លីគបាល់ទះកំពូលកម្ពុជា Archives - Kampuchea Thmey Daily

តេជោលីគ រកឃើញ ៦ ក្រុមចុងក្រោយ ខណៈ បញ្ជាការដ្ឋានអង្គរក្ស ប៉ះ ស្វាយរៀង កក្រើកថ្ងៃនេះ

chean virakbot — Tue, 02 Jun 2026 01:33:26 +0000

ការប្រកួតលីគបាល់ទះកំពូលកម្ពុជា «តេជោលីគ) រដូវកាលទី៣ នឹងបញ្ចប់ការប្រកួតជុំទី១ នៅថ្ងៃទី២ ខែមិថុនា ឆ្នាំ ២០២៦ នេះហើយ ប៉ុន្តែក៏រកឃើញក្រុមឡើងវគ្គ ៦ ក្រុមចុងក្រោយសម្រាប់ជុំទី២ និងក្រុមដែលត្រូវកាត់ចេញហើយដែរ។

ក្រុមបញ្ជាការដ្ឋានអង្គរក្ស កំពុងកាន់កំណត់ត្រាមិនទាន់ចាញ់ ដែលឈរនៅលើកំពូលតារាងជាមួយ ក្រុមលេខ ២ វិសាខា ក្រុមលេខ៣ ក្រសួងមហាផ្ទៃ ក្រុមលេខ៤ ស្នងការខេត្តស្វាយរៀង ក្រុមលេខ៥ ស្នងការរាជធានីភ្នំពេញ និងក្រុមលេខ៦ ស្នងការខេត្តកោះកុង បានជាប់ឡើងទៅជុំទី២ហើយ។

ចំណែកក្រុម កងពលអន្តរាគមន៍លេខ៣ និងក្រុមស្នងការខេត្តព្រះសីហនុ បានធ្លាក់ហើយ បន្ទាប់ពីចាញ់ ៦ ប្រកួត បើទោះបីជានៅសល់ ១ ប្រកួតទៀតក៏ដោយ។

សម្រាប់ការប្រកួតចុងក្រោយនៅជុំទី១នេះ គូគួរឲ្យចាប់អារម្មណ៍ គឺ ការប៉ះគ្នារវាង ក្រុមបញ្ជាការដ្ឋានអង្គរក្ស និងស្នងការខេត្តស្វាយរៀង។ បញ្ជាការដ្ឋានអង្គរក្ស មិនទាន់មានក្រុមណាអាចបញ្ឈប់ដំណើរពួកគេឡើយ ពីការប្រកួត ៦ លើកកន្លងមកគឺឈ្នះទាំងអស់។

ជាមួយគ្នានេះ ក្រុមស្នងការខេត្តស្វាយរៀង បានឈ្នះ ៤ និងចាញ់ ២ ប៉ុន្តែពីរប្រកួតចុងក្រោយពួកគេមានកីឡាករផ្តាច់ពេញដៃល្អ ដែលធ្វើឲ្យពួកគេឈ្នះ២ប្រកួតចុងក្រោយ ដូច្នេះពួកគេកំពុងឡើងដៃល្អ ហើយអាចនឹងបង្កការលំបាកច្រើនដល់បញ្ជាការដ្ឋានអង្គរក្ស។

គូប្រកួតថ្ងៃទី២ ខែមិថុនា

ស្នងការខេត្តព្រះសីហនុ vs កងពលធំលេខ៣ (ម៉ោង ១២ ថ្ងៃត្រង់)
ស្នងការរាជធានីភ្នំពេញ vs ស្នងការខេត្តកោះកុង (ម៉ោង ២ រសៀល)
បញ្ជាការដ្ឋានអង្គរក្ស vs ស្នងការខេត្តស្វាយរៀង (ម៉ោង ៤ រសៀល)
វិសាខា vs ក្រសួងមហាផ្ទៃ (ម៉ោង ៦ ល្ងាច)

តារាងចំណាត់ថ្នាក់

បញ្ជាការដ្ឋានអង្គរក្ស មាន ១៧ ពិន្ទុ ពីឈ្ការនះ ៦ ប្រកួត
វិសាខា មាន ១៦ ពិន្ទុ ពីការឈ្នះ ៥ និងចាញ់១
ក្រសួងមហាផ្ទៃ មាន ១២ ពិន្ទុ ពីការឈ្នះ ៤ និងចាញ់ ២
ស្នងការខេត្តស្វាយរៀង មាន ១១ ពិន្ទុ ពីការឈ្នះ ៤ និងចាញ់ ២
ស្នងការរាជធានីភ្នំពេញ មាន ៩ ពិន្ទុ ពីការឈ្នះ ៣ និងចាញ់ ៣
ស្នងការខេត្តកោះកុង មាន ៦ ពិន្ទុ ពីការឈ្នះ ២ និងចាញ់ ៤
កងពលធំលេខ៣ មាន ១ ពិន្ទុ ពីការចាញ់ ៦
ស្នងការខេត្តព្រះសីហនុ មាន ០ពិន្ទុ ពីការចាញ់ ៦

សូមបញ្ជាក់ថា ការប្រកួតជុំទី២ ដែលជាវគ្គ ៦ ក្រុមចុងក្រោយ គឺជាការប្រកួតវិលជុំសន្សំពិន្ទុសាជាថ្មី ដោយក្រុមទាំង ៦ ត្រូវប៉ះគ្នាទាំងអស់ ហើយពិន្ទុកាលពីជុំទី១គឺមិនរាប់ចូលទេដោយចោលទាំងអស់៕

អត្ថបទ៖ វិរបុត្រ

The post តេជោលីគ រកឃើញ ៦ ក្រុមចុងក្រោយ ខណៈ បញ្ជាការដ្ឋានអង្គរក្ស ប៉ះ ស្វាយរៀង កក្រើកថ្ងៃនេះ appeared first on Kampuchea Thmey Daily.

