យោង​តាម​ការចុះ​ផ្សាយរបស់ BBC នៅ​ថ្ងៃទី​២២ខែ​កុម្ភៈ ឆ្នាំ​២០២៦ ឱ្យ​ដឹងថា រដ្ឋ​ជា​ច្រើនរបស់សហរដ្ឋអាមេរិក​បាន​ប្រកាសអាសន្ន រួម​មាន​រដ្ឋ​ Massachusetts, Connecticut, Delaware, New Jersey និង Rhode Island។

ចំណែក​រដ្ឋជាច្រើន​ទៀត​បាន​ដាក់​ចេញ​នូវ​ការ​រឹត​បន្តឹង ឬហាម​ឃាត់​ការ​ធ្វើ​ដំណើរ​ដោយសារតែព្យុះ​ព្រិល ចំណែក​ជើង​ហោះ​ហើរ​រាប់​ពាន់​ត្រូវ​បាន​លុប​ចោល​។

អ្នក​ព្យាករណ៍អាកាសធាតុនិយាយថា ខេត្ត​ភាគឦសាន និង​ខេត្ត​នៅ​ជាប់​សមុទ្រ​ភាគ​ច្រើន​របស់​សហរដ្ឋអាមេរិក​នឹង​រង​ផលប៉ះពាល់​ចាប់​ពី​ល្ងាច​ថ្ងៃអាទិត្យ​ដល់ថ្ងៃចន្ទ។

ព្យុះ​នេះ​ អ្នក​ព្យាករណ៍​រំពឹង​ថា ​នឹង​ក្លាយ​ជា​ព្យុះ nor’easter ជា​ប្រភេទ​ព្យុះ​ដ៏​ខ្លាំង​ក្លា​បំផុត​រយៈ​ពេល​ជិត​មួយ​ទសវត្សរ៍​សម្រាប់​តំបន់​ជា​ច្រើននាំ​មក​នូវ​ព្រិល ខ្យល់​បក់​ខ្លាំង និង​ទឹកជំនន់​តាម​ឆ្នេរ​សមុទ្រ។

គិត​ត្រឹម​ម៉ោង ៥ព្រឹកកាល​ពី​ថ្ងៃចន្ទ តំបន់​ជា​ច្រើន​នៃភាគឦសាន​ ព្រិល​គ្រប​ដណ្ដប់ក្រាស់​ឃ្មឹក​ជា​ច្រើន​ និង​មាន​កម្រាស់ ២៥សង់ទីម៉ែត្រ​ រាយការណ៍​ក្នុង​តំបន់​ Manorville រដ្ឋញូវយ៉ក និង Howell រដ្ឋ New Jersey នេះ​បើ​យោង​តាមសេវាអាកាសធាតុជាតិ​សហរដ្ឋអាមេរិក (NWS)។

អង្គភាព​នេះ​ព្រមាន​ថាព្យុះនឹង​នាំ​មក​នូវ​ព្រិល​ធ្លាក់​ប្រហែល ៥ទៅ ៧សង់ទីម៉ែត្រក្នុង​មួយ​ម៉ោង​ អំឡុង​ពេល​ព្យុះ។ ជា​ពិសេស​ព្រិល​ធ្លាក់​អាច​ឡើង​ដល់ ៣០ ទៅ ៦០​សង់ទីម៉ែត្រ បណ្តាល​ឱ្យ​មាន​លក្ខ​ខណ្ឌ​មួយ​​ដែល​ធ្វើ​ដំណើរ​ស្ទើរ​តែ​មិន​អាច​ទៅ​រួច និង​មាន​គ្រោះ​ថ្នាក់​ខ្លាំង។

