ប្រទេស ប៉ាគីស្ថាន Archives - Kampuchea Thmey Daily

ចិនអំពាវនាវឱ្យប៉ាគីស្ថាន-អាហ្វហ្គានីស្ថាន ដោះស្រាយដោយសន្តិវិធី និងឈប់ប្រយុទ្ធគ្នាជាបន្ទាន់

Minea Neu — Sat, 28 Feb 2026 03:13:34 +0000

ប្រទេសចិនអំពាវនាវឱ្យប៉ាគីស្ថាន-អាហ្វហ្គានីស្ថាន រក្សាភាពអត់ធ្មត់ ព្យាយាមដោះស្រាយគ្នាដោយសន្តិវិធី តាមរយៈការសន្ទនា ការចរចា និងបញ្ចប់ការប្រយុទ្ធគ្នាឱ្យបានឆាប់តាមដែលអាចធ្វើទៅបាន។

យោងតាម Global Times ចុះផ្សាយនៅថ្ងៃទី២៧ខែកុម្ភៈ, អ្នកនាំពាក្យក្រសួងការបរទេសចិន លោកស្រី ម៉ៅ នីង( Mao Ning) លើកឡើងថា៖ « ប្រទេសចិនមានការព្រួយបារម្ភយ៉ាងខ្លាំង ចំពោះការកើនឡើងនៃជម្លោះប៉ាគីស្ថាន-អាហ្វហ្គានីស្ថាន ហើយមានការសោកស្ដាយចំពោះអ្នកស្លាប់ និងរបួស»។

អ្នកនាំពាក្យក្រសួងការបរទេសចិន លោកស្រី ម៉ៅ នីង។ រូបភាព៖ Facebook Page៖ លោកស្រី Mao Ning

បន្ថែមពីនេះ ប្រទេសចិនដើរតួនាទីជាអ្នកសម្របសម្រួលរវាងភាគីទាំងពីរតាមរយៈបណ្តាញក្នុងប្រទេសផ្ទាល់ខ្លួន និងត្រៀមខ្លួនរួចជាស្រេចដើម្បីបន្តស្ថាបនាក្នុងការបន្ធូរបន្ថយភាពតានតឹង កែលម្អទំនាក់ទំនងរវាងប្រទេសទាំងពីរ។

លោកស្រី Mao Ning បន្តថា៖ «ក្រសួង និងស្ថានទូតរបស់យើងនៅប្រទេសប៉ាគីស្ថាន និងអាហ្វហ្គានីស្ថានកំពុងចូលរួមជាមួយភាគីពាក់ព័ន្ធក្នុងប្រទេសទាំងពីរ។ ប្រទេសចិនស្នើសុំឱ្យប្រទេសប៉ាគីស្ថាន និងអាហ្វហ្គានីស្ថានធានាសុវត្ថិភាព និងសន្តិសុខរបស់បុគ្គលិក គម្រោង និងស្ថាប័នចិននៅក្នុងប្រទេសទាំងពីរ»។

គួរបញ្ជាក់ថា រដ្ឋមន្ត្រីក្រសួងការពារជាតិប៉ាគីស្ថាន លោក Khawaja Asif និយាយកាលពីថ្ងៃសុក្រថា ទីក្រុងអ៊ីស្លាម៉ាបាដ( Islamabad) នឹងធ្វើសង្គ្រាមបើកចំហក្នុងពេលឥឡូវនេះ ខណៈខ្លួនអស់ការអត់ធ្មត់ជាមួយអាជ្ញាធរតាលីបង់ បន្ទាប់ពីការវាយប្រហារដោយកងកម្លាំងអាហ្វហ្គានីស្ថានប្រឆាំងនឹងទីតាំងយោធាប៉ាគីស្ថានតាមបណ្តោយតំបន់ព្រំដែនរួមរវាងប្រទេសទាំងពីរ។

ការប៉ះទង្គិចគ្នាជុំថ្មីនេះ បណ្តាលឱ្យមានអ្នកស្លាប់និងរបួសសងខាង ទោះបីជាតួលេខពិតប្រាកដនៅតែមានការជជែកវែកញែកក៏ដោយ។

មិនតែប៉ុណ្ណោះ លោក Antonio Guterres អគ្គលេខាធិការអង្គការសហប្រជាជាតិ កំពុងតាមដានយ៉ាងដិតដល់នូវការប៉ះទង្គិចគ្នាឆ្លងព្រំដែនកាន់តែខ្លាំងឡើងរវាងប្រទេសអាហ្វហ្គានីស្ថាន និងប៉ាគីស្ថាន ដោយសម្តែងការព្រួយបារម្ភយ៉ាងខ្លាំង ចំពោះការកើនឡើងនៃអំពើហិង្សាថ្មីៗនេះ។

លោក Guterres បានជំរុញឱ្យប្រទេសទាំងពីរប្រកាន់ខ្ជាប់យ៉ាងតឹងរ៉ឹងនូវកាតព្វកិច្ចរបស់ខ្លួនក្រោមច្បាប់អន្តរជាតិ ជាពិសេសលើច្បាប់មនុស្សធម៌អន្តរជាតិ។ នេះបើយោងតាមការចុះផ្សាយរបស់ Al Jazeera៕

ប្រែសម្រួល៖ ណឺ មិនា

The post ចិនអំពាវនាវឱ្យប៉ាគីស្ថាន-អាហ្វហ្គានីស្ថាន ដោះស្រាយដោយសន្តិវិធី និងឈប់ប្រយុទ្ធគ្នាជាបន្ទាន់ appeared first on Kampuchea Thmey Daily.

