ភ្នំភ្លើង Archives - Kampuchea Thmey Daily

ផេះផ្ទុះចេញពីភ្នំភ្លើង Mayon នៅហ្វីលីពីន គ្រប់ដណ្តប់លើផ្ទៃដីជាង ៨ ៥០០ហិកតា

Minea Neu — Wed, 06 May 2026 10:04:58 +0000

ទីភ្នាក់ងារអវកាសហ្វីលីពីន (PhilSA) បានចេញផ្សាយផែនទីមួយ បង្ហាញតំបន់គ្របដណ្តប់ដោយស្រទាប់ផេះពីចរន្តដង់ស៊ីតេ «pyroclastic» ក្នុងភ្នំភ្លើង Mayon កាលពីថ្ងៃសៅរ៍ថា មានផ្ទៃដីយ៉ាងហោចណាស់ ៨ ៥៤៤ហិកតា ឬជាងពាក់កណ្តាលនៃទីក្រុង Quezon ត្រូវបានគ្របដណ្តប់ដោយផេះពីសកម្មភាពរបស់ភ្នំភ្លើង ហៅថា «uson» ។

យោងតាមសារព័ត៌មាន The Star ចុះផ្សាយថ្ងៃទី៦ ខែឧសភា ឆ្នាំ២០២៦ ឱ្យដឹងថា ចរន្តដង់ស៊ីតេ «pyroclastic» គឺជាលំហូរលឿននៃឧស្ម័នភ្នំភ្លើងក្តៅ ផេះ និងបំណែកថ្មធ្លាក់ចុះពីជម្រាលភ្នំភ្លើង អំឡុងពេលផ្ទុះ។

ភ្នំភ្លើងរបស់ហ្វីលីពីនកំពុងផ្ទុះ។ រូបភាព៖ NG

វិទ្យាស្ថានភ្នំភ្លើងនិងរញ្ជួយដីហ្វីលីពីនលើកឡើងថា៖ «ផេះដែលផ្សំឡើងពីភាគល្អិតភ្នំភ្លើងមានអង្កត់ផ្ចិតតិចជាង ២មីលីម៉ែត្រនោះ គឺគ្រោះថ្នាក់ដល់សុខភាព។ វាក៏គ្រោះថ្នាក់ដល់យន្តហោះ និងគ្រឿងចក្រឧស្សាហកម្មផ្សេងទៀតផងដែរ ដូចជាគ្រឿងចក្រសម្រាប់ដឹកជញ្ជូន និងផលិតថាមពលជាដើម»។

ទីភ្នាក់ងារស្ទង់មតិភូមិសាស្ត្រសហរដ្ឋអាមេរិក អះអាងថា៖ « ផេះដែលធ្លាក់អាចរំខានសកម្មភាពនានា ដោយបំផ្លាញអគារ ការដឹកជញ្ជូន ប្រព័ន្ធទឹក ការផ្គត់ផ្គង់ថាមពល ឧបករណ៍ទំនាក់ទំនង កសិកម្ម និងផលិតកម្មបឋមយ៉ាងសំខាន់ សូម្បីតែកម្រាស់ត្រឹមតែពីរបីមីលីម៉ែត្រ ឬត្រឹមអ៊ីញក៏ដោយ»។

យ៉ាងណា រហូតមកដល់ពេលនេះ ផេះដែលធ្លាក់ពីភ្នំភ្លើង Mayon បានប៉ះពាល់ដល់គ្រួសារចំនួន ៣០ ៥២២គ្រួសារ ឬមនុស្ស ១០២ ៤០៦នាក់ នៅក្នុងភូមិចំនួន៨៧ ក្នុងតំបន់ Bicol គិតត្រឹមថ្ងៃចន្ទ ថ្ងៃទី៤ ខែឧសភា ឆ្នាំ២០២៦។ នេះបើយោងតាមការិយាល័យការពារជនស៊ីវិលហ្វីលីពីន។

ប្រែសម្រួល៖ ណឺ មិនា

The post ផេះផ្ទុះចេញពីភ្នំភ្លើង Mayon នៅហ្វីលីពីន គ្រប់ដណ្តប់លើផ្ទៃដីជាង ៨ ៥០០ហិកតា appeared first on Kampuchea Thmey Daily.

ជម្លៀសពលរដ្ឋជាង ៣០០គ្រួសារ ក្រោយភ្នំភ្លើង Mayon ព្រួសផេះយ៉ាងសន្ធោសន្ធៅ នៅហ្វីលីពីន

Chheang — Mon, 04 May 2026 07:02:59 +0000

ភ្នំភ្លើងដ៏ល្បីល្បាញ Mayon របស់ហ្វីលីពីន បានព្រួសផេះ និងផ្សែងខ្មៅគ្របដណ្តប់ពេញមេឃ ដែលបង្ខំឲ្យអាជ្ញាធរត្រូវជម្លៀសគ្រួសារជាង ៣០០គ្រួសារ ចេញពីផ្ទះសម្បែង ដើម្បីសុវត្ថិភាព។ នេះបើយោងតាមការចុះផ្សាយរបស់សារព័ត៌មាន Channel News Asia នាថ្ងៃទី៤ ខែឧសភា ឆ្នាំ២០២៦។

(រូបថត៖ AP)