គួរ​ឱ្យ​ដឹង​ថា​មនុស្សប្រហែល ៤០លាននាក់​ស្ថិតនៅក្រោមការព្រមាន​អំពី​ព្យុះព្រិល ហើយមនុស្ស ១៩លាននាក់ផ្សេងទៀត ស្ថិត​នៅ​ក្រោម​ការ​ព្រមាន​អំពី​ព្យុះ​រដូវ​រងា គ្រប​ដណ្តប់​លើ​តំបន់​ Central Appalachians ពី ​North Carolina ដល់​ឆ្នេរ​សមុទ្រ​ Maine។

លោក Cody Snell អ្នក​ឧតុនិយម​នៅ​មជ្ឈមណ្ឌល​ព្យាករណ៍​អាកាស​ធាតុ​របស់​ NWS និយាយ​ថា​៖ «ខណៈយើងទទួល​ឥទ្ធិពល​ព្យុះ nor’easters ជា​ច្រើន​ដែល​បង្កើតឱ្យ​ព្រិល​ធ្លាក់​ខ្លាំង និង​ប៉ះពាល់​ជា​ច្រើន។ វា​មានរយៈ​ពេល​ជាច្រើនឆ្នាំមកហើយ​ចាប់​តាំងពីយើង​បានឃើញ​ព្យុះ​ដ៏​ធំ​មួយ​នេះ​នៅ​ទូទាំងតំបន់​ ជា​ពិសេស​ក្នុង​តំបន់​ដែល​មានប្រជាជន​រស់​នៅ​ច្រើន​»។  

ចំណែក​ជើងហោះ​ហើរ​ជិត​ ៥ ៥០០ របស់​សហរដ្ឋ​អាមេរិក​ត្រូវ​បាន​លុប​ចោលនៅ​ថ្ងៃអាទិត្យ និង​រាប់រយផ្សេងទៀតត្រូវបាន​ពន្យារ​ពេល ​។ នេះបើយោងតាមកម្មវិធីតាមដាន FlightAware៕

ប្រែ​សម្រួល៖ ណឺ មិនា

The post ប្រជាជន​អាមេរិក​ប្រមាណ​៥៩​លាន​នាក់​ស្ថិត​ក្រោម​ការ​ព្រមាន​ពី​ព្យុះ​រដូវ​រងា​ដ៏​ធំ​ appeared first on Kampuchea Thmey Daily.

តាមការផ្សាយរបស់ BBC នៅថ្ងៃចន្ទទី២៦ខែមករាឆ្នាំ២០២៦ ព្យុះដ៏សាហាវនេះវាយប្រហារចាប់ពីរដ្ឋ Texas ដល់ New England បណ្តាលឲ្យមានទឹកកកនិងព្រឹលធ្លាក់ខ្លាំង ព្រមទាំងធ្វើឲ្យសីតុណ្ហភាពធ្លាក់ចុះ ត្រជាក់ដល់ឆ្អឹង សម្លាប់មនុស្ស២នាក់ហើយនៅរដ្ឋ Louisiana និងម្នាក់ទៀតនៅ Texas។

ឥទ្ធិពលរបស់វា បណ្តាលឲ្យជាង១លានគ្រួសារគ្មានអគ្គិសនីប្រើប្រាស់, ជើងហោះហើរជាង ១០ ០០០ជើងត្រូវលុបចោល ហើយក្នុងឧបទ្ទវហេតុអាក្រក់បំផុតគឺរថយន្តជាង ២០០គ្រឿងបានជួបគ្រោះថ្នាក់ចរាចរណ៍ បុកតកន្ទុយគ្នានៅរដ្ឋ Virginia ព្រោះតែស្ថានភាពផ្លូវរអិល។

អ្នកជំនាញផ្នែកឧតុនិយមក៏ព្រមានដែរថា គ្រោះថ្នាក់ធំបំផុតមួយនៃព្យុះនេះគឺ «ទឹកកក» ដែលវាមានសមត្ថភាពអាចបោកផ្តួលរំលំដើមឈើ, បាក់បង្គោលខ្សែភ្លើង និងធ្វើឲ្យផ្លូវថ្នល់លែងមានសុវត្ថិភាពសម្រាប់ការធ្វើដំណើរ។

