​លោក ​វង្សី វិស្សុត ​បាន​លើក​ឡើង​នៅ​ក្នុង​ពិធី​សម្ពោធ​ ​«ចង្កោមកម្មវិធីគាំទ្រសហគ្រិនភាព សម្រាប់​គាំទ្រ​ដល់សិស្ស-និស្សិត ធុរកិច្ចថ្មី​ កសិករខ្នាតតូច ​និង​សហគ្រាសធុនមីក្រូ តូច និងមធ្យម​នៅ​ខេត្តកំពង់ធំ» នៅថ្ងៃទី ០៦ មិថុនា ២០២៦។​

ឧបនាយករដ្ឋមន្ត្រីប្រចាំការ ​បានវាយតម្លៃខ្ពស់ ​ដល់សហគ្រិនខ្មែរ រដ្ឋបាលខេត្តកំពង់ធំ ក្រសួង​ស្ថាប័ន​ពាក់ព័ន្ធ ​និងវិស័យឯកជន ​ដែលបានរៀបចំកម្មវិធីដ៏សំខាន់នេះ ​ឡើង ​​សមត្ថភាព​របស់​អាជីវករ ពាណិជ្ជករ កសិករ ពិសេសសហគ្រិនវ័យក្មេង និងធុរកិច្ចថ្មីនៅក្នុងខេត្តកំពង់ធំ ឱ្យកាន់តែ​មាន​ភាពប្រកួតប្រជែង ​អាចបង្កើតផលិតផលថ្មី និងតម្លៃបន្ថែមថ្មី ហើយអាចឈរជើងបាន និងរីក​លូត​លាស់ទៅថ្ងៃមុខ ដើម្បីធ្វើពិពិធកម្មមូល ដ្ឋានសេដ្ឋកិច្ចខេត្តកំពង់ធំ ក្លាយជាចន្ទល់សេដ្ឋកិច្ច​មួយ​របស់​កម្ពុជា។​

​ឧបនាយករដ្ឋមន្ត្រីប្រចាំការ​បន្តថា​ ថ្វីត្បិតខេត្តកំពង់ធំមានសក្តានុពលច្រើន មានផ្ទៃដីក៏ធំ ហើយ​ចំនួន​ប្រជាជនក៏ច្រើនគួរសមពិតមែន ក៏ប៉ុន្តែកម្រិតនៃការអភិវឌ្ឍសេដ្ឋកិច្ច-សង្គមរបស់ខេត្តកំពង់ធំ ដូចជា ចំណូលប្រជាជនម្នាក់ធៀបនឹង ផ.ស.ស មានសន្ទុះទាប ហើយអត្រានៃភាពក្រីក្រខ្ពស់ ក្នុង​ខណៈដែលចំនួនសហគ្រាសពាណិជ្ជកម្មនៅមានតិចនៅឡើយធៀបនឹងខេត្តដទៃ។

តួលេខនេះ គូសបញ្ជាក់ឱ្យឃើញថា បងប្អូនខេត្តកំពង់ធំយើងជា ច្រើននៅប្រកបរបរធ្វើស្រែចម្ការ ជាលក្ខណៈគ្រួសារនៅឡើយ និងពុំទាន់មានកម្រិតសហគ្រិនភាពច្រើននៅឡើយទេ។ ដូចនេះ យើងត្រូវលើកស្ទួយសហគ្រិនភាព ដែលជាមេទ័ពក្នុងសេដ្ឋកិច្ចឱ្យបានច្រើន ដើម្បីជំរុញការអភិវឌ្ឍ កំណើន និងការបង្កើតតម្លៃបន្ថែមក្នុងសេដ្ឋកិច្ច សម្រាប់ធ្វើបែងចែកផ្លែផ្កានៃកំណើន ក្នុងគោលដៅ​លើកកម្ពស់ជីវភាពប្រជាជន។

​ឧបនាយករដ្ឋមន្ត្រីប្រចាំការ ក៏បានគូសរំលេចថា រាជរដ្ឋាភិបាលមានទស្សនវិជ្ជា​ចាត់ទុកវិស័យ​ឯកជន ​រួមមានបងប្អូនកសិករ ​សិប្បករ អាជីវករទាំងអស់​ ដែលកម្ពុជាយើងមានកម្លាំង​ពលកម្ម​ប្រមាណ ១០លាននាក់ ​គឺជាអ្នកបង្កើតតម្លៃបន្ថែមក្នុងសេដ្ឋកិច្ច។ ​ហើយកម្មវិធីនាថ្ងៃនេះ​ មានគោល​ដៅ​គាំទ្រសហគ្រិនភាព ដើម្បីបណ្តុះ ទាំងអ្នកដែលមានទេពកោសល្យពីកំណើត និងទាំងអ្នកដែល​ចង់ចេះ ចង់ដឹង និងចង់ចាប់ផ្តើមអាជីវកម្ម ឱ្យក្លាយទៅជា «មេទ័ពសេដ្ឋកិច្ច»។​

​ឧបនាយករដ្ឋមន្ត្រីប្រចាំការ ​បន្ថែមថា ​សហគ្រិនភាពគឺជាទេពកោសល្យសំខាន់មួយ ទាមទារឱ្យ​មានចរិត អាកប្បកិរិយា ឥរិយាបថតស៊ូ ព្យាយាមចង់ចេះ ចង់ដឹង ចង់ធ្វើអាជីវកម្ម ប៉ុន្តែក៏ត្រូវពឹង​ផ្អែកលើឱកាស បរិស្ថាន​សង្គម បរិស្ថានសេដ្ឋកិច្ច ឬប្រព័ន្ធអេកូឡូស៊ីអំ​ណោយ​ផល ទើបសហគ្រិនទាំងនោះអាចងើបឡើងរួច។