ហេតុការណ៍ដែលកើតឡើងកាលពីល្ងាចថ្ងៃសៅរ៍នោះ បានធ្វើឲ្យភូមិចំនួន ៨៧ ក្នុងក្រុងចំនួន៣ ត្រូវរងគ្រោះដោយសារផេះធ្លាក់ចុះមកយ៉ាងក្រាស់ឃ្មឹក។ អភិបាលក្រុង Camalig ដែលស្ថិតនៅក្បែរជើងភ្នំភ្លើងនោះ បានរៀបរាប់ថា ផេះបានធ្លាក់ចុះមកក្រាស់ខ្លាំង រហូតដល់អ្នកធ្វើដំណើរតាមផ្លូវជាតិមើលអ្វីមិនឃើញឡើយ ហើយអ្នកភូមិខ្លះបានភ័យស្លន់ស្លោជាខ្លាំង។ ក្រៅពីការភ័យខ្លាច ផេះភ្នំភ្លើងនេះ ក៏បានបំផ្លាញចម្ការបន្លែរបស់អ្នកស្រុក និងបណ្ដាលឲ្យសត្វពាហនៈ ដូចជា ក្របី និងគោ ងាប់អស់មួយចំនួនផងដែរ។

អ្នកជំនាញខាងភ្នំភ្លើងហ្វីលីពីន បានបញ្ជាក់ថា បើទោះបីជាស្ថានភាពនៅថ្ងៃចន្ទនេះ ហាក់មានភាពស្ងប់ស្ងាត់ឡើងវិញបន្តិចមែន ប៉ុន្តែគ្រោះថ្នាក់នៅតែមានជានិច្ច ព្រោះភ្នំភ្លើង Mayon គឺជាភ្នំភ្លើងដែលសកម្មបំផុត ក្នុងចំណោមភ្នំភ្លើងទាំង ២៤ នៅក្នុងប្រទេសហ្វីលីពីន។ ភ្នំភ្លើងនេះ មានកម្ពស់ជាង ២ ៤០០ម៉ែត្រ និងមានរូបរាងស្រួចស្អាត ដែលទាក់ទាញភ្ញៀវទេសចរជាច្រើន ប៉ុន្តែវាក៏បង្កប់នូវគ្រោះថ្នាក់ដែលមិនអាចស្មានទុកជាមុនបានដែរ។

មកដល់ពេលនេះ អាជ្ញាធរនៅតែបន្តដាក់កម្រិតប្រុងប្រយ័ត្ននៅកម្រិតទី៣ នៅឡើយ ខណៈដែលការបោសសម្អាតផេះចេញពីលំនៅឋាន និងផ្លូវថ្នល់កំពុងធ្វើឡើងយ៉ាងសស្រាក់សស្រាក់។ មន្ត្រីជំនាញ បានក្រើនរំលឹកដល់ប្រជាពលរដ្ឋឲ្យរក្សាភាពស្ងប់ស្ងាត់ ប៉ុន្តែត្រូវត្រៀមខ្លួនជានិច្ច ព្រោះបើស្ថានភាពកាន់តែអាក្រក់ ហើយឈានដល់ការផ្ទុះខ្លាំងក្នុងកម្រិតទី៥ នោះវានឹងក្លាយជាគ្រោះមហន្តរាយដ៏ធំ ដែលគំរាមកំហែងដល់អាយុជីវិតជាក់ជាមិនខាន៕

(រូបថត៖ AP)

ប្រែសម្រួល៖ ឈាង

The post ជម្លៀសពលរដ្ឋជាង ៣០០គ្រួសារ ក្រោយភ្នំភ្លើង Mayon ព្រួសផេះយ៉ាងសន្ធោសន្ធៅ នៅហ្វីលីពីន appeared first on Kampuchea Thmey Daily.

ភ្នំភ្លើងនៅម៉ិកស៊ិក ចាប់ផ្តើមរង្គើ បន្ទាប់ពីគ្មានសកម្មភាពជាង៥០ឆ្នាំ

Minea Neu — Wed, 11 Feb 2026 12:00:00 +0000

ភ្នំភ្លើងដ៏ធំមួយនៅប្រទេសម៉ិកស៊ិកស្ថិតក្នុងចំណោមភ្នំភ្លើងដ៏គ្រោះថ្នាក់បំផុតរបស់ពិភពលោកចាប់ផ្តើមរង្គោះរង្គើ បន្ទាប់ពីស្ងៀមស្ងាត់ គ្មានសកម្មភាពអ្វីអស់រយៈពេលជិតកន្លះសតវត្សរ៍។

ភ្នំភ្លើងរបស់ម៉ិកស៊ិក។ Reuters

យោងតាមការចុះផ្សាយ Express UK នៅថ្ងៃទី១០ខែកុម្ភៈ ភ្នំភ្លើង El Chichon របស់ម៉ិកស៊ិកបានផ្ទុះចុងក្រោយក្នុងឆ្នាំ ១៩៨២ តែការផ្ទុះនេះមិនបង្ហាញពីមហន្តរាយអ្វីឡើយ។ វាជាការផ្ទុះស្ពាន់ធ័រខ្ពស់ និងសារធាតុ magma ដែលសម្បូរទៅដោយជាតិអ៊ីដ្រូអ៊ីត បំផ្លាញលំហកំពូល និងបញ្ចេញកម្អែភ្នំភ្លើង ជាពិសេសហក់ឡើងលើមានកាំ ៨ គីឡូម៉ែត្រ។