ទន្ទឹមនោះ រដ្ឋជិតពាក់កណ្តាលប្រទេស ត្រូវប្រកាសអាសន្ន ហើយសាលារៀនជាច្រើនបានសម្រេចលុបចោលការសិក្សាសិន ខណៈព្រឹទ្ធសភាសហរដ្ឋអាមេរិកក៏បានលុបចោលការបោះឆ្នោតដែលគ្រោងធ្វើនៅល្ងាចថ្ងៃចន្ទផងដែរ។

ក្នុងការប្រកាសភាពអាសន្ននៅរដ្ឋធានី, អភិបាលក្រុងវ៉ាស៊ីនតោន លោកស្រី Muriel Bowser និយា​យថា៖ «យើងកំពុងជួបប្រទះនូវព្យុះព្រឹលដ៏ធំបំផុតក្នុងរយៈពេលមួយទសវត្សរ៍ នាចុងសប្តាហ៍នេះ»។

ទោះបីជាយ៉ាងណាក៏ដោយ ព្យុះនេះនឹងមិនធូរស្រាលឆាប់ៗទេ ដោយភ្នាក់ងារអាកាសធាតុជាតិអាមេរិក ព្រមានថា វានឹងបន្តវាយប្រហារក្នុងរយៈពេលច្រើនថ្ងៃខាងមុខទៀត៕

អត្ថបទ៖ សុខ សុវណ្ណ

The post «ព្យុះបិសាច» ខែរងា វាយប្រហារអាមេរិក ប៉ះពាល់ប្រជាជន១៨០លាននាក់, រដ្ឋជាច្រើនប្រកាសអាសន្ន appeared first on Kampuchea Thmey Daily.

សេវា​កម្ម​អាកាស​ធាតុ​ជាតិ​ (NWS) បាន​ព្យាករណ៍​ថា​ នឹង​មាន​ព្រឹល​ធ្លាក់​ពាស​ពេញ​តំបន់ Great Lakes ពេញ​មួយ​ថ្ងៃ ជា​មួយ​នឹង​ព្យុះ​​ដ៏ធំ​កំពុងធ្វើដំណើរ​​ឆ្ពោះ​ទៅ​ប៉ែក​ឦ​សាន​។

ភ្នាក់ងារអាកាសធាតុ​ព្រមាន​ថា​៖ «ស្ថាន​ភាព​ផ្លូវ​នឹង​ពិបាក​ធ្វើ​ដំណើរ​ សូម្បី​ពេល​ត្រឡប់មក​ពី​ថ្ងៃ​ឈប់​សម្រាកវិញ​ក៏​ដោយ​» ។ ភ្នាក់ងារ​ក៏​​បង្ហាញ​ពី​ហា​និភ័យ​​នៃ​ទឹក​ជំនន់​ភ្លាមៗដោយសារព្យុះ​​នៅ​ទូទាំង​រដ្ឋ​កាលីហ្វ័រញ៉ា [California] ​ភាគ​ខាងត្បូង រួម​ជា​មួយ​នឹង​ខ្យល់​បក់​ខ្លាំង​ និង​ព្យុះ​ផ្គរ​រន្ទះ​នៅ​ជិត​ឆ្នេរ​សមុទ្រ​ផង​ដែរ​។

អ្នក​តំណាង​មក​ពី​ក្រុម​ហ៊ុន​អាកាស​ចរណ៍​អាមេរិក​ [United Airlines] និង JetBlue បាន​ប្រាប់​រ៉យទ័រ​ថាក្រុមហ៊ុន​ដឹកអ្នក​ដំណើរ​​បាន​លើក​លែង​ថ្លៃ​សំបុត្រ​យន្តហោះ​ និង​សងលុយវិញ​​សម្រាប់​ការកក់របស់​អ្នក​ធ្វើដំណើរ​ណា​ដែល អាច​នឹង​រង​ផល​ប៉ះ​ពាល់ខ្លាំង​៕

ប្រែសម្រួល៖ ណឺ មិនា​

The post ក្រុម​ហ៊ុន​អាកាស​ចរណ៍​អាមេរិក ​លុប​ចោល​ជើង​ហោះ​ហើរ​ជាង ១ ០០០ ដោយ​សារ​ព្យុះដ៏ធំ appeared first on Kampuchea Thmey Daily.

