សារព័ត៌មាន kyivindependent បាន​​ផ្សាយ​ថា​ ប្រមុខដឹកនាំអ៊ុយក្រែន លោក ហ្សេលេនស្គី បានថ្លែងថា៖ «យើង​បន្តពង្រឹងសមត្ថភាព​​​ប្រយុទ្ធ​​តាម​ផ្លូវ​អាកាសចរណ៍​របស់អ៊ុយក្រែន រួមគ្នាជាមួយស៊ុយអែត»។ ជាក់ស្ដែង យន្តហោះចម្បាំងទាំងនេះនឹងត្រូវប្រគល់ជូន រួមផ្សំជាមួយនឹងកញ្ចប់ឧបករណ៍ពាក់ព័ន្ធ ជំនួយបច្ចេកទេស និងបរិក្ខារផ្សេងៗទៀត។

យោងតាមកិច្ចព្រមព្រៀងមុនៗដែលបានសម្រេចជាមួយនាយករដ្ឋមន្ត្រីស៊ុយអែត លោក Ulf Kristersson ប្រទេសអ៊ុយក្រែនក៏ត្រូវបានរំពឹងទុកថា នឹងទទួលបានយន្តហោះចម្បាំងប្រភេទ Gripen C/D ចំនួន ១៦​គ្រឿង​ដំបូងរបស់ខ្លួន នៅដើមឆ្នាំ២០២៧ ខាងមុខនេះផងដែរ។

ទន្ទឹមនឹងនេះ លោក ហ្សេលេនស្គី ក៏បានជួបពិភាក្សាជាមួយរដ្ឋមន្ត្រីការពារជាតិស៊ុយអែត លោក Pal Jonson ដើម្បីពិភាក្សាអំពីការអនុវត្តកិច្ចព្រមព្រៀងនេះ ក៏ដូចជាកិច្ចសហប្រតិបត្តិការការពារជាតិទ្វេភាគីឲ្យកាន់តែទូលំទូលាយ រួមទាំងការត្រៀមលក្ខណៈសម្រាប់គំនិតផ្តួចផ្តើមលើប្រព័ន្ធដ្រូន និងការងារលើសមត្ថភាពប្រឆាំងមីស៊ីលបាលីស្ទីក។

ប្រធានាធិបតី​អ៊ុយក្រែន បាន​បន្ថែមទៀតថា «ខ្ញុំសូមថ្លែងអំណរគុណដល់ប្រទេសស៊ុយអែត ទាំងប្រជាជន និងរដ្ឋាភិបាល សម្រាប់ភាពជាដៃគូដ៏មានន័យ និងការគាំទ្រឥតឈប់ឈរ ចាប់តាំងពីការចាប់ផ្តើមនៃការឈ្លានពានទ្រង់ទ្រាយធំរបស់រុស្ស៊ី»។

យន្តហោះចម្បាំងប្រភេទ Saab JAS 39 Gripen គឺជាយន្តហោះចម្បាំងពហុតួនាទី ដែលមានសមត្ថភាពអាចធ្វើប្រតិបត្តិការវាយប្រហារ​ក្នុង​ដែន​អាកាស​​​​ផ្ទាល់​, ពីអាកាសទៅ​ទីតាំង​នៅ​ដី និងបេសកកម្មស៊ើបការណ៍។

ក្រុមអ្នកវិភាគបានលើកឡើងថា គុណសម្បត្តិដ៏ធំបំផុតមួយរបស់យន្តហោះប្រភេទ​នេះសម្រាប់អ៊ុយក្រែន គឺវាត្រូវបានរចនាឡើងជាពិសេសសម្រាប់ប្រតិបត្តិការបំបែកកម្លាំងក្នុងសម័យសង្រ្គាម តាំងពីសម័យសង្រ្គាមត្រជាក់មកម៉្លេះ ដែលកាលណោះ ស៊ុយអែត បានត្រៀមលក្ខណៈទប់ទល់នឹងការវាយប្រហារដែលអាចកើតមានពីសហភាពសូវៀត មកលើមូលដ្ឋានទ័ពអាកាសរបស់ខ្លួន។

មិនតែប៉ុណ្ណោះ យន្តហោះចម្បាំង Gripen អាចផ្ទុកអាវុធស្តង់ដាររបស់ណាតូ បានយ៉ាងច្រើន រួមមាន មីស៊ីល IRIS-T, AIM-9 Sidewinder, AIM-120 AMRAAM និងមីស៊ីលវាយប្រហារពីអាកាសទៅអាកាសប្រភេទ Meteor ផងដែរ។

គួររម្លឹកដែរថា ប្រទេសស៊ុយអែត បានក្លាយជាអ្នកគាំទ្រយោធាដ៏សំខាន់មួយរបស់អ៊ុយក្រែន ចាប់តាំងពីមានការផ្ទុះឡើងនៃសង្រ្គាមឈ្លានពានទ្រង់ទ្រាយធំក្នុងឆ្នាំ២០២២ ដោយបានផ្តល់ជំនួយជា រថក្រោះ, កាំភ្លើងធំ, យានពាសដែក និងយន្តហោះស៊ើបការណ៍៕