ត្រឹមតែជាងមួយសប្តាហ៍ នៅឆ្នាំដដែល ការផ្ទុះភ្នំភ្លើងចំនួនបីបានបន្សល់ទុកនូវ សោកនាដកម្ម មនុស្សស្លាប់ និងការបំផ្លិចបំផ្លាញ។ មនុស្សរាប់ពាន់នាក់ត្រូវបានសម្លាប់ ភូមិទាំងមូលរបស់ពួកគេ បានបាត់ពីផែនទី ហើយមនុស្សជាច្រើននាក់ទៀត ភៀសខ្លួន ប្រឈមនឹងភាពអស់សង្ឃឹម ក្នុងការរត់គេចចេញពីគ្រោះថ្នាក់ដ៏ធំនេះ។

លើសពីនេះ ឯកសារស្រាវជ្រាវឆ្នាំ ២០១៧ បានបង្ហាញថាការផ្ទុះមួយរបស់ភ្នំភ្លើង El Chichón នៅសតវត្សទី ៦ អាចជាព្រឹត្តិការណ៍បញ្ចប់ជីវិតមនុស្ស សត្វ ហេដ្ឋារចនាសម្ព័ន្ធជាច្រើន។ អ្នកវិទ្យាសាស្ត្រជឿថា វាអាចរួមចំណែកដល់ការដួលរលំនៃអរិយធម៌ម៉ាយ៉ាន( Mayan) ដោយទម្លាក់តំបន់នេះទៅជា «យុគងងឹត» ដ៏យូរមួយសតវត្សរ៍។

ឥឡូវនេះនៅឆ្នាំ ២០២៦ អ្នកស្រាវជ្រាវកំពុងតាមដានការផ្ទុះភ្នំភ្លើង បានរកឃើញការផ្លាស់ប្តូរគួរឱ្យព្រួយបារម្ភ នៅក្រោមផ្ទៃផែនដី និងនៅក្នុងភ្នំភ្លើងវាខ្លួនឯង ជាសញ្ញាចង្អុលទៅការវិលត្រឡប់នៃអាកប្បកិរិយាចាស់ នៃភាពសកម្ម និងគ្រោះថ្នាក់របស់ El Chichón។

យោងតាមសារព័ត៌មានបរិស្ថាន Green Matters អ្នកវិទ្យាសាស្ត្រមកពីសាកលវិទ្យាល័យស្វយ័តជាតិម៉ិកស៊ិក (UNAM) បានតាមដានចលនារបស់ភ្នំភ្លើងនៅពាក់កណ្តាលឆ្នាំ ២០២៥ ថាមានចលនាជាប់ៗគ្នា នៅក្នុងរណ្ដៅភ្នំភ្លើង El Chichón។

ចំណែក ការស្រាវជ្រាវក្នុងឆ្នាំ ២០២៥ ដោយលោកវេជ្ជបណ្ឌិត Paz បង្ហាញថាអន្តរកម្ម magma-hydrothermal ថ្មីកំពុងកើតឡើង ក្នុងភ្នំភ្លើង El Chichón។ ពាក្យសាមញ្ញ មានន័យថាការកើនឡើងនៃសារធាតុ magma ក្តៅកំពុងប៉ះនឹងទឹកនៅក្រោមផែនដី វាអាចបង្កើតជាចំហាយ សម្ពាធ និងការផ្ទុះ។ អន្តរកម្ម magma-hydrothermal នេះអាចនាំឱ្យមានការផ្ទុះភ្នំភ្លើងធំ។

ទោះបីជាមានការព្រួយបារម្ភកាន់តែខ្លាំងក៏ដោយ អ្នកវិទ្យាសាស្ត្រម៉ិកស៊ិកបាននិយាយថា ការបំភាយឧស្ម័នបែបនេះ គឺជារឿងធម្មតានៅក្នុងប្រព័ន្ធ hydrothermal សកម្ម ហើយគ្មានការរកឃើញណា បញ្ជាក់ថាការផ្ទុះនឹងជិតមកដល់នោះទេ។

យ៉ាងណា ក្រុមអ្នកស្រាវជ្រាវកំពុងតាមដានជាបន្តបន្ទាប់នូវការផ្លាស់ប្តូរ ដែលរីកដុះដាលនៅក្រោមផ្ទៃនៃភ្នំក្តៅ របស់ប្រទេសម៉ិកស៊ិក ដោយប្រើយន្តហោះគ្មានមនុស្សបើក(Drone) ឧបករណ៍ចាប់សញ្ញាផ្កាយរណប និងឧបករណ៍ផ្សេងទៀតនៅនឹងកន្លែងនោះ។

អ្នកវិទ្យាសាស្រ្តកំពុងតាមដានរាល់ការផ្លាស់ប្តូរ ទប់ស្កាត់ការកើតឡើងម្តងទៀតនៃគ្រោះមហន្តរាយ ដូចឆ្នាំ ១៩៨២ ដោយធានាឱ្យទាន់ពេលវេលា ចំពោះសុវត្ថិភាពសាធារណជន។

ចំណែកមន្ត្រីជំនាញបញ្ជាក់ថា ពេលនេះមិនមានអ្វីនាំឱ្យមានការភ្ញាក់ផ្អើលជាសាធារណៈឡើយ។ យ៉ាងណាសកម្មភាពជាថ្មីរបស់យើង គឺអាចផ្លាស់ប្តូរវាបាន។ ប៉ុន្តែភ្នំភ្លើងវានៅស្ងៀម កម្រអសកម្មណាស់ បើទោះបីជាវាស្ងប់ស្ងាត់គួរឱ្យសង្ស័យជិត ៥០ ឆ្នាំក៏ដោយ៕

ប្រែសម្រួល៖ ណឺ មិនា

The post ភ្នំភ្លើងនៅម៉ិកស៊ិក ចាប់ផ្តើមរង្គើ បន្ទាប់ពីគ្មានសកម្មភាពជាង៥០ឆ្នាំ appeared first on Kampuchea Thmey Daily.