ព្យុះកំបុតត្បូងកាលពីថ្ងៃអាទិត្យបានបោកបក់ពាសពេញខេត្តភាគខាងកើតនៃខេត្តសាន​ទុង (Shandong) ភាគខាងត្បូងនៃទីក្រុងប៉េកាំង ជាមួយនឹងព្រឹលធ្លាក់រហូតដល់ជម្រៅ១៣សង់ទីម៉ែត្រនៅក្នុងតំបន់មួយចំនួន។ នេះបើយោងតាមការចេញ​ផ្សាយរបស់កាសែត The Global Times។

អាជ្ញាធរក្រុងបានចេញសេចក្តី​​ជូនដំណឹង​​​ដែលកំណត់​កម្រិត​គ្រោះថ្នាក់ដល់​«ពណ៌ក្រហម» ចំនួនពីរ សម្រាប់គ្រោះថ្នាក់ដោយសារទឹកកកលើផ្លូវ និងខ្យល់ព្យុះ ខណៈដែលសាលាជាច្រើនត្រូវ​បានផ្អាកថ្នាក់រៀននៅថ្ងៃចន្ទនេះ។ ការ​ធ្វើ​ដំណើរ​ក៏​ត្រូវ​បាន​រំខាន ដោយ​មាន​ការ​ពន្យារ​ពេលខ្សែ​រថភ្លើង​ល្បឿន​លឿន​ជា​ច្រើន​ខ្សែ​កាត់​តាម​ខេត្តផងដែរ។

ប៉ុន្តែ ប្រហែល៦៤៤គីឡូម៉ែត្រពីទីក្រុងសៀងហៃ អ្នកស្រុកបានជួបប្រទះនឹងកម្ដៅខ្លាំងទៅវិញកាលថ្ងៃចុងសប្តាហ៍។

ទីក្រុងដែលមានប្រជាជនជិត២៥លាននាក់នេះ បានកត់ត្រា​​កម្តៅ​ក្តៅបំផុតនៅដើមខែមីនាក្នុងរយៈពេលជាង១៥០ឆ្នាំមិនធ្លាប់មាន។ សីតុណ្ហភាពបានឈានដល់កំណត់ត្រាថ្មីកាលពីថ្ងៃសៅរ៍ បន្ទាប់មកបានកើនឡើងកាន់តែខ្លាំងនៅថ្ងៃអាទិត្យសប្ដាហ៍មុនរហូតដល់ ២៨.៥អង្សាសេ។

សីតុណ្ហភាពនៅទីក្រុងសៀងហៃ ត្រូវបានរំពឹងថា នឹងធ្លាក់ចុះក្នុងរយៈពេលប៉ុន្មានថ្ងៃខាងមុខនេះ។ ប៉ុន្តែលក្ខខណ្ឌ​​អាកាសធាតុ​ខុសគ្នាយ៉ាងធំធេងនៅទូទាំងប្រទេសឆ្លុះបញ្ចាំងពី​​​​​ការ​​មិនអាចទាយទុក​មុនបានកាន់តែខ្លាំងឡើង ដែលក្នុងប៉ុន្មាន​​ឆ្នាំថ្មីៗនេះ បាននាំមកនូវសីតុណ្ហភាពកើនឡើង គ្រោះរាំងស្ងួតយូរ និងទឹកជំនន់ដ៏បំផ្លិចបំផ្លាញ។