អត្ថបទ ៖ សាង ស្រីល័ក្ខ

លោក Lukashenko ព្រមានធ្ងន់ៗដាក់​អ៊ុយក្រែនថា «កុំព្រហើនអូសបេឡារុស» ចូលសង្គ្រាម ប្រយ័ត្នសង្គ្រាម​ប្រែប្រួល​

The post លោក ហ្សេលេនស្គី ប្រកាសទិញយន្តហោះចម្បាំង Gripen​ជំនាន់ថ្មី ១៦គ្រឿងបន្ថែមទៀត ពីស៊ុយអែត appeared first on Kampuchea Thmey Daily.

រដ្ឋមន្ត្រីក្រសួងអាកាសធាតុស៊ុយអែត លោកស្រី Romina Pourmokhtari បានពរកូនប្រុសអាយុ៣ខែឈ្មោះ Adam ទៅចូលរួមកិច្ចប្រជុំក្រុមប្រឹក្សាសហភាពអឺរ៉ុបនៅប្រទេសលុចសំបួរ ដើម្បីបង្ហាញឲ្យឃើញកាន់តែច្បាស់​ពីអត្ថប្រយោជន៍នៃគោលនយោបាយច្បាប់សម្រាកថែទាំកូនសម្រាប់មាតាបិតា ដែលមិនបង្ខំឲ្យស្ត្រីត្រូវជ្រើសរើសរវាងការងារ និងទំនួលខុសត្រូវក្នុងគ្រួសារនោះឡើយ។

លោកស្រី Pourmokhtari បានប្រាប់ទីភ្នាក់ងារសារព័ត៌មាន Reuters ថា «ខ្ញុំចង់បង្ហាញខ្លួនដើម្បីធ្វើជាគំរូមួយថា យើងមិនចាំបាច់ធ្វើការជ្រើសរើស រវាងការងារនិងគ្រួសារនោះទេ។ រឿងនេះ ជាការពិតណាស់ វាក៏ទាមទារឲ្យមានដៃគូដែលមិនមានផ្នត់គំនិតបុរាណ ពោលគឺនរណាម្នាក់ដែលមានគំនិតទាន់សម័យ និងមានឆន្ទៈក្នុងការរួមដំណើរជាមួយខ្ញុំ»។

នៅក្នុងនោះផងដែរ មន្ត្រីក្រុមប្រឹក្សាសហភាពអឺរ៉ុបម្នាក់ បានបញ្ចេញមតិថា តាមអ្វីដែលស្ថាប័ននេះធ្លាប់ដឹង នេះជាលើកទីមួយហើយដែលមានទារកចូលរួមកិច្ចប្រជុំថ្នាក់រដ្ឋមន្ត្រីរបស់សហភាពអឺរ៉ុបបែបនេះ។

លោកស្រី Pourmokhtari អាយុ ៣០ឆ្នាំ គឺជារដ្ឋមន្ត្រីរដ្ឋាភិបាលដែលមានវ័យក្មេងជាងគេបំផុតនៅក្នុងប្រវត្តិសាស្ត្ររបស់ប្រទេសស៊ុយអែត នៅពេលលោកស្រី ចូលកាន់តំណែងក្នុងឆ្នាំ ២០២២។ លោកស្រីទើបតែ​បានត្រឡប់មកបំពេញការងារវិញ បន្ទាប់ពីសម្រាកថែទាំកូន ខណៈដែលស្វាមីរបស់លោកស្រី កំពុងស្ថិតក្នុងច្បាប់សម្រាករហូតដល់ការបោះឆ្នោតរបស់ស៊ុយអែតនៅខែកញ្ញា ហើយបានធ្វើដំណើរជាមួយលោកស្រីទៅកាន់ប្រទេសលុចសំបួរ ដើម្បីជួយមើលថែទារក Adam។

គួរបញ្ចាក់ដែរថា ស៊ុយអែតមានគោលនយោបាយច្បាប់សម្រាកថែទាំកូនដ៏ល្អបំផុតមួយក្នុងពិភពលោក ដែល​គាំទ្រដោយប្រព័ន្ធពន្ធដារខ្ពស់ក្នុងប្រទេសនេះ ហើយបញ្ហានេះបានក្លាយជាចំណុចក្តៅខាងនយោបាយនៅក្នុងយុទ្ធនាការឃោសនាបោះឆ្នោត។ ជាក់ស្ដែង មាតាបិតាទទួលបានការសម្រាកដោយទទួលបានប្រាក់បៀវត្សរ៍សរុបប្រហែល ១៦ខែ។ ក្នុងនោះ ច្បាប់សម្រាករយៈពេល ៩០ថ្ងៃ ត្រូវបានរក្សាទុកសម្រាប់ម្នាក់ៗដាច់ដោយឡែកពីគ្នា និងមិនអាចផ្ទេរទៅឲ្យម្នាក់ទៀតបានឡើយ។ ប្រសិនបើឪពុក ឬម្តាយមិនបានប្រើប្រាស់ពេលវេលាសម្រាកដែលបានកំណត់នេះទេ ថ្ងៃទាំងនោះនឹងត្រូវបាត់បង់ដោយស្វ័យប្រវត្តិ។

