ប្រទេសស្វីស Archives - Kampuchea Thmey Daily

ស្វីសមិនឲ្យនាំចេញអាវុធទៅអាមេរិកទេ ខណៈសង្រ្គាមនៅអ៊ីរ៉ង់កំពុងរាលដាល

Minea Neu — Sat, 21 Mar 2026 07:12:32 +0000

ប្រទេសស្វីសលើកឡើងថាខ្លួននឹងមិនចេញអាជ្ញាប័ណ្ណសម្រាប់ក្រុមហ៊ុនក្នុងប្រទេសស្វីសនាំចេញអាវុធទៅកាន់សហរដ្ឋអាមេរិកនោះទេ ខណៈសង្គ្រាមកំពុងបន្តលើប្រទេសអ៊ីរ៉ង់ ដោយលើកឡើងពីគោលការណ៍អព្យាក្រឹតយូរអង្វែងរបស់ប្រទេសនេះ។

សារព័ត៌មាន Al Jazeera មានមូលដ្ឋាននៅប្រទេសកាតា បានចេញផ្សាយថ្ងៃទី២០ខែមីនា ឆ្នាំ២០២៦ រដ្ឋាភិបាលលើកឡើងនៅក្នុងសេចក្តីថ្លែងការណ៍មួយកាលពីថ្ងៃសុក្រថា ៖«ការនាំចេញឧបករណ៍សង្គ្រាមទៅកាន់ប្រទេសដែលពាក់ព័ន្ធនឹងជម្លោះប្រដាប់អាវុធអន្តរជាតិជាមួយអ៊ីរ៉ង់ មិនអាចត្រូវបានអនុញ្ញាតអំឡុងពេលជម្លោះនោះទេ»។

សព្វាវុធរបស់ប្រទេសស្វីស។ រូបភាព៖ Getty Images

សេចក្តីថ្លែងការណ៍ដដែលបន្តថា៖ «ការនាំចេញឧបករណ៍សង្គ្រាមទៅកាន់សហរដ្ឋអាមេរិកមិនអាចត្រូវបានអនុញ្ញាតក្នុងពេលនេះឡើយ»។

ការប្រកាសនេះកើតឡើងពេលដែលសង្គ្រាមរវាងសហរដ្ឋអាមេរិក និងអ៊ីស្រាអែលលើអ៊ីរ៉ង់ឈានចូលសប្តាហ៍ទី៤ នាំឱ្យមានវិបត្តិមនុស្សធម៌កាន់តែធ្ងន់ធ្ងរនៅទូទាំងមជ្ឈិមបូព៌ា និងថាមពលសកលកើនឡើងផងដែរ។

មិនតែប៉ុណ្ណោះ រឿងនេះកើតឡើងបន្ទាប់ពីរដ្ឋាភិបាលស្វីសសម្រេចចិត្ត បិទដែនអាកាសរបស់ខ្លួន ចំពោះជើងហោះហើររបស់យោធាអាមេរិកដែលភ្ជាប់ដោយផ្ទាល់ទៅនឹងអ៊ីរ៉ង់។

គួរបញ្ជាក់ថា ច្បាប់សហព័ន្ធប្រទេសស្វីសត្រូវបានអនុម័តក្នុងឆ្នាំ ១៩៩៦ ចែងថាការនាំចូល នាំចេញ និងការឆ្លងកាត់ដោយសម្ភារៈសង្គ្រាមនិងបច្ចេកវិទ្យាពាក់ព័ន្ធ តម្រូវឱ្យមានអាជ្ញាប័ណ្ណនាំចេញដោយផ្អែកលើគោលការណ៍សិទ្ធិមនុស្ស និងអព្យាក្រឹតភាព។

ចាប់តាំងពីសង្គ្រាមអ៊ីរ៉ង់បានចាប់ផ្តើមនៅថ្ងៃទី២៨ ខែកុម្ភៈ ប្រទេសស្វីសប្រកាសថា មិនមានអាជ្ញាប័ណ្ណនាំចេញថ្មីណាមួយចេញឱ្យសហរដ្ឋអាមេរិកនោះទេ។

រដ្ឋាភិបាលក៏បានសង្កត់ដែរថា មិនមានអាជ្ញាប័ណ្ណច្បាស់លាស់ណាសម្រាប់ការនាំចេញសម្ភារៈសង្គ្រាមទៅកាន់អ៊ីស្រាអែលអស់រយៈពេលជាច្រើនឆ្នាំមកហើយ ហើយចំពោះអ៊ីរ៉ង់ក៏ដូចគ្នា។

ចំណែកអាជ្ញាប័ណ្ណអាមេរិកដែលមានស្រាប់បច្ចុប្បន្នប្រឈមមុខនឹងការពិនិត្យឡើងវិញជាប្រចាំដោយក្រុមអ្នកជំនាញ ដើម្បីវាយតម្លៃថាតើជំហាននានាត្រូវបានទាមទារក្រោមច្បាប់អព្យាក្រឹតភាពឬអត់។

យោងតាមទិន្នន័យរបស់រដ្ឋាភិបាលស្វីស សហរដ្ឋអាមេរិកគឺជាអ្នកទិញ អាវុធពីប្រទេសស្វីសធំជាងគេទីពីរកាលពីឆ្នាំមុនដែលមានតម្លៃ ១១៩លានដុល្លារ៕

ប្រែសម្រួល៖ ណឺ មិនា

The post ស្វីសមិនឲ្យនាំចេញអាវុធទៅអាមេរិកទេ ខណៈសង្រ្គាមនៅអ៊ីរ៉ង់កំពុងរាលដាល appeared first on Kampuchea Thmey Daily.

