ពេជ្រ អាទិទេព Archives - Kampuchea Thmey Daily

លោក ពេជ្រ សុផាន់ និយាយក្នុងថ្ងៃឡើងផ្ទះ ពេជ្រ អាទិទេព «នេះហើយសមិទ្ធិផលស្ដាប់ដំបូន្មានគ្រូ»

Sina Noun — Sun, 19 Apr 2026 08:02:38 +0000

លោក ពេជ្រ សុផាន់ ថ្លែងនៅថ្ងៃឡើងផ្ទះថ្មីរបស់ ពេជ្រ អាទិទេព ដែលទើបសាងសង់រួចអស់តម្លៃប្រហែលខ្ទង់ ៤-៥ម៉ឺនដុល្លារថា «នេះហើយជាសមិទ្ធផលស្ដាប់ដំបូន្មានគ្រូ» ខំប្រឹងប្រែងពិតប្រាកដគឺទទួលបានផលពិតដូចបានឃើញនេះហើយ។

រូបភាពផេកលោក ពេជ្រ សុផាន់

លោក ពេជ្រ សុផាន់ ថាក្នុងនាមជាគ្រូបង្វឹកគ្មានអ្វីដែលសប្បាយចិត្តជាងឃើញសិស្សរបស់ខ្លួនទទួលបានសមិទ្ធិផលបន្តបន្ទាប់ និងជោគជ័យលើវិថីនេះនោះទេ។ សមិទ្ធិផលទាំងនេះហើយនៃលទ្ធផលស្ដាប់ដំបូន្មានគ្រូពន្យល់ណែនាំកន្លងមក។

សមិទ្ធផលផ្សេងៗរបស់ ពេជ្រ អាទិទេព នេះកើតឡើងត្រឹមរយៈពេល ៣ឆ្នាំ ៣ខែ តែប៉ុណ្ណោះគឺទទួលបានជោគជ័យច្រើនរហូតមានថវិកាអាចធ្វើផ្ទះខ្ទង់ ៤-៥ម៉ឺនដុល្លារទៅហើយ។ រូបលោកផ្ទាល់តែងតែពន្យល់ណែនាំសិស្សៗគ្រប់គ្នាឲ្យខំប្រឹងប្រែងហ្វឹកហាត់ពិតប្រាកដនោះនឹងទទួលបានផលពិតប្រាកដដូចគ្នា។

រូបភាពផេកលោក ពេជ្រ សុផាន់

បញ្ជាក់ដែរថា កីឡាករ ពេជ្រ អាទិទេព កាលពីថ្ងៃទី១៨ ខែមេសា ឆ្នាំ២០២៦ នេះរូបគេទើបតែឡើងផ្ទះថ្មីដែលសាងសង់រួចក្នុងតម្លៃប្រហែល ៤-៥ម៉ឺនដុល្លារនៅឯខេត្តកំពង់ធំ។ រូបគេទើបតែចូលប្រឡូកគុនខ្មែរបាន ៣ឆ្នាំ ៣ខែ ប៉ុណ្ណោះជាមួយលោក ពេជ្រ សុផាន់។ បច្ចុប្បន្ន ពេជ្រ អាទិទេព ជាកីឡាករលំដាប់ជួរមុខមួយរូបលើប្រភេទទម្ងន់ ៥៧គីឡូក្រាមនៅកម្ពុជា។ រូបគេចាត់ទុកជាកីឡាករជោគជ័យមួយរូបដែលក្រសោបបានប្រាក់រង្វាន់ធំៗជាច្រើននាពេលកន្លងមក៕

រូបភាពផេកលោក ពេជ្រ សុផាន់

អត្ថបទដោយ៖ នួន ស៊ីណា

The post លោក ពេជ្រ សុផាន់ និយាយក្នុងថ្ងៃឡើងផ្ទះ ពេជ្រ អាទិទេព «នេះហើយសមិទ្ធិផលស្ដាប់ដំបូន្មានគ្រូ» appeared first on Kampuchea Thmey Daily.

លោក ពេជ្រ សុផាន់ បញ្ជាក់ហើយថាក្លឹបលោកជាក្លឹបអាជីពទោះទៅប្រកួតជំនួសគេក៏នៅតែល្អដែរ

Sina Noun — Fri, 27 Mar 2026 02:01:38 +0000

លោក ពេជ្រ សុផាន់ ដែលជាគ្រូបង្វឹកឆ្នើមក្នុងវិស័យប្រដាល់ថា ក្លឹបរបស់លោកគឺជាក្លឹបប្រដាល់អាជីពបើទោះជាមិនមានឈ្មោះប្រកួតក៏ដោយគឺនៅតែហ្វឹកហាត់ជាប្រចាំធម្មតា ដូច្នេះហើយបើទោះជាឡើងប្រកួតជំនួសគេក៏សមត្ថភាពសិស្សនៅតែល្អដដែល។