គួរម្លឹកថា កាលពីឆ្នាំមុន​គឺជាឆ្នាំក្តៅបំផុតរបស់ប្រទេសចិន ចាប់តាំងពីកំណត់ត្រាទូទាំងប្រទេសបានចាប់ផ្តើមជាង​៦០ឆ្នាំមុន ហើយនៅទីក្រុងសៀងហៃ​វិញ​ ឆ្នាំមុនជាឆ្នាំដែលក្តៅបំផុតចាប់តាំងពីរាជវង្ស Qing មក។ នេះបើតាមការរាយការណ៍ដោយទីភ្នាក់ងារសារព័ត៌មាន Reutersដែលដកស្រង់សម្តីអាជ្ញាធរក្នុងតំបន់៕

អត្ថបទ៖ ប៊ុន សុភាព

The post ​ភាគបូព៌ា​ប្រទេស​ចិន​រង​ការ​វាយ​ប្រហារ​ដោយ​ព្យុះ​ព្រឹល​ផង និង​កម្ដៅ​ខ្លាំង​ផង​​ appeared first on Kampuchea Thmey Daily.

ព្យុះនេះ រួមផ្សំជាមួយនឹងខ្យល់ត្រជាក់ នឹងនាំមកនូវការធ្លាក់ព្រឹល​ទឹកកកខ្លាំង និងការរំខានដល់ការធ្វើដំណើរសំខាន់ៗផ្សេងទៀត ចាប់ពីយប់ថ្ងៃចន្ទ ដល់ព្រឹកថ្ងៃពុធ នៅក្នុងទីក្រុងភាគខាងត្បូង ពីរដ្ឋ Texas  ដល់រដ្ឋ South Carolina ខណៈរ​ដ្ឋ​ទាំងនេះកម្រមានការព្រមានអំពីអាកាសធាតុត្រជាក់ខ្លាំងណាស់។

អភិបាលរដ្ឋ​មួយ​ចំនួន ដូច​ជា​រដ្ឋ Louisiana, Georgia, Alabama, Florida និង Mississippi បានប្រកាសដាក់​រដ្ឋ​​របស់​ពួក​គេ​ក្នុងគ្រាអាសន្ន ខណៈដែលអាជ្ញាធររដ្ឋ Texas បានណែនាំភ្នាក់ងាររដ្ឋឱ្យប្រមូលធនធានត្រៀមឆ្លើយ​តប​ ទៅ​នឹង​ការគំរាមកំហែងពី​ការ​ធ្លាក់​ព្រឹល។ លើសពីនេះរដ្ឋមួយចំនួន នៅទាំងភាគខាងត្បូងនិងខាងជើងអាកាសធាតុត្រជាក់​អាចនឹងធ្លាក់ដល់ក្រោមសូន្យអង្សារ។

ការធ្វើដំណើរអាចជាប់គាំងជាច្រើនថ្ងៃដោយយោងតាមគេហទំព័រតាមដាន FlightAware បានឱ្យដឹងថា ការព្យាករណ៍អាកាសធាតុបានជំរុញឱ្យមានការលុបចោលជើងហោះហើរជាង ១៧០០ រួចហើយនៅថ្ងៃអង្គារនេះ ដោយជើងហោះហើរភាគច្រើនមកពីរដ្ឋ Texas  និងរដ្ឋ Louisiana ។

អាកាសយានដ្ឋានសំខាន់ៗរបស់ Houston អាកាសយានដ្ឋានអន្តរទ្វីប George Bush និងអាកាសយានដ្ឋាន Hobby ក៏បានបិទនៅថ្ងៃអង្គារនេះដែរ។ សាលារៀនត្រូវបានបិទនៅក្នុងរដ្ឋមួយចំនួន រួមមាន Georgia, Louisiana និង Texas។ សាលា Houston Independent School District ដែលធំជាងគេនៅក្នុងរដ្ឋ និងធំជាងគេទីប្រាំបីក្នុងប្រទេស ក៏នឹងត្រូវបិទរហូតដល់ថ្ងៃពុធ៕

អត្ថបទ៖ ប៊ុន សុភាព

The post ​ធ្លាក់​ព្រឹលខ្លាំង​ពេក រដ្ឋភាគខាងត្បូងអាមេរិកប្រកាសអាសន្ន ​ខណៈ​​មនុស្ស​២២០​លាននាក់​រង​ផល​ប៉ះពាល់ appeared first on Kampuchea Thmey Daily.