ភ្នំភ្លើង Semeru របស់ឥណ្ឌូណេស៊ី ផ្ទុះ៦ដងផ្ទួនៗក្នុងមួយថ្ងៃ ឈានដល់ប្រកាសអាសន្ន

Sok Sovann — Mon, 22 Dec 2025 00:25:33 +0000

ត្រឹមមួយថ្ងៃប៉ុណ្ណោះ ភ្នំភ្លើង Semeru របស់ឥណ្ឌូណេស៊ី បានផ្ទុះរហូតដល់ទៅ៦លើក ធ្វើឲ្យអាជ្ញាធរ ប្រកាសអាសន្នកម្រិតខ្ពស់បំផុត។

ភ្នំភ្លើង Semeru ផ្ទុះ (រូបថត៖ Alamy)

តាមការផ្សាយរបស់ The Star, ភ្នំភ្លើងស្ថិតនៅខេត្តជ្វាខាងកើតមួយនេះ បានចាប់ផ្តើមផ្ទុះនៅម៉ោង ៥:៤៦នាទីព្រឹកថ្ងៃអាទិត្យទី២១ខែធ្នូឆ្នាំ២០២៥ បាញ់ផេះឡើងកម្ពស់១ ២០០ម៉ែត្រ។

ដោយសារតែហានិភ័យគ្រោះថ្នាក់ ភ្នាក់ងារសង្គ្រោះរបស់ឥណ្ឌូណេស៊ី បានចេញការព្រមាន មិនឲ្យនរណាម្នាក់ ចូលក្នុងរង្វង់ចម្ងាយ១៣គីឡូម៉ែត្រ នៅជុំវិញភ្នំភ្លើងនេះដាច់ខាត។

ភ្នំភ្លើង Semeru ផ្ទុះ (រូបថត៖ Alamy)

ទោះបីជាយ៉ាងណាក៏ដោយ មិនមាននរណាម្នាក់រងរបួស ឬមានសេចក្តីរាយការណ៍អំពីការខូចខាត បណ្តាលមកពីការផ្ទុះលើកនេះនោះទេ។

សូមជម្រាបថា Semeru ស្ថិតក្នុងចំណោមភ្នំភ្លើងសកម្មជិត ១៣០ភ្នំរបស់ឥណ្ឌូណេស៊ី។ ការផ្ទុះដ៏ធំលើកចុងក្រោយរបស់ភ្នំនេះ គឺកាលពីឆ្នាំ២០២១ ដែលបានសម្លាប់មនុស្ស៥១នាក់ និងរបួសរាប់រយនាក់ ហើយជម្លៀសមនុស្សជាង ១០ ០០០នាក់៕

អត្ថបទ៖ សុខ សុវណ្ណ

ឥណ្ឌូណេស៊ី ប្រកាសអាសន្នភ្នំភ្លើង Lewotobi Laki-laki ដល់កម្រិតខ្ពស់បំផុត ក្រោយពីផ្ទុះ៨ដងជាប់ៗគ្នា

The post ភ្នំភ្លើង Semeru របស់ឥណ្ឌូណេស៊ី ផ្ទុះ៦ដងផ្ទួនៗក្នុងមួយថ្ងៃ ឈានដល់ប្រកាសអាសន្ន appeared first on Kampuchea Thmey Daily.

ផ្ទុះភ្នំភ្លើងបង្ខំឱ្យមានការជម្លៀសប្រជាជននៅហ្គាតេម៉ាឡា

Bun sopheap — Fri, 06 Jun 2025 08:37:02 +0000

យោងតាមការចេញផ្សាយរបស់ទីភ្នាក់ងារព័ត៌មាន AFP នៅថ្ងៃទី០៦ខែឧសភានេះ អាជ្ញាធរប្រទេសហ្គាតេម៉ាឡាបានផ្តួចផ្តើមការជម្លៀសអ្នកស្រុកជាង ៥០០នាក់ បន្ទាប់ពីភ្នំភ្លើង Fuego ដែលជាភ្នំភ្លើងសកម្មបំផុតរបស់អាមេរិកកណ្តាលបានផ្ទុះ បញ្ចេញផេះ និងផ្សែងពុលទៅក្នុងបរិយាកាស។

ភ្នំភ្លើងកំពុងផ្ទុះ។ រូបភាព៖ Reuters

សហគមន៍ដែលរងផលប៉ះពាល់ដែលមានទីតាំងនៅជិតភ្នំភ្លើងប្រហែល ៣៥គីឡូម៉ែត្រពីទីក្រុង Guatemala ត្រូវបានផ្លាស់ប្តូរយ៉ាងលឿនទៅកាន់ជម្រកសង្គ្រោះបន្ទាន់ដើម្បីធានាសុវត្ថិភាពរបស់ពួកគេ។

