លោក សរ សុពុត្រា Archives - Kampuchea Thmey Daily

អភិបាលខេត្តស្ទឹងត្រែង៖ យកភាពស្មោះត្រង់ជា “ដើមទុន” ចម្បងក្នុងការបម្រើប្រជាជន

Dy Bunnara — Tue, 31 Mar 2026 04:00:33 +0000

លោក សរ សុពុត្រា អភិបាលនៃគណៈអភិបាលខេត្តស្ទឹងត្រែងបានលើកឡើងពីគោលការណ៍ដ៏សំខាន់ដែលលោកតែងតែប្រកាន់ភ្ជាប់ ក្នុងប្រតិបត្តិការងារក្នុងតួនាទីជាមន្រ្តីសាធារណៈបម្រើប្រជាជន។

លោក សរ សុពុត្រាបានបញ្ជាក់ថា ចាប់តាំងពីដើមរហូតមកដល់បច្ចុប្បន្នតាំងពីលោកនៅកាន់ជាជាមន្រ្តីមូលដ្ឋាន រហូតទទួលបានការតែងតាំងដឹកនាំរហូតមកដល់ពេលនេះ លោកប្រកាន់យកគោលការណ៍ចំនួន ៥ ក្នុងប្រតិបត្តិការងារក្នុងនោះគឺ គុណធម៌ សមត្ថភាព សុជីវធម៌ ភាពស្មោះត្រង់ និងការទទួលខុសត្រូវ។

លោកថា ភាពស្មោះត្រង់ត្រូវបានចាត់ទុកថាជា “ដើមទុន” ដ៏ចម្បងក្នុងការបម្រើប្រជាជន។ លោកសង្កត់ធ្ងន់ថា ភាពស្មោះត្រង់មិនមែនគ្រាន់តែជាការនិយាយដោយមាត់ថាខ្លួនស្មោះត្រង់នោះទេ ប៉ុន្តែត្រូវស្ដែងចេញតាមរយៈទង្វើ និងឥរិយាបថជាក់ស្ដែង។

សម្រាប់លោកផ្ទាល់ ក្នុងតូនាទីជាមន្រ្តីសាធារណៈគឺត្រូវយកភាពស្មោះត្រង់ ដើម្បីបម្រើប្រជាជន។

បន្ថែមពីនេះការវាយតម្លៃមន្ត្រីក្រោមបង្គាប់ ក៏លោកមិនផ្អែកលើការស្ដាប់សម្ដីអ្នកដទៃដែលនិយាយប្រាប់នោះទេ។ ការវាយតម្លៃទៅលើទង្វើជាក់ស្ដែងដែលមើលឃើញនឹងភ្នែកផ្ទាល់ជាកត្តាកំណត់។

ក្នុងការលះបង់ និងការរួមចំណែកដល់ជាតិមាតុភូមិ លោកមានទស្សនៈផ្ទាល់ខ្លួនថា បើមិនអាចក្លាយជាសសរទ្រូងរបស់ប្រទេសជាតិនោះទេ តែយ៉ាងហោចណាស់ត្រឹមបានក្លាយជា “ក្បឿងមួយសន្លឹក” ដើម្បីរួមចំណែកក្នុងការប្រក់ដំបូលមាតុភូមិ។

លោកមានសារសម្រាប់យុវជនមិនគួរមានសំនួរថា “តើធ្វើការសង្គមខ្ញុំបានអ្វីនោះទេ ប៉ុន្តែគួរតែសួរថា “តើខ្លួនបានធ្វើអ្វីខ្លះសម្រាប់សង្គម?”។

លោកថា ការដឹងគុណចំពោះប្រទេសជាតិ យុវជនកុំដាក់ក្តីរំពឹងទុកចង់បានពីប្រទេសជាតិ ពីព្រោះប្រទេសជាតិបានផ្ដល់នូវសន្តិភាព សេចក្ដីសុខ និងសុភមង្គលរួចជាស្រេចទៅហើយ។