ច្បាប់សម្រាកដែលមិនអាចផ្ទេរបានទាំងនេះ ជារឿយៗត្រូវបានគេហៅថា «ខែរបស់ឪពុក» ដែលត្រូវបានដាក់ចេញក្នុងគោលបំណងលើកទឹកចិត្តឲ្យអ្នកជាឪពុក ចំណាយពេលកាន់តែច្រើនជាមួយកូនៗរបស់ពួកគេ៕

អត្ថបទ ៖ សាង ស្រីល័ក្ខ

The post ភ្ញាក់ផ្អើលពេញកិច្ចប្រជុំអឺរ៉ុប​! រដ្ឋមន្ត្រីស្រីវ័យក្មេងម្នាក់ ពរកូនង៉ែតអាយុ ៣ខែ ទៅប្រជុំជាមួយមេដឹកនាំអឺរ៉ុប appeared first on Kampuchea Thmey Daily.

យោងតាមសារព័ត៌មាន RT ដោយថ្លែងនៅក្នុងសន្និសីទសារព័ត៌មាននៅមជ្ឈមណ្ឌលបណ្តុះបណ្តាលទីភ្នាក់ងារការពារជនស៊ីវិលរបស់ស៊ុយអែត ជាមួយអគ្គលេខាធិការអង្គការណាតូ នាយករដ្ឋមន្ត្រី​ស៊ុយអែត លោក Kristersson បាននិយាយថា ៖« យើងពិតជាមិនគួរទទួលយកការលើកឡើងរបស់រុស្ស៊ីលើរឿងនេះទេ ប៉ុន្តែផ្ទុយទៅវិញ ជាការពិតណាស់ យើងត្រូវជួយអ៊ុយក្រែនឲ្យអស់ពីសមត្ថភាព ដើម្បីតម្រង់ទិស និងជួយពួកគេឲ្យតម្រង់ទិសការវាយប្រហាររបស់ពួកគេចំទិសដៅត្រឹមត្រូវ»។

លោកក៏បានបញ្ជាក់បន្ថែមថា៖ «ខ្ញុំជឿជាក់យ៉ាងមុតមាំថា ប្រជាជនអ៊ុយក្រែន ពិតជាមិនចង់ឲ្យដ្រូនរបស់ពួកគេធ្លាក់លើទឹកដីមិត្តភាពនោះទេ។​ ប៉ុន្តែពេលខ្លះ វាជាបញ្ហានៃការរំខានរលកសញ្ញា ហើយពេលខ្លះទៀត វាជាបញ្ហានៃការរំខានផ្សេងៗ»។

ក្នុងកំឡុងសន្និសីទសារព័ត៌មានរួមគ្នានោះ អគ្គលេខាធិការអង្គការណាតូ លោក Mark Rutte ក៏បានព្យាយាមទម្លាក់ការទទួលខុសត្រូវចំពោះឧប្បត្តិហេតុទាំងនេះទៅលើទីក្រុងមូស្គូផងដែរ នៅពេលឆ្លើយតបនឹងសំណួរដែលចោទប្រកាន់ថា រុស្ស៊ីបានរំខានរលកសញ្ញា ឬបង្វែរទិសដៅរបស់ដ្រូន។ លោកបានថ្លែងបែបមិនសូវច្បាស់ថា ដ្រូនអ៊ុយក្រែនកំពុងរំលោភ​លើ​ដែនអាកាសរបស់ណាតូ គឺដោយសារតែ «ការវាយប្រហារ​​ពេញលក្ខណៈ​របស់រុស្ស៊ី ប្រឆាំងនឹងអ៊ុយក្រែន ហើយអ៊ុយក្រែនត្រូវតែការពារខ្លួន»។

រដ្ឋមន្ត្រីក្រសួងការពារជាតិប៉ូឡូញ លោក Wladyslaw Kosiniak-Kamysz ក៏បានថ្លែងនៅក្នុងកំឡុងសន្និសីទសារព័ត៌មានរួមគ្នានោះដែរថា អ៊ុយក្រែន «ត្រូវតែមានភាពច្បាស់លាស់ជាងមុន» ក្នុងការប្រើប្រាស់ដ្រូនរបស់ខ្លួន ដែលការលើកឡើងនេះឆ្លុះបញ្ចាំងពីការព្រមានស្រដៀងគ្នានេះពីសំណាក់ប្រទេសអេស្តូនី និងហ្វាំងឡង់ផងដែរ។