ការផ្ទុះនេះបានជំរុញឱ្យរដ្ឋាភិបាលផ្អាកសកម្មភាពសាលារៀនក្នុងតំបន់ និងបិទផ្លូវធំដែលតភ្ជាប់ភាគខាងត្បូងហ្គាតេម៉ាឡាទៅកាន់ទីក្រុងប្រវត្តិសាស្ត្រ Antigua ដែលជាតំបន់បេតិកភណ្ឌពិភពលោករបស់អង្គការយូណេស្កូ។ ការជម្លៀសនេះដើម្បីប្រុងប្រយ័ត្ន និងជាវិធានការបង្ការដែលបានធ្វើឡើង ដើម្បីជៀសវាងការស្លាប់ និងរបួស ខណៈដែលអ្នកស្រុកភ៧យខ្លាចពីផលវិបាកដ៏សាហាវនៃការផ្ទុះកាលពីអតីតកាល។

ភ្នំភ្លើង Fuego មានប្រវត្តិផ្ទុះខ្លាំងកាលពីឆ្នាំ ២០១៨ ដែលបានឆក់យកជីវិតមនុស្ស ២១៥ នាក់ ដោយចំនួនស្រដៀងគ្នានេះត្រូវបានគេរាយការណ៍ថាបានបាត់ខ្លួនបន្ទាប់ពីលំហូរកម្អែភ្នំភ្លើងបានគ្របដណ្តប់ភូមិក្បែរនោះ។ ការជម្លៀសស្រដៀងគ្នានេះក៏បានកើតឡើងក្នុងប៉ុន្មានឆ្នាំថ្មីៗនេះ រួមទាំងមួយកាលពីដើមខែមីនា ដោយគូសបញ្ជាក់ពីការគំរាមកំហែងជាបន្តបន្ទាប់ដែលភ្នំភ្លើងបង្កឡើងដល់សហគមន៍ក្បែរនោះ។

មកដល់ពេលនេះអាជ្ញាធរហ្គាតេម៉ាឡានៅតែបន្តតាមដានស្ថានការណ៍យ៉ាងដិតដល់ ខណៈដែលក្រុមសង្គ្រោះបន្ទាន់សម្របសម្រួលកិច្ចខិតខំប្រឹងប្រែងជួយសង្គ្រោះ និងវាយតម្លៃសកម្មភាពភ្នំភ្លើងដែលកំពុងបន្ត៕

(រូបភាព៖ Reuters) ភ្នំភ្លើង Fuego ផ្ទុះកាលពីឆ្នាំ២០១៨

អត្ថបទ៖ ប៊ុន សុភាព

The post ផ្ទុះភ្នំភ្លើងបង្ខំឱ្យមានការជម្លៀសប្រជាជននៅហ្គាតេម៉ាឡា appeared first on Kampuchea Thmey Daily.

អ្នកវិទ្យាសាស្រ្ត ព្រមានពីការផ្ទុះភ្នំភ្លើងយក្ស ដែលអាចបង្កមហន្តរាយនៅអឺរ៉ុប

Sok Sovann — Thu, 29 May 2025 09:37:44 +0000

ក្រុមអ្នកវិទ្យាសាស្រ្តកំពុងបារម្ភខ្លាំងមែនទែនចំពោះភ្នំភ្លើងយក្ស Campi Flegrei នៅប្រទេសអ៊ីតាលី ដែលមួយរយៈចុងក្រោយនេះបានកម្រើកចេញសកម្មភាពគួរឲ្យកត់សម្គាល់ ខណៈមានការព្រមានថា វាអាចផ្ទុះក្នុងពេលឆាប់ៗហើយបើផ្ទុះមែន វានឹងបង្កើតជាកម្លាំងដ៏មហិមា អាចឲ្យទ្វីបអឺរ៉ុបជួបមហន្តរាយបាន។

ភ្នំភ្លើងយក្ស Campi Flegrei (រូបថត៖ Reuters)

Daily Mail ចុះផ្សាយនៅថ្ងៃព្រហស្បតិ៍ទី២៩ខែឧសភាថា ក្នុងរយៈពេល៦ខែចុងក្រោយ ភ្នំ Campi Flegrei បានបង្កជាការរញ្ជួយតូចជាង ៣ ០០០លើក ខណៈក្នុងខែឧសភានេះ តំបន់ Phlegraean Fields នៅទីនោះ ត្រូវវាយប្រហារដោយរញ្ជួយដីកម្រិត ៤.៤រ៉ិចទ័រ ដែលជាកម្លាំងខ្លាំងបំផុតមិនធ្លាប់មានសោះក្នុងរយៈពេល៤០ឆ្នាំ។

តាមការឲ្យដឹងពីក្រុមអ្នកវិទ្យាសាស្រ្ត សកម្មភាពរញ្ជួយដ៏ញឹកបែបនេះ អាចរុញសិលាម៉ាក់ម៉ារបស់ភ្នំភ្លើងឡើងមកផ្ទៃខាងលើ ធ្វើឲ្យស្រទាប់ភ្នំភ្លើងកាន់តែស្តើង ងាយនឹងការផ្ទុះជាទីបំផុត។

មិនត្រឹមប៉ុណ្ណឹង អ្នកវិទ្យាសាស្រ្តក៏សង្កេតឃើញមានការបាញ់ឧស្ម័នកាបូនឌីអុកស៊ីដចេញពីភ្នំភ្លើងកាន់តែខ្លាំងផងដែរ ពោលគឺមួយថ្ងៃមានកម្រិត ៤ ០០០ទៅ៥ ០០០តោន ដែលនេះជាសញ្ញាព្រមាននៃហានិភ័យផ្ទុះខ្លាំង។

