មហាអំណាច Archives - Kampuchea Thmey Daily

ប្រទេសមាននុយក្លេអ៊ែរទាំង៩ បានចំណាយកើនឡើងយ៉ាងខ្លាំងលើអាវុធនុក្លេអ៊ែរ ក្នុងឆ្នាំមុន

Minea Neu — Tue, 09 Jun 2026 03:27:28 +0000

ប្រទេសដែលមានអាវុធនុយក្លេអ៊ែរ បានបង្កើនការចំណាយរបស់ពួកគេលើកម្មវិធីអាវុធបរមាណូដល់ទៅមួយភាគប្រាំ ដល់ជិត ១១៩ប៊ីលានដុល្លារ ដែលជាកម្រិតខ្ពស់បំផុតមិនធ្លាប់មាន ដោយមានគម្រោងបង្កើនការវិនិយោគអស់រយៈពេលជាច្រើនទសវត្សរ៍មកហើយ។ នេះបើយោងតាមអ្នកធ្វើយុទ្ធនាការលើកឡើងកាលពីថ្ងៃអង្គារ និងចុះផ្សាយដោយភ្នាក់ងារសារព័ត៌មាន AFP នៅថ្ងៃទី៩ ខែមិថុនា ឆ្នាំ២០២៦ ។

យោងតាមរបាយការណ៍ថ្មីមួយពីយុទ្ធនាការអន្តរជាតិ ដើម្បីលុបបំបាត់អាវុធនុយក្លេអ៊ែរ (ICAN) រដ្ឋដែលមានអាវុធនុយក្លេអ៊ែរចំនួន៩ លើពិភពលោក បានបង្កើនការចំណាយរបស់ពួកគេលើឃ្លាំងអាវុធ ជិត ១៧ប៊ីលានដុល្លារ កាលពីឆ្នាំមុន។

អាវុធនុយក្លេអ៊ែររបស់រុស្ស៊ី។ រូបភាព៖ Reuters

របាយការណ៍ ICAN ព្រមានថា៖ « ពេលមានភាពតានតឹងផ្នែកភូមិសាស្ត្រនយោបាយកាន់តែខ្លាំង ការរត់ប្រណាំងអាវុធនុយក្លេអ៊ែរថ្មីមួយកំពុងកើតមាន ដែលអ្នករំលោភបំពានកំពុងរៀបចំឡើង បន្តអស់រយៈពេលជាច្រើនទសវត្សរ៍មកហើយ»។

លោកស្រី Susi Snyder នាយិកាកម្មវិធីរបស់ ICAN និងជាសហអ្នកនិពន្ធរបាយការណ៍ និយាយថា៖ « ការកើនឡើងនេះ រួមជាមួយនឹងការភ័យខ្លាចថា បញ្ញាសិប្បនិម្មិត(AI) អាចបង្កើនហានិភ័យនៃការប្រើប្រាស់អាវុធនុយក្លេអ៊ែរ គឺជារឿងគួរឱ្យព្រួយបារម្ភយ៉ាងខ្លាំង»។

លោកស្រី ប្រាប់ AFP ថា៖ «និយាយឱ្យត្រង់ទៅ ខ្ញុំភ័យខ្លាចណាស់»។

ការសិក្សានោះ បង្ហាញថា រដ្ឋដែលមានអាវុធនុយក្លេអ៊ែរទាំងអស់ មាន ចក្រភពអង់គ្លេស ចិន បារាំង ឥណ្ឌា អ៊ីស្រាអែល កូរ៉េខាងជើង ប៉ាគីស្ថាន រុស្ស៊ី និងសហរដ្ឋអាមេរិក បានបង្កើនការចំណាយរបស់ពួកគេកាលពីឆ្នាំមុន។

របាយការណ៍ដដែល បានបង្ហាញថា ទីក្រុងវ៉ាស៊ីនតោន បានចំណាយខ្ពស់ជាងប្រទេសដទៃទៀតទាំងអស់រួមបញ្ចូលគ្នា ដោយចំណាយចំនួន ៦៩.២ប៊ីលានដុល្លារលើអាវុធនុយក្លេអ៊ែរក្នុងឆ្នាំ២០២៥ កើនឡើង ១២.៤ប៊ីលានដុល្លារកាលពីមួយឆ្នាំមុន។

ដោយឡែក ប្រទេសចិន ត្រូវគេប៉ាន់ប្រមាណថាបានចំណាយប្រាក់ចំនួន ១៣.៥ពាន់លានដុល្លារកាលពីឆ្នាំមុន បន្ទាប់មកចក្រភពអង់គ្លេស ១២.៦ប៊ីលាន និងរុស្ស៊ី ៩.៥ប៊ីលាន។

ក្នុងរយៈពេលប្រាំឆ្នាំកន្លងមកនេះ ICAN ជាស្ថាប័នឈ្នះរង្វាន់ណូបែលសន្តិភាពឆ្នាំ២០១៧ រកឃើញថាប្រទេសទាំង៩ បានចំណាយប្រាក់ជាង ៤៧០ប៊ីលានដុល្លារលើឃ្លាំងអាវុធរបស់ពួកគេ។ ការវិនិយោគទាំងនោះត្រូវបានគេរំពឹងថានឹងកើនឡើងនៅពេលអនាគត។

ការចំណាយលើអាវុធនុយក្លេអ៊ែររបស់សហរដ្ឋអាមេរិកក្នុងរយៈពេលមួយទសវត្សរ៍រវាងឆ្នាំ ២០២៥ និង ២០៣៤ ត្រូវបានព្យាករថាមានចំនួនជិត ១ទ្រីលានដុល្លារ។

អ្នកស្រាវជ្រាវនិយាយថា ចំនួនទឹកប្រាក់ដ៏ច្រើនសន្ធឹកសន្ធាប់ដែលកំពុងចំណាយគឺពិតជាគួរឱ្យភ្ញាក់ផ្អើល ជាពិសេសពេលប្រព័ន្ធមនុស្សធម៌សកលកំពុងរងផលប៉ះពាល់ពីការកាត់បន្ថយថវិកាយ៉ាងខ្លាំង។

លោកស្រី Snyder ចង្អុលបង្ហាញថា៖ « ទឹកប្រាក់ដែលប្រទេសទាំងនោះបានចំណាយក្នុងឆ្នាំ២០២៥ អាចចំណាយលើថវិកាប្រតិបត្តិការរបស់អង្គការសហប្រជាជាតិរយៈពេល ៣២ឆ្នាំ។ ការចំណាយលើអាវុធនុយក្លេអ៊ែរតែមួយថ្ងៃ កាលពីឆ្នាំមុនអាចផ្តល់សន្តិសុខស្បៀងដល់មនុស្សជាងពីរលាននាក់»៕

សម្រួល៖ ណឺ មិនា

The post ប្រទេសមាននុយក្លេអ៊ែរទាំង៩ បានចំណាយកើនឡើងយ៉ាងខ្លាំងលើអាវុធនុក្លេអ៊ែរ ក្នុងឆ្នាំមុន appeared first on Kampuchea Thmey Daily.

