ពេជ្រ សុផាន់ Archives - Kampuchea Thmey Daily

លោក ពេជ្រ សុផាន់ រំលឹកគុណរបស់លោក អេ ភូថង ដែលធ្លាប់ជួយខ្លួនអំឡុងឆ្នាំ២០១៤ ធ្លាក់ដល់ទាល់ច្រកអស់ផ្លូវដើរ

Sina Noun — Wed, 01 Jul 2026 05:36:07 +0000

គ្រូប្រដាល់គុនខ្មែរលោក ពេជ្រ សុផាន់ រំលឹកដល់គុណរបស់លោក អេ ភូថង ជាបុគ្គលម្នាក់ដែលជួយលោកអំឡុងឆ្នាំ២០១៤ ទាល់ច្រក់លែងមានផ្លូវដើរអំឡុងពេលនោះរហូតអាចងើបខ្លួនបានវិញ និងបង្កើតភាពជោគជ័យមានក្លឹបប្រដាល់ស្ដង់ដាដូចពេលនេះ។

លោក ពេជ្រ សុផាន់ និងលោក អេ ភូថង

ថ្លែងក្នុងកិច្ចសម្ភាសមួយលោក ពេជ្រ សុផាន់ រំលឹកទៅអតីតកាលថា គឺលោក អេភូថង ដែលជាបងធំរូបនេះហើយដែលអាណិតស្រឡាញ់ និងជួយលោកអំឡុងគ្រាដែលលំបាកបំផុតក្នុងជីវិតកាលពីឆ្នាំ២០១៤។ អំឡុងឆ្នាំនោះគឺលោកបានលង់ខ្លួនជាមួយសង្គមមិនល្អរហូតអស់អ្វីៗគ្រប់យ៉ាង និងទាល់ច្រកគ្មានផ្លូវដើរតទៅមុខទៀតនោះឡើយ។ ប៉ុន្តែលោក អេ ភូថង ម្នាក់នេះហើយដែលបានផ្ដល់ឱកាសឲ្យមករស់នៅជាមួយលោកក្នុងស្តាតចាស់ដោយផ្ដល់បាយទឹក ៣ពេល និងឲ្យជួយតែបង្ហាត់សិស្សក្នុងក្លឹបប៉ុណ្ណោះបានហើយ។

ពិធីសូត្រមន្តនៅក្លឹបថ្មីលោក ពេជ្រ សុផាន់

ការផ្ដល់ឱកាសរបស់លោក អេភូថង នៅពេលនោះហើយទើបធ្វើឲ្យរូបលោកបានកសាងខ្លួន ខិតខំប្រឹងប្រែងធ្វើការរកថវិកាចិញ្ចឹមក្រុមគ្រួសារ និងអភិវឌ្ឍន៍ខ្លួនជាបន្តបន្ទាប់រហូតក្លាយជាមនុស្សជោគជ័យមានកេរ្តិ៍ឈ្មោះ បង្កើតធនធានកីឡាករល្អៗ រួមទាំងបង្កើតបាននៅក្លឹបបែបស្ដង់ដាដូចពេលនេះ។

លោក ពេជ្រ សុផាន់ និងកូន

រំលឹកដែរថា បច្ចុប្បន្ននេះលោក ពេជ្រ សុផាន់ ជាគ្រូប្រដាល់ល្បីឈ្មោះ និងបានបណ្ដុះបណ្ដាលធនធានកីឡាករល្អៗជាច្រើននាក់។ លោកចាត់ចូលជាគ្រូដែលជោគជ័យមួយរូបនៅកម្ពុជាដែលសិស្សមានទីផ្សារប្រកួតច្រើន ក្លឹបឈ្នះប្រាក់រង្វាន់តូច-ធំ ជាបន្តបន្ទាប់ និងមានលទ្ធភាពកសាងក្លឹបប្រដាល់បែបស្ដង់ដាតម្លៃរាប់ម៉ឺនដុល្លារឯណោះ។ ថ្ងៃទី១ ខែកក្កដា ឆ្នាំ២០២៦ នេះគេឃើញលោក ពេជ្រ សុផាន់ បានធ្វើពិធីសូត្រមន្តសុំសេចក្ដីសុខដើម្បីចូលមកហ្វឹកហាត់នៅក្លឹបថ្មីហើយ៕

អត្ថបទដោយ៖ នួន ស៊ីណា

The post លោក ពេជ្រ សុផាន់ រំលឹកគុណរបស់លោក អេ ភូថង ដែលធ្លាប់ជួយខ្លួនអំឡុងឆ្នាំ២០១៤ ធ្លាក់ដល់ទាល់ច្រកអស់ផ្លូវដើរ appeared first on Kampuchea Thmey Daily.