វិស័យ​សាធារណៈត្រូវដើរតួជាអ្នកតម្រង់ផ្លូវ គាំទ្រសហគ្រិន មិនខ្ទប់សក្តានុពលវិស័យឯកជន ​និងជាពិសេសកសាងលក្ខខណ្ឌឱ្យវិស័យឯកជនមានឱកាសងើបឈរខ្លាំងឡើង ទាំងក្នុងកត្តា​គោល​នយោបាយ អប់រំ ហិរញ្ញវត្ថុ ច្បាប់ទម្លាប់។

ឧបនាយករដ្ឋមន្ត្រីប្រចាំការ បានលើកឡើងថា ក្នុងបរិការណ៍ដែលពិភពលោក រួមទាំង​ភូមិសាស្ត្រនយោបាយ ភូមិសាស្ត្រសេដ្ឋកិច្ច បច្ចេកវិទ្យា បរិយាកាសបរិស្ថាន​ផ្លាស់ប្តូរឥតឈប់ឈរ យើងត្រូវគិតគូរឡើងវិញអំពីការរៀបចំ ឬធ្វើបច្ចុប្បន្នកម្មក្របខ័ណ្ឌនៃការបណ្តុះមេទ័ព ឬបណ្តុះទ័ពស្រួច​ក្នុងវិស័យឯកជន ឱ្យទាន់សភាពការណ៍ ជាពិសេសសម្រាប់សហគ្រិនថ្មីៗ។

ក្រៅពីនេះ សង្គ្រាមឈ្លានពានរបស់ថៃបានគូសបញ្ជាក់ពីភាពចាំបាច់ និងភាពបន្ទាន់ថែមទៀត របស់ប្រទេស កម្ពុជា ក្នុងការចេះរៀនសូត្រពង្រឹងសមត្ថភាពផលិតដោយខ្លួនឯង ប្រកួតប្រជែង​ជាមួយគេ ជាពិសេសបន្ថយការនាំចូល បង្កើនការផលិត និងសេវាកម្ម។ ដូច្នេះ កម្មវិធីនេះក៏អាច​ចាត់ទុកថា​ជាការកសាងសមត្ថភាពផលិតទំនិញក្នុងស្រុក ដើម្បីប្រើប្រាស់ខ្លួនឯង ជំនួសការនាំចូល​ផង ហើយសម្រាប់បម្រើការនាំចេញទៅខាងក្រៅផង ព្រមទាំងជាការប្តូរផ្នត់គំនិតពីការពឹងផ្អែក ឱ្យទៅជាការជួយឱ្យមានសមត្ថភាពរកចំណូលដោយខ្លួនឯង ដែលពាក្យសាមញ្ញថា «បង្រៀនឱ្យចេះរកត្រី ជាជាងឱ្យត្រី»។ នេះទើបជាការធ្វើសេដ្ឋកិច្ចពិតប្រាកដរបស់ប្រទេស ហើយត្រូវអនុវត្តនៅគ្រប់ខេត្តទាំងអស់ ទើបយើងរឹងមាំបាន។

​ឧបនាយករដ្ឋមន្ត្រីប្រចាំការ បានផ្តាំផ្ញើដល់សិស្សានុសិស្សឱ្យមានក្តីសង្ឃឹម កុំឱ្យគិតថា ​ភាពក្រីក្រ​ធ្វើ​ឱ្យយើងធ្វើអ្វីមិនកើត ផ្ទុយទៅវិញត្រូវយកភាពក្រីក្រមកបង្កើតជាឆន្ទៈ និងឥរិយាបថ​ដើម្បីឱ្យ​យើង​ក្លាយ​ជាមនុស្សខ្លាំង និងបានណែនាំឱ្យសិស្សានុសិស្ស «ស្រមៃឱ្យធំ តែចាប់ផ្តើម​ពីកិច្ចការ​តូចតាច​ជា​មុន»៕

The post ​រដ្ឋាភិបាល​ដាក់​ទិស​ដៅ ​ប្រែក្លាយ​ខេត្ត​កំពង់ធំ​ ទៅ​ជាមូលដ្ឋានផលិតកម្ម ​និង​ទេសចរណ៍ appeared first on Kampuchea Thmey Daily.

​លោក ​ប៉ែន សុវិជាតិ ថ្លែងថា៖ ​«នៅពេលដែលប្រជាពលរដ្ឋយើងធ្វើពហិកាទំនិញថៃ​ ជាដំណាក់​កាល​មួយ​ដែល​យើងអាច​មានឱកាសល្អបំផុត ​សម្រាប់ឧស្សាហកម្មក្នុងស្រុករីកចម្រើន​ ហើយ​បើ​ឧស្សា​ហ​ករ​យើង​មិនឆ្លៀត​ឱកាស​ហ្នឹងទេ​យើង​ប្រហែល​ជានឹងបាត់បង់​ឱកាស​ល្អនេះ​»។​

​អ្នកនាំពាក្យក្រសួងពាណិជ្ជកម្ម ​បានបន្ថែមថា ​នៅពេល​ដែល​ដំណឹងថា​ ​មីម៉ាម៉ា ​បិទ ​មីជាតិ​របស់​យើង​ចូល​មក​ជំនួស​ភ្លាម ​ហើយ​មាន​ផលិតផល​ច្រើន​រសជាតិ ​ដែល​ស្រប​ទៅ​នឹង​តម្រូវ​ការ​ទីផ្សារ។​

​ឧកញ៉ា តែ តាំងប៉ ប្រធាន​សម្ព័ន្ធ​សមាគមសហគ្រាស​ធុន​​តូច​និង​មធ្យម​នៅ​កម្ពុជា ​មានប្រសាសន៍ថា ​ដើម្បីឱ្យផលិត​ផលរបស់យើងមានស្ថិរភាព ​និង​ភាពប្រកួតប្រជែង ​អាច​ឈរ​ជើង​បាន​នៅ​ក្នុង​ទីផ្សារ​ ផលិតផល​យើងត្រូវ​មាន​ស្ដង់ដា ​តម្លៃ​សមរម្យ ​និង​ប្រកួតប្រជែង ស្ថិរភាពនៃការផ្គត់ផ្គង់ នវានុវត្តន៍ផលិតផលថ្មីៗ ការកសាងម៉ាកយីហោ និងការធ្វើអនុលោម​ស្ដង់ដា និងច្បាប់។​

