The Nation បានដកស្រង់សេចក្តីប្រកាសរបស់នាយកដ្ឋានឧតុនិយម ដែលព្រមានកាលពីថ្ងៃអាទិត្យទី៦ខែមេសាឆ្នាំ២០២៦ថា អាកាសធាតុពេលថ្ងៃ នឹងឈានដល់លើស៤២ °Cទៅទៀត នៅផ្នែកភាគច្រើននៃប្រទេស ហើយនៅតំបន់ខ្លះ ក៏ត្រូវគ្របដណ្តប់ដោយផ្សែងពុលថែមទៀត។

យោងតាមនាយកដ្ឋាន, បើទោះបីជាមានកម្តៅខ្លាំងក៏ដោយ ក៏អាចមានបាតុភូតផ្គររន្ទះ និងខ្យល់កន្ត្រាក់នៅតំបន់ខ្លះផងដែរ ខណៈភាគខាងជើង ឦសាននិងកណ្តាល នឹងរងគ្រោះខ្លាំងជាងគេ។

មុននេះ ក្រសួងសេដ្ឋកិច្ច និងសង្គមឌីជីថល (DES) ថៃ បានចេញសេចក្តីព្រមានយ៉ាងអាសន្នមួយរួចទៅហើយថា សន្ទស្សន៍កម្ដៅ (Heat Index) អាចនឹងហក់ឡើងខ្ពស់រហូតដល់៦០អង្សាសេ​ឯណោះ​នា​​ដើមខែមេសា។

ក្រសួងបញ្ជាក់ថា ស្ថានភាពក្ដៅហួតហែងខ្លាំងបែបនេះ គឺជាហានិភ័យខ្ពស់បំផុតសម្រាប់ក្រុមមនុស្សងាយរងគ្រោះ រួមមាន មនុស្សចាស់ កុមារ ស្រ្តីមានផ្ទៃពោះ និងអ្នកដែលមានជំងឺប្រចាំកាយ ជាពិសេសអ្នកលេបថ្នាំបញ្ចុះសម្ពាធឈាម ឬថ្នាំបញ្ចុះទឹកនោម ដែលធ្វើ​ឲ្យ​រាងកាយពិបាកគ្រប់គ្រងសីតុណ្ហភាព៕

អត្ថបទ៖ សុខ សុវណ្ណ

The post ថៃជួបព្យុះផងនិងផ្សែងពុលផង ខណៈសីតុណ្ហភាព នឹងកើនលើស ៤២ °C ដល់បុណ្យចូលឆ្នាំ appeared first on Kampuchea Thmey Daily.

ក្រុមហ៊ុនអាកាសចរណ៍ IndiGo បានចេញសេចក្តីជូនដំណឹងកាលពីព្រឹកថ្ងៃចន្ទថា «អ័ព្ទនៅតែបន្តកើតមាននៅទូទាំងទីក្រុងដេលី និងអាកាសយានដ្ឋានជាច្រើននៅភាគខាងជើងប្រទេសឥណ្ឌា។ ភាពមើលឃើញនៅតែថយចុះ ហើយជាលទ្ធផល ជើងហោះហើរបច្ចុប្បន្នមានល្បឿនយឺតជាងធម្មតា ដោយមានការពន្យារពេលខ្លះៗ។

ប្រព័ន្ធផ្សព្វផ្សាយក្នុងស្រុកបានរាយការណ៍ថា ការចេញដំណើរចំនួន ៦៤ និងការមកដល់ចំនួន ៦៤ ក៏ត្រូវលុបចោលនៅទីក្រុងដេលីដូចគ្នា ហើយជើងហោះហើរមួយចំនួននៅទីក្រុងដេលី បានបង្វែរទៅកាន់អាកាសយានដ្ឋានផ្សេងទៀត។ ក្នុងនោះដែរ សេវាកម្មរថភ្លើងបានរងផលប៉ះពាល់ផងដែរ ដោយសារតែភាពមើលឃើញមិនល្អនៅក្នុងតំបន់ ធ្វើឲ្យអ្នកដំណើរមានការខកចិត្តនៅស្ថានីយ៍រថភ្លើង។

