ស្លាប់កើនដល់១០០នាក់ហើយ ក្នុងគ្រោះធម្មជាតិនៅ ប្រេស៊ីល (មានវីដេអូ)

ទឹកជំនន់ និងការបាក់ដីដែលបង្កឡើងដោយភ្លៀងធ្លាក់ខ្លាំង ឥឡូវនេះបានសម្លាប់មនុស្សចំនួន១០០នាក់ហើយនៅភាគឦសានប្រទេសប្រេស៊ីល ខណៈក្រុមសង្គ្រោះបន្ទាន់ នៅតែស្វែងរកសាកសពនិងអ្នកនៅរស់រានមានជីវិត។

កម្លាំង​នៃ​ការ​បាក់​ដី ​បាន​បំផ្លាញ​ផ្ទះ​សម្បែង​នៅ​ក្នុង​សង្កាត់​នានា​រួម​ទាំង Jardim Monteverde ដែលជា​សហគមន៍​ក្រីក្រ​មួយ​នៅ​ខាង​ក្រៅ​ទីក្រុង Recife ផងដែរ។

ក្រុមជួយសង្គ្រោះ បានរកឃើញសពមនុស្សរាប់សិបនាក់ ដែលត្រូវកប់ក្រោមដីភក់ បន្ទាប់ពីទឹកជំនន់វាយប្រហារទីនោះកាលពីថ្ងៃសៅរ៍។

ស្របពេលជាមួយគ្នានោះ មន្ត្រីគ្រប់គ្រងគ្រោះមហន្តរាយរដ្ឋ Pernambuco បាននិយាយថា មនុស្សចំនួន១៤នាក់ នៅតែបាត់ខ្លួន។

ក្រុងយ៉ាងតិច២៤នៅរដ្ឋ Pernambuco បានប្រកាសដាក់ក្នុងភាពអាសន្ន ហើយមនុស្សជាង ៦០០០នាក់ បានបាត់បង់ផ្ទះសម្បែង ឬត្រូវបង្ខំឲ្យភៀសខ្លួន។

គួរបញ្ជាក់ថា ភ្លៀង​បាន​ចាប់​ផ្តើមធ្លាក់​កាល​ពី​សប្តាហ៍​មុន ប៉ុន្តែ​​ធ្លាក់កាន់តែ​ខ្លាំងកាលពី​ចុង​សប្តាហ៍។ ពេញមួយយប់ថ្ងៃសុក្រដល់ថ្ងៃសៅរ៍ ភ្លៀងដែលធ្លាក់នៅតំបន់ខ្លះនៃរដ្ឋ Pernambuco គឺខ្លាំងជាងកម្រិតធម្មតាសម្រាប់ខែឧសភា ដល់ទៅ៧០%ឯណោះ។

សោកនាដកម្មទាក់ទងនឹងអាកាសធាតុ កំពុងក្លាយជារឿងកាន់តែធ្ងន់ធ្ងរនៅក្នុងប្រទេសប្រេស៊ីល។

កាល​ពី​ខែ​កុម្ភៈ មនុស្ស​២៣៣​នាក់​បាន​ស្លាប់​ក្នុង​គ្រោះ​ទឹក​ជំនន់ និង​ការ​បាក់​ដី​នៅ​ភាគ​អាគ្នេយ៍​ទីក្រុង Petropolis ក្នុង​រដ្ឋ Rio de Janeiro។

កាលពីខែមករា ភ្លៀងធ្លាក់ខ្លាំងបានឆក់យកជីវិតមនុស្សយ៉ាងតិច២៨នាក់ នៅភាគអាគ្នេយ៍ប្រទេសប្រេស៊ីល ដែលភាគច្រើននៅក្នុងរដ្ឋ Sao Paulo៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Bangkok Post

ចុចអាន៖ ភ្លៀងធ្លាក់ខ្លាំងបង្កជាទឹកជំនន់ និងការបាក់ដី សម្លាប់មនុស្ស ៧៩នាក់នៅ ប្រេស៊ីល