ឧកញ៉ា តែ តាំងប៉ បានបន្ថែមថា សម្ទុះនៃការប្រើប្រាស់​​ផលិតផលខ្មែរ ​កើនឡើង ៣០%​ បន្ទាប់​ពី​ប្រជាពលរដ្ឋធ្វើ​ពហិ​កាទំនិញថៃ។

លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ច នៃរាជបណ្ឌិត្យសភាកម្ពុជាលើកឡើងថា វិស័យឯកជនមិនអាចធានាគុណភាពផលិតផលបានទេ ប្រសិនបើគ្មានការចូលរួមពីរាជរដ្ឋាភិបាល ការដាក់ច្បាប់អាជ្ញាបណ្ណគឺជាម៉ែត្រវាស់វែងមួយ ប៉ុន្តែកុំឱ្យអាជ្ញាបណ្ណ និងម៉ែត្រវាស់វែងនេះ វាក្លាយទៅជាអន្ទាក់សម្រាប់ពួកគាត់ទៅវិញ ធ្វើឱ្យគេខ្លាច អត់ហ៊ានចូលទៅសុំអាជ្ញាបណ្ណ ដែលនេះជាបញ្ហាប្រឈមមួយដែលត្រូវដោះស្រាយ លើកទឹកចិត្តយ៉ាងម៉េចឱ្យគេចុះបញ្ជីបានស្រួល។

លោកបណ្ឌិត គី សេរីវឌ្ឍន៍ បន្ថែមថា៖ «ការផ្សព្វផ្សាយ ​ដោយពលរដ្ឋមួយចំនួនលោកក៏មិនទាន់យល់រឿងហ្នឹងដែរ ឱ្យតែឃើញមានអាជ្ញាបណ្ណចេះតែថា អូអាហ្នឹងមកទាលុយទៀត ​អញ្ចឹងត្រូវតែមានការផ្សព្វផ្សាយ ត្រូវមានបារ៉ែម ត្រូវមានការបញ្ជាក់ច្បាស់លាស់ទៅ ខ្ញុំជឿថានឹងចូលរួមទាំងអស់គ្នា ប្រសិនបើបារ៉ែមហ្នឹង បង់ចូលរដ្ឋផ្សេង ចូលហោប៉ៅផ្សេង អាហ្នឹងគឺជាអន្ទាក់ហើយ ពលរដ្ឋគាត់នៅបារម្ភតែប៉ុណ្ណឹងទេ»។

លោកបញ្ជាក់ថា ពាក់ព័ន្ធនឹងការពង្រឹងគុណភាពបច្ចេកទេស ក្រសួងក៏គួតែផ្ដល់លក្ខណៈបច្ចេកទេស បន្ថែមទៀត។ ម្យ៉ាងទៀត វត្ថុធាតុដើម ក៏ជាកត្តារារាំងមួយនៃផលិតកម្ម ដោយរដ្ឋាភិបាលត្រូវរៀបចំផែនការផលិតកម្ម៕

អត្ថបទ៖ ឡេង ដេត

The post ​ស្មារតី​ពហិការ​ទំនិញ​ថៃ ​ជា​ឱកាស​ល្អ​បំផុត ​សម្រាប់​សហគ្រាស​ក្នុងស្រុក​ appeared first on Kampuchea Thmey Daily.

នៅក្នុងវេទិកាពិភាក្សាស្តីពី «សេដ្ឋកិច្ចកម្ពុជាឆ្នាំ២០២៦» នៅរសៀលថ្ងៃទី ២៥ ឧសភា លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មមានប្រសាសន៍ថា ការរួបរួមសាមគ្គីគ្នាបានធ្វើឱ្យខ្មែរយើងខ្លាំងទោះបីជាកម្ពុជា​ជួប​វិបត្តិជាច្រើនដូចជាកូវីដ១៩ សង្គ្រាមរុស្សី-អ៊ុយក្រែន ការដាក់អត្រាពន្ធបដិកា សង្គ្រាមអាមេរិកអ៊ីរ៉ង កម្ពុជានៅរក្សា​ជំហ​​រឹងមាំព្រោះបានបង្កើតភាពធន់។ ជាក់ស្តែងតាមការព្យាករសេដ្ឋកិច្ចកម្ពុជា នៅឆ្នាំ២០២៦ មានកំណើនក្នុងរង្វង់ ៤.៥% ដោយសារកំណើននៃការនាំចេញ។

បើតាមលោក ប៉ែន សុវិជាតិ ក្រសួងពាណិជ្ជកម្ម កំពុងពង្រីកទីផ្សារថ្មីបន្ថែមទៀត ក្នុងនោះមាននាំចេញកសិផលទៅប្រទេសចិន ព្រោះចិនជាទីផ្សារដ៏ធំ និងបណ្តាប្រទេសផ្សេងៗទៀតដូចជារុស្សី អាហ្វ្រិក និងមជ្ឈិមបូព៌ា។ ទន្ទឹមនឹងការពង្រីកទីផ្សារយើងក៏គិតផងដែរថា តើយើងមានទំនិញលក់ដែរឬទេ ពិសេសទំនិញមានលក្ខខណ្ឌតាមបទដ្ឋានត្រឹមត្រូវ និងមានគុណភាព៕

អត្ថបទ៖ សំអឿន

The post ​មន្ត្រីជាន់ខ្ពស់ក្រសួងពាណិជ្ជកម្ម អំពាវនាវឱ្យប្រជាពលរដ្ឋ បន្តស្មារតីគាំទ្រស្រលាញ់ផលិតផលជាតិ appeared first on Kampuchea Thmey Daily.