នាយករដ្ឋមន្ត្រីកាណាដា អំពាវនាវឲ្យប្រទេសអំណាចកណ្តាលរួបរួមគ្នា កុំតាមមហាអំណាច

Minea Neu — Wed, 21 Jan 2026 10:16:03 +0000

នាយករដ្ឋមន្រ្តីកាណាដា លោក Mark Carney បានលើកឡើងថា សណ្តាប់ធ្នាប់ពិភពលោកដែលធ្លាប់មាននឹងមិនវិលត្រឡប់មកវិញទេ ជាពិសេសលោក បានជំរុញឱ្យ «ប្រទេសអំណាចកណ្តាល» រួមដៃគ្នាឡើងវិញ ដើម្បីពង្រឹងសមត្ថភាពរបស់ប្រទេស។ នេះជាការលើកឡើងក្នុងវេទិកាសេដ្ឋកិច្ចពិភពលោកនៅទីក្រុង Davos ប្រទេសស្វីស។

លោក Mark Carney ។ Reuters

លោក Carney បានលើកឡើងកាលពីថ្ងៃអង្គារថា៖«មហាអំណាចកណ្តាលត្រូវតែធ្វើសកម្មភាពរួមគ្នា ពីព្រោះប្រសិនបើយើងមិនបាននៅលើតុជុំគ្នាទេ យើងក៏ស្ថិតនៅក្នុងបញ្ជីឈ្មោះជាមួយគ្នាដែរ» ដោយបន្ថែមថា លោកជឿថាប្រទេសដែលមានអំណាចកំពុងប្រើការបង្ខិតបង្ខំសេដ្ឋកិច្ចពិភពលោក តាមអ្វីដែលពួកគេចង់បាន។

លោកក៏បានបញ្ជាក់ពីជំហររបស់ប្រទេសកាណាដា គាំទ្រចំពោះ Greenland នៃប្រទេសដាណឺម៉ាក និងសម្ព័ន្ធភាពណាតូផងដែរ។

បើតាមសារព័ត៌មាន BBC, យ៉ាងណា លោក Carney មិនបានលើកឡើងចំឈ្មោះ លោក ដូណាល់ ត្រាំទេ ប៉ុន្តែការថ្លែងសន្ទរកថាមួយចំនួនរបស់លោក ហាក់ដូចជាសំដៅទៅលើប្រធានាធិបតីអាមេរិកដែលកំពុងគំរាមកំហែងពន្ធលើសម្ព័ន្ធមិត្តអឺរ៉ុប និងចក្រភពអង់គ្លេស។

ចំណែក ពាក្យថា «មហាអំណាច» ជារឿយៗត្រូវបានកំណត់ថាជាប្រទេសដែលមានអាសនៈអចិន្ត្រៃយ៍លើក្រុមប្រឹក្សាសន្តិសុខអង្គការសហប្រជាជាតិ មានដូចជា ចិន បារាំង រុស្ស៊ី ចក្រភពអង់គ្លេស និងសហរដ្ឋអាមេរិក ដែលបង្ហាញពីឥទ្ធិពលសេដ្ឋកិច្ច និងយោធារបស់ពួកគេនៅក្នុងពិភពលោក។

រីឯមហាអំណាចកណ្តាល មានដូចជា កាណាដា អូស្ត្រាលី អាហ្សង់ទីន កូរ៉េខាងត្បូង និងប្រេស៊ីល គឺជាប្រទេសដែលនៅតែមានឥទ្ធិពលធំនៅក្នុងនយោបាយពិភពលោក ទោះបីជាសេដ្ឋកិច្ចរបស់ពួកគេតូចជាងក៏ដោយ។

នៅក្នុងសុន្ទរកថារបស់លោក Carney បាននិយាយថា៖ «ពិភពលោកគឺ ស្ថិតនៅក្នុងពាក់កណ្តាលនៃការប្រេះឆាហើយ វាមិនមែនជាការផ្លាស់ប្តូរទេដែលល្អទេ។ មហាអំណាចបានចាប់ផ្តើមប្រើប្រាស់សមាហរណកម្មសេដ្ឋកិច្ចជាអាវុធ ពន្ធគយជាអានុភាព ហេដ្ឋារចនាសម្ព័ន្ធហិរញ្ញវត្ថុជាការបង្ខិតបង្ខំ ខ្សែសង្វាក់ផ្គត់ផ្គង់ជាភាពងាយរងគ្រោះដែលត្រូវកេងប្រវ័ញ្ច»។

លោកបន្តទៀតថា៖ «កាណាដាគឺជាប្រទេសដំបូងគេដែលបានឈឺឆ្អាលអំពីបញ្ហានេះ ព្រោះភូមិសាស្ត្រនិងសម្ព័ន្ធភាពជាប្រវត្តិសាស្ត្រលែងធានាសន្តិសុខឬភាពរុងរឿងទៀតហើយ»។

យ៉ាងណាពេលដែលលោក ត្រាំ ត្រលប់មកកាន់តំណែងវិញ លោកបានលើកឡើង ដោយសំដៅលើប្រទេសកាណាដាថាជា «រដ្ឋទី ៥១» [សំដៅទៅលើទឹកដី ឬអង្គភាពដែលត្រូវបានស្នើឡើងសម្រាប់ការបន្ថែមទៅលើរដ្ឋចំនួន៥០ របស់សហរដ្ឋអាមេរិក] ជាពិសេសគំរាមកាណាដាតាមរយៈ កម្លាំងសេដ្ឋកិច្ច ។ បន្ទាប់មកសហរដ្ឋអាមេរិកបានវាយលុកប្រទេសជិតខាង នាភាគខាងជើង និងដៃគូពាណិជ្ជកម្មដ៏សំខាន់របស់ខ្លួនជាមួយនឹងពន្ធគយដ៏ច្រើនសន្ធឹកសន្ធាប់៕

ប្រែសម្រួល៖ ណឺ មិនា

The post នាយករដ្ឋមន្ត្រីកាណាដា អំពាវនាវឲ្យប្រទេសអំណាចកណ្តាលរួបរួមគ្នា កុំតាមមហាអំណាច appeared first on Kampuchea Thmey Daily.