ចុះកុងត្រារួចនៅវៀតណាម គួន ម៉ុម បង្ហើបប្រទេសធំមួយទៀត

chean virakbot — Fri, 23 Feb 2024 01:28:21 +0000

កីឡាករបាល់ទះជម្រើសជាតិកម្ពុជា និងវិសាខា គួន ម៉ុម បានចុះកុងត្រារួចរាល់ជាមួយក្លិបបាល់ទះ Lavie Long An ក្នុងក្របខណ្ឌលីគបាល់ទះកំពូលវៀតណាម ប៉ុន្តែរូបគេចុះកុត្រាតែជុំទី១ប៉ុណ្ណោះ ដោយសារសម្លឹងឃើញគោលដៅប្រទេសធំមួយទៀត។

គួន ម៉ុម បាននិយាយថា ៖«ខ្ញុំទៅប្រទេសវៀតណាម ខ្ញុំបានចុះកុងត្រារួចរាល់ហើយ ចន្លោះថ្ងៃទី៧-៨ (ខែមីនា) ខ្ញុំនឹងធ្វើដំណើរទៅលេងក្លិប Long An ដែលខ្ញុំបានទៅលេងលើកមុន។ ខ្ញុំទៅលើកនេះរយៈពេលអត់ដល់១ខែទេ។ គេលេង១ជុំ គេសម្រាកសិន ចូលជុំទី២បានគេចុះកុងត្រាម្តងទៀត ប៉ុន្តែខ្ញុំបានចុះកុងត្រាតែជុំទី១ទេ ខាងក្លិបសុំចុះកុងត្រាទាំងពីរជុំដែរ ដោយសារគោលដៅរបស់ខ្ញុំគឺទៅប្រទេសធំមួយទៀត តែសុំលាក់សិនចំពោះប្រទេសនោះ»។

កាលពីឆ្នាំ២០២៣ គួន ម៉ុម ត្រូវបានគេដឹងថា មានក្លិបបាល់ទះនៅប្រទេសជប៉ុនទាក់ទង ប៉ុន្តែចំពេលដែលរូបគេបានទៅលេងឲ្យក្លិប Lavie Long An លើកទី១។ នៅពេលនេះរូបគេបានបង្ហើបពីគោលដៅប្រទេសធំ បន្ទាប់ពីចប់លេងនៅលីគវៀតណាម ដូច្នេះលីគបាល់ទះជប៉ុនអាចជាគោលដៅសម្រាប់រូបគេដែរ។

ក្រៅពីនោះ ប្រទេសឥណ្ឌូណេស៊ីអាចជាគោលដៅសម្រាប់កីឡាករកម្ពុជារូបនេះដែរ ពីព្រោះលីគឥណ្ឌូណេស៊ីនឹងចាប់ផ្តើមនៅខែមេសា ស្របពេលលីគវៀតណាមអាចនឹងចប់ជុំទី១ ដូច្នេះក៏អាចជាពេលសម្រាប់ គួន ម៉ុម ចូលរួមក្លិបនៅឥណ្ឌូណេស៊ីដែរ។

គួន ម៉ុម អាយុ២៦ឆ្នាំជាកីឡាករកម្ពុជាមួយរូបដែលមានបទពិសោធលើឆាកអន្តរជាតិ។ កាលពីឆ្នាំ២០២០ រូបគេធ្លាប់លេងឲ្យក្លិបឥណ្ឌូណេស៊ី Garuda Jakarta ដែលមានគ្រូបង្វឹកលោក Indra ដែលទើបជួយបញ្ជាការដ្ឋានអង្គរក្សឈ្នះជើងឯកលីគបាល់ទះកម្ពុជាកាលពីពេលថ្មីៗនេះ។ កាលពីខែតុលា ឆ្នាំ២០២៣ រូបគេក៏ធ្លាប់បានលេងឲ្យក្លិបវៀតណាម Long An ដែរ។ សម្រាប់ប្រាក់ចំណូលលើកទី២នេះគឺមិនខុសពីកុងត្រាលើកទី២១។

គួន ម៉ុម ជាសមាជិកដ៏សំខាន់ដែលបានជួយក្រុមបាល់ទះជម្រើសជាតិកម្ពុជាឈ្នះមេដាយសំរិទ្ធស៊ីហ្គេម ឆ្នាំ២០២២ នៅប្រទេសវៀតណាម និងឈ្នះមេដាយប្រាក់ស៊ីហ្គេម ឆ្នាំ២០២៣ នៅកម្ពុជា ព្រមទាំងជួយវិសាខាទទួលបានជើងឯករងតេជោលីគឆ្នាំ២០២៤៕

អត្ថបទ៖ វីរបុត្រ

The post ចុះកុងត្រារួចនៅវៀតណាម គួន ម៉ុម បង្ហើបប្រទេសធំមួយទៀត appeared first on Kampuchea Thmey Daily.

Luvi ប្រាប់ថា «រយៈពេល២ខែនៅកម្ពុជាសប្បាយចិត្តណាស់ សង្ឃឹមមកទៀត»

chean virakbot — Wed, 21 Feb 2024 07:45:44 +0000

កីឡាករបាល់ទះវ័យក្មេងដ៏ឆ្នើមរបស់បញ្ជាការដ្ឋានអង្គរក្ស Luvi Ferbrian បានវិលត្រឡប់ទៅប្រទេសកំណើតឥណ្ឌូណេស៊ីវិញនៅរសៀលថ្ងៃទី២១ ខែកុម្ភៈ បន្ទាប់ពីបានជួយក្លិបកម្ពុជាទទួលបានជើងឯកលីគបាល់ទះកម្ពុជារដូវកាលដំបូងឆ្នាំ២០២៤ដែលទើបបញ្ចប់កាលពីថ្ងៃទី១៨ ខែកុម្ភៈ។

កីឡាករ Luvi បានចូលរួមជាមួយក្លិបបញ្ជាការដ្ឋានអង្គរក្សកាលពីដើមខែមករា ឆ្នាំ២០២៤សម្រាប់ការប្រកួតពានរង្វាន់បាល់ទះតេជោលីគ។ រូបគេលងក្នុងតំណែងប្រយុទ្ធដ៏មានប្រសិទ្ធភាព បើទោះបីជារូបគេទើបវ័យ១៩ឆ្នាំ និងមិនទាន់មានបទពិសោធជាប់ជម្រើសជាតិឥណ្ឌូណេស៊ីក៏ដោយ។ រូបគេបានឈ្នះពានរង្វាន់ឯកត្តជនជាអ្នកប្រយុទ្ធឆ្នើម (The Best Outside Hitter) ប្រចាំព្រឹត្តិការណ៍តេជោលីគ។

