ចុងសប្តាហ៍នេះ អាមេរិក ជួបព្យុះព្រឹលធ្ងន់ធ្ងរ ប៉ះពាល់ពលរដ្ឋជាង ៣០០លាននាក់

ទីភ្នាក់ងារអាកាសធាតុជាតិអាមេរិក (NWS) បានចេញការព្រមានអំពីព្យុះព្រឹលធ្ងន់ធ្ងរ ដែលនឹងវាយប្រហារតំបន់ភាគច្រើននៃសហរដ្ឋអាមេរិកនៅចុងសប្តាហ៍នេះ ហើយធ្លាយដល់សប្តាហ៍ក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីប្រកាសព័ត៌មានរបស់ NWS និងត្រូវបានចុះផ្សាយដោយ Guardian កាលពីថ្ងៃព្រហស្បតិ៍ទី១៦ខែមករាឆ្នាំ២០២៥, ព្យុះព្រឹលនេះគឺបង្កឡើងដោយបាតុភូតខ្យល់អាកទិក (Arctic Blasts) ដែលឥទ្ធិពលរបស់វានឹងធ្វើឲ្យអាកាសធាតុត្រជាក់ខ្លាំង ប៉ះពាល់ដល់ប្រជាជនអាមេរិកជាង ៣០០លាននាក់។

នៅទីក្រុងវ៉ាស៊ីនតោនឌីស៊ី សីតុណ្ហភាពនៅថ្ងៃអាទិត្យ ត្រូវបានគេព្យាករថានឹងធ្លាក់ចុះដល់ -៤.៤អង្សាសេ ខណៈនៅរដ្ឋ New Mexico និង North Dakota ឯណោះ បានចេញការព្រមានដល់ពលរដ្ឋឲ្យប្រុងប្រយ័ត្នរួចហើយ ព្រោះថានៅ North Dakota សីតុណ្ហភាពថ្ងៃអាទិត្យ នឹងធ្លាក់ចុះដល់ -៤៥អង្សាសេ។

ដោយសារហេតុនេះ NWS បានប្រាប់ឲ្យពលរដ្ឋត្រៀមខ្លួនព្រោះថា ព្យុះព្រឹលនឹងបង្កហានិភ័យខ្ពស់ចំពោះខុសភាពនិងសុវត្ថិភាព ជាពិសេសជនអនាថាគ្មានផ្ទះសម្បែងរស់នៅ និងអ្នកដែលធ្វើចរាចរណ៍តាមដងផ្លូវ។

ព្យុះព្រឹលនេះ កើតឡើងចំពេលភ្លើងឆេះព្រៃនៅរដ្ឋកាលីហ្វ័រញ៉ា ហាក់ធូរស្រាលបានបន្តិច ដោយអគ្គិភ័យសកម្មដូចជា Palisades ត្រូវកងពន្លត់គ្រប់គ្រងបាន២២% ចំណែកអគ្គិភ័យ Eaton គ្រប់គ្រងបាន៥៥%។

គិតត្រឹមថ្ងៃសុក្រទី១៧ខែមករាឆ្នាំ២០២៥ អគ្គិភ័យនៅកាលីហ្វ័រញ៉ា បានឆាបឆេះ១១ថ្ងៃហើយដោយសម្លាប់មនុស្សចំនួន២៦នាក់ និងបង្ខំឲ្យរាប់លាននាក់ទៀត ជម្លៀសចេញពីផ្ទះសម្បែង។

អគ្គិភ័យបានឆេះកម្ទេចលើផ្ទៃដីជាង ១៦ ៣០៨ហិកតា ដោយបំផ្លាញសំណង់អគារនិងផ្ទះសម្បែងជាង ១២ ៣០០ខ្នង និងបណ្តាលឲ្យខាតបង់សេដ្ឋកិច្ចក្នុងទំហំទឹកប្រាក់ប្រមាណ២៥០ពាន់លានដុល្លារអាមេរិក៕

អត្ថបទ៖ សុខ សុវណ្ណ

ចុចអាន៖ អាមេរិក ចាប់ផ្តើមមានមនុស្សស្លាប់ ដោយសារព្យុះព្រឹលដ៏កាចសាហាវ