អាទិទេព ប៉ះ សាក់ស៊ីន

នេះបើតាមការបង្ហោះនៅលើបណ្ដាញសង្គមលោក ពេជ្រ សុផាន់ បានលើកឡើងថា លោកតែងតែចាត់ទុកសិស្សក្នុងក្លឹបប្រដាល់ពេជ្រសុផាន់គុនខ្មែរជាកីឡាករអាជីព ដូច្នេះរាល់ការហ្វឹកហាត់ ការហូបចុក ការសម្រាក គឺធ្វើឡើងដើម្បីបានប្រាក់ចំណូល។ បើទោះជាពុំមានឈ្មោះឡើងប្រកួតយ៉ាងណាក្ដីក៏ត្រូវរស់នៅក្នុងជំរុំហ្វឹកហាត់ជាប្រចាំផងដែរ។

គ្រូឆ្នើមរូបនេះបន្ថែមទៀតថា ជាក់ស្ដែងដូចការប្រកួតរបស់ ពេជ្រ អាទិទេព និង ធន់ សាកស៊ីន អីចឹងដែរ បើទោះជាមកជំនួសកីឡាករដទៃក៏ដោយ ប៉ុន្តែសង្កេតឃើញថាមានកម្លាំងស៊ូហ្វ រាងកាយមាំមួនល្អ ទាំងនេះបានមកពីការហ្វឹកហាត់ជាប់ជាប្រចាំ។

អាទិទេព ប៉ះ សាក់ស៊ីន

បញ្ជាក់ដែរថា ក្លឹបប្រដាល់លោក ពេជ្រ សុផាន់ ជាក្លឹបធំមួយ និងល្បីឈ្មោះខ្លាំងនៅពេលបច្ចុប្បន្ននេះ។ កីឡាករមានចំនួនច្រើន និងមានទីផ្សារប្រកួតខ្លាំង។ បន្ថែមពីនេះសិស្សគុនភាគច្រើនទទួលបានជ័យជម្នះស្ទើគ្រប់កម្មវិធីប្រកួតផ្សេងៗ។ កីឡាករ ពេជ្រ អាទិទេព បើទោះជាមកជំនួសកីឡាករ ប៉ែនកាក់ យ៉ាស៊ីន យ៉ាងណាក្ដី ប៉ុន្តែរូបបង្ហាញទម្រង់វាយយ៉ាងល្អ និងដណ្ដើមយកជ័យជម្នះបានទៀតផងកាលពីថ្ងៃទី២២ ខែមីនា ឆ្នាំ២០២៦ នៅខេត្តស្វាយរៀង៕

ពេជ្រ អាទិទេព ពេលឈ្នះ សាក់ស៊ីន

អត្ថបទដោយ៖ នួន ស៊ីណា

The post លោក ពេជ្រ សុផាន់ បញ្ជាក់ហើយថាក្លឹបលោកជាក្លឹបអាជីពទោះទៅប្រកួតជំនួសគេក៏នៅតែល្អដែរ appeared first on Kampuchea Thmey Daily.

ជាគំរូល្អ ពេជ្រ អាទិទេព យកថវិកា ៤០ម៉ឺនរៀលទៅឧបត្ថម្ភ ប៉ែន កាក់យ៉ាស៊ីន ដល់ក្លឹបបន្ទាប់ពីប្រកួតចប់

Sina Noun — Tue, 24 Mar 2026 02:05:02 +0000

នេះជាគំរូល្អមួយរបស់កីឡាករ ពេជ្រ អាទិទេព បន្ទាប់ពីប្រកួតចប់បានយកតម្លៃខ្លួនចំនួន ៤០ម៉ឺនរៀលឧបត្ថម្ភដល់កីឡាករ ប៉ែនកាក់ យ៉ាស៊ីន ក្រោយរបួសដោយសារម៉ូតូបុកអំឡុងពេលរត់សម្រក់ទម្ងន់កន្លងទៅដែលនេះជាអំពើល្អចេះជួយគ្នាទៅវិញទៅមក។

កីឡាករ យ៉ាស៊ីន

ថ្មីៗនេះគេឃើញកីឡាករ ពេជ្រ អាទិទេព បានទៅដល់ក្លឹបប្រដាល់របស់លោក សេន ប៊ុនថេន តែម្ដងដើម្បីយកថវិកាចំនួន ៤០ម៉ឺនរៀលឧបត្ថម្ភទៅកាន់កីឡាករ ប៉ែនកាក់ យ៉ាស៊ីន ជាការលើកទឹកចិត្តផង និងជាការជួយសម្រួលដល់ការព្យាបាលផង។ ទង្វើនេះផងដែរគឺជាគំរូល្អប្រាប់ទៅដល់កីឡាករគុនខ្មែរដទៃទៀតឲ្យចេះជួយគ្នាទៅវិញទៅមកនៅពេលអ្នកក្នុងមជ្ឈដ្ឋានជាមួយគ្នានេះជួបបញ្ហាផ្សេងៗដូចនេះជាដើម។