ផ្សែងអ័ព្ទក្រាស់មួយស្រទាប់ ចំពេលសីតុណ្ហភាពរដូវរងាធ្លាក់ចុះនៅថ្ងៃនេះ បានធ្វើឲ្យរដ្ឋធានីឥណ្ឌាមានការថប់ដង្ហើម។ ទីក្រុងនេះមានបញ្ហាបំពុលបរិស្ថានជាប់លាប់ ដោយសន្ទស្សន៍គុណភាពខ្យល់ (AQI) ដែលវាស់កម្រិតភាគល្អិត PM2.5 ត្រូវគេរាយការណ៍ថា មានច្រើនជាង ៤០០ នៅថ្ងៃនេះ ខ្ពស់ជាងកម្រិតដែលបានណែនាំរបស់អង្គការសុខភាពពិភពលោក (WHO) ដល់ទៅ ៦០ ដង៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ឥណ្ឌា ត្រៀមខ្លួនដឹកនាំ BRICS ចំពេលមានសម្ពាធពីសហរដ្ឋអាមេរិក

The post ឥណ្ឌា លុបជើងហោះហើរជាង ១០០ ដោយសារចុះអ័ព្ទខ្លាំង appeared first on Kampuchea Thmey Daily.

ដើម្បីស្វែងរកការពិត Reuters បានចុះទៅដល់មន្ទីរពេទ្យផ្ទាល់ ដើម្បីសម្ភាសជាមួយវីរកងទ័ពខ្មែរ ហើយ Reuters ក៏បានឃើញច្បាស់ផ្ទាល់ភ្នែកអំពីភាពរងគ្រោះរបស់វីរកងទ័ពខ្មែរផងដែរ ដោយមានអ្នកខ្លះត្រូវពាក់ប្រដាប់ជំនួយខ្យល់អុកស៊ីសែនទៀតផង។

សម្រាន្តនៅលើគ្រែពេទ្យក្នុងមន្ទីរពេទ្យបង្អែកស្រុកព្រះនេត្រព្រះ ខេត្តបន្ទាយមានជ័យ វីរកងទ័ព គុន យ៉ុង ប្រាប់ទៅ Reuters ថា​ គាត់ត្រូវបង្ខំចិត្តដកចេញពីជួរមុខព្រោះតែពិបាកដកដង្ហើម ក្រោយថៃបាញ់ផ្សែងពុល។ លោកប្រាប់ថា៖ «ខ្ញុំថប់ដង្ហើមណាស់»។

ចំណែកលោក បង ប៊ុណ្ណារិទ្ធ ដែលជាគ្រូពេទ្យនៅមន្ទីរពេទ្យក្នុងខេត្តបន្ទាយមានជ័យ បាននិយាយថា លោកបានទទួលទាហានប្រហែល ២០ នាក់ កាលពីសប្តាហ៍មុន ដែលមានរោគសញ្ញា វិលមុខ ក្អួត និងពិបាកដកដង្ហើម។

នៅមន្ទីរពេទ្យមួយទៀត ក្នុងស្រុកសិរីសោភ័ណ ខេត្តបន្ទាយមានជ័យ លោកគ្រូពេទ្យ ណាក់ វណ្ណី ក៏និយាយថា លោកបានព្យាបាលទាហានចំនួន ២០ នាក់ កាលពីថ្ងៃសៅរ៍ ដែលមានរោគសញ្ញាស្រដៀងគ្នានេះ។

សូមជម្រាបថា ប្រទេសថៃ បានប្រព្រឹត្តឧក្រិដ្ឋកម្មសង្គ្រាមតាំងតែពីខែកក្កដាមកម្ល៉េះ តាមរយៈការប្រើប្រាស់អាវុធគីមី ដោយយន្តហោះថៃបានទម្លាក់ផ្សែងពុលវាយប្រហារមកលើវីរកងទ័ពខ្មែរ។

