មន្ត្រីជំនាញ Archives - Kampuchea Thmey Daily

មន្រ្តីជំនាញ ចុះពិនិត្យ និងប្រគល់-ទទួលវត្ថុសិល្បៈ នៅស្រុកបរិបូណ៌ មករក្សាទុកជាសម្បត្តិវប្បធម៌របស់ជាតិ

Ken Malis — Sat, 09 May 2026 02:32:38 +0000

ដោយបានគោលការណ៍អនុញ្ញាតពីលោក ប៊ុនថន សុខាណារិទ្ធ ប្រធានមន្ទីរ លោក សិត ស អនុប្រធានមន្ទីរវប្បធម៌ និងវិចិត្រសិល្ប:ខេត្តកំពង់ឆ្នាំង នាថ្ងៃទី៨ ខែឧសភា ឆ្នាំ២០២៦ បានដឹកនាំមន្រ្តីការិយាល័យជំនាញ ចុះពិនិត្យ និងប្រគល់-ទទួលវត្ថុសិល្បៈ នៅក្នុងវត្តសិរីសួស្តី ដែលស្ថិតក្នុងភូមិសិរី ឃុំខុនរ៉ង និងវត្តវិហារហ្លួង ស្ថិតក្នុងភូមិផ្សារ ឃុំផ្សារ ស្រុកបរិបូណ៌ ខេត្តកំពង់ឆ្នាំង។

ពិធីនេះមានការអញ្ជើញចូលរួមសហការ ពីលោកអភិបាលរងស្រុកបរិបូណ៌ នគរបាលបេតិកភណ្ឌនៃស្នងការដ្ឋាននគរខេត្តកំពង់ឆ្នាំង ប្រធានការិយាល័យសង្គមកិច្ចនិងសុខមាលភាពសង្គមនៃស្រុកបរិបូណ៌ អាជ្ញាធរមូលដ្ឋាន ព្រះសង្ឃ និងអាចារ្យគណកម្មការវត្តទាំងពីរផងដែរ។

ចំពោះវត្ថុសិល្បៈ ដែលព្រះសង្ឃនិងអាចារ្យគណៈកម្មការវត្តសិរីសួស្តី និងវត្តវហារហ្លួង បានប្រគល់-ទទួល មានដូចជា៖
១.បដិមា ធ្វើពីឈើ (វត្តសិរិសួស្តី), ២.បល្ល័ងព្រះពុទ្ធ ធ្វើពីឈើ (វត្តសិរីសួស្តី), ៣.គ្រែទេស ធ្វើពីឈើ (វត្តសិរិសួស្តី)
៤.គ្រែទេស ធ្វើពីឈើ (វត្តវិហារហ្លួង)។

សូមបញ្ជាក់ថា វត្ថុសិល្បៈខាងលើនេះ ក្រុមការងារជំនាញនឹងយកមកតម្កល់ទុកក្នុងសារមន្ទីរខេត្តកំពង់ឆ្នាំង ដើម្បីថែរក្សា ការពារ និងអភិរក្សទុកជាសម្បត្តិវប្បធម៌របស់ជាតិ៕

The post មន្រ្តីជំនាញ ចុះពិនិត្យ និងប្រគល់-ទទួលវត្ថុសិល្បៈ នៅស្រុកបរិបូណ៌ មករក្សាទុកជាសម្បត្តិវប្បធម៌របស់ជាតិ appeared first on Kampuchea Thmey Daily.

មន្ត្រីជំនាញនៃមន្ទីរបរិស្ថានខេត្តចុះបង្ក្រាបទីតាំងឡធ្យូង១កន្លែង ក្នុងដែនជម្រកសត្វព្រៃសំបូរ