​លោក ស៊ុត ខុន អភិបាលខេត្តស្តីទី ​មានប្រសាសន៍ថា​ ការរៀបចំ​ពិព័រណ៍ ​«ភូមិមួយផលិតផលមួយ» គឺជាព្រឹត្តិការណ៍ដ៏មានសារៈសំខាន់ក្នុងការបង្ហាញ​ និង​ផ្សព្វផ្សាយ​ពីសក្តានុពលផលិតផល​ក្នុងស្រុក​របស់ខេត្តតាកែវ ទៅកាន់ទីផ្សារកាន់តែទូលំទូលាយ ទាំងក្នុង ​និង​ក្រៅប្រទេស។​

​លោកបានបញ្ជាក់ថា ​ពិពណ៌នេះ ​មិនត្រឹមតែជាការបង្កើតឱកាសទីផ្សារសម្រាប់សិប្បកម្ម ​និង​ផលិត​ផល​ប្រពៃណីប៉ុណ្ណោះ​ទេ ​ប៉ុន្តែថែមទាំងជាកម្លាំងជំរុញសេដ្ឋកិច្ចសហគមន៍​ ជួយ​បង្កើតការងារ បង្កើន​ប្រាក់ចំណូល និងលើកកម្ពស់ជីវភាព​រស់នៅរបស់ប្រជា​ពលរដ្ឋឱ្យ​កាន់តែ​ប្រសើរឡើង ​ស្របតាម​គោល​នយោបាយ​របស់រាជរដ្ឋាភិបាលក្នុងការអភិវឌ្ឍសេដ្ឋកិច្ចមូលដ្ឋាន។​

​លោកអភិបាលខេត្តស្តីទី បានវាយតម្លៃខ្ពស់ចំពោះកិច្ចខិតខំប្រឹងប្រែង​របស់គណៈកម្មាធិការ​ចលនាភូមិមួយ​ផលិតផលមួយ មន្ទីរ-អង្គភាពពាក់ព័ន្ធ អាជ្ញាធរមូលដ្ឋាន និងសិប្បករទាំងអស់ ដែលបានរួមសហការរៀបចំព្រឹត្តិការណ៍នេះឱ្យប្រព្រឹត្ត​ទៅដោយជោគជ័យ។​

​លោក ស៊ុត ខុន ​បានអំពាវនាវដល់ប្រជាពលរដ្ឋ ​ភ្ញៀវទេសចរជាតិ និងអន្តរជាតិ ​ចូលរួមគាំទ្រ និងទិញ​ផលិតផលខ្មែរ ​ឱ្យបានច្រើនកុះករ ​ដើម្បីលើកទឹកចិត្តដល់ស្នាដៃកូនខ្មែរ​ និងរួមចំណែក​ពង្រឹង​សេដ្ឋកិច្ចជាតិឱ្យកាន់តែរីកចម្រើន។

​ពិព័រណ៍ផលិតផលក្នុងស្រុក ​«ភូមិមួយផលិតផលមួយ» ​ខេត្តតាកែវ ​ឆ្នាំ២០២៦ ​មានការតាំង​បង្ហាញ​ផលិតផលសក្តានុ​ពល​​ជាច្រើន រួមមាន សូត្រខ្មែរ ក្រមា បន្លែសុវត្ថិភាព ផលិតផលកែច្នៃ និងម្ហូប​អាហារ​ប្រចាំតំបន់ល្បីៗ​ជាច្រើនមុខ ​ដែលឆ្លុះបញ្ចាំងពីភាពវៃឆ្លាត ការច្នៃប្រឌិត និង​សមត្ថភាព​ផលិត​របស់​ប្រជាសហគមន៍ក្នុងខេត្តតាកែវ៕ ​

អត្ថបទ៖ ​វីរៈ

The post ខេត្តតាកែវ​បើកពិព័រណ៍ ​​«ភូមិមួយផលិតផលមួយ» ​ជំរុញ​ទីផ្សារផលិតផលខ្មែរ​ និង​លើកស្ទួយ​សេដ្ឋកិច្ច​សហគមន៍​ appeared first on Kampuchea Thmey Daily.

ផ្សារដើមគ ជាផ្សាររដ្ឋមួយក្នុងចំណោមផ្សាររដ្ឋទាំង ២៥ ក្នុងរាជធានីភ្នំពេញ ដែលមានការមមាញឹកខ្លាំងក្នុងការលក់ដូរទំនិញប្រចាំថ្ងៃ និងមានការទទួលបញ្ជាទិញទំនិញ និងម្ហូបអាហារច្រើន ពីសំណាក់ប្រជាពលរដ្ឋ។

អាជីវករក្នុងផ្សារដើមគ នៅតែបន្តការលក់ដូរទំនិញក្នុងស្រុក ដោយពួកគាត់បានបញ្ជាក់ថា ទំនិញខ្មែរ ក៏ជាទំនិញមានគុណភាពល្អ និងតម្លៃសមរម្យផងដែរ ហើយការលក់ដូរទំនិញខ្មែរ ក៏បានជួយដល់សេដ្ឋកិច្ចប្រចាំថ្ងៃរបស់ពួកគាត់ផងដែរ។ បន្ថែមនោះ ព្រោះតែការឈឺចាប់នឹងការឈ្លានពាន និងមាក់ងាយពីរដ្ឋបរទេសជិតខាង បណ្តាពលរដ្ឋខ្មែរ គាំទ្រឲ្យមានការលក់ទំនិញខ្មែរឲ្យបានច្រើន នៅតាមបណ្តាផ្សារលក់ដូរទាំងអស់ ដោយពួកគាត់ក៏ចូលរួមចំណែកក្នុងការទិញទំនិញរបស់ជាតិសាសន៍ខ្មែរផងដែរ។

សម្តេចតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា ធ្លាប់មានប្រសាសន៍លើកឡើងថា ពាក់ព័ន្ធនឹងទំនិញប្រទេសថៃ មានតែប្រជាជនកម្ពុជាខ្លួនឯងទេ ដែលជាអ្នកមានសិទ្ធិសម្រេចថា គួរប្រើប្រាស់ទំនិញរបស់អ្នកណា «អ្នកនាំចូលច្រើនប៉ុណ្ណា បើគ្មានអ្នកទិញទេ ក៏គ្មានអ្នកលក់ដែរ បើគ្មានអ្នកទិញទេ ក៏គ្មានអ្នករត់ពន្ធមកដែរ»៕
អត្ថបទ ៖ សុភា

The post ការលក់ដូរទំនិញក្នុងស្រុក នឹងជួយជំរុញដល់សេដ្ឋកិច្ចជាតិ ខណៈពលរដ្ឋក៏កំពុងបន្តប្រើប្រាស់ច្រើន appeared first on Kampuchea Thmey Daily.