យោងតាមសេចក្តីប្រកាសព័ត៌មានរបស់ NWS និងត្រូវបានចុះផ្សាយដោយ Guardian កាលពីថ្ងៃព្រហស្បតិ៍ទី១៦ខែមករាឆ្នាំ២០២៥, ព្យុះព្រឹលនេះគឺបង្កឡើងដោយបាតុភូតខ្យល់អាកទិក (Arctic Blasts) ដែលឥទ្ធិពលរបស់វានឹងធ្វើឲ្យអាកាសធាតុត្រជាក់ខ្លាំង ប៉ះពាល់ដល់ប្រជាជនអាមេរិកជាង ៣០០លាននាក់។

នៅទីក្រុងវ៉ាស៊ីនតោនឌីស៊ី សីតុណ្ហភាពនៅថ្ងៃអាទិត្យ ត្រូវបានគេព្យាករថានឹងធ្លាក់ចុះដល់ -៤.៤អង្សាសេ ខណៈនៅរដ្ឋ New Mexico និង North Dakota ឯណោះ បានចេញការព្រមានដល់ពលរដ្ឋឲ្យប្រុងប្រយ័ត្នរួចហើយ ព្រោះថានៅ North Dakota សីតុណ្ហភាពថ្ងៃអាទិត្យ នឹងធ្លាក់ចុះដល់ -៤៥អង្សាសេ។

ដោយសារហេតុនេះ NWS បានប្រាប់ឲ្យពលរដ្ឋត្រៀមខ្លួនព្រោះថា ព្យុះព្រឹលនឹងបង្កហានិភ័យខ្ពស់ចំពោះខុសភាពនិងសុវត្ថិភាព ជាពិសេសជនអនាថាគ្មានផ្ទះសម្បែងរស់នៅ និងអ្នកដែលធ្វើចរាចរណ៍តាមដងផ្លូវ។

ព្យុះព្រឹលនេះ កើតឡើងចំពេលភ្លើងឆេះព្រៃនៅរដ្ឋកាលីហ្វ័រញ៉ា ហាក់ធូរស្រាលបានបន្តិច ដោយអគ្គិភ័យសកម្មដូចជា Palisades ត្រូវកងពន្លត់គ្រប់គ្រងបាន២២% ចំណែកអគ្គិភ័យ Eaton គ្រប់គ្រងបាន៥៥%។

គិតត្រឹមថ្ងៃសុក្រទី១៧ខែមករាឆ្នាំ២០២៥ អគ្គិភ័យនៅកាលីហ្វ័រញ៉ា បានឆាបឆេះ១១ថ្ងៃហើយដោយសម្លាប់មនុស្សចំនួន២៦នាក់ និងបង្ខំឲ្យរាប់លាននាក់ទៀត ជម្លៀសចេញពីផ្ទះសម្បែង។

អគ្គិភ័យបានឆេះកម្ទេចលើផ្ទៃដីជាង ១៦ ៣០៨ហិកតា ដោយបំផ្លាញសំណង់អគារនិងផ្ទះសម្បែងជាង ១២ ៣០០ខ្នង និងបណ្តាលឲ្យខាតបង់សេដ្ឋកិច្ចក្នុងទំហំទឹកប្រាក់ប្រមាណ២៥០ពាន់លានដុល្លារអាមេរិក៕

អត្ថបទ៖ សុខ សុវណ្ណ

ចុចអាន៖ អាមេរិក ចាប់ផ្តើមមានមនុស្សស្លាប់ ដោយសារព្យុះព្រឹលដ៏កាចសាហាវ 

The post ចុងសប្តាហ៍នេះ អាមេរិក ជួបព្យុះព្រឹលធ្ងន់ធ្ងរ ប៉ះពាល់ពលរដ្ឋជាង ៣០០លាននាក់ appeared first on Kampuchea Thmey Daily.