លោក ពេជ្រ សុផាន់ មានជំនឿចិត្តខ្ពស់ថាក្រុមរបស់លោកនឹងបានឡានចូលក្នុងក្លឹបសប្ដាហ៍នេះ

Sina Noun — Thu, 11 Jun 2026 04:30:15 +0000

ការប្រកួតដណ្ដើមឡានដ៏សំខាន់បានឈានដល់សប្ដាហ៍ផ្ដាច់ព្រ័ត្រចុងក្រោយហើយថ្ងៃទី១៤ ខែមិថុនា ឆ្នាំ២០២៦ នេះហើយ ខណៈគ្រូឆ្នើម ពេជ្រ សុផាន់ មានជំនឿចិត្តខ្ពស់ថាក្រុមរបស់លោកដែលនៅសល់ជើងខ្លាំងដល់ទៅ ២រូបនឹងឈ្នះទទួលបានរង្វាន់ធំចូលក្លឹប។

លោក ពេជ្រ សុផាន់ និងរង្វាន់ឡាន

នៅក្នុងកិច្ចសម្ភាសលោក ពេជ្រ សុផាន់ ថាឈានមកដល់សប្ដាហ៍ផ្ដាច់ព្រ័ត្រនេះលោកមានអារម្មណ៍សប្បាយរីករាយជាខ្លាំង និងជាការបំពេញបំណងរបស់អ្នកគាំទ្រផងដែលទន្ទឹងរង់ចាំមើលការប្រកួតដ៏សំខាន់នេះជាយូរមកហើយ។

គ្រូឆ្នើមរូបនេះបន្ថែមទៀតថា ២ប្រកួតមុនគឺត្រឹមជាកីឡាករល្មមៗរបស់ក្លឹបនោះទេ ស្របពេល ២នាក់ចុងក្រោយនេះជាសន្លឹកអាត់របស់លោកហើយ។ ដូច្នេះអ្នកតាមដានវិស័យប្រដាល់ដឹងពីសមត្ថភាព និងការប្រកួតរបស់កីឡាករ ពេជ្រ សម្បត្តិ ពេជ្រ អាទិទេព រួចមកហើយ។ លោកមានក្ដីសង្ឃឹមខ្ពស់លើកីឡាករឆ្នើមទាំងពីរថានឹងឈ្នះអាចដណ្ដើមរង្វាន់ឡាននេះចូលមកកាន់ក្លឹបបាន។

ពេជ្រ អាទិទេព និង ពេជ្រ សម្បត្តិ

ការប្រកួតនេះផងដែរគ្រូៗប្រចាំក្លឹបទាំង ៣ គឺលោក ពេជ្រ សុផាន់ ធន់ សុភា និងលោក សេន ប៊ុនថេន សុទ្ធតែចង់ដាច់ស្រេចលទ្ធផលមិនចង់ឲ្យមានការជជែកវែកញែកច្រើនលើការដាក់ពិន្ទុ ឬមានការមិនពេញចិត្តណាមួយក្រោយបញ្ចប់ការប្រកួតនោះឡើយ។

កម្មវិធីប្រកួតថ្ងៃទី១៤ មិថុនា ២០២៦

បញ្ជាក់ដែរថា ការប្រកួត The battle of three kingdoms ដណ្ដើមឡានចូលក្លឹបនេះបានឈានមកដល់សប្ដាហ៍ចុងក្រោយដើម្បីកាត់សេចក្ដីហើយថាក្លឹបធំៗទាំង ៣ មានក្លឹបលោក សេន ប៊ុនថេន ក្លឹបលោក ពេជ្រ សុផាន់ និងក្លឹបលោក ធន់ សុភា នរណានឹងឈ្នះនោះ។ លទ្ធផល ២ប្រកួតកន្លងទៅគឺមិនទាន់អាចកំណត់ថារង្វាន់ឡាននេះបានទៅក្លឹបណានោះឡើយ និងត្រូវរង់ចាំមើលក្រោយបញ្ចប់ការប្រកួតថ្ងៃអាទិត្យ ទី១៤ ខែមិថុនា ឆ្នាំ២០២៦ ទាំងអស់គ្នាសិន។ គូដណ្ដើមឡានចូលក្លឹបសប្ដាហ៍នេះរួមមាន ពេជ្រ សម្បត្តិ ប៉ះ ធន់ ម៉េងហុង ពេជ្រ អាទិទេព ប៉ះ ប៉ែនកាក់ យ៉ាស៊ីន ប៊ុន សុធា ប៉ះ ប៉ែនកាក់ មហាម៉ាត់។ ក្លឹបណាដែលមានកីឡាករឈ្នះច្រើននាក់ជាងគេនោះនឹងទទួលបានរង្វាន់ឡាន ១គ្រឿងចូលក្លឹប។ ការប្រកួតនេះធ្វើឡើងថ្ងៃទី១៤ មិថុនា ២០២៦ នៅទីតាំងជិតស្ដុបទួលពង្រ ខណ្ឌពោធិ៍សែនជ័យ រាជធានីភ្នំពេញ៕

អត្ថបទដោយ៖ នួន ស៊ីណា

The post លោក ពេជ្រ សុផាន់ មានជំនឿចិត្តខ្ពស់ថាក្រុមរបស់លោកនឹងបានឡានចូលក្នុងក្លឹបសប្ដាហ៍នេះ appeared first on Kampuchea Thmey Daily.