ដោយឡែក ទីភ្នាក់ងារស៊ើបការណ៍សម្ងាត់បរទេសរបស់រុស្ស៊ី បានអះអាងកាលពីសប្តាហ៍នេះថា ប្រទេសឡេតូនី បានអនុញ្ញាតឲ្យអ៊ុយក្រែនប្រើប្រាស់ទឹកដីរបស់ខ្លួន សម្រាប់ការវាយប្រហារដោយដ្រូនទៅលើប្រទេសរុស្ស៊ី។ យ៉ាងណា មន្ត្រីនៃបណ្តាប្រទេសបាល់ទិកបានទាត់ចោលការចោទប្រកាន់នេះ ដោយទទូចថា ទីក្រុងកៀវមានសិទ្ធិគ្រប់បែបយ៉ាងក្នុងការការពារខ្លួន ប៉ុន្តែបានស្នើឲ្យអ៊ុយក្រែនគ្រប់គ្រងដ្រូនរបស់ខ្លួនឲ្យបានល្អជាងមុន។

ចាប់តាំងពីពាក់កណ្តាលខែមីនាមក ដ្រូនរយៈចម្ងាយឆ្ងាយរបស់អ៊ុយក្រែន បានហោះកាត់ដែនអាកាសបាល់ទិក និងណូឌីក (Nordic) ជាបន្តបន្ទាប់ ក្នុងដំណើរឆ្ពោះទៅកាន់គោលដៅនៅភាគពាយព្យនៃប្រទេសរុស្ស៊ី ជាពិសេសគឺស្ថានីយនាំចេញប្រេងនៅក្នុងតំបន់ Leningrad៕

អត្ថបទ៖ សាង ស្រីល័ក្ខ

រុស្ស៊ី បញ្ជូន​​ក្បាល​គ្រាប់នុយក្លេអ៊ែរ​ទៅ​​បេឡារុស សម្រាប់​លំហាត់សមយុទ្ធ​​​

The post នាយករដ្ឋមន្ត្រី ស៊ុយអែត ជំរុញ NATO ជួយ «តម្រង់​ទិស»​ ដល់​អ៊ុយក្រែន បាញ់ដ្រូនឲ្យចំគោល​ដៅ​រុស្ស៊ី appeared first on Kampuchea Thmey Daily.

លោក Kristersson បាន​ថ្លែង​​នៅ​ក្នុង​សុន្ទរក​កាល​ពី​ថ្ងៃ​អាទិត្យ​ថា សណ្តាប់​ធ្នាប់​ពិភព​លោក​ដែល​ពឹង​ផ្អែក​លើ​ច្បាប់​ គឺ​ស្ថិត​​ក្រោម​ការ​គំរាម​កំហែងយ៉ាង​​ខ្លាំង​​អស់​ជា​ច្រើន​ទសវត្សរ៍​មក​ហើយ​។

លោក​​បាន​លើក​ឡើង​នៅ​ក្នុង​សន្និ​សីទ​សន្តិ​សុខ​ប្រចាំ​ឆ្នាំ​នៅ​ភាគ​ខាង​ជើង​ប្រទេស​ស៊ុយ​អែត​ថា​៖​«យើង​​ពិត​ជា​មិន​ពេញ​ចិត្ត​ទេ​ ចំពោះ​អ្វី​ដែល​សហ​រដ្ឋ​អាមេរិក​កំពុង​អនុវត្ត​ ជា​ពិសេស​​បាន​​ធ្វើ​​​ចំពោះ​​​ប្រទេស​វ៉េណេ​ស៊ុយ​អេឡា​តែ​ម្តង។ ហើយ​ទាក់​ទង​នឹង​ច្បាប់​អន្តរ​ជាតិ ​ប្រហែល​ជា​មាន​ការ​រិះ​គន់​កាន់​តែ​ខ្លាំង​ ​ដែល​​​​លោក ត្រាំ ​បង្ហាញថា ខ្លួន​​​ប្រឆាំង​នឹង​កោះ Greenland និង​ដា​ណឺ​ម៉ាក​»។

លោក​បាន​សង្កត់​ធ្ងន់​ទៀត​ថា​៖​«ផ្ទុយ​​ទៅ​​វិញ សហ​រដ្ឋ​​អាមេរិក​​គួរ​​តែ​​អរ​គុណ​​ប្រទេស​​ដា​ណឺ​ម៉ាក ដែល​​បាន​​ក្លាយ​​ជា​​សម្ព័ន្ធ​មិត្ត​​ដ៏​​ស្មោះ​ត្រង់​​ អស់​​​រយៈ​ពេល​​ជា​ច្រើន​​ឆ្នាំ​​មក​​នេះ»។