ការបំផ្ទុះគ្រាប់បែកអត្តឃាតនៅស្ថានីយរថភ្លើងបណ្តាលឱ្យស្លាប់និងរបួសជិត១០០នាក់នៅប៉ាគីស្ថាន

Rann Reuy — Sat, 09 Nov 2024 07:42:36 +0000

យោងសេចក្តីរាយការណ៍របស់ទីភ្នាក់ងារព័ត៌មានរ៉យទ័រ មនុស្សយ៉ាងហោចណាស់២៤នាក់បានស្លាប់ និងជាង៤០នាក់ផ្សេងទៀតបានរងរបួសនៅក្នុងការបំផ្ទុះគ្រាប់បែកអត្តឃាតនៅស្ថានីយរថភ្លើងក្នុងទីក្រុង Quetta ភាគនិរតីនៃប្រទេសប៉ាគីស្ថាន នៅថ្ងៃទី៩ខែវិច្ឆិកានេះ។

ទិដ្ឋភាពក្រោយបំផ្ទុះគ្រាប់បែកនៅប៉ាគីស្ថាន។ AP

ការបំផ្ទុះគ្រាប់បែកអត្តឃាតនេះកើតឡើងនៅស្ថានីយអ្នកដំណើរតាមរថភ្លើង ខណៈដែលអ្នកដំណើររាប់រយនាក់កំពុងរង់ចាំការចេញដំណើររបស់រថភ្លើង។

លោក Mouzzam Jah Ansari អធិការនគរបាលក្រុង Balochistan នៅភាគនីរតីនៃប្រទេសជាទីដែលមានការតស៊ូផ្តាច់ខ្លួន និងការប្រយុទ្ធដោយក្រុមសកម្មប្រយុទ្ធជារឿយៗ បាននិយាយថា មនុស្ស២៤នាក់បានស្លាប់ដោយសារការបំផ្ទុះនេះរហូតមកដល់ពេលនេះ។

ការវាយប្រហាររបស់ពួកគេគឺសំដៅគោលដៅទាហានមកពីសាលាថ្មើរជើង។ នេះបើតាមការដកស្រង់របស់រ៉យទ័រ ដោយលើកឡើងថា មានជនរងគ្រោះរបួសធ្ងន់រាប់សិបនាក់ផ្សេងទៀតត្រូវដឹកសង្គ្រោះបន្ទាន់ទៅកាន់មន្ទីរពេទ្យ។

លោកវេជ្ជបណ្ឌិត Wasim Baig អ្នកនាំពាក្យមន្ទីរពេទ្យបានប្រាប់រ៉យទ័រថា ៖«រហូតមកដល់ពេលនេះអ្នករងរបួសចំនួន ៤៤នាក់ត្រូវបានបញ្ជូនទៅមន្ទីរពេទ្យស៊ីវិល»។

អគ្គនាយកជាន់ខ្ពស់នៃប្រតិបត្តិការប៉ូលីសលោក Muhammad Baloch បាននិយាយថា ការបំផ្ទុះនេះហាក់ដូចជាគ្រាប់បែកអត្តឃាត ហើយការស៊ើបអង្កេតកំពុងដំណើរការសម្រាប់ព័ត៌មានបន្ថែម។

លោក Baloch បាននិយាយថា «ការបំផ្ទុះបានកើតឡើងនៅខាងក្នុងស្ថានីយរថភ្លើង នៅពេលដែល Express-bound ទីក្រុង Peshawar ហៀបនឹងចាកចេញទៅកាន់គោលដៅរបស់ខ្លួន»។

គ្មានក្រុមណាមួយបានអះអាងទទួលខុសត្រូវចំពោះការបំផ្ទុះនៅស្ថានីយរថភ្លើងសំខាន់របស់ Quetta ដែលជាធម្មតារវល់នៅពេលព្រឹក។

កាលពីខែសីហា មនុស្សយ៉ាងហោចណាស់ ៧៣នាក់ត្រូវបានសម្លាប់នៅក្នុងខេត្ត Balochistan បន្ទាប់ពីពួកសកម្មប្រយុទ្ធបំបែកខ្លួនបានវាយប្រហារស្ថានីយប៉ូលីស ផ្លូវរថភ្លើង និងផ្លូវហាយវេ។

ការវាយប្រហារកាលពីខែសីហាគឺជាការរីករាលដាលបំផុតក្នុងរយៈពេលជាច្រើនឆ្នាំដោយពួកសកម្មប្រយុទ្ធប្រយុទ្ធនឹងការបះបោរអស់ជាច្រើនទសវត្សរ៍ដើម្បីឈ្នះការផ្តាច់ខ្លួននៃខេត្តភាគនិរតីដែលសម្បូរដោយធនធាន ដែលជាកន្លែងសម្រាប់គម្រោងសំខាន់ៗដែលដឹកនាំដោយប្រទេសចិនដូចជាកំពង់ផែ និងអណ្តូងរ៉ែមាស និងទង់ដែង។