ពលរដ្ឋគ្រប់រូបគឺជាម្ចាស់ដែលមាន “ភាគហ៊ុន” នៅក្នុងប្រទេសជាតិ។ ដូច្នេះរាល់អ្វីដែលកើតឡើងចំពោះប្រទេសជាតិ មិនថាគុណសម្បត្តិ ឬគុណវិបត្តិ គឺជាចំណែកទទួលខុសត្រូវរបស់ពលរដ្ឋគ្រប់រូប។ លោកបន្ថែម៕

The post អភិបាលខេត្តស្ទឹងត្រែង៖ យកភាពស្មោះត្រង់ជា “ដើមទុន” ចម្បងក្នុងការបម្រើប្រជាជន appeared first on Kampuchea Thmey Daily.

សង្រ្កាន្តចូលឆ្នាំ អភិបាលខេត្តស្ទឹងត្រែងដាក់ចេញវិធានការឲ្យម្ចាស់អាជីវកម្មកុំដំឡើងថ្លៃ សុខចិត្តចំណេញតិច តែទទួលទេសចរមកកម្សាន្តច្រើន

Dy Bunnara — Tue, 31 Mar 2026 01:46:04 +0000

ខណៈដែលខេត្តស្ទឹងត្រែងត្រៀមរៀបចំព្រឹត្តិការណ៍ “ស្ទឹងត្រែងសង្ក្រាន្ត” នៅពេលខាងមុខ មានការរៀបចំកម្មវិធីផ្សេងៗមានទាំងកម្មវិធីសាសនា សកម្មភាពកម្សាន្ត ស្របជាមួយការរឹតបន្តឹងសន្តិសុខសម្រាប់ទទួលភ្ញៀវទេសចរមកកម្សាន្ត។

ទាក់ទងការត្រៀមដំណើរការព្រឹត្តិការណ៍សង្ក្រាន្ត លោក សរ សុពុត្រា អភិបាលនៃគណៈខេត្តស្ទឹងត្រែងបានដាក់ចេញគោលការណ៍ណែនាំ ក៏ដូចជាបានចេញលិខិតជូនដំណឹងដល់ម្ចាស់ផ្ទះសំណាក់ សណ្ឋាគារ និងភោជនីយដ្ឋានទាំងអស់មិនឲ្យដំឡើងថ្លៃសេវាកម្ម ក្នុងឱកាសបុណ្យចូលឆ្នាំនេះឡើយ។

តាមផ្ទះសំណាក់សណ្ឋាគារ ក៏ដូចជាភោជនីដ្ឋានត្រូវធានាថានឹងមិនមានការតម្លើងថ្លៃនៅក្នុងឱកាសពិធីបុណ្យខាងមុខ។ នេះបើតាមលោក សរ សុពុត្រា។

«ខ្ញុំបានចេញិខិតជូនដំណឹងបន្តហើយបានន័យថា សុខចិត្តចំណេញតិចដែលយើងទទួលបានភ្ញៀវច្រើន។ បើបងប្អូនចង់ចំណេញច្រើនយើងនឹងបាត់បង់ភ្ញៀវអីចឹងតើយកមួយណា»។ លោក សរ សុពុត្រា បន្ថែម។

លោកសង្កត់ធ្ងន់ថា «ការសុខចិត្តចំណេញតិចតែទទួលបានភ្ញៀវច្រើននិងយូរអង្វែង គឺប្រសើរជាងការដំឡើងថ្លៃដែលនាំឲ្យបាត់បង់ភ្ញៀវទេសចរនៅឆ្នាំបន្តបន្ទាប់»។

ស្ទឹងត្រែងសង្ក្រាន្ត ជាការបង្ហាញពីការយកចិត្តទុកដាក់លើការថែរក្សាព្រលឹងជាតិ និងការបង្កើតបរិយាកាសសប្បាយរីករាយជូនប្រជាពលរដ្ឋ ដោយមិនមានការកេងចំណេញហួសហេតុពីសំណាក់អាជីវករ។