ក្លឹបលោកពេជ្រ សុផាន់ រឿងច្បាប់ទម្លាប់គឺតឹងរឹងណាស់ «កីឡាល្អតែសម្រាប់អ្នកខំទេ»

Sina Noun — Tue, 12 May 2026 05:32:20 +0000

ក្លឹបប្រដាល់លោក ពេជ្រ សុផាន់ ដែលគេទទួលស្គាល់ថាមានកីឡាករល្អៗពោពេញដោយសមត្ថភាព និងឡើងប្រកួតអស់ៗនោះគឺមានច្បាប់ទម្លាប់តឹងរឹងខ្លាំងណាស់ពិសេសមិនអនុគ្រោះចំពោះសិស្សៗណាដែលខ្ចិល និងគ្មានវិន័យនោះឡើយ។

រូបភាពលើហ្វេសបុកលោក ពេជ្រ សុផាន់

ថ្លែងក្នុងការប្រជុំវិន័យក្លឹបថ្មីៗនេះលោក ពេជ្រ សុផាន់ បានពន្យល់ទៅកាន់សិស្សៗថា «កីឡាគឺល្អសម្រាប់តែអ្នកខំប្រឹងប្រែងប៉ុណ្ណោះ»។ ដូច្នេះម្នាក់ៗត្រូវតែមានការខំប្រឹងឲ្យខ្លាំងលើការហ្វឹកហាត់ គោរពវិន័យក្នុងក្លឹប និងឧស្សាហ៍ព្យាយាមទើបអាចល្បីឈ្មោះទៅបាន។

ពេជ្រ អាទិទេព កំពុងហ្វឹកហាត់

គ្រូឆ្នើមរូបនេះបន្ថែមទៀតថា សិស្សគ្រប់រូបត្រូវតែខំប្រឹងប្រែងហ្វឹកហាត់ឲ្យអស់ពីចិត្ត និងចេះជួយកាន់ស៊ីបគ្នាទៅវិញទៅមកដើម្បីពង្រឹងសមត្ថភាពខ្លួនឯង និងបានជួយមិត្តរួមក្លឹបផង។ មួយវិញទៀតត្រូវតែតស៊ូខំប្រឹងព្យាយាមហ្វឹកហាត់ជាប្រចាំពិសេសពេលឡើងប្រកួតត្រូវតែធ្វើឲ្យអស់ៗពីសមត្ថភាពកុំឲ្យម្ចាស់កម្មវិធីគេអន់ចិត្តចំពោះការផ្ដល់ឱកាស។ លោកបន្ថែមទៀតថា ចំពោះអ្នកដែលខ្ចិលលើការហ្វឹកហាត់ និងមិនសូវមានការតស៊ូកុំចាប់អាជីពនេះនាំឲ្យខាតពេលវេលា។

រូបភាពលើហ្វេសបុក ក្របីព្រៃ

បញ្ជាក់ដែរថា ក្លឹបពេជ្រសុផាន់គុនខ្មែរគឺដឹកនាំដោយលោក ពេជ្រ សុផាន់ ផ្ទាល់តែម្ដង។ ក្លឹបប្រដាល់នេះមានភាពល្បីល្បាញជាខ្លាំងក្នុងវិស័យមួយនេះដោយមានកីឡាករដែលជាជើងខ្លាំងច្រើន និងសំបូរកីឡាករដែលប្រកួតជក់ចិត្តសម្រាប់អ្នកគាំទ្រ។ ក្លឹបនេះផងដែរគឺមានច្បាប់តឹងរឹងណាស់មិនបណ្ដោយឲ្យសិស្សឈប់គ្មានច្បាប់ទម្លាប់ ដើរលេងផ្ដេសផ្ដាស ឬផឹកគ្រឿងស្រវឹងនោះឡើយ។ សិស្សៗដែលមិនមានការអំណត់តស៊ូហ្វឹកហាត់គឺនៅមិនអាចនៅបានយូរជាមួយក្លឹបទេ។ មានសិស្សរាប់រយនាក់ហើយដែលបានចាក់ចេញពីក្លឹបប្រដាល់នេះទៅវិញក្រោយមិនអាចតស៊ូនៅបាន។ ក្លឹបនេះបណ្ដុះបានជើងខ្លាំងដូចជា ពេជ្រ សម្បត្តិ ពេជ្រ ប៊ុនសិទ្ធ ពេជ្រ សឹង្ហៈ ពេជ្រ អាទិទេព និងអ្នកជំនាន់ក្រោយជាច្រើនទៀត៕

រូបភាពលើហ្វេសបុក ក្របីព្រៃ

អត្ថបទដោយ៖ នួន ស៊ីណា

The post ក្លឹបលោកពេជ្រ សុផាន់ រឿងច្បាប់ទម្លាប់គឺតឹងរឹងណាស់ «កីឡាល្អតែសម្រាប់អ្នកខំទេ» appeared first on Kampuchea Thmey Daily.

