យេនឌ័រ Archives - Kampuchea Thmey Daily

ប្រធានរដ្ឋសភាថា ស្ត្រីត្រូវការឱកាស និងការផ្លាស់ប្ដូរនូវផ្នត់គំនិតសង្គមដើម្បីបង្ហាញសមត្ថភាពពេញលេញរបស់ខ្លួន

hun sirivadh — Tue, 07 Apr 2026 07:36:17 +0000

ប្រធានសភាកម្ពុជា សម្ដេចសភាធិបតី ឃួន សុដារី មានប្រសាសន៍ថាស្ត្រីមានសក្ដានុពលរបស់ខ្លួនក្នុងការបំពេញការងារ តែក៏ត្រូវការនូវឱកាស និងការផ្លាស់ប្ដូរផ្នត់គំនិតសង្គមចំពោះពួកគេផងដែរ។ នេះជាការលើកឡើងរបស់សម្ដេចប្រធានសភាក្នុងឱកាសជំនួបជម្រាបលារបស់ឯកអគ្គរដ្ឋទូតតួកគីប្រចាំកម្ពុជាព្រឹកថ្ងៃទី៧ ខែមេសា ឆ្នាំ២០២៦នេះ។

តាមការឱ្យដឹងពីនាយខុទ្ធការល័យ និងជាអ្នកនាំពាក្យសម្ដេចសភាធិបតី លោក កែវ ពិសិដ្ឋ បានឱ្យដឹងថាក្នុងជំនួបនៅវិមានរដ្ឋសភាព្រឹកនេះ សម្ដេចសភាធិបតី ឃួន សុដារី មានប្រសាសន៍ថា ទាំងរដ្ឋសភា និងរដ្ឋាភិបាលកម្ពុជាតែងតែជំរុញការងារយេនឌ័រជាខ្លាំងដើម្បីធានាថាស្ត្រីគ្រប់រូបទទួលបានឱកាសចូលរួមចំណែកវិស័យផ្សេងៗនៅកម្ពុជាជាពិសេសគឺការធ្វើនយោបាយ និងការសម្រេចចិត្ត។

សម្ដេចបញ្ចាក់ថា៖ «ស្ត្រីត្រូវការតែឱកាស និងការផ្លាស់ប្ដូរនូវផ្នត់គំនិតសង្គមប៉ុណ្ណោះគឺស្ត្រីអាចធ្វើការងារដូចជាបុរសផងដែរ។ អ្វីដែលបុរសធ្វើបាន គឺស្ត្រីក៏អាចធ្វើបានដែរ ហើយការងារខ្លះល្អជាងបុរសផង»។

សម្ដេចក៏បន្ថែមផងដែរថាក្នុងសភាក៏មានកម្មវិធី ស្ត្រីឆ្ពោះទៅភាពជាអ្នកដឹកនាំ ដែលផ្ដល់នូវបទពិសោធន៍ផ្ទាល់របស់ថ្នាក់ដឹកនាំនយោបាយជាស្ត្រីដល់ស្ត្រីនិងក្មេងស្រីក្នុងវេទិកាសាធារណៈផងដែរ។

ឯកអគ្គរដ្ឋទូតតួកគីដែលចប់អាណត្តិនៅកម្ពុជាលោកស្រី អ៊ុលឃូ ខូខាអ៊ីវ ( Ülkü Kocaefe) បានកោតសរសើរចំពោះភាពជាអ្នកដឹកនាំរបស់សម្ដេចសភាធិបតីដោយថាមិនត្រឹមជាគំរូសម្រាប់ស្ត្រីកម្ពុជាប៉ុណ្ណោះទេ តែសម្រាប់ប្រជាពលរដ្ឋទូទៅផងដែរ។ លោកស្រីបន្ថែមថា តួគីនៅតែផ្ដល់អាទិភាពខ្ពស់ដល់ទំនាក់ទំនងជាមួយប្រទេសកម្ពុជា ពិសេសក៏នឹងពង្រឹងទំនាក់ទំនងពហុភាគីរវាងរដ្ឋសភាប្រទេសទាំងពីរបន្ថែមទៀតផងដែរ។

ទំនាក់ទំនងតួកគីនិងកម្ពុជាត្រូវបានមើលឃើញថាមានទំនាក់ទំនងរីកចម្រើនខ្លាំងក្នុងឆ្នាំ២០១៩ បន្ទាប់ពីអតីតនាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានបំពេញទស្សនកិច្ចនៅប្រទេសនេះ និងបានបន្តពង្រឹងបន្ថែមដោយរដ្ឋាភិបាលអាណត្តិទី៧នេះ។ ប្រទេសនេះតែងតែគាំទ្រដល់ការអភិវឌ្ឍន៍កម្ពុជាលើវិស័យពាណិជ្ជកម្ម វិនិយោគ ទេសចរន៍ អប់រំ សុខាភិបាល និងហេដ្ឋារចនាសម្ព័ន្ធ ខណៈប្រធានសភាកម្ពុជា បានបង្ហាញក្ដីសង្ឃឹមថា តួកគីនឹងបន្តជួយគាំទ្រដល់កម្ពុជាលើវិស័យអប់រំ បណ្ដុះបណ្ដាលធនធានមនុស្សជាសំខាន់បន្ថែមទៀតផងដែរ៕

អត្ថបទដោយ ហ៊ុន សិរីវឌ្ឍន៍

The post ប្រធានរដ្ឋសភាថា ស្ត្រីត្រូវការឱកាស និងការផ្លាស់ប្ដូរនូវផ្នត់គំនិតសង្គមដើម្បីបង្ហាញសមត្ថភាពពេញលេញរបស់ខ្លួន appeared first on Kampuchea Thmey Daily.