តែយ៉ាងណា ប្រ​ធា​នា​ធិប​តី ដូ​ណាល់ ត្រាំ បាន​និយាយ​កាល​ពី​ថ្ងៃ​សុក្រ​ថា សហ​រដ្ឋ​អា​មេរិក​ចាំ​បាច់​ត្រូវ​តែ​កាន់​កាប់​ កោះ​Greenland ដើម្បី​រារាំង​រុស្ស៊ី ឬ​ចិន​ ពី​ការ​កាន់​កាប់​​​កោះ​​នេះ​នា​ពេល​អនាគត​។

​ប្រធានាធិបតី ដូណាល់ ត្រាំ ​បាន​និយាយ​ម្តង​ហើយ​ម្តង​ទៀត​ថា កប៉ាល់​រុស្ស៊ី និង​ចិន​កំពុង​ប្រតិបត្តិ​ការ​នៅ​ជិតកោះ​ Greenland ​តែ​​ប្រទេស​​​នៅ​តំបន់​អឺរ៉ុប​ខាងជើង «Nordic»​ ដែលគ្រប់គ្រង​កោះនេះ​ បាន​ច្រាន​ចោល​ការ​លើក​ឡើង​របស់​លោក ត្រាំ​​៕

ប្រែសម្រួល៖ ណឺ មិនា

The post ស៊ុយ​អែតរិះ​គន់​​​ខ្លាំង​ៗ​ចំពោះ​រដ្ឋបាលសហ​​រដ្ឋអាមេរិក​​ដែល​​​មើល​ស្រាល​ច្បាប់​អន្តរជាតិ appeared first on Kampuchea Thmey Daily.

​រ៉យ​ទ័របាន​រាយការណ៍​ថា ប្រទេស​ស៊ុយ​អែត ក៏​ដូច​ជាបណ្តាប្រទេស​​នៅ​​អឺរ៉ុប​ភាគ​ច្រើន​ផ្សេងទៀត ​បាន​បណ្តាក់​ទុន​យ៉ាង​ច្រើន​ក្នុង​វិស័យ​ការពារ​ជាតិ​ បន្ទាប់​ពី​ការ​លុក​លុយ​របស់​រុស្ស៊ី​លើ​​ប្រទេស​អ៊ុយ​ក្រែន​កាល​ពី​ខែ​​​​​កុម្ភៈឆ្នាំ​២០២២​​។ តែ​ទោះ​បី​ជា​យ៉ាងណាក៏ដោយ ទឹក​ដី​ដ៏​ធំ​របស់​ប្រទេស​ស៊ុយ​អែត នៅ​តែ​ងាយ​រងពី​​ការ​គំរាម​កំហែង​ពី​លើ​ដែន​អាកាស​។​

រដ្ឋ​មន្ត្រី​ការពារ​ជាតិ​ស៊ុយអែត លោក Pal Jonson បាន​ប្រាប់​អ្នក​សារព័ត៌មាន​ នៅ​ក្នុង​សន្និ​សីទ​សន្តិ​សុខជាតិ​​មួយ​ នៅ​ភាគ​ខាង​ជើង​ប្រទេស​ស៊ុយ​អែត​ថា​៖«បទ​ពិសោធន៍​ពី​សង្រ្គាម​នៅ​អ៊ុយ​ក្រែន​ បង្ហាញ​យ៉ាង​ច្បាស់​ថាតើ​​ប្រព័ន្ធ​ការពារ​ដែន​អាកាស​ដ៏​រឹង​មាំ និង​ធន់ ​គឺ​មាន​សារៈ​សំខាន់​ខ្លាំងប៉ុណ្ណា​​?»។

លោក​បាន​លើក​ឡើង​ថា ប្រទេស​ស៊ុយ​អែត​នឹង​ទិញ​ប្រព័ន្ធ​ការពារ​ដែន​អាកាស​រយៈ​ចម្ងាយ​ខ្លី ដើម្បី​ការពារ​ទីក្រុង ស្ពាន រោង​ចក្រ​ថាមពល​ និង​ហេដ្ឋា​រចនា​សម្ព័ន្ធ​សំខាន់ៗ​ផ្សេង​ទៀត​។

គួរ​ឱ្យ​ដឹង​ផង​ដែរ​ថា កាល​ពី​ថ្ងៃ​អាទិត្យ នាយក​រដ្ឋ​មន្ត្រីស៊ុយ​អែត​ លោក​ Ulf Kristersson បាន​រិះ​គន់រដ្ឋ​បាល​អា​មេ​រិក​ រឿង​​វោហាសាស្ត្រ​គំរាម​កំហែង ​​ប្រឆាំង​នឹងកោះ​ Greenland ដែលស្ថិតនៅ​ក្រោម​ការ​គ្រប់គ្រង​នាពេលបច្ចុប្បន្ន​របស់​​ប្រទេស​ដាណឺម៉ាក។