ក្លឹបថ្មីលោក ពេជ្រ សុផាន់ ពេលសាងសង់រួចរាល់នឹងបង្ហាត់ផ្ដោតលើ ៣ប្រភេទកីឡា

Sina Noun — Tue, 05 May 2026 03:25:38 +0000

លោក ពេជ្រ សុផាន់ គ្រូប្រដាល់គុនខ្មែរដែលមានភាពជោគជ័យខ្លាំងថាក្លឹបថ្មីរបស់លោកនេះនៅពេលសាងសង់រួចរាល់ហើយនោះនឹងបង្ហាត់លើ ៣ប្រភេទកីឡាគឺប្រដាល់គុនខ្មែរ ប្រដាល់សកល និងប្រដាល់ឃីកបុកស៊ីងនៅពេលខាងមុខនេះ។

លោក ពេជ្រ សុផាន់

ក្លឹបប្រដាល់ពេជ្រសុផាន់គុនខ្មែរដែលនៅទីតាំងថ្មីកំពុងសាងសង់នេះគេមើលឃើញថាមានទីធ្លាធំទូលាយមានកម្ពស់ច្រើនជាន់ និងមានច្រើនបន្ទប់ផងដែរ។ ក្លឹបនេះចាត់ទុកជាក្លឹបលំដាប់ស្ដង់ដាខ្ពស់មួយនៅកម្ពុជាដំបូងគេហើយ ព្រោះនឹងមានកន្លែងហ្វឹកហាត់ធំទូលាយ មានកន្លែងស្នាក់ច្រើនបន្ទប់ មានកន្លែងលក់សម្ភារកីឡា មានហាងកាហ្វេ មានម៉ាត និងមានបន្ទប់ធ្វើការជាដើម។

លោក ពេជ្រ សុផាន់

លោក ពេជ្រ សុផាន់ ថ្លែងក្នុងការឡាយវីដេអូលើហ្វេសបុក (Live) ថានៅពេលទីតាំងក្លឹបថ្មីនេះសាងសង់រួចរាល់ និងបានចូលហ្វឹកហាត់ហើយនោះលោកនឹងបង្ហាត់ប្រដាល់ ២ប្រភេទកីឡាទៀតលើពីប្រដាល់គុនខ្មែរដែលមានស្រាប់។ ដូច្នេះចាប់ពីពេលសាងសង់រួចលោកនឹងបង្ហាត់សិស្សលើជំនាញប្រដាល់សកល និងប្រដាល់ឃីកបុកស៊ីងសម្រាប់សិស្សណាដែលមានទេពកោសល្យ ឬអ្នកដែលចង់ហ្វឹកហាត់ផ្នែកនេះ។

ទិដ្ឋភាពសាងសង់

ការបន្ថែមជំនាញលើ ២ប្រភេទកីឡានេះអាចដោយសារតែលោក ពេជ្រ សុផាន់ មើលឃើញពីការកើនឡើងទីផ្សារប្រកួតទាំងនៅក្នុងស្រុក និងក្រៅប្រទេស។ មួយវិញទៀតផ្នែកឃីកបុកស៊ីង និងប្រដាល់សកលនេះមានការពេញនិយម និងសន្ទុះគាំទ្រច្រើនផងដែរលើឆាកអន្តរជាតិ។ ថ្ងៃអនាគតកីឡាទាំងនេះអាចនឹងមានការគាំទ្រកាន់តែខ្លាំងនៅកម្ពុជាផងដែរ។

រូបភាពគំរូក្លឹបលោក ពេជ្រ សុផាន់

បញ្ជាក់ដែរថា លោក ពេជ្រ សុផាន់ ជាគ្រូប្រដាល់ល្បីឈ្មោះ និងជោគជ័យខ្លាំងនៅកម្ពុជានាពេលបច្ចុប្បន្ននេះ។ សិស្សគុនរបស់លោកមានទីផ្សារប្រកួតច្រើននៅតាមកម្មវិធីធំៗរបស់ស្ថានីយទូរទស្សន៍ក្នុងស្រុក និងបានចេញផ្សព្វផ្សាយគុនខ្មែរនៅលើឆាកអន្តរជាតិក៏ច្រើនដងដែរ។ កន្លងទៅនេះក្លឹបរបស់លោកគឺបង្ហាត់ផ្ដោតតែប្រដាល់គុនខ្មែរប៉ុណ្ណោះ។ ក្លឹបប្រដាល់ពេជ្រសុផាន់គុនខ្មែរដែលនៅទីតាំងចាស់ក្រោយពន្ធនាគារព្រៃសនោះនឹងត្រូវផ្លាស់ប្ដូរទៅថ្មីដែលកំពុងសាងសង់ជិតរួចរាល់នឹងបានចូលហ្វឹកហាត់នៅពេលឆាប់ៗខាងមុខ។ ទីតាំងថ្មីនេះនៅមិនឆ្ងាយប៉ុន្មានទេពីក្លឹបចាស់របស់លោកឡើយ៕

អត្ថបទដោយ៖ នួន ស៊ីណា

The post ក្លឹបថ្មីលោក ពេជ្រ សុផាន់ ពេលសាងសង់រួចរាល់នឹងបង្ហាត់ផ្ដោតលើ ៣ប្រភេទកីឡា appeared first on Kampuchea Thmey Daily.

