យោងតាម​ការ​លើក​ឡើង​របស់​អាជីវករ​ផ្សារ​ភ្នំ​ធំ​ជា​ច្រើន​រូប បាន​ឱ្យ​ដឹង​ថា មូល​ហេតុ​ដែល​ពួក​គាត់​នាំ​គ្នា​តវ៉ា នឹងទៅអាជ្ញាធរឃុំឲ្យជួយអន្តរាគមន៍ទប់ស្កាត់ការសាងសង់ផ្សារបន្ថែមទៀត របស់​ក្រុមហ៊ុនផ្សារភ្នំធំ ក៏ព្រោះតែក្នុងកិច្ចកុងត្រា​រវាងអាជីវករជាមួយក្រុមហ៊ុមផ្សារភ្នំធំរយៈពេល១០ឆ្នាំ ក្រុមហ៊ុនមិនមានការសាសង់ ឬធ្វើអ្វីបន្ថែមទៀត ក្រៅពីផ្សារនៅពេលបច្ចុប្បន្ននេះឡើយ ។

ពួកគាត់បានមកធ្វើអាជីវកម្មលក់ដូរក្នុងផ្សារអស់នេះរយៈពេល ២ឆ្នាំមកហើយ ក្រោយពីផ្សារបង្កើតឡើងថ្មី លើដីរបស់លោក កូ ណៃ ដោយពុំដឹងថា ក្រុមហ៊ុនផ្សារជានណានោះឡើយ។

មុនពេលបង្កើតផ្សារ គឺ អាជីវករបានទិញលក់មានកិច្ចព្រមព្រៀងត្រឹមត្រូវ ដោយ​ទំហំមួយប្រឡោះតូប ២ម៉ែត្រ គុណនឹង២ម៉ែត្រ ១៥០០ដុល្លារ ហើយ​ត្រូវធ្វើតូបដោយខ្លួនឯង មួយទីតាំងអស់១៥០០ដុល្លារ ដូចនេះសរុបទាំងអស់ ១តូបអស់ ៣០០០ដុល្លារ ក្នុងកិច្ចកុងត្រា ១០ឆ្នាំម្តង ដោយពុំមានការសាងសង់អ្វីបន្ថែមនៅខាងមុខផ្សារឡើយ ក្នុងនោះក្រុមហ៊ុន ក៏ធានាចាក់ផ្លូវបេតុងជុំវិញផ្សារ តែគិតមកដល់ពេលនេះរយៈជាង២ឆ្នាំហើយ ក្រុមហ៊ុនពុំបានធ្វើអ្វីទាំងអស់ ខណៈដែលបច្ចុប្បន្ន ការលក់ដូរត្រឹមម៉ោង ៩, ១០ ព្រឹកអស់មនុស្ស និយាយជារួមលក់មិនដាច់ តូបនៅក្នុងផ្សារក៏មិនទាន់ពេញ ។ បើក្រុមហ៊ុនផ្សារបន្តធ្វើផ្សារ និងតូបនៅខាងមុខ របស់ពួកគាត់លក់រាល់ថ្ងៃ វាកាន់តែធ្វើឲ្យពួកគាត់លក់ដូរមិនដាច់ថែមទៀត ទាំងទីតាំងផ្នែកខាងក្រោយផ្សារ នៅមានតូបមិនទាន់បានលក់ដូរជាច្រើន រឿងអីដែលត្រូវសាសង់ផ្សារបន្ថែមពីមុខទៀត ។

ការសាងសង់ផ្សារ ឬតូបរបស់ក្រុមហ៊ុនផ្សារ បិតពីមុខតូបអាជីវករចាស់ គឺ ធ្វើដើម្បីតែលក់តូបយកលុយតែប៉ុណ្ណោះ ទាំងមិនខ្វល់ពីការលំបាករបស់អាជីវករបច្ចុប្បន្ន ដែលលក់មិនដាច់ និងកំពុងតែបង់រំលួសថ្លៃតូប ជាមួយម្ចាស់ជាប្រចាំខែមិនទាន់នឹងដាច់ផង ។ ធម្មតាបើបង្កើតផ្សារនៅខាងមុខ ប្រាកដ​ជាមានអ្នកទិញជាក់ជាមិនខាន រឿងអាជីវករលក់ដាច់មិនដាច់គេមិនខ្វល់។ បច្ចុប្បន្ន អាជីវករប្រឈមនឹងបញ្ហាជាច្រើន ដូចជា ៖ លក់មិនដាច់ ត្រូវបង់ធនាការជាប្រចាំហើយថែមទាំងប្រឈមនឹងអ្នកលក់ដូរចល័តតាមរថយន្ត រទេះ ជាច្រើន បានមកលក់នៅពីមុខផ្សារថែមទៀត។

អាជីវករសំណូមពរ ដល់អាជ្ញាធរនិងរដ្ឋាភិបាល យល់ពីទុក្ខលំបាករបស់ពួកគាត់ កុំឲ្យមានការសាងសង់ផ្សារបន្ថែម ។

ជុំវិញករណីនេះ បើតាមឯកសារ ដែលអាជីវករធ្វើជាមួយខាងក្រុមហ៊ុនផ្សារ គឺ ក្រុមហ៊ុនផ្សារមានឈ្មោះ ចក្រភព ស៊ីធី រៀល អុីស្តេត ឯ.ក ដោយមានប្រធានក្រុមហ៊ុនឈ្មោះ ឈិត ប៊ុនជឿន បានចេញវិញ្ញាបនបត្រមានរយៈកំណត់ ពី២០២៣ ដល់ ២០៣៣ ។