ជាមួយគ្នានោះដែរលោក សេន ប៊ុនថេន ដែលជាគ្រូរបស់ យ៉ាស៊ីន បានបង្ហោះអរគុណចំពោះកីឡាករ ពេជ្រ អាទិទេព ជាខ្លាំងដែលបានចូលខ្លួនប្រកួតជំនួសសិស្សរបស់លោកដែលជួបគ្រោះថ្នាក់ចរាចរណ៍ និងថែមទាំងឧបត្ថម្ភថវិកាទៅទៀត។

កីឡាករ ពេជ្រ អាទិទេព

បញ្ជាក់ដែរថា កាលពីថ្ងៃទី១៩ ខែមីនា ឆ្នាំ២០២៦ នេះកីឡាករ ប៉ែនកាក់ យ៉ាស៊ីន បានជួបគ្រោះថ្នាក់ចរាចរណ៍ដោយត្រូវម៉ូតូបុកអំឡុងរូបគេរត់សម្រកទម្ងន់។ ជាមួយគ្នានោះដែរដោយសារតែរូបគេមិនអាចឡើងប្រកួតបាន ដូច្នេះកីឡាករ ពេជ្រ អាទិទេព ក៏មកជំនួសដើម្បីដណ្ដើមពានជាមួយកីឡាករ ធន់ សាក់ស៊ីន កាលពីថ្ងៃទី២២ ខែមីនា ឆ្នាំ២០២៦ នេះលើសង្វៀនទទក៕

អត្ដបទដោយ៖ នួន ស៊ីណា

The post ជាគំរូល្អ ពេជ្រ អាទិទេព យកថវិកា ៤០ម៉ឺនរៀលទៅឧបត្ថម្ភ ប៉ែន កាក់យ៉ាស៊ីន ដល់ក្លឹបបន្ទាប់ពីប្រកួតចប់ appeared first on Kampuchea Thmey Daily.

ពេជ្រ អាទិទេព លើកឡើងពីសមត្ថភាព ធន់ ម៉េងហុង នៅខ្ចីជាង ពេជ្រ សម្បត្តិ ឆ្ងាយបើប៉ះគ្នានោះ

Sina Noun — Mon, 16 Feb 2026 08:15:13 +0000

កីឡាករ ពេជ្រ អាទិទេព ដែលជាជើងខ្លាំងមួយរូបក្នុងវិស័យគុនខ្មែរ និយាយអំពីរឿង ធន់ ម៉េហុង និង ពេជ្រ សម្បត្តិ សមត្ថភាពខុសគ្នា បទពិសោធ បច្ចេកទេសគឺនៅខុសគ្នាឆ្ងាយដូចអ្នកគាំទ្រដឹងហើយពីចំណុចខ្លាំងរបស់សិស្សច្បងខ្លួនកន្លងមក។

អាទិទេព និង សម្បត្តិ

ថ្លែងក្នុងវីដេអូមួយកីឡាករ ពេជ្រ អាទិទេព បានលើកឡើងថា បើប៉ះគ្នាមែនខ្លួននៅតែយកសិស្សច្បង ពេជ្រ សម្បត្តិ ព្រោះជឿជាក់លើសមត្ថភាព។ សិស្សច្បងរបស់ខ្លួន ពេជ្រ សម្បត្តិ គឺចូលហ្វឹកហាត់គុនខ្មែរយូរជាង ធន់ ម៉េងហុង ស្របពេលមានបទពិសោធប្រកួតច្រើន និងមានបច្ចេកទេសល្អជាង។ ចំណែកភាពធន រឹងមាំ និងទម្ងន់ដៃគឺដូចអ្នកគាំទ្របានដឹងហើយក្នុងការប្រកួតកន្លងម។

កីឡាករ ពេជ្រ សម្បត្តិ

ធន់ ម៉េងហុង ជាកីឡាករល្អ និងទើបឡើងសមត្ថភាពមួយរូប ប៉ុន្តែបើប្រៀបធៀបជាមួយសិស្សច្បងរបស់ខ្លួនគឺនៅខុសគ្នាឆ្ងាយ។ ពីរនាក់នេះបើប៉ះគ្នាគឺប៉ះបាន ប៉ុន្តែលទ្ធផលដូចអ្នកគាំទ្របានដឹងទុកជាមុនហើយរវាង ពេជ្រ សម្បត្តិ និង ធន់ ម៉េងហុង។