មុនពេលត្រឡប់ទៅប្រទេសឥណ្ឌូណេស៊ីវិញ Luvi បាននិយាយថា ៖«សូមអរគុណដល់អ្នកទាំងអស់គ្នាសម្រាប់ការគាំទ្ររយៈពេល២ខែចុងក្រោយនេះ។ ខ្ញុំពិតជាសប្បាយរីករាយណាស់ដែលបានមកលេងនៅទីនេះ។ សង្ឃឹមថា ជួបគ្នាលើកក្រោយទៀត»។

ការវិលត្រឡប់ទៅប្រទេសឥណ្ឌូណេស៊ីវិញនេះ Luvi នឹងចូលរួមជាមួយក្លិប Jarkarta Garudo ដែលលេងក្នុងលីគបាល់ទះកំពូលឥណ្ឌូណេស៊ី Indonesian Proliga។

ចំណែកមិត្តរួមជាតិ២នាក់ទៀតដែលបានចូលរួមជាមួយក្រុមបញ្ជាការដ្ឋានអង្គរក្សក៏វិលត្រឡប់ទៅឥណ្ឌូណេស៊ីវិញដែរ។ កីឡាករ Dio Zulfikri ដែលបានឈ្នះពានរង្វាន់អ្នកបញ្ជូនបាល់ឆ្នើម (អ្នកប៉ះសេ) នឹងចូលរួមជាមួយក្លិប Bogor Lavani ខណៈខ្សែប្រយុទ្ធ Doni Haryono នឹងចូលរួមជាមួយក្លិប Jakarta STIN BIN។ ដូច្នេះមិត្តរូមជាតិទាំង៣នាក់នេះនឹងក្លាយជាគូប្រយុទ្ធគ្នានៅលីគបាល់ទះឥណ្ឌូណេស៊ីដែលនឹងចាប់ផ្តើមនៅខែមេសា ឆ្នាំ២០២៤។

បន្ទាប់ពីបង្ហាញខ្លួនលេចធ្លោនៅលីគបាល់ទះកម្ពុជា Luvi អាចនឹងត្រូវបានគ្រូបង្វឹកជម្រើសជាតិឥណ្ឌូណេស៊ីចាប់អារម្មណ៍៕

អត្ថបទ៖ វីរបុត្រ

The post Luvi ប្រាប់ថា «រយៈពេល២ខែនៅកម្ពុជាសប្បាយចិត្តណាស់ សង្ឃឹមមកទៀត» appeared first on Kampuchea Thmey Daily.

សន្ទុះអ្នកគាំទ្រលីគបាល់ទះកម្ពុជាជាប់លេខ១នៅតំបន់អាស៊ាន

chean virakbot — Tue, 20 Feb 2024 04:06:15 +0000

សន្ទុះអ្នកគាំទ្រនៅទីលាននៃការប្រកួតពានរង្វាន់បាល់ទះតេជោលីគរដូវកាលដំបូងឆ្នាំ២០២៤ខ្ពស់ជាងបណ្តាប្រទេសផ្សេងៗនៅក្នុងតំបន់អាស៊ាន។ នេះបើតាមការឲ្យដឹងពីលោក អាំង សិរីពិសិដ្ឋ អនុប្រធាន និងជាអគ្គលេខាធិការសហព័ន្ធកីឡាបាល់ទះកម្ពុជា។

សហព័ន្ធកីឡាបាល់ទះកម្ពុជាបានបង្កើតឲ្យមានលីគបាល់ទះកំពូលកម្ពុជាហៅកាត់«តេជោលីគ»ជាលើកដំបូងនៅក្នុងឆ្នាំ២០២៤ដែលមានក្រុមចូលរួមប្រកួតចំនួន៨ត្រូវបានទទួលស្គាល់ដោយសហព័ន្ធកីឡាបាល់ទះអាស៊ីអាគ្នេយ៍ អាស៊ី និងពិភពលោក។ ចាប់ពីពេលនេះរាល់កីឡាករបាល់ទះកម្ពុជាផ្ទេរចេញទៅក្រៅប្រទេស ឬកីឡាករបរទេសផ្ទេរចូលក្លិបកម្ពុជាត្រូវឆ្លងកាត់តាមច្បាប់សហព័ន្ធបាល់ទះអាស៊ី និងពិភពលោកត្រឹមត្រូវ។

តេជោលីគរដូវកាលទី១ដែលបានចាប់ផ្តើមកាលពីថ្ងៃទី១៨ ខែមករា ដល់ថ្ងៃទី១៨ ខែកុម្ភៈ ឆ្នាំ២០២៤ នៅវិមានពហុកីឡដ្ឋានជាតិអូឡាំពិក រាល់ការប្រកួតពីមួយសប្តាហ៍ទៅមួយសប្តាហ៍មានអ្នកគាំទ្រចូលទស្សនាផ្ទាល់យ៉ាងច្រើនកុះករជាលំដាប់។

លោក អាំង សិរីពិសិដ្ឋ បានឲ្យដឹងថា ៖«ជាក់ស្តែងយើងឃើញហើយ ចាប់តាំងពីតេជោលីគចាប់ផ្តើម ទស្សនិកជនគាំទ្ររៀងរាល់ថ្ងៃសុក្រ សៅរ៍ អាទិត្យ។ បើយើងបូកសរុបរាប់ម៉ឺននាក់។ អីចឹងត្រឡប់មកវិញតាំងពីថ្ងៃចាប់ផ្តើមដល់ថ្ងៃបញ្ចប់គឺមានអ្នកទស្សនារាប់សែននាក់នៅទីលានផ្ទាល់ ដោយយើងមិនទាន់គិតដល់អ្នកគាំទ្រតាមបណ្តាញទំនាក់ទំនងសង្គមផង»។

«យើងមិនចង់ប្រៀបធៀបទៅប្រទេសតំបន់អាស៊ី ឬពិភពលោកទេ តែបងប្អូនជនរួមជាតិអាចវាយតម្លៃខ្លួនឯងបាន។ ការរៀបចំនេះមានបងប្អូនប្រជាពលរដ្ឋចូលរួមគាំទ្រលើកទឹកចិត្តច្រើនណាស់។ ទី១គឺបង្ហាញពិភពលោកឲ្យដឹងថា អ្នកស្នេហាបាល់ទះកម្ពុជាមានច្រើនលើសលប់។ ទី២គឺជាការផ្តល់តម្លៃត្រឡប់វិញដល់ថ្នាក់ដឹកនាំសហព័ន្ធដែលបានដាក់ចិត្តកាយធ្វើកំណែទម្រង់ដើម្បីឲ្យបងប្អូនទទួលស្គាល់ពីគុណភាពបាល់ទះកម្ពុជា»។