អាជ្ញាធរតំបន់ Nord នៅភាគខាងជើងប្រទេសបារាំង បាននិយាយនៅក្នុងសេចក្តីថ្លែងការណ៍មួយថា មនុស្សម្នាក់ក្នុងចំណោមអ្នកស្លាប់បានរអិលដួលនៅលើចិញ្ចើមផ្លូវមួយ និងបានរងរបួសក្បាលយ៉ាងធ្ងន់ធ្ងររហូតដល់ស្លាប់។ ចំណែកមនុស្សម្នាក់ទៀតត្រូវបានគេប្រទះឃើញស្លាប់នៅក្នុងទីក្រុង Valenciennes។

អាកាស​ធាតុ​ដ៏ត្រជាក់​នេះបាន​ចាប់ផ្ដើមវាយ​ប្រហារ​លើកដំបូង​កាល​ពី​ថ្ងៃ​ពុធ ដែល​ទាមទារ​ឲ្យ​ភ្នាក់ងារ​សង្គ្រោះ​ត្រូវ​ដោះស្រាយ​​បញ្ហា​គ្រោះថ្នាក់ចរាចរណ៍ មនុស្សរអិលដួលដោយសារព្រិល​​ទឹកកក ទឹកជំនន់ និងការសង្គ្រោះបន្ទាន់ផ្សេងទៀត។ ព្រិលធ្លាក់ ភ្លៀងធ្លាក់ជាច្រើនថ្ងៃក៏បានរំខានដល់អាកាសយានដ្ឋាន ខ្សែរថភ្លើង និងផ្លូវថ្នល់ទូទាំងប្រទេស ដែលនាំឱ្យមានការពន្យារពេល និងលុបចោលការធ្វើដំណើរក្នុងអំឡុងពេលថ្ងៃឈប់សម្រាកដ៏មមាញឹកផងដែរ។

មិនត្រឹមតែនៅបារាំងនោះទេនៅ​ចក្រភព​អង់គ្លេសក៏មានការព្រមានអំពីអាកាសធាតុផង​ដែរ ដែលសីតុណ្ហភាពត្រូវបានគេរំពឹងថានឹងធ្លាក់ចុះដល់ -១៦ អង្សាសេ នៅកន្លែងខ្លះ។ អាកាសយានដ្ឋាន Manchester បានបិទផ្លូវរត់របស់ខ្លួនរយៈពេលខ្លី ដោយសារព្រិលធ្លាក់ខ្លាំងនៅព្រឹកថ្ងៃព្រហស្បតិ៍ តែក្រោយមកបើកដំណើរការឡើងវិញ។ ទីភ្នាក់ងារព្យាករណ៍អាកាសធាតុរបស់ចក្រភពអង់គ្លេស Met បានព្រមានអំពីការរំខានការធ្វើដំណើរបន្ថែមទៀតចំពោះសេវាកម្មផ្លូវថ្នល់ និងផ្លូវដែកនៅក្នុងផ្នែកខ្លះ ក៏ដូចជាគ្រោះថ្នាក់ដែលអាចកើតមាននៅក្នុងតំបន់ទឹកកក។ លើសពីនេះការ​ព្រមាន​អំពី​ព្រិល និង​ទឹកកក​ក៏​មាន​សម្រាប់​ប្រទេស​ស្កុតឡេន និង​អៀរឡង់​ខាង​ជើង​ផង​ដែរ៕

អត្ថបទ៖ ប៊ុន សុភាព

The post ព្យុះព្រិល និងព្យុះទឹកកក​នៅបារាំងសម្លាប់មនុស្ស ២ នាក់និងរបួស ២០ នាក់ appeared first on Kampuchea Thmey Daily.