ជុំវិញការតវ៉ារបស់អាជីវករខាងលើ អ្នកសារព័ត៌មានយើងមិនអាចសុំការបំភ្លឺ ពីខាងក្រុមហ៊ុនផ្សារបានឡើយ ដោយពេលមានអាជីវករតវ៉ា ខាងក្រុមហ៊ុនផ្សារបានបិតទ្វារការិយាល័យរបស់ខ្លួន មិនអាចអោយអ្នកសារព័ត៌មានទំនាក់ទំនងបាន ហើយក៏ពុំដឹងថាក្រុមហ៊ុនផ្សារនេះ សាងសង់ផ្សារ ឬតូបបន្ថែម មានអាជ្ញាធរដឹងលឺ និងអនុវត្តន៍ តាមច្បាប់ក្រសួងហិរញ្ញវត្ថុដែរឬទេ ។

ដោយឡែកបើតាមលោក រ័ត្ន ដាស៊ីណង់ អភិបាលស្រុកមង្គលបូរី បានឲ្យដឹងថា ជុំវិញហេតុការណ៍នេះលោកពុំទាន់ទទួលបាននៅឡើយទេ ហើយលោកនឹងសួរទៅអាជ្ញាធរឃុំជំវិញរឿងរ៉ាវនេះ ។ ហើយចំពោះផ្សារនេះ ជាដីរបស់លោក កូ ណៃ តែប៉ុណ្ណោះ ៕

ដោយ ៖ អពៅ

The post អាជីវករផ្សារភ្នំធំ ផ្ទុះការតវ៉ា​មិន​ឱ្យក្រុមហ៊ុនផ្សារ សង់ផ្សារ​បន្ថែម​ខុស​នឹង​កិច្ច​កុងត្រា appeared first on Kampuchea Thmey Daily.

ការប្រឈមមុខដាក់គ្នាដោយហិង្សាបានផ្ទុះឡើងនៅជិត​មជ្ឈមណ្ឌល​ឃុំខ្លួនដ៏​ធំ​​​ (Metropolitan Detention Center) ដោយប៉ូលិសបានប្រើឧស្ម័នបង្ហូរទឹកភ្នែក ដើម្បីរារាំបាតុករ។ មនុស្សរាប់សិបនាក់ត្រូវបានចាប់ខ្លួន ហើយអ្នកតវ៉ា​ខ្លះបានគប់កម្ទេច​កម្ទី​ និងថ្មក្នុងពេលតវ៉ា។

រដ្ឋាភិបាលសហព័ន្ធ បានចាប់ផ្តើមការបង្រ្កាបយ៉ាងតឹងរ៉ឹង បន្ទាប់ពីចាប់ខ្លួនមនុស្សជាង១០០នាក់ក្នុងការចូល​​ឆ្មក់​ចាប់​ជន​អន្តោប្រវេសន៍នៅទូទាំងទីក្រុង Los Angeles។ មេដឹកនាំប្រជាធិបតេយ្យនៅរដ្ឋកាលីហ្វ័រញ៉ា ដូចជា អភិបាលរដ្ឋ​កាលី​ហ្វ័រញ៉ា លោក Gavin Newsom បានរិះគន់ការសម្រេចចិត្តរបស់ប្រធានាធិបតី ត្រាំ​ ដោយហៅ វាថាគ្រោះថ្នាក់ និងទំនងជាបង្កឱ្យមានអំពើហិង្សាបន្ថែមទៀត ដោយលោក ត្រាំ​ បានប្រើច្បាប់ពិសេសមួយដើម្បីគ្រប់គ្រងឆ្មាំជាតិរបស់រដ្ឋដោយគ្មានការអនុញ្ញាតពីអភិបាលរដ្ឋ។

នៅលើប្រព័ន្ធផ្សព្វផ្សាយសង្គម លោក ត្រាំ​ បានហៅការតវ៉ាថា «កុប្បកម្មជនចំណាកស្រុក» ហើយបាននិយាយថា កង​ទ័ព​បន្ថែមទៀតនឹងត្រូវបានបញ្ជូនប្រសិនបើចាំបាច់ ដោយសន្យាថា នឹងនាំយកមកវិញនូវសណ្តាប់ធ្នាប់។ រដ្ឋមន្ត្រីក្រសួងការពារជាតិអាមេរិក លោក Pete Hegseth ក៏បាននិយាយផងដែរថា កងម៉ារីនដែលបំពេញកាតព្វកិច្ចដ៏​សកម្មនៅមូលដ្ឋាន Camp Pendleton បានត្រៀមខ្លួនរួចជាស្រេចក្នុងការបញ្ជូនទៅកាន់ទីក្រុង Los Angeles ប្រសិនបើស្ថានការណ៍កាន់តែអាក្រក់ទៅៗ។

គួរបញ្ជាក់ថា នេះគឺជាវត្តមានឆ្មាំជាតិដ៏ច្រើនបំផុតនៅក្នុងទីក្រុង Los Angeles ចាប់តាំងពីកុប្បកម្មឆ្នាំ ១៩៩២ បន្ទាប់ពីឧប្បត្តិហេតុ Rodney King ។ មនុស្សមួយចំនួនដូចជាព្រឹទ្ធសមាជិក លោក Bernie Sanders បាននិយាយថា លោក ត្រាំ កំពុងប្រើអំណាចច្រើនពេកហើយធ្វើដូចជាជនផ្តាច់ការ។ ប៉ុន្តែ​មេដឹកនាំ​គណបក្ស​សាធារណរដ្ឋ​ជាច្រើន​បាន​គាំទ្រ​ការសម្រេចចិត្ត​របស់​លោក ត្រាំ​ ដោយ​និយាយថា ការពង្រាយកងទ័ពគឺ​ចាំបាច់​ដើម្បី​រក្សាសណ្ដាប់ធ្នាប់៕

