ប្រទេសស៊ុយអែត Archives - Kampuchea Thmey Daily

នាយករដ្ឋមន្ត្រី ស៊ុយអែត ជំរុញ NATO ជួយ «តម្រង់ទិស» ដល់អ៊ុយក្រែន បាញ់ដ្រូនឲ្យចំគោលដៅរុស្ស៊ី

សាង ស្រីល័ក្ខ — Fri, 22 May 2026 04:17:29 +0000

នាយករដ្ឋមន្ត្រីស៊ុយអែត លោក Ulf Kristersson បាននិយាយកាលពីថ្ងៃទី២១ ខែឧសភា ថា បណ្តាប្រទេសជាសមាជិកអង្គការណាតូ គួរតែជួយអ៊ុយក្រែនក្នុងការ «តម្រង់ទិស» វាយប្រហារដោយដ្រូនឲ្យចំទិសដៅត្រឹមត្រូវ ព្រមទាំងបានទម្លាក់កំហុសលើទីក្រុងមូស្គូ ចំពោះករណីដែលដ្រូនអ៊ុយក្រែនហោះចូលដែនអាកាសរបស់ប្រទេសក្នុងប្លុកយោធាណាតូ ដឹកនាំដោយអាមេរិកមួយនេះជាបន្តបន្ទាប់។

នាយករដ្ឋមន្ត្រីស៊ុយអែត លោក Ulf Kristersson (រូបភាព៖Reuters)

យោងតាមសារព័ត៌មាន RT ដោយថ្លែងនៅក្នុងសន្និសីទសារព័ត៌មាននៅមជ្ឈមណ្ឌលបណ្តុះបណ្តាលទីភ្នាក់ងារការពារជនស៊ីវិលរបស់ស៊ុយអែត ជាមួយអគ្គលេខាធិការអង្គការណាតូ នាយករដ្ឋមន្ត្រីស៊ុយអែត លោក Kristersson បាននិយាយថា ៖« យើងពិតជាមិនគួរទទួលយកការលើកឡើងរបស់រុស្ស៊ីលើរឿងនេះទេ ប៉ុន្តែផ្ទុយទៅវិញ ជាការពិតណាស់ យើងត្រូវជួយអ៊ុយក្រែនឲ្យអស់ពីសមត្ថភាព ដើម្បីតម្រង់ទិស និងជួយពួកគេឲ្យតម្រង់ទិសការវាយប្រហាររបស់ពួកគេចំទិសដៅត្រឹមត្រូវ»។

លោកក៏បានបញ្ជាក់បន្ថែមថា៖ «ខ្ញុំជឿជាក់យ៉ាងមុតមាំថា ប្រជាជនអ៊ុយក្រែន ពិតជាមិនចង់ឲ្យដ្រូនរបស់ពួកគេធ្លាក់លើទឹកដីមិត្តភាពនោះទេ។ ប៉ុន្តែពេលខ្លះ វាជាបញ្ហានៃការរំខានរលកសញ្ញា ហើយពេលខ្លះទៀត វាជាបញ្ហានៃការរំខានផ្សេងៗ»។

ក្នុងកំឡុងសន្និសីទសារព័ត៌មានរួមគ្នានោះ អគ្គលេខាធិការអង្គការណាតូ លោក Mark Rutte ក៏បានព្យាយាមទម្លាក់ការទទួលខុសត្រូវចំពោះឧប្បត្តិហេតុទាំងនេះទៅលើទីក្រុងមូស្គូផងដែរ នៅពេលឆ្លើយតបនឹងសំណួរដែលចោទប្រកាន់ថា រុស្ស៊ីបានរំខានរលកសញ្ញា ឬបង្វែរទិសដៅរបស់ដ្រូន។ លោកបានថ្លែងបែបមិនសូវច្បាស់ថា ដ្រូនអ៊ុយក្រែនកំពុងរំលោភលើដែនអាកាសរបស់ណាតូ គឺដោយសារតែ «ការវាយប្រហារពេញលក្ខណៈរបស់រុស្ស៊ី ប្រឆាំងនឹងអ៊ុយក្រែន ហើយអ៊ុយក្រែនត្រូវតែការពារខ្លួន»។

រដ្ឋមន្ត្រីក្រសួងការពារជាតិប៉ូឡូញ លោក Wladyslaw Kosiniak-Kamysz ក៏បានថ្លែងនៅក្នុងកំឡុងសន្និសីទសារព័ត៌មានរួមគ្នានោះដែរថា អ៊ុយក្រែន «ត្រូវតែមានភាពច្បាស់លាស់ជាងមុន» ក្នុងការប្រើប្រាស់ដ្រូនរបស់ខ្លួន ដែលការលើកឡើងនេះឆ្លុះបញ្ចាំងពីការព្រមានស្រដៀងគ្នានេះពីសំណាក់ប្រទេសអេស្តូនី និងហ្វាំងឡង់ផងដែរ។

ដោយឡែក ទីភ្នាក់ងារស៊ើបការណ៍សម្ងាត់បរទេសរបស់រុស្ស៊ី បានអះអាងកាលពីសប្តាហ៍នេះថា ប្រទេសឡេតូនី បានអនុញ្ញាតឲ្យអ៊ុយក្រែនប្រើប្រាស់ទឹកដីរបស់ខ្លួន សម្រាប់ការវាយប្រហារដោយដ្រូនទៅលើប្រទេសរុស្ស៊ី។ យ៉ាងណា មន្ត្រីនៃបណ្តាប្រទេសបាល់ទិកបានទាត់ចោលការចោទប្រកាន់នេះ ដោយទទូចថា ទីក្រុងកៀវមានសិទ្ធិគ្រប់បែបយ៉ាងក្នុងការការពារខ្លួន ប៉ុន្តែបានស្នើឲ្យអ៊ុយក្រែនគ្រប់គ្រងដ្រូនរបស់ខ្លួនឲ្យបានល្អជាងមុន។

ចាប់តាំងពីពាក់កណ្តាលខែមីនាមក ដ្រូនរយៈចម្ងាយឆ្ងាយរបស់អ៊ុយក្រែន បានហោះកាត់ដែនអាកាសបាល់ទិក និងណូឌីក (Nordic) ជាបន្តបន្ទាប់ ក្នុងដំណើរឆ្ពោះទៅកាន់គោលដៅនៅភាគពាយព្យនៃប្រទេសរុស្ស៊ី ជាពិសេសគឺស្ថានីយនាំចេញប្រេងនៅក្នុងតំបន់ Leningrad៕

អត្ថបទ៖ សាង ស្រីល័ក្ខ

រុស្ស៊ី បញ្ជូនក្បាលគ្រាប់នុយក្លេអ៊ែរទៅបេឡារុស សម្រាប់លំហាត់សមយុទ្ធ

The post នាយករដ្ឋមន្ត្រី ស៊ុយអែត ជំរុញ NATO ជួយ «តម្រង់ទិស» ដល់អ៊ុយក្រែន បាញ់ដ្រូនឲ្យចំគោលដៅរុស្ស៊ី appeared first on Kampuchea Thmey Daily.

