មីស៊ីលមួយគ្រាប់ធ្លាក់នៅប៉ាគីស្ថាន, ឥណ្ឌា ថា ខ្លួនច្រឡំដៃបាញ់ទៅ

ប្រទេសឥណ្ឌានិយាយថា ខ្លួនបានច្រឡំដៃ បាញ់កាំជ្រួចមីស៊ីលចូលទៅក្នុងប្រទេសជិតខាង ប៉ាគីស្ថាន នៅសប្តាហ៍នេះ ដោយសារតែ “បញ្ហាខុសបច្ចេកទេស” ក្នុងអំឡុងពេលថែទាំជាប្រចាំ។

ក្រសួងការពារជាតិឥណ្ឌា បាននិយាយនៅក្នុងសេចក្តីថ្លែងការណ៍មួយកាលពីថ្ងៃសុក្រទី១១ខែមីនាថា “នៅថ្ងៃទី៩ខែមីនាឆ្នាំ២០២២, ក្នុងដំណើរការថែទាំជាប្រចាំ បញ្ហាបច្ចេកទេស បាននាំឲ្យមានការច្រឡំដៃបាញ់កាំជ្រួចមីស៊ីល”។

មីស៊ីលនេះ បានធ្លាក់នៅតំបន់មួយនៃប្រទេសប៉ាគីស្ថាន ប៉ុន្តែសំណាងល្អ មិនមានមនុស្សណាម្នាក់បាត់បង់ជីវិតដោយសារឧបទ្ទវហេតុនេះឡើយ។

ក្រសួង​​និយាយ​ថា រដ្ឋាភិបាល​បាន​ចាត់​វិធានការ​យ៉ាង​ម៉ឺងម៉ាត់ និង​បាន​បញ្ជា​ឲ្យមានការ​ស៊ើប​អង្កេត​កម្រិត​ខ្ពស់ ​ចំពោះ​ឧប្បត្តិហេតុ​នេះ។

សេចក្តីថ្លែងការណ៍នេះបានធ្វើឡើងប៉ុន្មានម៉ោង បន្ទាប់ពីក្រសួងការបរទេសទីក្រុង អ៊ីស្លាម៉ាបាដ បានថ្កោលទោសនូវអ្វីដែលខ្លួនហៅថា “ការរំលោភបំពានដែនអាកាសរបស់ខ្លួនដោយវត្ថុហោះហើរ មានប្រភពចេញពីប្រទេសឥណ្ឌា”។

ស្របពេលជាមួយគ្នានោះ ភារធារីរបស់ឥណ្ឌានៅទីក្រុង ស្លាម៉ាបាដ ត្រូវបានកោះហៅទៅកាន់ការិយាល័យការបរទេស សម្រាប់ការតវ៉ា។

គួរបញ្ជាក់ថា នាពេលកន្លងមក អ្នកជំនាញខាងយោធាបានព្រមានពីហានិភ័យនៃគ្រោះថ្នាក់ ឬការគណនាខុសដោយប្រទេសជិតខាងទាំង២ ដែលបានប្រយុទ្ធគ្នាចំនួនបីលើក និងមានការប៉ះទង្គិចគ្នាផ្នែកយោធាជារឿយៗ ដែលថ្មីៗបំផុតគឺនៅក្នុងឆ្នាំ២០១៩៕

ប្រែសម្រួល៖ Vann Vann

ប្រភព៖ Al Jazeera

ចុចអាន៖ ឥណ្ឌា ប្រាប់ ចិន ឲ្យដកទ័ពចេញពីព្រំដែន ទើបទំនាក់ទំនងល្អប្រសើរ