ប៉ាគីស្ថានកំពុងប្រឈមមុខនឹងការកើនឡើងនៃការវាយប្រហារដោយក្រុមសកម្មប្រយុទ្ធនៅភាគពាយព្យរបស់ខ្លួន និងការកើនឡើងនៃការបះបោរបំបែកខ្លួននៅភាគខាងត្បូង៕

The post ការបំផ្ទុះគ្រាប់បែកអត្តឃាតនៅស្ថានីយរថភ្លើងបណ្តាលឱ្យស្លាប់និងរបួសជិត១០០នាក់នៅប៉ាគីស្ថាន appeared first on Kampuchea Thmey Daily.

ហេតុអ្វីបានជាប្រទេស ប៉ាគីស្ថាន ជួបគ្រោះទឹកជំនន់ ធ្ងន់ធ្ងរបែបនេះ? (មានវីដេអូ)

Sok Sovann — Tue, 30 Aug 2022 23:30:00 +0000

វិបត្តិអាកាសធាតុ គឺជាកត្តាចម្បងសម្រាប់ទំហំដ៏មហន្តរាយ នៃគ្រោះទឹកជំនន់នៅក្នុងប្រទេសប៉ាគីស្ថាន ដែលបានសម្លាប់មនុស្សជាង ១០០០នាក់ និងប៉ះពាល់ដល់ប្រជាជនជាង៣០លាននាក់។

គ្រោះមហន្តរាយនេះ គឺបណ្តាលមកពីកត្តាសំខាន់ៗរួមបញ្ចូលគ្នានៃភាពងាយរងគ្រោះរបស់ប្រជាពលរដ្ឋក្រីក្រ ជម្រាលភ្នំដ៏ចោតនៅក្នុងតំបន់មួយចំនួន ការធ្លាយទំនប់ទឹក និងការប្រែប្រួលអាកាសធាតុ។

ប៉ាគីស្ថានមានប្រជាជនប្រមាណ ២២១លាននាក់។

ប្រជាជនភាគច្រើនរស់នៅតាមដងទន្លេ Indus ដែលហូរចេញពីជួរភ្នំហិមាល័យ ឆ្លងកាត់តំបន់ភាគច្រើននៃប្រទេស ចុះទៅសមុទ្រអារ៉ាប់នៅទីក្រុង ការ៉ាជី។

ក្នុងរដូវមូសុង ទន្លេ Indus ងាយនឹងមានគ្រោះទឹកជំនន់ជាទីបំផុត។

ស្ថិតនៅភាគខាងជើងនៃជួរភ្នំហិមាល័យ ប្រទេសប៉ាគីស្ថានគឺជាជម្រុកនៃផ្ទាំងទឹកកក ច្រើនជាងកន្លែងផ្សេងទៀតនៅលើពិភពលោក ខាងក្រៅតំបន់អាកទិក និងអង់តាក់ទិក ដែលមានផ្ទាំងទឹកកក ប្រហែល ៧០០០។

សីតុណ្ហភាព ដែលកើនឡើងដល់ជិត ៥០អង្សាសេ នៅក្នុងទីក្រុង Nawabshah កាលពីដើមឆ្នាំនេះ កំពុងបណ្តាលឲ្យផ្ទាំងទឹកកកទាំងនោះរលាយ និងបង្កើតជាបឹងទឹកកក។

បឹងថ្មីប្រហែល ៣០០០ ត្រូវបានបង្កើតឡើង ខណៈក្រុមមន្ត្រី ព្រមានថា បឹងចំនួន ៣៣ ក្នុងចំណោមនោះ កំពុងប្រឈមនឹងហានិភ័យនៃការបង្កជាទឹកជំនន់។

នៅពេលផ្ទាំងទឹកកក Shisper រលាយក្នុងខែឧសភា វាបានបញ្ចេញទឹករាប់លានម៉ែត្រគូប ដែលបណ្តាលឲ្យមានការបាក់ដី និងបង្កើតបានជាបឹងដែលបំផ្លាញស្ពាន រោងចក្រថាមពលចំនួនពីរ និងបំផ្លាញផ្ទះរាប់រយខ្នងនៅជ្រលងភ្នំ Hunza។

បណ្ឌិត Fahad Saeed អ្នកវិទ្យាសាស្ត្រអាកាសធាតុនៃក្រុម Climate Analytics ដែលមានមូលដ្ឋាននៅទីក្រុង អ៊ីស្លាម៉ាបាដ បាននិយាយថា “យើងកំពុងមើលឃើញទឹកជំនន់ដ៏អាក្រក់បំផុតនៅក្នុងប្រវត្តិសាស្ត្ររបស់ប្រទេស”។