Kang Tola — Sat, 24 Jan 2026 15:23:00 +0000

ទីតាំងឡធ្យូង១កន្លែង ដោយមានឡចំនួន ៣ ដែលកំពុងធ្វើសកម្មភាពកាប់ឈើ និងដុតអូសដើម្បីក្លាយជាធ្យូង ត្រូវបានមន្ត្រីឧទ្យានុរក្សដែនជម្រកសត្វព្រៃសំបូរ និងក្រុមល្បាតសហគមន៍អូរគ្រៀង ចុះបង្ក្រាបនិងកម្ទេចឡទាំងនោះចោល កាលពីថ្ងៃទី២៣ ខែមករា ឆ្នាំ២០២៦ ម្សិលម៉ិញនេះ។

ប្រភពពីមន្ត្រីជំនាញ បានឱ្យដឹងថា ក្នុងការចុះបង្ក្រាបករណីខាងលើនេះ ក្នុងពេលក្រុម មន្ត្រីឧទ្យានុរក្សដែនជម្រកសត្វព្រៃសំបូរ និងក្រុមល្បាតសហគមន៍អូរគ្រៀង បានធ្វើការចុះល្បាត ទប់ស្កាត់បទល្មើសធនធានធម្មជាតិ លុះមកដល់ត្រង់ចំណុច ស្រែត្រពាំងពុល (អូរព្រះ) ក្នុងដែនជម្រកសត្វព្រៃសំបូរ ក្នុងភូមិសាស្ត្រ ឃុំអូរគ្រៀង ស្រុកអូរគ្រៀង ខេត្តក្រចេះ ក៏ប្រទះឃើញឡធ្យូងខាងលើ កំពុងមានសកម្មភាពដុតបំផ្លាញអូសដែលកាត់ចេញពីក្នុងតំបន់អភិរក្សដើម្បីកែច្នៃទៅជាធ្យូងកំពុងមានសកម្មភាពភ្លាមៗក្រុមការងារល្បាតក៏បានបង្រ្កាបករណីលួចបង្កើតឡកែច្នៃផលនិងអនុផលធនធានធម្មជាតិ (ឡធ្យូង) ខុសច្បាប់។

ប្រភពបានបញ្ជាក់បន្ថែមថា ក្នុងពេលចុះបង្ក្រាបករណីខាងលើ មិនបានរកឃេីញជនសង្ស័យដែលជាអ្នកប្រព្រឹត្ត និងបង្កើតឡធ្យូងដោយគ្មានច្បាប់អនុញ្ញាតនោះទេ៕

អត្ថបទ ៖ ប្រុញ វិធិន

The post មន្ត្រីជំនាញនៃមន្ទីរបរិស្ថានខេត្តចុះបង្ក្រាបទីតាំងឡធ្យូង១កន្លែង ក្នុងដែនជម្រកសត្វព្រៃសំបូរ appeared first on Kampuchea Thmey Daily.

មន្ត្រីជំនាញ ជួសជុលកំណាត់ផ្លូវ ២៧១ មានជង្ហុកធំ តែងបង្កគ្រោះថ្នាក់ដល់ពលរដ្ឋធ្វើដំណើរ

អ៊ិន ពិសី — Mon, 20 Oct 2025 08:03:48 +0000

កំណាត់ផ្លូវ ២៧១ ដែលរងការខូចខាតរយៈពេលយូរ កំពុងត្រូវបានមន្ត្រីជំនាញជួសជុលអ៊ុតកៅស៊ូឡើងវិញជូនប្រជាពលរដ្ឋ ដើម្បីកាត់បន្ថយការលំបាក និងងាយស្រួលធ្វើដំណើរ។

ជាក់ស្ដែងបណ្ដោយចំណុចផ្លូវ ២៧១ ខូចខាតប្រវែង ៥០ ម៉ែត្រ នេះ ស្ថិតនៅក្បែរស្តុបបឹងទំនប់ រហូតទៅជិតដល់កែងផ្លូវ ជីបម៉ុង សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។

កញ្ញា ឈៀន បានឲ្យដឹងថា ផ្លូវជង្ហុកនេះខូចខាតរាងយូរគួរសមដែរ ហើយចំណុចនេះមានចរាចរណ៍មមាញឹក ឆ្លងកាត់ទៅមកច្រើន ដែលបង្កការលំបាករាល់ពេលធ្វើដំណើរឆ្លងកាត់។