ពេជ្រ សម្បត្តិ និង ធន់ ម៉េងហុង

បញ្ជាក់ដែរថា បន្ទាប់ពីកីឡាករ ធន់ ម៉េងហុង កូនសិស្សលោក ធន់ សុភា មួយរយៈពេលនេះមានសមត្ថភាពល្អ និងកំពុងឡើងកូដផងនោះអ្នកគាំទ្រមួយចំនួនចង់ឲ្យរូបគេប៉ះជាមួយកីឡាករ ពេជ្រ សម្បត្តិ។ ការចង់ឲ្យប៉ះគ្នានេះដោយមើលឃើញពីភាពធន និងមានជំនាញល្អខាងវាយបែបហ្គង់ចេញម្រាមកន្លងមក។ មិនទាន់ឃើញមានការប្រកាសជាផ្លូវការនៅឡើយទេពីអ្នករៀបចំកម្មវិធីប្រកួតនានានៅកម្ពុជាដែលនឹងរៀបចំឲ្យអ្នកពីរនាក់នេះប៉ះគ្នានោះ៕

អត្ថបទដោយ៖ នួន ស៊ីណា

The post ពេជ្រ អាទិទេព លើកឡើងពីសមត្ថភាព ធន់ ម៉េងហុង នៅខ្ចីជាង ពេជ្រ សម្បត្តិ ឆ្ងាយបើប៉ះគ្នានោះ appeared first on Kampuchea Thmey Daily.

អ្នកប្រដាល់កំពុងល្បី យ៉ាស៊ីន ស្គាល់កីឡាករ ពេជ្រ អាទិទេព និងអាចប្រកួតបានឲ្យតែគ្រូអនុញ្ញាត

Sina Noun — Thu, 22 Jan 2026 07:26:40 +0000

ក្រោយពីផ្ទុះរឿងផ្គូរផ្គង់ និងកំពុងល្បីលើបណ្ដាញសង្គមហ្វេសបុកប៉ុន្មានថ្ងៃមកនេះ ឥឡូវកីឡាករ ប៉ែនកាក់ យ៉ាស៊ីន បង្ហើបមកហើយគឺខ្លួនស្គាល់កីឡាករ ពេជ្រ អាទិទេព និងអាចប្រកួតគ្នាបានប្រសិនបើគ្រូបង្វឹករបស់ខ្លួនអនុញ្ញាតប៉ះគ្នាមែននោះ។

កីឡាករ ប៉ែនកាក់ យ៉ាស៊ីន

ថ្លែងក្នុងវីដេអូរបស់ភរិយាលោក សេន ប៊ុនថេន កីឡាករ ប៉ែនកាក់ យ៉ាស៊ីន បានបញ្ជាក់ថាខ្លួនពិតជាស្គាល់ជើងខ្លាំង ពេជ្រ អាទិទេព និងអត់ខ្លាចទេអាចប្រកួតបានប្រសិនបើគ្រូរបស់ខ្លួនអនុញ្ញាតឲ្យគ្នាមែននោះ។ វីដេអូដែលលោក អេ ភូថង និយាយថាចង់ឲ្យគូទាំងពីរនេះប៉ះគ្នានោះគឺបានធ្វើឲ្យផ្ទុះខ្លាំង និងបណ្ដុះចិត្តអ្នកតាមដានប្រដាល់ចង់ឲ្យគូនេះប៉ះគ្នាផងដែរ។

លោក អេ ភូថង ថាពិតជាចង់ឲ្យ យ៉ាស៊ីន ប៉ះ ពេជ្រ អាទិទេព ណាស់រហូតនឹងផ្ដល់ថវិកាឧបបត្ថម្ភម្នាក់ៗ ១០ម៉ឺនរៀលទៀតផងប្រសិនបើគូនេះត្រូវរ៉ូវគ្នាមែន។ លោកបន្តថា សេន ប៊ុនថេន កុំនៅដើរស៊ីទម្ងន់ ៥៤គីឡូក្រាមនេះយូរពេកទុកឲ្យកីឡាករផ្សេងៗផង។ ការឡើងមកប៉ះ ពេជ្រ អាទិទេព នេះគឺគូល្អសិក្តិសមបំផុត និងលោកចង់មើលការប៉ះគ្នានេះណាស់។

កីឡាករ ពេជ្រ អាទិទេព

បន្ទាប់ពីមានការសួរពីលោក ពេជ្រ សុផាន់ គ្រូរបស់ ពេជ្រ អាទិទេព ទៅលើលោក សេន ប៊ុនថេន រួចហើយក៏មានការឆ្លើយតបរបស់ យ៉ាស៊ីន បណ្ដើរៗមកហើយតើគូនេះអាចនឹងមានវាសនាប៉ះគ្នា ឬទេនៅថ្ងៃខាងមុខនេះ។ ដូច្នេះមានតែរង់ចាំមើលបន្តទៀតតើខាងស្ថានីយ ឬកម្មវិធីប្រដាល់មួយណានឹងចាប់គូនេះឲ្យប៉ះគ្នាបានរវាងជើងខ្លាំងទាំងពីរខាងលើ។ យ៉ាស៊ីន ជាជើងខ្លាំងប្រចាំទម្ងន់ ៥៤កីឡូក្រាមរូបគេយកឈ្នះកីឡាករច្រើននាក់មកហើយ និងទើបឈ្នះ ប៊ុន សុធា បានខ្សែក្រវាត់ ១គ្រឿងអមដោយទឹកប្រាក់ ៤០លានរៀលទៀតផង។ ចំណែក ពេជ្រ អាទិទេព ជាកីឡាករទើបឡើងកូដខ្លាំង និងកំពុងក្រសោបប្រាក់រង្វាន់ច្រើនលើប្រភេទទម្ងន់ ៥៧គីឡូក្រាមកន្លងទៅនេះ និងធ្លាប់ឈ្នះជើងខ្លាំងដូចជា វ៉ាន់ វឿន ធន់ ផានិត ទៀតផង៕