លោក​ បាន​សង្កត់​ធ្ងន់​ថា ​សហ​រដ្ឋ​អាមេរិក​គួរ​តែ​អរគុណ​ប្រទេស​ដាណឺ​ម៉ាក ​សម្រាប់​ការ​ធ្វើ​ជា​សម្ព័ន្ធ​មិត្ត​ដ៏​ស្មោះ​ត្រង់​អស់​រយៈ​ពេល​ដ៏​យូរ​មក​ហើយ​៕

ប្រែ​សម្រួល៖ ណឺ មិនា

The post មេរៀន​ពី​រុស្ស៊ីវាយប្រហារ​អ៊ុយក្រែន បង្ខំ​ស៊ុយ​អែត​​​​វិនិយោគ​លើ​ប្រព័ន្ធ​ការពារ​ដែន​អាកាស​​ appeared first on Kampuchea Thmey Daily.

នៅក្នុងរបាយការណ៍មួយដែលបានដាក់ជូនរដ្ឋាភិបាលនៅសប្តាហ៍នេះ កងកម្លាំងយោធាស៊ុយអែតបាននិយាយថា ខ្លួនចង់បានប្រព័ន្ធអាវុធដែលមានចម្ងាយរហូតដល់ ២,០០០គីឡូម៉ែត្រ ( ដើម្បីអាចវាយប្រហារទីតាំងយោធា និងហេដ្ឋារចនាសម្ព័ន្ធសំខាន់ៗនៅពីក្រោយខ្សែសត្រូវ។ យ៉ាងណា ចម្ងាយផ្លូវត្រង់រវាងទីក្រុងមូស្គូ និងទីក្រុងស្តុកខុម (Stockholm) គឺត្រឹមតែជាង ១៤០០ គីឡូម៉ែត្រប៉ុណ្ណោះ។

រដ្ឋមន្ត្រីក្រសួងការពារជាតិលោក Pal Jonson បានថ្លែងនៅក្នុងបទសម្ភាសន៍មួយទៅកាន់ Reuters ថា «បទពិសោធន៍ពីសង្គ្រាមនៅអ៊ុយក្រែនបង្ហាញថា រុស្ស៊ីកំពុងអភិវឌ្ឍសមត្ថភាពរយៈចម្ងាយឆ្ងាយរបស់ខ្លួនយ៉ាងសកម្ម ទាំងមីស៊ីលបញ្ជាចម្ងាយឆ្ងាយ មីស៊ីលផ្លោង និងយន្តហោះគ្មានមនុស្សបើករយៈចម្ងាយឆ្ងាយ។ ដូច្នេះ យើងត្រូវតែកសាងការរារាំងដ៏រឹងមាំប្រឆាំងនឹងការគំរាមកំហែងនោះ»។

កន្លងមក កងទ័ពអាកាសស៊ុយអែតបានបញ្ជាទិញមីស៊ីលបញ្ជាចម្ងាយឆ្ងាយ Taurus របស់ស៊ុយអែត-អាល្លឺម៉ង់ ដែលមានចម្ងាយប្រហែល ៥០០ គីឡូម៉ែត្រ សម្រាប់យន្តហោះចម្បាំង Gripen របស់ខ្លួន ប៉ុន្តែលោក Jonson បាននិយាយថា ប្រព័ន្ធផ្សេងទៀតក៏អាចត្រូវបានពិចារណាផងដែរ។

ជាក់ស្ដែង របាយការណ៍នេះក៏បាននិយាយផងដែរថា ប្រទេសរុស្ស៊ីអាចនឹងបង្កើនសមត្ថភាពយោធារបស់ខ្លួនក្នុងរយៈពេល៥ខាងមុខ ហើយស៊ុយអែតត្រូវបង្កើនសមត្ថភាពការពារដែនអាកាស និងចារកម្មរបស់ខ្លួន រួមទាំងយន្តហោះគ្មានមនុស្សបើក និងផ្កាយរណបចារកម្មផងដែរ។

យ៉ាងណាមិញ បន្ទាប់ពី​ជម្លោះ​អ៊ុយក្រែន​កាន់តែ​តានតឹង ស៊ុយអែត​បាន​បោះបង់​អព្យាក្រឹតភាព ហើយ​ចូល​ជា​សមាជិក​ណាតូ។ ក្រោយមក បានក្លាយជាអ្នកគាំទ្រដ៏ខ្ជាប់ខ្ជួនបំផុតរបស់ក្រុងកៀវ ដោយផ្គត់ផ្គង់ប្រព័ន្ធកាំភ្លើងធំ អាវុធប្រឆាំងរថក្រោះ សមាសធាតុការពារអាកាស គ្រាប់រំសេវ និងការបណ្តុះបណ្តាលដល់កងកម្លាំងអ៊ុយក្រែន។ ជាងនេះទៀតដែរ ក្នុងខែមិថុនា ខ្លួនបានយល់ព្រមបង្កើនការចំណាយលើវិស័យការពារជាតិ ដើម្បីផ្គូផ្គងគោលដៅថ្មីរបស់ណាតូគឺ ៥% នៃផលិតផលក្នុងស្រុកសរុប ដោយកើនឡើងពី ២.៧% នាបច្ចុប្បន្ន៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ភាពខុសគ្នារវាងយន្តហោះចម្បាំង Gripen និង Rafale ដែល អ៊ុយក្រែន គ្រោងទិញឆាប់ៗ