ភ្នំភ្លើងមួយនៅអឺរ៉ុប (រូបថត៖ Pixarbay)

យោងតាមលោក Christopher R. J. Kilburn អ្នកជំនាញភ្នំភ្លើងឈានមុខគេនៅវិទ្យាស្ថានជាតិភូគព្ភសាស្ត្រនិងភ្នំភ្លើងអ៊ីតាលី (IGNV) បានឲ្យដឹងថា ភ្នំភ្លើងយក្ស Campi Flegrei កំពុងបង្កការគំរាមកំហែងយ៉ាងធ្ងន់ធ្ងរដល់មនុស្សជាង ៤លាននាក់ដែលរស់នៅក្នុងតំបន់ទីប្រជុំជននៃទីក្រុង Naples។

ប្រសិនបើវាផ្ទុះ ការខូចខាតអាចនឹងរីករាលដាលធំធេង ដូចជាអគារនានាអាចត្រូវបានបំផ្លាញដោយលំហូរកម្អែ ពពកផេះ និងឧស្ម័នក្តៅដែលផ្លាស់ទីយ៉ាងលឿន បង្កើតជាវិបត្តិអាកាសធាតុ ប៉ះពាល់ខ្លាំងដល់សុខភាពមនុស្សនៅអឺរ៉ុប។ លើសពីនេះ ផ្លូវថ្នល់ ការផ្គត់ផ្គង់ទឹកស្អាតនិងថាមពល អាចត្រូវកាត់ផ្តាច់ ដែលធ្វើឲ្យជីវិតមនុស្សមានគ្រោះថ្នាក់និងធ្លាក់ចូលភាពវឹកវរ ហើយជះឥទ្ធិពលដល់ផ្នែកជាច្រើននៃទ្វីបនេះ។

សូមជម្រាបថា ភ្នំភ្លើង Campi Flegrei ផ្ទុះលើកចុងក្រោយបំផុតនៅឆ្នាំ១៥៣៨ ហើយដ្បិតតែវាមិនផ្ទុះញឹកញាប់ក៏ដោយ ប៉ុន្តែភ្នំភ្លើងនេះបានបង្ហាញសញ្ញានៃស្ថានភាពមិនស្រួលក្នុងរយៈពេលប៉ុន្មានទសវត្សរ៍ថ្មីៗនេះ៕

អត្ថបទ៖ សុខ សុវណ្ណ

ចុចអាន៖ ឥណ្ឌូណេស៊ី ប្រកាសអាសន្នភ្នំភ្លើង Lewotobi Laki-laki ដល់កម្រិតខ្ពស់បំផុត ក្រោយពីផ្ទុះ៨ដងជាប់ៗគ្នា

The post អ្នកវិទ្យាសាស្រ្ត ព្រមានពីការផ្ទុះភ្នំភ្លើងយក្ស ដែលអាចបង្កមហន្តរាយនៅអឺរ៉ុប appeared first on Kampuchea Thmey Daily.

ឥណ្ឌូណេស៊ី ប្រកាសអាសន្នភ្នំភ្លើង Lewotobi Laki-laki ដល់កម្រិតខ្ពស់បំផុត ក្រោយពីផ្ទុះ៨ដងជាប់ៗគ្នា

Chheang — Mon, 19 May 2025 07:00:57 +0000

យោងតាមការចុះផ្សាយនៅថ្ងៃចន្ទទី១៩ខែឧសភាឆ្នាំ២០២៥របស់ទីភ្នាក់ងារព័ត៌មាន Reuters អាជ្ញាធរឥណ្ឌូណេស៊ី បានប្រកាសអាសន្ននៃភ្នំភ្លើង Lewotobi Laki-laki ដល់កម្រិតខ្ពស់បំផុត បន្ទាប់ពីវាបានផ្ទុះចំនួន៨ដងជាប់ៗគ្នាកាលពីចុងសប្តាហ៍។

ភ្នំភ្លើង Lewotobi Laki-Laki (រូបថត៖ Reuters)

ក្រោយការផ្ទុះ ភ្នំភ្លើងដ៏សកម្មនេះបានព្រួសពពកផេះហោះឡើងពាសពេញផ្ទៃមេឃក្នុងកម្ពស់ពី៣ទៅ៥,៥គីឡូម៉ែត្រកាលពីថ្ងៃអាទិត្យនៅវេលាម៉ោង៨យប់។ Lewotobi Laki-laki ដែលជាភ្នំភ្លើងភ្លោះកម្ពស់ ១ ៧០៣ម៉ែត្រ នៅលើកោះទេសចរណ៍ Flores នៅតែបន្តបញ្ចេញពពកផេះបន្ថែមទៀតនៅព្រឹកថ្ងៃនេះនៅកម្ពស់ ១,២គីឡូម៉ែត្រពីលើរណ្ដៅរបស់វា។ លោក Muhammad Wafid ប្រធានទីភ្នាក់ងារភូគព្ភសាស្ត្ររបស់ឥណ្ឌូណេស៊ី បាននិយាយថា «ការវិភាគរបស់យើងបានបង្ហាញថា សកម្មភាពរបស់ភ្នំភ្លើង Lewotobi Laki-laki នៅតែមានកម្រិតខ្ពស់នៅឡើយ» ដោយបានព្រមានអំពីការផ្ទុះដ៏ធំថែមទៀត។