អាវុធគីមីត្រូវបានហាមឃាត់យ៉ាងដាច់ខាតក្រោមអនុសញ្ញាអាវុធគីមី (CWC) ដែលប្រទេសថៃ និងកម្ពុជា សុទ្ធតែជាភាគី។ ការប្រើប្រាស់អាវុធបែបនេះ គឺជាឧក្រិដ្ឋកម្មសង្គ្រាម ដ៏ធ្ងន់ធ្ងរបំផុត៕

អត្ថបទ៖ សុខ សុវណ្ណ

The post Reuters ឃើញផ្ទាល់ភ្នែកហើយ! វីរកងទ័ពខ្មែរ ពិតជារងគ្រោះដោយផ្សែងពុលរបស់ថៃ មែន appeared first on Kampuchea Thmey Daily.

នាព្រឹកថ្ងៃអាទិត្យទី១៤ ខែធ្នូ ឆ្នាំ២០២៥ លោកស្រី ហឹង ណារី វ៉ា ថន តំណាងលោក វ៉ា ថន អភិបាលខេត្តក្រចេះ ចុះសួរសុខទុក្ខវីរកងទ័ពជួរមុខ កំពុងសម្រាកព្យាបាលនៅមន្ទីរពេទ្យបង្អែកខេត្តក្រចេះ និងបាននាំយកអង្ករ សម្ភារៈ និងថវិកាជូនដល់វីរកងទ័ពផងដែរ។

ក្នុងឱកាសនោះ លោកស្រី ហឹង ណារី វ៉ាថន បានពាំនាំនូវការនឹករលឹក និងការផ្តាំផ្ញើសួរសុខទុក្ខ និងយកចិត្តទុកដាក់ខ្ពស់ពីលោក វ៉ា ថន អភិបាលខេត្ត​ ស្របតាមអនុសាសន៍ណែនាំដ៏ខ្ពង់ខ្ពស់របស់សម្តេចតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដែលតែងតែគិតគូរអំពីសុខទុក្ខ និងជីវភាពរស់នៅរបស់ប្រជាពលរដ្ឋគ្រប់ៗរូប គ្រប់មូលដ្ឋានទូទាំងប្រទេស ដោយមិនប្រកាន់និន្នាការឡើយ។ ជាពិសេស វីរកងទ័ពដែលបាននិងកំពុងបំពេញភារកិច្ចការពារជាតិមាតុភូមិនៅជួរមុខ និងយកចិត្តទុកដាក់ផងដែរអំពីជីវភាព សុខុមាលភាពគ្រួសារកងទ័ព រួមនិងព​លរដ្ឋភៀសសឹកកម្ពុជា។

ជាមួយគ្នានេះ លោកស្រីបានអំពាវនាវឱ្យប្រជាពលរដ្ឋទាំងអស់ បន្តជឿជាក់លើរាជរដ្ឋាភិបាលក្នុងការដឹកនាំប្រទេសប្រកបដោយសន្តិភាព និងការអភិវឌ្ឍ ជាពិសេសលើកិច្ចការការពារព្រំដែន ដោយត្រូវមានការអត់ធ្មត់ខ្ពស់ ដើម្បីទប់ស្កាត់កុំឱ្យមានការផ្ទុះអាវុធ ឬញុះញង់ឱ្យមានអំពើហិង្សាណាមួយកើតឡើង ដែលអាចបង្កផលវិបាកដល់ប្រទេសជាតិ និងប្រជាជន។ លោកស្រី ក៏បានជូនពរដល់ប្អូនៗវីរកងទ័ពដែលរងរបួសទាំងអស់ឆាប់ជាសះស្បើយ និងការកោតសសើរចំពោះការលះបង់ដ៏ធំធេង ដែលមិនអាចកាត់ថ្លៃបាន ក្នុងនាមជាទ័ពជួរមុខក្នុងការរក្សាសន្តិភាព ការការពារអធិបតេយ្យភាព បូរណភាពទឹកដី ការពារពីការរំលោភបំពានពីពួកចោរឈ្លានពាន ៕ អត្ថបទ៖ ប្រុញ វិធិន

The post វីរកងទ័ពជួរមុខ ៧រូប រងគ្រោះដោយផ្សែងពុល កំពុងសម្រាកព្យាបាលនៅមន្ទីរពេទ្យបង្អែកខេត្តក្រចេះ appeared first on Kampuchea Thmey Daily.