អ្នកស្រី ភោគ ហឿង អ្នកគ្រប់គ្រងទូទៅ នៃសហគ្រាស Khmer Food enterprise ប្រាប់ កម្ពុជាថ្មី ថា បច្ចុប្បន្នអ្នកស្រីសង្កេតឃើញថាប្រជាជនខ្មែរបាននាំគ្នាគាំទ្រផលិតផលដែលផលិតបានក្នុងស្រុកកាន់តែច្រើនជាងមុន ខណៈបច្ចុប្បន្នសហគ្រិនខ្មែរក៏អាចមានលទ្ធភាពផលិតបាននូវគ្រឿងទេស និងផលិតផលផ្សេងៗទៀតបានយ៉ាងច្រើនមុខផងដែរ។

អ្នកស្រី ភោគ ហឿង បន្តថា ចំពោះសហគ្រាសរបស់អ្នកស្រីវិញ បច្ចុប្បន្នក៏អាចមានលទ្ធភាពផលិតម្សៅស៊ុបដែលមានស្ដង់ដាត្រឹមត្រូវសម្រាប់ដាក់លក់លើទីផ្សារក្នុងប្រទេសកម្ពុជា។ យ៉ាងណាមិញ​ ការផលិតជាក់ស្ដែង ដ្បិតតែពុំទាន់អាចឆ្លើយតបទៅនឹងតម្រូវាការទីផ្សារបាននៅឡើយ ប៉ុន្តែអ្នកស្រី នៅតែព្យាយាមពីមួយថ្ងៃទៅមួយថ្ងៃ ដើម្បីធ្វើយ៉ាងណាអាចផលិតម្សៅស៊ុបសម្រាប់ចែកចាយក្នុងទីផ្សារប្រទេសកម្ពុជាផងដែរ។

អ្នកស្រីបានឱ្យដឹងទៀតថា រាល់ការផលិតរបស់សហគ្រាសអ្នកស្រី ជានិច្ចកាលតែងតែ បានជ្រើសរើសវត្ថុធាតុដើម ពិសេសគឺដំណាំរបស់កសិករដែលក្នុងនោះមានដូចជា៖ ម្រេចកំពត ស្លឹកគ្រៃ ខ្ទឹមស ខ្ទឹមក្រហម ល្ពៅ និងសាច់មាន់ដែលចិញ្ចឹមដោយកសិដ្ឋានក្នុងស្រុក ដើម្បីយកមកផលិតម្សៅស៊ុបដែលមានរសជាតិឆ្ងាញ់ និងគុណភាពខ្ពស់ សម្រាប់ប្រជាជនខ្មែរដែលកំពុងមានតម្រូវម្សៅស៊ុបក្នុងការងារចម្អិនម្ហូបប្រចាំថ្ងៃ។

ក្រៅពីផលិតម្សៅស៊ុបដាក់លក់លើទីផ្សារ ​បច្ចុប្បន្នសហគ្រាសរបស់អ្នកស្រី ភោគ ហឿង ក៏បានសាកល្បងផលិតខ្ទិះដូងកំប៉ុងសម្រាប់ដាក់លក់លើទីផ្សារប្រទេសកម្ពុជាផងដែរ។

សហគ្រាសផលិតម្សៅស៊ុប Khmer Food enterprise បានបើកដំណើរកាលពីចុងឆ្នាំ ២០២៥។ បច្ចុប្បន្នមានទីតាំងស្ថិតនៅ ខណ្ឌកំបូល រាជធានីភ្នំពេញ៕

អត្ថបទ ៖ សួស សិត

The post ម្សៅស៊ុបផលិតក្នុងស្រុកកាន់តែមានទីផ្សារល្អ ខណៈប្រជាជនខ្មែររួមគាំទ្រផលិតផលខ្មែរ appeared first on Kampuchea Thmey Daily.

លោក ខេង ឆេកូ អ្នកគ្រប់គ្រង់ទូទៅ នៃសិប្បកម្មផលិតប្រេងសណ្ដែកដី ខ្មែរ ហ៊ែលស៊ី អឺស ប្រាប់ កម្ពុជាថ្មី ថា បច្ចុប្បន្នសិប្បកម្មរបស់លោកបាននឹងកំពុងផលិតប្រេងសុខភាពជាច្រើនមុខសម្រាប់ផ្គត់ផ្គង់ទីផ្សារក្នុងស្រុក​ និងក៏បាននាំចេញទៅក្រៅប្រទេស។

រាល់ផលិតផលប្រេងសុខភាព របស់សិប្បកម្មទាំងមូលគឺភាគច្រើនកើតចេញអំពីកសិផលរបស់កសិករនៅតាមតំបន់ ក្នុងនោះមាន៖ សណ្ដែកដី រមៀត ម្ទេស ល្ង និងទឹកឃ្មុំរបស់កសិករនៅតាមបណ្ដាខេត្តមួយចំនួនទៀតដូចជា៖ កំពង់ចាម ត្បូងឃ្មុំ កំពង់ធំ និងព្រះវិហារ ជាដើម។