រដ្ឋមន្ត្រីស្វីស៖ ក្រោមធម្មនុញ្ញអង្គការសហប្រជាជាតិ អាមេរិកនិងអ៊ីស្រាអែលគ្មានសិទ្ធិប្រើប្រាស់កម្លាំងវាយប្រហារទេ

Minea Neu — Mon, 09 Mar 2026 06:57:36 +0000

រដ្ឋមន្ត្រីក្រសួងការពារជាតិស្វីស លោក Martin Pfister បានលើកឡើងក្នុងបទសម្ភាសន៍មួយកាលពីថ្ងៃអាទិត្យថា សហរដ្ឋអាមេរិក និងអ៊ីស្រាអែល បានបំពានច្បាប់អន្តរជាតិ ដោយបើកការវាយប្រហារលើប្រទេសអ៊ីរ៉ង់។

យោងតាមរ៉យទ័រចុះផ្សាយថ្ងៃទី៨ ខែមីនា អ្នកជំនាញផ្នែកច្បាប់ បាននិយាយថា ប្រទេសជាច្រើននឹងចាត់ទុកការវាយប្រហារនោះមិនសមហេតុផលក្រោមធម្មនុញ្ញអង្គការសហប្រជាជាតិ។ ក្រោមធម្មនុញ្ញអង្គការសហប្រជាជាតិ ប្រទេសជាសមាជិកត្រូវតែចៀសវាងការប្រើប្រាស់កម្លាំង ឬការគំរាមកំហែងដោយកម្លាំងដោយគ្មានការអនុញ្ញាតពីអង្គការសហប្រជាជាតិ ឬលុះត្រាតែធ្វើសកម្មភាពក្នុងការការពារខ្លួនប៉ុណ្ណោះ។

រដ្ឋមន្ត្រីក្រសួងការពារជាតិស្វីស លោក Martin Pfister។ រូបភាព៖ Swissinfo

លោក Pfister ប្រាប់កាសែត SonntagsZeitung ថា៖ «ក្រុមប្រឹក្សាសហព័ន្ធលើកឡើងថា ការវាយប្រហារលើអ៊ីរ៉ង់គឺជាការរំលោភលើច្បាប់អន្តរជាតិ»។

លោក បន្ថែមថា៖ «តាមទស្សនៈរបស់យើង វាគឺជាការរំលោភលើការហាមឃាត់ក្នុងការប្រើប្រាស់អំពើហិង្សាដោយចេតនា។ យើងអំពាវនាវដល់គ្រប់ភាគីពាក់ព័ន្ធទាំងអស់ឱ្យបញ្ឈប់ការប្រយុទ្ធ ដើម្បីការពារអាយុជីវិតជនស៊ីវិល»។

លោក Pfister សំដៅលើប្រទេសទាំងអស់ណាដែលមិនគោរពតាមការហាមឃាត់ក្នុងការប្រើប្រាស់អំពើហិង្សា រួមទាំងសហរដ្ឋអាមេរិក និងអ៊ីស្រាអែលផងដែរ។

លោក Pfister បាននិយាយថា៖ « សហរដ្ឋអាមេរិក និងអ៊ីស្រាអែលបានវាយប្រហារអ៊ីរ៉ង់ពីលើអាកាស។ ធ្វើដូច្នេះ! ពួកគេដូចជាអ៊ីរ៉ង់ដែរ បានរំលោភច្បាប់អន្តរជាតិ»៕

ប្រែសម្រួល៖ ណឺ មិនា

The post រដ្ឋមន្ត្រីស្វីស៖ ក្រោមធម្មនុញ្ញអង្គការសហប្រជាជាតិ អាមេរិកនិងអ៊ីស្រាអែលគ្មានសិទ្ធិប្រើប្រាស់កម្លាំងវាយប្រហារទេ appeared first on Kampuchea Thmey Daily.