ស៊ុយអែតរិះគន់ខ្លាំងៗចំពោះរដ្ឋបាលសហរដ្ឋអាមេរិកដែលមើលស្រាលច្បាប់អន្តរជាតិ

Minea Neu — Mon, 12 Jan 2026 07:43:56 +0000

នាយករដ្ឋមន្ត្រីស៊ុយអែត លោក Ulf Kristersson បានថ្លែងកាលពីថ្ងៃអាទិត្យថា ប្រទេសស៊ុយអែតមិនពេញចិត្តយ៉ាងខ្លាំង ចំពោះការលើកឡើងដែលគំរាមកំហែងប្រឆាំងនឹងកោះ Greenland គ្រប់គ្រងដោយប្រទេសដាណឺម៉ាក ពីសំណាក់រដ្ឋបាលរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ។ នេះបើតាមរ៉យទ័រ។

លោក Ulf Kristersson, Reuters.

លោក Kristersson បានថ្លែងនៅក្នុងសុន្ទរកកាលពីថ្ងៃអាទិត្យថា សណ្តាប់ធ្នាប់ពិភពលោកដែលពឹងផ្អែកលើច្បាប់ គឺស្ថិតក្រោមការគំរាមកំហែងយ៉ាងខ្លាំងអស់ជាច្រើនទសវត្សរ៍មកហើយ។

លោកបានលើកឡើងនៅក្នុងសន្និសីទសន្តិសុខប្រចាំឆ្នាំនៅភាគខាងជើងប្រទេសស៊ុយអែតថា៖«យើងពិតជាមិនពេញចិត្តទេ ចំពោះអ្វីដែលសហរដ្ឋអាមេរិកកំពុងអនុវត្ត ជាពិសេសបានធ្វើចំពោះប្រទេសវ៉េណេស៊ុយអេឡាតែម្តង។ ហើយទាក់ទងនឹងច្បាប់អន្តរជាតិ ប្រហែលជាមានការរិះគន់កាន់តែខ្លាំង ដែលលោក ត្រាំ បង្ហាញថា ខ្លួនប្រឆាំងនឹងកោះ Greenland និងដាណឺម៉ាក»។

លោកបានសង្កត់ធ្ងន់ទៀតថា៖«ផ្ទុយទៅវិញ សហរដ្ឋអាមេរិកគួរតែអរគុណប្រទេសដាណឺម៉ាក ដែលបានក្លាយជាសម្ព័ន្ធមិត្តដ៏ស្មោះត្រង់ អស់រយៈពេលជាច្រើនឆ្នាំមកនេះ»។

តែយ៉ាងណា ប្រធានាធិបតី ដូណាល់ ត្រាំ បាននិយាយកាលពីថ្ងៃសុក្រថា សហរដ្ឋអាមេរិកចាំបាច់ត្រូវតែកាន់កាប់ កោះGreenland ដើម្បីរារាំងរុស្ស៊ី ឬចិន ពីការកាន់កាប់កោះនេះនាពេលអនាគត។

ប្រធានាធិបតី ដូណាល់ ត្រាំ បាននិយាយម្តងហើយម្តងទៀតថា កប៉ាល់រុស្ស៊ី និងចិនកំពុងប្រតិបត្តិការនៅជិតកោះ Greenland តែប្រទេសនៅតំបន់អឺរ៉ុបខាងជើង «Nordic» ដែលគ្រប់គ្រងកោះនេះ បានច្រានចោលការលើកឡើងរបស់លោក ត្រាំ៕

ប្រែសម្រួល៖ ណឺ មិនា

The post ស៊ុយអែតរិះគន់ខ្លាំងៗចំពោះរដ្ឋបាលសហរដ្ឋអាមេរិកដែលមើលស្រាលច្បាប់អន្តរជាតិ appeared first on Kampuchea Thmey Daily.

មេរៀនពីរុស្ស៊ីវាយប្រហារអ៊ុយក្រែន បង្ខំស៊ុយអែតវិនិយោគលើប្រព័ន្ធការពារដែនអាកាស

Minea Neu — Mon, 12 Jan 2026 03:18:05 +0000

រដ្ឋាភិបាលស៊ុយអែតដែលបានរុញប្រទេសនេះក្លាយជាសមាជិកណាតូកាលខែមីនាឆ្នាំ២០២៤ បាននិយាយកាលពីថ្ងៃអាទិត្យថា ប្រទេសស៊ុយអែតនឹងចំណាយប្រាក់ ១.៦ប៊ីលានដុល្លារ លើវិស័យការពារដែនអាកាស ក្នុងគោលបំណងការពារជាចម្បងដល់ប្រជាជនស្លូតត្រង់ និងហេដ្ឋារចនាសម្ព័ន្ធស៊ីវិល។

រដ្ឋមន្ត្រីការពារជាតិស៊ុយអែត លោក Pal Jonson។ Reuters.

រ៉យទ័របានរាយការណ៍ថា ប្រទេសស៊ុយអែត ក៏ដូចជាបណ្តាប្រទេសនៅអឺរ៉ុបភាគច្រើនផ្សេងទៀត បានបណ្តាក់ទុនយ៉ាងច្រើនក្នុងវិស័យការពារជាតិ បន្ទាប់ពីការលុកលុយរបស់រុស្ស៊ីលើប្រទេសអ៊ុយក្រែនកាលពីខែកុម្ភៈឆ្នាំ២០២២។ តែទោះបីជាយ៉ាងណាក៏ដោយ ទឹកដីដ៏ធំរបស់ប្រទេសស៊ុយអែត នៅតែងាយរងពីការគំរាមកំហែងពីលើដែនអាកាស។

រដ្ឋមន្ត្រីការពារជាតិស៊ុយអែត លោក Pal Jonson បានប្រាប់អ្នកសារព័ត៌មាន នៅក្នុងសន្និសីទសន្តិសុខជាតិមួយ នៅភាគខាងជើងប្រទេសស៊ុយអែតថា៖«បទពិសោធន៍ពីសង្រ្គាមនៅអ៊ុយក្រែន បង្ហាញយ៉ាងច្បាស់ថាតើប្រព័ន្ធការពារដែនអាកាសដ៏រឹងមាំ និងធន់ គឺមានសារៈសំខាន់ខ្លាំងប៉ុណ្ណា?»។

លោកបានលើកឡើងថា ប្រទេសស៊ុយអែតនឹងទិញប្រព័ន្ធការពារដែនអាកាសរយៈចម្ងាយខ្លី ដើម្បីការពារទីក្រុង ស្ពាន រោងចក្រថាមពល និងហេដ្ឋារចនាសម្ព័ន្ធសំខាន់ៗផ្សេងទៀត។