ចំពោះការគាំទ្រវិញ អ្នកគ្រប់គ្រងសិប្បកម្មរូបនេះ បានឱ្យដឹងដែរថា រយៈពេលចុងក្រោយនេះ ប្រជាជនខ្មែរបានរួមគ្នាគាំទ្រផលិតផលក្នុងស្រុកយ៉ាងច្រើនកុះករ ដែលនេះគឺជាកត្តាជំរុញឱ្យសហគ្រាស និងសិប្បកម្មក្នុងស្រុកទាំងអស់មានទឹកចិត្តបន្តក្នុងដំណើរផលិតរបស់ខ្លួនផងដែរ។

សិប្បកម្ម ផលិតប្រេងសណ្ដែកដី ខ្មែរ ហ៊ែលស៊ី អឺស របស់លោក ខេង ឆេកូ វិញ បច្ចុប្បន្នក៏អាចមានលទ្ធភាពគ្រប់គ្រាន់ក្នុងការផលិតប្រេងសណ្ដែកដី ប្រេងល្ង ប្រេងម្ទេស និងប្រេងទឹកឃ្មុំ សម្រាប់ដាក់លក់លើបណ្ដាទំនើបមួយចំនួនក្នុងប្រទេសកម្ពុជា ខណៈថ្មីៗនេះ សិប្បកម្មក៏បាននាំចេញផលិតផលជាច្រើនមុខទៀតទៅដាក់លក់ដល់ប្រទេសកូរ៉េផងដែរ។

ចំពោះអត្ថប្រយោជន៍ប្រេងសុខភាពទាំងនេះវិញ លោក ឆេកូ បានបញ្ជាក់ដែរថា ប្រេងសុខភាពរបស់សិប្បកម្ម ភាគច្រើនជួយដល់សុខភាពអ្នកប្រើប្រាស់បានដូចជា៖ កាត់បន្ថយសម្ពាធ​ឈាមខ្ពស់ ដោយជួយឱ្យសសៃឈាមរត់បានស្រួល ជួយដល់សុខភាពបេះដូង ប្រឆាំងជំងឺមហារីក ការពារជំងឺក្រពះ ជួយបង្កើនប្រព័ន្ធភាពសាំក្នុងរាងកាយ ជួយដល់សសៃសក់ បំបាត់មុន និងអាចម៌រុយ ប្រើសម្រាប់ម៉ាស្សាខ្លួន ប្រើប្រាស់ជាប្រេងក្រអូបបំបាត់ស្រ្ដេស និងរក្សាកម្រិតកូឡេស្ទេរ៉លក្នុងរាងកាយបានយ៉ាងមានប្រសិទ្ធិភាពខ្ពស់ផងដែរ៕

អត្ថបទ ៖ សួស សិត

The post សិប្បកម្មផលិតប្រេងសណ្ដែកដី ខ្មែរកំពុងពង្រីកការផ្គត់ផ្គង់ទីផ្សារក្នុងស្រុក និងនាំចេញ​ appeared first on Kampuchea Thmey Daily.

​សម្ដេចធិបតី ​​ហ៊ុន ​ម៉ាណែត ​បានលើកឡើងតាមរយៈសារលិខិតអបអរសាទរ​ក្នុងឱកាសទិវា​ជាតិលើក​កម្ពស់​ការប្រើប្រាស់​ផលិតផលខ្មែរ ​៩ មេសា ​លើកទី ៩ ​ឆ្នាំ ២០២៦ ​ក្រោមប្រធានបទ «ខ្មែរផលិត ​ខ្មែរ​ប្រើប្រាស់ ​ខ្មែររីកចម្រើន»។

​សម្ដេច​នាយករដ្ឋមន្ត្រី​ក៏បាន​អំពាវ​នាវ​ឱ្យ​ផលិតករ ​បន្តវិនិយោគលើការច្នៃប្រឌិត ​ការកែលម្អ​គុណ​ភាព​ និង​បង្កើតផលិត​ផលថ្មីៗ ​ដែលអាចឆ្លើយតបតាមតម្រូវការទីផ្សារក្នុងស្រុក ​និងក្រៅ​ប្រទេស ​ការបន្តគាំទ្រគោលនយោបាយ ​និងអន្តរា​គមន៍​នានា ​សំដៅ​ពង្រឹងទំនុកចិត្តរបស់អ្នកវិនិយោគ។

​ក្នុងរយៈពេលជិតមួយឆ្នាំកន្លងមកនេះ​ ប្រទេសកម្ពុជាបានជួបប្រទះនឹងបញ្ហាប្រឈមជាច្រើន ដែល​ក្នុង​នោះ ​មានបញ្ហា​វិបត្តិសេដ្ឋកិច្ចសកលផង​ ​រួមទាំងបញ្ហាព្រឹត្តិការណ៍ជម្លោះព្រំដែនខ្មែរ-ថៃផង​ ដែលការណ៍នេះ​ បានបង្កឱ្យមានការព្រួយបារម្ភ ​និងកាន់តែប្រុងប្រយ័ត្នខ្ពស់។​ បរិការណ៍នេះ ​បង្ហាញឱ្យយើងឃើញកាន់តែច្បាស់អំពីសារៈសំខាន់នៃសន្តិភាព​ និង​ស្ថិរភាពតំបន់ ដែល​ជាមូលដ្ឋានដ៏ចាំបាច់សម្រាប់ការអភិវឌ្ឍសេដ្ឋកិច្ច។ ​

​សម្ដេច ​ហ៊ុន ​ម៉ាណែត ​សង្កេតឃើញ​អំពីការប្រកាន់​យកនូវមន​សិការ​ជាតិនិយម​របស់​បងប្អូនប្រជាពលរដ្ឋខ្មែរ​ ​ដោយបានសម្តែងឱ្យឃើញនូវសាមគ្គីភាពជាតិមួយរឹងមាំដូចដែកថែប រវាង​ប្រជា​ជន​ ​និងប្រជាជន​ ប្រជាជន ​និងរាជរដ្ឋាភិបាល​ ប្រជាជន ​និងកងទ័ព និងលើស​ពីនេះ​ការ​លើក​កម្ពស់​ផលិតផលខ្មែរ​បានក្លាយជា​ ការងារដែលកាន់តែមានន័យជាងមុន ព្រោះវាជាការបង្ហាញ​ពី​សមត្ថ​ភាព​ក្នុង​ការបង្កើតតម្លៃសេដ្ឋកិច្ចដោយខ្លួនឯង​ និងការការពារអធិបតេយ្យភាពសេដ្ឋកិច្ចក្នុង​ពេល​​មាន​ភាព​មិនច្បាស់លាស់នៅក្នុងតំបន់។