ត្រាំ និយាយលេងបន្លំមែន ប្រដូចកោះ Greenland ទៅ Iceland

Minea Neu — Thu, 22 Jan 2026 03:21:23 +0000

ប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយម្តងហើយម្តងទៀត ត្រឡប់ត្រឡិននៅក្នុងសុន្ទរកថា ទៅកាន់មេដឹកនាំពិភពលោកក្នុងវេទិកាសេដ្ឋកិច្ចសកល ដោយប្រដូច Iceland ទៅកោះ Greenland ម្តងជាពីរដង។ ថ្លែងក្នុងទីក្រុង Davos, ប្រទេសស្វីស ក្នុងកិច្ចប្រជុំវេទិកាសេដ្ឋកិច្ចពិភពលោក(WEF) កាលពីថ្ងៃពុធទី២១ខែមករា ប៉ុន្តែសេតវិមានបានច្រានចោលនូវការលើកឡើងដោយភាពស្រពិចស្រពិលមួយនេះ។

លោក ត្រាំ ក្នុងក្រុង Davos, Reuters.

យោងតាមសារព័ត៌មាន CNA, ប្រធានាធិបតីអាមេរិកមកពីគណបក្សសាធារណរដ្ឋ វ័យ៧៩ឆ្នាំរូបនេះបានទាមទារ ចង់ទិញយកកោះ Greenland ជាទឹកដីកោះដ៏ធំមួយស្ថិតក្រោមការគ្រប់គ្រងរបស់ប្រទេសដាណឺម៉ាក ដែលលោកតែងយកលេសថា៖«មានការគំរាមកំហែងផ្នែកសន្តិសុខពីរុស្ស៊ី និងចិនក្នុងតំបន់អាកទិក»។

តែយ៉ាងណា កាលពីថ្ងៃពុធ លោកបានប្រកាសពី «ក្របខ័ណ្ឌ» សម្រាប់កិច្ចព្រមព្រៀងនៅពេលអនាគតលើកោះ Greenland និងគ្រោងលុបចោលការយកពន្ធលើបណ្តាប្រទេសនៅអឺរ៉ុប ដែលបានប្រឆាំងនឹងចំណាត់ការរបស់ខ្លួនក្នុងការគ្រប់គ្រងកោះនេះ ហើយលោកក៏មិនបានធ្វើឱ្យសម្ព័ន្ធមិត្តណាតូកាន់តែតានតឹង និងធ្វើឱ្យទំនាក់ទំនងឆ្លងអាត្លង់ទិកកាន់តែតានតឹងនោះដែរ។

លោក ត្រាំ បានឡើងថា៖ «ខ្ញុំកំពុងជួយអង្គការណាតូ ហើយរហូតដល់ប៉ុន្មានថ្ងៃចុងក្រោយនេះ ហើយនៅពេលដែលខ្ញុំប្រាប់ពួកគេអំពី Iceland, ពួកគេស្រឡាញ់ខ្ញុំ។ ពួកគេមិននៅទីនោះជាមួយយើងលើកោះ Iceland ទេ នេះជាអ្វីដែលខ្ញុំអាចប្រាប់អ្នកបាន»។

លោកបន្តទៀតថា៖ «ខ្ញុំមានន័យថា ទីផ្សារភាគហ៊ុនរបស់យើងបានធ្លាក់ចុះជាលើកដំបូងកាលពីម្សិលមិញ ដោយសារតែ Iceland ។ ដូច្នេះ Iceland បានធ្វើឱ្យយើងអស់លុយច្រើនហើយ»។

តែវាហាក់ដូចជា លោកកំពុងសំដៅទៅលើ Greenland ច្រើនជាង មិនមែន Iceland ដែលជាកោះ មានទំហំតូចជាងប្រទេសជិតខាងនោះទេ ហើយកោះនេះស្ថិតនៅអាត្លង់ទិកខាងជើងដ៏ល្បីល្បាញ និងមានទេសភាពភ្នំភ្លើងដ៏អស្ចារ្យផងដែរ។

តែយ៉ាងណា បន្ទាប់ពីការថ្លែងសុន្ទរកថា មន្ត្រីព័ត៌មានប្រចាំសេតវិមាន អ្នកនាង Karoline Leavitt បានច្រានចោល នឹងការបង្ហោះនៅលើបណ្តាញសង្គម X ដោយអ្នកកាសែត លោក Libbey Dean ដែលបានសរសេរថា៖«ប្រធានាធិបតី លោក ដូណាល់ ត្រាំ បាននិយាយរឿង Greenland និង Iceland ប្រហែលពីរបីដង»។

មិនតែប៉ុណ្ណោះ អំឡុងពេលសុន្ទរកថានៅឯក្រុង Davos លោក ដូណាល់ ត្រាំ តែងតែវង្វេងពីអ្វីដែលសរសេរនៅលើក្រដាស់ព្រាងរបស់លោក៕

ប្រែសម្រួល៖ ណឺ មិនា

The post ត្រាំ និយាយលេងបន្លំមែន ប្រដូចកោះ Greenland ទៅ Iceland appeared first on Kampuchea Thmey Daily.