សម្ដេចតេជោ ប្រាប់អាស៊ានឱ្យបង្កើតសុខដុមក្នុងតំបន់ ហើយប្រយ័ត្នចំពោះភាពលម្អៀងទៅមហាអំណាចណាមួយ

Thoeun Vansong — Fri, 09 May 2025 02:37:29 +0000

បុរសខ្លាំងកម្ពុជា សម្ដេចតេជោ ហ៊ុន សែន ប្រាប់បណ្ដាប្រទេសជាសមាជិកអាស៊ានឱ្យប្រុងប្រយ័ត្នចំពោះភាពលម្អៀងទៅលើមហាអំណាចណាមួយ ដែលកំពុងតែប្រកួតប្រជែងគ្នា ហើយសម្ដេច បានរំលឹកដល់ប្រជាជាតិអាស៊ាន ត្រូវតែពួតដៃរួមគ្នាបង្កើតសុខដុមនីយកម្មក្នុងតំបន់របស់ខ្លួន។

ថ្លែងចេញពីវិមានរដ្ឋសភារបស់ទីម័រ កាលពីយប់ថ្ងៃទី៨ ខែឧសភា ឆ្នាំ២០២៥ សម្ដេចតេជោ ហ៊ុន សែន លើកឡើងថា៖ «យើងត្រូវប្រុងប្រយ័ត្នចំពោះមហាអំណោចណាមួយដែលកំពុងប្រកួតប្រជែង ដែលធ្វើឱ្យស្ថាប័នពហុភាគីទាំងនោះលេចចុះ ឬលេចឡើង ទៅតាមគោលនយោបាយរបស់មហាអំណោច ឬថ្នាក់ដឹកនាំនៃប្រទេសមហោអំណាច»។

ភ្ជាប់នឹងការប្រុងប្រយ័ត្នចំពោះការប្រកួតប្រជែងរបស់មហាអំណោច សម្ដេចតេជោ ហ៊ុន សែន ប្រធានព្រឹទ្ធសភា បានលើកឡើងពីតួនាទីដ៏ខាន់របស់អាស៊ានក្នុងបរិការណ៍នេះ ដោយសម្ដេច ថា អាស៊ានគួរតែផ្តល់ទម្ងន់ទៅលើការខិតខំអភិវឌ្ឍន៍និម្មាបនកម្មតំបន់ ដែលដឹកនាំដោយអាស៊ានវិញ ព្រោះថា អាស៊ានមានលក្ខណៈអព្យាក្រឹត្យជាង ហើយអាចប្រាស្រ័យទាក់ទងជាមួយនឹងដៃគូច្រើនប្រភេទ និងច្រើនតំបន់ដោយមិនប្រកាន់មនោគមវិជ្ជា។

បន្ថែមពីនេះ គឺយន្តការអាស៊ានមានភាពអចិន្ត្រៃយ៍ និងស្ថិរភាពជាង បើទោះបីជាថ្នាក់ដឹកនាំនៃប្រទេសសមាជិកអាស៊ានប្រែប្រួលក៏ដោយ។ សម្ដេចតេជោ បន្ថែមយ៉ាងដូច្នេះ ហើយក្នុងន័យនេះ សម្ដេច ក៏បានគូររំលេចពីតួនាទីសំខាន់របស់រដ្ឋលេខាធិការដ្ឋានអាស៊ានដែលធានាភាពអចិន្ត្រៃយ៍ ឬចីរភាពនៃយន្តការ និងកិច្ចសហប្រតិបត្តិការ ការងារសម្របសម្រួលដ៏ច្រើនលើសលប់ រួមទាំងការរៀបចំចងក្រង កំណត់ត្រា លក្ខណៈស្ថាប័ន និងជំរុញការគិតគូរស្រាវជ្រាវអំពីទិសដៅអនាគតសម្រាប់អាស៊ាន។

តាមការបញ្ជាក់របស់សម្ដេចតេជោ អាស៊ានមានតួនាទីសំខាន់ក្នុងការលើកស្ទួយសន្តិភាព ហើយអាស៊ានអាចគ្រប់គ្រងស្ថានការណ៍នៅក្នុងតំបន់របស់ខ្លួនបាន ជាអាទិ៍ អាចជម្នះការខិតខំជ្រៀតជ្រែកកិច្ចការផ្ទៃក្នុងនៅក្នុងតំបន់អាស៊ានបាន អាចបង្ការកុំឱ្យមានសង្គ្រាម ដោយតួអង្គតំណាងរបស់ប្រទេសមហាអំណាចនៅក្នុងតំបន់អាស៊ានបានជាដើម។ ខណៈអាស៊ាន ក៏អាចបញ្ចេញឥទ្ធិពលរបស់ខ្លួនលើរបៀបវារៈសន្តិភាពលើសពីកម្រិតតំបន់ផងដែរ។

យកឱកាសថ្លែងសុន្ទរកថានៅក្នុងរដ្ឋសភាទីម័រ សម្ដេច ហ៊ុន សែន បានលើកឡើពីភាពចាំបាច់នូវទំនាក់ទំនងជិតស្និទ្ធ និងយល់ពីគ្នាទៅវិញទៅមកប្រកបដោយស្មារតីសហគមន៍ ជាគ្រួសារអាស៊ានពីសំណាក់ថ្នាក់ដឹកនាំនៃប្រទេសអាស៊ាន ដោយក្នុងន័យនេះ សម្ដេច បានលើកទឹកចិត្តដល់ថ្នាក់ដឹកនាំរបស់អាស៊ានជំនាន់ថ្មី បង្កើតអនុស្សាវរីយ៍ជិតស្និទ្ធជាមួយគ្នាឱ្យបានច្រើន ដើម្បីរឹតចំណងមិត្តភាព កិច្ចសហប្រតិបត្តិការ និងបង្កើតភាពសុខដុមនៅក្នុងតំបន់៕

ដោយ៖ ធឿន វ៉ាន់សុង

The post សម្ដេចតេជោ ប្រាប់អាស៊ានឱ្យបង្កើតសុខដុមក្នុងតំបន់ ហើយប្រយ័ត្នចំពោះភាពលម្អៀងទៅមហាអំណាចណាមួយ appeared first on Kampuchea Thmey Daily.

បណ្ឌិត យង់ ពៅ៖ កម្ពុជាកុំមើលរំលងកិច្ចការអន្តរជាតិឱ្យសោះ កុំបណ្តោយឱ្យកិច្ចការអន្តរជាតិសម្រេចដោយមហាអំណាចតែឯកឯង

អុន ស្រីមាន — Wed, 04 Sep 2024 04:00:02 +0000

បណ្ឌិត យង់ ពៅ អគ្គលេខាធិការនៃរាជបណ្ឌិត្យសភាកម្ពុជា បានលើកឡើងថា កម្ពុជាហាក់ដើរយឺតជាងគេក្នុងបរិបទកិច្ចការពិភពលោក ព្រោះកម្ពុជាមិនសូវយកបញ្ហាអន្តរជាតិមកពិភាក្សាឡើយ ដូចនេះ កម្ពុជាក្នុងនាមជាប្រទេសទន់ខ្សោយមានតែខិតខំខ្លួនឯង កុំបណ្តោយឱ្យប្រទេសមហាអំណាចចាត់ចែងគ្រប់កិច្ចការទាំងអស់ជំនួស។