អត្ថបទ៖ ប៊ុន សុភាព

The post លោក ត្រាំ បញ្ជា​​​​​បញ្ជូន​​កងកម្លាំង​សហព័ន្ធ​​២០០០នាក់ បង្រ្កាប​ការតវ៉ា​ហិង្សា នៅ​ Los Angeles appeared first on Kampuchea Thmey Daily.

ហេតុការណ៍​នេះ​បង្ក​ការ​ភ្ញាក់ផ្អើល​កាលពី​វេលា​ម៉ោង​ជាង ១១ យប់ ថ្ងៃ​ទី ២៥ ខែ​មេសា ឆ្នាំ ២០២៥ នៅ​តាម​បណ្ដោយ​ផ្លូវ ១០៥ បុប្ផា​រាជធានី សង្កាត់​ទួល​សង្កែ​ទី ១ ខណ្ឌ​ឫស្សីកែវ រាជធានី​ភ្នំពេញ។

តាម​ប្រភព​ពី​ប្រជាពលរដ្ឋ​ដែល​បាន​មក​តវ៉ា និយាយ​ថា ពួកគាត់​មកនេះ​គឺ​មក​ទាមទារ​រក​ឯកសារ និង​លុយ​ដែល​បាន​បង់​ទៅ​ឲ្យ​មជ្ឈមណ្ឌល​បណ្ដុះបណ្ដាល អេស​.​ភី យូ​ហាក់ ក្នុង ១ នាក់ អស់ ៦០០ ដុល្លារ ដើម្បី​សិក្សា​ភាសា​កូរ៉េ ដោយ​ការ​តវ៉ា​នេះ​ធ្វើឡើង​តាំងពី​ព្រឹក​ថ្ងៃ​ទី ២៥ រហូត​មក​ទល់​យប់មិញ​នេះ។

ប្រភព​ដដែល​បាន​បន្ត​ថា ពួកគាត់​ព្យាយាម​ចរចា ដោយ​សុំ​លុយ​មក​វិញ​ត្រឹមតែ ៤០០ ដុល្លារ សុខ​ចិត្ត​ខាតដើម ២០០ ដុល្លារ តែ​ខាង​មជ្ឈមណ្ឌល​បណ្ដុះបណ្ដាល អេស​.​ភី យូ​ហាក់ ឲ្យ​ត្រឹម​តែ ៣០០ ដុល្លារ តែ​ប៉ុណ្ណោះ ទើប​ពួកគាត់​មិន​សុខចិត្ត។ ពួកគាត់​ថា ចំណោម​ពួកគាត់ អ្នក​ខ្លះ​បាន​ខ្ចី​លុយ​គេ​យក​មក និង​បង់លុយ​សង​ទៅ​ម្ចាស់បំណុល​ក្នុង ១ ខែ ៦០ ដុល្លារ អស់​រយៈពេល ៧ ខែ មក​ហើយ។

ពាក់ព័ន្ធ​ករណី​នេះ កាលពី​វេលា​ម៉ោង​ប្រមាណ​ជាង ១១ យប់ ថ្ងៃ​ដដែល លោក ជិន ប៊ុនធឿន អភិបាល នៃ​គណៈ​អភិបាល​ខណ្ឌ​ឫស្សីកែវ បាន​ដឹកនាំ​កម្លាំង​ចុះ​ទៅ​ទីតាំង​ខាងលើ ឃាត់ខ្លួន​មនុស្ស​ប្រុស-ស្រី​ជាច្រើន​នាក់ ដែល​បាន​ពាក់ព័ន្ធ បម្រើការ​ក្នុង​មជ្ឈមណ្ឌល​បណ្ដុះបណ្ដាល អេស​.​ភី យូ​ហាក់ បញ្ជូន​ទៅកាន់​អធិការដ្ឋាន​នគរបាល​ខណ្ឌ​ឫស្សីកែវ ដើម្បី​ធ្វើការ​សាកសួរ៕

អត្ថបទ ៖ សំណាង

The post នគរបាលកំពុងស៊ើបសួរបុគ្គលិកសាលាបង្រៀនភាសាកូរ៉េ ១ កន្លែង ជុំវិញករណី ពលរដ្ឋជាច្រើននាក់ មកតវ៉ាទាមទារលុយបង់ថ្លៃសិក្សា appeared first on Kampuchea Thmey Daily.