កញ្ញា បានបន្តថា គាត់តែងឧស្សាហ៍ឃើញមានពលរដ្ឋអ្នកបើកម៉ូតូឆ្លងកាត់ តែងតែជិះធ្លាក់ចូលជង្ហុកនេះម្តងៗ ដោយខ្លះដួល ឯខ្លះទៀត ស្ទើរតែដួលទៅហើយ។ យ៉ាងណា ទោះបីចំណុចនេះមានការខូចត្រឹម ៥០ ម៉ែត្រ ក៏ពិតមែន ប៉ុន្តែមានជង្ហុករាងជ្រៅ ដែលជាហេតុប៉ះពាល់ដល់ការធ្វើដំណើររបស់ប្រជាពលរដ្ឋ ជាពិសេសពេលយប់ រួមមានធ្លាក់ភ្លៀង ជង្ហុកនេះបានដក់ទឹក បង្កឲ្យអ្នកឆ្លងកាត់មិនបានចាប់អារម្មណ៍ជិះធ្លាក់ដួលច្រើននាក់ហើយ។

លោក សុន ហៀង ជាពលរដ្ឋអ្នកប្រកបរបរចិញ្ចឹមជីវិតលើផ្លូវខាងលើនេះ បានអរគុណចំពោះការជួសជុលរបស់អាជ្ញាធរ។ លោកថា បន្ទាប់ពីមានការសំណូមពីពលរដ្ឋដែលជួបការលំបាកបញ្ហាផ្លូវខូច អាជ្ញាធរ តែងតែយកចិត្តទុកដាក់ដោះស្រាយបញ្ហាជានិច្ច ទោះបីជារាងយឺតបន្តិចក៏ដោយ។

ពាក់ព័ន្ធបញ្ហានេះ លោក កែវ សាវឿន ចៅសង្កាត់ចាក់អង្រែលើ បានឲ្យកម្ពុជាថ្មីដឹងថា អាជ្ញាធរខណ្ឌមានជ័យ បានចុះជួសជុលផ្លូវរងការខូចខាត ដោយសារទឹកភ្លៀង ព្រោះចំណុចនេះមិនមានលូសម្រាប់បង្ហូរទឹកនោះឡើយ ដែលធ្វើឲ្យពេលធ្លាក់ភ្លៀងមកទឹកដក់លើផ្លូវរហូតឈានដល់កើតមាននូវជង្ហុកបែបនេះ។

លោកចៅសង្កាត់ចាក់អង្រែលើ បន្តថា លោក នឹងជួយសម្រួលផលលំបាករាល់ពេលធ្វើដំណើររបស់ ប្រជាពលរដ្ឋ និងបង្ការការពារកុំឲ្យកើតមាននូវគ្រោះថ្នាក់ណាមួយកើតឡើងបន្តទៀត។ អាជ្ញាធរ នឹងខិតខំប្រឹងជួសជុល ក៏ដូចជារកដំណោះស្រាយជូនប្រជាពលរដ្ឋកុំឲ្យជួបការលំបាកបន្តទៅទៀត៕

អត្ថបទ ៖ រដ្ឋា

The post មន្ត្រីជំនាញ ជួសជុលកំណាត់ផ្លូវ ២៧១ មានជង្ហុកធំ តែងបង្កគ្រោះថ្នាក់ដល់ពលរដ្ឋធ្វើដំណើរ appeared first on Kampuchea Thmey Daily.

មន្ត្រីជំនាញ ស្ទាក់ចាប់រថយន្តដឹកសាច់បង្កកនាំចូលពីវៀតណាមខុសច្បាប់ ជិត ៤ តោន

អ៊ិន ពិសី — Tue, 22 Jul 2025 03:29:56 +0000

មន្ត្រីជំនាញបង្ក្រាបបទល្មើសចលនាសត្វ និងផលិតកម្មសត្វ បានចុះឃាត់ចាប់រថយន្ត ១ គ្រឿង ដែលដឹកសាច់បង្កកនាំចូលពីវៀតណាមខុសច្បាប់ សរុបចំនួន ៣៧៩៨ គីឡូក្រាម មកចែកចាយក្នុងរាជធានីភ្នំពេញ។

