៊ីថន ប្រជាពលរដ្ឋខណ្ឌដង្កោ ថា៖ «កំពុងបាយ កំពុងតែដាំបាយ យកទឹកយកចានយកឆ្នាំងដាក់ដាំបាយរៀបចំបាយហ្នឹង មកគ្រាំងមក[គ្រាប់ផ្លោង]គ្មានបានបាយទេរត់ចោលឆ្នាំងបាយបាត់ បាទអាហ្នឹងជាសង្គ្រាម»។ រីឯលោក ឈួន បូរិត ប្រជាពលរដ្ឋនៅរាជធានីភ្នំពេញ ថា«វាធ្វើឱ្យបែកបាក់គ្រួសារ បាត់បង់បងប្អូន ញាតិសន្តាន ហើយវិស័យគ្រប់យ៉ាងគឺត្រូវបាត់បង់ទាំងអស់»។

ពិតណាស់ ផ្លែផ្កាសន្តិភាពដែលកំពុងរីកស្គុសស្គាយនាពេលបច្ចុប្បន្នមិនអាចទៅរួចបានឡើយបើសិនជាគ្មាន ការដឹកនាំតស៊ូរបស់សម្តេចតេជោហ៊ុន សែន ដែលយកជីវិតធ្វើជាដើមទុនដើម្បីតស៊ូរំដោះប្រជាជនកម្ពុជា ចេញពីរបបប្រល័យពូជសាសន៍ ប៉ុល ពត កាលពី៤៧ឆ្នាំមុន។

សម្តេចតេជោ ហ៊ុន សែន ធ្លាប់បានលើកឡើងថា ទោះបីពេលនេះរូបលោក និងប្រជាជនកម្ពុជា កំពុងទទួលបានសេចក្តីសុខ តែលោក មិនដែលភ្លេចនូវទឹកភ្នែករាប់ម៉ឺនរាប់សែនដំណក់ នៅពេលដែលលោក ឈានជើងចេញពីមាតុភូមិចោលប្រជាជនកម្ពុជាដែលកំពុងរងគ្រោះ ពិសេសចាកចេញចោលភរិយាដ៏កំសត់ ដែលកំពុងមានផ្ទៃពោះ។ វីរភាពរបស់សម្តេចតេជោបានធ្វើឱ្យប្រជាជនរំភើបក្តុកក្តួលកោតសរសើរនិងចាត់ទុកលោកដូចជាឪពុកដែលផ្តល់កំណើតហើយថែរក្សាកូនចៅគ្រប់ៗគ្នា។

លោក កាន់ ស៊ីថន ប្រជាពលរដ្ឋនៅខណ្ឌដង្កោ ថា «សម្តេចតេជោជាអតីតនាយករដ្ឋមន្ត្រីលោកបានតស៊ូប្តូរសាច់ប្តូរឈាមដើម្បីទាមទារយកនូវសន្តិភាពនេះឡើយ»។

អ្នកស្រី សុខា លីនដា ប្រជាពលរដ្ឋខេត្តកណ្តាល ថា «ខ្ញុំឃើញថាគាត់លះបង់ច្រើនណាស់ ដើម្បីប្រជាជនយើង អ៊ីចឹងត្រូវធ្វើម៉េចប្រជាជនត្រូវមានការចាងចាំនៅក្នុងចិត្តថា បើមិនមានសម្តេចតេជោហ៊ុនសែនទេ គឺមិនមានថ្ងៃហ្នឹងកើតឡើងទេ»។ លោក អឿន វីរៈ ពលរដ្ឋខេត្តកណ្តាល៖«បើអត់មានសម្តេចតេជោ ក៏គ្មានសន្តិភាពដែរ»។

ដោយមើលឃើញពីសារសំខាន់ និងតម្លៃនៃសន្តិភាព លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃកម្ពុជា និងលោកបណ្ឌិត ថុង ម៉េងដាវិត អ្នកវិភាគភូមិសាស្ត្រនយោបាយនិងសន្តិសុខ ព្រមទាំងប្រជាពលរដ្ឋ បានអរគុណសន្តិភាព និងបង្ហាញពីការចូលរួមថែរក្សាការពារសន្តិភាព អំពាវនាវឱ្យមានការថែរក្សាការពារសន្តិភាព ដែលបានមកដោយកម្រនេះ ផងដែរ។

លោកបណ្ឌិត គិន ភា៖ «អរគុណសន្តិភាព អរគុណប្រតិបត្តិករមគ្គុទេសន៍ឯកសម្តេចតេជោហ៊ុនសែនដែលលោកនាំមកនាំមកនូវសន្តិភាពសម្រាប់ប្រជាជនយើងហើយជាគំរូសម្រាប់តំបន់និងពិភពលោកទាំងមូល»។

