សន្តិសុខសង្គម

នគរបាលកំពុងស៊ើបសួរបុគ្គលិកសាលាបង្រៀនភាសាកូរ៉េ ១ កន្លែង ជុំវិញករណី ពលរដ្ឋជាច្រើននាក់ មកតវ៉ាទាមទារលុយបង់ថ្លៃសិក្សា

បានផុស

៣ សប្តាហ៍ មុន

នៅ

ថ្ងៃសៅរ៍ ២៦ មេសា ២០២៥

ដោយ

ប្រជាពលរដ្ឋប្រមាណជាង ៣០ នាក់ មកឈរតវ៉ាទាមទារលុយពួកគាត់បានបង់ថ្លៃសិក្សាភាសាកូរ៉េ ក្នុង ១ នាក់ ៦០០ ដុល្លារ ទៅឲ្យមជ្ឈមណ្ឌលបណ្ដុះបណ្ដាល អេស.ភី យូហាក់ អស់រយៈពេល ៧ ខែ ដោយអះអាងថា ខាងសាលាមិនបានបង្រៀនអ្វីជាដុំកំភួននោះទេ គ្រាន់តែថតមេរៀនដាក់ក្នុងគ្រប់តេឡេក្រាម មិនពន្យល់អ្វីទាំងអស់ ដែលករណីនេះនគរបាលខណ្ឌឫស្សីកែវបានឃាត់ខ្លួន និងកំពុងស៊ើបសួរអ្នកពាក់ព័ន្ធបម្រើការនៅសាលានេះផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបង្កការភ្ញាក់ផ្អើលកាលពីវេលាម៉ោងជាង ១១ យប់ ថ្ងៃទី ២៥ ខែមេសា ឆ្នាំ ២០២៥ នៅតាមបណ្ដោយផ្លូវ ១០៥ បុប្ផារាជធានី សង្កាត់ទួលសង្កែទី ១ ខណ្ឌឫស្សីកែវ រាជធានីភ្នំពេញ។

តាមប្រភពពីប្រជាពលរដ្ឋដែលបានមកតវ៉ា និយាយថា ពួកគាត់មកនេះគឺមកទាមទាររកឯកសារ និងលុយដែលបានបង់ទៅឲ្យមជ្ឈមណ្ឌលបណ្ដុះបណ្ដាល អេស.ភី យូហាក់ ក្នុង ១ នាក់ អស់ ៦០០ ដុល្លារ ដើម្បីសិក្សាភាសាកូរ៉េ ដោយការតវ៉ានេះធ្វើឡើងតាំងពីព្រឹកថ្ងៃទី ២៥ រហូតមកទល់យប់មិញនេះ។

ប្រភពដដែលបានបន្តថា ពួកគាត់ព្យាយាមចរចា ដោយសុំលុយមកវិញត្រឹមតែ ៤០០ ដុល្លារ សុខចិត្តខាតដើម ២០០ ដុល្លារ តែខាងមជ្ឈមណ្ឌលបណ្ដុះបណ្ដាល អេស.ភី យូហាក់ ឲ្យត្រឹមតែ ៣០០ ដុល្លារ តែប៉ុណ្ណោះ ទើបពួកគាត់មិនសុខចិត្ត។ ពួកគាត់ថា ចំណោមពួកគាត់ អ្នកខ្លះបានខ្ចីលុយគេយកមក និងបង់លុយសងទៅម្ចាស់បំណុលក្នុង ១ ខែ ៦០ ដុល្លារ អស់រយៈពេល ៧ ខែ មកហើយ។

ពាក់ព័ន្ធករណីនេះ កាលពីវេលាម៉ោងប្រមាណជាង ១១ យប់ ថ្ងៃដដែល លោក ជិន ប៊ុនធឿន អភិបាល នៃគណៈអភិបាលខណ្ឌឫស្សីកែវ បានដឹកនាំកម្លាំងចុះទៅទីតាំងខាងលើ ឃាត់ខ្លួនមនុស្សប្រុស-ស្រីជាច្រើននាក់ ដែលបានពាក់ព័ន្ធ បម្រើការក្នុងមជ្ឈមណ្ឌលបណ្ដុះបណ្ដាល អេស.ភី យូហាក់ បញ្ជូនទៅកាន់អធិការដ្ឋាននគរបាលខណ្ឌឫស្សីកែវ ដើម្បីធ្វើការសាកសួរ៕

អត្ថបទ ៖ សំណាង