ទៅដល់ស្វីស លោកត្រាំ បន្ទន់ឥរិយាបទ ដោយបញ្ជាក់ថា នឹងមិនប្រើកម្លាំង វាយយក Greenland ទេ

Sok Sovann — Thu, 22 Jan 2026 00:26:17 +0000

លោក ដូណាល់ ត្រាំ ប្រែជាបន្ទន់ឥរិយាបទពេលទៅដល់វេទិកាសេដ្ឋកិច្ចពិភពលោក (WEF) នៅប្រទេសស្វីស ដោយប្រធានាធិបតីអាមេរិករូបនេះ បញ្ជាក់យ៉ាងច្បាស់ថា លោកនឹងមិនប្រើប្រាស់កម្លាំងយោធាដើម្បីដណ្តើមយកកោះ Greenland នោះទេ ប៉ុន្តែចង់ឲ្យមានការចរចាជាបន្ទាន់ ដើម្បីធានាបាននូវកម្មសិទ្ធិលើទឹកដីមួយនេះ។

លោក ត្រាំ (រូបថត៖ Reuters)

នេះគឺផ្ទុយស្រឡះពីអ្វីដែលអាមេរិកធ្លាប់តែគំរាមប្រើយោធាដើម្បីវាយយកកោះ Greenland ដោយមិនខ្វល់ពីការរិះគន់ឬប្រតិកម្មពិភពលោកឡើយ។

តាមការផ្សាយរបស់ BBC នៅថ្ងៃព្រហស្បតិ៍ទី២២ខែមករាឆ្នាំ២០២៦ ក្នុងសុន្ទរកថានៅ WEF នាទីក្រុងដាវ៉ូស ប្រធានាធិបតីអាមេរិកអះអាងថា លោកកំពុងស្វែងរកការចរចាជាបន្ទាន់ ដើម្បីយកបាន Greenland ប៉ុន្តែ នឹងមិនដណ្ដើមយកទឹកដីនេះដោយប្រើកម្លាំងបាយឡើយ។

លោកបន្តថា៖ «យើងប្រហែលជាមិនទទួលបានអ្វីទាំងអស់ លុះត្រាតែខ្ញុំសម្រេចចិត្តប្រើប្រាស់កម្លាំងបាយ និងអំណាចដ៏លើសលប់ ដែលតាមពិតទៅគ្មាននរណាអាចទប់ទល់យើងបានឡើយ ប៉ុន្តែយើងនឹងមិនធ្វើបែបនោះទេ។ ខ្ញុំមិនចាំបាច់ប្រើកម្លាំងបាយឡើយ។ ខ្ញុំមិនចង់ប្រើកម្លាំងបាយ ហើយខ្ញុំក៏នឹងមិនប្រើកម្លាំងបាយដែរ»។

លោក ត្រាំ (រូបថត៖ Reuters)

ប្រធានាធិបតីអាមេរិក មិនត្រឹមតែច្រានចោលពីការប្រើយោធាប៉ុណ្ណោះទេ ប៉ុន្តែក្រោយពីសុន្ទរកថានៅ WEF លោកត្រាំក៏បង្ហោះសារលើបណ្តាញសង្គម Truth Social បញ្ជាក់ពីការបង្កើតក្របខ័ណ្ឌនៃកិច្ចព្រមព្រៀងនាពេលអនាគតទាក់ទងនឹងកោះ Greenland ហើយផ្អាកយកពន្ធលើប្រទេសអឺរ៉ុបចំនួន៨ថែមទៀតផង។

នៅលើបណ្ដាញសង្គម លោក ត្រាំ បានលើកឡើងថា៖ «ជំនួបដ៏មានផ្លែផ្កាបំផុតជាមួយមេដឹកនាំអង្គការណាតូ បានឈានដល់ការបង្កើតក្របខ័ណ្ឌនៃកិច្ចព្រមព្រៀងដ៏មានសក្ដានុពលមួយ ដែលគ្របដណ្ដប់លើកោះ Greenland និងតំបន់អាកទិកទាំងមូល។ ប្រសិនបើបានសម្រេចជាស្ថាពរ ដំណោះស្រាយនេះ នឹងក្លាយជាចំណុចដ៏អស្ចារ្យមួយសម្រាប់សហរដ្ឋអាមេរិក និងរដ្ឋជាសមាជិកណាតូទាំងអស់»។

យ៉ាងណាក្តី លោកត្រាំមិនប្រាប់ព័ត៌មានលម្អិតអំពីក្របខ័ណ្ឌនៃកិច្ចព្រមព្រៀងនោះឡើយ ប៉ុន្តែបង្ហើបថា ព័ត៌មានបន្ថែមនឹងផ្សព្វផ្សាយ នៅពេលកិច្ចពិភាក្សាដំណើរការទៅមុខដោយរលូន៕

អត្ថបទ៖ សុខ សុវណ្ណ

Air Force One ដឹកលោកត្រាំ ទៅស្វីស មានបញ្ហាប្រព័ន្ធអគ្គិសនីលើអាកាស ត្រូវហោះបកទៅ វ៉ាស៊ីនតោនវិញ

The post ទៅដល់ស្វីស លោកត្រាំ បន្ទន់ឥរិយាបទ ដោយបញ្ជាក់ថា នឹងមិនប្រើកម្លាំង វាយយក Greenland ទេ appeared first on Kampuchea Thmey Daily.