ចាប់ពីដើមខែសីហាមក ភ្លៀងធ្លាក់គឺមានកម្រិតខ្ពស់ជាងមធ្យម ៩ដងក្នុងខេត្ត Sindh និងខ្ពស់ជាង ៥ដងនៅទូទាំងប្រទេសប៉ាគីស្ថាន។ ភ្លៀង បានធ្លាក់កាន់តែខ្លាំង នៅជុំវិញពិភពលោក ហើយខ្យល់កាន់តែមានសំណើម។

ការវិភាគរបស់អ្នកវិទ្យាសាស្រ្តអំពីទឹកជំនន់ដ៏អាក្រក់បំផុតក្នុងឆ្នាំ២០១០ បានបង្ហាញថា មហាគ្រោះទឹកជំនន់ ទំនងជាកើតឡើងដោយសារកម្តៅផែនដី ដែលបណ្តាលឲ្យមានភ្លៀងធ្លាក់ខ្លាំង។

មហាសមុទ្រដែលកាន់តែក្តៅ និងកម្តៅនៅតំបន់អាកទិក បានជាប់ពាក់ព័ន្ធនៅក្នុងមហាគ្រោះទឹកជំនន់ឆ្នាំ ២០១០ ខណៈកត្តាទាំងនេះ បានប៉ះពាល់ដល់ចរន្តខ្យល់កម្រិតខ្ពស់ដែលបក់ជុំវិញភពផែនដី។ ចរន្តខ្យល់កាន់តែច្របូកច្របល់ បាននាំឲ្យមានភ្លៀងធ្លាក់អូសបន្លាយក្នុងប្រទេសប៉ាគីស្ថាន និងរលកកម្ដៅខ្លាំងនៅរុស្ស៊ីក្នុងឆ្នាំនោះ។

ហើយយោងទៅតាមការសិក្សាឆ្នាំ២០២១, កម្តៅផែនដី កំពុងធ្វើឲ្យខ្យល់មូសុងនៅអាស៊ីខាងត្បូងកាន់តែខ្លាំង និងខុសប្រក្រតី ដោយរាល់ការកើនឡើង ១អង្សាសេនៅក្នុងសីតុណ្ហភាពពិភពលោក បាននាំឲ្យមានភ្លៀងធ្លាក់បន្ថែម៥%។

ចាប់តាំងពីឆ្នាំ២០១០មក ប្រទេសប៉ាគីស្ថាន បានរងគ្រោះដោយទឹកជំនន់ជាទៀងទាត់ ក៏ដូចជារលកកម្តៅ និងភ្លើងឆេះព្រៃផងដែរ។

លោក Saeed និយាយថា “ការប្រែប្រួលអាកាសធាតុពិតជាប៉ះពាល់ដល់យើង។ វាបានក្លាយជាបទដ្ឋាន ដែលជារៀងរាល់ឆ្នាំយើងត្រូវប្រឈមមុខនឹងព្រឹត្ដិការណ៍ អាកាសធាតុធ្ងន់ធ្ងរ”។

ស្របពេលជាមួយគ្នានោះ យោងតាមបណ្ឌិត Liz Stephens សាស្ត្រាចារ្យរងផ្នែកហានិភ័យអាកាសធាតុ និងភាពធន់នៅសាកលវិទ្យាល័យ Reading ចក្រភពអង់គ្លេស បានឲ្យដឹងថា ទឹកជំនន់នៅប៉ាគីស្ថាននាពេលបច្ចុប្បន្ននេះ គឺកើតឡើងមិនដល់ម្តងផង ក្នុងមួយសតវត្សរ៍។ យើងអាចមើលឃើញថា វាជាទឹកជំនន់ដ៏សាហាវ ហើយនៅកន្លែងជាច្រើន វានឹងអាក្រក់ជាងឆ្នាំ ២០១០ ដែលបានសម្លាប់មនុស្ស ១៧០០ នាក់ទៅទៀត។

លោកស្រី Stephens និយាយថា កត្តាសំខាន់ពីរដែលបណ្តាលឲ្យមានអ្នកស្លាប់ច្រើនគឺ ទឹកជំនន់កើតឡើងភ្លាមៗ និងការបាក់ទំនប់។ ភ្លៀងធ្លាក់ខ្លាំង បានវាយប្រហារកន្លែងដែល ទឹកហូរបុកយ៉ាងលឿនចុះពីជម្រាលភ្នំ ខណៈមនុស្សមិនបានត្រៀមខ្លួនសម្រាប់ហានិភ័យ។

លោកស្រី Stephens បន្តថា ការកាប់បំផ្លាញព្រៃឈើ ក៏អាចបង្កើនល្បឿននៃ ទឹកហូរនៅកន្លែងនានាផងដែរ។

ចំណែកអ្នកឧតុនិយម Scott Duncan បាននិយាយថា វដ្ដអាកាសធាតុធម្មជាតិ ដែលជំរុញដោយការប្រែប្រួលសីតុណ្ហភាព និងខ្យល់នៅក្នុងមហាសមុទ្រប៉ាស៊ីហ្វិក ក៏អាចរួមចំណែកទៅលើគ្រោះទឹកជំនន់នៅប៉ាគីស្ថានផងដែ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Sky, The Guardian

ចុចអាន៖ ប៉ាគីស្ថាន ខាតបង់ទឹកប្រាក់ ១០ ពាន់លានដុល្លារ ដោយសារទឹកជំនន់

The post ហេតុអ្វីបានជាប្រទេស ប៉ាគីស្ថាន ជួបគ្រោះទឹកជំនន់ ធ្ងន់ធ្ងរបែបនេះ? (មានវីដេអូ) appeared first on Kampuchea Thmey Daily.