The post ស៊ុយអែត ចង់បានប្រព័ន្ធអាវុធរយៈចម្ងាយឆ្ងាយអាចបាញ់ជ្រៅដល់ រុស្ស៊ី តែម្ដង appeared first on Kampuchea Thmey Daily.

តាមការផ្សាយរបស់ The Nation នៅថ្ងៃពុធទី២៧ខែសីហាឆ្នាំ២០២៥, លោក Jonson បានជំរុញឲ្យថៃនិងកម្ពុជា បន្ថយកម្តៅស្ថានការណ៍នៅព្រំដែន និងលើកទឹកចិត្តភាគីទាំងពីរ ត្រូវអនុញ្ញាតឲ្យគណៈកម្មការសង្កេតការណ៍អាស៊ាន ចូលជួយផ្សះផ្សារទំនាក់ទំនងរវាងប្រទេសទាំងពីរផងដែរ។ 

កាលពីថ្ងៃចន្ទ ​​​​អគ្គមេបញ្ជាការ​កងទ័ព​អាកាសថៃ Panpakdee Pattanakul និង រដ្ឋមន្ត្រី​ក្រសួង​ការបរទេស Maris Sangiampongsa បានធ្វើដំណើរទៅ​កាន់​ប្រទេសស៊ុយអែត​ ដើម្បី​ចុះ​​ហត្ថលេខា​​​​លើការ​ទិញ​-លក់​ យន្តហោះ​ចម្បាំង ប្រភេទ​ Gripen E/F ចំនួន​​៤គ្រឿង។

កិច្ចព្រមព្រៀង​​ទិញ​យន្តហោះ​​ចម្បាំង​ល្បឿងលឿន​ជាងសំឡេងរបស់​ភាគី​ថៃ​ បាន​ក្លាយ​ជា​​ប្រធានបទ​ចម្រូង​ចម្រាស​​មួយ​ បន្ទាប់​ពី​​​យោធាខ្លួន​ប្រើ​​​យន្តហោះ​ចម្បាំង ​Gripen C/D ​​ដែល​ពួក​គេ​បាន​ទិញ​ពី​ស៊ុយអែត​​កាលឆ្នាំ​២០១១ មក​វាយប្រហារ​​​​កម្ពុជា​​ ក្នុង​ការ​​​ប៉ុនប៉ង​ឈ្លាន​ពាន​​មិនបានសម្រេចចន្លោះ​ថ្ងៃទី​២៤ដល់ថ្ងៃទី​២៨​ខែ​​កក្កដាឆ្នាំ​២០២៥​។

ថៃ​​ជា​ប្រទេសតែមួយ​គត់នៅអាស៊ីអាគេ្នយ៍​ ដែល​​​ទិញ​​​​យន្តហោះ​ចម្បាំង​​ប្រភេទ Gripen ផលិត​​ដោយ​​ ​​ស៊ុយអែត​​សម្រាប់​ប្រើ​ប្រាស់​ឈ្លាន​ពាន​​ប្រទេស​ជាប់​ខ្លួន​។

យ៉ាងណា ការ​ប្រើប្រាស់សម្រាប់​ការ​ឈ្លាន​ពាន​​​របស់​ថៃ អាច​នឹ​ងត្រូវ​ប្រឈម​​​​​បណ្តឹង​តវ៉ា​«ឧក្រិដ្ឋកម្ម​សង្គ្រាម»។ ជាមួយ​គ្នា​នោះ អ្នក​លេង​បណ្តាញ​សង្គម​មាន​ទាំងជន​ជាតិកម្ពុជា និង ជន​បរទេស​ផង ​បង្ហាញ​ការ​តវ៉ា​​យ៉ាង​ខ្លាំង​ចំពោះ​រដ្ឋាភិបាល​ទីក្រុងស្តុកខុល​ ដើម្បី​ឲ្យ​ពិចារណា​ឡើង​វិញ​នូវ​កិច្ចសន្យា​ដែល​​​​​​ខ្លួន​ធ្វើ​ជាមួយអាជ្ញាធរថៃ​​៕

អត្ថបទ៖ សុខ សុវណ្ណ

ចុចអាន៖ អ្នកជំនាញស៊ុយអែត៖ ការលក់ Gripen Fighter Jets ទៅឱ្យថៃ ជាកិច្ចព្រមព្រៀងដ៏ផុយស្រួយ ប្រឈមការលុបចោលគ្រប់ពេលវេលា

The post ក្រោយព្រមលក់ Gripen ឲ្យក្រុងបាងកក, ​ស៊ុយអែត​ អំពាវនាវ កម្ពុជា-ថៃ បន្ថយភាពតានតឹង appeared first on Kampuchea Thmey Daily.