និស្សិត៤ក្រុម នឹងចូលរួមប្រកួតជជែកដេញដោលវគ្គពាក់កណ្តាលផ្តាច់ព្រ័ត្រ ក្រោមមូលបទ «ស្រ្តី និងសកលភាវូបនីយកម្ម»

អុន ស្រីមាន — Wed, 21 May 2025 02:48:37 +0000

និស្សិត៤ក្រុមនឹងប្រកួតជជែកដេញដោលក្រោមមូលបទ «ស្រ្តី និងសកលភាវូបនីយកម្ម» នៅថ្ងៃទី ២៥ ឧសភា ឆ្នាំ២០២៥។ បន្ទាប់ពីឆ្លងកាត់ការបណ្តុះបណ្តាល ស្តីពីមូលបទនៃការប្រកួត និងតិចនិចក្នុងការនិយាយជាសាធារណៈក្នុងនាមជាអ្នកជជែកដេញដោល បេក្ខជនទាំង៤ក្រុមនឹងប្រកួតដើម្បីស្វែងរកក្រុមឆ្នើមពីរក្រុមទៅកាន់វគ្គផ្តាច់ព្រ័ត្រ។

កញ្ញា តាំង មុយលាង អ្នកដឹកនាំគម្រោងកម្មវិធីប្រកួតជជែកដេញដោល «ទស្សនៈយុវជន»ប្រចាំឆ្នាំ២០២៥ បានប្រាប់ កម្ពុជាថ្មី ថា រដូវកាលទី៥នេះ កម្មវិធីជជែកដេញដោលផ្តោតលើមូលបទ «ស្រ្តី និងសកលភាវូបនីយកម្ម» ក្រោមការសហការរៀបចំរវាង NGO-CEDAW និង RULErs ។ កញ្ញាបន្តថា មកដល់ពេលនេះ បេក្ខជន ៤ក្រុម បានឈានមកដល់ដំណាក់កាលវគ្គពាក់កណ្តាលផ្តាច់ព្រ័ត្រ គឺក្រុម ស្រ្តីសកលឬទ្ធិពល, មេរ៉ាសម្បយោគបញ្ច , សណ្តែកក្រហម, និង ពុទ្ធនារីឬទ្ធី ដែលក្នុងចំណោម ៤ ក្រុមនេះ មានតែពីរក្រុមប៉ុណ្ណោះអាចឈានទៅកាន់វគ្គផ្តាច់ព្រ័ត្របាន។

បើតាមប្រធានគម្រោង បានឱ្យដឹងថា ការប្រកួតក្នងវគ្គពាក់កណ្តាលផ្តាច់ព្រ័ត្រនេះ ក្រុមទាំង៤ នឹងជជែកដេញដោលទៅលើប្រធានបទពីរផ្សេងគ្នា។ ប្រធានបទទី១ «ការមិនអនុវត្តនូវក្រមសីលធម៌វិជ្ជាជីវៈអ្នកសារព័ត៌មានជាកត្តាជំរុញឱ្យកើនឡើងនូវវប្បធម៍ស្តីបន្ទោសជនរងគ្រោះ» ជាការប្រកួតរវាងក្រុម ស្រ្តីសកលឬទ្ធិពល ជាមួយ ក្រុម មេរ៉ាសម្បយោគបញ្ច។ ប្រធានបទទី២ «ការកើនឡើងនៃការប្រើប្រាស់បណ្តាញសង្គមជាកត្តាជំរុញនាំឱ្យមានផលប៉ះពាល់ដល់ស្ត្រីជាជាងជួយស្ត្រី» ជាការប្រកួតរវាងក្រុម សណ្តែកក្រហម និង ក្រុម ពុទ្ធនារីឬទ្ធី។ ក្នុងចំណោមទាំងបួនក្រុមខាងលើ នឹងត្រូវជម្រុះយកតែពីរក្រុមប៉ុណ្ណោះដើម្បីឈានទៅកាន់វគ្គផ្តាច់ព្រ័ត្រ។

នៅក្នុងការជជែកដេញដោលវគ្គពាក់កណ្ដាលផ្ដាច់ព្រ័ត្រ «ទស្សនៈយុវជន» រដូវកាលទី៥ នឹងមានការចូលរួមដាក់ពិន្ទុដោយគណៈកម្មការវាយតម្លៃ៣រូប កញ្ញា ហេង បូដាលីន លោក ងួន វ៉ាយុ និង លោកស្រី អេង ចាន់ឌី។ គណៈកម្មការទាំង៣រូប សុទ្ធតែជាអ្នកដែលមានបទពិសោធន៍ពាក់ព័ន្ធជាមួយនឹងស្រ្តី ផ្នត់គំនិតយេនឌ័រ ការងារសង្គម និងបច្ចេកទេសនៅក្នុងការជជែកដេញដោល។

ការប្រកួតនេះនឹងប្រព្រឹត្តទៅនៅថ្ងៃទី ២៥ ឧសភា ២០២៥ ដែលនឹងធ្វើនៅទីតាំង Anik Palace Hotel ចាប់ពីម៉ោង ១រសៀល ដល់ម៉ោង ៥ ល្ងាច។ ប្រសិនបើមានចំណាប់អារម្មណ៍ក្នុងការចុះឈ្មោះ សូមចូលទៅកាន់តំណភ្ជាប់ចុះឈ្មោះឱ្យបានរួសរាន់ ព្រោះចំនួនមានកំណត់។ តំណភ្ជាប់ចុះឈ្មោះ (https://docs.google.com/…/1FAIpQLSezuxtyPDd7xI…/viewform ) ។

កញ្ញា មុយលាង បានបន្តរៀបរាប់ថា ទម្រាំមកដល់វគ្គពាក់កណ្តាលផ្តាច់ព្រ័ត្រនេះ បេក្ខជនទាំង ១៦ រូប បានឆ្លងកាត់ដំណាក់កាលជាច្រើនដូចជា ការដាក់ពាក្យអនឡាញ ការសម្ភាស ការបណ្តុះបណ្តាលពីរលើក ដែលណែនាំពីមូលបទនៃការប្រកួតនៅឆ្នាំនេះ ព្រមទាំងតិចនិចក្នុងការនិយាយជាសាធារណៈក្នុងនាមជាអ្នកជជែកដេញដោលផងដែរ ដែលត្រូវបានបណ្តុះបណ្តាលដោយអ្នកដែលមានបទពិសោធន៍ដូចជា បុគ្គលិកនៃ NGO-CEDAW អ្នកនាង សៀក ពេជ្ររចនា និងលោក ងួន វ៉ាយុ ដែលជាអ្នកមានបទពិសោធន៍ និងទទួលបានជ័យលាភីក្នុងការប្រកួតជាច្រើនទាំងកម្មវិធីថ្នាក់ជាតិ។

គួរបញ្ជាក់ផងដែរថា ឆ្នាំនេះជាលើកទី៥ហើយដែលក្រុមការងារ RULErs និង NGO-CEDAW បានសហការគ្នាក្នុងការរៀបចំការប្រកួតជជែកដេញដោលលើប្រធានបទជុំវិញសិទ្ធស្រ្តី និងសមភាពយេនឌ័រ៕

The post និស្សិត៤ក្រុម នឹងចូលរួមប្រកួតជជែកដេញដោលវគ្គពាក់កណ្តាលផ្តាច់ព្រ័ត្រ ក្រោមមូលបទ «ស្រ្តី និងសកលភាវូបនីយកម្ម» appeared first on Kampuchea Thmey Daily.