“ស្ទឹងត្រែងសង្ក្រាន្ត” ផ្ដោតសំខាន់លើការផ្សារភ្ជាប់ជាមួយប្រពៃណី ទំនៀមទម្លាប់ និងសាសនា។ ក្នុងនោះក៏មានរៀបចំពិធីបង្សុកូលឧទ្ទិសកុសលជូនដល់វីរកងទ័ព និងវីរនគរបាលជាតិដែលបានពលីក្នុងបុព្វហេតុការពារជាតិ។

លោក សរ សុពុត្រា បានបញ្ជាក់ថា ក្នុងកម្មវិធី “ស្ទឹងត្រែងសង្ក្រាន្ត” ក៏នឹងមានរៀបចំកម្មវិធី “នំបញ្ចុកសាមគ្គី” ជាមួយជនភាសឹកដែលរស់នៅមណ្ឌលក្នុងស្រុកថាឡាបរិវ៉ាត់ ដើម្បីសួរសុខទុក្ខគ្រួសារកងទ័ព។

បន្ថែមពីនេះនៅក្នុងព្រឹត្តិការណ៍នេះក៏នឹងមានការបង្ហាញពី វិថីម្ហូបអាហារខ្មែរ, ភូមិនំខ្មែរ, តំបន់ល្បែងប្រជាប្រិយ, ការបង្ហាញផ្ទាំងទស្សនីយភាពរបាំបុរាណ និងសម័យ រួមទាំងការសម្ដែងល្ខោនបាសាក់ផងដែរ។ គោលបំណងធំគឺដើម្បីលើកស្ទួយ និងរក្សាមរតកវប្បធម៌ដែលជាអត្តសញ្ញាណជាតិ។

ពាក់ព័ន្ធការធានាសន្តិសុខ លោក សរ សុពុត្រា បានអះអាងពីការធានាឲ្យបាននូវសន្តិសុខ សណ្ដាប់ធ្នាប់សាធារណៈ និងសុវត្ថិភាពជូនដល់ភ្ញៀវទេសចរ៕

The post សង្រ្កាន្តចូលឆ្នាំ អភិបាលខេត្តស្ទឹងត្រែងដាក់ចេញវិធានការឲ្យម្ចាស់អាជីវកម្មកុំដំឡើងថ្លៃ សុខចិត្តចំណេញតិច តែទទួលទេសចរមកកម្សាន្តច្រើន appeared first on Kampuchea Thmey Daily.

សមិទ្ធផលធំៗបានកែប្រែមុខមាត់ក្រុងស្ទឹងត្រែងធ្លាប់ទីប្រជុំជនស្ងាត់ជ្រងំ កាន់តែអ៊ូអរអភិវឌ្ឍពីមួយថ្ងៃទៅមួយថ្ងៃ

Dy Bunnara — Mon, 30 Mar 2026 03:53:06 +0000

ក្រុងស្ទឹងត្រែងបានផ្លាស់ប្តូរមុខមាត់ថ្មី ខណៈដែលពីមុនធ្លាប់ជាទីប្រជុំជនដ៏ស្ងាត់ជ្រងំហើយទេសចរឆ្ងាយជិតច្រើនតែជិះហួសមកហួស ឥឡូវនេះបានអភិវឌ្ឍកែប្រែមុខមាត់ថ្មីតាមរយៈគម្រោងអភិវឌ្ឍនានា ជាពិសេសការកែលម្អសោភណភាពបរិស្ថានក្នុងក្រុងកាន់តែស្រស់ស្អាតពីមួយថ្ងៃទៅមួយថ្ងៃ។

