ពលរដ្ឋ Archives - Kampuchea Thmey Daily

ពលរដ្ឋគាំទ្រចំពោះការអនុវត្តវិធានការច្បាប់លើជនទាំងឡាយដែលពាក់ព័ន្ធឧក្រិដ្ឋកម្មឆបោកតាមប្រព័ន្ធបច្ចេកវិទ្យា

អ៊ិន ពិសី — Sat, 17 Jan 2026 04:42:17 +0000

ប្រជាពលរដ្ឋកម្ពុជា បានបង្ហាញការគាំទ្រខ្ពស់ចំពោះការអនុវត្តវិធានការច្បាប់លើជនទាំងឡាយដែលជាប់ពាក់ព័ន្ធនឹងឧក្រិដ្ឋកម្មឆបោកតាមប្រព័ន្ធបច្ចេកវិទ្យា។

ស្របពេលប្រមុខរាជរដ្ឋាភិបាលកម្ពុជា កំពុងមានវិធានការក្តៅបំផុតលើយុទ្ធនាការកម្ទេចឲ្យអស់ចំពោះ ឧក្រិដ្ឋកម្មឆបោកតាមប្រព័ន្ធបច្ចេកវិទ្យា ( Online scams ) អាជ្ញាធរមានសមត្ថកិច្ចកម្ពុជា ក៏បានរកឃើញមានជនមួយចំនួនតូច បានប្រឡូកខ្លួនចូលពាក់ព័ន្ធនឹងការធ្វើជាខ្នងបង្អែកលើបទល្មើសទាំងនេះ ដែលចាំបាច់ឲ្យអាជ្ញាធរកម្ពុជា ត្រូវតែមានវិធានការច្បាប់ជាធរមាន ដោយមិនមានការលើកលែងនោះឡើយ។

ជាក់ស្ដែងកាលពីពេលថ្មីៗ នេះ អតីតឧកញ៉ាមួយរូប ក៏ត្រូវបានតុលាការចេញដីកាសម្រេចឃុំខ្លួនដាក់ពន្ធនាគារបណ្ដោះអាសន្នរួចហើយផងដែរ ពាក់ព័ន្ធនឹងការធ្វើជាខ្នងបង្អែកនៅពីក្រោយបទល្មើសឆបោកតាមប្រព័ន្ធអនឡាញនេះ។

លោក គា សំណាង ជាប្រជាពលរដ្ឋកម្ពុជា សម្តែងការគាំទ្របំផុតចំពោះចំណាត់ការដ៏ម៉ឺងម៉ាត់របស់សម្តេចប្រមុខថ្នាក់ដឹកនាំ និងអាជ្ញាធរមានសមត្ថកិច្ច ដែលបានប្រើប្រាស់វិធានការច្បាប់លើជនគ្រប់រូប បើទោះបីជាជនដែលប្រព្រឹត្តិអំពើខុសច្បាប់នោះ មានតួនាទីឋានៈបុណ្យស័ក្ដិ ឬទ្រព្យធនកម្រិតណាក៏ដោយ ក៏ច្បាប់នៅតែអនុវត្តស្មើភាពដូចទៅនឹងសាមញ្ញជនធម្មតាដែរ។

លោក សុ ទិត្យា ជាប្រជាពលរដ្ឋ បានបញ្ជាក់ថា ប្រទេសជាតិ មានសន្តិភាព គឺមិនត្រូវការមានបទល្មើសឧក្រិដ្ឋកម្មទេ គឺរីកចម្រើនតាមរយៈការដឹកនាំដ៏ត្រឹមត្រូវរបស់ សម្តេចប្រមុខថ្នាក់ដឹកនាំ និងការពង្រឹងធនធានមនុស្សជំនាន់ក្រោយ ឲ្យមានសមត្ថភាព និងសក្តានុពល ប៉ុណ្ណោះ ទើបអាចឲ្យប្រទេសជាតិរីកចម្រើនបាន។

គួររំលឹកថា កាលពីពេលកន្លងទៅថ្មីៗ សម្តេចធិបតី ហ៊ុន ម៉ាណែត នាយករដ្ឋមន្ត្រី បានបញ្ជាក់ថា សម្តេច ពិតជាចង់ឃើញណាស់នូវការចូលរួមជាមួយនឹងការប្តេជ្ញាចិត្ត និងការលះបង់ដើម្បីជាតិ ពីគ្រប់តួអង្គដែលមានការពាក់ព័ន្ធទាំងអស់ ជាពិសេសការចូលរួមប្រជាជនខ្មែរគ្រប់ស្រទាប់វណ្ណៈ គ្រប់និន្នាការ ក៏ដូចជាមន្ត្រីរាជការ អាជ្ញាធរមូលដ្ឋាន កងកម្លាំងមានសមត្ថកិច្ចពាក់ព័ន្ធទាំងអស់ ដើម្បីរួបរួមគ្នាជាកម្លាំងមហាសាមគ្គីជាតិខ្មែរ សំដៅលុបបំបាត់នូវរាល់បញ្ហាអសកម្មពាក់ព័ន្ធនឹងឧក្រិដ្ឋកម្មឆបោកតាមប្រព័ន្ធបច្ចេកវិទ្យា ក៏ដូចជាដើម្បីលើកកម្ពស់កេរ្តិ៍ឈ្មោះដ៏ប្រពៃ នៃព្រះរាជាណាចក្រកម្ពុជា នៅលើឆាកអន្តរជាតិ៕

អត្ថបទ ៖ សុភា

The post ពលរដ្ឋគាំទ្រចំពោះការអនុវត្តវិធានការច្បាប់លើជនទាំងឡាយដែលពាក់ព័ន្ធឧក្រិដ្ឋកម្មឆបោកតាមប្រព័ន្ធបច្ចេកវិទ្យា appeared first on Kampuchea Thmey Daily.