ហេតុការណ៍នេះ បង្កឲ្យមានការភ្ញាក់​ផ្អើល​កាល​ពី​ម៉ោង​១០​យប់ ​ថ្ងៃ​ទី​២៩ ​ខែ​តុលា ​ឆ្នាំ​២០២៤ ​នៅ​តាម​បណ្ដោយ​ផ្លូវ​ បេតុង​ ជិត​បុរី​រំចេក​ ដែល​ស្ថិត​នៅ​សង្កាត់​កន្ទោក​ ខណ្ឌ​កំបូល រាជធានីភ្នំពេញ​។

​សមត្សមត្ថកិច្ចនគរបាលប៉ុស្តិ៍កន្ទោកបានឲ្យ​ដឹង​ថា​ មុន​ពេល​កើត​ហេតុ​​មាន​​ប្រជាពលរដ្ឋ​បាន​រាយការណ៍​ និង​ប្តឹង​សមត្ថកិច្ច​ថា​ មាន​ម៉ូតូ​មួយ​គ្រឿង​ជា​ម៉ូតូ​ធំ​ ម៉ាក YAMAHA MX KING​ ពណ៌​ខៀវ​ ពាក់​ស្លាក​លេខ ​សៀមរាប ​1AQ-6060 ​តែង​តែ​បើករោទ៍សំឡេងលឺខ្លាំងៗ រំខានដល់ប្រជាពលរដ្ឋ​ពេញ​ភូមិ​។ បន្ទាប់​មកនគរបាល​ប៉ុស្តិ៍​កន្ទោក​សហការ​ជាមួយ​នគរបាល​ខណ្ឌ​កំបូល​ បាន​ឃាត់​ម៉ូតូ​ខាង​លើ​ភ្លាមៗ​ តែ​ម្ចាស់​ម៉ូតូ​ស្រែក​ឡាំប៉ា​ដាក់​កម្លាំងនគរបាល​ថា​ ពួកគាត់​មិន​បាន​ជិះ​ទេ ​ម៉េច​បាន​ឃាត់​ម៉ូតូ​គាត់​ ហើយពួកគាត់​ថា​ មុន​នេះ​គាត់​កំពុង​ផឹក​ស៊ីនៅ​ជិត​កន្លែង​កើត​ហេតុ​ ហើយ​មិន​បាន​ជិះ​ម៉ូតូ​ទេ​គ្រាន់​តែ​បណ្តើរ​ប៉ណ្ណោះ​។

សមត្ថកិច្ច​​បាន​បញ្ជាក់​ប្រាប់​ទៀត​ថា​ កម្លាំងនឹងយក​ម៉ូតូទៅរក្សាទុកនៅ​ប៉ុស្តិ៍​បណ្តុះអាសន្នសិន ដេីម្បីឲ្យម្ចាស់​ម៉ូតូ​យក​បំពង់​ស៊ីម៉ាំង​ធម្មតា​មក​ប្តូរ​វិញ និងធ្វេីកិច្ចសន្យាអប់រំរួចប្រគល់ឲ្យម្ចាស់វិញ​។ តែ​មិត្តភក្ដិ​ម្ចាស់​ម៉ូតូ​មិន​ព្រម ​ខ្លាច​កម្លាំងសមត្ថកិច្ច​នគរបាល​ឃាត់​ម៉ូតូ​ខាង​លើ​កៀប​ស៊ី​ពួកគាត់​ ដោយ​នាំ​គ្នា​ឡូឡា​ពេញ​ដង​ផ្លូវ​ ​បណ្តាល​ឲ្យ​ផ្អើល​ដល់​ប្រជាពលរដ្ឋ​នៅ​ជិត​កន្លែង​កើត​ហេតុ​ចោមរោម​ពេញ​ដង​ផ្លូវ​ លុះ​មួយ​សន្ទុះ​ក្រោយ​មក​ទើប​ព្រមប្រគល់ម៉ូតូទឲ្យសមត្ថកិច្ច។

បន្ទាប់ពីកើតហេតុសមត្ថកិច្ចបានឲ្យពួក​គាត់​ប្តូរ​ដាក់ស៊ី​ម៉ាំង​ធម្មតា​វិញ និង​ណែនាំ​​អោយ​ត្រឡប់ទៅផ្ទះភ្លាមៗ​ ដោយ​មិន​ទាម​ទារ​ផាក​នោះ​ឡើយ៕

អត្ថបទ៖ សុខា

The post ប្រជាពលរដ្ឋផ្ទុះការតវ៉ា ពេលសមត្ថកិច្ចចុះឃាត់​ម៉ូតូ​បំពាក់​បំពង់​ស៊ីម៉ាំង​កែច្នៃ​ appeared first on Kampuchea Thmey Daily.

ការតវ៉ានេះបានឡើងកាលពីវេលាល្ងាចថ្ងៃទី៥ ខែកញ្ញា ឆ្នាំ២០២៤ ដោយពួកគាត់បាននាំគ្នាកាន់ប្លង់រឹងឯកសារពាក់ព័ន្ធនិងរូបថតលោកឧកញ៉ាថៃ ឈុនគ្រី នៅលើដីរបស់ពួកគាត់ដែលស្ថិតនៅតាមផ្លូវ បេតុង(អតីតផ្លូវភ្លើង)ដែលស្ថិតនៅភូមិទួលសង្កែ សង្កាត់ទួលសង្កែ ខណ្ឌឬស្សីកែវ រាជធានីភ្នំពេញ។