អត្ថបទដោយ៖ នួន ស៊ីណា

The post អ្នកប្រដាល់កំពុងល្បី យ៉ាស៊ីន ស្គាល់កីឡាករ ពេជ្រ អាទិទេព និងអាចប្រកួតបានឲ្យតែគ្រូអនុញ្ញាត appeared first on Kampuchea Thmey Daily.

រយៈពេលត្រឹម ៣ឆ្នាំកីឡាករ ពេជ្រ អាទិទេព មានសមិទ្ធផលអស្ចារ្យខ្សែក្រវាត់ ៤គ្រឿង និងពាន

Sina Noun — Fri, 12 Dec 2025 07:25:09 +0000

កូនសិស្សគ្រូឆ្នើមគឺកីឡាករ ពេជ្រ អាទិទេព ពិតជាសាងកេរ្តិ៍ឈ្មោះបានលឿនដូចរៀមច្បងក្នុងក្លឹបមែន និងទទួលបានខ្សែក្រវាត់រហូតដល់ទៅ ៤គ្រឿង ពានរង្វាន់២ ទៀតផងត្រឹមរយៈពេលប្រហែល ៣ឆ្នាំមកនេះលើវិថីប្រដាល់គុនខ្មែរ។

ពេជ្រ អាទិទេព និងគ្រូ

កីឡាករដើមកំណើតពីខេត្តកំពង់ធំរូបនេះនៅ ២ប្រកួតចុងក្រោយធ្វើឲ្យកេរ្ត៍ឈ្មោះរបស់គេកាន់តែល្បីខ្លាំងដោយផ្ដួលឲ្យ វ៉ាន់ វឿន សន្លប់ក្នុងទឹកទី១ និងជាការឈ្នះលើកទី២ ផងដែរ។ ចំណែក ១ប្រកួតទៀតគឺការយកឈ្នះរៀមច្បង ធន់ ផានិត ដណ្ដើមបានពានរង្វាន់ ១ ក៏បានធ្វើឲ្យរូបគេរឹតតែទទួលការចាប់អារម្មណ៍ពីអ្នកគាំទ្រប្រដាល់។

រយៈពេលប្រហែល ៣ឆ្នាំនេះរូបគេមានសមិទ្ធផលដូចជា៖

ឈ្នះខ្សែក្រវាត់នៅម៉ាឡេស៊ី King Of The Ring ១គ្រឿង

ឈ្នះខ្សែក្រវាត់អ្នកចម្បាំងអូដ្ឋ ១គ្រឿង អមដោយពានរង្វាន់ ១

ឈ្នះខ្សែក្រវាត់ IPCC ១គ្រឿង

ឈ្នះខ្សែក្រវាត់ Dragon ១គ្រឿង

ពានរង្វាន់ម៉ារ៉ាតុង ១

កីឡាករ ពេជ្រ អាទិទេព

តាមរយៈសមិទ្ធផល និងកេរ្តិ៍ឈ្មោះល្បីប្រកួតជាង ៥០ដង ចាញ់តែ ៣ដងនេះធ្វើឲ្យរូបគេឥលូវមានជីវភាពធូធារមានលទ្ធភាពសាងសងផ្ទះថ្ម និងការរស់នៅក្នុងក្រុមគ្រួសារកាន់តែប្រសើរឡើងនាពេលបច្ចុប្បន្ននេះ។ ពេជ្រ អាទិទេព ជាកូនសិស្សដែលបណ្ដុះដោយផ្ទាល់ដៃលោក ពេជ្រ សុផាន់ ហៅគ្រូឆ្នើមដែលកំពុងល្បីឈ្មោះក្នុងវិស័យគុនខ្មែរ៕

អត្ថបទដោយ៖ នួន ស៊ីណា

The post រយៈពេលត្រឹម ៣ឆ្នាំកីឡាករ ពេជ្រ អាទិទេព មានសមិទ្ធផលអស្ចារ្យខ្សែក្រវាត់ ៤គ្រឿង និងពាន appeared first on Kampuchea Thmey Daily.