តាមការផ្សាយរបស់ Bangkok Post កាលពីថ្ងៃពុធទី២៦ខែវិច្ឆិកាឆ្នាំ២០២៥ ដោយដកស្រង់ប្រភពពីទីភ្នាក់ងារអភិវឌ្ឍន៍បច្ចេកវិទ្យាភូមិសាស្ត្រព័ត៌មាននិងអវកាស, កម្រិត PM2.5 នៅបាងកក បានឈានដល់៤២.២មីក្រូក្រាមក្នុងមួយម៉ែត្រគូបនៃខ្យល់ លើកម្រិតសុវត្ថិភាពកំណត់ដោយរដ្ឋាភិបាលដែលដាក់ត្រឹម ៣៧.៥មីក្រូក្រាមក្នុងមួយម៉ែត្រគូបនៃខ្យល់។ 

សម្រាប់ខេត្តទាំង១៤ដែល PM2.5 ឈានដល់កម្រិតប៉ះពាល់សុខភាពនោះមានដូចជា៖ Samut Songkhram, Samut Sakhon, Samut Prakan, Pathum Thani, Nonthaburi, Ratchaburi, Maha Sarakham, Ang Thong, Surin, Phetchaburi, Suphan Buri, Sing Buri, Nakhon Pathom និង Roi Et។

ផ្សែងពុលនេះកើតឡើងចំពេលប្រទេសថៃ ជាពិសេសនៅភាគខាងត្បូង កំពុងវេទនាដោយគ្រោះទឹកជំនន់ដ៏សាហាវ ដោយគិតត្រឹមថ្ងៃពុធទី២៦ខែវិច្ឆិកា តួលេខមនុស្សស្លាប់បានកើនឡើងដល់៣៣នាក់។

លើសពីនេះ ពលរដ្ឋ១.៩លាននាក់ត្រូវរងផលប៉ះពាល់ រីឯផ្ទៃដី៣ ៩០០គីឡូម៉ែត្រការ៉េត្រូវទឹកជន់លិច ចំណែកផលប៉ះពាល់សេដ្ឋកិច្ចមានប្រមាណ ១ទៅ១.៥ពាន់លានបាតក្នុងមួយថ្ងៃ។

មិនត្រឹមប៉ុណ្ណឹង ផ្ទះរាប់ម៉ឺនខ្នងបានរងការខូចខាត, អគាររដ្ឋាភិបាលនិងហាងនានាត្រូវបិទទ្វារ ស្របពេលផ្លូវថ្នល់និងស្ពានត្រូវកាត់ផ្តាច់ ហើយសូម្បីសេវារថភ្លើងនិងយន្តហោះ ក៏ជាប់គាំងផងដែរ។

វាជាគ្រោះទឹកជំនន់ដ៏កាចសាហាវបំផុតមិនធ្លាប់មានសោះនៅភាគខាងត្បូងប្រទេសថៃ ក្នុងប្រវត្តិសាស្រ្តរយៈពេល៣០០ឆ្នាំមកនេះ៕

អត្ថបទ៖ សុខ សុវណ្ណ

The post បន្ថែមពីលើទឹកជំនន់ ផ្សែងពុលកំពុងគ្របដណ្តប់ទីក្រុងបាងកក និងខេត្តថៃចំនួន១៤ appeared first on Kampuchea Thmey Daily.