អ្នកស្រី ជា ចាន់រ៉ា អាយុ ៣៧ឆ្នាំ បានឱ្យដឹងថា អ្នកស្រីបានរងអយុត្តិធម៌យ៉ាងខ្លាំង ដែលរស់នៅលើដីរបស់ខ្លួនមានប្លង់រឹងជាលក្ខណះប្រព័ន្ធត្រឹមត្រូវបែរជាលោកឧកញ៉ា ថៃ ឈុនគ្រី ប្តឹងចេញដីការក្សាការពារហាមឃាត់ដីរបស់គាត់មិនឱ្យលក់ដូរ និងសាងសង់សំណង់ផ្សេងៗទៅវិញ។ អ្នកស្រីបានឱ្យដឹងទៀតថា ដីរបស់គាត់មុនដំបូងដល់ផ្លូវរថភ្លើង នៅកំឡុងឆ្នាំ២០១៦ រដ្ឋបាលរាជធានីភ្នំពេញ បានអភិវឌ្ឍស្ថាបនាផ្លូវបេតុងតាមផ្លូវរថភ្លើង ដោយមានការសម្របសម្រួលកាត់បន្ថយនូវផលប៉ះពាល់​ឱ្យកាត់តែតិច ហើយបានកាត់ប្រវែង១០ម៉ែត្រ ពីអក្សរស្ថាបនាផ្លូវបេតុង។ បន្ទាប់ពីកាត់ ១០ម៉ែត្រដីដែលនៅសល់ប្រវែងប្រមាណ១៧ម៉ែត្រ ត្រូវបានរដ្ឋបាលសាលារាជធានីភ្នំពេញរួមទាំងមន្ទីរជំនាញបានចុះធ្វើប្លង់ជួនប្រជាពលរដ្ឋជាលក្ខណះប្រព័ន្ធ និងបានសាងសង់ផ្ទះដោយសុំច្បាប់ត្រឹមត្រូវ ស្រាប់តែលោក ឧកញ៉ាថៃ ឈុនគ្រី ប្តឹងទៅតុលាការហាមឃាត់សំណង់របស់គាត់។

ប្រជាពលរដ្ឋដែលតវ៉ា បានឱ្យដឹងទៀតថា ប្រជាពលរដ្ឋដែលរងនូវអយុត្តិធម៌មានចំនួន ៦គ្រួសារ តែពួកគាត់ជាប់រវល់នៅតែ ២គ្រួសារដែលបានតវ៉ា។ លោកស្រីបានបញ្ជាក់ថា លោកឧកញ៉ាប្តឹងចង់បានដីរបស់ពួកគាត់តែម្តងដោយគាត់អះអាងថាដីរបស់គាត់រហូតដល់ផ្លូវរថភ្លើង។ ចំណែក ដីលោកឧកញ៉ាថៃ ឈុនគ្រី គឺនៅខាងក្រោយផ្ទះរបស់ពួកគាត់ហើយ បានសាងសង់ជាបុរី ថៃ ឈុនគ្រី លក់អស់ហើយដោយទុកកន្ទុយដីខាងក្រោយទល់កន្ទុយដីរបស់គាត់ដោយមានរបងត្រឹមត្រូវ មិននឹកស្មានថាមកប្តឹងយកដីរបស់ពួកគាត់ដែលមានប្លង់ត្រឹមត្រូវទៅវិញ។

ពាក់ព័ន្ធករណីនេះ លោក ប៊ុន ឡេង មេធាវីតំណាងអាណិត្តរបស់លោក ឧកញ៉ា ថៃ ហុងគ្រី បានបញ្ជាក់ប្រាប់ថា ចំពោះបញ្ហាដែរពលរដ្ឋ តវ៉ាថាពួកគាត់រងភាពអយុត្តិធម៌នោះ គឺទុកឱ្យអាជ្ញាធរ និងស្ថាប័នតុលាការដោះស្រាយតាមផ្លូវច្បាប់។ ប៉ុន្តែ លោកបញ្ជាក់បន្ថែមថា កាលពីលោកឧកញ៉ាទិញដីនោះ គឺដីនោះ មានព្រំប្រទល់ជាប់ជាមួយនឹងដីចំណីផ្លូវរថភ្លើង តែប្រជាពលរដ្ឋបានមកអាស្រ័យផលស្នាក់នៅលើដីចំណីផ្លូវរថភ្លើង។ ពេលរដ្ឋបាលរាជធានីភ្នំពេញធ្វើការអភិវឌ្ឍអតីតផ្លូវរថភ្លើង ប្រែក្លាយទៅជាផ្លូវបេតុង ហើយក៏បានចេញប្លង់ជូនប្រជាពលរដ្ឋដែលអាស្រ័យផលលើដីចំណីផ្លូវនោះផងដែរ។

ជាចុងក្រោយ ប្រជាពលរដ្ឋក៏បានសំណូមពរដល់សម្តេចបវរធិបតី ហ៊ុន ម៉ាណែត និងថ្នាក់ដឹកនាំក្រសួងយុត្តិធម៌មេត្តាជួយរកយុត្តិធម៌ឱ្យពួកគាត់ផង និងសំណូមពរដល់លោក ឃ្លោក ពិសិដ្ឋ ចៅក្រមសាលាដំបូងរាជធានីភ្នំពេញ ដែលបានចេញដីកា សូមមេត្តាជួយពិនិត្យអង្គហេតុនេះសារឡើងវិញព្រោះពួកគាត់រងអយុត្តិធម៌មិនអាចទទួលយកបាននោះទេ៕

អត្ថបទ៖ សុភា

The post ពលរដ្ឋ ២គ្រួសារ ផ្ទុះការតវ៉ាប្រឆាំងនឹងលោកឧកញ៉ាថៃ ឈុនគ្រី ដែលប្ដឹងហាមឃាត់ដីរបស់ពួកគាត់ appeared first on Kampuchea Thmey Daily.