រដ្ឋមន្ត្រីសុខាភិបាល លើកទឹកចិត្តមន្ត្រីមានការអត់ធ្មត់ បំពេញភារកិច្ចសង្គ្រោះពលរដ្ឋ និងវីរកងទ័ព ឱ្យអស់ពីលទ្ធភាព

អ៊ិន ពិសី — Tue, 23 Dec 2025 03:07:25 +0000

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានលើកទឹកចិត្តដល់មន្ត្រីសុខាភិបាលទាំងអស់ មានការអត់ធ្មត់ ការគិតគូរ និងការបំពេញភារកិច្ចសង្គ្រោះប្រជាពលរដ្ឋ និងវីរកងទ័ព ឱ្យអស់ពីលទ្ធភាព។

លោករដ្ឋមន្ត្រី មានប្រសាសន៍ថា «ទោះក្នុងស្ថានភាពបែបណា មន្ត្រីសុខាភិបាល សូមបន្តថែរក្សា និងតម្កល់ខ្ពស់សេចក្តីថ្លៃថ្នូរ ស្មារតីរឹងមាំ នឹងន ប្រកាន់ខ្ជាប់ជានិច្ចក្រមសីលធម៌វេជ្ជសាស្ត្រ ដែលនេះជាភាពរឹងមាំរបស់សុខាភិបាល»។

លោករដ្ឋមន្ត្រី បានលើកឡើងបែបនេះ កាលពីរសៀលថ្ងៃទី ២២ ខែធ្នូ ឆ្នាំ ២០២៥ ក្នុងឱកាសដឹកនាំកិច្ចប្រជុំកម្រិតថ្នាក់ដឹកនាំលើកទី ២ នៃ ខែធ្នូ ដើម្បីពិនិត្យវឌ្ឍនភាពការងារ និងលើកទិសដៅការងារឆ្នាំបន្ត ជាពិសេសផ្តោតសំខាន់ការងារអាទិភាពឆ្លើយតបទៅនឹងស្ថានភាពព្រំដែនកម្ពុជា-ថៃ។

ជាមួយគ្នានេះដែរ លោករដ្ឋមន្ត្រី បានណែនាំដល់ មន្ត្រីសុខាភិបាល ត្រូវបង្កើនការសហការគ្នា ជួយគាំទ្រនូវគ្រប់មធ្យោបាយ មានភាពម្ចាស់ការ លំនឹង និងច្បាស់លាស់ ទាំងការបម្រើសេវាសុខាភិបាលនៅអង្គភាព និងការងារព្រំដែន និងកុំបណ្តោយឱ្យកើតមានបញ្ហា ក្នុងពេលដែលយើងកំពុងជួបប្រទះបញ្ហា។ សកម្មភាពឆ្លើយតប ត្រូវអនុវត្តដោយការបត់បែន និងត្រៀមនូវផែនការគ្រប់ជំហាន ដើម្បីឆ្លើយតបទៅតាមស្ថានភាពការងារតំបន់ព្រំដែន។ ត្រូវភ្ជាប់ខ្លួនជាមួយនឹងដំណើរវិវឌ្ឍ នៃស្ថានភាពប្រទេសជាតិ ហើយត្រូវស្ថិតក្នុងភាពច្បាស់លាស់ជានិច្ច និងមន្ត្រីសុខាភិបាល ត្រូវមានឥរិយាបថមួយដែលផ្តល់ជាឥទ្ធិពលល្អ ដើម្បីផ្តល់ការជឿទុកចិត្ត ការគោរព និងសេចក្តីថ្លៃថ្នូរក្នុងវិជ្ជាជីវៈសុខាភិបាល។

យ៉ាងណាក៏ដោយ លោករដ្ឋមន្ត្រី បានថ្លែងនូវការកោតសរសើរ និងវាយតម្លៃខ្ពស់ចលនាគ្រប់កម្រិតក្នុងប្រព័ន្ធសុខាភិបាល ចាប់ពីកម្រិតថ្នាក់ដឹកនាំ មន្ទីរពេទ្យជាតិ ដល់កម្រិតខេត្ត ដែលមានការចូលរួមសហការគាំទ្រដល់ខេត្តជាប់ព្រំដែន និងការសស្រាក់សស្រាំរបស់មន្ត្រីសុខាភិបាល ដោយមិនគិតពីភាពនឿយហត់ក្នុងការបម្រើសេវាសុខាភិបាលដល់ប្រជាពលរដ្ឋ ជនភៀសសឹក និងវីរកងទ័ព៕

អត្ថបទ ៖ សំអឿន

The post រដ្ឋមន្ត្រីសុខាភិបាល លើកទឹកចិត្តមន្ត្រីមានការអត់ធ្មត់ បំពេញភារកិច្ចសង្គ្រោះពលរដ្ឋ និងវីរកងទ័ព ឱ្យអស់ពីលទ្ធភាព appeared first on Kampuchea Thmey Daily.