លោកថុង ម៉េងដាវិត៖«កុំនិយាយដល់ការអភិវឌ្ឍប្រទេស ឬក៏ការកសាងមូលដ្ឋាន ហេដ្ឋារចនាសម្ព័ន្ធផ្សេងៗគឺ យើងនឹងមិនមាននោះទេ បើសិនជាមិនមានដាក់ចេញនូវយុទ្ធសាស្ត្រឈ្នះឈ្នះរបស់សម្តេចតេជោ»។

លោក តាំង ថា ពលរដ្ឋនៅរាជធានីភ្នំពេញ បានលើកឡើងថា «រួមគ្នាការពារសន្តិភាព កុំឱ្យមានសង្គ្រាម សង្គ្រាមគឺវេទនាណាស់»។

លោក យ៉ោក សុទ្ធី នាយកវិទ្យាស្ថានជាតិបណ្តុះបណ្តាលបច្ចេកទេស៖«សន្តិភាពមិនមែនតែសម្រាប់តែកម្ពុជាទេ សូម្បីប្រទេសនៅលើសាកលលោកគឺគេទាមទាណាស់ត្រូវការណាស់សន្តិភាព សូមរក្សាសន្តិភាពឱ្យបានគ្រប់ៗគ្នា»។

តម្លៃសន្តិភាព គឺកម្ពុជាបានសុខជៀសផុតពីសង្រ្គាម ហើយសន្តិភាពដែលប្រទេសកម្ពុជាទទួលនេះបាន ពិតជាមានតម្លៃណាស់ក្នុងការអភិវឌ្ឍសេដ្ឋកិច្ច និងសង្គម។ ជាក់ស្តែងសន្តិភាពនៅកម្ពុជា បានជួយជម្រុញវិស័យកសិកម្ម ឧស្សាហកម្មពាណិជ្ជកម្ម ទេសចរណ៍ឱ្យមានការអភិវឌ្ឍ ការកសាងហេដ្ឋារចនាសម្ព័ន្ធគ្រប់បែបយ៉ាង។

មិនតែប៉ុណ្ណោះ ក៏មានការលើកស្ទួយការគោរពសិទ្ធិមនុស្ស សេរីភាពក្នុងសង្គមប្រជាធិបតេយ្យ ការពារ ទបស្កាត់អំពើពុករលួយ អភិវឌ្ឍលើវិស័យអប់រំ អភិវឌ្ឍវប្បធម៌ជាតិ និងសាសនា ផងដែរ។ ផ្ទុយទៅវិញ សង្គ្រាមមានតែទុក្ខវេទនា ព្រាត់ប្រាស់ ខ្លោចផ្សាគ្រប់យ៉ាង សង្គមវប្បធម៌ សង្គមធម្មជាតិ មនុស្សជាតិត្រូវរលាយទាំងអស់៕

The post តម្លៃសន្តិភាព ជាអ្វីដែលពលរដ្ឋកម្ពុជាគ្រប់រូបត្រូវចងចាំ និងការពារ ខណៈពិភពលោកកំពុងជួបសង្គ្រាម appeared first on Kampuchea Thmey Daily.

ថៃ ចាប់ជនជាតិខ្មែរ ១៧៥នាក់ ព្រោះដណ្តើមមុខរបរ ដែលបម្រុងទុកសម្រាប់ពលរដ្ឋខ្លួន

Sok Sovann — Thu, 21 Mar 2024 09:33:26 +0000

តាមការចុះផ្សាយរបស់ The Nation នៅថ្ងៃព្រហស្បតិ៍ទី២១ខែមីនា, ក្នុងរយៈពេលប្រាំមួយខែកន្លងមកនេះ រដ្ឋាភិបាលថៃ បានចាប់ខ្លួនជនបរទេសជាង៧០០នាក់ ព្រោះដណ្តើមមុខរបរ ដែលបម្រុងទុកសម្រាប់ប្រជាជនរបស់ខ្លួន ហើយក្នុងនោះដែរ ជនជាតិមីយ៉ាន់ មានច្រើនជាងគេ ពោលគឺ ៣១៦នាក់ និង កម្ពុជា ឈរលេខ២ មាន១៧៥នាក់។

(រូបថត៖ Nation)

ក្រៅពីជនជាតិមីយ៉ាន់ម៉ានិងខ្មែរ, ជនបរទេសផ្សេងទៀតដែលចាប់បានដណ្តើមមុខរបរប្រជាជនថៃ មានដូចជា ឡាវ១០៦នាក់, ឥណ្ឌា៦៥នាក់, វៀតណាម៤២នាក់, ចិន៥, ចំណែក១២នាក់ទៀត មានសញ្ជាតិផ្សេងៗ។