ស្វីសបង្កកទ្រព្យសម្បត្តិមាសជាង១០០តោន របស់រដ្ឋាភិបាលលោកម៉ាឌូរ៉ូ

Chheang — Wed, 07 Jan 2026 07:58:22 +0000

ក្រុមប្រឹក្សាសហព័ន្ធស្វីស បានសម្រេចបិទខ្ទប់រាល់ទ្រព្យសម្បត្តិទាំងអស់ដែលពាក់ព័ន្ធនឹងអតីតមេដឹកនាំលោក នីកូឡាស ម៉ាឌូរ៉ូ និងសហការីចំនួន ៣៧នាក់ផ្សេងទៀត ដែលនេះគឺជាការចាក់សោលើអាណាចក្រហិរញ្ញវត្ថុដ៏មហិមា រួមទាំងការដឹកជញ្ជូនមាសជាង១០០តោន ទៅកាន់រោងចក្រចម្រាញ់មាសរបស់ស្វីសនាពេលកន្លងមក។

លោកម៉ាឌូរ៉ូ (រូបថត៖ Bloomberg)

យោងតាមរ៉យទ័រ ក្រឹត្យអាសន្នដែលបានចេញកាលពីថ្ងៃទី៥ ខែមករា ឆ្នាំ២០២៦ បានធ្វើឡើងបន្ទាប់ពីកងកម្លាំងអាមេរិកបានចាប់ខ្លួនលោកម៉ាឌូរ៉ូ នៅក្នុងទីក្រុងការ៉ាកាស កាលពីប៉ុន្មានថ្ងៃមុន។ តាមរយៈការអនុវត្តច្បាប់សហព័ន្ធស្តីពីការបង្កក និងការប្រគល់ទ្រព្យសម្បត្តិខុសច្បាប់ (FIAA) ប្រទេសស្វីសមានគោលបំណងការពាររាល់មាស និងទ្រព្យសម្បត្តិដែលនៅសេសសល់ មិនឲ្យមានការផ្ទេរចេញពីប្រព័ន្ធធនាគារ។

អស់រយៈពេលជាច្រើនឆ្នាំមកហើយដែលមាសជាង១០០តោន ត្រូវបានគេចាត់ទុកជានិមិត្តរូបនៃយុទ្ធសាស្ត្ររស់រានមានជីវិតរបស់រដ្ឋាភិបាលលោកម៉ាឌូរ៉ូ។ ចន្លោះឆ្នាំ២០១៣ ដល់ ២០១៦ ប្រទេសវ៉េណេស៊ុយអេឡាបានដឹកជញ្ជូនមាសប្រហែល ១១៣តោនមានតម្លៃប្រហែល ៥,២ពាន់លានដុល្លារ ទៅកាន់ប្រទេសស្វីស ដើម្បីចម្រាញ់ និងលក់យកសាច់ប្រាក់សម្រាប់ដោះស្រាយវិបត្តិសេដ្ឋកិច្ច។

ការបង្កកនេះមានសុពលភាពរយៈពេល៤ឆ្នាំ និងបម្រើជាមូលដ្ឋានច្បាប់បណ្តោះអាសន្ន។ យោងតាមច្បាប់ស្វីស នៅពេលដែលមេដឹកនាំម្នាក់ «ធ្លាក់ពីអំណាច» រដ្ឋអាចបង្កកទ្រព្យសម្បត្តិរបស់ពួកគេ ដើម្បីទុកឱកាសឲ្យរដ្ឋាភិបាលវ៉េណេស៊ុយអេឡាថ្មីនាពេលអនាគត ចាប់ផ្តើមនីតិវិធីផ្លូវច្បាប់ដើម្បីទាមទារទ្រព្យសម្បត្តិទាំងនោះត្រឡប់ទៅវិញ។

រដ្ឋាភិបាលស្វីសបានបញ្ជាក់ថា គោលដៅចុងក្រោយគឺដើម្បីធានាថា ប្រាក់ទាំងនេះនឹងត្រូវបានយកទៅប្រើប្រាស់សម្រាប់ «ជាប្រយោជន៍ដល់ប្រជាជនវ៉េណេស៊ុយអេឡា»។

សូមជម្រាបថា លោកម៉ាឌូរ៉ូ កំពុងត្រូវបានឃុំខ្លួននៅទីក្រុងញូវយ៉ក។ កាលពីថ្ងៃទី៦មករា លោកបានបង្ហាញខ្លួនជាលើកដំបូងនៅក្នុងតុលាការសហព័ន្ធ Manhattan ដើម្បីប្រឈមមុខនឹងការចោទប្រកាន់ពីបទភេរវកម្មគ្រឿងញៀន ការឃុបឃិត និងការលាងលុយកខ្វក់។ លោកម៉ាឌូរ៉ូ បានបដិសេដរាល់ការចោទប្រកាន់ បានបញ្ជាក់ថា «ខ្ញុំគ្មានទោសទេ… ខ្ញុំនៅតែជាប្រធានាធិបតីនៃប្រទេសរបស់ខ្ញុំ»។