ភាពជាអ្នកដឹកនាំមានតុល្យភាពយេនឌ័រនៅក្នុងសេដ្ឋកិច្ចពិតជាមានសារសំខាន់រួមចំណែកកសាងសង្គមជាតិ

Din Thary — Wed, 26 Mar 2025 05:06:56 +0000

លោកស្រី កែវ ចរិយា រដ្ឋលេខាធិការ ក្រសួងសេដ្ឋកិច្ច និងសេដ្ឋកិច្ច បានមានប្រសាសន៍ថា នៅក្នុងទីផ្សាររបស់កម្ពុជា ត្រូវបានគេទទួលស្គាល់ថាភាពជាអ្នកដឹកនាំដែលមានតុល្យភាពយេនឌ័រ និងកាលានុវត្តភាពសមភាពសមធម៌នៅក្នុងវិស័យហិរញ្ញវត្ថុពិតជាមានសារសំខាន់ដែលធានាបាននូវភាពរុងរឿង យូរអង្វែង សម្រាប់ទាំងអស់គ្នា និងរួមចំណែកកសាងសង្គមជាតិ។

នៅក្នុងកម្មវិធី «បន្លឺសំឡេងកណ្តឹង ដើម្បីសមភាពយេនឌ័រ» នាថ្ងៃទី២៤ ខែមីនា នេះ លោកស្រី កែវ ចរិយា បានលើកឡើងថា កម្មវិធីនេះមិនត្រឹមតែជាព្រឹត្តិការណ៍ដ៏សំខាន់មួយក្នុងដំណើររួមគ្នា ឆ្ពោះទៅរកបរិយាប័ន្ន និងការពង្រឹងសិទ្ធិ សមភាពប៉ុណ្ណោះទេ ប៉ុន្តែជាការក្រើនរំលឹកដ៏មានឥទ្ធិពលថា សមភាពយេនឌ័រមិនមែនត្រឹមតែជាកត្តាចាំបាច់ខាងសីលធម៌នោះទេ ប៉ុន្តែជាតម្រូវការក្នុងការចូលរួមនៃ ការអភិវឌ្ឍន៍សេដ្ឋកិច្ច និងសង្គមជាតិទាំងមូល។ ជាក់ស្តែងប្រតិបត្តិការណ៍រវាងស្ត្រី និងក្មេងស្រី ជាសមភាពមួយដែលក្នុងនីតិកាលទី៧ នេះ រាជរដ្ឋាភិបាលកម្ពុជា បានចាត់ទុកជាថា ស្ត្រីជាឆ្អឹងខ្នង សេដ្ឋកិច្ច និងសង្គមជាតិ។

នៅទូទាំងសកលលោក គ្រប់គ្នា បានទទួលស្គាល់ពីការផ្លាស់ប្ដូរការចូលរួមរបស់ស្ត្រីក្នុងធុរកិច្ចហិរញ្ញវត្ថុ និងភាពជាអ្នកដឹកនាំដែលបានជំរុញឱ្យអង្គភាព និងស្ថាប័នទាំងអស់ដំណើរការយ៉ាងល្អប្រសើរ ជំរុញនវានុវត្តន៍ និងជំរុញកំណើនប្រកបដោយនិរន្តរភាព។

លោកស្រី ម៉ារ អមរា ប្រធាននាយកប្រតិបត្តិស្តីទី ធនាគារ អេស៊ីលីដា ភីអិលស៊ី បានមានសាទរចំពោះ UN Women និង UN Global Compact ព្រមទាំងស្ថានទូតអូស្ត្រាលីប្រចាំនៅកម្ពុជា ក៏ដូចជា និយ័តករពាក់ព័ន្ធ រួមមាន និយ័តករមូលបត្រកម្ពុជា ផ្សារមូលបត្រកម្ពុជា ដែលបានជ្រើសរើសធនាគារ អេស៊ីលីដា សម្រាប់រៀបចំ កម្មវិធី “បន្លឺសំឡេងកណ្តឹង ដើម្បីសមភាពយេនឌ័រ សម្រាប់ស្រ្តី និងយុវតីទាំងអស់៖ សិទ្ធិ សមភាព បង្កើនភាពអង់អាច” នេះឡើង។

លោកបានថ្លែងថា៖« ក្នុងឱកាសដ៏វិសេសវិសាលនេះ យើងរួមគ្នាមិនត្រឹមតែលើកកម្ពស់ការយល់ដឹងប៉ុណ្ណោះទេ ប៉ុន្តែដើម្បីលើកកម្ពស់ដល់សិទ្ធិ និងបង្កើនភាពអង់អាចរបស់ស្ត្រី និងយុវតីនៅគ្រប់ទីកន្លែង។ ក្នុងនាមជាធនាគារពាណិជ្ជនាំមុខក្នុងវិស័យធនាគារ ធនាគារ អេស៊ីលីដា ចូលរួមក្នុងការប្រកួតប្រជែងលក្ខណៈចម្រុះ និងបរិយាបន្ន ដោយធានាថា សំឡេងរបស់ស្ត្រីត្រូវបានឮ និងឱ្យតម្លៃដល់កម្មករនិយោជិតគ្រប់ជាន់ថ្នាក់របស់យើង។ ដូច្នេះ យើងរួមគ្នាបន្តលើកកម្ពស់សមភាពយេនឌ័រ និងបង្កើនភាពអង់អាចដល់ស្ត្រីនិងយុវតីគ្រប់រូប និងធានានូវផលប្រយោជន៍សម្រាប់សង្គម និងសេដ្ឋកិច្ចឱ្យបានកាន់តែទូលំទូលាយ»។

