ព្យុះព្រិល និងព្យុះទឹកកក​នៅបារាំងសម្លាប់មនុស្ស ២ នាក់និងរបួស ២០ នាក់

អាជ្ញាធរប្រទេសបារាំង បានឲ្យដឹងថា មនុស្សពីរនាក់បានស្លាប់និង ២០ នាក់ផ្សេងទៀតបានរងរបួសដោយសារអាកាសធាតុដ៏ត្រជាក់នាំយកព្រិលនិងទឹកកកមកគ្របដណ្ដប់ពាសពេញភាគខាងជើងអឺរ៉ុប។ នេះបើយោងតាមការចេញផ្សាយរបស់CNN កាល​ពី​ថ្ងៃ​ព្រហស្បតិ៍​ទី​៩​ខែ​មករា​ឆ្នាំ​២០២៥។

អាជ្ញាធរតំបន់ Nord នៅភាគខាងជើងប្រទេសបារាំង បាននិយាយនៅក្នុងសេចក្តីថ្លែងការណ៍មួយថា មនុស្សម្នាក់ក្នុងចំណោមអ្នកស្លាប់បានរអិលដួលនៅលើចិញ្ចើមផ្លូវមួយ និងបានរងរបួសក្បាលយ៉ាងធ្ងន់ធ្ងររហូតដល់ស្លាប់។ ចំណែកមនុស្សម្នាក់ទៀតត្រូវបានគេប្រទះឃើញស្លាប់នៅក្នុងទីក្រុង Valenciennes។

អាកាស​ធាតុ​ដ៏ត្រជាក់​នេះបាន​ចាប់ផ្ដើមវាយ​ប្រហារ​លើកដំបូង​កាល​ពី​ថ្ងៃ​ពុធ ដែល​ទាមទារ​ឲ្យ​ភ្នាក់ងារ​សង្គ្រោះ​ត្រូវ​ដោះស្រាយ​​បញ្ហា​គ្រោះថ្នាក់ចរាចរណ៍ មនុស្សរអិលដួលដោយសារព្រិល​​ទឹកកក ទឹកជំនន់ និងការសង្គ្រោះបន្ទាន់ផ្សេងទៀត។ ព្រិលធ្លាក់ ភ្លៀងធ្លាក់ជាច្រើនថ្ងៃក៏បានរំខានដល់អាកាសយានដ្ឋាន ខ្សែរថភ្លើង និងផ្លូវថ្នល់ទូទាំងប្រទេស ដែលនាំឱ្យមានការពន្យារពេល និងលុបចោលការធ្វើដំណើរក្នុងអំឡុងពេលថ្ងៃឈប់សម្រាកដ៏មមាញឹកផងដែរ។

មិនត្រឹមតែនៅបារាំងនោះទេនៅ​ចក្រភព​អង់គ្លេសក៏មានការព្រមានអំពីអាកាសធាតុផង​ដែរ ដែលសីតុណ្ហភាពត្រូវបានគេរំពឹងថានឹងធ្លាក់ចុះដល់ -១៦ អង្សាសេ នៅកន្លែងខ្លះ។ អាកាសយានដ្ឋាន Manchester បានបិទផ្លូវរត់របស់ខ្លួនរយៈពេលខ្លី ដោយសារព្រិលធ្លាក់ខ្លាំងនៅព្រឹកថ្ងៃព្រហស្បតិ៍ តែក្រោយមកបើកដំណើរការឡើងវិញ។ ទីភ្នាក់ងារព្យាករណ៍អាកាសធាតុរបស់ចក្រភពអង់គ្លេស Met បានព្រមានអំពីការរំខានការធ្វើដំណើរបន្ថែមទៀតចំពោះសេវាកម្មផ្លូវថ្នល់ និងផ្លូវដែកនៅក្នុងផ្នែកខ្លះ ក៏ដូចជាគ្រោះថ្នាក់ដែលអាចកើតមាននៅក្នុងតំបន់ទឹកកក។ លើសពីនេះការ​ព្រមាន​អំពី​ព្រិល និង​ទឹកកក​ក៏​មាន​សម្រាប់​ប្រទេស​ស្កុតឡេន និង​អៀរឡង់​ខាង​ជើង​ផង​ដែរ៕

អត្ថបទ៖ ប៊ុន សុភាព