«ខ្ញុំមិនប្រៀបធៀបទេពីថ្ងៃម្សិលមិញ និងថ្ងៃនេះ (ថ្ងៃវគ្គពាក់កណ្តាលផ្តាច់ព្រ័ត្រ និងថ្ងៃវគ្គផ្តាច់ព្រ័ត្រ) គឺយើងជាន់ពេលវេលាប្រកួតជាមួយប្រទេសជិតខាងគឺ Semi-Final និង Final ដូចគ្នា ប៉ុន្តែសន្ទុះនៃការគាំទ្រនៅទីលាន យើងជាប់លំដាប់លេខ១ដែលយើងមិនអាចប្រកែកថា ខ្លួនយើងអន់បានទេ»។

លោក អាំង សិរីពិសិដ្ឋ បន្ថែមថា ទោះបីជាលទ្ធផលគួរជាទីគាប់ចិត្តបែបនេះក៏មិនអាចធ្វើឲ្យក្រុមការងារសហព័ន្ធរំសាយចិត្តក្នុងការខិតខំប្រឹងប្រែងបន្ថែមទៀតដែរ។ ផ្ទុយទៅវិញគឺជាអម្រែកកាន់តែធ្ងន់ដែលសហព័ន្ធត្រូវតែបង្កើន និងពង្រឹងបន្ថែមទៀតទាំងសមត្ថភាពដឹកនាំ ការរៀបចំព្រឹត្តិការណ៍ ធនធានមនុស្ស បច្ចេកទេសឲ្យកាន់តែល្អប្រសើរឡើង។

សូមបញ្ជាក់ថា ការប្រកួតពានរង្វាន់បាល់ទះតេជោលីគរដូវកាលដំបូងមានក្រុមអាជីព៨គឺមកពីតាមបណ្តាខេត្ត៣ និងក្រុមនៅរាជធានីភ្នំពេញ៥ ហើយម្ចាស់ជើងឯកបានទៅក្រុមបញ្ជាការដ្ឋានអង្គរក្ស ខណៈលេខ២បានទៅវិសាខា និងលេខ៣បានទៅស្នងការដ្ឋាននគរបាលរាជធានីភ្នំពេញ៕

អត្ថបទ៖ វីរបុត្រ

The post សន្ទុះអ្នកគាំទ្រលីគបាល់ទះកម្ពុជាជាប់លេខ១នៅតំបន់អាស៊ាន appeared first on Kampuchea Thmey Daily.

អ្នកប៉ះសេឆ្នើម Dio ចង់មកលេងតេជោលីគទៀតក្រោយឈ្នះជើងឯក

chean virakbot — Tue, 20 Feb 2024 01:21:33 +0000

កីឡាករឥណ្ឌូណេស៊ី Dio Sulfikri ចង់មកលេងលីគបាល់ទះកំពូលកម្ពុជាទៀត ប្រសិនបើក្រុមបញ្ជាការដ្ឋានអង្គរក្សផ្តល់ឱកាស និងពេលវេលាមិនជាន់គ្នានឹងការប្រកួតលីគបាល់ទះឥណ្ឌូណេស៊ី។

Dio ដែលទើបជួយក្រុមបញ្ជាការដ្ឋានអង្គរក្សឈ្នះជើងឯកតេជោលីគរដូវកាលដំបូង និងបានក្លាយជាអ្នកបញ្ជូនបាល់ (អ្នកប៉ះសេ)ឆ្នើមប្រចាំព្រឹត្តិការណ៍បានប្រាប់សារព័ត៌មាន«កម្ពុជាថ្មី»ថា លោកពិតជាសប្បាយរីករាយណាស់សម្រាប់ការប្រកួតតេជោលីគជាមួយបញ្ជាការដ្ឋានអង្គរក្ស ពីព្រោះអ្នកគាំទ្រនៅកម្ពុជាពិតជាស្រឡាញ់ចូលចិត្តបាល់ទះខ្លាំងមែនទែន។

លោកបាននិយាយថា ៖«ខ្ញុំពិតជាសប្បាយចិត្ត។ អ្នកគាំទ្រច្រើនណាស់ចូលចិត្ត គាំទ្របាល់ទះ។ ខ្ញុំដឹងច្បាស់ពីព្រោះនេះជាការលើកទី២ដែលខ្ញុំមកប្រកួតនៅកម្ពុជា។ កាលពីលើកទី១គឺកីឡាស៊ីហ្គេមឆ្នាំ២០២៣»។

នៅពេលសួរថា តើលោកនឹងមកប្រកួតលីគបាល់ទះកម្ពុជារដូវកាលក្រោយទៀតទេ? កីឡាករបានឆ្លើយថា ប្រសិនបើកម្មវិធីប្រកួតលីគបាល់ទះឥណ្ឌូណេស៊ី និងកម្ពុជាមិនជាន់គ្នា លោកនឹងមកទៀត ប៉ុន្តែប្រសិនពេលវេលាជាន់គ្នា ប្រហែលជាមិនអាចមកបានទេ។ ទោះបីជាយ៉ាងណា លោកបានបញ្ជាក់ថា លីគបាល់ទះឥណ្ឌូណេស៊ីនឹងចាប់ផ្តើមនៅខែមេសាខាងមុខនេះ ដូច្នេះនឹងមិនជាន់គ្នាទេ។

ពាក់ព័ន្ធនឹងការប្រកួតឈ្នះវិសាខានៅវគ្គផ្តាច់ព្រ័ត្រ កីឡាករជំនាញប៉ះសេបានលើកឡើងថា ក្រុមទាំងអស់បានត្រៀមខ្លួនយ៉ាងល្អសម្រាប់ការប្រកួតវគ្គផ្តាច់ព្រ័ត្រ។ វិសាខាជាក្រុមខ្លាំងនៅប្រទេសកម្ពុជា។ ទោះបីជាយ៉ាងណា បញ្ជាការដ្ឋានអង្គរក្សត្រៀមខ្លួនបានល្អតាមរយៈស្មារតីក្រុមដ៏រឹងមាំ ការជឿជាក់ និងត្រៀមយុទ្ធសាស្ត្របានល្អសម្រាប់វគ្គផ្តាច់ព្រ័ត្រ។