កាលពីវេលាម៉ោង ៨ និង ៣០ នាទីយប់ ថ្ងៃទី ២១ ខែកក្កដា ឆ្នាំ ២០២៥ ម្សិលមិញ ក្រុមការងារអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ បានសហការជាមួយការិយាល័យផលិតកម្ម និងបសុព្យាបាលខេត្តកំពង់ចាម ចុះឃាត់ចាប់រថយន្ត ១ គ្រឿង ម៉ាក SSANGYONG ISTANA ដឹកសាច់សត្វបង្កកសរុប ៣៧៩៨ គីឡូក្រាម ចំនួន ១៨៧ កេសក្រដាស ស្មើនឹង ២២៤៨ គីឡូក្រាម (ស្បែកជ្រូក ជើងជ្រូក) និងហតដកសាច់មាន់ ៣១ បាវ ស្មើនឹង ១៥៥០ គីឡូក្រាម ស្ថិតនៅលើផ្លូវបេតុង ឃុំជីហែ ស្រុកកោះសូទិន ខេត្តកំពង់ចាម។ រថយន្តខាងលើបានដឹកសាច់សត្វបង្កកទាំងនេះ ចេញពីប្រទេសវៀតណាម ឆ្ពោះមកលក់ចែកចាយនៅរាជធានីភ្នំពេញ ដោយគ្មានលិខិតអនុញ្ញាតអ្វីទាំងអស់។

ដោយឡែក វត្ថុតាង និងបទល្មើសខាងលើ ត្រូវបាននាំយកទៅរក្សាទុកនៅទីតាំងចត្តាឡីស័កសត្វរបស់អគ្គនាយកដ្ឋានសុខភាពសត្វ និងផលិតកម្មសត្វ ដើម្បីអនុវត្តតាមនីតិវិធីច្បាប់៕

អត្ថបទ និង រូបភាព ៖ ឡេក ចាន់ពេជ្រ

The post មន្ត្រីជំនាញ ស្ទាក់ចាប់រថយន្តដឹកសាច់បង្កកនាំចូលពីវៀតណាមខុសច្បាប់ ជិត ៤ តោន appeared first on Kampuchea Thmey Daily.

មន្ត្រីជំនាញដោះស្រាយបញ្ហាប្រឈមមួយចំនួនលើកំណាត់ផ្លូវជាតិលេខ ៧ ស្គន់-កំពង់ចាម

អ៊ិន ពិសី — Thu, 29 May 2025 07:04:23 +0000

ដើម្បីដោះស្រាយបញ្ហាខឿនចេញចូលមុខផ្ទះរបស់ប្រជាពលរដ្ឋនៅតំបន់ទីប្រជុំស្គន់ និងប្រព័ន្ធលូរំដោះទឹកចេញទៅក្រៅ នាយកគ្រប់គ្រងគម្រោងស្ថាបនាផ្លូវជាតិលេខ ៧ បានធ្វើការណែនាំ និងជំរុញឲ្យក្រុមហ៊ុនជួយកែសម្រួលដោះស្រាយភ្លាមៗ នូវបញ្ហាទាំងអស់នេះ និងធ្វើទៅបច្ចេកទេសស្តង់ដារត្រឹមត្រូវ។