គួរឱ្យដឹងផងដែរថា កាលពីថ្ងៃអាទិត្យ នាយករដ្ឋមន្ត្រីស៊ុយអែត លោក Ulf Kristersson បានរិះគន់រដ្ឋបាលអាមេរិក រឿងវោហាសាស្ត្រគំរាមកំហែង ប្រឆាំងនឹងកោះ Greenland ដែលស្ថិតនៅក្រោមការគ្រប់គ្រងនាពេលបច្ចុប្បន្នរបស់ប្រទេសដាណឺម៉ាក។

លោក បានសង្កត់ធ្ងន់ថា សហរដ្ឋអាមេរិកគួរតែអរគុណប្រទេសដាណឺម៉ាក សម្រាប់ការធ្វើជាសម្ព័ន្ធមិត្តដ៏ស្មោះត្រង់អស់រយៈពេលដ៏យូរមកហើយ៕

ប្រែសម្រួល៖ ណឺ មិនា

The post មេរៀនពីរុស្ស៊ីវាយប្រហារអ៊ុយក្រែន បង្ខំស៊ុយអែតវិនិយោគលើប្រព័ន្ធការពារដែនអាកាស appeared first on Kampuchea Thmey Daily.

ស៊ុយអែត ចង់បានប្រព័ន្ធអាវុធរយៈចម្ងាយឆ្ងាយអាចបាញ់ជ្រៅដល់ រុស្ស៊ី តែម្ដង

សាង ស្រីល័ក្ខ — Wed, 26 Nov 2025 03:24:27 +0000

ប្រទេសស៊ុយអែត ត្រូវការកាំជ្រួចមីស៊ីលរយៈចម្ងាយឆ្ងាយ ដើម្បីវាយប្រហារគោលដៅជ្រៅទៅដល់បណ្តាប្រទេសដែលខ្លួនចាត់ទុកថាជាការគំរាមកំហែង ដូចជារុស្ស៊ីជាដើម។ នេះបើយោងតាមរបាយការណ៍របស់កងកម្លាំងប្រដាប់អាវុធស៊ុយអែត ចេញផ្សាយកាលពីថ្ងៃអង្គារ៍ទី២៥ វិច្ឆិកា ឆ្នាំ២០២៥។

រដ្ឋមន្ត្រីក្រសួងការពារជាតិលោក Pal Jonson (រូបភាព៖Reuters)

នៅក្នុងរបាយការណ៍មួយដែលបានដាក់ជូនរដ្ឋាភិបាលនៅសប្តាហ៍នេះ កងកម្លាំងយោធាស៊ុយអែតបាននិយាយថា ខ្លួនចង់បានប្រព័ន្ធអាវុធដែលមានចម្ងាយរហូតដល់ ២,០០០គីឡូម៉ែត្រ ( ដើម្បីអាចវាយប្រហារទីតាំងយោធា និងហេដ្ឋារចនាសម្ព័ន្ធសំខាន់ៗនៅពីក្រោយខ្សែសត្រូវ។ យ៉ាងណា ចម្ងាយផ្លូវត្រង់រវាងទីក្រុងមូស្គូ និងទីក្រុងស្តុកខុម (Stockholm) គឺត្រឹមតែជាង ១៤០០ គីឡូម៉ែត្រប៉ុណ្ណោះ។

រដ្ឋមន្ត្រីក្រសួងការពារជាតិលោក Pal Jonson បានថ្លែងនៅក្នុងបទសម្ភាសន៍មួយទៅកាន់ Reuters ថា «បទពិសោធន៍ពីសង្គ្រាមនៅអ៊ុយក្រែនបង្ហាញថា រុស្ស៊ីកំពុងអភិវឌ្ឍសមត្ថភាពរយៈចម្ងាយឆ្ងាយរបស់ខ្លួនយ៉ាងសកម្ម ទាំងមីស៊ីលបញ្ជាចម្ងាយឆ្ងាយ មីស៊ីលផ្លោង និងយន្តហោះគ្មានមនុស្សបើករយៈចម្ងាយឆ្ងាយ។ ដូច្នេះ យើងត្រូវតែកសាងការរារាំងដ៏រឹងមាំប្រឆាំងនឹងការគំរាមកំហែងនោះ»។

កន្លងមក កងទ័ពអាកាសស៊ុយអែតបានបញ្ជាទិញមីស៊ីលបញ្ជាចម្ងាយឆ្ងាយ Taurus របស់ស៊ុយអែត-អាល្លឺម៉ង់ ដែលមានចម្ងាយប្រហែល ៥០០ គីឡូម៉ែត្រ សម្រាប់យន្តហោះចម្បាំង Gripen របស់ខ្លួន ប៉ុន្តែលោក Jonson បាននិយាយថា ប្រព័ន្ធផ្សេងទៀតក៏អាចត្រូវបានពិចារណាផងដែរ។

ជាក់ស្ដែង របាយការណ៍នេះក៏បាននិយាយផងដែរថា ប្រទេសរុស្ស៊ីអាចនឹងបង្កើនសមត្ថភាពយោធារបស់ខ្លួនក្នុងរយៈពេល៥ខាងមុខ ហើយស៊ុយអែតត្រូវបង្កើនសមត្ថភាពការពារដែនអាកាស និងចារកម្មរបស់ខ្លួន រួមទាំងយន្តហោះគ្មានមនុស្សបើក និងផ្កាយរណបចារកម្មផងដែរ។

យ៉ាងណាមិញ បន្ទាប់ពីជម្លោះអ៊ុយក្រែនកាន់តែតានតឹង ស៊ុយអែតបានបោះបង់អព្យាក្រឹតភាព ហើយចូលជាសមាជិកណាតូ។ ក្រោយមក បានក្លាយជាអ្នកគាំទ្រដ៏ខ្ជាប់ខ្ជួនបំផុតរបស់ក្រុងកៀវ ដោយផ្គត់ផ្គង់ប្រព័ន្ធកាំភ្លើងធំ អាវុធប្រឆាំងរថក្រោះ សមាសធាតុការពារអាកាស គ្រាប់រំសេវ និងការបណ្តុះបណ្តាលដល់កងកម្លាំងអ៊ុយក្រែន។ ជាងនេះទៀតដែរ ក្នុងខែមិថុនា ខ្លួនបានយល់ព្រមបង្កើនការចំណាយលើវិស័យការពារជាតិ ដើម្បីផ្គូផ្គងគោលដៅថ្មីរបស់ណាតូគឺ ៥% នៃផលិតផលក្នុងស្រុកសរុប ដោយកើនឡើងពី ២.៧% នាបច្ចុប្បន្ន៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ភាពខុសគ្នារវាងយន្តហោះចម្បាំង Gripen និង Rafale ដែល អ៊ុយក្រែន គ្រោងទិញឆាប់ៗ

The post ស៊ុយអែត ចង់បានប្រព័ន្ធអាវុធរយៈចម្ងាយឆ្ងាយអាចបាញ់ជ្រៅដល់ រុស្ស៊ី តែម្ដង appeared first on Kampuchea Thmey Daily.