លោកបណ្ឌិតលើកឡើងបែបនេះ ក្នុងពិធីបើកវេទិកាទំនាក់ទំនងអន្តរជាតិលើកទី៣ ស្តីពី “សណ្តាប់ធ្នាប់ពិភពលោកប្រកបដោយការផ្លាស់ប្តូរ និងតួនាទីរបស់មហាអំណាច សម្រាប់សន្តិភាព ស្ថិរភាព និងវិបុលភាពសកល” នៅថ្ងៃទី៤ ខែកញ្ញា ឆ្នាំ២០២៤ ដែលរៀបចំឡើងដោយវិទ្យាស្ថានទំនាក់ទំនងអន្តរជាតិនៃកម្ពុជា នៃរាជបណ្ឌិតសភាកម្ពុជា។

លោកបណ្ឌិត បានលើកឡើងថា ប្រធានបទដែលលើកយកមកពិភាក្សាក្នុងវេទិកានេះ សុទ្ធតែជាប្រធានបទសំខាន់ និងត្រូវតាមស្ថានភាពពិភពលោកដែលកំពុងជួបប្រទះ និងលើកយកមកពិភាក្សា។ លោកថា ចំពោះកម្ពុជា គឺមិនសូវមានការជជែកវែកញែកពីកិច្ចការអន្តរជាតិបានច្រើននោះទេ ដូចនេះ ធ្វើឱ្យសង្គមកម្ពុជាដើរយឺតជាងគេ ព្រោះមិនដឹងពីស្ថានភាពទូលំទូលាយ។ ទោះបីកម្ពុជាមានការរៀនពីទំនាក់ទំនងអន្តរជាតិ និងភូមិសាស្ត្រនយោបាយច្រើនមែន ប៉ុន្តែនៅមានកម្រិតនៅឡើយ។ លោកបណ្ឌិតមានប្រសាសន៍ថា៖ “សូមកុំមើលរំលងកិច្ចការអន្តរជាតិឱ្យសោះ សូមកុំបណ្តោយឱ្យកិច្ចការអន្តរជាតិសម្រេចដោយមហាអំណាចតែឯងៗ។ ដូចជាឥឡូវក៏នៅតែអញ្ចឹងដែរ មហាអំណាចនៅតែតាំងខ្លួនជាចាហ្វាយនាយនៃចក្រវាលនេះ ពីព្រោះប្រទេសទន់ខ្សោយនៅតែទន់ខ្សោយមិនអាចចូលរួមបាន… ជាការយល់ឃើញរបស់ខ្ញុំ យើងជាប្រទេសទន់ខ្សោយ កុំតាំងខ្លួនឯងថាទន់ខ្សោយពេក បើយើងនៅតែទន់ខ្សោយ មហាអំណាចនៅតែចាត់ចែងជំនួសយើង”។

ការណ៍ដែលមហាអំណាចចាត់ចែងជំនួសប្រទេសទន់ខ្សោយ គឺដើម្បីទទួលបានផលប្រយោជន៍ច្រើនពីកិច្ចការនោះ។ លោកបណ្ឌិតបញ្ជាក់បន្តថា ការប្រែប្រួលជាបន្តបន្ទាប់ក្នុងសណ្តាប់ធ្នាប់ពិភពលោក នឹងធ្វើឱ្យប្រទេសមហាអំណាចប្រជែងឥទ្ធិពលគ្នាកាន់តែច្រើន និងជះឥទ្ធិពលជោគវាសនាទាំងប្រទេសធំ និងតូច ជាមូលហេតុធ្វើឱ្យប្រទេសនានាបង្កើនកិច្ចសហការជាមួយគ្នា និងសាមគ្គីគ្នា។ លើសពីនេះ ឥទ្ធិពលមហាអំណាច ការប្រជែងរវាងមហាអំណាច បានធ្វើឱ្យសណ្តាប់ធ្នាប់ពិភពលោកបច្ចុប្បន្នកាន់តែស្មុគស្មាញ។ លោកបណ្ឌិតថា ការស្មុគស្មាញនេះអាចដោះស្រាយដោយមនុស្សបាន ប្រសិនមានការខិតខំដោះស្រាយបានច្រើន។

យ៉ាងណាមិញ លោកបណ្ឌិត យង់ ពៅ ក៏បន្ថែមថា ក្នុងនាមជាប្រទេសទន់ខ្សោយ មិនអាចរង់ចាំតែដំណោះស្រាយពីប្រទេសមហាអំណាចគ្រប់បែបយ៉ាងនោះទេ គួរសួរខ្លួនឯងផងថា តើត្រូវរៀបចំខ្លួនបែបណាស្រប់នឹងស្ថានការណ៍ និងអាចដោះស្រាយបាន? ហើយប្រទេសមហាអំណាចក៏ដូចគ្នា គួររៀនទទួលយកចំណុចនេះដូចគ្នា។

សូមបញ្ជាក់ថា វេទិកាទំនាក់ទំនងអន្តរជាតិលើកទី៣នេះ រៀបចំឡើងដោយមានវាគ្មិនជំនាញៗ ទាំងជាតិ និងអន្តរជាតិ ជជែក ពិភាក្សា ពីបញ្ហានានាដែលពិភពលោកកំពុងជួបប្រទះ ទាំងបញ្ហានយោបាយ កិច្ចការអន្តរជាតិជាដើម។ ក្នុងនោះ ក៏មានភាគីពាក់ព័ន្ធ មន្ត្រី និស្សិត ជាច្រើនចូលរួមនៅរាជបណ្ឌិត្យសភាកម្ពុជាផងដែរ។ វេទិកានេះ ត្រូវបានរៀបចំឡើងដោយមាន ៣វគ្គធំៗគឺ វគ្គទី១ និយាយពីសណ្តាប់ធ្នាប់ពិភពលោកថ្មី ការប្រកួតប្រជែងរវាងមហាអំណាច។ វគ្គទី២ និយាយពីភាពតានតឹងនៅអឺរ៉ុប និងមជ្ឈិមបូព៌ា និងវគ្គទី៣ តួនាទីរបស់មហាអំណាចក្នុងការលើកកម្ពស់សុខដុមភាពពិភពលោក៕

ដោយ៖ អុន ស្រីមាន

The post បណ្ឌិត យង់ ពៅ៖ កម្ពុជាកុំមើលរំលងកិច្ចការអន្តរជាតិឱ្យសោះ កុំបណ្តោយឱ្យកិច្ចការអន្តរជាតិសម្រេចដោយមហាអំណាចតែឯកឯង appeared first on Kampuchea Thmey Daily.