អាជ្ញាធរខេត្តសៀមរាប ជំរុញអាជ្ញាធរមូលដ្ឋាន និងពលរដ្ឋ ចូលរួមត្រួតពិនិត្យ ស្តារប្រព័ន្ធធារាសាស្ត្រ បញ្ចៀសជំនន់ទឹកភ្លៀង

អ៊ិន ពិសី — Mon, 29 Sep 2025 03:24:53 +0000

អាជ្ញាធរខេត្តសៀមរាប បានណែនាំដល់អាជ្ញាធរមូលដ្ឋាន និងប្រជាពលរដ្ឋមានលំនៅឋានតាមដងផ្លូវដែលរងផលប៉ះពាល់ដោយជំនន់ទឹកភ្លៀង ត្រូវចូលរួមសម្អាត កម្ចាត់ការកកស្ទះក្នុងប្រព័ន្ធលូបង្ហូរទឹក ទំនប់ប្រឡាយសាធារណៈ ដើម្បីសម្រួលលំហូរទឹក ធានាមានលំហូរទឹកលឿនបំផុតនៅពេលភ្លៀងធ្លាក់ខ្លាំង ព្រមទាំងថែរក្សាប្រព័ន្ធធារាសាស្ត្របុរាណ និង ថ្មី ឲ្យដំណើរការល្អ សម្រាប់រំដោះទឹក បញ្ចៀសបញ្ហាជំនន់ទឹកភ្លៀងក្នុងមូលដ្ឋាន។

ក្នុងកិច្ចប្រជុំពិភាក្សា និងពិនិត្យលើស្ថានភាពប្រព័ន្ធធារាសាស្ត្រ ប្រព័ន្ធលូ និងប្រឡាយសាធារណៈ ដើម្បីរំដោះទឹក និងបញ្ចៀសបញ្ហាជំនន់ទឹកភ្លៀងនៅក្នុងភូមិសាស្ត្រប៉ែកខាងកើតក្រុងសៀមរាប និងភូមិសាស្ត្រស្រុកប្រាសាទបាគង នៅចុងសប្ដាហ៍ ខែកញ្ញា ឆ្នាំ ២០២៥ នេះ លោក អ៊ឹង គឹមលាង អភិបាលរងខេត្ត បានជំរុញឲ្យប្រជាពលរដ្ឋរងផលប៉ះពាល់ ចូលរួមដាក់លូថ្មី ឬពង្រីកលូដែលមានស្រាប់នៅតាមមុខផ្ទះ។ ការធ្វើដូច្នេះ គឺជាការបន្ថែមប្រព័ន្ធបង្ហូរទឹកភ្លៀង ឬទឹកដក់ឲ្យហូរចូលទៅក្នុងប្រព័ន្ធលូធំ ដើម្បីបង្កើនល្បឿន និងសមត្ថភាពរំដោះទឹក កុំឲ្យជន់លិចទីធ្លាសាធារណៈ ឬចូលក្នុងផ្ទះ។ តាមរយៈការដាក់លូនេះ អាចការពារផ្ទះសម្បែង ទ្រព្យសម្បត្តិ និងហេដ្ឋារចនាសម្ព័ន្ធផ្លូវ មិនឲ្យខូចខាតដោយសារទឹកជំនន់។

លោក អ៊ឹង គឹមលាង សង្កត់ធ្ងន់ថា ការដោះស្រាយបញ្ហាទឹកជំនន់ មិនមែនជាបន្ទុករបស់រដ្ឋាភិបាល ឬអាជ្ញាធរមូលដ្ឋានតែឯងនោះទេ តែគឺជាការងាររួម ដែលតម្រូវឲ្យប្រជាពលរដ្ឋចូលរួមទាំងកម្លាំងពលកម្ម ឬ ថវិកា និងជួយសម្របសម្រួលទីតាំង។ នៅពេលប្រជាពលរដ្ឋចូលរួមសហការដាក់លូនៅមុខផ្ទះខ្លួនឯង ពួកគាត់នឹងមានស្មារតីថែរក្សា និងការពារប្រព័ន្ធលូនោះមិនឲ្យកកស្ទះដោយសំរាម ឬសម្ភារៈផ្សេងៗ នាំឲ្យទឹកលិចឡើងវិញ។ បន្ថែមនេះ លោកបានជំរុញដល់មន្ទីរអង្គភាពជំនាញ និងអាជ្ញាធរក្រុង-ស្រុក ត្រូវពង្រឹងកិច្ចសហការរវាងអាជ្ញាធរពាក់ព័ន្ធ ដើម្បីធានាប្រសិទ្ធភាពការងារ។

លោកអភិបាលរងខេត្ត ក៏បានស្នើដល់អាជ្ញាធរពាក់ព័ន្ធ ត្រូវវាយតម្លៃឡើងវិញនូវស្ថានភាពលូ បំពង់បង្ហូរទឹក ប្រឡាយទឹក និងស្ថានីយបូមទឹកដែលមានស្រាប់ ថាតើមានបញ្ហាស្ទះ ខូចខាត ឬតម្រូវការជួសជុល និងពង្រីកកម្រិតណា កំណត់តំបន់ងាយរងគ្រោះដោយជំនន់ទឹកភ្លៀងខ្លាំងជាងគេ?។ ត្រូវដាក់ចេញនូវវិធានការអាទិភាព ដូចជា ការជីកស្តារប្រឡាយ និងការបំពាក់លូធំៗ ដើម្បីកាត់បន្ថយផលប៉ះពាល់ នៃជំនន់ទឹកភ្លៀងមកលើជីវភាពរស់នៅរបស់ប្រជាពលរដ្ឋ ហេដ្ឋារចនាសម្ព័ន្ធ និងសេដ្ឋកិច្ចក្នុងមូលដ្ឋាន៕

អត្ថបទ ៖ គឿន វេត

The post អាជ្ញាធរខេត្តសៀមរាប ជំរុញអាជ្ញាធរមូលដ្ឋាន និងពលរដ្ឋ ចូលរួមត្រួតពិនិត្យ ស្តារប្រព័ន្ធធារាសាស្ត្រ បញ្ចៀសជំនន់ទឹកភ្លៀង appeared first on Kampuchea Thmey Daily.