លោក ពេជ្រ សុផាន់ បញ្ជាក់ហើយថាក្លឹបលោកជាក្លឹបអាជីពទោះទៅប្រកួតជំនួសគេក៏នៅតែល្អដែរ

Sina Noun — Fri, 27 Mar 2026 02:01:38 +0000

លោក ពេជ្រ សុផាន់ ដែលជាគ្រូបង្វឹកឆ្នើមក្នុងវិស័យប្រដាល់ថា ក្លឹបរបស់លោកគឺជាក្លឹបប្រដាល់អាជីពបើទោះជាមិនមានឈ្មោះប្រកួតក៏ដោយគឺនៅតែហ្វឹកហាត់ជាប្រចាំធម្មតា ដូច្នេះហើយបើទោះជាឡើងប្រកួតជំនួសគេក៏សមត្ថភាពសិស្សនៅតែល្អដដែល។

អាទិទេព ប៉ះ សាក់ស៊ីន

នេះបើតាមការបង្ហោះនៅលើបណ្ដាញសង្គមលោក ពេជ្រ សុផាន់ បានលើកឡើងថា លោកតែងតែចាត់ទុកសិស្សក្នុងក្លឹបប្រដាល់ពេជ្រសុផាន់គុនខ្មែរជាកីឡាករអាជីព ដូច្នេះរាល់ការហ្វឹកហាត់ ការហូបចុក ការសម្រាក គឺធ្វើឡើងដើម្បីបានប្រាក់ចំណូល។ បើទោះជាពុំមានឈ្មោះឡើងប្រកួតយ៉ាងណាក្ដីក៏ត្រូវរស់នៅក្នុងជំរុំហ្វឹកហាត់ជាប្រចាំផងដែរ។

គ្រូឆ្នើមរូបនេះបន្ថែមទៀតថា ជាក់ស្ដែងដូចការប្រកួតរបស់ ពេជ្រ អាទិទេព និង ធន់ សាកស៊ីន អីចឹងដែរ បើទោះជាមកជំនួសកីឡាករដទៃក៏ដោយ ប៉ុន្តែសង្កេតឃើញថាមានកម្លាំងស៊ូហ្វ រាងកាយមាំមួនល្អ ទាំងនេះបានមកពីការហ្វឹកហាត់ជាប់ជាប្រចាំ។

អាទិទេព ប៉ះ សាក់ស៊ីន

បញ្ជាក់ដែរថា ក្លឹបប្រដាល់លោក ពេជ្រ សុផាន់ ជាក្លឹបធំមួយ និងល្បីឈ្មោះខ្លាំងនៅពេលបច្ចុប្បន្ននេះ។ កីឡាករមានចំនួនច្រើន និងមានទីផ្សារប្រកួតខ្លាំង។ បន្ថែមពីនេះសិស្សគុនភាគច្រើនទទួលបានជ័យជម្នះស្ទើគ្រប់កម្មវិធីប្រកួតផ្សេងៗ។ កីឡាករ ពេជ្រ អាទិទេព បើទោះជាមកជំនួសកីឡាករ ប៉ែនកាក់ យ៉ាស៊ីន យ៉ាងណាក្ដី ប៉ុន្តែរូបបង្ហាញទម្រង់វាយយ៉ាងល្អ និងដណ្ដើមយកជ័យជម្នះបានទៀតផងកាលពីថ្ងៃទី២២ ខែមីនា ឆ្នាំ២០២៦ នៅខេត្តស្វាយរៀង៕

ពេជ្រ អាទិទេព ពេលឈ្នះ សាក់ស៊ីន

អត្ថបទដោយ៖ នួន ស៊ីណា

The post លោក ពេជ្រ សុផាន់ បញ្ជាក់ហើយថាក្លឹបលោកជាក្លឹបអាជីពទោះទៅប្រកួតជំនួសគេក៏នៅតែល្អដែរ appeared first on Kampuchea Thmey Daily.

លោក ពេជ្រ សុផាន់ ផ្ដាំអ្នកចង់យកកូនមកហាត់ប្រដាល់ជាមួយលោកសូមកុំលូកដៃច្រើន

Sina Noun — Thu, 19 Mar 2026 02:02:46 +0000

បន្ទាប់ពីការមានការចាក់ចេញពីក្លឹបជាបន្តបន្ទាប់លោក ពេជ្រ សុផាន់ បានផ្ដាំផ្ញើក្នុងវីដេអូឡាយរបស់លោកថា អ្នកដែលចង់យកកូនមកហ្វឹកហាត់ជាមួយលោកសូមកុំលូកដៃច្រើនពេកដែលនាំឲ្យមានបញ្ហារហូតមិនអាចហ្វឹលកហាត់ជាប់លាប់ជាដើម។

លោក ពេជ្រ សុផាន់

លោក ពេជ្រ សុផាន់ គ្រូបង្វឹកក្លឹបប្រដាល់ពេជ្រសុផាន់គុនខ្មែរ បានលើកឡើងក្នុងការឡាយលើហ្វេសបុកថា បន្ទាប់ពីសិស្សៗមួយចំនួនបានចាក់ចេញពីក្លឹបគឺលោកទទួលបានបទពិសោធថ្មីៗមួយចំនួនពីរឿងទាំងនេះផងដែរ។ លោកចង់ផ្ដាំផ្ញើទៅកាន់អ្នកដែលចង់យកកូនក្មួយមកហ្វឹកហាត់ជាមួយលោកសូមកុំលូកដៃច្រើនដែលការធ្វើបែបនេះបានប៉ះពាល់ដល់ការរស់នៅហ្វឹកហាត់របស់សិស្ស។ ក្នុងន័យនេះលោកចង់បញ្ជាក់ថា ការលូកដៃផ្សេងៗនោះគឺអាចនឹងធ្វើឲ្យកីឡាករបែកអារម្មណ៍ ឬដកចិត្តពីការរស់នៅហ្វឹកហាត់រហូតឈានដល់ការឈប់ពីអាជីពប្រដាល់នេះ។