ស្អែកនេះ រាជបណ្ឌិត្យសភាកម្ពុជា នឹងរៀបចំវេទិកាទំនាក់ទំនងអន្តរជាតិលើកទី៣ ស្តីពីសណ្តាប់ធ្នាប់ពិភពលោក និងតួនាទីមហាអំណាចដើម្បីសន្តិភាពសកល

អុន ស្រីមាន — Tue, 03 Sep 2024 07:41:52 +0000

នៅថ្ងៃទី០៤ ខែកញ្ញា ឆ្នាំ២០២៤ ស្អែកនេះ វិទ្យាស្ថានទំនាក់ទំនាក់ទំនងអន្តរជាតិនៃកម្ពុជា នៃរាជបណ្ឌិត្យសកម្ពុជា នឹងរៀបចំវេទិកាទំនាក់ទំនងអន្តរជាតិលើកទី៣ ស្តីពី «សណ្តាប់ធ្នាប់ពិភពលោកប្រកបដោយការផ្លាស់ប្តូរនិងតួនាទីរបស់មហាអំណាចសម្រាប់សន្តិភាព ស្ថិរភាព និងវិបុលភាពសាកល» ដែលមានរយៈពេលមួយថ្ងៃពេញ ក្នុងភាពជាដៃគូជាមួយមូលនិធិខុនរ៉ាដ អាដិណៅអ៊ែរប្រចាំព្រះរាជាណាចក្រកម្ពុជា។

លោកបណ្ឌិត គិន ភា ប្រធានវិទ្យាស្ថានទំនាក់ទំនាក់ទំនងអន្តរជាតិនៃកម្ពុជា នៃរាជបណ្ឌិត្យសកម្ពុជា បានឱ្យដឹងថា វេទិកានេះ ធ្វើឡើងដើម្បីពិនិត្យសណ្តាប់ធ្នាប់ពិភពលោកថ្មីនៅក្នុងបរិបទនៃការប្រកួតប្រជែងគ្នារវាងប្រទេសមហាអំណាច ភាពតានតឹងនៅអឺរ៉ុប មជ្ឈិមបូព៌ា និងកន្លែងផ្សេងទៀត។ លើសពីនេះ ក៏ដើម្បីលើកកម្ពស់ការយល់ដឹងជាសាធារណៈអំពីតួនាទីរបស់មហាអំណាច និងការអនុវត្តរបស់ពួកគេសម្រាប់សន្តិភាព និងសន្តិសុខពិភពលោក និងលើកកម្ពស់ការយល់ដឹងជាសាធារណៈស្តីពីសារៈសំខាន់នៃសន្តិភាពផងដែរ។

បណ្ឌិត គិន ភា

ជាមួយគ្នានេះ វេទិកានេះ ត្រូវបានរៀបចំឡើងដោយមាន ៣វគ្គធំៗគឺ វគ្គទី១ និយាយពីសណ្តាប់ធ្នាប់ពិភពលោកថ្មី ការប្រកួតប្រជែងរវាងមហាអំណាច។ វគ្គទី២ និយាយពីភាពតានតឹងនៅអឺរ៉ុប និងមជ្ឈិមបូព៌ា និងវគ្គទី៣ តួនាទីរបស់មហាអំណាចក្នុងការលើកកម្ពស់សុខដុមភាពពិភពលោក។ នៅក្នុងវេទិកានេះ ក៏មានការចូលរួមពីវាគ្មិនជំនាញៗដែលនឹងជជែកពីបញ្ហានានាតាមវគ្គនីមួយៗផងដែរ។

លោកបណ្ឌិត គិន ភា ថា វេទិកានេះ ក្រៅពីវាគ្មិនជំនាញ ក៏មានអ្នកចូលរួមមកពីស្ថាប័នធនាគារខួរក្បាលជាតិ និងអន្តរជាតិ សាស្ត្រាចារ្យ និស្សិតសាកលវិទ្យាល័យ តំណាងក្រសួង តំណាងស្ថាទូតបរទេសប្រចាំកម្ពុជា ថ្នាក់ដឹកនាំនិងអ្នកសា្រវជ្រាវនៃរាជបណ្ឌិត្យសភាកម្ពុជា ព្រមទាំងអ្នកសារព័ត៌មាន សរុបប្រមាណ ១០០នាក់។ ដោយឡែកចំពោះពិធីបើកនៃវេទិកានេះនឹងប្រព្រឹត្តទៅក្រោមអធិបតីភាពរបស់លោកបណ្ឌិត យង់ ពៅ អគ្គលេខាធិការនៃរាជបណ្ឌិត្យសភាកម្ពុជា។ ចំពោះក្នុងពិធីបិទ និងធ្វើឡើងក្រោមអធិបតីភាពរបស់បណ្ឌិតសភាចារ្យ សុខ ទូច ប្រធាន រាជបណ្ឌិត្យសភាកម្ពុជា។

ឆ្លៀតក្នុងឱកាសនេះ ក្រៅពីការរៀបចំវេទិកាទំនាក់ទំនងអន្តរជាតិលើកទី៣ លោកបណ្ឌិត គិន ភា បញ្ជាក់ថា ក៏មានពិធីចុះហត្ថលេខាលើអនុស្សរណៈនៃការយោគយល់គ្នា (MOU) រវាងវិទ្យាស្ថានទំនាក់ទំនងអន្តរជាតិនៃកម្ពុជានិងមូលនិធិខុនរ៉ាដ អាដិណៅអ៊ែរប្រចាំព្រះរាជាណាចក្រកម្ពុជាសម្រាប់រយៈពេល ៤ឆ្នាំ (២០២៤-២០២៧) នៅចុងបញ្ចប់នៃកម្មវិធី ក្រោមអធិបតីភាពរបស់លោកបណ្ឌិត សុខ ទូច។ ចំពោះការចុះ MOU នេះគឺបញ្ជាក់ពីវិសាលភាព និងបង្កើតក្របខ័ណ្ឌសម្រាប់កម្មវិធីកិច្ចសហប្រតិបត្តិការរវាងស្ថាប័នទាំងពីរ៕

The post ស្អែកនេះ រាជបណ្ឌិត្យសភាកម្ពុជា នឹងរៀបចំវេទិកាទំនាក់ទំនងអន្តរជាតិលើកទី៣ ស្តីពីសណ្តាប់ធ្នាប់ពិភពលោក និងតួនាទីមហាអំណាចដើម្បីសន្តិភាពសកល appeared first on Kampuchea Thmey Daily.