​ស្ថិតក្នុងស្ថានភាពបច្ចុប្បន្ន​ កម្ពុជាកំពុងត្រូវការយុទ្ធសាស្ត្រ​ដែលអាចលើក​កម្ពស់​សមត្ថភាព​ផលិត​ក្នុង​ស្រុក​ បង្កើតការងារ និងបង្កើនតម្លៃបន្ថែមនៅតំបន់ជនបទ។ ក្នុងចំណោមគោល​នយោ​បាយ​ជាតិ​ជា​ច្រើន​ដែលបាន​ដាក់ចេញក្នុងរយៈពេលចុងក្រោយ ​គោលនយោបាយ ​«ភូមិមួយផលិតផលមួយ»​ នៅ​តែត្រូវបានចាត់ទុកថាជា​ ដៃឃ្នាស់ដ៏សំខាន់មួយសម្រាប់ជំរុញការអភិវឌ្ឍសេដ្ឋកិច្ចមូលដ្ឋាន និង​ការ​កសាងសមត្ថភាពប្រកួតប្រជែងរបស់​ប្រទេស​ ដោយប្រកាន់យកស្មារតី «សហគមន៍​ជាមូល​ដ្ឋាន​នៃ​ការ​អភិវឌ្ឍ​ និង​រដ្ឋធ្វើតួនាទីជាអ្នកគាំទ្រ​ បណ្តុះបណ្តាល និងបង្កើតបរិយាកាស​សម​ស្រប​សម្រាប់​ទីផ្សារ​ធ្វើ​ជាមូលដ្ឋាន។​

សម្ដេចធិបតី ​ហ៊ុន ម៉ាណែត យល់ឃើញថា ​ចលនាភូមិមួយផលិតផលមួយ បានរួមចំណែក​យ៉ាង​សកម្ម​ក្នុង​ការ​ជួយ​លើក​​កម្ពស់ផលិតផលជនបទឱ្យក្លាយជាផលិតផលពាណិជ្ជកម្ម​ ជួយបង្កើតការងារ និងចំណូល​សម្រាប់​គ្រួសារ ជួយអភិរក្សវប្បធម៌ សិប្បកម្មបុរាណ ជួយបង្កើតអត្តសញ្ញាណផលិតផលតាមតំបន់ និង​ជួយជំរុញឱ្យសហគមន៍មានសមត្ថភាព​ គ្រប់គ្រងអាជីវកម្ម និងបង្កើនភាពច្នៃប្រឌិត​ដោយ​ខ្លួន​ឯង​។​

​ផលិតផលក្នុងស្រុកជាច្រើន​ ត្រូវបានបង្កើតឡើងតាមរយៈការផលិត ​និង​កែច្នៃវត្ថុធាតុដើម ដែល​មាន​ស្រាប់នៅតាមមូលដ្ឋាន​ ឱ្យក្លាយជាគ្រឿងឧបភោគបរិភោគ ​វត្ថុប្រើប្រាស់ និងវត្ថុអនុស្សាវរីយ៍​ជា​ច្រើន​ប្រភេទ។ ​

​ផលិតផលទាំងនេះពោរពេញដោយគំនិតច្នៃប្រឌិត​ ការរក្សាទុកប្រពៃណី និងទំនៀមទម្លាប់​របស់​ជាតិ​ខ្មែរ​ ហើយបង្ហាញយ៉ាងច្បាស់អំពីអត្តសញ្ញាណជាតិ និងតម្លៃវប្បធម៌​របស់យើង​ជាមួយ​នឹងគុណ​ភាព​ល្អ​ តម្លៃសមរម្យ ​និងបរិមាណគ្រប់គ្រាន់​តាមតម្រូវការទីផ្សារ។ ​

​សម្ដេចធិបតី ​​ហ៊ុន ​ម៉ាណែត បានបន្ថែមថា ​បច្ចុប្បន្ន ​ផលិតផលក្នុងស្រុក កំពុងក្លាយ​ជាផលិតផល​ដែល​មានសក្តានុពលខ្ពស់ក្នុងការបំពេញតម្រូវការរបស់ប្រជាពលរដ្ឋ ​និង​ទីផ្សារទូទាំង​ប្រទេស និង​បាន​ជំរុញឱ្យប្រជាពលរដ្ឋប្តូរឥរិយាបថ ​និង​បង្កើនទំនុកចិត្តលើផលិតផលខ្មែរកាន់តែខ្លាំងឡើងជា​បន្ត​បន្ទាប់។ ​

​ការប្រើប្រាស់ផលិតផលក្នុងស្រុកជំនួសផលិតផលនាំចូលពីបរទេស ​មិនត្រឹមតែជាការគាំទ្រដល់អ្នកផលិតខ្មែរប៉ុណ្ណោះទេ​ ប៉ុន្តែជាការបង្ហាញនូវមោទនភាពជាតិ និងការយល់ដឹង​អំពីតម្លៃនៃ​ផលិត​ផល​ដែល​កើតចេញ​ពីកម្លាំង ​និង​ចំណេះដឹងរបស់ខ្មែរ ​ព្រមទាំងជំរុញឱ្យមានភាពរីកចម្រើន។​

សម្ដេចមហាបវរធិបតី ​ហ៊ុន ម៉ាណែត នាយករដ្ឋមន្ត្រីកម្ពុជាក៏​បានផ្តល់អនុសាសន៍សំខាន់ៗ រួមមាន៖​