លោកស្រី កែវ ចរិយា បានថ្លែងបន្ថែមទៀតថា មិនតែប៉ុណ្ណោះ សំឡេងកណ្ដឹងដើម្បីសមភាពយេនឌ័រ បានសបញ្ជាក់ពីការគាំទ្រ និងអំពាវនាវ ឱ្យមានការយកចិត្តទុកដាក់ខ្ពស់ក្នុងការលើកកម្ពស់វត្តមានរបស់ស្ត្រីក្នុងភាពជាអ្នកដឹកនាំក្នុងវិស័យហិរញ្ញវត្ថុ សម្រាប់គោលនយោបាយដែលលើកកម្ពស់កាលានុវត្តនភាពស្មើគ្នា និងបរិយាកាសរីកចម្រើនសម្រាប់មនុស្សគ្រប់គ្នាដោយមិនប្រកាន់ភេទ។

លោកស្រី សង្កត់ធ្ងន់ថា «តាមរយៈគំនិតផ្ដួចផ្ដើមជាលើកដំបូងនៅកម្ពុជានេះ មិនមែនត្រឹមតែជានិមិត្តសញ្ញាប៉ុណ្ណោះទេ ប៉ុន្តែជាការប្តេជ្ញាចិត្តក្នុងការកសាងប្រព័ន្ធអេកូឡូស៊ីហិរញ្ញវត្ថុដែលផ្តល់តម្លៃគាំទ្រដល់ភាពជឿនលឿនរបស់ស្រ្តីលើវិស័យមូលប័ត្រ»។

លោកស្រី បានអះអាងថា នៅពេលដែលពិភពលោកកាន់តែជឿនលឿនទៅមុខ យើងនឹងបន្តឆ្ពោះទៅរកបរិញ្ញាប័ណ្ឌ ដែលជួបប្រទះនឹងឧបសក្ក និងបញ្ហាប្រឈមស្របពេលមានឧបសក្ក និងបញ្ហាប្រឈម វត្តមានរបស់ស្ត្រី នឹងប្រែក្លាយទៅជាកាលានុវត្តភាព ដែលអាចជំរុញឱ្យមនុស្សគ្រប់គ្នារួមចំណែកដល់វឌ្ឍនភាពសេដ្ឋកិច្ច និងសង្គម។ លោកស្រីសង្ឃឹមថា កម្ពុជានឹងអាចកសាងសង្គម និងប្រទេសមួយដែលមានសមភាពយេនឌ័រ យ៉ាងពេញលេញ៕

The post ភាពជាអ្នកដឹកនាំមានតុល្យភាពយេនឌ័រនៅក្នុងសេដ្ឋកិច្ចពិតជាមានសារសំខាន់រួមចំណែកកសាងសង្គមជាតិ appeared first on Kampuchea Thmey Daily.

ឱកាសថ្មី សម្រាប់និស្សិតជជែកដេញដោលជាសាធារណៈលើប្រធានបទទាក់ទងនឹងផ្នត់គំនិតយេនឌ័រ

អុន ស្រីមាន — Mon, 03 Mar 2025 04:26:32 +0000

«ទស្សនៈយុវជន – Youth’s Perspectives» បានរៀបចំកម្មវិធីជជែកដេញដោលសាធារណៈទាក់ទងនឹងផ្នត់គំនិតស្ត្រី និងយេនឌ័រ ដោយឆ្នាំ២០២៥ នេះ ធ្វើឡើងក្រោមប្រធានបទ «ស្ត្រី និងសកលភាវូបនីយកម្ម»។ ទស្សនៈយុវជន ក៏បានប្រកាសជ្រើសរើសនិស្សិតជាច្រើនរូបចូលរួមប្រកួតក្នុងកម្មវិធីនេះ ដើម្បីក្លាយជាម្ចាស់ជ័យលាភី ក្នុងការជជែកដេញដោលរដូវកាលទី៥ នេះ។

ម្ចាស់ជ័យលាភី ឆ្នាំ២០២៤

សម្រាប់គោលបំណងដែលជ្រើសយកប្រធានបទ «ស្ត្រី និងសកលភាវូបនីយកម្ម» អ្នកនាង គ្រី លីតា សហស្ថាបនិកនៃ RULErs បានឱ្យ កម្ពុជាថ្មី ដឹងថា ការរើសយកប្រធានបទនេះ ព្រោះមើលឃើញថា បច្ចុប្បន្ន មានលំហូរចូលវប្បធម៌ និងផ្នត់គំនិតពីបរទេសច្រើន ជាពិសេស ផ្នត់គំនិតរបស់ស្ត្រី និងក្មេងស្រីសព្វថ្ងៃ ក៏ទទួលឥទ្ធិពលពីសកលលោកមកដែរ តាមរយៈការគិតបានវែងឆ្ងាយ ហ៊ានក្នុងការសម្រេចចិត្ត និងរើសគូជីវិតដោយខ្លួនឯង និងបញ្ឈប់ការគិតថា ស្រ្តីវិលចង្ក្រាន្តមិនជុំ ដូចពីមុនទៀត។

អ្នកនាង គ្រី លីតា

ចំពោះលក្ខខណ្ឌចូលរួមប្រកួតប្រជែងមានដូចជា ជានិស្សិតកំពុងសិក្សាថ្នាក់បរិញ្ញាបត្រ, ជាអ្នកមានទីលំនៅបច្ចុប្បន្នក្នុងទីក្រុងភ្នំពេញ, មានការយល់ដឹងមូលដ្ឋានក្នុងការនិយាយជាសាធារណៈ និងការជចែកដេញដោល, មានចំណាប់អារម្មណ៍ក្នុងការយល់ដឹង រៀនសូត្របន្ថែមពីបញ្ហាពាក់ព័ន្ធនឹងយេនឌ័រនៅក្នុងប្រទេសកម្ពុជា និងមានការប្តេជ្ញាខ្ពស់ចូលរួមវគ្គបណ្តុះបណ្តាលនានាដែលកម្មវិធីបានរៀបចំ។ សម្រាប់ការដាក់ពាក្យ អាចស្គេនតាម QR Code ខាងក្រោម។