ប៉ាគីស្ថាន ខាតបង់ទឹកប្រាក់ ១០ ពាន់លានដុល្លារ ដោយសារទឹកជំនន់

Sok Sovann — Tue, 30 Aug 2022 06:54:16 +0000

រដ្ឋមន្ត្រីក្រសួងផែនការប៉ាគីស្ថាន បាននិយាយកាលពីថ្ងៃចន្ទទី២៩ខែសីហាថា តាមការប៉ាន់ប្រមាណដំបូង ទំហំនៃការខូចខាតពីគ្រោះទឹកជំនន់ដ៏សាហាវនាពេលថ្មីៗនេះ គឺជាង១០ពាន់លានដុល្លារ។

ទឹកជំនន់ភ្លាមៗមិនធ្លាប់មានពីមុនមក ដែលបណ្តាលមកពីភ្លៀងមូសុងជាប្រវត្តិសាស្ត្រ បានបំផ្លាញផ្លូវថ្នល់ ដំណាំ ហេដ្ឋារចនាសម្ព័ន្ធ និងស្ពាន ដោយបានសម្លាប់មនុស្សជាង ១០០០នាក់ ក្នុងរយៈពេលប៉ុន្មានសប្តាហ៍ថ្មីៗនេះ និងប៉ះពាល់ដល់មនុស្សជាង ៣៣លាននាក់ ពោលគឺជាង១៥ភាគរយនៃចំនួនប្រជាជន២២០លាននាក់ របស់ប្រទេសនេះ។

ស្របពេលជាមួយគ្នានោះ លោកស្រី Sherry Rehman រដ្ឋមន្ត្រីក្រសួងបម្រែបម្រួលអាកាសធាតុ បាននិយាយថា “វាជាមហាសមុទ្រដ៏ធំមួយ គ្មានដីស្ងួត ដើម្បីបូមទឹកចេញនោះទេ។ ឥឡូវនេះ មួយភាគបីនៃប្រទេសប៉ាគីស្ថាន គឺស្ថិតនៅក្រោមទឹក។ យើងមិនដែលឃើញបែបនេះឡើយ”។

លោកស្រី Sherry Rehman រដ្ឋមន្ត្រីក្រសួងបម្រែបម្រួលអាកាសធាតុ ប៉ាគីស្ថាន

រដ្ឋមន្ត្រីផែនការលោក Ahsan Iqbal បានប្រាប់រ៉យទ័រក្នុងបទសម្ភាសន៍មួយថា “ខ្ញុំគិតថា វានឹងមានទំហំធំ។ រហូតមកដល់ពេលនេះ ការប៉ាន់ប្រមាណដំបូងគឺថា វាបង្កការខូចខាតដ៏ធំ ខ្ពស់ជាង១០ពាន់លានដុល្លារ។ គិតត្រឹមពេលនេះ យើងបានបាត់បង់ជីវិតមនុស្សជាង ១០០០ នាក់ហើយ។ មានការខូចខាតដល់ផ្ទះជិតមួយលានខ្នង។ ប្រជាជន បានបាត់បង់ជីវភាពរស់នៅទាំងស្រុង”។

លោក Iqbal បានវាយតម្លៃទឹកជំនន់នាពេលថ្មីៗនេះថា អាក្រក់ជាងទឹកជំនន់ដែលបានវាយប្រហារប្រទេសប៉ាគីស្ថានក្នុងឆ្នាំ ២០១០ទៅទៀត។ វាអាចចំណាយពេលប្រាំឆ្នាំដើម្បីកសាង និងស្តារប្រទេសជាតិឡើងវិញ ខណៈក្នុងរយៈពេលដ៏ខ្លីខាងមុខនេះ វានឹងប្រឈមមុខនឹងការខ្វះខាតស្បៀងអាហារធ្ងន់ធ្ងរ៕

ប្រែសម្រួល៖ Vann Vann

ប្រភព៖ CNA

ចុចអាន៖ ទិដ្ឋភាពសោកនាដកម្មគ្រោះទឹកជំនន់នៅប៉ាគីស្ថាន សម្លាប់មនុស្សជាង ១ពាន់នាក់ ខណៈ៣៣លាននាក់ ត្រូវជម្លៀស

The post ប៉ាគីស្ថាន ខាតបង់ទឹកប្រាក់ ១០ ពាន់លានដុល្លារ ដោយសារទឹកជំនន់ appeared first on Kampuchea Thmey Daily.