ជាក់ស្ដែងនៅព្រឹកថ្ងៃទី ២៩ ខែឧសភា ឆ្នាំ ២០២៥ លោក លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន និងជានាយកគ្រប់គ្រងគម្រោងស្ថាបនាផ្លូវជាតិលេខ ៧ ពី ពីរគន្លងទៅជាបួនគន្លង ចាប់ពីរង្វង់មូលស្គន់ ដល់ រង្វង់មូលស្ពានគីហ្សូណា ក្រុងកំពង់ចាម បានដឹកនាំមន្ត្រីជំនាញ និងក្រុមហ៊ុន សហការជាមួយអាជ្ញាធរមូលដ្ឋាន អញ្ជើញចុះពិនិត្យវឌ្ឍនភាពគុណភាពការងារស្ថាបនាផ្លូវជាតិលេខ ៧ ពីស្គន់ ទៅក្រុងកំពង់ចាម។ ក្នុងនោះដែរ លោក លឹម ស៊ីដេនីន ក៏បានណែនាំឲ្យក្រុមហ៊ុនធ្វើការកែសម្រួលឡើងវិញប្រអប់លូចេញចូលផ្ទះរបស់ប្រជាពលរដ្ឋ ដោយធ្វើយ៉ាងណាឲ្យមានជំរេលងាយស្រួលធ្វើដំណើរចេញចូលផ្ទះពួកគាត់ និងជួយដោះស្រាយប្រព័ន្ធលូបង្ហូរទឹកចេញទៅក្រៅ ពោលគឺកុំធ្វើឲ្យប៉ះពាល់ដល់លំនៅឋាន និងដីភូមិប្រជាពលរដ្ឋ។

សូមជម្រាបជូនថា គម្រោងស្ថាបនាផ្លូវជាតិលេខ ៧ ជាបួនគន្លង ចាប់ពីរង្វង់មូលស្គន់ ដល់រង្វង់មូលស្ពានគីហ្សូណា ក្រុងកំពង់ចាម នេះ បានចាប់ផ្តើមបើកការដ្ឋានស្ថាបនា កាលពីថ្ងៃទី ៩ ខែមករា ឆ្នាំ ២០២៣ គម្រោងនេះមានប្រវែងសរុបជាង ៤៥ គីឡូម៉ែត្រ ចំពោះទទឹងផ្លូវវិញ នៅតំបន់ក្រៅទីប្រជុំ មានទទឹង ២៤ ម៉ែត្រកន្លះ និងក្នុងទីប្រជុំជនមានទទឹង ២០ ម៉ែត្រកន្លះ ដោយមានសួនច្បារនៅចំចំណុចកណ្តាលផ្លូវ ក្រោមឥណទានសម្បទានពីរដ្ឋាភិបាល នៃសាធារណរដ្ឋប្រជាមានិតចិន៕

អត្ថបទ និង រូបភាព ៖ ឡេក ចាន់ពេជ្រ

The post មន្ត្រីជំនាញដោះស្រាយបញ្ហាប្រឈមមួយចំនួនលើកំណាត់ផ្លូវជាតិលេខ ៧ ស្គន់-កំពង់ចាម appeared first on Kampuchea Thmey Daily.

មន្រ្តីជំនាញរកឃើញសារធាតុគីមីហាមឃាត់លើគ្រឿងសមុទ្រជាង ៤០គីឡូក្រាម ក្នុងផ្សារមោងឫស្សី

Ken Malis — Wed, 09 Apr 2025 03:06:33 +0000

នៅថ្ងៃទី៨ ខែមេសា ឆ្នាំ២០២៥ ដោយបានការអនុញ្ញាតពីលោកឧត្តមសេនីយ៍ទោ ដាញ់ អេងប៊ុនចាន់ ស្នងការនៃស្នងការដ្ឋាននគរបាលខេត្តបាត់ដំបង កម្លាំងការិយាល័យនគរបាលប្រឆាំងបទល្មើសសេដ្ឋកិច្ច បានសហការជាមួយមន្រ្តីសាខា (ក.ប.ប) ខេត្តបាត់ដំបង និងមន្រ្តីនៃមន្ទីរពាណិជ្ជកម្មខេត្តចុះត្រួតពិនិត្យទំនិញ គ្រឿងឧបភោគបរិភោគ និងទំនិញវេចខ្ចប់ស្រាប់តាមផ្ទះ និងតូបលក់ទំនិញនៅផ្សារមោងឫស្សី ស្ថិតក្មុងភូមិមោង ឃុំមោង ស្រុកមោងឫស្សី ខេត្តបាត់ដំបង។