អ្នកនាង គ្រី លីតា បានបន្ថែមថា ស្ត្រី មានភាពក្លាហានច្រើនជាងមុន ក្នុងការជជែកដេញដោលជាសាធារណៈ បើប្រៀបធៀបនឹងរដូវកាលមុនៗ ពោល គឺចាប់ពីរដូវកាលទី១ ដល់រដូវកាលទី៤ ឃើញថា ស្ត្រីដាក់ពាក្យចូលរួមប្រកួតដេញដោលជាមួយទស្សនៈយុវជនកើនឡើងច្រើនជាងបុរស។ អ្នកនាងបញ្ជាក់ថា យុវជនមួយចំនួន មានបទពិសោធក្នុងការជជែកដេញដោលស្រាប់ ឯមួយចំនួននៅមិនទាន់មានភាពក្លាហានគ្រប់គ្រាន់នោះទេ ប៉ុន្តែពួកគេមានឆន្ទៈក្នុងការចូលរួមប្រកួត គួបផ្សំជាមួយនឹងការចូលរួមវគ្គបណ្តុះបណ្តាលជាមួយ ទស្សនៈយុជន ក្នុងកម្មវិធីជជែកដេញដោល ជំរុញឱ្យពួកគេមានភាពក្លាហាន និយាយជាសាធារណៈជុំវិញផ្នត់គំនិតយេនឌ័រ។

គួរបញ្ជាក់ថា RULErs និង NGO-CEDAW បានសហការគ្នា រៀបចំកម្មវិធីជជែកដេញដោល «ទស្សនៈយុវជន – Youth’s Perspectives» តាំងពីឆ្នាំ២០២១មកម្ល៉េះ ក្រោយពេលដែល RULErs បានលេចចេញជារូបរាងឡើងដោយអតីតនិស្សិតចំនួន៥រូបផ្តួចផ្តើម។ គិតមកដល់ពេលនេះ ឆ្នាំនេះគឺជារដូវកាលទី៥ នៃការប្រកួតដេញដោលនេះ ដោយម្ចាស់ជ័យលាភី នឹងត្រូវជ្រើសរើសក្លាយជាអ្នកបណ្តុះបណ្តាលដល់បេក្ខជនប្រកួតជំនាន់ក្រោយ ដើម្បីពង្រឹងសមត្ថភាពបន្ថែមដល់បេក្ខជនប្រកួតលើប្រធានបទដែលកម្មវិធីដាក់ជូន៕

អត្ថបទ៖ អុន ស្រីមាន

The post ឱកាសថ្មី សម្រាប់និស្សិតជជែកដេញដោលជាសាធារណៈលើប្រធានបទទាក់ទងនឹងផ្នត់គំនិតយេនឌ័រ appeared first on Kampuchea Thmey Daily.

លោក អ៊ុង ប៊ុនអ៊ី៖ កង្វះគោលនយោបាយយេនឌ័រក្នុងស្ថាប័នប្រព័ន្ធផ្សព្វផ្សាយ កាន់តែធ្វើឱ្យអ្នកសារព័ត៌មានស្ត្រី មិនសូវត្រូវបានយកចិត្តទុកដាក់

អុន ស្រីមាន — Mon, 27 Jan 2025 07:25:44 +0000

ប្រធានដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ (DMC) លោក អ៊ុង ប៊ុនអ៉ី បានលើកឡើងថា ការខ្វះខាតគោលនយោបាយយេនឌ័រនៅតាមស្ថាប័នប្រព័ន្ធផ្សព្វផ្សាយ កាន់តែធ្វើឱ្យអ្នកសារព័ត៌មានស្ត្រី និងជា LGBTQ+ មិនសូវត្រូវបានយកចិត្តទុកដាក់។

ការលើកឡើងនេះ ធ្វើឡើងនៅព្រឹកថ្ងៃទី២៧ ខែមករា ឆ្នាំ២០២៥ ក្នុងសិក្ខាសាលាផ្ទៀងផ្ទាត់ស្តីពី គោលការណ៍ណែនាំអំពីសុវត្ថិភាបយេនឌ័រសម្រាប់ស្ថាប័នផ្សព្វផ្សាយ ដែលដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ (DMC) សហការរៀបចំជាមួយអង្គការយូណេស្កូ ដោយមានការចូលរួមពីអ្នកសារព័ត៌មានស្ត្រី និងបុរសផងដែរ។

លោក អ៊ុង ប៊ុនអ៉ី បានលើកឡើងថា អ្នកសារព័ត៌មានបច្ចុប្បន្នជួបហានិភ័យដូចជា ការចាប់ពិរុទ្ធ ការបៀតបៀន អំពើហិង្សា ដោយអអ្នកសារព័ត៌មានជាស្ត្រី និងជា LGBTQ+ ត្រូវស៊ូទ្រាំជាមួយនឹងការគំរាមកំហែងបន្ថែមទៀតដូចជា ការរំលោភបំពានតាមអ៊ីនធឺណេត ការបៀតបៀនផ្លូវភេទ និងការការពារផ្សេងៗនៅមានកម្រិតក្នុងវិស័យនេះ។ លោកក៏បន្ថែមថា ចំពោះវិសមភាព និងតំណាងរបស់ស្ត្រីក្នុងភាពជាអ្នកដឹកនាំក៏ធ្វើឱ្យមានបញ្ហាប្រឈមបន្ថែមដែរ។

ប្រធាន DMC បានលើកយកពីការសិក្សារបស់អង្គការយូណេស្កូថា ក្នុងឆ្នាំ២០២០ ៧៣%នៃស្ត្រីធ្វើការនៅក្នុងប្រព័ន្ធផ្សព្វផ្សាយបានជួបប្រទះបញ្ហាអំពើហិង្សាតាមប្រព័ន្ធអ៉ីនធឺណេត ហើយឆ្នាំ២០២១ អ្នកសារព័ត៌មានជាស្ត្រីមានត្រឹមជាង ៩.៤%ប៉ុណ្ណោះ ដែលមានតួនាទីជាអ្នកគ្រប់គ្រង។ ដោយបញ្ហាទាំងអស់នេះហើយ ចាំបាច់ត្រូវមានគោលការណ៍ណែនាំពីសុវត្ថិភាពយេនឌ័រ ដើម្បីជំរុញឱ្យមានសុវត្ថិភាព និងបរិយាកាសល្អជាងមុនក្នុងវិស័យសារព័ត៌មានសម្រាប់ស្ត្រី និង LGBTQ+ ។