អ្នកលេងគុនខ្មែរ ធន់ សាក់ស៊ីន អាចទប់ជាប់ទេប៉ះ ពេជ្រ អាទិទេព លក្ខណៈហ្គង់ចេញម្រាម ៥ទឹក

Sina Noun — Mon, 08 Dec 2025 03:49:05 +0000

ក្រោយមានការផ្គូផ្គង់ច្រើនលើបណ្ដាញសង្គមហ្វេសបុករវាង ធន់ សាក់ស៊ីន និង ពេជ្រ អាទិទេព ឥលូវនេះបានជួបគ្នាហើយថ្ងៃទី១៣ ខែធ្នូ ឆ្នាំ២០២៥ នេះលក្ខណៈហ្គង់ចេញម្រាម និងជាការប្រកួតដណ្ដើមពានទៀតផងសម្រាប់មហាជនទស្សនាជំនួបគួរឲ្យចាប់អារម្មណ៍មួយនេះ។

កីឡាករ ធន់ សាក់ស៊ីន

ដូចបានឃើញស្រាប់ហើយនៅប៉ុន្មានប្រកួតចុងក្រោយរបស់ ពេជ្រ អាទិទេព គឺសមត្ថភាពឡើងខ្លាំងរហូតឈ្នះដៃគូដោយផ្ដួលឲ្យសន្លប់ជាប់ៗគ្នាផង និងវាយឲ្យដៃគូទក់ស្ទើរបោះបង់ការប្រកួតសឹងតែរាល់ពេល។ ខ្សែក្រវាត់ ពានរង្វាន់ ប្រាក់រង្វាន់តូច-ធំ មួយរយៈពេលនេះកូនសិស្សគ្រូឆ្នើមរូបនេះប្រមូលសឹងតែគ្រប់កម្មវិធីប្រកួតទៅហើយ។

ធន់ សាក់ស៊ីន លើកឡើងអំពីការប៉ះគ្នាជាមួយ ពេជ្រ អាទិទេព ថារូបគេកំពុងហ្វឹកហាត់ត្រៀមយ៉ាងល្អដើម្បីទប់ទល់ជាមួយសិស្សប្អូនដែលឡើងកូដខ្លាំងរូបនេះ។ សាក់ស៊ីន ទទួលស្គាល់ថា ពេជ្រ អាទិទេព ជាកីឡាករស្រករក្រោយដែលមានសមត្ថភាពឡើងខ្លាំងពិសេសការយកឈ្នះជើងខ្លាំងទម្ងន់ ៥៧គីឡូក្រាមជាបន្តបន្ទាប់រួមទាំង ធន់ ផានិក ដែលជាសិស្សរួមក្លឹបទៀតផង។

កីឡាករ ពេជ្រ អាទិទេព

កូនសិស្សលោក ធន់ សុភា រូបនេះបន្តទៀតថា ខ្លួនពិតជាសប្បាយចិត្តដែលបានប៉ះអ្នកខ្លាំង និងជំនាញផ្នែកហ្គង់ចេញម្រាមដូចនេះ។ លទ្ធផលយ៉ាងណានោះចាំមើលលើសង្វៀនសិន ប៉ុន្តែចំពោះខ្លួនគឺបានត្រៀមរួចរាល់ហើយមិនបណ្ដោយឲ្យដៃគូឈ្នះស្រួលៗនោះទេនៅថ្ងៃទី១៣ ធ្នូ ២០២៥ នេះ។

កីឡាករ ធន់ សាក់ស៊ីន

បញ្ជាក់ដែរថា ការប្រកួតរវាង ធន់ សាក់ស៊ីន និង ពេជ្រ អាទិទេព នឹងធ្វើឡើងនៅថ្ងៃទី១៣ ខែធ្នូ ឆ្នាំ២០២៥ វេលាម៉ោង ៦កន្លះល្ងាចតទៅនៅឯខេត្តកណ្ដាល។ ការប្រកួតនេះលក្ខណៈហ្គង់ចេញម្រាមដណ្ដើមពានរង្វាន់ Dragon របស់សង្វៀនទទក៕

អត្ថបទដោយ៖ នួន ស៊ីណា

The post អ្នកលេងគុនខ្មែរ ធន់ សាក់ស៊ីន អាចទប់ជាប់ទេប៉ះ ពេជ្រ អាទិទេព លក្ខណៈហ្គង់ចេញម្រាម ៥ទឹក appeared first on Kampuchea Thmey Daily.

គូ អេ អាំម៉ារីនភូថង និងគូ ពេជ្រ អាទិទេព កក្រើកដូចគ្នាតែមួយកក្រើកវាយល្អមួយកក្រើករិះគន់

Sina Noun — Mon, 01 Dec 2025 02:18:26 +0000

ការប្រកួតរបស់គូ អេ អាំម៉ារីនភូថង និងគូរបស់ ពេជ្រ អាទិទេ ប៉ះ ធន់ ផានិត គឺកក្រើកដូចគ្នា ប៉ុន្តែមួយកក្រើកវាយល្អមើលជក់ចិត្ត និងមួយទៀតកក្រើកអ្នកគាំទ្ររិះគន់ថាវាយរត់ពេកកាលពីថ្ងៃទី២៨ ខែវិច្ឆិកា ឆ្នាំ២០២៥ នៅឯខេត្តកោះកុង។