ក្រោយព្រមលក់ Gripen ឲ្យក្រុងបាងកក, ស៊ុយអែត អំពាវនាវ កម្ពុជា-ថៃ បន្ថយភាពតានតឹង

Sok Sovann — Wed, 27 Aug 2025 07:23:08 +0000

រដ្ឋមន្ត្រីការពារជាតិស៊ុយអែត Pål Jonson បានអំពាវនាវឲ្យថៃនិងកម្ពុជាបន្ធូរបន្ថយភាពតានតឹងនៅព្រំដែន ដ្បិតខ្លួនទើបព្រមលក់យន្តហោះចម្បាំង Gripen ចំនួន៤គ្រឿងទៅឲ្យទីក្រុងបាងកក ក៏ដោយ។

រដ្ឋមន្ត្រីការពារជាតិស៊ុយអែត Pål Jonson (រូបថត៖ Reuters)

តាមការផ្សាយរបស់ The Nation នៅថ្ងៃពុធទី២៧ខែសីហាឆ្នាំ២០២៥, លោក Jonson បានជំរុញឲ្យថៃនិងកម្ពុជា បន្ថយកម្តៅស្ថានការណ៍នៅព្រំដែន និងលើកទឹកចិត្តភាគីទាំងពីរ ត្រូវអនុញ្ញាតឲ្យគណៈកម្មការសង្កេតការណ៍អាស៊ាន ចូលជួយផ្សះផ្សារទំនាក់ទំនងរវាងប្រទេសទាំងពីរផងដែរ។

កាលពីថ្ងៃចន្ទ អគ្គមេបញ្ជាការកងទ័ពអាកាសថៃ Panpakdee Pattanakul និង រដ្ឋមន្ត្រីក្រសួងការបរទេស Maris Sangiampongsa បានធ្វើដំណើរទៅកាន់ប្រទេសស៊ុយអែត ដើម្បីចុះហត្ថលេខាលើការទិញ-លក់ យន្តហោះចម្បាំង ប្រភេទ Gripen E/F ចំនួន៤គ្រឿង។

យន្តហោះចម្បាំង Gripen (រូបថត៖ Reuters)

កិច្ចព្រមព្រៀងទិញយន្តហោះចម្បាំងល្បឿងលឿនជាងសំឡេងរបស់ភាគីថៃ បានក្លាយជាប្រធានបទចម្រូងចម្រាសមួយ បន្ទាប់ពីយោធាខ្លួនប្រើយន្តហោះចម្បាំង Gripen C/D ដែលពួកគេបានទិញពីស៊ុយអែតកាលឆ្នាំ២០១១ មកវាយប្រហារកម្ពុជា ក្នុងការប៉ុនប៉ងឈ្លានពានមិនបានសម្រេចចន្លោះថ្ងៃទី២៤ដល់ថ្ងៃទី២៨ខែកក្កដាឆ្នាំ២០២៥។

ថៃជាប្រទេសតែមួយគត់នៅអាស៊ីអាគេ្នយ៍ ដែលទិញយន្តហោះចម្បាំងប្រភេទ Gripen ផលិតដោយ ស៊ុយអែតសម្រាប់ប្រើប្រាស់ឈ្លានពានប្រទេសជាប់ខ្លួន។

យ៉ាងណា ការប្រើប្រាស់សម្រាប់ការឈ្លានពានរបស់ថៃ អាចនឹងត្រូវប្រឈមបណ្តឹងតវ៉ា«ឧក្រិដ្ឋកម្មសង្គ្រាម»។ ជាមួយគ្នានោះ អ្នកលេងបណ្តាញសង្គមមានទាំងជនជាតិកម្ពុជា និង ជនបរទេសផង បង្ហាញការតវ៉ាយ៉ាងខ្លាំងចំពោះរដ្ឋាភិបាលទីក្រុងស្តុកខុល ដើម្បីឲ្យពិចារណាឡើងវិញនូវកិច្ចសន្យាដែលខ្លួនធ្វើជាមួយអាជ្ញាធរថៃ៕

អត្ថបទ៖ សុខ សុវណ្ណ

ចុចអាន៖ អ្នកជំនាញស៊ុយអែត៖ ការលក់ Gripen Fighter Jets ទៅឱ្យថៃ ជាកិច្ចព្រមព្រៀងដ៏ផុយស្រួយ ប្រឈមការលុបចោលគ្រប់ពេលវេលា

The post ក្រោយព្រមលក់ Gripen ឲ្យក្រុងបាងកក, ស៊ុយអែត អំពាវនាវ កម្ពុជា-ថៃ បន្ថយភាពតានតឹង appeared first on Kampuchea Thmey Daily.

អ្នកជំនាញស៊ុយអែត៖ ការលក់ Gripen Fighter Jets ទៅឱ្យថៃ ជាកិច្ចព្រមព្រៀងដ៏ផុយស្រួយ ប្រឈមការលុបចោលគ្រប់ពេលវេលា

Sansophea Mey — Wed, 27 Aug 2025 05:18:17 +0000

កិច្ចព្រមព្រៀងលក់យន្តហោះចម្បាំងកម្រិតកំពូលរវាង ថៃ និងប្រទេសស៊ុយអែត បានក្លាយជាប្រធានបទក្តៅមួយមិនថាសម្រាប់ កម្ពុជា-ថៃ ដែលកំពុងស្ថិតក្នុងជម្លោះព្រំដែនដ៏តានតឹងប៉ុណ្ណោះទេ វាក៏ជាប្រធានក្តៅកំពុងត្រូវបានវែកញែកនៅក្នុងប្រទេសស៊ុយអែតផ្ទាល់តែម្តង។

អ្នកជំនាញនយោបាយជាច្រើន បានព្រមានទៅកាន់រដ្ឋាភិបាល ទីក្រុង Stockholm ជុំវិញការសម្រេចចិត្តចុះហត្ថលេខាលក់ Saab JAS-39 Gripen ម៉ូដែល E និង F ចំនួន៤គ្រឿងទៅកាន់ប្រទេសថៃ ហើយចាត់ទុកជាកិច្ចព្រមចុះហត្ថលេខាកាលពីថ្ងៃ ២៥ សីហា ធ្វើឡើងមិនចំកាលៈទេសៈ។

