ជម្លៀស​ពលរដ្ឋជាង ៣០០គ្រួសារ ក្រោយ​ភ្នំភ្លើង Mayon ព្រួសផេះយ៉ាងសន្ធោសន្ធៅ នៅ​ហ្វីលីពីន

ភ្នំភ្លើងដ៏ល្បីល្បាញ Mayon របស់​ហ្វីលីពីន បានព្រួសផេះ និងផ្សែងខ្មៅគ្របដណ្តប់ពេញមេឃ ដែលបង្ខំឲ្យ​អាជ្ញាធរ​​ត្រូវជម្លៀសគ្រួសារជាង ៣០០គ្រួសារ ចេញពីផ្ទះសម្បែង ដើម្បីសុវត្ថិភាព។ នេះ​បើ​យោង​តាម​ការ​ចុះ​ផ្សាយ​របស់​សារព័ត៌មាន​ Channel News Asia នា​ថ្ងៃទី​៤ ខែ​ឧសភា ឆ្នាំ​២០២៦។

ហេតុការណ៍ដែលកើតឡើងកាលពីល្ងាចថ្ងៃសៅរ៍នោះ បានធ្វើឲ្យ​ភូមិចំនួន ៨៧ ក្នុងក្រុងចំនួន៣ ត្រូវរងគ្រោះដោយសារផេះធ្លាក់ចុះមកយ៉ាងក្រាស់ឃ្មឹក។ អភិបាលក្រុង Camalig ដែលស្ថិតនៅក្បែរជើងភ្នំភ្លើងនោះ បានរៀបរាប់ថា ផេះបានធ្លាក់ចុះមកក្រាស់ខ្លាំង រហូតដល់អ្នកធ្វើដំណើរតាមផ្លូវជាតិមើលអ្វីមិនឃើញឡើយ ហើយអ្នកភូមិខ្លះបានភ័យស្លន់ស្លោជាខ្លាំង។ ក្រៅពីការភ័យខ្លាច ផេះភ្នំភ្លើងនេះ ក៏បានបំផ្លាញចម្ការបន្លែរបស់អ្នកស្រុក និងបណ្ដាលឲ្យ​សត្វពាហនៈ ដូចជា ក្របី និងគោ ងាប់អស់មួយចំនួនផងដែរ។

អ្នកជំនាញខាងភ្នំភ្លើងហ្វីលីពីន បានបញ្ជាក់ថា បើទោះបីជាស្ថានភាពនៅថ្ងៃចន្ទនេះ ហាក់មានភាពស្ងប់ស្ងាត់ឡើងវិញបន្តិចមែន ប៉ុន្តែគ្រោះថ្នាក់នៅតែមានជានិច្ច ព្រោះភ្នំភ្លើង Mayon គឺជាភ្នំភ្លើងដែលសកម្មបំផុត ក្នុងចំណោមភ្នំភ្លើងទាំង ២៤ នៅក្នុងប្រទេសហ្វីលីពីន។ ភ្នំភ្លើងនេះ មានកម្ពស់ជាង ២ ៤០០ម៉ែត្រ និងមានរូបរាងស្រួច​​ស្អាត ដែលទាក់ទាញភ្ញៀវទេសចរជាច្រើន ប៉ុន្តែវាក៏បង្កប់នូវគ្រោះថ្នាក់ដែលមិនអាចស្មានទុកជាមុនបានដែរ។

មកដល់ពេលនេះ អាជ្ញាធរនៅតែបន្តដាក់កម្រិតប្រុងប្រយ័ត្ននៅកម្រិតទី៣ នៅឡើយ ខណៈដែលការបោសសម្អាតផេះចេញពីលំនៅឋាន និងផ្លូវថ្នល់កំពុងធ្វើឡើងយ៉ាងសស្រាក់សស្រាក់។ មន្ត្រីជំនាញ បានក្រើនរំលឹកដល់ប្រជាពលរដ្ឋ​ឲ្យរក្សាភាពស្ងប់ស្ងាត់ ប៉ុន្តែត្រូវត្រៀមខ្លួនជានិច្ច ព្រោះបើស្ថានភាពកាន់តែអាក្រក់ ហើយឈានដល់ការផ្ទុះខ្លាំងក្នុងកម្រិតទី៥ នោះវានឹងក្លាយជាគ្រោះមហន្តរាយដ៏ធំ ដែលគំរាមកំហែងដល់អាយុជីវិតជាក់ជាមិនខាន៕

ប្រែសម្រួល៖ ឈាង