លោក ពេជ្រ សុផាន់

គ្រូឆ្នើមរូបនេះបន្ថែមទៀតថា លោកពិតជាសោកស្ដាយទឹកចិត្តដែលលោកបានស្រឡាញ់ និងដាក់ចិត្តបង្ហាត់បង្រៀនដោយអស់ពីចិត្ត ប៉ុន្តែការទទួលបានពីសិស្សវិញមិនដូច្នោះនោះឡើយ។ នេះជាបទពិសោធថ្មីសម្រាប់លោក ដូច្នេះរាល់ការទទួលសិស្សចូលមកហ្វឹកហាត់ក្រោយៗនឹងមានការបញ្ជាក់ច្បាស់លាស់ពីអាណាព្យាបាល។

សិស្សលោក ពេជ្រ សុផាន់

បញ្ជាក់ដែរថា ក្លឹបលោក ពេជ្រ សុផាន់ ជាក្លឹបដែលល្បីឈ្មោះ និងមានការគាំទ្រច្រើនក្នុងវិស័យប្រដាល់នាពេលបច្ចុប្បន្ននេះ។ សិស្សគុនរបស់លោកគឺមានទីផ្សារប្រកួតច្រើននៅតាមស្ថានីយទូរទស្សន៍ផ្សេងៗ។ ទន្ទឹមនិងភាពជោគជ័យនេះក្លឹបរបស់លោកក៏មានសិស្សចេញច្រើនផងដែរដោយសារវិន័យតឹងរឹងខ្លាំង និងមានការហ្វឹកហាត់ខ្លាំង។ ថ្មីៗនេះកីឡាករដែលកំពុងមានសាធារណៈជនស្គាល់ និងចាប់អារម្មណ៍ច្រើនគឺ ពេជ្រ ម៉ាយហាត ទើបឈប់ពីក្លឹបដោយសារនឹកផ្ទះមិនអាចបន្តនៅបាន៕

អត្ថបទដោយ៖ នួន ស៊ីណា

The post លោក ពេជ្រ សុផាន់ ផ្ដាំអ្នកចង់យកកូនមកហាត់ប្រដាល់ជាមួយលោកសូមកុំលូកដៃច្រើន appeared first on Kampuchea Thmey Daily.

មិនធម្មតាមែនក្រៅតែបង្ហាត់ប្រដាល់ឲ្យខ្លាំងហើយនោះលោក ពេជ្រ សុផាន់ ក៏បង្រៀនប្រពន្ធកីឡាករឲ្យចេះធ្វើវីដេអូរកលុយថែមទៀតផង

Sina Noun — Wed, 25 Feb 2026 09:19:39 +0000

លោក ពេជ្រ សុផាន់ ឬហៅថាគ្រូឆ្នើមក្នុងវិស័យប្រដាល់នេះគឺពិតជាជោគជ័យ និងប្រកបដោយសមត្ថភាពពិតៗនាពេលបច្ចុប្បន្ននេះ មិនថាការបង្ហាត់សិស្សឲ្យខ្លាំង មានទីផ្សារប្រកួតមិនខ្វះ កីឡាករមានជីវភាពប្រសើរឡើងនោះទេថែមទាំងចេះបង្រៀនប្រពន្ធកីឡាករឲ្យធ្វើវីដេអូទៀតផង។

ពេជ្រ សម្បត្តិ និងភរិយា

អ្នកគាំទ្រមួយចំនួនអាចដឹងត្រឹមលោក ពេជ្រ សុផាន់ ចំណាយពេលបង្ហាត់កូនសិស្ស ពង្រឹងសមត្ថភាព រាងកាយ ស្មារតីកីឡាករ និងទម្រង់ទិសដល់កូនសិស្សតែប៉ុណ្ណោះទេ។ មែនទែនទៅការធ្វើវីដេអូផ្សព្វផ្សាយ ឬប្រម៉ូតខ្លួនឯង កីឡាករ ក្លឹប នេះក៏ជាជំនាញមួយទៀតរបស់លោក ពេជ្រ សុផាន់ ផងដែររហូតអាចទទួលបានប្រាក់ចំណូលពីហ្វេសបុក និងយូធូបទៀត។

លោក ពេជ្រ សុផាន់ និងសិស្ស

ការងារធ្វើវីដេអូជូនម្ចាស់ឧបត្ថម្ភក្លឹបដូចជាខាងឌ្រុដ នាពេលកន្លងមកក៏លោកជាអ្នកទទួលខុសត្រូវ និងរៀបចំផងដែរ។ យ៉ាងណាឥលូវនេះលោកបានបង្ហាត់បង្រៀន និងបានបង្ហាញផ្លូវដល់ប្រពន្ធកីឡាករឲ្យចេះជំនាញនេះផងដែរដូចជា ចេះធ្វើវីដេអូសម្ភាស ធ្វើវីដេអូហ្វឹកហាត់ខ្លីផ្សេងៗ និងអធិប្បាយ (Voice Over) ផងដែររហូតម្នាក់ៗមានចេះស្ទាត់ទៅហើយ។ បច្ចុប្បន្ននេះគេឃើញមានប្រពន្ធកីឡាករ ពេជ្រ សម្បត្តិ ចេះជំនាញនេះស្ទាត់ហើយ ប្រពន្ធ ពេជ្រ ប៊ុន សិទ្ធ និងចុងក្រោយនេះគូដណ្ដឹងរបស់ ពេជ្រ សឹង្ហៈ តែម្ដង។ បន្ថែមពីនេះកីឡាករខ្លួនឯងក៏ចេះថែមទៀតដែរដូចជា អាទិទេព សឹង្ហៈ និងអ្នកមួយចំនួនទៀត។