ពលរដ្ឋ ចាប់ផ្ដើមវិលត្រឡប់ពីស្រុកកំណើតចូលមកភ្នំពេញវិញ តាមរយៈរថយន្តក្រុងឥតគិតថ្លៃរបស់រាជរដ្ឋាភិបាល

អ៊ិន ពិសី — Wed, 24 Sep 2025 06:54:07 +0000

ទិដ្ឋភាពទូទៅនៅព្រឹកថ្ងៃទី ២៤ ខែកញ្ញា ឆ្នាំ ២០២៥ នេះ នៅតាមចំណតរថយន្តក្រុងសាធារណៈទាំង ០៦ មានការវិលចូលត្រឡប់មកវិញជាបន្តបន្ទាប់ពីសំណាក់ប្រជាពលរដ្ឋ សិស្ស-និស្សិត កម្មករ-និយោជិត ដែលបានប្រើប្រាស់សេវាដឹកជញ្ជូនរថយន្តក្រុងសាធារណៈឥតគិតថ្លៃរបស់រាជរដ្ឋាភិបាលកម្ពុជា ដើម្បីមកបន្តប្រកបរបររកស៊ីទទួលទាន និងបំពេញកិច្ចការងារជាធម្មតាវិញ។ បន្ទាប់ពីបុណ្យភ្ជុំបិណ្ឌ ប្រពៃណីជាតិខ្មែរ ត្រូវបានបញ្ចប់ ប្រជាពលរដ្ឋ បានចាប់ផ្ដើមចាកចេញពីស្រុកកំណើតតាមបណ្តាខេត្ត វិលត្រឡប់ចូលមកកាន់រាជធានីភ្នំពេញវិញជាបន្តបន្ទាប់។

ប្រជាពលរដ្ឋធ្វើដំណើរពីខេត្តពោធិ៍សាត់ តាមរយៈរថយន្តក្រុងរបស់រាជរដ្ឋាភិបាលដោយឥតគិតប្រាក់ បានថ្លែងអំណរអរគុណយ៉ាងក្រៃលែងចំពោះ សម្តេចប្រមុខថ្នាក់ដឹកនាំ នៃរាជរដ្ឋាភិបាលកម្ពុជា ដែលតែងតែគិតគូរពីសុខទុក្ខរបស់ពលរដ្ឋគ្រប់ៗ គ្នា ពិសេសការផ្តល់រថយន្តក្រុងជិះឥតគិតថ្លៃរៀងរាល់បុណ្យជាតិធំៗ ដែលបានជួយសម្រួលខ្ពស់លើការចំណាយថ្លៃធ្វើដំណើរ។

ពួកគាត់បន្តលើកឡើងទៀតថា ការជិះរថយន្តក្រុងមានផាសុកភាព ទូលាយ មានម៉ាស៊ីនត្រជាក់ មិនខុសពីរថយន្តផ្ទាល់ខ្លួននោះទេ ជាពិសេសនោះ អ្នកបើកបររួសរាយរាក់ទាក់ បើកបរក្នុងល្បឿនសមរម្យ ដោយការទទួលខុសត្រូវខ្ពស់ គិតពីសុវត្ថិភាព។

គួររំលឹកថា រថយន្តក្រុងសាធារណៈរបស់រាជរដ្ឋាភិបាល តាមរយៈសាលារាជធានីភ្នំពេញ ចំនួន ៥៩៧ គ្រឿង បានដាក់ឱ្យបម្រើដឹកជញ្ជូនឥតគិតថ្លៃជូនពលរដ្ឋរយៈពេល ០៦ ថ្ងៃ គិតចាប់ពីថ្ងៃទី ២០ ដល់ថ្ងៃទី ២៥ ខែកញ្ញា ឆ្នាំ ២០២៥៕

អត្ថបទ ៖ សុភា

The post ពលរដ្ឋ ចាប់ផ្ដើមវិលត្រឡប់ពីស្រុកកំណើតចូលមកភ្នំពេញវិញ តាមរយៈរថយន្តក្រុងឥតគិតថ្លៃរបស់រាជរដ្ឋាភិបាល appeared first on Kampuchea Thmey Daily.

ក្រសួងការងារ និងសមាគមមិត្តយើង រៀបចំកម្មវិធីកាត់សក់ឥតគិតថ្លៃជូន កម្មករ ពលរដ្ឋ ប្រមាណ ៥០០ នាក់ នៅសង្កាត់ចោមចៅទី ១

អ៊ិន ពិសី — Mon, 15 Sep 2025 02:24:25 +0000

លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានអញ្ជើញចូលរួមជាអធិបតីក្នុង”កម្មវិធីសក់ និងសម្រស់មិត្តយើង” ដើម្បីផ្តល់ជូនការកាត់សក់បង្កក់សិរីក្នុងឱកាសភ្ជុំបិណ្ឌ ដោយឥតគិតថ្លៃដល់កម្មករ និងប្រជាពលរដ្ឋ នៅផ្សារត្រពាំងថ្លឹង សង្កាត់ចោមចៅទី ១ ខណ្ឌពោធិ៍សែនជ័យ រាជធានីភ្នំពេញ ក្រោមកិច្ចសហការរវាងក្រសួងការងារ និងបណ្តុះបណ្តាលវិជ្ជាជីវៈ និងសមាគមមិត្តយើង កាលពីព្រឹកថ្ងៃទី ១៤ ខែកញ្ញា ឆ្នាំ ២០២៥។