ពាក់ព័ន្ធនឹងការចាប់ខ្លួននេះ អគ្គលេខាធិការ លោក António Guterres បានព្រមានថា សកម្មភាពរបស់អាមេរិកបានបង្កើត «គំរូដ៏គ្រោះថ្នាក់» សម្រាប់ច្បាប់អន្តរជាតិ។ ខណៈដែលទីក្រុងវ៉ាស៊ីនតោនបានការពារការវាយឆ្មក់នេះថា ជាសកម្មភាពអនុវត្តច្បាប់ប្រឆាំងនឹង «ជនជាប់ចោទដែលរត់គេចខ្លួន» ប្រទេសចិន និងរុស្ស៊ីបានថ្កោលទោសរឿងនេះថាជា «ការប្រើប្រាស់កម្លាំងបាយយ៉ាងកំរោល» ប្រឆាំងនឹងរដ្ឋអធិបតេយ្យ៕

ប្រែសម្រួល៖ ឈាង

The post ស្វីសបង្កកទ្រព្យសម្បត្តិមាសជាង១០០តោន របស់រដ្ឋាភិបាលលោកម៉ាឌូរ៉ូ appeared first on Kampuchea Thmey Daily.

សង្ស័យថា សោកនាដកម្មឆេះក្លឹបកម្សាន្តនៅស្វីស បង្កឡើងដោយ ស្រាសាំប៉ាញ

Sok Sovann — Fri, 02 Jan 2026 07:59:44 +0000

សោកនាដកម្មឆេះក្លឹបកម្សាន្តនៅប្រទេសស្វីសថ្ងៃឆ្លងឆ្នាំ ធ្វើឲ្យពិភពលោកទាំងមូលតក់ស្លុត ហើយដ្បិតថា មូលហេតុពិតនៅមិនទាន់គេដឹងក៏ដោយ ប៉ុន្តែរូបថតមួយសន្លឹកធ្វើឲ្យគេសង្ស័យថា អគ្គិភ័យអាចបណ្តាលមកពីស្រាសាំប៉ាញ។

(រូបថត៖ បណ្តាញសង្គម)

តាមការផ្សាយរបស់ Daily Mail, អគ្គិភ័យកើតឡើងនៅម៉ោង១:៣០នាទីរំលងអធ្រាត្រថ្ងៃ៣១ខែធ្នូឆ្នាំ២០២៥ ឈានចូលថ្ងៃ១ខែមករាឆ្នាំ២០២៦ នៅក្លឹប Le Constellation ក្នុងរមណីយដ្ឋាន Crans-Montana នៃតំបន់ Valais។

គិតត្រឹមរសៀលថ្ងៃសុក្រទី២ខែមករាឆ្នាំ២០២៦ តួលេខមនុស្សស្លាប់ បានកើនដល់៤៧នាក់ ខណៈ១១៥នាក់រងរបួស។ មនុស្សស្លាប់ភាគច្រើនជាទេសចរ ហើយជាជនបរទេសមកពីប្រទេសផ្សេងៗ។

ស្របពេលប៉ូលិសស្វីសកំពុងបើកការស៊ើបអង្កេតចូលក្នុងករណីនេះ មានការទម្លាយរូបភាពមួយសន្លឹក ដែលបង្ហាញពីអ្នកចូលក្លឹបនាំគ្នាគាស់ស្រាសាំប៉ាញ ដើម្បីជប់លៀងអបអរឆ្នាំថ្មី ប៉ុន្តែស្រាទាំងនោះ បែរជាត្រូវភ្លើងឆាប បង្កជាអណ្តាតភ្លើងទៅវិញ។

(រូបថត៖ បណ្តាញសង្គម)

ទោះនេះមិនអាចកំណត់ជាផ្លូវការថាជាដើមចមបង្កឲ្យមានអគ្គិភ័យយ៉ាងសន្ធោសន្ធៅក៏ដោយ ប៉ុន្តែវាត្រូវបានគេដាក់ការសង្ស័យ និងកំពុងពិនិត្យមើល។

ប្រទេសស្វីស បានប្រកាសកាន់ទុក្ខរយៈពេល៥ថ្ងៃ ហើយទង់ជាតិនៅលើអគារសហព័ន្ធទាំងអស់ ត្រូវបង្ហូតចុះពាក់កណ្តាលដង។

ទន្ទឹមនោះ មេដឹកនាំជុំវិញពិភពលោក ក៏បានសម្តែងនូវសេចក្តីសោកស្តាយយ៉ាងជ្រាលជ្រៅ និងបានផ្តល់ការគាំទ្រដល់ប្រទេសស្វីសផងដែរ៕

អត្ថបទ៖ សុខ សុវណ្ណ

មនុស្សស្លាប់កើនដល់៤០នាក់ ក្នុងសោកនាដកម្មឆេះក្លឹបកម្សាន្តនៅស្វីស ថ្ងៃឆ្លងឆ្នាំ

The post សង្ស័យថា សោកនាដកម្មឆេះក្លឹបកម្សាន្តនៅស្វីស បង្កឡើងដោយ ស្រាសាំប៉ាញ appeared first on Kampuchea Thmey Daily.