ក្នុងនោះមន្រ្តីជំនាញបាន ត្រួតពិនិត្យទំនិញបានចំនួន ១០តូបក្នុងផ្សារ និងផ្ទះលក់ទំនិញជុំវិញផ្សារបាន ៥ផ្ទះ ជាលទ្ធផល បានសម្រេចដកហូតមុខទំនិញដែលប៉ះពាល់សុខភាពរួមមាន មឹកដៃធំទម្ងន់ ១៩,៥គីឡូក្រាម មានសារធាតុគីមី Formalin។ មឹកបំពង់ធំទម្ងន់ ៥,៥គីឡូក្រាម មានសារធាតុគីមី Formalin។ ដៃមឹក ទម្ងន់ ១៩ គីឡូក្រាម មានសារធាតុគីមី Formalin។ សរុប ៤៤គីឡូក្រាម។

ជាមួយគ្នានោះ មន្រ្តីជំនាញក៏បានធ្វើការអប់រំណែនាំផ្សព្វផ្សាយ នូវនីតិវិធីឯកសារគតិយុត្ត ដែលពាក់ព័ន្ធទំនិញ ព្រមទាំងបិទ និងចែកផ្ទាំង POSTER បានចំនួន ១៥ផ្ទាំង ជូនដល់អាជីវករលក់ដូរផងដែរ។

សូមជម្រាបជូនថា ប្រសិនបើគ្រឿងឧបភោគបរិភោគ ឬទំនិញដែលខូចគុណភាព ហួសកាលបរិច្ឆេទប្រើប្រាស់ ឬមានសារធាតុគីមីហាមឃាត់ ហើយត្រូវបានដាក់លក់នៅលើទីផ្សារ ពិតជាធ្វើឱ្យអ្នកប្រើប្រាស់មានផលប៉ះពាល់ដល់សុខភាព៕

The post មន្រ្តីជំនាញរកឃើញសារធាតុគីមីហាមឃាត់លើគ្រឿងសមុទ្រជាង ៤០គីឡូក្រាម ក្នុងផ្សារមោងឫស្សី appeared first on Kampuchea Thmey Daily.

មន្ត្រីជំនាញរដ្ឋបាលព្រៃឈើ ខេត្តមណ្ឌលគិរី ចុះបង្ក្រាបទីតាំងសិប្បកម្មកែច្នៃមួយកន្លែងដែលគ្មានច្បាប់អនុញ្ញាត

Ken Malis — Mon, 24 Feb 2025 03:06:54 +0000

បទល្មើសព្រៃឈើនៅក្នុងខេត្តមណ្ឌលគិរី ត្រូវមន្ត្រីជំនាញបានបង្ក្រាបជាបន្តបន្ទាប់ ខណៈពួកឈ្មួញប្រព្រឹត្តបទល្មើសទាំងនោះ បានធ្វើសកម្មភាពកែច្នៃដឹកជញ្ជូនគ្រប់មធ្យោបាយ គ្រប់រូបភាព ដើម្បីបំភាន់ភ្នែកសមត្ថកិច្ច។ ទោះបីជាការកែច្នៃខំលាក់បំបាំង បំភាន់ភ្នែកសមត្ថកិច្ចយ៉ាងណាក៏ដោយ ប៉ុន្តែនៅពេលថ្មីៗនេះ សមត្ថកិច្ចនៅតែបន្តចុះបង្ក្រាបទីតាំងកែច្នៃឈើមួយកន្លែងទៀតដែលស្ថិតក្នុងភូមិពូញ៉ាវ ឃុំមេម៉ង់ ស្រុកកែវសីមា ខេត្តមណ្ឌលគិរី។