ថ្លែងទៅកាន់អ្នកចូលរួមនាឱកាសនោះ លោករដ្ឋមន្ត្រី លើកឡើងថា ពិធីកាត់សក់ដែលធ្វើឡើងនាពេលនេះ ជាការបង្កើតភាពជិតស្និទ្ធ និងបង្ខិតទំនាក់ទំនងរវាងមន្ត្រីរាជរដ្ឋាភិបាល អាជ្ញាធរមូលដ្ឋាន ជាមួយនឹងប្រជាពលរដ្ឋនៅមូលដ្ឋាន ជាពិសេសជាការរួមចំណែកកាត់បន្ថយការចំណាយមួយផ្នែករបស់ពលរដ្ឋ និងជាការលើកសម្រស់ និងសិរីសួស្តីដល់អ្នកចូលរួមផងដែរ។

ឆ្លៀតឱកាសនោះ លោករដ្ឋមន្ត្រី បានផ្ដាំផ្ញើដល់កម្មករត្រូវត្រឡប់ទៅស្រុកកំណើតក្នុងឱកាសឈប់សម្រាកបុណ្យភ្ជុំបិណ្ឌខាងមុខនេះ បើបានជួបពលករទើបត្រឡប់មកពីថៃ សូមចូលរួមផ្សព្វផ្សាយឱកាសការងារទៅដល់ពួកគាត់ បើសិនជាសហគ្រាស ក្រុមហ៊ុន រោងចក្រ ដែលកម្មករធ្វើការកំពុងត្រូវការជ្រើសរើសបុគ្គលិក។ លោករដ្ឋមន្ត្រី ក៏បានស្នើឲ្យកម្មករ-និយោជិតទាំងអស់ ជួយផ្សព្វផ្សាយលេខ ១២៩៧ ដើម្បីក្រសួងការងារជួយចុះឈ្មោះស្វែងរកការងារជូន។

ជាមួយគ្នានេះ លោករដ្ឋមន្ត្រី ក៏បានផ្សព្វផ្សាយពីការផ្តល់ជូនសេវាដឹកជញ្ជូនសាធារណៈរថយន្តក្រុងដោយមិនបង់ប្រាក់ក្នុងឱកាសពិធីបុណ្យភ្ជុំបិណ្ឌមានរថយន្តក្រុងជិត ៦០០ គ្រឿង ដែលជាអនុសាសន៍ណែនាំដ៏ខ្ពស់ខ្ពស់របស់ សម្តេចនាយករដ្ឋមន្ត្រី ហ៊ុន ម៉ាណែត ដើម្បីសម្រួលដល់ការចំណាយធ្វើដំណើររបស់ប្រជាពលរដ្ឋ។

ទន្ទឹមនឹងនេះ លោករដ្ឋមន្ត្រី ក៏បានអរគុណដល់សមាគមមិត្តយើង ក្រុមការងារអាជ្ញាធរមូលដ្ឋានក្នុងសង្កាត់ និងខណ្ឌ ទីភ្នាក់ងារជាតិមុខរបរ និងការងារ NEA នៃក្រសួងការងារ ដែលផ្តល់ព័ត៌មានការងារ ជាពិសេសជាងកាត់សក់ស្ម័គ្រចិត្តទាំងអស់ រួមទាំងអ្នកពាក់ព័ន្ធផ្សេងៗ ទៀត ដែលធ្វើឲ្យកម្មវិធីកាត់សក់ជូនកម្មករ-និយោជិត និងប្រជាពលរដ្ឋនៅមូលដ្ឋានសម្រេចបានជោគជ័យ៕

The post ក្រសួងការងារ និងសមាគមមិត្តយើង រៀបចំកម្មវិធីកាត់សក់ឥតគិតថ្លៃជូន កម្មករ ពលរដ្ឋ ប្រមាណ ៥០០ នាក់ នៅសង្កាត់ចោមចៅទី ១ appeared first on Kampuchea Thmey Daily.

ពលរដ្ឋស្នើអាជ្ញាធរពិនិត្យមើលជង្ហុកដ៏ធំ ១ កន្លែង លើផ្លូវ ៥៩៨ នៅខណ្ឌសែនសុខ តែងបង្កគ្រោះថ្នាក់ដល់អ្នកដំណើរជាញឹកញាប់

អ៊ិន ពិសី — Fri, 29 Aug 2025 09:14:40 +0000

ប្រជាពលរដ្ឋ បានស្នើសុំអាជ្ញាធរ សូមមេត្តាជួយចុះពិនិត្យមើលជង្ហុកដ៏ធំ ១ កន្លែង នៅលើផ្លូវ ៥៩៨ ក្នុងមូលដ្ឋានខណ្ឌសែនសុខ ដែលតែងតែបង្កគ្រោះថ្នាក់ដល់អ្នកធ្វើដំណើរឆ្លងកាត់ជាញឹកញាប់។

ជាក់ស្ដែងទីតាំងជង្ហុកនេះស្ថិតនៅតាមបណ្ដោយផ្លូវ ៥៩៨ ត្រង់ចំណុចស្តុបប្រសប់ជា ៣ ផ្លូវ ៦០៨ និងផ្លូវ ៣១៥ ក្នុងមូលដ្ឋានខណ្ឌសែនសុខ ដែលតែងតែបង្កគ្រោះថ្នាក់ដល់អ្នកធ្វើដំណើរតាមផ្លូវ ហើយខ្លះទៀតដួលបែកមុខបែកមាត់។