Dio បាននិយាយពីគន្លឹះសំខាន់ដែលអាចយកឈ្នះវិសាខានៅវគ្គផ្តាច់ព្រ័ត្រគឺការទទួលសេវាបានល្អ និងការពារពីការវាយផ្តាច់បានល្អ។ កីឡាករនិយាយថា ៖«ចំណុចសំខាន់របស់យើងគឺការទទួលសេវា និងការការពារ រួចហើយវាយផ្តាច់»។

Dio ជាកីឡាករម្នាក់ក្នុងចំណោមកីឡាករឥណ្ឌូណេស៊ី៣រូបដែលបានរួមចំណែកដ៏សំខាន់ជួយក្រុមបញ្ជាការដ្ឋានអង្គរក្សបានគ្រងជើងឯកបាល់ទះតេជោលីគរដូវកាលដំបូង២០២៤ បន្ទាប់ពីយកឈ្នះវិសាខានៅវគ្គផ្តាច់ព្រ័ត្រដោយលទ្ធផល ៣-១៕

អត្ថបទ៖ វីរបុត្រ

The post អ្នកប៉ះសេឆ្នើម Dio ចង់មកលេងតេជោលីគទៀតក្រោយឈ្នះជើងឯក appeared first on Kampuchea Thmey Daily.

តើក្រុមណានឹងក្លាយជាជើងឯកតេជោលីគចុងសប្តាហ៍នេះ?

chean virakbot — Wed, 14 Feb 2024 01:42:38 +0000

ការប្រកួតវគ្គពាក់វគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រពានរង្វាន់បាល់ទះតេជោលីគរដូវកាលដំបូង២០២៤នឹងឈានមកដល់នាចុងសប្តាហ៍នេះហើយដោយមានក្រុមខ្លាំង៤ប៉ះគ្នា។

ការប្រកួតវិលជុំសន្សំពិន្ទុជុំទី២ នៅសល់១ប្រកួតទៀតដែលក្រុមខ្លាំង៦ត្រូវប៉ះគ្នានៅថ្ងៃសុក្រ ទី១៦ ខែកុម្ភៈ ឆ្នាំ២០២៤ ក្នុងនោះ ក្រុមខ្លាំងវិសាខា ប៉ះ បញ្ជាការដ្ឋានអង្គរក្ស ខណៈក្រសួងមហាផ្ទៃប៉ះក្រុមនគរបាលខេត្តពោធិ៍សាត់ ហើយក្រុមស្នងការដ្ឋាននគរបាលរាជធានីភ្នំពេញ ប៉ះក្រុមកងពលធំអន្តរាគមន៍លេខ៣។

ទោះជាលទ្ធផលប្រែប្រូលយ៉ាងណា ក៏ក្រុមវិសាខានៅតែឈរលេខ១ បញ្ជាការដ្ឋាននៅតែឈរលេខ២ ក្រសួងមហាផ្ទៃឈរលេខ៣ និងស្នងការដ្ឋាននគរបាលរាជធានីពេញលេខ៤។ ចំពោះក្រុមលេខ៥គឺកងពលធំអន្តរាគមន៍លេខ៣ និងក្រុមលេខ៦ នគរបាលខេត្តពោធិ៍សាត់អស់ឱកាសហើយ។

នៅវគ្គពាក់កណ្តាលផ្តាច់ព្រ័ត្រ ថ្ងៃទី១៧ ខែកុម្ភៈ ក្រុមខ្លាំងលេខ១ វិសាខា ប៉ះ ក្រុមចំណាត់ថ្នាក់លេខ៤ ស្នងការដ្ឋាននគរបាលរាជធានីភ្នំពេញ ហើយក្រុមលេខ២ បញ្ជាការដ្ឋានអង្គរក្សប៉ះក្រុមលេខ៣ ក្រសួងមហាផ្ទៃ។ ថាតើពីរក្រុមណាឡើងវគ្គផ្តាច់ព្រ័ត្រដែលត្រូវធ្វើនៅថ្ងៃអាទិត្យ ទី១៨ ខែកុម្ភៈ ហើយក្រុមចាញ់ត្រូវប្រកួតដណ្តើមចំណាត់ថ្នាក់លេខ៣។

វិសាខា

វិសាខា ជាក្រុមតែមួយគត់ដែលមិនទាន់ស្គាល់បរាជ័យ ដោយរក្សាកំណត់ត្រាជ័យជម្នះ ៣-០ លើក្រុមទាំង៧ ទាំងជុំទី១ និងទី២។ ឆ្លងកាត់១១ប្រកួត ពួកគេឈ្នះទាំង១១ប្រកួត រកបាន៣៣ពិន្ទុ ឈរចំណាត់ថ្នាក់លេខ១។
តួសំខាន់៖ កីឡាករកម្ពុជា គួន ម៉ុម កើតឆ្នាំ១៩៩៨ កម្ពស់១.៩៨ម៉ែត្រ ទម្ងន់៩៤គីឡូក្រាម ពាក់អាវលេខ១៥ជាកីឡាករដែលមានបទពិសោធច្រើនទាំងជាតិ និងអន្តរជាតិ ហើយជំនាញវ៉ៃផ្តាច់ របស់សមាគមបាល់ទះវិសាខា។

បញ្ជាការដ្ឋានអង្គរក្ស

បញ្ជាការដ្ឋានអង្គរក្សក៏ជាក្រុមមួយគួរឲ្យចាប់អារម្មណ៍ បន្ទាប់ពីឈ្នះ៩ប្រកួត និងចាញ់២ប្រកួត រកបាន២៦ពិន្ទុ ឈរចំណាត់ថ្នាក់លេខ២។
តួសំខាន៖ កីឡាករឥណ្ឌូណេស៊ី Luvi FN កើតឆ្នាំ២០០៤ មានកម្ពស់១.៨៨ម៉ែត្រល្អខ្លាំងខាងលោតវ៉ៃផ្តាច់ដើម្បីយកពិន្ទុ។