លោក អ៊ូ សុភក្តី នាយខណ្ឌរដ្ឋបាលព្រៃឈើមណ្ឌលគិរី បានប្រាប់សារព័ត៌មាន «កម្ពុជាថ្មី» នៅថ្ងៃទី២៣ ខែកុម្ភៈ ឆ្នាំ២០២៥ ថា ក្រុមការងារខណ្ឌរដ្ឋបាលព្រៃឈើមណ្ឌលគិរី បានឆ្មក់ចូលបង្រ្កាបទីតាំងសិប្បកម្មកែច្នៃឈើក្នុងលំនៅដ្ឋានមួយកន្លែងរបស់ឈ្មោះ ញ៉ន រ៉ាន់ ភេទប្រុស សង្ស័យពីបទ (សន្និធិផលអនុផលព្រៃឈើ និងបង្កើតរោងសិប្បកម្មកែច្នៃផលអនុផលព្រៃឈើ) ដោយមិនមានលិខិតអនុញ្ញាតពីរដ្ឋបាលព្រៃឈើ ត្រង់ចំណុចនិយាមកាលេខ (710946-1390677) ស្ថិតក្នុងភូមិពូញ៉ាវ ឃុំមេម៉ង់ ស្រុកកែវសីមា ខេត្តមណ្ឌលគិរី។

លោកនាយខណ្ឌដដែលរូបនេះ បានបញ្ជាក់ថា ក្នុងប្រតិបត្តិការបង្ក្រាបនោះ ក្រុមការងារខណ្ឌរដ្ឋបាលព្រៃឈើមណ្ឌលគិរី សហការជាមួយអាជ្ញាធរភូមិពូញ៉ាវ ឃុំមេម៉ង់ និងប៉ុស្តិ៍នគរបាលរដ្ឋបាលមេម៉ង់ ដោយមានការសម្របសម្រួលនីតិវិធី ពីលោក ស៊ាវ ងីឈាន់ ព្រះរាជអាជ្ញារងអមសាលាដំបូងខេត្តមណ្ឌលគិរី ចុះត្រួតពិនិត្យ និងឆែកឆេចុះបង្ក្រាបទីតាំងកែច្នៃឈើនោះបានដោយជោគជ័យ។

លោកបន្ថែមថា ក្នុងការចុះបង្ក្រាបទីតាំងនោះ សមត្ថកិច្ចជំនាញបានដកហូតវត្ថុតាងបទល្មើមួយចំនួនរួមមាន ម៉ូទ័រ(កាត់ ជ្រី ឈូស និងខាត់) ចំនួន ៦គ្រឿង ឈើអារប្រភេទលេខ១ (សុក្រម) ចំនួន ៧៦ដុំ/សន្លឹកស្មើនឹង ១ ៥០៧ (មួយម៉ែត្រត្រីគុណប្រាំរយប្រាំពីរ)។

បច្ចុប្បន្ន ក្រុមការងារបានដឹកជញ្ជូនវត្ថុតាងយកមកថែរក្សា នៅស្នាក់ការខណ្ឌរដ្ឋបាលព្រៃឈើមណ្ឌលគិរី ស្ថិតក្នុងភូមិចំការតែ សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី ដើម្បីចាត់ការតាមនីតិច្បាប់ស្តីពីព្រៃឈើផងដែរ៕

អត្ថបទ៖រៀម សុខហេង

The post មន្ត្រីជំនាញរដ្ឋបាលព្រៃឈើ ខេត្តមណ្ឌលគិរី ចុះបង្ក្រាបទីតាំងសិប្បកម្មកែច្នៃមួយកន្លែងដែលគ្មានច្បាប់អនុញ្ញាត appeared first on Kampuchea Thmey Daily.

មន្ទីរពាណិជ្ជកម្មខេត្តបាត់ដំបងបង្ហើប តម្លៃស្រូវឆ្នាំនេះប្រហាក់ប្រហែលឆ្នាំមុន

Din Thary — Fri, 20 Sep 2024 10:20:35 +0000

កាលពីពេលកន្លងទៅថ្មីៗនេះ ក្រោយពីមានស្ត្រីម្នាក់ជាកសិកររស់នៅក្នុងឃុំធិបតី ស្រុកគាស់ក្រឡ ខេត្តបាត់ដំបងបានបង្ហោះនៅលើបណ្តាញសង្គមដោយត្អួញត្អែថា ទិន្នផលស្រូវមានតម្លៃថោកមិនរួចថ្លៃធ្វើផងនោះ មន្ត្រីនៃមន្ទីរពាណិជ្ជកម្មខេត្ត បានចុះពិនិត្យទៅលើសកម្មភាពរបស់កសិករដោយផ្ទាល់បានឱ្យដឹងថា ភាគតិចណាស់ដែលតម្លៃស្រូវធ្លាក់ចុះ ហើយការធ្លាក់ថ្លៃអាចពាក់ព័ន្ធគុណភាពស្រូវថយចុះ ទើបឈ្មួញឱ្យតម្លៃតាមជាក់ស្តែង។