តាមរយៈសិក្ខាសាលានេះ ធ្វើឡើងដើម្បីលើកកម្ពស់សមភាពយេនឌ័រ និងសុវត្ថិភាពអ្នកសារព័ត៌មាន ជាពិសេសស្ត្រីតាមរយៈការលើកកម្ពស់សមភាពយេនឌ័រ សមធម៌ និងសមភាពក្នុងស្ថាប័នសារព័ត៌មាន។ សិក្ខាសាលា ក៏មានគោលការណ៍ណែនាំសុវត្ថិភាពពីអង្គការយូណេស្កូ សម្រាប់ស្ថាប័នសារព័ត៌មាន ដើម្បីឆ្លើយតបស្របតាមតម្រូវការ និងបញ្ហាប្រឈមរបស់សារព័ត៌មានស្ត្រី និង LGBTQ+។ បន្ថែមពីនេះ ក៏មានការពិភាក្សា និងប្រមូលធាតុចូលដើម្បីបង្កើនដល់គោលការណ៍នេះផងដែរ៕

The post លោក អ៊ុង ប៊ុនអ៊ី៖ កង្វះគោលនយោបាយយេនឌ័រក្នុងស្ថាប័នប្រព័ន្ធផ្សព្វផ្សាយ កាន់តែធ្វើឱ្យអ្នកសារព័ត៌មានស្ត្រី មិនសូវត្រូវបានយកចិត្តទុកដាក់ appeared first on Kampuchea Thmey Daily.

យុវជន២ក្រុម នឹងប្រកួតជជែកដេញដោលវគ្គផ្តាច់ព្រ័ត្រស្តីពី «ស្រ្តី និងផ្នត់គំនិតយេនឌ័រក្នុងសតវត្សទី២១»

អុន ស្រីមាន — Fri, 18 Oct 2024 07:59:25 +0000

យុវជន២ក្រុម គឺក្រុមនារីបញ្ចយុទ្ធ និងក្រុមGen Z’s Genius នឹងប្រកួតជជែកដេញដោលវគ្គផ្តាច់ព្រ័ត្រនៅថ្ងៃទី ២០ តុលា ២០២៤ នៅសណ្ឋាគារ Himawari ពីប្រធានបទ «តួនាទីយេនឌ័រ និងផ្នត់គំនិតសង្គម ជាមូលហេតុចម្បងនាំឱ្យមានវិសមភាពនៃការចូលរួមរបស់ស្រ្តីក្នុងវិស័យការងារ»។

តាមទំព័រហ្វេសប៊ុករបស់ ទស្សនៈយុវជន បានឱ្យដឹងថា យុវជន២ក្រុមបានជាប់ជ័យលាភីនៅវគ្គពាក់កណ្តាលផ្តាច់ព្រ័ត្រ គឺក្រុមនារីបញ្ចយុទ្ធ និងក្រុមGen Z’s Genius ដែលបានប្រកួតជាមួយនឹងក្រុមឃ្មុំមាលា និងស្រមោចក្រហមកាលពីថ្ងៃ២៩ កញ្ញា កន្លងផុតទៅ។ ក្រុមទាំង២ បានឆ្លងកាត់វគ្គបណ្តុះបណ្តាលការជជែកដេញដោល ក៏ដូចជាការបណ្តុះបណ្តាលពាក់ព័ន្ធនឹងមូលបទ ស្រ្តី និងផ្នត់គំនិតយេនឌ័រសតវត្សទី២១ ដែលត្រូវបានរៀបចំដោយ NGO-CEDAW និង RULErs ដោយមានការចូលរួមចែករំលែកពីអ្នកដែលមានបទពិសោធន៍ក្នុងវិស័យជជែកដេញដោលផ្ទាល់ដើម្បីឱ្យបេក្ខជនមានសមត្ថភាពទាំងក្នុងការជជែកដេញដោល និងប្រធានបទ ដែលនាំឱ្យការជជែក និងការប្រកួតរបស់ពួកគេពោរពេញទៅដោយខ្លឹមសារអត្ថន័យ ព្រមទាំងសមត្ថភាពមកទាំងព្រមតែម្តង។

ក្រុមនារីបញ្ចយុទ្ធ

ក្រោយពីឈ្នះការប្រកួតវគ្គមុនៗ និងត្រៀមខ្លួនអស់រយៈពេលជាង៣សប្តាហ៍ ក្រុមនារីបញ្ចយុទ្ធ និងក្រុម Gen Z’s Genius នឹងប្រកួតនៅវគ្គផ្តាច់ព្រ័ត្រដែលជជែកពីប្រធានបទខាងលើនៅថ្ងៃទី ២០ ខែតុលា ២០២៤ វេលាម៉ោង ១:00 រសៀល។ ការប្រកួតនេះ ក៏អនុញ្ញាតឱ្យសាធារណជនចុះឈ្មោះចូលរួមដោយសេរីតាមរយៈតំណភ្ជាប់៖ https://forms.gle/9HMDPs3ALKzVvxYRA ផងដែរ ។

ក្រុមGen Z’s Genius

នៅវគ្គផ្តាច់ព្រ័ត្រនេះ បេក្ខជនដែលបានជ័យលាភី នឹងទទួលបានរង្វាន់លើកទឹកចិត្ត និងលិខិតបញ្ជាក់ពីការចូលរួមប្រកួត ដែលនឹងមានវត្តមានបេក្ខជនទាំងអស់ក្នុងទស្សនៈយុវជន និងអ្នកចូលរួមដែលមានបំណងក្នុងការចូលរួមគាំទ្រយុវជនក្នុងការជជែកដេញដោលពាក់ព័ន្ធនឹងសមភាពយេនឌ័រ។

ចំពោះ ការប្រកួតវគ្គផ្តាច់ព្រ័ត្រនេះក៏មានការចូលរួមវាយតម្លៃដោយគណៈកម្មការដែលមានជំនាញក្នុងការជជែកដេញដោលព្រមទាំងអ្នកដែលធ្វើការពាក់ព័ន្ធនឹងសមភាពយេនឌ័រដែលមាន អ្នកស្រី ផាន់ គីមហុង ជានាយិកានៃមជ្ឈមណ្ឌលភាសាអេអាយអាយ , លោក សុគន្ធ សុខា ដែលជានាយកមកពីសាលាបង្រៀនគួរគុណវឌ្ឍន៍ និង ពេជ្រ ភារក្ស ដែលមកពីអង្គការក្លាហាន។

គួរបញ្ជាក់ថា នេះជាឆ្នាំទី៤ហើយដែលគម្រោងជជែកដេញដោល ទស្សនៈយុវជន ត្រូវបានរៀបចំឡើង ដោយ NGO-CEDAW និង RULErs ក្នុងគោលបំណងបង្វឹកសិស្សនិស្សិតពីការជជែកដេញដោល និងប្រធានបទពាក់ព័ន្ធនឹងសមភាពយេនឌ័រ ដែលចុងក្រោយ បេក្ខជននឹងបង្ហាញវត្តមានក្នុងការប្រកួតនៅលើឆាកចំនួនពីរលើកដើម្បីស្វែងរកម្ចាស់ជ័យលាភីលេខ ១ និងលេខ ២ នៅវគ្គផ្តាច់ព្រ័ត្រ៕

The post យុវជន២ក្រុម នឹងប្រកួតជជែកដេញដោលវគ្គផ្តាច់ព្រ័ត្រស្តីពី «ស្រ្តី និងផ្នត់គំនិតយេនឌ័រក្នុងសតវត្សទី២១» appeared first on Kampuchea Thmey Daily.