ក្រុមអាជីវករបាននិយាយថា នៅព្រឹកថ្ងៃទី៣ ខែកញ្ញានេះ មានបុគ្គល១ក្រុមនាំគ្នាយកបង្គោលទៅជីកដាំនៅលើផ្លូវបេតុងខាងមុខផ្សារ ក្នុងបំណងចងខ្សែព័ទ្ធធ្វើកន្លែងផ្ញើរម៉ូតូយកលុយដាក់ហោប៉ៅ ដោយបិទបាំងកន្លែងពួកគាត់លក់ដូរទាំងស្រុង។ ក្រោយពេលឃើញបែបនេះ ពួកគាត់បាននាំគ្នាសួរនាំបុគ្គលទាំងនោះបានប្រាប់ថា លោកប្រធានផ្សារអនុញ្ញាតឲ្យបង្កើតទីនោះធ្វើជាទីតាំងផ្ញើរកង់ និងម៉ូតូ។

ក្រុមអាជីវករបាននិយាយបន្តទៀតថា ដោយសារតែប្រយោជន៍បុគ្គល និងប្រធានផ្សារ ហើយបង្កផលប៉ះពាល់ដល់ការ​​​​​​​​​​​​​​​​​​​​​​​​​​​​​​​​​​​រកសុីរបស់ពួកគាត់បែបនេះ ទើបពួកគាត់នាំគ្នាធ្វើការតវ៉ានៅមុខការិយាល័យផ្សារ ដើម្បីប្រឆាំងមិនឲ្យបង្កើតកន្លែងផ្ញើរម៉ូតូទីនោះឡើយ។ ព្រោះសព្វថ្ងៃការលក់ដូរលំបាកខ្លាំងណាស់ មិនសូវដាច់ស្រាប់ផង ទំរាំតែធ្វើកន្លែងផ្ញើរម៉ូតូបាំងទៀត រឹតតែយ៉ាប់មិនខានឡើយ ដូច្នេះទើបពួកគាត់ត្រូវតែធ្វើការរារាំងជាដាច់ខាត។

ក្រោយពេលប្រជាពលរដ្ឋធ្វើការតវ៉ា អាជ្ញាធរសង្កាត់ចោមចៅទី២ និងខណ្ឌពោធិ៍សែនជ័យ បានចុះទៅធ្វើអន្តរាគមន៍សម្របសម្រួល ហើយបុគ្គលទាំងនោះបានបញ្ឈប់សកម្មភាព និងធ្វើការដកបង្គោលនោះចេញវិញ ចំណែកអាជីវករក៏រំសាយនៅវេលាព្រឹកថ្ងៃដដែលនោះផងដែរ៕

អត្ថបទ៖ សុខា

The post អាជីវករផ្សារកាណាសុីធីជិត១០០នាក់ ផ្ទុះការតវ៉ា បន្ទាប់ពីមានបុគ្គល១ក្រុមយកផ្លូវធ្វើកន្លែងផ្ញើរម៉ូតូ appeared first on Kampuchea Thmey Daily.

យោង​តាម​ការ​ចេញ​សេចក្ដីជូនដំណឹង​របស់​ក្រុមហ៊ុន​កាលពី​ថ្ងៃទី​២៩ ខែកក្កដា ឆ្នាំ​២០២៤​។ ការ​ជួប​ប្រមូលផ្ដុំ​នេះ ដោយ​ប្រជាពលរដ្ឋ​ដែល​រងគ្រោះ​បាន​លើកគ្នា​ទៅ​ស្នាក់​ការ​ក្រុមហ៊ុន​ដែល​ស្ថិតនៅ ភូមិ ត្រពាំង​ថ្ងាន់ សង្កាត់​ព​ន្សាំ​ង ខណ្ឌ​ព្រែក​ព្នៅ រាជធានី​ភ្នំពេញ កាលពី​វេលា​ម៉ោង​ប្រមាណ​៨​ព្រឹក​ថ្ងៃទី០៧​ ខែសីហា​ ឆ្នាំ​២០២៤​។

ប្រជាពលរដ្ឋ​ដែល​រងគ្រោះ​ប្រមាណ ៤០០​ទៅ ទៅ​៥០០នាក់ ​បាន​មក​ពី​គ្រប់ទិសទី​ជួប​ប្រមូល​ផ្តុំគ្នា​នៅមុខ​ស្នាក់ការ​ក្រុមហ៊ុន​បន្ទាប់ពី​ទទួល​ដំណឹង​ថា ​ក្រុមហ៊ុន​សន្យា និង​កាត់​ដី​ឱ្យ​ពួកគាត់​តែ​ប្រជាពលរដ្ឋ​មិន​ព្រម​។

​នៅ​ក្នុង​ការ​ជួប​ប្រមូលផ្ដុំ​នេះដែរ ​តំណាង​ក្រុមហ៊ុន ក៏បាន​ចេញមុខ​មក​ជួប​ដោះស្រាយ​ជាមួយ​ប្រជាពលរដ្ឋ​ដោយ​សន្យាថា ទី​១ ក្រុមហ៊ុន​នឹង​លក់​ដី​របស់​ខ្លួន​២៣​ហិត​តា សង​ប្រជាពលរដ្ឋ​វិញ ,​ទី​២.​ក្រុមហ៊ុន​នឹង​កាត់​ដី​ជួន​ប្រជាពលរដ្ឋ​តែ​ឱ្យ​ប្រជាពលរដ្ឋ​ហើយ​ទុកពេល​ឱ្យ​ក្រុមហ៊ុន​រយៈ​៣​ឆ្នាំ​ក្រុមហ៊ុន​ទិញ​វិញ​ក្នុងតម្លៃ​ដើម​ក្នុង​១​ឡូ​តិ៍​តម្លៃ​១៥០០០​ដុល្លារ​។