ក្រសួងមហាផ្ទៃ

កាលពីជុំទី១ ក្រសួងមហាផ្ទៃមិនសូវបង្កការភ្ញាក់ផ្អើលប៉ុន្មានទេ ប៉ុន្តែនៅជុំទី២កាន់តែបង្ហាញភាពខ្លាំងរហូតដណ្តើមបានចំណាត់ថ្នាក់លេខ៣ តាមរយៈជ័យជ្នះ៧លើក និងចាញ់៤លើក រកកបាន២១ពិន្ទុ។
តួសំខាន់៖ កីឡាករកម្ពុជា ធី ម៉េងហ៊ួង កើតឆ្នាំ២០០១ កម្ពស់១.៨៧ម៉ែត្រ ទម្ងន់៧០គីឡូក្រាម ពាក់លេខ៧ជាអ្នកផ្តាច់ និងបិទបាំងដ៏ល្អរបស់ក្លិបបាល់ទះក្រសួងមហាផ្ទៃ។

ស្នងការដ្ឋាននគរបាលរាជធានីភ្នំពេញ

ស្នងការដ្ឋាននគរបាលរាជធានីឈរចំណាត់ថ្នាក់លេខ៤ បន្ទាប់ពីឆ្លងកាត់១១ប្រកួត រកបាន១១ពិន្ទុ តាមរយៈជ័យជម្នះ៣ប្រកួត និងចាញ់៨ប្រកួត។
តួសំខាន់ ៖ កីឡាករគុយបា Mendeze កើតនៅឆ្នាំ១៩៩៥មានកម្ពស់១.៩៩ម៉ែត្រ ទម្ងន់៧៥គីឡូក្រាម ជាអ្នកផ្តាច់លេចធ្លោនៅក្លិបស្នងការដ្ឋាននគរបាលរាជធានីភ្នំពេញ។

អត្ថបទ៖ វីរបុត្រ

The post តើក្រុមណានឹងក្លាយជាជើងឯកតេជោលីគចុងសប្តាហ៍នេះ? appeared first on Kampuchea Thmey Daily.

គូល្អ! បញ្ជាការដ្ឋានអង្គរក្ស ប៉ះ ក្រសួងមហាផ្ទៃ វគ្គពាក់កណ្តាលផ្តាច់ព្រ័ត្រតេជោលីគ

chean virakbot — Tue, 13 Feb 2024 02:23:37 +0000

ការប៉ះគ្នារវាង ក្រុមបញ្ជាការដ្ឋានអង្គរក្ស និង ក្រសួងមហាផ្ទៃ បានក្លាយជាជំនួបគួរឲ្យចាប់អារម្មណ៍បំផុតក្នុងវគ្គពាក់កណ្តាលផ្តាច់ព្រ័ត្រពានរង្វាន់បាល់ទះតេជោលីគ ឆ្នាំ២០២៤។

ក្រុមបញ្ជាការដ្ឋានអង្គរក្ស

ក្រុមទាំងពីរនៅសល់ម្នាក់១ប្រកួតដូចគ្នាក្នុងវគ្គវិលជុំសន្សំពិន្ទុ ជុំទី២ ដោយក្រសួងមហាផ្ទៃត្រូវប៉ះក្រុមនគរបាលខេត្តពោធិ៍សាត់ ខណៈបញ្ជាការដ្ឋានអង្គរក្សប៉ះក្រុមខ្លាំងវិសាខា នៅថ្ងៃទី១៦ ខែកុម្ភៈ ឆ្នាំ២០២៤។ ទោះជាលទ្ធផលប្រែប្រូលយ៉ាងណា ក៏ក្រុមបញ្ជាការដ្ឋាននៅតែឈរលេខ២ និងក្រុមក្រសួងមហាផ្ទៃនៅតែឈរលេខ៣។

ក្រុមក្រសួងមហាផ្ទៃ

ឆ្លងកាត់១១ប្រកួតក្នុងវគ្គវិលជុំសន្សំពិន្ទុ បញ្ជាការដ្ឋានអង្គរក្ស រកបាន២៦ពិន្ទុ តាមរយៈជ័យជម្នះ៩លើក និងចាញ់២លើក។ ចំណែកក្រសួងមហាផ្ទៃរកបាន២១ពិន្ទុ តាមរយៈជ័យជម្នះ៧លើក និងចាញ់៤លើក។

បរាជ័យ២លើករបស់បញ្ជាការដ្ឋានអង្គរក្សក្រោមស្នាដៃរបស់ក្រុមវិសាខា កាលពីជុំទី១ និងចាញ់ក្រសួងមហាផ្ទៃ នៅក្នុងជុំទី២ ខណៈបរាជ័យ៤លើករបស់ក្រសួងមហាផ្ទៃក្រោមថ្វីដៃរបស់បញ្ជាការដ្ឋានអង្គរក្ស កាលពីជុំទី១ វិសាខា ក្នុងជុំទី១ ស្នងការដ្ឋាននគរបាលរាជធានីភ្នំពេញជុំទី១ និងវិសាខាជុំទី២។

Luvi តួសំខាន់របស់បញ្ជាការដ្ឋានអង្គរក្ស

ជួបគ្នា២លើកកន្លងមក ក្រុមទាំងពីរពិតជាស្វិតស្វាញខ្លាំងមែនទែន។ នៅជុំទី១ ក្រុមបញ្ជាការដ្ឋានអង្គរក្ស បានយកឈ្នះក្រសួងមហាផ្ទៃដោយលទ្ធផល ៣សិតទល់២ ប៉ុន្តែនៅជុំទី២ ក្រសួងមហាផ្ទៃសងសឹកបញ្ជាការដ្ឋានអង្គរក្សបានសម្រេចតាមរយៈជ័យជម្នះ៣សិតទល់២វិញ។

ក្រុមបញ្ជាការដ្ឋានអង្គរក្សមានសមាជិកបរទេសជាកម្លាំងដ៏សំខាន់គឺកីឡាករឥណ្ឌូណេស៊ី៣រូប ស្របពេលក្រសួងមហាផ្ទៃមានកីឡាករវៀតណាម២រូបដ៏ល្អ ប៉ុន្តែបើនិយាយពីកីឡាករខ្មែរវិញ ក្រសួងមហាផ្ទៃមាន មឿន ម៉េងឡាយ និង ធី ម៉េងហួង ជាកម្លាំងដ៏សំខាន់។