ក្រសួងកិច្ចការនារី ទទួលបានពានរង្វាន់ “សេដ្ឋកិច្ចដែលគិតគូរពីសុខុមាលភាព” ពីកិច្ចប្រជុំកំពូលស្ត្រីអាស៊ាននៅឡាវ

Ngoeul Narath — Mon, 26 Aug 2024 08:01:04 +0000

កាលពីថ្ងៃទី ថ្ងៃទី២៣ ខែសីហា ឆ្នាំ២០២៤ ក្រសួងកិច្ចការនារី ទទួលបានពានរង្វាន់ “សេដ្ឋកិច្ចដែលគិតគូរពីសុខុមាលភាព” (2024 ASEAN Care Economy Recognition Award) ក្នុងកិច្ចប្រជុំកំពូលស្ត្រីអាស៊ានលើកទី៣ នៅទីក្រុងវៀងចន្ទ ប្រទេសឡាវ។ នេះបើតាមសេចក្ដីប្រកាសព័ត៌មានរបស់ក្រសួងកិច្ចការនារី ចេញផ្សាយកាលពេលថ្មីៗ។

កិច្ចប្រជុំកំពូលស្ត្រីអាស៊ានលើកទី៣ នៅប្រទេសឡាវ បានរៀបចំពិធីប្រគល់ពានរង្វាន់ជូនក្រសួង-ស្ថាប័ន សាធារណៈរបស់ប្រទេសជាសមាជិកអាស៊ានទាំង១០ប្រទេស ដែលបានផ្តួចផ្តើម គាំទ្រនិងជំរុញការអនុវត្តសេដ្ឋកិច្ចដែល គិតគូរពីសុខុមាលភាព (CARE Economy)។ ក្នុងនោះក្រសួងកិច្ចការនារីត្រូវបានជ្រើសរើសជាបេក្ខភាព ក្នុងការទទួលនូវពាន រង្វាន់នេះ តំណាងឱ្យប្រទេសកម្ពុជា។ ក្រសួងកិច្ចការនារី គឺជាសេនាធិការរបស់រាជរដ្ឋាភិបាល ក្នុងការអនុវត្តគោល នយោបាយលើកកម្ពស់សមភាពយេនឌ័រ និងលើកកម្ពស់ស្ថានភាពស្ត្រី ក្នុងព្រះរាជាណាចក្រកម្ពុជា។

លោកស្រីកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី បានដឹកនាំគណៈប្រតិភូកម្ពុជាចូលរួមក្នុង កិច្ចប្រជុំកំពូលស្ត្រីអាស៊ានលើកទី៣ ដែលត្រូវបានរៀបចំឡើងដោយ រដ្ឋាភិបាលឡាវ ក្នុងនាមជាម្ចាស់ផ្ទះនៃកិច្ចប្រជុំកំពូលអាស៊ានឆ្នាំ២០២៤។

គួរឱ្យដឹងថា កិច្ចប្រជុំកំពូលស្ត្រីអាស៊ានត្រូវបានរៀបចំឡើងចំនួន២លើករួចមកហើយ ដោយលើកទី១ត្រូវបានរៀបចំដោយប្រទេសវៀតណាមកាលពីឆ្នាំ២០២០ និងលើកទី២ត្រូវបានរៀបចំដោយប្រទេសកម្ពុជាក្នុងឆ្នាំ២០២២ ដែលក្នុងនោះក៏បានអនុម័តលើសេចក្តីថ្លែងការណ៍អាស៊ានស្តីពី ការកសាងអនាគតប្រកបដោយចីរភាព បរិយាប័ន្ន និងកាន់តែរឹងមាំ៖ បំផុសសហគ្រិនភាពរបស់ ស្ត្រីនៅក្នុងអាស៊ាន។

តាមរយៈសេចក្ដីប្រកាសព័ត៌មាន ក្រសួងកិច្ចការនារីអះអាងថា ក្នុងអាណត្តិនៃរាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំប្រកបដោយគតិបណ្ឌិត និងចក្ខុវិស័យ វែងឆ្ងាយ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក្រសួងកិច្ចការនារីបានផ្ដួចផ្ដើម និងដឹកនាំ សម្របសម្រួល កិច្ចខិតខំប្រឹងប្រែងដើម្បីអនុវត្តរបៀបវារៈសេដ្ឋកិច្ចដែលគិតគូរពីសុខុមាលភាព ទាំងក្នុងប្រទេស និងនៅថ្នាក់តំបន់ សំដៅរួមចំណែកលើកកម្ពស់ប្រព័ន្ធអេកូឡូស៊ី និងបង្កើតបរិស្ថានអំណោយផល ព្រមទាំងជំរុញកិច្ច សហការ និងកៀរគរធនធានពីគ្រប់ដៃគូពាក់ព័ន្ធ ដើម្បីគាំទ្រ និងវិនិយោគលើសេដ្ឋកិច្ចដែលគិតគូរពីសុខុមាលភាព ដែលជាកិច្ចការដ៏ចម្បង ដែលនឹងរួមចំណែកទ្រទ្រង់ផ្នែកសង្គម សេដ្ឋកិច្ច និងសុខុមាលភាពរបស់គ្រួសារ ក៏ដូចជា សង្គមជាតិទាំងមូល។