អ្នកស្រី សុគន្ធ ជាប្រជាពលរដ្ឋ បានឲ្យដឹងថា ទីតាំងជង្ហុកនេះ ដំបូងឡើយ គ្មាននោះទេ តែដោយសារមានរថយន្តដឹកទំនិញធំៗ បើកមកកិន ទើបធ្វើឲ្យផ្លូវនេះខូចបន្តិចម្ដងៗ ចំណែកកន្លែងខ្លះក៏មានស្រុតផងដែរ ហើយប្រជាពលរដ្ឋដែលនៅក្បែរនោះបានយកថ្មមកចាក់បំពេញ ដើម្បីកុំឲ្យមានអ្នករងគ្រោះដោយសារជិះធ្លាក់ជង្ហុក។

ចំណែក លោក លីគា ដែលជាប្រជាពលរដ្ឋ ក៏បានបញ្ជាក់ដែរថា ជង្ហុកមួយនេះ តែងតែបង្កគ្រោះថ្នាក់ដល់ប្រជាពលរដ្ឋនៅពេលធ្វើដំណើរ ជាពិសេសពេលមានភ្លៀងធ្លាក់ទឹកដក់លិចបាត់មើលមិនឃើញ ធ្វើឲ្យអ្នកធ្វើដំណើរជិះមកធ្លាក់ដួលប្រឡាក់ខោអាវ និងរងរបួសផងដែរ។

លោក លីគា បានសំណូមពរដល់អាជ្ញាធរពាក់ព័ន្ធក្នុងមូលដ្ឋាន សូមមេត្តាជួយចុះពិនិត្យមើល និងធ្វើការជួសជុលជង្ហុកខាងលើនេះផង ជៀសវាងមានគ្រោះថ្នាក់ដល់អ្នកធ្វើដំណើរបន្តទៀត។

ពាក់ព័ន្ធបញ្ហានេះដែរ លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន បានឲ្យកម្ពុជាថ្មីដឹងថា លោកនឹងចាត់ឲ្យក្រុមការងារចុះទៅធ្វើការត្រួតពិនិត្យមើលជាបន្ទាន់។

បន្ថែមនោះ លោក ផន រឹម ក៏បានអរគុណសម្រាប់ការជួយផ្ដល់ព័ត៌មានផងដែរ៕

អត្ថបទ ៖ ម៉េង

The post ពលរដ្ឋស្នើអាជ្ញាធរពិនិត្យមើលជង្ហុកដ៏ធំ ១ កន្លែង លើផ្លូវ ៥៩៨ នៅខណ្ឌសែនសុខ តែងបង្កគ្រោះថ្នាក់ដល់អ្នកដំណើរជាញឹកញាប់ appeared first on Kampuchea Thmey Daily.

ពលរដ្ឋ សំណូមពរអន្តរជាតិបន្តឃ្លាំមើលឲ្យបានខ្លាំងលើសកម្មភាពប៉ងឈ្លានពាន និងគំរាមបាញ់របស់ភាគីថៃម្ដងហើយម្ដងទៀតមកលើកម្ពុជា

អ៊ិន ពិសី — Thu, 14 Aug 2025 08:40:10 +0000

ប្រជាពលរដ្ឋ បានទទូច និងសំណូមពរដល់អន្តរជាតិ ជាពិសេសប្រធានអាស៊ានប្ដូរវេន មហាអំណាចអាមេរិក និងចិន សូមមេត្តាបន្តជួយឃ្លាំមើលឲ្យបានខ្លាំងលើសកម្មភាពប៉ងឈ្លានពានជាថ្មី របស់ភាគីថៃ មកលើដែនអធិបតេយ្យភាពរបស់កម្ពុជា។

លោក សុ ទិត្យា ជាប្រជាពលរដ្ឋ លើកឡើងថា សកម្មភាពប៉ងចង់ឈ្លានពានម្តងហើយម្តងទៀត របស់សៀមមកលើកម្ពុជា បានធ្វើឲ្យប៉ះពាល់ជាខ្លាំង ពិសេសការរំលោភបំពានលើកិច្ចព្រមព្រៀងបទឈប់បាញ់ ដែលទទួលស្គាល់ដោយអន្តរជាតិ។

លោកបានបន្តទៀតថា ពិតជាមិនអាចទទួលយកបានឡើយចំពោះទង្វើរបស់ថៃ បើទោះបីជាបទឈប់បាញ់បានចូលជាធរមានក៏ពិតមែន ប៉ុន្តែថៃ តែងតែបង្កសកម្មភាពផ្សេងៗ មកលើកម្ពុជា រួមមានរាយបន្លាលួស ដាក់កង់ឡាន បាញ់ចម្ពាមកៅស៊ូ មកលើអធិបតេយ្យភាពដែនដីរបស់កម្ពុជា ដែលមានចេតនាចង់ឲ្យកម្ពុជាក្រោធខឹង ហើយផ្ដើមចេញជាការផ្ទុះអាវុធមុន។

គួរបញ្ជាក់ថា នៅថ្ងៃទី ១៤ ខែសីហា ឆ្នាំ ២០២៥ នេះ ក្រុមអ្នកសង្កេតការណ៍អន្តរកាល (IOT) មកពីប្រទេសចំនួន ៧ បានចុះពិនិត្យស្ថានភាពសន្តិសុខតាមព្រំដែនកម្ពុជា-ថៃ រួមមាន (ខេត្តបាត់ដំបង-យោធភូមិភាគទី ៥ , ខេត្តបន្ទាយមានជ័យ-ច្រកព្រំដែនអន្តរជាតិប៉ោយប៉ែត ច្រកអូបីជាន់ភូមិជោគជ័យ និងច្រកបឹងត្រកួន , ខេត្តព្រះវិហារ-ច្រកព្រំដែនអានសេះ) ដើម្បីសង្កេតការណ៍ពីស្ថានការណ៍ជាក់ស្ដែងនៅតំបន់ទាំងនោះ ក្នុងគោលដៅធានាបាន បទឈប់បាញ់ ឲ្យមានប្រសិទ្ធភាពខ្ពស់៕

អត្ថបទ ៖ សុភា

The post ពលរដ្ឋ សំណូមពរអន្តរជាតិបន្តឃ្លាំមើលឲ្យបានខ្លាំងលើសកម្មភាពប៉ងឈ្លានពាន និងគំរាមបាញ់របស់ភាគីថៃម្ដងហើយម្ដងទៀតមកលើកម្ពុជា appeared first on Kampuchea Thmey Daily.