សេដ្ឋវិទូប្រាប់ឆ្នាំដែល ចិន ផ្តួល សហរដ្ឋអាមេរិក ក្លាយជាមហាអំណាចសេដ្ឋកិច្ចពិភពលោក

Sok Sovann — Thu, 04 Mar 2021 07:44:39 +0000

ក្រុមសេដ្ឋវិទូជឿជាក់ថា ប្រទេសចិននឹងផ្តួលសហរដ្ឋអាមេរិក ដើម្បីក្លាយជាមហាអំណាចសេដ្ឋកិច្ចពិភពលោកនៅត្រឹមឆ្នាំ២០២៨។

ការសិក្សាពីមជ្ឈមណ្ឌលស្រាវជ្រាវសេដ្ឋកិច្ចនិងពាណិជ្ជកម្ម បាននិយាយថា រោគរាតត្បាតកូវីដ១៩ និងការធ្លាក់ចុះនៃសេដ្ឋកិច្ចសកលបានបង្ហាញពីភាពប្រកួតប្រជែងខាងសេដ្ឋកិច្ចរវាងចិនជាមួយសហរដ្ឋអាមេរិក ដែលនៅទីបំផុតមានតែចិនប៉ុណ្ណោះដែលបានបង្ហាញលទ្ធផលគាប់ប្រសើរ។

ទន្ទឹមនឹងនេះដែរ ប្រទេសចិនបានប្រើវិបត្តិរោគរាតត្បាត ដើម្បីពង្រឹងជំហររបស់ខ្លួនក្នុងនាមជាតួអង្គនៅលើឆាកពិភពលោក ដោយផ្តល់វ៉ាក់សាំងកូវីដរបស់ខ្លួន កន្លះកោដិដូសទៅឲ្យប្រទេសចំនួន៤៥ ដើម្បីជួយពួកគេឲ្យយកឈ្នះជំងឹនេះរួមទាំងនៅតំបន់អាមេរិកខាងត្បូងដែលជាភូមិសាស្រ្តរបស់អាមេរិកផងដែរ។

ការចាក់ថ្នាំបង្ការរោគជាមួយវ៉ាក់សាំងរបស់ចិន បានចាប់ផ្តើមនៅក្នុងប្រទេសជាង២៥ ហើយវ៉ាក់សាំងត្រូវបានបញ្ជូនទៅ១១ប្រទេសផ្សេងទៀត។

ប្រទេសចិន បានបង្កើតមហាសេដ្ឋីជាង២០០នាក់កាលពីឆ្នាំមុន ខណៈទីផ្សារភាគហ៊ុនដែលកំពុងរីកចម្រើននិងការចុះបញ្ជីក្រុមហ៊ុនថ្មីមួយចំនួន បានជួយទូទាត់ចំពោះការខូចខាតដែលបណ្តាលមកពីជំងឺរាតត្បាតកូវីដ១៩។

បញ្ជីអ្នកមានសកលលោករបស់ក្រុមហ៊ុន Hurun បានបង្ហាញថា ជនជាតិចិនចំនួន២៥៩នាក់ បានក្លាយខ្លួនជាមហាសេដ្ឋីមានទឹកប្រាក់រាប់ពាន់លានដុល្លារនៅក្នុងឆ្នាំ២០២០ ច្រើនជាងប្រទេសដទៃទៀតនៅលើពិភពលោក ហើយនាំឲ្យប្រទេសនេះមានមហាសេដ្ឋីសរុបចំនួន១,០៥៨នាក់។

បើប្រៀបធៀប សហរដ្ឋអាមេរិកបានបង្កើតមហាសេដ្ឋីថ្មីត្រឹមតែ៧០នាក់ប៉ុណ្ណោះកាលពីឆ្នាំមុន ដែលធ្វើឲ្យចំនួនសរុបរបស់ខ្លួនកើនដល់៦៩៦នាក់។

ប្រទេសចិន ត្រូវបានគេមើលឃើញថា សេដ្ឋកិច្ចរបស់ខ្លួនមានការរីកលូតលាស់ខណៈ ហិរញ្ញវត្ថុរបស់ប្រទេសផ្សេងទៀតនៅលើពិភពលោក ត្រូវទទួលរងផលប៉ះពាល់ដោយសារជំងឺរាតត្បាតកូវីដ១៩៕

ប្រែសម្រួលដោយ៖ Vann Vann

ប្រភព៖ Daily Mail

ចុចអាន៖ អានបន្តិចមើល ! វិស័យសំណង់លំនៅដ្ឋាន និងអចលនទ្រព្យ ដំណើរការយ៉ាងណាដែរ ក្នុងដំណាក់កាលវិបត្តិជំងឺកូវីដ-១៩

ចុចអាន៖ កម្ពុជាមានសមត្ថភាពផលិតស៊ីម៉ងត៍ខ្លួនឯង មួយឆ្នាំចំណេញជិត ៥០០ លានដុល្លារ មិនបាច់នាំចូលពីក្រៅ

The post សេដ្ឋវិទូប្រាប់ឆ្នាំដែល ចិន ផ្តួល សហរដ្ឋអាមេរិក ក្លាយជាមហាអំណាចសេដ្ឋកិច្ចពិភពលោក appeared first on Kampuchea Thmey Daily.

មហាអំណាចពិភពលោក៣ កំពុងតតាំងគ្នាដើម្បីរុករករ៉ែនៅឋានព្រះចន្ទ

Sok Sovann — Thu, 04 Feb 2021 09:14:21 +0000

ក្រុមអ្នកជំនាញបានព្រមានថា ភពព្រះចន្ទត្រូវបានគេកំណត់ថានឹងក្លាយជា “តំបន់ព្រៃខាងលិចថ្មី” ខណៈប្រទេសចិន រុស្ស៊ីនិងសហរដ្ឋអាមេរិកកំពុងប្រយុទ្ធប្រឆាំងដើម្បីទទួលបានសិទ្ធិរុករករ៉ែនៅទីនោះ។

រឿងនេះបានកើតឡើងបន្ទាប់ពីក្របខណ្ឌច្បាប់ដើម្បីអនុញ្ញាតឲ្យមានការរុករករ៉ែនៅលើភពព្រះចន្ទ ត្រូវបានចុះហត្ថលេខាដោយប្រទេសអូស្រ្តាលី កាណាដា អង់គ្លេស ជប៉ុន លុចសំបួ អ៊ីតាលី អារ៉ាប់រួមនិងអង្គការណាសាកាលពីឆ្នាំមុនដែលត្រូវបានគេស្គាល់ថា កិច្ចព្រមព្រៀង Artemis។

ក្រុមអ្នកជំនាញបានចង្អុលបង្ហាញថា ការរុករកអាចម៍ផ្កាយនិងភពព្រះចន្ទអាចចំណាយប្រាក់រាប់ពាន់លានផោន បន្ទាប់ពីអាចម៍ផ្កាយមានលោហធាតុទទឹង១៤០ម៉ាយល៍និងមានតម្លៃប្រមាណ១០,០០០ Quadrillion (១០,០០០,០០០,០០០,០០០,០០០,០០០ដុល្លារ) បានខិតមកជិតផែនដីរបស់យើងកាលពីចុងឆ្នាំមុន។

ក្រុមអ្នកជំនាញបាននិយាយថា ប៉ុន្តែដោយសារការខកខានមិនបានចូលរួមជាមួយប្រទេសរុស្ស៊ីនិងចិននៅក្នុងកិច្ចព្រមព្រៀង Artemis, អតីតរដ្ឋបាលរបស់លោក Trump ត្រូវបានគេចោទប្រកាន់ថា “បង្កឲ្យមានការគំរាមកំហែងកាន់តែធ្ងន់ធ្ងរដល់សន្តិសុខជាតិ”។