លោក Martin Lundmark គ្រូឯកទេសប្រព័ន្ធការពារជាតិ នៃសាកលវិទ្យាល័យការពារជាតិ ប្រទេសស៊ុយអែត បានលើកឡើងថា កិច្ចព្រមព្រៀងខាងលើលក់យន្តចម្បាំងកម្រិតកំពូលទៅឱ្យប្រទេសថៃនៅពេលនេះ គឺជាកិច្ចព្រមព្រៀងដែលកំពុងប្រឈមមុខនឹងគ្រោះថ្នាក់ជាទីបំផុត។

“ប្រសិនជាមានការឈ្លានពានណាមួយកើតឡើង ឬផ្ទុះចេញសង្គ្រាមធំ ឬក៏ប្រសិនជាប្រទេសថៃ បើកការឈ្លានពានកម្ពុជា ដណ្តើមកាន់កាប់ទឹកដីជម្លោះ ដូច្នេះ ខ្ញុំជឿថា កិច្ចព្រមព្រៀងនេះ នឹងត្រូវផ្អាក ឬអាចឈានទៅដល់ការលុបចោលតែម្តង” នេះជាការលើកឡើងរបស់លោក Martin Lundmark។

ក្នុងសេចក្តីថ្លែងការណ៍របស់លោកធ្វើឡើងនាព្រឹកថ្ងៃ ២៦ សីហា កន្លងទៅ គឺបានបង្កប់នូវចំណុចសំខាន់មួយពាក់ព័ន្ធទៅនឹងច្បាប់នាំចេញសព្វាវុធរបស់ខ្លួន តម្រូវឱ្យប្រកាន់ភ្ជាប់នូវលទ្ធិប្រជាធិបតេយ្យ និងគោរពសិទ្ធិមនុស្សយ៉ាងតឹងរឹងបំផុត មានន័យថា អធិការកិច្ចសម្រាប់ផលិតផលយុទ្ធសាស្ត្រហៅថា ISP ត្រូវតែវាយតម្លៃឱ្យបានគ្រប់ជ្រុងជ្រោយតើថាប្រទេសដែលទិញសព្វាវុធពីស៊ុយអែត បានបំពេញលក្ខខណ្ឌសិទ្ធិមនុស្ស និងប្រជាធិបតេយ្យស្របតាមគោលការណ៍របស់ខ្លួន ឬយ៉ាងណា។

លោក Martin Lundmark សង្កត់ធ្ងន់ថា លទ្ធិប្រជាធិបតេយ្យនៅក្នុងប្រទេសថៃបច្ចុប្បន្ន ស្ថិតក្នុងកម្រិតទាបមួយ បើធៀបទៅនឹងស្ថានភាពកាលពីអតីតកាល ពោលគឺ កិច្ចព្រមព្រៀងកាលពីឆ្នាំ២០១១។

“ក្នុងឆ្នាំ២០១១ ពេលដែលកិច្ចព្រមព្រៀងលក់យន្តហោះចម្បាំងធ្វើឡើង ថៃពេលនោះត្រូវចាត់ទុកជាប្រទេសប្រជាធិបតេយ្យពេញលេញមួយ។ សំណួរសួរថា បច្ចុប្បន្ន លទ្ធិប្រជាធិបតេយ្យក្នុងប្រទេសថៃ សមស្របតាមការទាមទាររបស់រដ្ឋាភិបាលស៊ុយអែត ឬក៏យ៉ាងណា”៕

The post អ្នកជំនាញស៊ុយអែត៖ ការលក់ Gripen Fighter Jets ទៅឱ្យថៃ ជាកិច្ចព្រមព្រៀងដ៏ផុយស្រួយ ប្រឈមការលុបចោលគ្រប់ពេលវេលា appeared first on Kampuchea Thmey Daily.

ការផ្គត់ផ្គង់ Gripen របស់ស៊ុយអែតដល់់ថៃកំពុងក្លាយជាប្រធានបទក្តៅ

Bun sopheap — Fri, 01 Aug 2025 02:16:33 +0000

កិច្ចព្រមព្រៀងទិញ-លក់ យន្តហោះចម្បាំងប្រភេទ «Gripen» រវាងប្រទេសស៊ុយអែតនិងប្រទេសថៃដែលគ្រោងនាំចូលបន្ថែមទៀតនៅបណ្តាឆ្នាំខាងមុខ កំពុងក្លាយជាប្រធានបទក្តៅមួយក្នុងការលើកពិភាក្សា បន្ទាប់ពីយោធាថៃបានប្រើប្រាស់យន្តហោះចម្បាំង JAS-39 Gripen វាយប្រហារប្រទេសកម្ពុជាក្នុងការប្រយុទ្ធដ៏សាហាវបំផុតក្នុងពេលប៉ះទង្គិចគ្នាត្រឹមរយៈពេល៥ថ្ងៃ។

កងទ័ពអាកាសថៃ ត្រូវបានគេដឹងថា ប្រើប្រាស់យន្តហោះ JAS-39 Gripen ដែលទិញពីប្រទេសស៊ុយអែត និងផលិតដោយកក្រុមហ៊ុនអាកាសចរណ៍ និងការពារជាតិស៊ុយអែត Saab។ ប៉ុន្តែការប្រើប្រាស់យន្តហោះចម្បាំងទំនើបនេះវាយប្រហារ បានក្លាយទៅជាបន្ទុកដាក់លើខ្លួនឯងទៅវិញ ដែលអាចប្រឈមបទល្មើស «ឧក្រិដ្ឋកម្មសង្គ្រាម» បន្ទាប់ពីកងទ័ពអាកាសថៃបានប្រើប្រាស់យន្តហោះនេះក្នុងការប្រយុទ្ធផ្ទាល់ក្នុងអំឡុងពេលប៉ះទង្គិចព្រំដែនជាមួយប្រទេសកម្ពុជា។ នេះបើយោងតាមការចេញផ្សាយរបស់ Defence Security Asia កាលពីថ្ងៃទី៣០ ខែកក្កដា។

យន្តហោះចម្បាំង JAS-39 Gripen

រដ្ឋមន្ត្រីការបរទេសស៊ុយអែតលោកស្រី Maria Malmer Stenergard បាននិយាយថា រដ្ឋាភិបាលស៊ុយអែតកំពុងតាមដានយ៉ាងដិតដល់នូវស្ថានភាពនេះ ដោយបង្កើនការព្រួយបារម្ភអំពីការរំលោភដែលអាចកើតមានចំពោះគោលនយោបាយនាំចេញអាវុធដ៏តឹងរឹងរបស់ប្រទេសស៊ុយអែត។