អេដមីនទាំងបីរបស់កូនសិស្សលោក ពេជ្រ សុផាន់

បញ្ជាក់ដែរថា លោក ពេជ្រ សុផាន់ ជាគ្រូបង្វឹកប្រដាល់ដ៏ឆ្នើមមួយរូបនៅកម្ពុជា និងកំពុងជោគជ័យខ្លាំងលើវិថីកីឡាគុនខ្មែររហូតមានជីវភាពធូធារ និងកំពុងសាងសង់ក្លឹបខ្ទង់រាប់សែនដុល្លារទៀតផង។ បច្ចុប្បន្ននេះព័ត៌មាន ឬវីដេអូផ្សេងៗអំពីកីឡាករ សកម្មភាពផ្សេងៗក្នុងក្លឹបគឺមានជាច្រើនលើបណ្ដាញសង្គមដោយសារតែមានប្រពន្ធកីឡាករបានធ្វើវីដេអូផ្សព្វផ្សាយ និងចែករំលែកបានច្រើនដល់អ្នកគាំទ្រ៕

អត្ថបទដោយ៖ នួន ស៊ីណា

The post មិនធម្មតាមែនក្រៅតែបង្ហាត់ប្រដាល់ឲ្យខ្លាំងហើយនោះលោក ពេជ្រ សុផាន់ ក៏បង្រៀនប្រពន្ធកីឡាករឲ្យចេះធ្វើវីដេអូរកលុយថែមទៀតផង appeared first on Kampuchea Thmey Daily.

មូលហេតុអ្វីឲ្យប្រាកដកីឡាករមួយចំនួនមកថ្លឹងទម្ងន់តែងតែលើសដៃគូ ឬមិនបានធ្វើតាមខាងកម្មវិធីប្រាប់

Sina Noun — Fri, 20 Feb 2026 06:46:32 +0000

ការថ្លឹងទម្ងន់មុនឡើងប្រកួតគឺនៅតែជាបញ្ហាប្រឈមចំពោះកីឡាករ និងម្ចាស់កម្មវិធីផ្សេងៗតាំងពីមុនរហូតមកដល់ពេលបច្ចុប្បន្ននេះ។ កីឡាករមួយចំនួនមិនបានធ្វើទម្ងន់ឲ្យបានត្រឹមត្រូវតាមការកំណត់នោះទេ ពោលពេលឡើងជញ្ជីងថ្លឹងគឺតែងតែលើសរហូតដល់ពេលខ្លះត្រូវបានសម្របសម្រួលដើម្បីបានប្រកួតក៏មានដែរ។

លោក ពេជ្រ សុផាន់

លោក ពេជ្រ សុផាន់ បានបង្ហាញការយល់ឃើញរបស់ខ្លួនថា បញ្ហាលើសទម្ងន់ក្នុងពេលថ្លឹងរបស់កីឡាករមួយចំនួននោះគឺមកពីការគ្មានវិន័យរបស់សាមីកីឡាករខ្លួនឯង។ នេះបញ្ជាក់ពីកីឡាកររូបនោះដែលគ្មានវិន័យលើការគ្រប់គ្រងទម្ងន់ខ្លួនឯង គ្មានវិន័យលើការហ្វឹកហាត់ច្បាស់លាស់។ ប្រសិនបើកីឡាករដែលច្បាស់លាស់គឺរូបគេតែងតែគ្រប់គ្រងលើទម្ងន់ខ្លួនឯងបាន និងមិនជួបបញ្ហាមួយនេះឡើយ។

រូបភាពតំណាង (កីឡាករ ពេជ្រ សម្បត្តិ)

គ្រូបង្វឹករូបនេះបន្ថែមទៀតថា យូរៗលើសម្ដងមិនជាថ្វីនោះទេ ប៉ុន្តែកីឡាករមួយចំនួនគឺតែងតែលើសរហូតក្លាយជាទម្លាប់ក៏មានដែរ។ បញ្ហាទម្ងន់នេះគឺមានយូរមកហើយ និងនៅតែបន្តរហូតដល់បច្ចុប្បន្ននេះដែលអូសបន្លាយមិនទាន់មានវិធានការច្បាស់លាស់។ យ៉ាងណានៅតាមស្ថានីយមួយចំនួនគឺបានធ្វើច្បាស់លាស់ផងដែរលើរឿងទម្ងន់នេះមិនអនុញ្ញាតឲ្យមានករណីបែបនេះនោះឡើយ។ ចំពោះកីឡាករបរទេសវិញការលើសទម្ងន់នេះលោកចាត់ទុកជាប្រភេទកីឡាករវាយយកតែលុយប៉ុណ្ណោះ ព្រោះអ្នកដែលអាជីពពិតប្រាកដគឺគេតែងតែគ្រប់គ្រងគីឡូខ្លួនឯងបាន។ មានតែប្រភេទអ្នកដែលមកវាយៗយកតែតម្លៃខ្លួនប៉ុណ្ណោះដែលមកលើសៗបែបនេះ។