លោក Elya Taichman អតីតនាយកនីតិបញ្ញត្តិរបស់អភិបាលរដ្ឋ New Mexico លោកស្រី Michelle Lujan Grisham បានប្រាប់កាសែត Politico ថា “ជាអកុសល រដ្ឋបាល Trump បានបង្កឲ្យមានការគំរាមកំហែងដល់សន្តិសុខជាតិកាន់តែខ្លាំង និងបានប្រថុយប្រថានចំពោះឱកាសសេដ្ឋកិច្ចដែលខ្លួនសង្ឃឹមថានឹងទទួលបានពីបរិយាកាសខាងក្រៅ ដោយសារតែការខកខានមិនចូលរួមជាមួយរុស្ស៊ីឬចិនក្នុងនាមជាដៃគូសក្តានុពល”។

លោកបានសរសេរថា “ផ្ទុយទៅវិញ កិច្ចព្រមព្រៀង Artemis បានជំរុញឲ្យប្រទេសចិននិងរុស្ស៊ី ឆ្ពោះទៅរកការបង្កើនកិច្ចសហប្រតិបត្តិការក្នុងលំហអវកាសទាំងគ្មានភាពភ័យខ្លាច”។

ចាប់តាំងពីសេចក្តីប្រកាសស្តីពីកិច្ចព្រមព្រៀង Artemis, ចិនបានស្នើទៅប្រទេសរុស្ស៊ីដើម្បីរួមគ្នាបង្កើតមូលដ្ឋានស្រាវជ្រាវឋានព្រះចន្ទមួយ ប៉ុន្តែអ្នកជំនាញគិតថា រឿងនេះអាចនឹងកំពុងបង្កជាបញ្ហា។

អ្នកជំនាញការខាងនយោបាយលោកស្រី Anne-Marie Slaughter និយាយថា “អាមេរិកនិងចិនគួរតែសហការគ្នានៅទីអវកាស។ ប្រសិនបើសហរដ្ឋអាមេរិកអាចសម្របសម្រួលជាមួយសហភាពសូវៀតស្តីពីគោលនយោបាយអវកាសក្នុងអំឡុងសង្គ្រាមត្រជាក់ អាមេរិកអាចរកឃើញនូវមធ្យោបាយដើម្បីធ្វើកិច្ចសហប្រតិបត្តិការជាមួយប្រទេសចិននាពេលឥឡូវនេះ”។

លោកស្រី Slaughter ដែលជាអតីតនាយកផ្នែកធ្វើផែនការគោលនយោបាយនៅក្រសួងការបរទេសសហរដ្ឋអាមេរិកចាប់ពីឆ្នាំ២០០៩ដល់ឆ្នាំ២០១១ជឿជាក់ថា ក្រុមរបស់លោកប្រធានាធិបតី Joe Biden គួរតែបន្តចាប់ផ្តើមវិធីសាស្រ្តថ្មីនៅក្នុងគណៈកម្មាធិការរបស់អង្គការសហប្រជាជាតិស្តីពីការប្រើប្រាស់អវកាសដោយសន្តិវិធី៕

ប្រែសម្រួលដោយ៖ Vann Vann

ប្រភព៖ Daily Star

ចុចអាន៖ ពណ៌សំណាង សក្តិសមជាមួយរាសីកំណើត ដើម្បីនាំថាមពលវិជ្ជមាន នាឆ្នាំ ២០២១

The post មហាអំណាចពិភពលោក៣ កំពុងតតាំងគ្នាដើម្បីរុករករ៉ែនៅឋានព្រះចន្ទ appeared first on Kampuchea Thmey Daily.

មហាអំណាច២នេះមិនទាន់អបអរជ័យជម្នះលោក Biden ទេ ហេតុអ្វីទៅ?

Sok Sovann — Tue, 10 Nov 2020 07:09:56 +0000

បណ្តាមេដឹកនាំពិភពលោកបានផ្ញើសារអបអរសាទរដល់ប្រធានាធិបតីជាប់ឆ្នោតលោក Joe Biden និងអនុប្រធានាធិបតីជាប់ឆ្នោតលោកស្រី Kamala Harris ប៉ុន្តែមិនមែនគ្រប់គ្នាសុទ្ធតែចេញមុខទទួលស្គាល់អ្នកឈ្នះនៃការបោះឆ្នោតប្រធានាធិបតីអាមេរិកឆ្នាំ២០២០នេះទេ។

ក្នុងចំណោមអ្នកទាំងនោះគឺជាបុរសខ្លាំងដែលលោកប្រធានាធិបតី Donald Trump មានទំនាក់ទំនងកក់ក្តៅនិងទាក់ទាញការកោតសរសើរក្នុងរយៈពេលបួនឆ្នាំចុងក្រោយនេះ។

ទោះបីជាយ៉ាងណាក៏ដោយ មេដឹកនាំទាំងនោះហាក់ដូចជាមិនទាន់បានបញ្ចេញប្រតិកម្មណាមួយនៅឡើយទេចំពោះការជាប់ឆ្នោតរបស់រដ្ឋបាលថ្មី។

ប្រធានាធិបតីរុស្ស៊ីលោក Vladimir Putin

ក្នុងឆ្នាំ២០១៦ វិមានក្រឹមឡាំងបានអបអរសាទរចំពោះលោកប្រធានាធិបតី Donald Trump ក្នុងរយៈពេលត្រឹមតែប៉ុន្មានម៉ោងប៉ុណ្ណោះបន្ទាប់ពីការប្រកាសលទ្ធផលប៉ុន្តែប្រធានាធិបតីរុស្ស៊ីលោក Vladimir Putin មិនបានផ្ញើសារដូចនេះទៅកាន់លោក Biden ទេ។ កាលពីថ្ងៃចន្ទ អ្នកនាំពាក្យវិមានក្រឹមឡាំងលោក Dmitry Peskov បាននិយាយថា ទីក្រុងមូស្គូនឹងរង់ចាំលទ្ធផលបោះឆ្នោតជាផ្លូវការមុនពេលធ្វើអត្ថាធិប្បាយអំពីលទ្ធផល។

ក្នុងរយៈពេលនៃតំណែងជាប្រធានាធិបតីរបស់គាត់ លោក Trump បានដើរផ្លូវផ្សេងពីគោលនយោបាយដ៏យូរអង្វែងរបស់សហរដ្ឋអាមេរិកដោយបានសរសើរលោក Putin ម្តងហើយម្តងទៀតដែលជាហេតុធ្វើឲ្យមានការសង្ស័យចំពោះទំនាក់ទំនងនៃយុទ្ធនាការរបស់លោកចំពោះការជ្រៀតជ្រែករបស់រុស្ស៊ីនៅក្នុងការបោះឆ្នោត។ ទំនាក់ទំនងបែបនេះមិនអាចត្រូវបានរំពឹងទុកពីលោក Biden ទេព្រោះគាត់បានប្តេជ្ញាចាត់ទុកការជ្រៀតជ្រែកពីបរទេសថាជាទង្វើអមិត្ត។