នេះជាលើកទីមួយហើយ ដែលស៊ុយអែតបានដើរថយក្រោយពីដៃគូការពារជាតិ ដោយសាររបៀបដែលយន្តហោះចម្បាំងរបស់ខ្លួនត្រូវបានប្រើប្រាស់ក្នុងស្ថានភាពយោធាមិនត្រឹមត្រូវនិងផ្ទុយពីច្បាប់លក់អាវុធរបស់ស៊ុយអែត។ ទោះបីជាមិនទាន់មានការលុបចោលសំណើរជាផ្លូវការក៏ដោយ ក៏ការផ្លាស់ប្តូរនេះបានធ្វើឱ្យការគ្រោងទុកទិញយន្តហោះ Gripen ចំនួន៤ គ្រឿងបន្ថែមទៀតរបស់ប្រទេសថៃជាផ្នែកនៃកម្មវិធីរយៈពេល ១០ឆ្នាំលើវិស័យការពារជាតិ ក្នុងតម្លៃ ៥៩៦ លានដុល្លារមានហានិភ័យដែរ។

យន្តហោះ Gripen របស់ Royal Thai Air Force (RTAF)

ទោះយ៉ាងណាថៃបានការពារការប្រើប្រាស់យន្តហោះ Gripen ដោយនិយាយថា ការវាយប្រហារមានកម្រិត និងជាការឆ្លើយតបនឹងការគំរាមកំហែងពីកងកម្លាំងកម្ពុជា ខណៈដែលភាគីថៃជាអ្នកឈ្លានពានកម្ពុជាមុននិងប្រើយន្តហោះទម្លាក់គ្រាប់បែកលើទីតាំងប្រសាទនិងទីតាំងជនស៊ីវិល។

ទោះបីជាយ៉ាងណាក៏ដោយ ឧបទ្ទវហេតុនេះអាចបំពានច្បាប់របស់ប្រទេសស៊ុយអែតដែលហាមឃាត់ការនាំចេញទៅកាន់បណ្តាប្រទេសដែលមានជម្លោះសកម្ម លុះត្រាតែការប្រើប្រាស់មានការការពារយ៉ាងតឹងរ៉ឹង និងស្របច្បាប់ក្រោមច្បាប់អន្តរជាតិ។

ពាក់ព័ន្ធបញ្ហានេះអ្នកវិភាគព្រមានថា ប្រសិនបើស៊ុយអែតរារាំងការលក់ ថៃអាចនឹងងាកទៅរកអ្នកផ្គត់ផ្គង់ផ្សេងទៀតដូចជាកូរ៉េខាងត្បូង ចិន ឬសហរដ្ឋអាមេរិក ការផ្លាស់ប្តូរបែបនេះអាចបំផ្លាញការវិនិយោគថៃជាច្រើនឆ្នាំនៅក្នុងប្រព័ន្ធការពារពីស៊ុយអែត។

សារព័ត៌មាន Khaosod របស់ថៃ បានផ្សាយនៅថ្ងៃទី១ខែសីហានេះថា បុគ្គលិកស្ថានទូតស៊ុយអែតប្រចាំទីក្រុងបាងកក បានអះអាងថា មិនទាន់មានការលុបចោលកិច្ចព្រមព្រៀងទិញលក់នោះទេ៕

អត្ថបទ៖ ប៊ុន សុភាព

The post ការផ្គត់ផ្គង់ Gripen របស់ស៊ុយអែតដល់់ថៃកំពុងក្លាយជាប្រធានបទក្តៅ appeared first on Kampuchea Thmey Daily.

មូលហេតុពិតនាំឲ្យ ស៊ុយអែត ស្ថិតក្នុងប្រទេសមានសុភមង្គលលើលោកក្នុងឆ្នាំ ២០២៥

សាង ស្រីល័ក្ខ — Tue, 06 May 2025 10:09:05 +0000

នៅឆ្នាំ២០២៥ ប្រទេសស៊ុយអែត បានក្លាយជាប្រទេសដែលមានសុភមង្គលបំផុតទាំង៤នៅលើពិភពលោក។ ចំណាត់ថ្នាក់ទី ១ ទី ២ និងទី ៣ បានទៅលើប្រទេសហ្វាំងឡង់ ដាណឺម៉ាក និងអ៊ីស្លង់នៅតំបន់ទ្វីបអឺរ៉ុបភាគខាងជើងនោះ។ កាលពីនៅឆ្នាំ២០២៤ ប្រទេសទាំង៤ខាងលើនេះ ក៏ធ្លាប់ស្ថិតក្នុងលំដាប់នេះដូចគ្នាដែរ។

សារព័ត៌មាន CNN បានអត្ថាធិប្បាយនៅក្នុងអត្ថបទមួយ ដែលបានបង្ហោះនៅថ្ងៃទី២០ខែមីនាឆ្នាំ ២០២៥ នៃទិវាសុភមង្គលអន្តរជាតិ ថា នេះមិនមែនជារឿងចៃដន្យទេ ប៉ុន្តែជាលទ្ធផលនៃរចនាសម្ព័ន្ធសង្គម វប្បធម៌ សេដ្ឋកិច្ច និងបរិស្ថានដែលបានសាងសង់យ៉ាងប្រុងប្រយ័ត្ន ដែលផ្តល់នូវគុណភាពខ្ពស់នៃជីវិត។

ពីប្រព័ន្ធសុខុមាលភាពសង្គមដ៏ល្អ សមភាពយេនឌ័រ ការងារដែលមានតុល្យភាពឥតខ្ចោះ និងជីវិតផ្ទាល់ខ្លួន ដល់បរិយាកាសរស់នៅស្អាត ដែលទាំងអស់នេះធ្វើឲ្យប្រជាជននៅអឺរ៉ុបខាងជើង តែងតែមានអារម្មណ៍ពេញចិត្ត និងសប្បាយរីករាយជានិច្ច។

រូបភាព៖ getty

១ ជាអ្នកត្រួសត្រាយផ្លូវក្នុងការការពារបរិស្ថាន និងការអភិវឌ្ឍប្រកបដោយចីរភាព

ស៊ុយអែតបានកសាងកេរ្តិ៍ឈ្មោះជាប្រទេសនាំមុខគេលើពិភពលោកក្នុងការការពារបរិស្ថាន និងការអភិវឌ្ឍប្រកបដោយនិរន្តរភាពចាប់តាំងពីទសវត្សរ៍ឆ្នាំ ១៩៦០ និងឆ្នាំ១៩៧០។ ជាមួយនឹងការប្តេជ្ញាចិត្តក្នុងការសម្រេចបាននូវអព្យាក្រឹតភាពនៃកាបូននៅឆ្នាំ ២០៤៥ ប្រទេសនេះ មិនត្រឹមតែដោះស្រាយបញ្ហាប្រឈមអាកាសធាតុយ៉ាងទូលំទូលាយប៉ុណ្ណោះទេ ប៉ុន្តែថែមទាំងធ្វើឲ្យប្រសើរឡើងនូវគុណភាពជីវិតរបស់អ្នកស្រុករបស់ខ្លួន ដោយបង្កើតគំរូអភិវឌ្ឍន៍ដែលគួររៀនសូត្រតាម។