អ្នកនាំពាក្យរដ្ឋាភិបាលលោក Kharom Polpornklang និយាយថា ក្រោយមានការតវ៉ាពីប្រជាពលរដ្ឋ នាយកដ្ឋានការងារបានបើកការបង្រ្កាប ជាលទ្ធផល ឃាត់ខ្លួនជនបរទេសចំនួន៧២១នាក់ ដែលភាគច្រើនជាអ្នកលក់ដូរតាមដងផ្លូវ ជាងកាត់សក់ អ្នកបើកបរ និងអ្នកម៉ាស្សា ហើយការត្អូញត្អែរនោះទៀតសោត ភាគច្រើនចេញពីខេត្តពឹងលើទេសចរណ៍។

អ្នកនាំពាក្យរដ្ឋាភិបាលលោក Kharom Polpornklang (រូបថត៖ Nation)

ស្របពេលជាមួយគ្នានោះដែរ នាយកដ្ឋាន បានត្រួតពិនិត្យអាជីវកម្មចំនួន២៥ ៦២៨កន្លែងនៅទូទាំងប្រទេស ចាប់ពីថ្ងៃទី១ខែតុលាឆ្នាំ២០២៣ ដល់ថ្ងៃទី១៨ខែមីនាឆ្នាំ២០២៤ ហើយបានចាត់វិធានការផ្លូវច្បាប់ប្រឆាំងអាជីវកម្មចំនួន៨២០ សម្រាប់ការជួលកន្លែងឲ្យជនបរទេស ប្រកបមុខរបរដែលបម្រុងទុកសម្រាប់ប្រជាជនថៃ។

បើយោងតាមរបាយការណ៍ ជនបរទេសដែលធ្វើការនៅក្នុងប្រទេសថៃ ភាគច្រើនស្ថិតនៅក្នុងទីក្រុងបាងកក និងតំបន់ជុំវិញនោះ ដូចជាភូកេត កោះសាមុយ ប៉ាតាយ៉ា និងឈៀងម៉ៃ។

(រូបថត៖ Nation)

ខាងក្រោមនេះ គឺជាការងារទាំង ២៧ ដែលថៃទុកសម្រាប់តែប្រជាជនខ្លួនប៉ុណ្ណោះ បើជនបរទេសហ៊ានធ្វើគឺខុសច្បាប់៖

ជាងចម្លាក់ឈើ
អ្នកបើកបរដឹកជញ្ជូនសាធារណៈ
អ្នកធ្វើការងារខាងដេញថ្លៃ
អ្នកកាត់ត្បូង
ជាងកាត់សក់
អ្នកត្បាញក្រណាត់
អ្នកត្បាញកន្ទេល
អ្នកធ្វើក្រដាសខ្ចប់
ម្នាងសិលា
អ្នកផលិតឧបករណ៍ភ្លេងថៃ
អ្នកធ្វើនីឡូវែរ
ជាងមាស ប្រាក់ និងស្ពាន់
ការងារធ្វើពីលង្ហិនប៉ូលា
អ្នកធ្វើតុក្កតាថៃ
អ្នកធ្វើបាត្រលោក
អ្នកត្បាញក្រណាត់សូត្រធ្វើដោយដៃ
ជាងចម្លាក់ព្រះពុទ្ធរូប
អ្នកធ្វើឆ័ត្រក្រដាសប្រពៃណី
ភ្នាក់ងារឈ្មួញកណ្តាល
អ្នកធ្វើការងារម៉ាស្សាបែបប្រពៃណីថៃ
អ្នកមូរបារី
មគ្គុទេសក៍ទេសចរណ៍
អ្នកដើរលក់របស់កំប៉ិកកំប៉ុក
អ្នកវាយអក្សរ
អ្នកក្រងខ្សែអំបោះ
លេខា
អ្នកផ្តល់សេវាដោះស្រាយវិវាទ

អត្ថបទ៖ សុខ សុវណ្ណ

ចុចអាន៖ ការងារទាំង២៧ ថៃទុកសម្រាប់តែប្រជាជនខ្លួនប៉ុណ្ណោះ បើពលករចំណាកស្រុកហ៊ានធ្វើ គឺខុសច្បាប់

The post ថៃ ចាប់ជនជាតិខ្មែរ ១៧៥នាក់ ព្រោះដណ្តើមមុខរបរ ដែលបម្រុងទុកសម្រាប់ពលរដ្ឋខ្លួន appeared first on Kampuchea Thmey Daily.