អ្នកស្រុកត្រូវបានគេណែនាំឲ្យជម្លៀសចេញចម្ងាយ៦គីឡូម៉ែត្រជុំវិញភ្នំភ្លើង ហើយត្រូវពាក់ម៉ាស់ដើម្បីការពារប្រឆាំងនឹងការស្រូបផេះ។ អាជ្ញាធរក៏បានព្រមានផងដែរអំពីហានិភ័យនៃលំហូរកម្អែរត្រជាក់ដែលមានប្រភពចេញពីភ្នំភ្លើង ជាពិសេសប្រសិនបើមានភ្លៀងធ្លាក់ខ្លាំង ដែលអាចនាំឲ្យមានភក់ និងកម្ទេចកម្ទីដ៏គ្រោះថ្នាក់ជន់លិចនៅក្នុងទន្លេ។

កាលពីខែមីនា ការផ្ទុះនៅភ្នំភ្លើង Lewotobi Laki-laki បាននាំឲ្យមានការរំខានដល់ការហោះហើរ ក្នុងនោះមានការលុបចោល និងពន្យារពេលនៅក្រុមហ៊ុនអាកាសចរណ៍ជាច្រើន ដូចជា Jetstar និង Qantas Airways។ ការផ្ទុះដ៏ធ្ងន់ធ្ងរជាងនេះកើតឡើងក្នុងខែវិច្ឆិកាឆ្នាំ២០២៤ ដែលបានបណ្តាលឲ្យមនុស្សយ៉ាងហោចណាស់៩នាក់បានស្លាប់ និងរាប់ពាន់នាក់ត្រូវបានជម្លៀសចេញ។

សូមបញ្ជាក់ថា ឥណ្ឌូណេស៊ី គឺជាប្រទេសមួយស្ថិតនៅក្នុងតំបន់ “រង្វង់ភ្លើង” ឬហៅថា “Ring of Fire” ដែលគ្រោះរញ្ជួយដី និងបន្ទុះភ្នំភ្លើងគឺជារឿងដែលការកើតឡើងជាញឹកញាប់។ ភ្នំភ្លើងសកម្មនៅឥណ្ឌូណេស៊ី មានចំនួនសរុប ១២៧កន្លែង៕

(រូបថត៖ Reuters)

ដោយ៖ ឈាង

The post ឥណ្ឌូណេស៊ី ប្រកាសអាសន្នភ្នំភ្លើង Lewotobi Laki-laki ដល់កម្រិតខ្ពស់បំផុត ក្រោយពីផ្ទុះ៨ដងជាប់ៗគ្នា appeared first on Kampuchea Thmey Daily.

ភ្នំភ្លើងនៅអាឡាស្កា ជិតផ្ទុះជាមួយកម្លាំងដ៏ខ្លាំង ខណៈអ្នកជំនាញព្រមានពីគ្រោះថ្នាក់ធ្ងន់ធ្ងរ

Sok Sovann — Wed, 30 Apr 2025 08:15:36 +0000

ដោយដកស្រង់ប្រភពពីទីភ្នាក់ងារសង្កេតភ្នំភ្លើងអាឡាស្កា (AVO), ក្រុមអ្នកជំនាញព្រមានថា ភ្នំភ្លើងSpurr នៅរដ្ឋភាគពាយព្យសហរដ្ឋអាមេរិកមួយនេះ ជិតផ្ទុះហើយ ហើយការផ្ទុះនោះក៏នឹងមានកម្លាំងខ្លាំងទៀតផង ជាហេតុបង្កគ្រោះថ្នាក់ដល់មនុស្សនិងផលប៉ះពាល់ធ្ងន់ធ្ងរ ពិសេសចំពោះវិស័យអាកាសចរណ៍តែម្តង។

(រូបថត៖ USGS)

មួយរយៈចុងក្រោយនេះ គេសង្កេតឃើញភ្នំភ្លើងបញ្ចេញសកម្មភាពគួរឲ្យព្រួយបារម្ភ ហើយថែមទាំងមានការរញ្ជួយដីជាច្រើនលើកច្រើនសានៅផ្ទៃខាងក្រោមភ្នំភ្លើងផងដែរ។

តាមការចុះផ្សាយរបស់ Daily Mail កាលពីថ្ងៃអង្គារទី២៩ខែមេសាឆ្នាំ២០២៥, អ្នកជំនាញព្រមានថា ភ្នំភ្លើងនេះអាចផ្ទុះនៅប៉ុន្មានសប្តាហ៍ឬប៉ុន្មានខែខាងមុខក៏ថាបាន ហើយពោរពេញដោយកម្លាំងខ្លាំង ដូច្នេះប្រជាពលរដ្ឋនៅជិតៗនោះ ត្រូវប្រុងប្រៀបខ្លួននិងស្តាប់សេចក្តីជូនដំណឹងឲ្យជាប់ជានិច្ច ចៀសវាងគ្រោះថ្នាក់ដល់អាយុជីវិត។

(រូបថត៖ Anadolu)

ក្នុងករណីភ្នំនេះផ្ទុះ វាមិនមែនត្រឹមជះឥទ្ធិពលដល់មនុស្សប៉ុណ្ណោះទេ ប៉ុន្តែវាក៏បង្កផលប៉ះពាល់ខ្លាំងក្លាចំពោះវិស័យអាកាសចរណ៍ផងដែរព្រោះថា វានឹងបាញ់ផេះឡើងលើមេឃ ធ្វើឲ្យយន្តហោះ ហោះមិនកើត។