មនុស្សស្លាប់កើនដល់៤០នាក់ ក្នុងសោកនាដកម្មឆេះក្លឹបកម្សាន្តនៅស្វីស ថ្ងៃឆ្លងឆ្នាំ

Sok Sovann — Fri, 02 Jan 2026 00:27:59 +0000

អាជ្ញាធរស្វីសបញ្ជាក់ថា ចំនួនមនុស្សស្លាប់ក្នុងសោកនាដកម្មអគ្គិភ័យ ឆាបឆេះក្លឹបកម្សាន្ត Le Constellation បានកើនដល់៤០នាក់ហើយ។

(រូបថត៖ បណ្តាញសង្គម)

អគ្គិភ័យកើតឡើងកាលពីថ្ងៃព្រហស្បតិ៍ទី១ខែមករាឆ្នាំ២០២៦ នៅពេលទេសចរកំពុងអបអរពិធីឆ្លងឆ្នាំថ្មីឆ្នាំសកល២០២៦ នៅតំបន់ Valais ភាគខាងត្បូង។

ស្វីសបានបញ្ជូនឧទ្ធម្ភាគចក្រ១៣គ្រឿង រថយន្តពេទ្យចំនួន៤២គ្រឿងនិងបុគ្គលិកសង្គ្រោះបន្ទាន់១៥០នាក់ទៅកន្លែងកើតហេតុទាំងយប់ ដើម្បីសម្រួលដល់ប្រតិបត្តិការជួយសង្គ្រោះ។

(រូបថត៖ បណ្តាញសង្គម)

តាមការផ្សាយរបស់ BBC ដែលដកស្រង់ប្រភពពីក្រុមជួយសង្គ្រោះ, ក្រៅពីមនុស្សស្លាប់ ក៏មានមនុស្ស១១៥នាក់ទៀតរងរបួសផងដែរ ហើយក្នុងនោះមានច្រើននាក់របួសធ្ងន់ដោយសារការរលាកភ្លើង។

ប្រទេសជាច្រើនជាពិសេសបារាំងនិងអ៊ីតាលី សុទ្ធតែចេញមកបញ្ជាក់ថា ជនជាតិរបស់ពួកគេ គឺស្ថិតក្នុងចំណោមមនុស្សស្លាប់ក្នុងហេតុការណ៍នេះ ប៉ុន្តែមិនទាន់ច្បាស់តួលេខ។

(រូបថត៖ Reuters)

ទោះបីជាយ៉ាងណា ប៉ូលិសមិនទាន់ដឹងពីមូលហេតុច្បាស់នៃសោកនាដកម្មនេះទេ ប៉ុន្តែបានច្រានចោលថា វាមិនមែនជាការវាយប្រហារឡើយ។

សូមជម្រាបថា ស្វីសគឺជាប្រទេសល្បីល្បាញជាកន្លែងទេសចរយ៉ាងល្អឥតខ្ចោះនៅលើពិភពលោក ហើយហេតុការណ៍សម្លាប់មនុស្សច្រើនបែបនេះ គឺកម្រកើតមានណាស់៕

អត្ថបទ៖ សុខ សុវណ្ណ

ការផ្ទុះក្លិបកម្សាន្តនៅស្វីស កំពុងធ្វើឲ្យអ្នកទេសចរស្ថិតក្នុងភាពស្លន់ស្លោ

The post មនុស្សស្លាប់កើនដល់៤០នាក់ ក្នុងសោកនាដកម្មឆេះក្លឹបកម្សាន្តនៅស្វីស ថ្ងៃឆ្លងឆ្នាំ appeared first on Kampuchea Thmey Daily.

ប្រទេសស្វីស ថាត្រៀមខ្លួនរួចហើយសម្រាប់ជំនួបកំពូលរវាង ត្រាំ-ពូទីន

Chheang — Mon, 13 Jan 2025 03:59:37 +0000

ស្វីស បានប្រកាសថា ខ្លួនត្រៀមរួចជាស្រេចក្នុងការធ្វើជាម្ចាស់ផ្ទះនៃកិច្ចប្រជុំកម្រិតខ្ពស់រវាងប្រធានាធិបតីទើបជាប់ឆ្នោតអាមេរិកលោក ដូណាល់ ត្រាំ និងប្រធានាធិបតីរុស្ស៊ីលោក វ៉្លាឌឺមៀរ ពូទីន។ នេះបើយោងតាមលោក Nicolas Bideau ប្រធានផ្នែកទំនាក់ទំនងនៅក្រសួងការបរទេសស្វីស ដែលបានថ្លែងទៅកាន់កាសែតស្វីស Le Temps កាលពីថ្ងៃអាទិត្យទី១២ខែមករាឆ្នាំ២០២៥។