​១.ក្រសួង និងស្ថាប័នពាក់ព័ន្ធទាំងអស់​ ត្រូវបន្តអនុវត្តតួនាទីសកម្មក្នុងការលើកកម្ពស់ និងជំរុញ​ចល​នា​ផលិតគ្រប់វិស័យ ដោយចាប់ផ្តើមពីគ្រួសារ សហគមន៍ និងក្រុមអ្នកផលិត។​ ត្រូវលើក​ទឹក​ចិត្ត​ការច្នៃប្រឌិត​ ការកែច្នៃផលិតផលកសិកម្មឱ្យក្លាយជាផលិតផលមានតម្លៃបន្ថែម ដូចជាម្ហូប​អាហារ​ វត្ថុសិល្បៈ និងផលិតផលប្រើប្រាស់ផ្សេងៗ ដើម្បីបំពេញតម្រូវការ​ទីផ្សារក្នុងស្រុក​ និង​ក្រៅ​ស្រុក​ និងជាពិសេសត្រូវបង្កលក្ខណៈអំណោយផលចាំបាច់នានា សំដៅជំរុញឱ្យ​ផលិតផល​ខ្មែរអាច​បំ​ពេញតួនាទីពេញលេញនៅលើទីផ្សារ​ ជំនួសផលិតផលនាំចូល ​ឱ្យបានច្រើនជាអតិបរមា។​ ការខិតខំរួមគ្នានេះ នឹងជួយលើកកម្ពស់កម្រិតជីវភាពរបស់ប្រជាពលរដ្ឋខ្មែរឱ្យកាន់តែប្រសើរឡើង និងបង្កើតឱកាសសេដ្ឋកិច្ចថ្មីៗ នៅតាមតំបន់ជនបទ។​

២.គណៈកម្មាធិការជាតិជំរុញចលនាភូមិមួយផលិតផលមួយ និងក្រសួងពាក់ព័ន្ធ ដូចជាក្រសួង​កសិកម្ម​ រុក្ខាប្រមាញ់ និងនេសាទ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្រសួង​ពាណិជ្ជកម្ម ក្រសួងទេសចរណ៍ ក្រសួងព័ត៌មាន ក្រសួងការបរទេស​ និងសហប្រតិបត្តិ​ការ​អន្តរ​ជាតិ ក្រសួងសេដ្ឋកិច្ចនិងហិរញ្ញវត្ថុ និងស្ថាប័នផ្សេងៗ ត្រូវបន្តសហការយ៉ាងជិតស្និទ្ធ ដើម្បី​អភិវឌ្ឍ​ផលិតផល​ក្នុងស្រុកឱ្យមានគុណភាពខ្ពស់មានសមត្ថភាពប្រកួតប្រជែងបានល្អ និងពង្រីក​ឱកាស​ទីផ្សារឱ្យកាន់តែទូលំទូលាយ។​ ​ការសហការរួមគ្នានេះ គួរត្រូវបានធ្វើឱ្យមានប្រសិទ្ធភាព​ខ្ពស់​ជាង​មុន ដើម្បីធានាថា ផលិតករខ្មែរទទួលបានជម្រើស និងឱកាសពាណិជ្ជកម្ម កាន់តែច្រើន។

៣.គណៈកម្មាធិការជំរុញចលនាភូមិមួយផលិតផលមួយ រាជធានី ខេត្ត ត្រូវបន្តធ្វើការងារ​យ៉ាង​សកម្ម និងដោយការទទួលខុសត្រូវខ្ពស់ក្នុងការស្វែងរក និងជ្រើសរើសផលិតផលសក្តា​នុពល​នៅ​តាម​មូលដ្ឋាន​ ដើម្បី​ដាក់បញ្ចូលជាផលិត ផលភូមិមួយផលិតផលមួយ។ ត្រូវពង្រីកបណ្តាញ​សមាជិក​ឱ្យទូលំទូលាយ​ និងធ្វើអន្តរាគមន៍ដោះស្រាយបញ្ហាប្រឈម​របស់អ្នកផលិត​ឱ្យបាន​ទាន់ពេលវេលា។ ​ការងារនេះគួរត្រូវបានអនុវត្តដោយមានចក្ខុវិស័យវែងឆ្ងាយ និងការគាំទ្របច្ចេក​ទេស​ត្រឹមត្រូវ។

៤.គណៈកម្មាធិការជាតិជំរុញចលនាភូមិមួយផលិតផលមួយ ត្រូវបន្តសហការ​ជាមួយ​ក្រសួង​ពាណិជ្ជកម្ម​ និងគណៈកម្មាធិការជំរុញចលនាភូមិមួយផលិតផលមួយ រាជធានី ខេត្ត ដើម្បីរៀប​ចំព្រឹត្តិការណ៍​តាំងបង្ហាញ និងលក់ផលិតផលខ្មែរ និងផលិតផលភូមិមួយផលិតផលមួយឱ្យបាន​ទូលំទូលាយ​នៅតាមតំបន់មានសក្តានុពល។ ព្រឹត្តិការណ៍ទាំងនេះ គឺជាវេទិកាដ៏សំខាន់​សម្រាប់​លើក​កម្ពស់ការទទួលស្គាល់​ និង​ការចូលទីផ្សាររបស់ផលិតផលខ្មែរឱ្យកាន់តែទូលំទូលាយ ព្រមទាំងជួយបង្កើនភាពជឿជាក់ និងស្តង់ដាថ្មីសម្រាប់ផលិតករខ្មែរទូទាំងប្រទេស៕

The post ​សម្ដេច ហ៊ុន ម៉ាណែត ​អំពាវនាវ​ឱ្យ​ពលរដ្ឋ​ បន្ត​គាំទ្រ​ផលិតផល​ខ្មែរ​ ដើម្បីកសាងសេដ្ឋកិច្ចជាតិ appeared first on Kampuchea Thmey Daily.