ឈៀងម៉ៃជាប់លេខ២ ជាទីក្រុងដែលមានខ្យល់ពុលបំផុតលើពិភពលោក

មហន្តរាយផ្សែងពុលបាននិងកំពុងវាយលុកយ៉ាងខ្លាំងនៅភាគខាងជើងនៃប្រទេសថៃ ដោយនៅថ្ងៃទី២ ខែមេសា ឆ្នាំ២០២៦នេះ ទីក្រុងឈៀងម៉ៃបានធ្លាក់ចូលទៅក្នុង «តំបន់ពណ៌ស្វាយ» ដែលជាកម្រិតគ្រោះថ្នាក់បំផុត។

យោង​តាម​ការ​ផ្សាយ​របស់​ The Nation សន្ទស្សន៍គុណភាពខ្យល់ (AQI) បានហក់ឡើងដល់២៣១ ដែលធ្វើ​ឲ្យ​ទីក្រុងទេសចរណ៍ដ៏ល្បីមួយនេះ ក្លាយជាទីក្រុងដែលមានខ្យល់កខ្វក់ខ្លាំងជាងគេលំដាប់ទី២ នៅលើពិភពលោក បន្ទាប់ពីទីក្រុងដាកា ប្រទេសសេណេហ្គាល់។ បច្ចុប្បន្ន ប្រជាពលរដ្ឋក្នុងតំបន់កំពុងជួបប្រទះបញ្ហាសុខភាពធ្ងន់ធ្ងរ ដូចជា ការរលាកភ្នែក និងពិបាកដកដង្ហើម ដោយសារតែការប្រមូលផ្តុំនៃធូលីពុល PM2.5 បានកើនឡើងហួសកម្រិតដែលមនុស្សទូទៅអាចទ្រាំទ្របាន។

ស្ថានភាពនេះមិនមែនកើតឡើងតែនៅឈៀងម៉ៃប៉ុណ្ណោះទេ ប៉ុន្តែវាកំពុងរីករាលដាលពេញតំបន់ភាគខាងជើងនៃប្រទេសថៃតែម្ដង។ នៅខេត្តឈៀងរ៉ាយ ស្ថានភាពរឹតតែអាក្រក់ទៅទៀត ដោយកម្រិត AQI បានហក់ឡើងដល់២៦៩ ដែលជាកម្រិតមហន្តរាយ។ ខេត្តដទៃទៀតដូចជា Ratchaburi និង Khon Kaen ក៏កំពុងស្ថិតក្នុង «តំបន់ពណ៌ក្រហម» ផងដែរ។ អាជ្ញាធរថៃបានសម្រេចប្រកាសតំបន់ខ្លះក្នុងខេត្តឈៀងម៉ៃ ជាតំបន់គ្រោះមហន្តរាយភ្លើងឆេះព្រៃ ខណៈដែលផ្សែងអ័ព្ទពុលនៅតែបន្តគ្របដណ្តប់យ៉ាងក្រាស់ឃ្មឹក និងមានចំណុចកម្តៅដែលបង្កដោយភ្លើងឆេះព្រៃរាប់សិបកន្លែងមិនទាន់រលត់។

ចំពោះមុខគ្រោះថ្នាក់នេះ មន្ត្រីសុខាភិបាលបានអំពាវនាវយ៉ាងទទូចដល់សាធារណជន ឲ្យ​ផ្អាកសកម្មភាពនៅក្រៅផ្ទះជាបណ្ដោះអាសន្ន ហើយប្រសិនបើចាំបាច់ត្រូវចេញទៅក្រៅ ត្រូវតែពាក់ម៉ាសប្រភេទ N95 ជាដាច់ខាត។ ដើម្បីការពារសុខភាពក្នុងរយៈពេលវែង ប្រជាពលរដ្ឋត្រូវបានណែនាំ​ឲ្យ​ប្រើប្រាស់ម៉ាស៊ីនចម្រោះខ្យល់ បិទបង្អួចឲ្យ​ជិត និងតាមដានកម្រិតជាតិពុលតាមរយៈកម្មវិធីទូរស័ព្ទ​ឲ្យ​បានជាប់លាប់។ ទន្ទឹមនឹងនេះ រដ្ឋាភិបាលក៏បានស្នើសុំឲ្យ​មានការកាត់បន្ថយការដុតសំរាមក្នុងទីវាល និងកាត់បន្ថយការប្រើប្រាស់រថយន្តផ្ទាល់ខ្លួន ដើម្បីជួយសម្រាលស្ថានភាពបរិស្ថានដែលកំពុងស្ថិតក្នុងភាពអាសន្ននេះ៕

ប្រែសម្រួល៖ ឈាង