ទឹកជំនន់នៅ ប៉ាគីស្ថាន សម្លាប់មនុស្សជាង ៨០០នាក់

Sok Sovann — Thu, 25 Aug 2022 01:58:47 +0000

រដ្ឋមន្ត្រីក្រសួងបម្រែបម្រួលអាកាសធាតុរបស់ប្រទេសប៉ាគីស្ថាន លោកស្រី Sherry Rehman បាននិយាយកាលពីថ្ងៃពុធទី២៤ខែសីហាថា ភ្លៀងធ្លាក់រដូវមូសុងដ៏ខ្លាំងក្លា មិនធ្លាប់មានក្នុងកំណត់ត្រា បានបង្កឲ្យមានគ្រោះមហន្តរាយធំធេង។

ស្របពេលជាមួយគ្នានោះ លោកស្រីបានអំពាវនាវសុំឲ្យអន្តរជាតិ ផ្តល់ជំនួយក្នុងការដោះស្រាយជាមួយទឹកជំនន់ដែលបានសម្លាប់មនុស្សជាង ៨០០ នាក់ហើយ ចាប់តាំងពីខែមិថុនាមក។

ភ្លៀងរដូវមូសុងប្រចាំឆ្នាំ ពិតជាមានសារសំខាន់សម្រាប់ការស្រោចស្រពដំណាំ និងការបំពេញបឹង និងទំនប់នៅទូទាំងឧបទ្វីបឥណ្ឌា ប៉ុន្តែជារៀងរាល់ឆ្នាំ វាក៏នាំមកនូវរលកនៃការបំផ្លិចបំផ្លាញផងដែរ។

ភ្លៀងធ្លាក់ខ្លាំង បានបន្តវាយលុកប្រទេសប៉ាគីស្ថានកាលពីថ្ងៃពុធ ខណៈអាជ្ញាធររាយការណ៍ថា មានអ្នកស្លាប់ជាងដប់នាក់ រួមទាំងកុមារប្រាំបួននាក់ផងដែរ ក្នុងរយៈពេល ២៤ម៉ោងចុងក្រោយ។

លោកស្រី Sherry Rehman និយាយថា អាជ្ញាធរនឹងចាប់ផ្តើមការអំពាវនាវសុំជំនួយពីអន្តរជាតិ នៅពេលដែលការវាយតម្លៃបានបញ្ចប់។ លោកស្រីបានប្រាប់ AFP ថា “ការរស់នៅមានហានិភ័យ មនុស្សរាប់ពាន់នាក់គ្មានផ្ទះសម្បែង។ វាជារឿងសំខាន់ដែលដៃគូអន្តរជាតិ ត្រូវជួយយើង”។

ប្រទេសប៉ាគីស្ថាន ស្ថិតនៅលំដាប់ទី៨ក្នុងបញ្ជីប្រទេសដែលត្រូវបានគេចាត់ទុកថាងាយរងគ្រោះបំផុតចំពោះអាកាសធាតុអាក្រក់ ដែលបង្កឡើងដោយការប្រែប្រួលអាកាសធាតុ។

កាលពីដើមឆ្នាំនេះ តំបន់ភាគច្រើននៃប្រទេស ត្រូវបានវាយប្រហារដោយរលកកម្តៅ ដោយសីតុណ្ហភាពបានឡើងរហូតដល់៥១អង្សាសេក្នុងទីក្រុង Jacobabad នៃខេត្ត Sindh។

ប៉ុន្តែបច្ចុប្បន្ន ទីក្រុងនេះកំពុងប្រឈមនឹងទឹកជំនន់ ដែលបានជន់លិចផ្ទះសម្បែង និងហូរកាត់ផ្តាច់ផ្លូវ និងស្ពាន។

ភ្លៀងធ្លាក់ក្នុងឆ្នាំនេះ គឺខ្លាំងបំផុតចាប់តាំងពីឆ្នាំ២០១០មក នៅពេលដែលមនុស្សជាង២០០០នាក់បានស្លាប់ និងជាង២លាននាក់ត្រូវបានជម្លៀស ដោយទឹកជំនន់ខ្យល់ ដែលគ្របដណ្តប់ជិតមួយភាគប្រាំនៃប្រទេស៕

ប្រែសម្រួល៖ Vann Vann

ប្រភព៖ CNA

ចុចអាន៖ ស្លាប់កើនដល់១០០នាក់ហើយ ក្នុងគ្រោះធម្មជាតិនៅ ប្រេស៊ីល

The post ទឹកជំនន់នៅ ប៉ាគីស្ថាន សម្លាប់មនុស្សជាង ៨០០នាក់ appeared first on Kampuchea Thmey Daily.

ប៉ាគីស្ថាន អង្វរប្រជាជន ឲ្យបន្ថយផឹក តែ ដើម្បីជួយសេដ្ឋកិច្ច

Sok Sovann — Wed, 15 Jun 2022 07:17:29 +0000

ប្រជាជនប៉ាគីស្ថាន ត្រូវបានស្នើឲ្យកាត់បន្ថយបរិមាណទឹកតែដែលពួកគេផឹក ដើម្បីជួយសេដ្ឋកិច្ចរបស់ប្រទេស។

រដ្ឋមន្ត្រីជាន់ខ្ពស់លោក Ahsan Iqbal បាននិយាយថា ការផឹកទឹកតែកាន់តែតិចពែង ក្នុងមួយថ្ងៃនឹងជួយកាត់បន្ថយថ្លៃនាំចូលដ៏ខ្ពស់របស់ប្រទេស ប៉ាគីស្ថាន។