លោក សាន់ សៅយ៉ាន់

ចំណែកលោក សាន់ សៅយ៉ាន់ វិញក៏បានឡើងចំពោះបញ្ហានេះដែរថា ទី១ ក្លឹបមិនបានដាក់វិន័យតឹងរឹង ឬតាមដានកីឡាករខ្លួនឯងឲ្យបានច្បាស់លាស់ ដូច្នេះសាមីកីឡាករធ្វើទៅតាមការគិត ឬចិត្តរបស់ខ្លួនឯងរហូតលើសទម្ងន់បែបនេះ។ ទី២ ច្បាប់នៅកម្ពុជាមិនសូវតឹងរឹងអំពីចំណុចនេះ ដូចជាមិនសូវដាក់បន្ទុកឲ្យដាច់ខាតចំពោះក្លឹប ឬកីឡាករដែលធ្វើទម្ងន់មិនបានតាមការកំណត់ដែលត្រូវប្រកួត។ ច្បាប់មិនសូវតឹងរឹងចំពោះក្លឹប និងកីឡាករឲ្យទទួលខុសត្រូវខានតែបានដោយត្រូវសងពិន័យជាថវិកាជាដើមចំពោះការធ្វើទម្ងន់មិនបាន។ ទី៣ ដោយសារនៅខ្មែរមានកីឡាករតិចកម្មវិធីប្រកួតច្រើន ដូច្នេះហើយនៅពេលលើសទម្ងន់បន្តិចបន្តួចតែងតែសម្របសម្រួលជួយកីឡាករដើម្បីកុំឲ្យខូចកម្មវិធីរបស់គេ ឬមានការផ្លាស់ប្ដូរផ្សេងនាំឲ្យប៉ះពាល់ដល់ Sponsor។ ចំណុចតែងតែលើកលែងសម្របសម្រួលនេះហើយក៏បានធ្វើឲ្យកីឡាករមួយចំនួនក្លាយជាទម្លាប់ខូចផងដែរ៕

រូបភាពតំណាង (ហ្វេសបុកផេក Krud)

អត្ថបទដោយ៖ នួន ស៊ីណា

The post មូលហេតុអ្វីឲ្យប្រាកដកីឡាករមួយចំនួនមកថ្លឹងទម្ងន់តែងតែលើសដៃគូ ឬមិនបានធ្វើតាមខាងកម្មវិធីប្រាប់ appeared first on Kampuchea Thmey Daily.

ពេជ្រ សុផាន់ Archives - Kampuchea Thmey Daily

លោក​ ពេជ្រ​ សុផាន់​ មាន​ជំនឿ​ចិត្ត​ខ្ពស់​ថា​ក្រុម​របស់​លោក​នឹង​បាន​ឡាន​ចូល​ក្នុង​ក្លឹប​សប្ដាហ៍​នេះ

ក្លឹប​លោក​ពេជ្រ សុផាន់​ រឿង​ច្បាប់​ទម្លាប់​គឺ​តឹងរឹង​ណាស់ «កីឡា​ល្អ​តែ​សម្រាប់​អ្នក​ខំ​ទេ»​

ក្លឹប​ថ្មី​លោក ​ពេជ្រ​ សុផាន់​ ពេល​សាងសង់​រួចរាល់​នឹង​បង្ហាត់​ផ្ដោត​លើ​ ៣ប្រភេទ​កីឡា​

លោក​ ពេជ្រ​ សុផាន់​ បញ្ជាក់​ហើយ​ថា​ក្លឹប​លោក​ជា​ក្លឹប​អាជីព​ទោះ​ទៅ​ប្រកួត​ជំនួស​គេ​ក៏​នៅ​តែ​ល្អ​ដែរ

លោក​ ពេជ្រ​ សុផាន់​ ផ្ដាំ​អ្នក​ចង់​យក​កូន​មក​ហាត់​ប្រដាល់​ជា​មួយ​លោក​សូម​កុំ​លូក​ដៃ​ច្រើន​

លោក ពេជ្រ សុផាន់ មានជំនឿចិត្តខ្ពស់ថាក្រុមរបស់លោកនឹងបានឡានចូលក្នុងក្លឹបសប្ដាហ៍នេះ

ក្លឹបលោកពេជ្រ សុផាន់ រឿងច្បាប់ទម្លាប់គឺតឹងរឹងណាស់ «កីឡាល្អតែសម្រាប់អ្នកខំទេ»

ក្លឹបថ្មីលោក ពេជ្រ សុផាន់ ពេលសាងសង់រួចរាល់នឹងបង្ហាត់ផ្ដោតលើ ៣ប្រភេទកីឡា

លោក ពេជ្រ សុផាន់ បញ្ជាក់ហើយថាក្លឹបលោកជាក្លឹបអាជីពទោះទៅប្រកួតជំនួសគេក៏នៅតែល្អដែរ

លោក ពេជ្រ សុផាន់ ផ្ដាំអ្នកចង់យកកូនមកហាត់ប្រដាល់ជាមួយលោកសូមកុំលូកដៃច្រើន