អ្នកតាមដាន៖ ពលរដ្ឋកម្ពុជាគួរតែទៅលេងឱ្យច្រើន នៅប្រាសាទតាមាន់តូច តាមាន់ធំ តាក្របី

អុន ស្រីមាន — Mon, 21 Jul 2025 05:13:25 +0000

អ្នកតាមដានសង្គម ២រូប បានប្រាប់មក កម្ពុជាថ្មី ដូចគ្នាថា អំឡុងពេលមានវិវាទព្រំដែន កម្ពុជា-ថៃ ប្រជាជនកម្ពុជា គួរតែទៅលេងនៅប្រាសាទតាមាន់តូច តាមាន់ធំ និងតាក្របី ឱ្យបានច្រើនតាមសមត្ថភាព និងសុវត្ថិភាពនៅតាមព្រំដែន ដើម្បីបង្ហាញពីការស្រឡាញ់សម្បត្តិវប្បធម៌ខ្មែរ ការស្រឡាញ់ជាតិ និងការលើកទឹកចិត្តកងទ័ពខ្មែរនៅតំបន់ព្រំដែន។

រូបភាពពីហ្វេសប៊ុក Bo Kimyong

លោកបណ្ឌិត ដៀប សុផល សាស្ត្រាចារ្យប្រវត្តិសាស្រ្ត និងទំនាក់ទំនងអន្តរជាតិ បានប្រាប់ កម្ពុជាថ្មី ថា ក្នុងពេលដែលកម្ពុជា និងថៃ មានជម្លោះព្រំដែនជាមួយគ្នា កងទ័ពកម្ពុជាបានឈរជើងនៅទីនោះដើម្បីការពារទឹកដីពីជនឈ្លានពានដែលជាកិច្ចការការពារជាតិ ហើយកិច្ចការការពារជាតិគឺជាកាតព្វកិច្ចរបស់ប្រជាពលរដ្ឋគ្រប់ស្រទាប់វណ្ណៈទាំងអស់តាមរយៈរូបភាពផ្សេងៗគ្នា។ ត្រង់ចំណុចនេះ លោកបណ្ឌិតថា ការទៅលេងនៅតំបន់ព្រំដែនដើម្បីលើកទឹកចិត្តកងទ័ព គឺជារឿងមួយចាំបាច់ និងសំខាន់ណាស់ គឺជាចលនាមហាជនមួយដែលត្របាញ់ចូលគ្នារវាងកងទ័ព និងមហាជន ដើម្បីការពារមាតុភូមិកម្ពុជា។

បណ្ឌិត ដៀប សុផល

ក្នុងស្ថានភាពជម្លោះរវាងប្រទេសទាំង២ លោកបណ្ឌិត ដៀប សុផល ឃើញថា មានការប្រឈមមុខដាក់គ្នាចច្រើន ដូចជាការប្រឈមមុខការផ្ទុះប្រដាប់អាវុធ សង្គ្រាមពាក្យសម្តីតាមបណ្តាញសង្គម និងវប្បធម៌ ដែលបានរាលដាលច្របល់ចូលគ្នា។ លោកក៏មើលឃើញថា ឥរិយាបថរបស់ប្រជាជនថៃមួយចំនួន បានបញ្ចេញអាកប្បកិរិយាមិនគប្បី បំផ្លើស និងបំភ្លៃការពិត ហេតុនេះ លោកបណ្ឌិត បានប្រាប់ទៅពលរដ្ឋត្រូវទប់ទល់នឹងស្ថានភាពនេះឱ្យបានល្អ ដោយត្រូវយល់ឱ្យច្បាស់ថា ទាំងអស់នេះ គឺជាសង្គ្រាមចិត្តសាស្ត្រ កុំជឿ កុំទទួលយកតាមការបំផ្លើសរបស់សត្រូវ ពោល គឺត្រូវស្វែងរកការពិតរបស់ខ្លួន។ ប្រជាពលគ្រប់រូប ត្រូវមានជំហរដាច់ខាតរបស់ខ្លួន គឺរួមគ្នាការពារទឹកដី កុំចាញ់បោកឧបាយកល និងបម្រើឱ្យឧបាយរបស់សត្រូវដាច់ខាត និងដើរតាមមាគ៌ាអភិវឌ្ឍន៍របស់រាជរដ្ឋាភិបាលកម្ពុជា។

អ្នកជំនាញរូបនេះ សំណូមពរដល់ប្រជាពលរដ្ឋគ្រប់រូបថា៖ “យើងត្រូវទៅលេង យើងទៅសួរសុខទុក្ខបងប្អូនយុទ្ធជនរបស់យើងដែលនៅហាលភ្លៀងហាលខ្យល់ ប្រឈមមុខនឹងការលំបាកគ្រប់បែបយ៉ាង ហើយនៅឆ្ងាយពីគ្រួសារ យើងទៅលេង យើងទាំងអស់គ្នាជាគ្រួសាររបស់គាត់”។ លោកសង្កត់ធ្ងន់ ថា ពលរដ្ឋគួរទៅឱ្យបានច្រើនគ្នា និងធ្វើអ្វីដែលអាចធ្វើបានដើម្បីជួយដល់កងទ័ពជួរមុខ បង្ហាញថា ខ្មែរតែមួយ រួមសុខរួមទុក្ខជាមួយគ្នា។