តាមការផ្សាយរបស់ Bangkok Post នៅថ្ងៃចន្ទទី១០ខែវិច្ឆិកាឆ្នាំ២០២៥ ដែលដកស្រង់ប្រភពពីទីភ្នាក់ងារអវកាសនិងភូមិសាស្ត្រព័ត៌មានវិទ្យាជាតិនៃប្រទេសថៃ (GISTDA), កម្រិត PM2.5 នៅបាងកក មានចន្លោះពី៣២.២ទៅ៤១.៩មីក្រូក្រាមក្នុងមួយម៉ែត្រគូបនៃខ្យល់នារយៈពេល២៤ម៉ោងចុងក្រោយ លើសកម្រិតសុវត្ថិភាពកំណត់ដោយរដ្ឋាភិបាលថៃ ដែលដាក់ត្រឹម២៥មីក្រូក្រាមប៉ុណ្ណោះ។

បើនិយាយពីខេត្តទាំង២០វិញ, Nonthaburi ជាកន្លែងដែល PM2.5 ឈានដល់កម្រិតធ្ងន់ធ្ងរបំផុតពោលគឺមានចន្លោះពី២៥.១ទៅ៣៩.៥មីក្រូក្រាមក្នុងមួយម៉ែត្រគូបនៃខ្យល់។

ជុំវិញបញ្ហាខ្យល់ពុល, របាយការណ៍កាលពីដើមឆ្នាំនេះបង្ហាញថា អ្នកក្រុងបាងកកប្រមាណ ២.៤លាននាក់ ត្រូវអាឡ័កស៊ីនិងកើតជំងឺផ្លូវដង្ហើម ខណៈក្នុងនោះមានពាក់កណ្តាលដែលត្រូវទៅពេទ្យ ម្តងក្នុងមួយខែ។

តួលេខនេះ ត្រូវបានចងក្រងក្នុងរបាយការណ៍របស់ មជ្ឈមណ្ឌលស្រាវជ្រាវ Kasikorn ដោយបញ្ជាក់ថា បញ្ហា PM2.5 ឡើងខ្ពស់ ក៏បង្កការខាតបង់ដល់សេដ្ឋកិច្ចទីក្រុងបាងកក បើគិតជាទំហំទឹកប្រាក់ស្មើនឹង ៣ពាន់លានបាតក្នុងមួយខែផងដែរ ព្រោះមនុស្សត្រូវការចំណាយប្រាក់ដើម្បីពិនិត្យសុខភាពនិងព្យាបាលជំងឺ ហើយមានអ្នកទេសចរជាច្រើន បានលុបចោលដំណើរកម្សាន្ត ប៉ះពាល់ខ្លាំងបំផុត ចំពោះវិស័យទេសចរណ៍។

ដោយឡែក បើងាកទៅមើលរបាយការណ៍របស់ AFP កាលពីឆ្នាំ២០២៣, ប្រជាជនថៃជាង១០លាននាក់ បានធ្លាក់ខ្លួនឈឺជំងឺដែលជាប់ទាក់ទងនឹងខ្យល់ពុលត្រឹមមួយឆ្នាំនោះ។

របាយការណ៍ដដែលចង្អុលបង្ហាញថា គុណភាពខ្យល់របស់ប្រទេសថៃកាន់តែអាក្រក់ទៅៗ ដោយការដុតព្រៃយកដីធ្វើកសិកម្មនិងភ្លើងឆេះព្រៃ ជាពិសេសនៅភាគខាងជើងប្រទេស បានបង្កើតឲ្យមានផ្សែងអ័ព្ទដ៏គួរឲ្យភ័យខ្លាច៕

អត្ថបទ៖ សុខ សុវណ្ណ

ចុចអាន៖ អភិបាល​ក្រុង​បាងកក​ បន្ទោស​ប្រទេសជិតខាង ទើបផ្សែងពុលនៅរាជធានី ឈានដល់កម្រិតធ្ងន់ធ្ងរ

The post កំពុងរងគ្រោះដោយទឹកជំនន់ស្រាប់ផង ថៃ ត្រូវជួបវិបត្តិផ្សែងពុលដ៏គ្រោះថ្នាក់បន្ថែមពីលើទៀត appeared first on Kampuchea Thmey Daily.