ទុនបម្រុងរូបិយប័ណ្ណបរទេសដ៏ទាបរបស់ប្រទេសនេះ បច្ចុប្បន្នអាចទប់ទល់ចំពោះការនាំចូលទាំងអស់បានក្នុងរយៈពេលត្រឹមតែ២ខែទៀតប៉ុណ្ណោះ។

ប៉ាគីស្ថាន គឺជាប្រទេសនាំចូលតែដ៏ធំបំផុតរបស់ពិភពលោក ដោយបានទិញក្នុងតម្លៃជាង៦០០លានដុល្លារអាមេរិកកាលពីឆ្នាំមុន។

លោក Iqbal បាននិយាយថា “ខ្ញុំសូមអំពាវនាវដល់ប្រជាជន ឲ្យកាត់បន្ថយការផឹកទឹកតែ មួយទៅពីរពែងក្នុងមួយថ្ងៃ ពីព្រោះយើងនាំចូលតែ ដោយខ្ចីលុយគេ”។ លោកបានស្នើសុំឲ្យអាជីវករ បិទតូបក្នុងផ្សារនៅម៉ោង២០និង៣០នាទីផងដែរ ដើម្បីសន្សំសំចៃអគ្គិសនី។

ការអង្វរករនេះ បានកើតឡើងស្របពេលទុនបម្រុងរូបិយប័ណ្ណបរទេសរបស់ប៉ាគីស្ថាន បន្តធ្លាក់ចុះយ៉ាងឆាប់រហ័ស ដោយដាក់សម្ពាធលើរដ្ឋាភិបាលឲ្យកាត់បន្ថយការចំណាយលើការនាំចូល និងរក្សាមូលនិធិនៅក្នុងប្រទេស។

ទុនបម្រុងប្តូរប្រាក់បរទេសរបស់ប៉ាគីស្ថាន បានធ្លាក់ចុះពីប្រហែល ១៦ពាន់លានដុល្លារអាមេរិក ក្នុងខែកុម្ភៈ មកតិចជាង ១០ពាន់លានដុល្លារអាមេរិកក្នុងសប្តាហ៍ដំបូងនៃខែមិថុនា។

កាលពីខែមុន មន្ត្រីនៅទីក្រុងការ៉ាជី បានរឹតបន្តឹងការនាំចូលវត្ថុប្រណីតមិនសំខាន់រាប់សិប ដែលជាផ្នែកមួយនៃការប៉ុនប៉ងការពារមូលនិធិ៕

ប្រែសម្រួល៖ Vann Vann

ប្រភព៖ BBC

ចុចអាន៖ ស្រីលង្កា ឲ្យមន្ត្រីរដ្ឋ ឈប់ថែមមួយថ្ងៃទៀតក្នុងមួយសប្តាហ៍ ដើម្បីទៅធ្វើស្រែ

The post ប៉ាគីស្ថាន អង្វរប្រជាជន ឲ្យបន្ថយផឹក តែ ដើម្បីជួយសេដ្ឋកិច្ច appeared first on Kampuchea Thmey Daily.

នាយករដ្ឋមន្ត្រីប៉ាគីស្ថាន ធ្លាក់តំណែងបន្ទាប់ពីចាញ់ការបោះឆ្នោត ដកសេចក្តីទុកចិត្ត

Sok Sovann — Sun, 10 Apr 2022 00:42:33 +0000

នាយករដ្ឋមន្ត្រីប៉ាគីស្ថាន លោក Imran Khan ត្រូវបានទម្លាក់ចេញពីតំណែង បន្ទាប់ពីចាញ់ការបោះឆ្នោតដកសេចក្តីទុកចិត្តក្នុងការដឹកនាំរបស់គាត់។

ការបោះឆ្នោតនេះ ត្រូវបានធ្វើឡើងកាលពីថ្ងៃសៅរ៍ទី០៩ខែមេសា បន្ទាប់ពីគណបក្សប្រឆាំងបានដាក់ញត្តិប្រឆាំងនឹងរូបគាត់ ដែលត្រូវបានគាំទ្រដោយតុលាការកំពូល។

លោក Khan និយាយថា លោកនឹងមិនទទួលស្គាល់រដ្ឋាភិបាលគណបក្សប្រឆាំងឡើយ ដោយអះអាងទាំងគ្មានភស្តុតាងថា មានការឃុបឃិតដឹកនាំដោយសហរដ្ឋអាមេរិក ដើម្បីទម្លាក់គាត់។

សភាប៉ាគីស្ថាន នឹងជួបប្រជុំគ្នាដើម្បីបោះឆ្នោតជ្រើសរើសមេដឹកនាំថ្មីរបស់ប្រទេស នៅថ្ងៃចន្ទស្អែកនេះ។

បុគ្គលនោះនឹងអាចកាន់អំណាចរហូតដល់ខែតុលា ឆ្នាំ២០២៣ នៅពេលដែលការបោះឆ្នោតលើកក្រោយនឹងត្រូវធ្វើឡើង។