ការប្រកួតរបស់ អាំម៉ារីនភូថង

មុនការប្រកួតមកដល់រវាង អេ អាំម៉ារីនភូថង និងកីឡាករ Mo Abdurahman មហាជនចាប់អារម្មណ៍ខ្លាំងគូនេះ ព្រោះជាការប្រកួតសងសឹកគ្នាផង និងដណ្ដើមខ្សែក្រវាត់ផង។ ស្របពេលគូនេះពីមុនធ្លាប់ប្រកួតគ្នាជក់ចិត្តផងដែរដោយកូនប្រុសលោក អេ ភូថង ជាអ្នកចាញ់។ ប៉ុន្តែដល់ការប្រកួតមកដល់កាលពីថ្ងៃទី២៨ វិច្ឆិកា ២០២៥ នេះគឺមិនដូចការរំពឹងទុករបស់មហាជនអ្នកគាំទ្រនោះឡើយ ដោយមើលឃើញថា អេ អាំម៉ារីនភូថង វាយថយពេញ ៥ទឹក និងបានត្រឹមធាក់ៗលើដៃគូប៉ុណ្ណោះ។ ទម្រង់វាយនេះមើលឃើញថា អាំម៉ារីនភូថង មិនហ៊ានសម្រុក ឬប្ដូរនោះឡើយដោយខ្លាចចូលផ្លែរបស់ Mo Abdurahman ត្រូវរាប់ ឬសន្លប់ជាដើម ដូច្នេះការប្រកួតភាគច្រើនត្រឹមធាក់កាត់ និងវាយដៃតិចតួចប៉ុណ្ណោះ។

ក្រោយបញ្ចប់ភ្លាមមហាជនបានរិះគន់ភ្លាមៗលើបណ្ដាញសង្គមតែម្ដង ដោយចៅក្រម ៣រូបបានដាក់ពិន្ទុឲ្យកូនប្រុសលោក អេ ភូថង ខាងលើជាអ្នកឈ្នះទៅវិញ ខណៈផ្នែកអ្នកគាំទ្រមើលឃើញការដើរចូលវាយរបស់បរទេសមានប្រៀបឈ្នះជាង។

ការបង្ហោះរបស់ប្រធានសហព័ន្ធគុនខ្មែរ

មិនត្រឹមតែមហាជនអ្នកគាំទ្ររិះគន់នោះទេ ពោលសូម្បីតែប្រធានសហព័ន្ធប្រដាល់គុនខ្មែរក៏ចេញប្រតិកម្មភ្លាមៗផងដែរចំពោះគូ អេ អាំម៉ារីនភូថង នេះដោយថានឹងសើរើការដាក់ពិន្ទុឡើងវិញបើទោះជាមិនមានភាគីណាដាក់ពាក្យបណ្ដឹងមកសហព័ន្ធក៏ដោយ។

ងាកមកគូរបស់ ពេជ្រ អាទិទេព វិញប្រកួតចប់គឺកក្រើកដូចគ្នា ប៉ុន្តែគូនេះកក្រើកវាយជក់ចិត្ត និងល្អមើល។ ការប្រកួតរវាង ពេជ្រ អាទិទេព និង ធន់ ផានិក ក៏មានការចាប់អារម្មណ៍ច្រើនពីមហាជនផងដែរ ដោយសារតែមួយជាកីឡាករស្រករក្រោយ និងម្នាក់ទៀតជាជើងចាស់។

រូបភាពលើផេកលោក ពេជ្រ សុផាន់

ពេជ្រ អាទិទេព មិនទុកយូរនោះឡើយ ពោលសម្រុកវាយលើ ធន់ ផានិក តាំងតែពីទឹកទី១ ទៅតែម្ដង។ កណ្ដាប់ដៃធ្ងន់ៗចេញជាច្រើនរហូត ផានិត ស្ទើរតែបាត់បង់ស្មារតីម្ដងៗទៅហើយ ប៉ុន្តែភាពធនស្វិតរបស់កូនសិស្សលោក ធន់ សុភា រូបនេះនៅតែតស៊ូបានរហូតបញ្ចប់ការប្រកួតទាំង ៥ទឹកពេញ។ គូនេះពេញចិត្តអ្នកគាំទ្រដោយសារតែវាយអស់ពីសមត្ថភាពវាយដោយមិនខ្លាចចាញ់ ឬមិនខ្លាចសន្លប់ ដូច្នេះបញ្ចប់ការប្រកួតភ្លាមមានការកោតសរសើរជាច្រើនតាមបណ្ដាញសង្គមថាជក់ចិត្ត។ បន្ថែមពីនេះបានសរសើរកីឡាករ ពេជ្រ អាទិទេព ឡើងខ្លាំងមួយរយៈពេលចុងក្រោយនេះ។