ក្រសួងកិច្ចការនារី បន្ថែមថា រាជរដ្ឋាភិបាលកម្ពុជាកំពុងតែបញ្ចប់នូវក្របខណ្ឌផែនការសកម្មភាពជាតិ ស្តីពី សេដ្ឋកិច្ចគិតគូរពីសុខុមាលភាព និងការងារថែទាំ ដែលផ្តោតលើសសរស្តម្ភសំខាន់ៗចំនួន៤គឺ៖ ១). ហេដ្ឋារចនា សម្ព័ន្ធ ផ្នែកថែទាំសុខុមាលភាព (Care Infrastructure) ២). វិធានការគាំពារ និងគាំពារសង្គមដែលពាក់ព័ន្ធនិងការ ថែទាំ (Care-related social protection) ៣). សេវាផ្នែកថែទាំ (Care Services) និង ៤). គោលនយោបាយការងារពាក់ព័ន្ធនឹងថែទាំ (Employment-related to care policies)។

នៅក្នុងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល ដែលនៅតែបន្តចាត់ទុកការលើកកម្ពស់ សមភាពយេនឌ័រ និងបង្កើនភាពអង់អាចដល់ស្ត្រីជាកិច្ចការអាទិភាពសម្រាប់រាជរដ្ឋាភិបាល នីតិកាលទី៧ នៃរដ្ឋសភា តាមរយៈការបន្តវិនិយោគដើម្បីបង្កើនភាពអង់អាចដល់ស្ត្រីក្នុងវិស័យសេដ្ឋកិច្ច អប់រំ សុខភាព កិច្ចគាំពារសង្គម និង ភាពជាអ្នកដឹកនាំក្នុងវិស័យសាធារណៈ និងនយោបាយ ។ល។ ដើម្បីទាញយកប្រយោជន៍ពីភាគលាភយេនឌ័រ ព្រម ទាំងបង្កើតបរិយាកាសអំណោយផលសម្រាប់ស្ត្រី ដើម្បីទទួលបានសិទ្ធិពេញលេញ កាត់បន្ថយភាពងាយរងគ្រោះ និង លើកកម្ពស់ទំនាក់ទំនងអន្តរជំនាន់៕

The post ក្រសួងកិច្ចការនារី ទទួលបានពានរង្វាន់ “សេដ្ឋកិច្ចដែលគិតគូរពីសុខុមាលភាព” ពីកិច្ចប្រជុំកំពូលស្ត្រីអាស៊ាននៅឡាវ appeared first on Kampuchea Thmey Daily.

និស្សិត៦០នាក់ បានជ្រើសរើសសម្ភាសក្នុងកម្មវិធីជជែកដេញដោលពី «ស្រ្តី និងផ្នត់គំនិតយេនឌ័រក្នុងសតវត្សទី២១»

អុន ស្រីមាន — Tue, 13 Aug 2024 06:57:41 +0000

ក្រុមការងាររៀបចំកម្មវិធីជជែកដេញដោល «ទស្សនៈយុវជន» បានឱ្យដឹងថា បេក្ខជនដែលជានិស្សិតជាង៦០នាក់ ក្នុងចំណោមបេក្ខជន៩១នាក់ ដែលបានដាក់ពាក្យប្រកួតក្នុងកម្មវិធីជជែកដេញដោលពី «ស្រ្តី និងផ្នត់គំនិតយេនឌ័រក្នុងសតវត្សទី២១» ត្រូវបានជ្រើសរើសសម្ភាសនៅថ្ងៃទី១១ ខែសីហា ឆ្នាំ២០២៤ ដោយ RULErs និង NGO-CEDAW។

ក្រុមការងាររៀបចំកម្មវីបញ្ជាក់ថា កម្មវិធីជជែកដេញដោលស្តីពី «ស្រ្តី និងផ្នត់គំនិតយេនឌ័រក្នុងសតវត្សទី២១» ដែលរៀបចំដោយ RULErs មានបេក្ខជនដាក់ពាក្យរហូតដល់៩១នាក់ ក្នុងនោះមានបេក្ខជន ៦០នាក់ត្រូវបានជ្រើសរើសមកសម្ភាស ដោយមើលឃើញថា ពួកគេជាអ្នកចូលចិត្តការជជែកដេញដោល និងពិភាក្សាវែកញែកពីប្រធានបទពាក់ព័ន្ធនឹងសមភាពយេនឌ័រ និងការលុបបំបាត់ការរើសអើងគ្រប់រូបភាពលើស្រ្តី។

បេក្ខជនទាំងអស់បានចូលរួមវគ្គរង្វាយតម្លៃដែលក្រុមការងារបានណែនាំពីសាវតានៃគម្រោងទស្សនៈយុវជន ព្រមទាំងលក្ខន្តិកមួយចំនួនដើម្បីឱ្យបេក្ខជនអាចត្រៀមលក្ខណៈរួចរាល់ក្នុងការសម្ភាស។ អ្វីដែលពិសេសជាងនេះទៅទៀត បេក្ខជនទាំងអស់គ្នាបានទទួលឱកាសក្នុងការស្វែងយល់ពីប្រធានបទពាក់ព័ន្ធនឹងសមភាពយេនឌ័រតាមរយៈការបណ្តុះបណ្តាលដោយ NGO-CEDAW ផងដែរ។

បន្ទាប់ពីទទួលបានការបណ្តុះបណ្តាល និងការណែនាំលក្ខន្តិកមួយចំនួន បេក្ខជនបានចូលសម្ភាសដើម្បីបង្ហាញពីសមត្ថភាព និងឆន្ទៈរបស់ពួកគេទៅកាន់គណៈកម្មការ ។ នៅក្នុងចំណោមប្រមាណបេក្ខជនចំនួន ៦០ នាក់ មានតែបេក្ខជន ១៦ នាក់តែប៉ុណ្ណោះនឹងត្រូវបានជ្រើសរើសទៅវគ្គបន្តទៀតដើម្បីបង្វឹកពីរបៀបដេញដោល និងបណ្តុះបណ្តាលចំណេះដឹងពាក់ព័ន្ធនឹងយេនឌ័រ។

សូមរម្លឹកថា ឆ្នាំ២០២៤នេះ ជាលើកទី៤ហើយដែលក្រុមការងារ RULErs និង NGO-CEDAW បានសហការគ្នាក្នុងការរៀបចំការប្រកួតជជែកដេញដោលលើប្រធានបទជុំវិញសិទ្ធិស្រ្តី និងសមភាពយេនឌ័រ៕

The post និស្សិត៦០នាក់ បានជ្រើសរើសសម្ភាសក្នុងកម្មវិធីជជែកដេញដោលពី «ស្រ្តី និងផ្នត់គំនិតយេនឌ័រក្នុងសតវត្សទី២១» appeared first on Kampuchea Thmey Daily.