ចំណែក លោកស្រីបណ្ឌិត ជា វណ្ណី ប្រធាននាយកដ្ឋានធម្មសាស្ត្រ ចរិយាសាស្ត្រ និងយេនឌ័រ នៃវិទ្យាស្ថានមនុស្សសាស្ត្រ និងវិទ្យាសាស្ត្រសង្គម នៃរាជបណ្ឌិត្យសភាកម្ពុជា បានប្រាប់មក កម្ពុជាថ្មី មិនខុសពីបណ្ឌិត ដៀប សុផល ឡើយ។ លោកស្រីបណ្ឌិត យល់ឃើញថា ពលរដ្ឋកម្ពុជា គួរតែទៅលេងនៅប្រាសាទតាមាន់តូច តាមាន់ធំ តាក្របី ឱ្យបានច្រើន តាមសមត្ថភាពរៀងខ្លួន និងសុវត្ថិភាពជាក់ស្តែងនៅតាមព្រំដែន។ ការទៅលេងនៅតំបន់ព្រំដែននេះគឺជាការប្រសើរណាស់ បង្ហាញពីការស្រឡាញ់ ការការពារ អភិរក្សសម្បត្តិវប្បធម៌ដែលបន្សល់ពីដូនតាខ្មែរ ហើយក៏អាចជួយបង្កើនសេដ្ឋកិច្ចពលរដ្ឋតាមតំបន់ព្រំដែនបន្ថែមទៀតដែរ។ បន្ថែមពីនេះ ក៏ចូលរួមចំណែកការពារព្រំដែនពីជនឈ្លានពានចង់យកទឹកដីខ្មែរ ដោយលោកស្រីបញ្ជាក់ថា នៅពេលពលរដ្ឋខ្មែរទៅលេងច្រើន ក៏ធ្វើឱ្យអ្នកចង់ឈ្លានពានមានការខ្លាចរអាដូចគ្នា។

បណ្ឌិត ជា វណ្ណី

លោកស្រីថា ក្នុងស្ថានភាពជម្លោះ កម្ពុជា-ថៃ ជាង១ខែមកនេះ ប្រជាជនកម្ពុជា គួរបង្ហាញប្រកាន់អាកប្បកិរិយាចាស់ទុំ អត់ធ្មត់ កុំឆ្លើយតបទាំងអារម្មណ៍ខុសឆ្គង និងប្រុងប្រយ័ត្នខ្ពស់ កុំធ្វើដូចប្រជាជនថៃមួយចំនួន។ លោកស្រី និយាយថា៖ “ដូច្នេះ គឺយើងកុំបង្កជម្លោះ ហើយការកុំបង្កជម្លោះហ្នឹងមិនមែនឱ្យអត់ធ្មត់រហូតដល់ថ្នាក់គេជាន់ជើង គេវាយអីហើយយើងមិនតបតទេ ពេលហ្នឹងគឺយើងតបត។ តែបើក្នុងតែករណីប្រើបណ្តាញសង្គម ប្រើអារម្មណ៍ទេ យើងកុំយកអារម្មណ៍ដ៏ល្អផូរផង់របស់យើង ទៅច្រឡោតខឹងជាមួយអ្នកដែលមិនដឹងអី”។ លោកស្រី ក៏បញ្ជាក់ទៀតថា កម្ពុជាគួររក្សាជំហររឹងមាំតែមិនទន់ជ្រាយ ប្រាកដប្រជា រក្សាភាពម៉ឺងម៉ាត់ សមរម្យដោយគុណតម្លៃនៃជីវិតរស់នៅក្នុងសង្គម និងឈរលើគោលការណ៍គោរពច្បាប់អន្តរជាតិ នោះអន្តរជាតិ នឹងគាំទ្រកម្ពុជា។

លោកស្រី បានអំពាវនាវដល់ពលរដ្ឋគ្រប់រូប ប្រសិនជានៅតំបន់ព្រំដែនមានសុខសុវត្ថិភាពល្អ ពលរដ្ឋខ្មែរគួរទៅលេងនៅទីនោះឱ្យបានច្រើន ដើម្បីបញ្ជាក់ពីទឹកចិត្តស្រឡាញ់ជាតិ ព្រមទាំងគោរព ផ្តល់តម្លៃដល់មរតកវប្បធម៌ដូនតាខ្មែរដូចគ្នា។ បន្ថែមពីនេះ ការទៅទស្សនានៅតំបន់ប្រាសាទតាមព្រំដែន ក្រៅពីការស្រឡាញ់ជាតិ ក៏បង្ហាញពីការកសាងសន្តិភាពរវាងអ្នកជិតខាង និងអ្នកជិតខាងផងដែរ។ ការធ្វើខ្លួនជាអ្នកជិតខាងល្អ លោកស្រី ជា វណ្ណី ថា ក៏អាចក្លាយជាគំរូល្អ សម្រាប់អ្នកជិតខាង សម្រាប់អ្នកនៅក្នុងតំបន់ និងក្រៅតំបន់ដែរ៕

រូបភាពពីហ្វេសប៊ុក ព័ត៌មានយោធា-Military News

The post អ្នកតាមដាន៖ ពលរដ្ឋកម្ពុជាគួរតែទៅលេងឱ្យច្រើន នៅប្រាសាទតាមាន់តូច តាមាន់ធំ តាក្របី appeared first on Kampuchea Thmey Daily.