តាមការចុះផ្សាយរបស់ Nation នៅថ្ងៃចន្ទទី២៤ខែមីនាឆ្នាំ២០២៥, សន្ទស្សន៍គុណភាពខ្យល់ PM2.5 នៅខណ្ឌចំនួន៤៤ ក្នុងរាជធានី បានឈានដល់កម្រិតគ្រោះថ្នាក់ពណ៌ទឹកក្រូច ខណៈ៦ខណ្ឌលោតដល់កម្រិតគ្រោះថ្នាក់ធ្ងន់ធ្ងរពណ៌ក្រហម ដែលប៉ះពាល់សុខភាពមនុស្សខ្លាំងបំផុត។

ខណ្ឌចំនួន៣ដែល PM2.5 ឈានដល់កម្រិតគ្រោះថ្នាក់ខ្លាំងជាងគេគឺ Nong Khaem (៨០.៥ មីក្រូក្រាមក្នុងខ្យល់មួយម៉ែត្រគូប បន្ទាប់មកគឺ Thawi Watthana ៧៩.៩ មីក្រូក្រាមក្នុងខ្យល់មួយម៉ែត្រគូប និង Bueng Kum ៧៦.៩ មីក្រូក្រាមក្នុងខ្យល់មួយម៉ែត្រគូប។

យ៉ាងណាក្តី លោក Sittipunt បានបង្ហោះថា មានចំណុចក្តៅនៃផ្សែងពុលជាង ១ ០០០កន្លែង ត្រូវគេឃើញនៅប្រទេសជិតខាងចាប់ពីថ្ងៃសុក្រដល់ថ្ងៃអាទិត្យសប្តាហ៍មុន ហើយវាបានរសាត់អណ្តែតមកលើភាគកណ្តាលប្រទេសថៃនិងទីក្រុងបាងកក។

ដូច្នេះហើយ គុណភាពខ្យល់ក្នុងរាជធានីបានធ្លាក់ចុះដល់ ២ ០០០ម៉ែត្រគូបក្នុងមួយវិនាទី ធ្វើឲ្យធូលីប្រមូលផ្តុំជះឥទ្ធិពលដល់ខ្យល់រហូតដល់ពេលព្រឹកព្រលឹមថ្ងៃចន្ទ។

ទោះបែបនេះ រដ្ឋបាលក្រុងមិនទាន់ចេញសេចក្តីប្រកាសថាស្ថានភាពធ្ងន់ធ្ងរ ឈានដល់ការណែនាំឲ្យធ្វើការពីផ្ទះឡើយ ប៉ុន្តែពលរដ្ឋត្រូវប្រុងប្រយ័ត្ននិងការពារសុខភាព ដូចជាកាត់បន្ថយសកម្មភាពនៅខាងក្រៅ ឬពាក់ម៉ាសជាដើម៕

អត្ថបទ៖ សុខ សុវណ្ណ

ចុចអាន៖ UN ព្រមានថា ផ្សែងពុលកំពុងបង្កគ្រោះថ្នាក់សុខភាព​កុមារ​រា​ប់​លាន​នាក់​​នៅខេត្ត Punjab ប៉ាគីស្ថាន

The post អភិបាល​ក្រុង​បាងកក​ បន្ទោស​ប្រទេសជិតខាង ទើបផ្សែងពុលនៅរាជធានី ឈានដល់កម្រិតធ្ងន់ធ្ងរ appeared first on Kampuchea Thmey Daily.