បើតាមមន្ត្រីនៃមន្ទីរកសិកម្មខេត្តបាត់ដំបងបានឲ្យ «កម្ពុជាថ្មី» ដឹងថា តម្លៃស្រូវឆ្នាំនេះបើធៀបក្នុងឆ្នាំ២០២៣ តម្លៃប្រហាក់ប្រហែលឆ្នាំ២០២៣ ឬអាចលើសឆ្នាំមុនបន្តិចបន្តួច។ ប៉ុន្តែបើសិនជាចុះតម្លៃខ្លះ ក៏អាស្រ័យលើគុណភាពគ្រាប់ស្រូវផងដែរ។

មន្ទីរពាណិជ្ជកម្មខេត្តបាត់ដំបងបានបង្ហាញអំពីតម្លៃស្រូវដែលឈ្មួញកណ្ដាលប្រមូលទិញ នៅក្នុងភូមិទួលម្ទេស ឃុំធិបតី ស្រុកគាស់ក្រឡ នាថ្ងៃទី១៩ ខែកញ្ញា ក្នុងតម្លៃមិនក្រោមឆ្នាំមុននោះទេ ក្នុងនោះមានដូចជា ស្រូវស្រង៉ែតម្លៃ ១,១៣០ រៀល ទៅ ១,១៦០រៀល/គីឡូក្រាម (គុណភាពល្អ) និងស្រូវស្រង៉ែ ដែលក្រោមគុណភាពតម្លៃ ១,០០០រៀល ទៅ ១,០៥០រៀល/គីឡូក្រាម ។

ប្រភពដដែលបន្តថា បើតម្លៃស្រូវដឹកដល់រោងម៉ាស៊ីន ស្រូវសែនក្រអូប (SKO) តម្លៃ ១,៤១៥រៀល/គីឡូក្រាម , ស្រូវស្រង៉ែ តម្លៃ ១,២០០រៀល/គីឡូក្រាម , ស្រូវ OM5451 តម្លៃ ១,១០០រៀល/គីឡូក្រាម ។

បើគឹតត្រឹម ខែកញ្ញា ឆ្នាំ២០២៤ ស្រូវសែនក្រអូប (SKO) តម្លៃ ១,៣០៨-១,៤១៥ រៀល/គីឡូក្រាម, ស្រូវស្រង៉ែ តម្លៃ១,២០០រៀល ទៅ១,៣៤៦រៀល/គីឡូក្រាម, ស្រូវ OM5451 តម្លៃ ៩២៤រៀល ទៅ ១,០៥១រៀល/ គីឡូក្រាម។ បើធ្វើការប្រៀបធៀបតម្លៃក្នុងខែតែមួយ ក្នុងឆ្នាំ២០២៣ គឺស្រូវសែនក្រអូប (SKO) តម្លៃ ១,១៦៧ រៀល ទៅ ១,៤០០ រៀល/គីឡូក្រាម, ស្រូវស្រង៉ែតម្លៃ ១,១៤០រៀល ទៅ ១,៣៥០រៀល/គីឡូក្រាម ,ស្រូវ OM5451 តម្លៃ ១,០៥០រៀល ទៅ ១,៣០០រៀល/គីឡូក្រាម ៕

អត្ថបទ៖ សៅ សារិទ្ធ

The post មន្ទីរពាណិជ្ជកម្មខេត្តបាត់ដំបងបង្ហើប តម្លៃស្រូវឆ្នាំនេះប្រហាក់ប្រហែលឆ្នាំមុន appeared first on Kampuchea Thmey Daily.