២ មានគោលបំណងក្លាយជាប្រទេសអព្យាក្រឹតកាបូនដំបូងបង្អស់របស់ពិភពលោកនៅឆ្នាំ ២០៤៥

ដើម្បីសម្រេចបាននូវគោលដៅដ៏មានមហិច្ឆតានេះ ស៊ុយអែតបានអនុម័តច្បាប់ការពារអាកាសធាតុជាតិក្នុងឆ្នាំ ២០១៧ ដោយដាក់មូលដ្ឋានច្បាប់ដ៏រឹងមាំសម្រាប់ការប្តេជ្ញាចិត្តផ្នែកអាកាសធាតុរបស់ខ្លួន និងតាមដានយ៉ាងដិតដល់នូវវឌ្ឍនភាពតាមរយៈក្រុមអ្នកជំនាញឯករាជ្យ។

ស្របគ្នានោះ រដ្ឋាភិបាលបានប្តេជ្ញាកាត់បន្ថយការបំភាយឧស្ម័នពីឧស្សាហកម្ម ការដឹកជញ្ជូន ថាមពល និងសំណង់ចំនួន ៨៥%។ ទន្ទឹមនឹងនេះ អុហ្វសិតកាបូនត្រូវបានអនុវត្តតាមរយៈគម្រោងដាំព្រៃឈើ ការបង្កើតឡើងវិញនូវប្រព័ន្ធអេកូឡូស៊ីធម្មជាតិ និងការអនុវត្តបច្ចេកវិជ្ជាស្រូបយកកាបូន។

នៅក្នុងវិស័យថាមពលតែម្នាក់ឯង៖ ទីភ្នាក់ងារថាមពលអន្តរជាតិ (IEA) និយាយថា ស៊ុយអែតប្រើប្រាស់ថាមពលច្រើន ប៉ុន្តែការបញ្ចេញកាបូនគឺទាបជាងប្រទេសដទៃទៀត។ នេះជាមូលហេតុ៖ ៧០% នៃអគ្គិសនីរបស់ប្រទេស ត្រូវបានបង្កើតចេញពីប្រភពបំភាយទាប រួមទាំងវារីអគ្គិសនី (៤១%) និងថាមពលនុយក្លេអ៊ែរ (២៩%)។

ក្នុងវិស័យដឹកជញ្ជូន៖ នេះគឺជាវិស័យដែលបណ្តាលឲ្យមានការបំភាយឧស្ម័នផ្ទះកញ្ចក់ និងការបំពុលខ្យល់ច្រើនជាងគេលើពិភពលោក ដែលជាបញ្ហាដែលធ្វើឲ្យប្រទេសជាច្រើនឈឺក្បាល ប៉ុន្តែស៊ុយអែតបានដោះស្រាយបញ្ហានោះជាមួយនឹងដំណោះស្រាយដ៏ទម្លាយជាច្រើន ដូចជាការលើកទឹកចិត្តប្រជាជនឲ្យប្រើប្រាស់រថយន្តអគ្គិសនី និងរថយន្តកូនកាត់តាមរយៈការលើកទឹកចិត្តពន្ធ និងការកសាងបណ្តាញស្ថានីយ៍សាកថ្មយ៉ាងទូលំទូលាយ និងដាក់ពង្រាយប្រព័ន្ធដឹកជញ្ជូនសាធារណៈប្រកបដោយប្រសិទ្ធភាព តាមរយៈការវិនិយោគលើរថភ្លើងក្រោមដី រថភ្លើង និងឡានក្រុង ដែលដំណើរការដោយថាមពលកកើតឡើងវិញ កាត់បន្ថយការពឹងផ្អែកលើរថយន្តឯកជន។

នៅក្នុងវិស័យផលិតកម្ម៖ ជាមួយនឹងសភាស៊ុយអែត បានអនុម័តក្របខ័ណ្ឌគោលនយោបាយអាកាសធាតុដ៏ទូលំទូលាយ រួមទាំងច្បាប់ការពារអាកាសធាតុជាតិក្នុងឆ្នាំ ២០១៧ វិស័យឧស្សាហកម្មរបស់ប្រទេសកំពុងអនុវត្តយ៉ាងតឹងរ៉ឹងជាមួយនឹងបទប្បញ្ញត្តិនៃការបំភាយឧស្ម័ន ដែលរួមចំណែកដល់គោលដៅរបស់ប្រទេស ក្នុងការសម្រេចបាននូវការបំភាយឧស្ម័នផ្ទះកញ្ចក់សុទ្ធត្រឹមសូន្យនៅឆ្នាំ ២០៤៥។

៣ ដំណើរបំផុសគំនិតនៃម៉ាកគ្រឿងសង្ហារិមដ៏ធំបំផុតរបស់ពិភពលោក

នៅឆ្នាំ ២០២៤ សារព័ត៌មានរ៉យទ័របានរាយការណ៍ថា IKEA មានគោលបំណងកាត់បន្ថយការបំភាយឧស្ម័ន ៥០% ត្រឹមឆ្នាំសារពើពន្ធ ២០៣០ កើនឡើងពីគោលដៅមុន ១៥% ដែលវាកើនលើសនៅឆ្នាំ ២០២៣ និងសម្រេចបាននូវការបំភាយសូន្យសុទ្ធត្រឹមឆ្នាំសារពើពន្ធ ២០៥០ ដោយមិនពឹងផ្អែកលើអុហ្វសិតកាបូន ដើម្បីសម្រេចបាននូវគោលដៅកាត់បន្ថយដាច់ខាតនេះ។

ដើម្បីសម្រេចបាននូវគោលដៅដ៏មានមហិច្ឆតាខ្លាំងទាំងនេះ IKEA បានធ្វើការផ្លាស់ប្តូរពណ៌បៃតងដ៏រឹងមាំពីការប្រើប្រាស់ថាមពលបៃតង ការកែច្នៃវត្ថុធាតុដើមទៅជាការដឹកជញ្ជូនពណ៌បៃតង និងការបំប្លែងទៅជាគំរូអាជីវកម្មរាងជារង្វង់។

នៅឆ្នាំ ២០២៤ ក្រុមហ៊ុនបានកាត់បន្ថយការបំភាយឧស្ម័ន២៧% បើធៀបនឹងឆ្នាំ ២០១៦ ដោយសារការកើនឡើងនៃការប្រើប្រាស់ថាមពលពន្លឺព្រះអាទិត្យ និងថាមពលខ្យល់។ បច្ចុប្បន្ននេះ រោងចក្រ IKEA ជាង ៤០០ បានប្តូរទៅប្រើប្រាស់ថាមពលកកើតឡើងវិញ ១០០%។