ទោះបីជា​យ៉ាងណា ​ប្រជាពលរដ្ឋ​មិន​ទទួលយក​នូវ​ការសន្យា​របស់​ក្រុមហ៊ុន​ទៀត​ឡើយ​ដោយ​ចាត់ទុកថា​ការសន្យា​នេះ​ គឺជា​ការបោកប្រាស់​ព្រោះ​រយៈពេល​កន្លងមក​ក្រុមហ៊ុន​តែងតែ​សន្យា​ខ្យល់​ថា​នឹង​ដោះស្រាយ​ជូន​ប្រជាពលរដ្ឋ​រហូត​មក​។

តាម​ប្រជាពលរដ្ឋ​ឱ្យ​ដឹង​ទៀត​ថា ​ពី​កំឡុង​ឆ្នាំ​២០២១ ​ឆ្នាំ២០២២​ពួកគាត់​រាប់ពាន់​គ្រួសារ​បាន​នាំ​គ្នា​មក​ទិញ​ដី​របស់​ក្រុមហ៊ុន​ពិភព​ដី​មាស​នេះ​ នៅ​ស្រុក​ឧ​ត្តុ​ង្គ ​ខេត្តកំពង់ស្ពឺ​ក្នុង​មួយ​ឡូតិ៍​១៥០០០ដុល្លារ​ហើយ​នៅ​ក្នុង​ការទិញ​ដី​ជិត​ទៀតសោត​ គឺ​បានការ​ប្រាក់​បី​ភាគរយ​ជាហេតុ​ធ្វើ​ឱ្យ​ពួកគាត់​បាន​យក​ប្លង់ដី​និង​ផ្ទះ​ទៅ​ដាក់​ធានា​គារ ដើម្បី​យក​លុយ​មក​ទិញ​ដី​ពី​ក្រុមហ៊ុន​បានការ​ប្រាក់​និង​ខ្លះ​ទៀត​យក​លុយ​ទៅ​ដាក់​ឱ្យ​ក្រុមហ៊ុន​ដើម្បី​យក​ការ​ក៏​មាន​ដែរ​ តែ​ទីបំផុត​បានការ​តែ​ប៉ុន្មាន​ខែ​បាញ់​បោក​អស់ទាំង​ការ​និង​ដើម​។ បន្ទាប់ពី​មាន​ភាព​ចម្រុង​ចម្រាស់​គ្នា​ខាង​ក្រុមហ៊ុន​និង​ប្រជាពលរដ្ឋ​សន្យា​ថា​នឹង​ជួប​ដោះស្រាយ​គ្នា​បន្តទៀត​នៅ​ថ្ងៃទី​១៥​ ខែសីហា​ ឆ្នាំ​២០២៤​នេះ ​ដោយមាន​អាជ្ញាធរ​ដឹងឮ​។

​គួរ​បញ្ជាក់​ថា លោក​ហ៊ី គឹមហុង អគ្គនាយក​ក្រុមហ៊ុន ពិភព​ដី​មាស និង​កង​អង្គរក្ស​១៣​នាក់​ត្រូវ​បាន​កម្លាំង​នគរបាល​ព្រហ្មទណ្ឌ​កម្រិត​ស្រាល​នៃ​ស្នងការ​នគរបាល​រាជធានី​ភ្នំពេញ ឃាត់ខ្លួន​នៅ​វេលា​រសៀល​ថ្ងៃទី​០៧​ខែសីហា ឆ្នាំ​២០២៣ ពាក់ព័ន្ធ បាន​ប្រើ​ហិង្សា​មកលើ​សមត្ថកិច្ច។

ការ​ឃាត់​ខ្លួន​បន្ទាប់ពី​ប្រជាពលរដ្ឋ បាន​ផ្ទុះ​ការ​តវ៉ា ដុត​កង់​រថយន្ត ដើម្បី​ទាមទារ​ប្រាក់ ដែល​ពួកគាត់​ទិញ ដី នោះ ត្រឡប់មកវិញ​ ខ​ណៈ​ពេល​ដែល​ក្រុមហ៊ុន ខាន​បង់​ការប្រាក់​តាម​កិច្ចសន្យា​រយៈពេល​៥​ខែ​( ទិញ ដី​មានការ​ប្រាក់​)​មក​ហើយ​។ ​កាលនោះ បន្ទាប់​ជួប ប្រមូល​ផ្តុំ​តវ៉ា​នៅវេលា​រសៀល ប្រជាពលរដ្ឋ ក៏បាន​នាំគ្នា ដុត​កង់​រថយន្ត​ដើម្បី​ទទូច​ឱ្យ លោក​ចេញមុខ មក​ដោះស្រាយ។