អ្នកជំនាញនយោបាយជាច្រើន បានព្រមានទៅកាន់រដ្ឋាភិបាល ទីក្រុង​ Stockholm  ជុំវិញការសម្រេចចិត្តចុះហត្ថលេខាលក់ Saab JAS-39 Gripen ម៉ូដែល E និង F ចំនួន៤គ្រឿងទៅកាន់ប្រទេសថៃ ហើយចាត់ទុកជាកិច្ចព្រមចុះហត្ថលេខាកាលពីថ្ងៃ ២៥ សីហា ធ្វើឡើងមិនចំកាលៈទេសៈ។

លោក Martin Lundmark គ្រូឯកទេសប្រព័ន្ធការពារជាតិ នៃសាកលវិទ្យាល័យការពារជាតិ ប្រទេសស៊ុយអែត បានលើកឡើងថា កិច្ចព្រមព្រៀងខាងលើលក់យន្តចម្បាំងកម្រិតកំពូលទៅឱ្យប្រទេសថៃនៅពេលនេះ គឺជាកិច្ចព្រមព្រៀងដែលកំពុងប្រឈមមុខនឹងគ្រោះថ្នាក់ជាទីបំផុត។

“ប្រសិនជាមានការឈ្លានពានណាមួយកើតឡើង ឬផ្ទុះចេញសង្គ្រាមធំ ឬក៏ប្រសិនជាប្រទេសថៃ បើកការឈ្លានពានកម្ពុជា ដណ្តើមកាន់កាប់ទឹកដីជម្លោះ ដូច្នេះ ខ្ញុំជឿថា កិច្ចព្រមព្រៀងនេះ នឹងត្រូវផ្អាក ឬអាចឈានទៅដល់ការលុបចោលតែម្តង” នេះជាការលើកឡើងរបស់លោក Martin Lundmark។

ក្នុងសេចក្តីថ្លែងការណ៍របស់លោកធ្វើឡើងនាព្រឹកថ្ងៃ ២៦ សីហា កន្លងទៅ គឺបានបង្កប់នូវចំណុចសំខាន់មួយពាក់ព័ន្ធទៅនឹងច្បាប់នាំចេញសព្វាវុធរបស់ខ្លួន តម្រូវឱ្យប្រកាន់ភ្ជាប់នូវលទ្ធិប្រជាធិបតេយ្យ និងគោរពសិទ្ធិមនុស្សយ៉ាងតឹងរឹងបំផុត មានន័យថា អធិការកិច្ចសម្រាប់ផលិតផលយុទ្ធសាស្ត្រហៅថា ISP ត្រូវតែវាយតម្លៃឱ្យបានគ្រប់ជ្រុងជ្រោយតើថាប្រទេសដែលទិញសព្វាវុធពីស៊ុយអែត បានបំពេញលក្ខខណ្ឌសិទ្ធិមនុស្ស និងប្រជាធិបតេយ្យស្របតាមគោលការណ៍របស់ខ្លួន ឬយ៉ាងណា។

លោក Martin Lundmark សង្កត់ធ្ងន់ថា លទ្ធិប្រជាធិបតេយ្យនៅក្នុងប្រទេសថៃបច្ចុប្បន្ន ស្ថិតក្នុងកម្រិតទាបមួយ បើធៀបទៅនឹងស្ថានភាពកាលពីអតីតកាល ពោលគឺ កិច្ចព្រមព្រៀងកាលពីឆ្នាំ២០១១។

“ក្នុងឆ្នាំ២០១១ ពេលដែលកិច្ចព្រមព្រៀងលក់យន្តហោះចម្បាំងធ្វើឡើង ថៃពេលនោះត្រូវចាត់ទុកជាប្រទេសប្រជាធិបតេយ្យពេញលេញមួយ។ សំណួរសួរថា បច្ចុប្បន្ន លទ្ធិប្រជាធិបតេយ្យក្នុងប្រទេសថៃ សមស្របតាមការទាមទាររបស់រដ្ឋាភិបាលស៊ុយអែត ឬក៏យ៉ាងណា”៕

The post អ្នកជំនាញស៊ុយអែត៖ ការលក់ Gripen Fighter Jets ទៅឱ្យថៃ ជាកិច្ចព្រមព្រៀងដ៏ផុយស្រួយ ប្រឈមការលុបចោលគ្រប់ពេលវេលា appeared first on Kampuchea Thmey Daily.