រូបភាពលើផេកលោក ពេជ្រ សុផាន់

បញ្ជាក់ដែរថា ការប្រកួតរបស់ អេ អាំម៉ារីនភូថង នៅឯខេត្តកោះកុង កាលពីថ្ងៃទី២៨ ខែវិច្ឆិកា ឆ្នាំ២០២៥ កន្លងទៅនេះលទ្ធផលគឺរូបគេឈ្នះពិន្ទុកីឡាករអង់គ្លេស Mo Abdurahman។ ប៉ុន្តែគូនេះសហព័ន្ធនឹងសើរើការដាក់ពិន្ទុឡើងវិញនៅថ្ងៃចន្ទ ទី១ ខែធ្នូ ២០២៥ នេះ។ ចំណែក ពេជ្រ អាទិទេព បានយកឈ្នះពិន្ទុលើកីឡាករ ធន់ ផានិក កាលពីថ្ងៃទី២៩ ខែវិច្ឆិកា ឆ្នាំ២០២៥ នៅឯខេត្តស្វាយរៀង ទទួលបានខ្សែក្រវាត់ ១គ្រឿងបន្ថែមទៀត៕

អត្ថបទដោយ៖ នួន ស៊ីណា

The post គូ អេ អាំម៉ារីនភូថង និងគូ ពេជ្រ អាទិទេព កក្រើកដូចគ្នាតែមួយកក្រើកវាយល្អមួយកក្រើករិះគន់ appeared first on Kampuchea Thmey Daily.

ពេជ្រ អាទិទេព Archives - Kampuchea Thmey Daily

លោក​ ពេជ្រ​ សុផាន់​ និយាយ​ក្នុង​ថ្ងៃ​ឡើង​ផ្ទះ​ ពេជ្រ​ អាទិទេព​ «នេះ​ហើយ​សមិទ្ធិផល​ស្ដាប់​ដំបូន្មាន​គ្រូ»

លោក​ ពេជ្រ​ សុផាន់​ បញ្ជាក់​ហើយ​ថា​ក្លឹប​លោក​ជា​ក្លឹប​អាជីព​ទោះ​ទៅ​ប្រកួត​ជំនួស​គេ​ក៏​នៅ​តែ​ល្អ​ដែរ

ពេជ្រ​ អាទិទេព​ លើក​ឡើង​ពី​សមត្ថភាព​ ធន់​ ម៉េងហុង​ នៅ​ខ្ចី​ជាង​ ពេជ្រ​ សម្បត្តិ​ ឆ្ងាយ​បើ​ប៉ះ​គ្នា​នោះ​

រយៈពេល​ត្រឹម​ ៣ឆ្នាំ​កីឡាករ​ ពេជ្រ​ អាទិទេព​ មាន​សមិទ្ធផល​អស្ចារ្យ​​ខ្សែក្រវាត់​ ៤គ្រឿង​ និង​ពាន​

អ្នក​លេង​គុន​ខ្មែរ​ ធន់​ សាក់ស៊ីន​ អាច​ទប់​ជាប់​ទេ​ប៉ះ​ ពេជ្រ អាទិទេព​ លក្ខណៈ​ហ្គង់​ចេញម្រាម​ ៥ទឹក​

គូ​ អេ អាំម៉ារីន​ភូថង​ និង​គូ​ ពេជ្រ​ អាទិទេព​ កក្រើក​ដូច​គ្នា​តែ​មួយ​កក្រើក​វាយ​ល្អ​មួយ​កក្រើក​រិះគន់​

លោក ពេជ្រ សុផាន់ និយាយក្នុងថ្ងៃឡើងផ្ទះ ពេជ្រ អាទិទេព «នេះហើយសមិទ្ធិផលស្ដាប់ដំបូន្មានគ្រូ»

លោក ពេជ្រ សុផាន់ បញ្ជាក់ហើយថាក្លឹបលោកជាក្លឹបអាជីពទោះទៅប្រកួតជំនួសគេក៏នៅតែល្អដែរ

ពេជ្រ អាទិទេព លើកឡើងពីសមត្ថភាព ធន់ ម៉េងហុង នៅខ្ចីជាង ពេជ្រ សម្បត្តិ ឆ្ងាយបើប៉ះគ្នានោះ

រយៈពេលត្រឹម ៣ឆ្នាំកីឡាករ ពេជ្រ អាទិទេព មានសមិទ្ធផលអស្ចារ្យខ្សែក្រវាត់ ៤គ្រឿង និងពាន

អ្នកលេងគុនខ្មែរ ធន់ សាក់ស៊ីន អាចទប់ជាប់ទេប៉ះ ពេជ្រ អាទិទេព លក្ខណៈហ្គង់ចេញម្រាម ៥ទឹក

គូ អេ អាំម៉ារីនភូថង និងគូ ពេជ្រ អាទិទេព កក្រើកដូចគ្នាតែមួយកក្រើកវាយល្អមួយកក្រើករិះគន់