ក្នុងអំឡុងបទសម្ភាសន៍ជាមួយកម្មវិធី 60 Minutes របស់ទូរទស្សន៍ CBS កាលពីចុងខែតុលា លោក Biden បានហៅប្រទេសរុស្ស៊ីថាជា “ការគំរាមកំហែងដ៏សំខាន់” ចំពោះសន្តិសុខជាតិរបស់សហរដ្ឋអាមេរិក។ អ្នកនាំពាក្យវិមានក្រឹមឡាំងលោក Peskov បានឆ្លើយតបថា ប្រទេសរុស្ស៊ីមិនយល់ស្របនឹងការកត់សម្គាល់របស់លោក Biden ទេហើយវោហារសាស្រ្តបែបនេះបានពង្រីកការស្អប់ខ្ពើមចំពោះសហព័ន្ធរុស្ស៊ី។

មុនការបោះឆ្នោតអាមេរិក ប្រទេសទាំងពីរមិនបានឈានដល់កិច្ចព្រមព្រៀងដើម្បីពង្រីកសន្ធិសញ្ញាកាត់បន្ថយអាវុធសំខាន់ New START ដែលចុះហត្ថលេខាដោយលោកប្រធានាធិបតី Obama និង Dmitry Medvedev ក្នុងឆ្នាំ២០១០ទេ។

កន្លងមក លោក Putin បានបញ្ជាក់ថា លោកមើលឃើញសន្ធិសញ្ញាជាយុទ្ធសាស្ត្រនេះជាចំណុចសក្តានុពលមួយសម្រាប់កិច្ចសហប្រតិបត្តិការជាមួយលោក Biden។

ប្រធានាធិបតីចិនលោក Xi Jinping

ថ្វីបើមានវោហារសាស្រ្តដ៏ខ្លាំងក្លាប្រឆាំងនឹងប្រទេសចិនក្នុងនាមជាបេក្ខជននៅក្នុងការបោះឆ្នោតឆ្នាំ២០១៦ក៏ដោយក៏ប្រធានាធិបតីជាប់ឆ្នោតពេលនោះគឺលោក Trump ត្រូវបានអបអរសាទរចំពោះជ័យជម្នះរបស់គាត់ដោយលោកប្រធានាធិបតី Xi Jinping។ លោក Xi បានអំពាវនាវឲ្យទំនាក់ទំនងដ៏ល្អនិងរឹងមាំរវាងចិន-អាមេរិកឆ្ពោះទៅមុខ។

ហើយខណៈពេលដែលលោក Trump និងលោក Xi បានបង្កើតចំណងមិត្តភាពមិនទំនងមួយរយៈនៅឯរមណីយដ្ឋាន Mar-a-Lago របស់ប្រធានាធិបតីសហរដ្ឋអាមេរិកនោះ ទំនាក់ទំនងរវាងប្រទេសទាំងពីរកាន់តែយ៉ាប់យ៉ឺនទៅៗចំពេលមានការបែកបាក់គ្នាយ៉ាងខ្លាំងលើបញ្ហានានាដូចជាពាណិជ្ជកម្ម បច្ចេកវិទ្យា សិទ្ធិមនុស្ស ការចោទប្រកាន់អំពីការពង្រីកខ្លួនរបស់ចិននិងថ្មីៗនេះគឺការស្តីបន្ទោសលើការរីករាលដាលនៃជំងឺជំងឺកូវីដ១៩។

ប៉ុន្តែទោះបីមានការប្រឆាំងនឹងបរិបទនេះក៏ដោយក៏លោក Xi មិនបានស្វាគមន៍ភ្លាមៗចំពោះប្រធានាធិបតីជាប់ឆ្នោត Biden ដែរ។ កាលពីថ្ងៃចន្ទ រដ្ឋាភិបាលចិនបានបដិសេធឆ្លើយសំណួរថា តើពេលណាទើបខ្លួនអបអរសាទរលោក Biden ចំពោះជ័យជម្នះនៃការបោះឆ្នោតរបស់លោកដោយអ្នកនាំពាក្យក្រសួងការបរទេសបាននិយាយយ៉ាងខ្លីថា ប្រទេសចិននឹងធ្វើស្របតាមការអនុវត្តអន្តរជាតិ។

វាមិនពិបាកយល់ទេថាតើហេតុអ្វីបានជាទីក្រុងប៉េកាំងស្ទាក់ស្ទើរ។ លោក Biden ដិនបានអួតអាងពីសមត្ថភាពរបស់ខ្លួនក្នុងការទប់ទល់ជាមួយប្រទេសចិនផ្ទុយពីលោក Trump។ លោក Biden បានថ្កោលទោសប្រធានាធិបតីជិតផុតអាណត្តិរូបនេះសម្រាប់ការឱបក្រសោបលោក Xi។ ទីក្រុងប៉េកាំងប្រហែលជាមិនមានអារម្មណ៍ថាមានការសម្រុះសម្រួលជាមួយសហរដ្ឋអាមេរិកក្រោមការដឹកនាំរបស់រដ្ឋបាលថ្មីនេះទេជាពិសេសដោយសារហានិភ័យនៃសកម្មភាពដែលមិនអាចទាយទុកជាមុនបាន៕

ប្រែសម្រួលដោយ៖ Vann Vann

ប្រភព៖ CNN

The post មហាអំណាច២នេះមិនទាន់អបអរជ័យជម្នះលោក Biden ទេ ហេតុអ្វីទៅ? appeared first on Kampuchea Thmey Daily.

មហាអំណាច Archives - Kampuchea Thmey Daily

​នាយករដ្ឋមន្ត្រី​កាណាដា ​អំពាវនាវ​ឲ្យ​​ប្រទេសអំណាច​កណ្តាល​រួបរួម​គ្នា កុំតាមមហាអំណាច​​

សម្ដេចតេជោ ប្រាប់អាស៊ានឱ្យបង្កើតសុខដុមក្នុងតំបន់ ហើយប្រយ័ត្នចំពោះភាពលម្អៀងទៅមហាអំណាចណាមួយ

សេដ្ឋវិទូប្រាប់ឆ្នាំដែល ចិន ផ្តួល សហរដ្ឋអាមេរិក ក្លាយជាមហាអំណាចសេដ្ឋកិច្ចពិភពលោក

មហាអំណាចពិភពលោក៣ កំពុងតតាំងគ្នាដើម្បីរុករករ៉ែនៅឋានព្រះចន្ទ

មហាអំណាច២នេះមិនទាន់អបអរជ័យជម្នះលោក Biden ទេ ហេតុអ្វីទៅ?

នាយករដ្ឋមន្ត្រីកាណាដា អំពាវនាវឲ្យប្រទេសអំណាចកណ្តាលរួបរួមគ្នា កុំតាមមហាអំណាច