ផ្សែងអ័ព្ទពុលបានគ្របដណ្ដប់ទីក្រុង Lahore និងស្រុកចំនួន១៧ផ្សេងទៀតនៅក្នុងរដ្ឋ Punjab ចាប់តាំងពីខែមុន បានបណ្ដាល​ឲ្យ​មនុស្សជាង ៤០០០០នាក់​កើត​​ជំងឺផ្លូវដង្ហើម និង​ត្រូវ​បាន​បញ្ជូន​ទៅ​ព្យាបាល​នៅ​មន្ទីរ​ពេទ្យ។

តំណាងអង្គការ UNICEF ប្រចាំប្រទេសប៉ាគីស្ថាន លោក Abdullah Fadil ក្នុងសេចក្តីថ្លែងការណ៍មួយ បានជំរុញ​ឱ្យរដ្ឋាភិបាល ខិតខំប្រឹងប្រែងជាបន្ទាន់ និងកាន់តែខ្លាំង ដើម្បីកាត់បន្ថយការបំពុលខ្យល់​ចំពោះកុមាររងគ្រោះ​១១លាននាក់​ដែលមានអាយុក្រោម​៥ឆ្នាំ និងអ្នកផ្សេងៗទៀត។

លោក Fadil បាននិយាយថា «មុននឹងឈានដល់កម្រិតបំបែកកំណត់ត្រានៃការបំពុលខ្យល់ទាំងនេះ ប្រហែល ១២% នៃការស្លាប់របស់កុមារអាយុក្រោម ៥ ឆ្នាំនៅក្នុងប្រទេសប៉ាគីស្ថានគឺដោយសារតែការបំពុលខ្យល់ ផលប៉ះពាល់នៃផ្សែងអ័ព្ទដ៏អាក្រក់ក្នុងឆ្នាំនេះនឹងត្រូវការពេលវេលាដើម្បីវាយតម្លៃ ប៉ុន្តែយើងដឹងថាការកើនឡើងទ្វេដង និងបីដងនៃការបំពុលបរិយាកាសនឹងមានផលប៉ះពាល់យ៉ាងខ្លាំង ជាពិសេសទៅលើកុមារ និងស្ត្រីមានផ្ទៃពោះ»។

គួរបញ្ជាក់ថាប្រទេសប៉ាគីស្ថានបានបិទសាលារៀនរហូតដល់ថ្ងៃទី ១៧ ខែវិច្ឆិកានៅក្នុងផ្នែកខ្លះនៃខេត្ត Punjab ដែលជាវិធានការមានគោលបំណងការពារសុខភាពរបស់កុមារ។ អាជ្ញាធរកាលពីថ្ងៃសុក្របានបញ្ជាឱ្យបិទឧទ្យាន និងសារមន្ទីរទាំងអស់រយៈពេល ១០ ថ្ងៃ ហើយបានជំរុញឱ្យប្រជាជនជៀសវាងការធ្វើដំណើរចេញក្រៅដែលមិនចាំបាច់។

យោងតាមនាយកដ្ឋានការពារបរិស្ថានក្នុងខេត្តPunjab ទីក្រុង Multan នៅតែជាទីក្រុងដែលមានការបំពុលបរិស្ថានបំផុតកាលពីថ្ងៃច័ន្ទ ជាមួយនឹងសន្ទស្សន៍គុណភាពខ្យល់ប្រហែល ៨០០ លើសពីកម្រិត ៣០០ ត្រូវបានចាត់ទុកថាមានគ្រោះថ្នាក់ដល់សុខភាព។

ទោះបីជារដ្ឋាភិបាលបានបញ្ជាឱ្យមានការចាំបាច់នៃការពាក់ម៉ាស់មុខក៏ដោយ នោះត្រូវបានប្រជាជនមិនយកចិត្តទុកដាក់យ៉ាងទូលំទូលាយនោះទេ។ រដ្ឋាភិបាល​ក៏​កំពុង​សម្លឹង​រក​វិធី​ដើម្បី​បង្ក​ភ្លៀង​ធ្លាក់​សិប្បនិម្មិត​ដើម្បី​ប្រយុទ្ធ​ប្រឆាំង​នឹង​ការ​បំពុលនេះ៕

អត្ថបទ៖ ប៊ុន សុភាព

The post UN ព្រមានថា ផ្សែងពុលកំពុងបង្កគ្រោះថ្នាក់សុខភាព​កុមារ​រា​ប់​លាន​នាក់​​នៅខេត្ត Punjab ប៉ាគីស្ថាន appeared first on Kampuchea Thmey Daily.