ប៉ះគ្នានៅថ្ងៃទី១៧ ខែកុម្ភៈ ឆ្នាំ២០២៤ វេលាម៉ោង៦ល្ងាចគឺជាការកាត់សេចក្តីស្វែងរកក្រុមឡើងទៅវគ្គផ្តាច់ព្រ័ត្រ។

ធី ម៉េងហួង ជាតួសំខាន់របស់ក្រសួងមហាផ្ទៃ

សម្រាប់ការប្រកួតវគ្គពាក់កណ្តាលផ្តាច់ព្រ័ត្រ១គូទៀតគឺ ក្រុមខ្លាំងវិសាខា ប៉ះ ក្រុមស្នងការដ្ឋាននគរបាលរាជធានីភ្នំពេញ។ វិសាខាជាក្រុមមានកំណត់ត្រាល្អឥតខ្ចោះដោយឈ្នះទាំង១១ប្រកួត មាន៣៣ពិន្ទុ ឈរលើកំពូលតារាង ខណៈស្នងការដ្ឋាននគរបាលរាជធានីភ្នំពេញ ឈរលេខ៤ក្នុងតារាង បន្ទាប់ពីឈ្នះ៦ ចាញ់៥ រកបាន១៧ពិន្ទុ។

លទ្ធផល១១ប្រកួតរបស់ បញ្ជាការដ្ឋានអង្គរក្ស (ឈ្នះ៩ ចាញ់២ មាន២៦ពិន្ទុ)

ឈ្នះ ស្នងការដ្ឋាននគរបាលរាជធានីភ្នំពេញ ៣-០
ឈ្នះ នគរបាលខេត្តពោធិ៍សាត់ ៣-០
ចាញ់ ក្រសួងមហាផ្ទៃ ២-៣
ឈ្នះ កងពលធំអន្តរាគមន៍លេខ៣ ៣-០
ឈ្នះ នគរបាលខេត្តកណ្តាល ៣-០
ចាញ់ វិសាខា ០-៣
ឈ្នះ ស្នងការដ្ឋាននគរបាលរាជធានីភ្នំពេញ ៣-២
ឈ្នះ នគរបាលខេត្តពោធិ៍សាត់ ៣-១
ឈ្នះ ក្រសួងមហាផ្ទៃ ៣-២
ឈ្នះ កងពលធំអន្តរាគមន៍លេខ៣ ៣-១
ឈ្នះ នគរបាលខេត្តព្រះសីហនុ ៣-០

លទ្ធផល១១ប្រកួតរបស់ ក្រសួងមហាផ្ទៃ (ឈ្នះ៧ ចាញ់៤ មាន២១ពិន្ទុ)

ចាញ់ វិសាខា ០-៣
ឈ្នះ កងពលធំអន្តរាគមន៍លេខ៣ ៣-០
ឈ្នះ បញ្ជាការដ្ឋានអង្គរក្ស ៣-២
ចាញ់ ស្នងការដ្ឋាននរបាលរាជធានីភ្នំពេញ ១-៣
ចាញ់ វិសាខា ០-៣
ឈ្នះ កងពលធំអន្តរាគមលេខ៣ ៣-១
ឈ្នះ នគរបាលខេត្តព្រះសីហនុ ៣-០
ឈ្នះ នគរបាលខេត្តកណ្តាល ៣–០
ចាញ់ បញ្ជាការដ្ឋានអង្គរក្ស ២-៣
ឈ្នះ ស្នងការដ្ឋាននគរបាលរាជធានីភ្នំពេញ ៣-១
ឈ្នះ នគរបាលខេត្តពោធិ៍សាត់ ៣-១

អត្ថបទ៖ វីរបុត្រ

The post គូល្អ! បញ្ជាការដ្ឋានអង្គរក្ស ប៉ះ ក្រសួងមហាផ្ទៃ វគ្គពាក់កណ្តាលផ្តាច់ព្រ័ត្រតេជោលីគ appeared first on Kampuchea Thmey Daily.

យុវជន ខេង ថុនា ទើបហាត់នៅវិសាខាកន្លះឆ្នាំទទួលបានឱកាសលេងតេជោលីគ

chean virakbot — Thu, 08 Feb 2024 02:24:41 +0000

យុវជនវ័យ១៩ឆ្នាំ ខេង ថុនា កំពុងហ្វឹកហាត់បាល់ទះនៅក្លិបវិសាខា ស្របពេលរូបគេក៏កំពុងរៀននៅសាកលវិទ្យាល័យក្នុងរាជធានីភ្នំពេញ ក្រោយពេលចប់វិទ្យាល័យ។

ខេង ថុនា បានប្រាប់ថា រូបគេចូលចិត្តលេងបាល់ទះតាំងពីកម្រិតបឋមសិក្សា និងវិទ្យាល័យដែលជាកន្លែងរូបគេធ្លាប់ចេញប្រកួតក្នុងពានបាល់ទះមហាជនកម្រិតវិទ្យាល័យ។ ការលេងនៅវិទ្យាល័យមិនសូវទទួលបានល្អប្រសើរប៉ុន្មានឡើយ ហើយក៏មិនមានគ្រូបង្វឹកបង្ហាត់បាល់ទះត្រឹមត្រូវដែរ។ ទោះបីជាយ៉ាងណាតាមរយៈក្តីស្រឡាញ់ កាយសម្បទាអំណោយផល និងមានការជំរុញពីក្រុមគ្រួសារផងនោះបានធ្វើឲ្យរូបគេកាន់តែស្រឡាញ់កីឡាបាល់ទះ។

កីឡាករកម្ពស់១.៨៨ម៉ែត្របាននិយាយថា ៖«ពីដំបូង ខ្ញុំលេងបាល់ទះធម្មតាៗ សប្បាយៗទេ តែក្រុមគ្រួសារ បងប្អូន មិត្តភក្តិបានជំរុញឲ្យខ្ញុំខំប្រឹងលើបាល់ទះ ពីព្រោះពួកគាត់ឃើញខ្ញុំមានកម្ពស់ខ្ពស់ ហើយមកពីខ្ញុំចូលចិត្តលេងបាល់ទះដែរ។ ខ្ញុំបានចាប់លេងបាល់ទះប្រហែលជាឆ្នាំ២០២០»។