គួរបញ្ជាក់ថា រដ្ឋាភិបាលរបស់លោក Khan បានបន្តរំលាយសភា ហើយអំពាវនាវឲ្យមានការបោះឆ្នោតជាបន្ទាន់មួយ។

រឿងនេះបានធ្វើឲ្យសមាជិកបក្សប្រឆាំងមួយចំនួនខឹងសម្បា ដោយខ្លះចោទនាយករដ្ឋមន្ត្រីថាក្បត់ជាតិដោយសាររារាំងការបោះឆ្នោត៕

ប្រែសម្រួល៖ Vann Vann

ប្រភព៖ BBC

ចុចអាន៖ មីស៊ីលមួយគ្រាប់ធ្លាក់នៅប៉ាគីស្ថាន, ឥណ្ឌា ថា ខ្លួនច្រឡំដៃបាញ់ទៅ

The post នាយករដ្ឋមន្ត្រីប៉ាគីស្ថាន ធ្លាក់តំណែងបន្ទាប់ពីចាញ់ការបោះឆ្នោត ដកសេចក្តីទុកចិត្ត appeared first on Kampuchea Thmey Daily.

មីស៊ីលមួយគ្រាប់ធ្លាក់នៅប៉ាគីស្ថាន, ឥណ្ឌា ថា ខ្លួនច្រឡំដៃបាញ់ទៅ

Sok Sovann — Sat, 12 Mar 2022 01:02:40 +0000

ប្រទេសឥណ្ឌានិយាយថា ខ្លួនបានច្រឡំដៃ បាញ់កាំជ្រួចមីស៊ីលចូលទៅក្នុងប្រទេសជិតខាង ប៉ាគីស្ថាន នៅសប្តាហ៍នេះ ដោយសារតែ “បញ្ហាខុសបច្ចេកទេស” ក្នុងអំឡុងពេលថែទាំជាប្រចាំ។

នាយករដ្ឋមន្ត្រីឥណ្ឌា លោក ណារ៉េនដ្រា ម៉ូឌី

ក្រសួងការពារជាតិឥណ្ឌា បាននិយាយនៅក្នុងសេចក្តីថ្លែងការណ៍មួយកាលពីថ្ងៃសុក្រទី១១ខែមីនាថា “នៅថ្ងៃទី៩ខែមីនាឆ្នាំ២០២២, ក្នុងដំណើរការថែទាំជាប្រចាំ បញ្ហាបច្ចេកទេស បាននាំឲ្យមានការច្រឡំដៃបាញ់កាំជ្រួចមីស៊ីល”។

មីស៊ីលនេះ បានធ្លាក់នៅតំបន់មួយនៃប្រទេសប៉ាគីស្ថាន ប៉ុន្តែសំណាងល្អ មិនមានមនុស្សណាម្នាក់បាត់បង់ជីវិតដោយសារឧបទ្ទវហេតុនេះឡើយ។

ក្រសួងនិយាយថា រដ្ឋាភិបាលបានចាត់វិធានការយ៉ាងម៉ឺងម៉ាត់ និងបានបញ្ជាឲ្យមានការស៊ើបអង្កេតកម្រិតខ្ពស់ ចំពោះឧប្បត្តិហេតុនេះ។

សេចក្តីថ្លែងការណ៍នេះបានធ្វើឡើងប៉ុន្មានម៉ោង បន្ទាប់ពីក្រសួងការបរទេសទីក្រុង អ៊ីស្លាម៉ាបាដ បានថ្កោលទោសនូវអ្វីដែលខ្លួនហៅថា “ការរំលោភបំពានដែនអាកាសរបស់ខ្លួនដោយវត្ថុហោះហើរ មានប្រភពចេញពីប្រទេសឥណ្ឌា”។

ស្របពេលជាមួយគ្នានោះ ភារធារីរបស់ឥណ្ឌានៅទីក្រុង ស្លាម៉ាបាដ ត្រូវបានកោះហៅទៅកាន់ការិយាល័យការបរទេស សម្រាប់ការតវ៉ា។

គួរបញ្ជាក់ថា នាពេលកន្លងមក អ្នកជំនាញខាងយោធាបានព្រមានពីហានិភ័យនៃគ្រោះថ្នាក់ ឬការគណនាខុសដោយប្រទេសជិតខាងទាំង២ ដែលបានប្រយុទ្ធគ្នាចំនួនបីលើក និងមានការប៉ះទង្គិចគ្នាផ្នែកយោធាជារឿយៗ ដែលថ្មីៗបំផុតគឺនៅក្នុងឆ្នាំ២០១៩៕

ប្រែសម្រួល៖ Vann Vann

ប្រភព៖ Al Jazeera

ចុចអាន៖ ឥណ្ឌា ប្រាប់ ចិន ឲ្យដកទ័ពចេញពីព្រំដែន ទើបទំនាក់ទំនងល្អប្រសើរ

The post មីស៊ីលមួយគ្រាប់ធ្លាក់នៅប៉ាគីស្ថាន, ឥណ្ឌា ថា ខ្លួនច្រឡំដៃបាញ់ទៅ appeared first on Kampuchea Thmey Daily.