ខ​ណៈ​នោះ សមត្ថកិច្ច ខណ្ឌ​ព្រែក​ព្នៅ និង​នគរបាល​ព្រហ្មទណ្ឌកម្រិត​ស្រាល​នៃ​ស្នងការ​នគរបាល​រាជធានី​ភ្នំពេញ ក៏​បាន​ចុះទៅ​អន្តរាគមន៍ និង​សាកសួរ​  ម្ចាស់​ក្រុមហ៊ុន ហើយ​ត្រូវ​បាន​អង្គរក្ស​រារាំង ប្រើ​ហិង្សា​វាយ​មក​លើ​សមត្ថកិច្ច​ប​ណ្តា​ល​ឱ្យ​រង​របួស ហើយ​ត្រូវ​បាន​កម្លាំង​សមត្ថកិច្ច ក៏បាន​ផ្ទុះ​អាវុធ​ជាច្រើន​គ្រាប់​គំរាម និង​ឃាត់​កង​អង្គ​រក្សា​បានជា​បន្តបន្ទាប់​ចំនួន​១៣​នាក់​។

បន្ទាប់ពី​ឃាត់ខ្លួន​ទៅ​សាលាដំបូង រាជធានី​ភ្នំពេញ​ជាប់គុក​រយៈពេល​ប្រមាណ​៣​ខែ​នៅ​ដើមខែ​វិច្ឆិកា ឆ្នាំ​២០២៣ បាន​ដោះ​លែ​វិញ​ហើយ​ប្រជាពលរដ្ឋ បន្ត​នាំគ្នា​តវ៉ា​រហូត​មក​ដើម្បី​ទាមទារ​ប្រាក់​ត្រឡប់មកវិញ​ក្រុមហ៊ុន​ចេះតែ​សន្យា​ខ្យល់​រហូតមក៕

អត្ថបទ ​៖ សុភា

The post ប្រជាពលរដ្ឋ​ដែល​ចាញ់បោក​លោកហ៊ី គឹមហុង​ អគ្គនាយក​ក្រុមហ៊ុន ពិភព​ដី​មាស​បាន​ជួប​ប្រមូល​ផ្តុំ​គ្នា​តវ៉ា​ជាថ្មី appeared first on Kampuchea Thmey Daily.

ការតវ៉ានៅក្នុងប្រទេសកេនយ៉ា បានផ្ទុះឡើងជាថ្មី ខណៈបុរសម្នាក់ត្រូវបានបាញ់សម្លាប់ក្នុងអំឡុងពេលប្រឈមមុខដាក់គ្នារវាងក្រុមបាតុករ និងកងកម្លាំងសន្តិសុខនៅជាយរដ្ឋធានីប្រទេសនេះ។ ជាមួយគ្នានេះនៅកណ្តាលទីក្រុងណៃរ៉ូប៊ី ហាងនានាត្រូវបានបិទ ខណៈដែលប៉ូលិសបាញ់ឧស្ម័នបង្ហូរទឹកភ្នែកដើម្បីបំបែកហ្វូងបាតុកររាប់រយនាក់។ ឈុតឆាកនៃការតវ៉ាដ៏ច្របូកច្របល់ក៏មាននៅក្នុងផ្នែកផ្សេងទៀតនៃប្រទេសកេនយ៉ា រួមទាំងនៅ​ទីក្រុង Mombasa, ក្រុង Kisumu, ក្រុង​Nakuru និង តំបន់​ប្រជុំជន Nyeri ។ កាសែត Daily Nation របស់ប្រទេសកេនយ៉ា បានរាយការណ៍ថា មានការតវ៉ានៅស្ទើរតែពាក់កណ្តាលនៃស្រុកចំនួន៤៧​របស់ប្រទេសនេះ។

គួរបញ្ជាក់ថា ការតវ៉ាបានចាប់ផ្តើមតាំង​ពីខែមុនប្រឆាំងនឹងច្បាប់​ពន្ធដារ ដែលត្រូវបានដកចេញដោយប្រធានាធិបតី។ ចាប់តាំងពីពេលនោះមក ហ្វូង​​បាតុករ​បាន​បន្តការ​តវ៉ា​ដោយកំហឹង​កាន់តែ​ទូលំទូលាយជុំវិញបញ្ហាអភិបាលកិច្ច​មិនល្អ អំពើពុករលួយ និងទាមទារឲ្យមាន​ការទទួលខុសត្រូវ​របស់​ប៉ូលិស​ជុំវិញ​ការស្លាប់​របស់​បាតុករ​រាប់សិប​នាក់​ក្នុង​ការប្រមូលផ្តុំ​នាពេល​ថ្មីៗ​នេះ។ មកទល់ពេលនេះ មនុស្សរាប់សិបនាក់ ត្រូវបានសម្លាប់ចាប់តាំងពីបាតុកម្មបានចាប់ផ្តើម។ សរុបចំនួនអ្នកស្លាប់មិនតិចជាង៥០នាក់ និងអ្នករងរបួសមានចំនួន​៤១៣នាក់។

កាលពីសប្តាហ៍មុន លោកប្រធានាធិបតី Ruto បានអំពាវនាវឱ្យមានការចរចាជាមួយបាតុករ ស្របពេលដែលលោកបានបណ្តេញគណៈរដ្ឋមន្ត្រីទាំងមូលរបស់ខ្លួន ខណៈប្រធានកងកម្លាំងប៉ូលីសបានលាលែងពីតំណែង។ យ៉ាងណាមិញក្រុមបាតុករនៅតែទាមទារឲ្យលោក Rutoលាលែងពីតំណែងជាប្រធានាធិបតី៕

អត្ថបទ៖ ប៊ុន សុភាព

The post បាតុករ​បន្ត​ស្លាប់ ខណៈ​ហ្វូង​មនុស្ស​អំពាវនាវ​ឲ្យ​មេដឹកនាំ​កេនយ៉ា​លាលែងពីតំណែង appeared first on Kampuchea Thmey Daily.