កាលនៅរៀនវិទ្យាល័យ ខេង ថុនា បានលេងឲ្យក្រុមវិទ្យាល័យដោយបានចូលរួមប្រកួតព្រឹត្តិការណ៍កីឡាវិទ្យាល័យកាលពីឆ្នាំ២០២១ ប៉ុន្តែមិនទទួលបានល្អប្រសើរទេ។ ទោះជាយ៉ាងងណា រូបគេនៅតែលេងបាល់ទះទាំងការប្រកួតផ្លូវការ និងក្រៅផ្លូវការរហូតចប់វិទ្យាល័យ។ រូបគេបានបន្តការសិក្សានៅសាកលវិទ្យាល័យក្នុងរាជធានីភ្នំពេញ ហើយក៏បានធ្វើតេស្តជាប់ក្នុងក្រុមយុវជនអាយុក្រោម១៨ឆ្នាំរបស់សមាគមបាល់ទះវិសាខាកាលពីខែកក្កដា ឆ្នាំ២០២៣។

ខេង ថុនា បានរៀបរាប់ថា ៖«នៅខេត្ត ខ្ញុំមិនសូវបានហ្វឹកហាត់ត្រឹមត្រូវទេ តែដល់ចូលក្លិបអាជីព មានការហ្វឹកហាត់ត្រឹមត្រូវ ការហ្វឹកហាត់ខ្លាំង ពិបាកដែរ តែខ្ញុំអាចស៊ូទ្រាំបាន។ ខ្ញុំនៅខ្វះខាតបទពិសោធ និងបច្ចេកទេស។ ខ្ញុំបានតាំងចិត្តខិតខំប្រឹងប្រែងដើម្បីឲ្យសមត្ថភាពល្អដូចកីឡាករបង»។

កីឡាករវ័យក្មេងរូបនេះបានប្រាប់ថា រូបគេពិតជាអរគុណដល់កីឡាកររៀមច្បងដែលបានជួយណែនាំ ចែករំលែកបទពិសោធ និងប្រាប់ពីចំណុចខ្វះខាតដែលធ្វើឲ្យរូបគេកាន់តែមានកម្លាំងចិត្តក្នុងការហ្វឹកហាត់។

បន្ទាប់ពីហ្វឹកហាត់ជាមួយក្រុមវិសាខាបានប្រហែលជាកន្លះឆ្នាំ ខេង ថុនា ក៏មានឈ្មោះចូលរួមប្រកួតក្នុងពានរង្វាន់បាល់ទះតេជោលីគដើមឆ្នាំ២០២៤។ ទោះបីជាមិនបានបង្ហាញខ្លួនញឹកញាប់ ក៏រូបគេត្រូវបានគ្រូបង្វឹកដាក់លេងច្រើនដែរ។

គោលដៅរបស់ ខេង ថុនា គឺអភិវឌ្ឍខ្លួនឲ្យមានសមត្ថភាពខ្លាំងដូចរៀមច្បង និងមានឱកាសជាប់ជម្រើសជាតិកម្ពុជា។ កីឡាករបាននិយាយថា ៖«ខ្ញុំចង់ជាប់ជម្រើសជាតិ តែសមត្ថភាពរបស់ខ្ញុំបច្ចុប្បន្ននៅមានកម្រិត អីចឹងខ្ញុំមានតែខិតខំប្រឹងប្រែងបន្តទៀតប៉ុណ្ណោះ។ ខ្ញុំសង្ឃឹមថា ថ្ងៃណាមួយ ខ្ញុំអាចធ្វើបានដូចបងៗជម្រើសជាតិ»។

ក្រៅពីការហ្វឹកហាត់ កីឡាករកើតឆ្នាំ២០០៥ មានកម្ពស់ ១.៨៨ម៉ែត្រ ទម្ងន់៧២គីឡូក្រាម ពាក់អាវលេខ២១ កំពុងរៀននៅសាកលវិទ្យាល័យ។ កីឡាករ មួន និមល និង ផុល រតនៈ ជាគំរូសម្រាប់រូបគេអភិវឌ្ឍខ្លួនតាម៕

អត្ថបទ៖ វីរបុត្រ

The post យុវជន ខេង ថុនា ទើបហាត់នៅវិសាខាកន្លះឆ្នាំទទួលបានឱកាសលេងតេជោលីគ appeared first on Kampuchea Thmey Daily.

លីគបាល់ទះកំពូលកម្ពុជា Archives - Kampuchea Thmey Daily

តេជោលីគ រកឃើញ​ ៦ ក្រុម​ចុង​ក្រោយ ខណៈ បញ្ជាការដ្ឋាន​អង្គរក្ស ប៉ះ ស្វាយរៀង កក្រើក​ថ្ងៃ​នេះ

ចុះកុងត្រារួចនៅវៀតណាម គួន ម៉ុម បង្ហើបប្រទេសធំមួយទៀត

Luvi ប្រាប់​ថា «រយៈ​ពេល២ខែនៅកម្ពុជា​សប្បាយចិត្តណាស់ សង្ឃឹមមកទៀត»

សន្ទុះអ្នកគាំទ្រលីគបាល់ទះកម្ពុជាជាប់លេខ១នៅ​តំបន់អាស៊ាន

អ្នកប៉ះសេឆ្នើម Dio ចង់មកលេងតេជោលីគទៀតក្រោយឈ្នះជើងឯក

តើក្រុមណានឹងក្លាយជាជើងឯកតេជោលីគចុងសប្តាហ៍នេះ?

គូល្អ! បញ្ជាការដ្ឋានអង្គរក្ស ប៉ះ ក្រសួងមហាផ្ទៃ វគ្គពាក់កណ្តាលផ្តាច់ព្រ័ត្រតេជោលីគ

យុវជន ខេង ថុនា ទើបហាត់នៅវិសាខាកន្លះឆ្នាំទទួលបានឱកាសលេងតេជោលីគ

តេជោលីគ រកឃើញ ៦ ក្រុមចុងក្រោយ ខណៈ បញ្ជាការដ្ឋានអង្គរក្ស ប៉ះ ស្វាយរៀង កក្រើកថ្ងៃនេះ

Luvi ប្រាប់ថា «រយៈពេល២ខែនៅកម្ពុជាសប្បាយចិត្តណាស់ សង្ឃឹមមកទៀត»

សន្ទុះអ្នកគាំទ្រលីគបាល់ទះកម្ពុជាជាប់លេខ១នៅតំបន់អាស៊ាន