អាកាសយានដ្ឋានធំបំផុតចំនួន២គឺ Ted Stevens Anchorage International Airport (ANC) និង Fairbanks International Airport (FAI) នឹងត្រូវបិទទ្វារដើម្បីសុវត្ថិភាព ធ្វើឲ្យជើងហោះហើរត្រូវពន្យាពេលឬលុបចោលតែម្តង។ កត្តានេះ មិនមែនប៉ះពាល់ត្រឹមជើងហោះហើរដឹកអ្នកដំណើរទេ តែវាក៏ប៉ះពាល់យន្តហោះដឹកទំនិញផងដែរ ជាហេតុធ្វើឲ្យរំខានដល់ខ្សែសង្វាក់ផ្គត់ផ្គង់ជាសកល។

(រូបថត៖ USGS)

សូមជម្រាបថា ភ្នំភ្លើង Spurr មានកម្ពស់ ៣ ៣៥៣ម៉ែត្រស្ថិតនៅចម្ងាយប្រហែល១២៨គីឡូម៉ែត្រពីទីក្រុង Anchorage ដែលមានប្រជាជនជិត ៣០០ ០០០នាក់។

ភ្នំភ្លើងនេះបានផ្ទុះលើកចុងក្រោយក្នុងឆ្នាំ១៩៩២ ដែលកាលនោះ ព្រលាន ANC ត្រូវបិទអស់រយៈពេល ២០ម៉ោង ហើយពពកផេះបានគ្របដណ្តប់ពាសពេញទីក្រុង Anchorage៕

អត្ថបទ៖ សុខ សុវណ្ណ

ចុចអាន៖ ផ្ទុះភ្នំភ្លើងនៅហ្វីលីពីន ព្រួសផ្សែងផេះកម្ពស់ ៤ ០០០ម៉ែត្រ

The post ភ្នំភ្លើងនៅអាឡាស្កា ជិតផ្ទុះជាមួយកម្លាំងដ៏ខ្លាំង ខណៈអ្នកជំនាញព្រមានពីគ្រោះថ្នាក់ធ្ងន់ធ្ងរ appeared first on Kampuchea Thmey Daily.

ភ្នំភ្លើង Archives - Kampuchea Thmey Daily

ផេះ​​​ផ្ទុះ​ចេញ​ពី​ភ្នំភ្លើង​ Mayon នៅ​ហ្វីលីពីន​ គ្រប់​ដណ្តប់​លើ​ផ្ទៃ​ដីជាង ៨ ៥០០ហិកតា

ជម្លៀស​ពលរដ្ឋជាង ៣០០គ្រួសារ ក្រោយ​ភ្នំភ្លើង Mayon ព្រួសផេះយ៉ាងសន្ធោសន្ធៅ នៅ​ហ្វីលីពីន

ភ្នំភ្លើងនៅ​ម៉ិក​ស៊ិក ចាប់​ផ្តើម​​រង្គើ បន្ទាប់​ពីគ្មាន​សកម្មភាព​ជាង៥០ឆ្នាំ

ភ្នំភ្លើង Semeru របស់ឥណ្ឌូណេស៊ី ផ្ទុះ៦ដងផ្ទួនៗក្នុងមួយថ្ងៃ ឈានដល់ប្រកាសអាសន្ន

ផ្ទុះ​ភ្នំភ្លើង​បង្ខំ​ឱ្យ​មានការ​ជម្លៀស​ប្រជាជននៅហ្គាតេម៉ាឡា

អ្នកវិទ្យាសាស្រ្ត ព្រមានពីការផ្ទុះភ្នំភ្លើងយក្ស ដែលអាចបង្កមហន្តរាយនៅអឺរ៉ុប

ឥណ្ឌូណេស៊ី ប្រកាសអាសន្នភ្នំភ្លើង Lewotobi Laki-laki ​ដល់​កម្រិត​ខ្ពស់​បំផុត ក្រោយ​ពី​ផ្ទុះ​៨ដង​ជាប់ៗ​គ្នា

ភ្នំភ្លើងនៅអាឡាស្កា ជិតផ្ទុះជាមួយកម្លាំងដ៏ខ្លាំង ខណៈអ្នកជំនាញព្រមានពីគ្រោះថ្នាក់ធ្ងន់ធ្ងរ

ផេះផ្ទុះចេញពីភ្នំភ្លើង Mayon នៅហ្វីលីពីន គ្រប់ដណ្តប់លើផ្ទៃដីជាង ៨ ៥០០ហិកតា

ជម្លៀសពលរដ្ឋជាង ៣០០គ្រួសារ ក្រោយភ្នំភ្លើង Mayon ព្រួសផេះយ៉ាងសន្ធោសន្ធៅ នៅហ្វីលីពីន

ភ្នំភ្លើងនៅម៉ិកស៊ិក ចាប់ផ្តើមរង្គើ បន្ទាប់ពីគ្មានសកម្មភាពជាង៥០ឆ្នាំ

ផ្ទុះភ្នំភ្លើងបង្ខំឱ្យមានការជម្លៀសប្រជាជននៅហ្គាតេម៉ាឡា

ឥណ្ឌូណេស៊ី ប្រកាសអាសន្នភ្នំភ្លើង Lewotobi Laki-laki ដល់កម្រិតខ្ពស់បំផុត ក្រោយពីផ្ទុះ៨ដងជាប់ៗគ្នា