លោក វ៉្លាឌឺមៀរ ពូទីន និងលោក ដូណាល់ ត្រាំ (រូបភាព៖ Reuters)

លោក Bideau បាននិយាយថា បន្ទាប់ពីកិច្ចប្រជុំកំពូលសន្តិភាពពិភពលោកដែលបានធ្វើឡើងនៅស្វីសក្នុងខែមិថុនាកន្លងទៅ ប្រទេសអ៊ុយក្រែន រុស្ស៊ី និងសហរដ្ឋអាមេរិកត្រូវបានជូនដំណឹងជាទៀងទាត់អំពីឆន្ទៈរបស់ស្វីសក្នុងការសម្របសម្រួលគំនិតផ្តួចផ្តើមការទូត។

ការអត្ថាធិប្បាយរបស់លោក Bideau ធ្វើឡើងនៅពេលដែលវិមានក្រឹមឡាំងបានបង្ហាញពីឆន្ទៈ ក្នុងការជួបជាមួយលោក ត្រាំ ដើម្បីរៀបចំកិច្ចព្រមព្រៀងស្តីពីការបញ្ចប់សង្គ្រាមរបស់រុស្ស៊ី ប្រឆាំងនឹងអ៊ុយក្រែន។ យ៉ាងណា គ្មានផែនការ ឬកាលបរិច្ឆេទជាក់លាក់ណាមួយត្រូវបានកំណត់ឡើយ។ ទីក្រុងមូស្គូ បានឲ្យដឹងថា កិច្ចប្រជុំទល់មុខគ្នាអាចកើតឡើងបានទាល់តែលោក ត្រាំ ឡើងកាន់តំណែងជាផ្លូវការនៅថ្ងៃទី២០ខែមករាជាមុនសិន។

លោក ត្រាំ បានប្តេជ្ញាថានឹងនាំទីក្រុងកៀវ និងទីក្រុងមូស្គូទៅកាន់តុចរចា ហើយបញ្ចប់សង្គ្រាមទ្រង់ទ្រាយធំនេះឲ្យបានឆាប់រហ័ស។ កាលពីដើមសប្តាហ៍មុន លោកបានប្រាប់ក្រុមអ្នកយកព័ត៌មានថា ការរៀបចំសម្រាប់កិច្ចប្រជុំជាមួយលោក ពូទីន កំពុងដំណើរការហើយ៕

ដោយ៖ ឈាង

The post ប្រទេសស្វីស ថាត្រៀមខ្លួនរួចហើយសម្រាប់ជំនួបកំពូលរវាង ត្រាំ-ពូទីន appeared first on Kampuchea Thmey Daily.

ប្រទេសស្វីស Archives - Kampuchea Thmey Daily

ស្វីស​មិន​​ឲ្យ​នាំ​ចេញ​អាវុធទៅ​អាមេរិក​ទេ​ ខណៈ​សង្រ្គាម​នៅ​អ៊ីរ៉ង់​​​​​កំពុង​រាលដាល​​

ត្រាំ និយាយ​លេង​បន្លំមែន ប្រដូចកោះ Greenland ទៅ Iceland

ទៅដល់ស្វីស លោកត្រាំ បន្ទន់ឥរិយាបទ ដោយបញ្ជាក់ថា នឹងមិនប្រើកម្លាំង វាយយក Greenland ទេ

ស្វីសបង្កកទ្រព្យសម្បត្តិមាសជាង១០០​​តោន របស់រដ្ឋាភិបាល​លោកម៉ាឌូរ៉ូ

សង្ស័យថា សោកនាដកម្មឆេះក្លឹបកម្សាន្តនៅស្វីស បង្កឡើងដោយ ស្រាសាំប៉ាញ

មនុស្សស្លាប់កើនដល់៤០នាក់ ក្នុងសោកនាដកម្មឆេះក្លឹបកម្សាន្តនៅស្វីស ថ្ងៃឆ្លងឆ្នាំ

ប្រទេស​ស្វីស ថាត្រៀម​ខ្លួន​រួច​ហើយ​សម្រាប់​ជំនួប​កំពូល​រវាង ត្រាំ-ពូទីន

ស្វីសមិនឲ្យនាំចេញអាវុធទៅអាមេរិកទេ ខណៈសង្រ្គាមនៅអ៊ីរ៉ង់កំពុងរាលដាល

ត្រាំ និយាយលេងបន្លំមែន ប្រដូចកោះ Greenland ទៅ Iceland

ស្វីសបង្កកទ្រព្យសម្បត្តិមាសជាង១០០តោន របស់រដ្ឋាភិបាលលោកម៉ាឌូរ៉ូ

ប្រទេសស្វីស ថាត្រៀមខ្លួនរួចហើយសម្រាប់ជំនួបកំពូលរវាង ត្រាំ-ពូទីន