តាមសេចក្តីរាយការណ៍របស់ BBC នៅថ្ងៃអង្គារទី៧ខែមករាឆ្នាំ២០២៥, មនុស្សចំនួន៥នាក់ ​(២នាក់នៅរដ្ឋ Kansas, ម្នាក់នៅ Missouri, ម្នាក់នៅ North Carolina និងម្នាក់នៅ Virginia) គឺស្លាប់ដោយសារគ្រោះថ្នាក់ចរាចរណ៍បង្កឡើងដោយបញ្ហាអាកាសធាតុ ខណៈម្នាក់ទៀតស្លាប់នៅជិតចំណតរថយន្តក្រុង ដោយសារអាកាសធាតុត្រជាក់ពេក ក្នុងរដ្ឋ Texas។

ក្រៅពីឆក់យកជីវិតមនុស្សហើយនោះ ព្យុះព្រឹលក៏បង្កទុក្ខលំបាកដល់ពលរដ្ឋរាប់លាននាក់ផងដែរ តួយ៉ាងគឺជើងហោះហើរជាង ២ ០០០ជើងត្រូវលុបចោល និង ២៣ ០០០ជើងត្រូវពន្យារពេលទូទាំងសហរដ្ឋអាមេរិក។

មិនត្រឹមប៉ុណ្ណឹង ពលរដ្ឋជិត ៣០០ ០០០នាក់ ក៏គ្មានអគ្គិសនីប្រើប្រាស់ផងដែរនៅទូទាំងរដ្ឋ Kentucky, Indiana, Virginia, West Virginia, Illinois និង Missouri។ 

នៅទីក្រុង Kansas នៃរដ្ឋ Missouri ព្យុះព្រឹលបានឈានដល់ស្ថានភាពគ្រោះថ្នាក់បំផុតសម្រាប់ការធ្វើដំណើរ រីឯទីក្រុង Louisville នៃរដ្ឋ Kentucky បានជួបប្រទះព្រឹលធ្លាក់ខ្លាំងបំផុតមិនធ្លាប់មានសោះក្នុងរយៈពេល២៥ឆ្នាំមកនេះ។

អ្វីដែលគួរឲ្យកត់សម្គាល់គឺថា រដ្ឋធានីវ៉ាស៊ីនតោន ឌីស៊ី បានកត់ត្រាអំពីព្រឹលធ្លាក់ក្នុងកម្រិត ១៣.៩៧សង់ទីម៉ែត្រ ចំណែកឯតំបន់នានាក្នុងរដ្ឋ Maryland មានព្រឹលធ្លាក់កម្រិត ១៧.៧៨សង់ទីម៉ែត្រ។

ព្យុះនេះគឺបង្កឡើងដោយខ្យល់ប៉ូលឬគេហៅថា Polar Vortex ដែលជាខ្យល់ត្រជាក់ ចរាចរជុំវិញតំបន់អាក់ទិក។ ជាធម្មតា Polar Vortex ស្ថិតនៅជុំវិញប៉ូលខាងជើង ប៉ុន្តែវាអាចផ្លាស់ប្តូរ និងពង្រីកខ្លួន ដោយនាំមកនូវសីតុណ្ហភាពទាបជាងធម្មតាបោកបក់លើសហរដ្ឋអាមេរិក៕

អត្ថបទ៖ សុខ សុវណ្ណ

ចុចអាន៖ ៦រដ្ឋនៅអាមេរិក ប្រកាសអាសន្នដោយសារព្យុះព្រឹល ដែលគំរាមកំហែងដល់អាយុជីវិតមនុស្សរាប់លាននាក់

The post អាមេរិក ចាប់ផ្តើមមានមនុស្សស្លាប់ ដោយសារព្យុះព្រឹលដ៏កាចសាហាវ  appeared first on Kampuchea Thmey Daily.