លើសពីនេះ IKEA ក៏ប្រើប្រាស់សម្ភារៈកែច្នៃផងដែរ។ ប្រហែល ១៥% នៃឈើដែលប្រើក្នុងផលិតផល IKEA គឺជាឈើកែច្នៃ។ ក្រុមហ៊ុនបានប្តេជ្ញាចិត្តក្នុងការប្រើប្រាស់ ១០០% សម្ភារៈកែច្នៃ ឬកកើតឡើងវិញនៅក្នុងផលិតផលរបស់ខ្លួននៅឆ្នាំ ២០៣០។

ក្រុមហ៊ុនគ្រឿងសង្ហារិមយក្សនេះក៏កំពុងវិនិយោគលើរថយន្តអគ្គិសនី និងបង្កើនប្រសិទ្ធភាពខ្សែសង្វាក់ផ្គត់ផ្គង់របស់ខ្លួន ដើម្បីកាត់បន្ថយការបំភាយឧស្ម័នពីការដឹកជញ្ជូន។ នៅឆ្នាំ ២០២៤ ការបំភាយឧស្ម័នពីការដឹកជញ្ជូននឹងថយចុះ ៧០% បើធៀបនឹងឆ្នាំ ២០១៧។ IKEA ក៏បានផ្លាស់ប្តូរទៅជាគំរូអាជីវកម្មរាងជារង្វង់ ដែលផលិតផលត្រូវបានរចនាឡើងដើម្បីប្រើប្រាស់ឡើងវិញ និងកែច្នៃឡើងវិញ កាត់បន្ថយកាកសំណល់។

កិច្ចខិតខំប្រឹងប្រែងទាំងនេះមិនត្រឹមតែជួយ IKEA កាត់បន្ថយការបំភាយឧស្ម័នប៉ុណ្ណោះទេ ថែមទាំងបង្កើតនិន្នាការប្រើប្រាស់ប្រកបដោយនិរន្តរភាព ដោយលើកទឹកចិត្តអតិថិជនឲ្យជ្រើសរើសផលិតផលដែលមិនប៉ះពាល់ដល់បរិស្ថាន។ IKEA បានក្លាយជានិមិត្តសញ្ញានៃការច្នៃប្រឌិត និងទំនួលខុសត្រូវសង្គមនៅក្នុងឧស្សាហកម្ម FMCG (ទំនិញប្រើប្រាស់ដែលផ្លាស់ប្តូរយ៉ាងឆាប់រហ័ស ផលិតផលដែលត្រូវបានលក់យ៉ាងឆាប់រហ័ស និងក្នុងតម្លៃសមរម្យ រួមទាំងរបស់របរដូចជា អាហារ ភេសជ្ជៈ គ្រឿងអនាម័យ និងឧបករណ៍ប្រើប្រាស់ក្នុងផ្ទះជាដើម៕

រូបតំណាង

អត្ថបទ៖ សាង ស្រីល័ក្ខ

ចុចអាន៖បាត់ខ្លួនលើភ្នំទឹកកក ១០ថ្ងៃ តែបុរសចិនម្នាក់នៅមានជីវិត ដោយសារថ្នាំដុសធ្មេញ

The post មូលហេតុពិតនាំឲ្យ ស៊ុយអែត ស្ថិតក្នុងប្រទេសមានសុភមង្គលលើលោកក្នុងឆ្នាំ ២០២៥ appeared first on Kampuchea Thmey Daily.

ប្រទេសស៊ុយអែត Archives - Kampuchea Thmey Daily

នាយករដ្ឋមន្ត្រី ស៊ុយអែត ជំរុញ NATO ជួយ «តម្រង់​ទិស»​ ដល់​អ៊ុយក្រែន បាញ់ដ្រូនឲ្យចំគោល​ដៅ​រុស្ស៊ី

ស៊ុយ​អែតរិះ​គន់​​​ខ្លាំង​ៗ​ចំពោះ​រដ្ឋបាលសហ​​រដ្ឋអាមេរិក​​ដែល​​​មើល​ស្រាល​ច្បាប់​អន្តរជាតិ

មេរៀន​ពី​រុស្ស៊ីវាយប្រហារ​អ៊ុយក្រែន បង្ខំ​ស៊ុយ​អែត​​​​វិនិយោគ​លើ​ប្រព័ន្ធ​ការពារ​ដែន​អាកាស​​

ស៊ុយអែត ចង់បានប្រព័ន្ធអាវុធរយៈចម្ងាយឆ្ងាយអាចបាញ់ជ្រៅដល់ រុស្ស៊ី តែម្ដង

ក្រោយព្រមលក់ Gripen ឲ្យក្រុងបាងកក, ​ស៊ុយអែត​ អំពាវនាវ កម្ពុជា-ថៃ បន្ថយភាពតានតឹង

អ្នកជំនាញស៊ុយអែត៖ ការលក់ Gripen Fighter Jets ទៅឱ្យថៃ ជាកិច្ចព្រមព្រៀងដ៏ផុយស្រួយ ប្រឈមការលុបចោលគ្រប់ពេលវេលា

​ការ​ផ្គត់ផ្គង់​ Gripen ​របស់​ស៊ុយអែត​ដល់់​ថៃ​​កំពុង​ក្លាយ​ជា​​ប្រធានបទ​ក្តៅ​​

មូលហេតុពិតនាំឲ្យ ស៊ុយអែត ​ស្ថិត​ក្នុង​ប្រទេស​​មាន​​សុភមង្គល​​​លើ​​លោកក្នុង​ឆ្នាំ ២០២៥

នាយករដ្ឋមន្ត្រី ស៊ុយអែត ជំរុញ NATO ជួយ «តម្រង់ទិស» ដល់អ៊ុយក្រែន បាញ់ដ្រូនឲ្យចំគោលដៅរុស្ស៊ី

ស៊ុយអែតរិះគន់ខ្លាំងៗចំពោះរដ្ឋបាលសហរដ្ឋអាមេរិកដែលមើលស្រាលច្បាប់អន្តរជាតិ

មេរៀនពីរុស្ស៊ីវាយប្រហារអ៊ុយក្រែន បង្ខំស៊ុយអែតវិនិយោគលើប្រព័ន្ធការពារដែនអាកាស

ក្រោយព្រមលក់ Gripen ឲ្យក្រុងបាងកក, ស៊ុយអែត អំពាវនាវ កម្ពុជា-ថៃ បន្ថយភាពតានតឹង

ការផ្គត់ផ្គង់ Gripen របស់ស៊ុយអែតដល់់ថៃកំពុងក្លាយជាប្រធានបទក្តៅ

មូលហេតុពិតនាំឲ្យ ស៊ុយអែត ស្ថិតក្នុងប្រទេសមានសុភមង្គលលើលោកក្នុងឆ្នាំ ២០២៥