កីឡា

អ្នកប្រដាល់កំពុងល្បី យ៉ាស៊ីន ស្គាល់កីឡាករ ពេជ្រ អាទិទេព និងអាចប្រកួតបានឲ្យតែគ្រូអនុញ្ញាត

បានផុស

៦ ខែ មុន

នៅ

ថ្ងៃព្រហស្បតិ៍ ២២ មករា ២០២៦

ដោយ

ក្រោយពីផ្ទុះរឿងផ្គូរផ្គង់ និងកំពុងល្បីលើបណ្ដាញសង្គមហ្វេសបុកប៉ុន្មានថ្ងៃមកនេះ ឥឡូវកីឡាករ ប៉ែនកាក់ យ៉ាស៊ីន បង្ហើបមកហើយគឺខ្លួនស្គាល់កីឡាករ ពេជ្រ អាទិទេព និងអាចប្រកួតគ្នាបានប្រសិនបើគ្រូបង្វឹករបស់ខ្លួនអនុញ្ញាតប៉ះគ្នាមែននោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ ប៉ែនកាក់ យ៉ាស៊ីន

ថ្លែងក្នុងវីដេអូរបស់ភរិយាលោក សេន ប៊ុនថេន កីឡាករ ប៉ែនកាក់ យ៉ាស៊ីន បានបញ្ជាក់ថាខ្លួនពិតជាស្គាល់ជើងខ្លាំង ពេជ្រ អាទិទេព និងអត់ខ្លាចទេអាចប្រកួតបានប្រសិនបើគ្រូរបស់ខ្លួនអនុញ្ញាតឲ្យគ្នាមែននោះ។ វីដេអូដែលលោក អេ ភូថង និយាយថាចង់ឲ្យគូទាំងពីរនេះប៉ះគ្នានោះគឺបានធ្វើឲ្យផ្ទុះខ្លាំង និងបណ្ដុះចិត្តអ្នកតាមដានប្រដាល់ចង់ឲ្យគូនេះប៉ះគ្នាផងដែរ។

លោក អេ ភូថង ថាពិតជាចង់ឲ្យ យ៉ាស៊ីន ប៉ះ ពេជ្រ អាទិទេព ណាស់រហូតនឹងផ្ដល់ថវិកាឧបបត្ថម្ភម្នាក់ៗ ១០ម៉ឺនរៀលទៀតផងប្រសិនបើគូនេះត្រូវរ៉ូវគ្នាមែន។ លោកបន្តថា សេន ប៊ុនថេន កុំនៅដើរស៊ីទម្ងន់ ៥៤គីឡូក្រាមនេះយូរពេកទុកឲ្យកីឡាករផ្សេងៗផង។ ការឡើងមកប៉ះ ពេជ្រ អាទិទេព នេះគឺគូល្អសិក្តិសមបំផុត និងលោកចង់មើលការប៉ះគ្នានេះណាស់។

កីឡាករ ពេជ្រ អាទិទេព

បន្ទាប់ពីមានការសួរពីលោក ពេជ្រ សុផាន់ គ្រូរបស់ ពេជ្រ អាទិទេព ទៅលើលោក សេន ប៊ុនថេន រួចហើយក៏មានការឆ្លើយតបរបស់ យ៉ាស៊ីន បណ្ដើរៗមកហើយតើគូនេះអាចនឹងមានវាសនាប៉ះគ្នា ឬទេនៅថ្ងៃខាងមុខនេះ។ ដូច្នេះមានតែរង់ចាំមើលបន្តទៀតតើខាងស្ថានីយ ឬកម្មវិធីប្រដាល់មួយណានឹងចាប់គូនេះឲ្យប៉ះគ្នាបានរវាងជើងខ្លាំងទាំងពីរខាងលើ។ យ៉ាស៊ីន ជាជើងខ្លាំងប្រចាំទម្ងន់ ៥៤កីឡូក្រាមរូបគេយកឈ្នះកីឡាករច្រើននាក់មកហើយ និងទើបឈ្នះ ប៊ុន សុធា បានខ្សែក្រវាត់ ១គ្រឿងអមដោយទឹកប្រាក់ ៤០លានរៀលទៀតផង។ ចំណែក ពេជ្រ អាទិទេព ជាកីឡាករទើបឡើងកូដខ្លាំង និងកំពុងក្រសោបប្រាក់រង្វាន់ច្រើនលើប្រភេទទម្ងន់ ៥៧គីឡូក្រាមកន្លងទៅនេះ និងធ្លាប់ឈ្នះជើងខ្លាំងដូចជា វ៉ាន់ វឿន ធន់ ផានិត ទៀតផង៕

អត្ថបទដោយ៖ នួន ស៊ីណា