ក្នុងដំណើរទស្សនកិច្ចរបស់ក្រុមអ្នកសារព័ត៌មាន ចុះទៅផ្សព្វផ្សាយពីសក្តានុពលក្នុងខេត្តស្ទឹងត្រែងកាលពីពេលថ្មីៗនេះ លោក សរ សុពុត្រា អភិបាលនៃគណៈអភិបាលខេត្តស្ទឹងត្រែងបានរំលេចពីសមិទ្ធផលធំៗដែលរដ្ឋបាលខេត្តបានកំពុងតែកែប្រែមុខមាត់ក្រុងស្ទឹងត្រែងកាន់តែស្រស់បំព្រង ជាមួយគម្រោងអភិវឌ្ឍនានាដែលធ្វើឲ្យខេត្តភាគឦសានធ្លាប់តែស្ងាត់ជ្រងំមានការអភិវឌ្ឍរីកចម្រើន និងទាក់ទាញទេសចរមកកម្សាន្តកើនឡើងពីមួយថ្ងៃទៅមួយថ្ងៃ។

សមិទ្ធផលធំៗដែលខេត្តបានខិតខំអភិវឌ្ឍកែប្រែមុខមាត់ក្រុងស្ទឹងត្រែងមានដូចជា៖

ការសាងសង់ទីលានតេជោធិបតី និងវេទិកានាគជ័យដែលស្ថិតនៅចំពីមុខសាលាខេត្ត ដែលជាទីលានពហុបំណងសម្រាប់រៀបចំព្រឹត្តិការណ៍ផ្សេងៗ និងអាចផ្ទុកមហាជនបានរហូតដល់ជាង ៥ ម៉ឺននាក់។

ការស្ថាបនាសួនបវរធិបតីបានបញ្ចប់ ដោយមានការដាំដើមត្រែងជាដើមឈើតំណាងអត្តសញ្ញាណរបស់ខេត្ត និងមានដាក់រូបសំណាក់គ្រួសារត្រីផ្សោតជាត្រីកម្ររបស់ពិភពលោកថែមទៀត។

ក្រៅពីនេះនៅចំពីមុខសាលាខេត្ត អាជ្ញាធរខេត្តកំពុងសាងសង់សួនតេជោសន្តិភាព ដើម្បីរំលឹកដល់ការនាំមកនូវសន្តិភាពពេញបរិបូរណ៍តាមរយៈនយោបាយឈ្នះ-ឈ្នះ របស់សម្តេចតេជោ ហ៊ុន សែន។

នៅតាមផ្លូវជួរមាត់ទន្លេ សួនសុវណ្ណភូមិក៏ត្រូវបានរៀបចំកែលម្អជាទីតាំងសម្រាប់កុមារលេងកម្សាន្ត និងមានបំពាក់ឧបករណ៍ហាត់ប្រាណសម្រាប់មនុស្សពេញវ័យផងដែរ។ បន្ថែមពីនេះ អាជ្ញាធរក៏កំពុងសាងសង់រង្វង់មូលម្នាស់ស្ថិតនៅផ្លូវចូលខេត្តជាកសិផលតំណាងខេត្តស្ទឹងត្រែង។

លោកអភិបាលខេត្តបានបញ្ជាក់ថា នៅតាមច្រាំងទន្លេក៏កំពុងរៀបចំផ្លូវថ្មើរជើង ការដាំផ្កាលម្អ និងការសាងសង់បន្ទប់ទឹកសាធារណៈ ដើម្បីបម្រើដល់តម្រូវការរបស់ប្រជាពលរដ្ឋ ដែលគ្រោងបញ្ចប់នៅក្នុងឆ្នាំ ២០២៦។

បើតាមលោកអភិបាលខេត្ត សមិទ្ធផលទាំងអស់នេះមិនទាន់សម្ពោធដាក់ឱ្យប្រើប្រាស់ជាផ្លូវការនៅឡើយទេ ដោយរង់ចាំសម្ដេចមហាបវរធិបតីនាយករដ្ឋមន្ត្រីមកជាអធិបតីក្នុងពិធីសម្ពោធក្នុងពេលវេលាសមស្រប៕

The post សមិទ្ធផលធំៗបានកែប្រែមុខមាត់ក្រុងស្ទឹងត្រែងធ្លាប់ទីប្រជុំជនស្ងាត់ជ្រងំ កាន់តែអ៊ូអរអភិវឌ្ឍពីមួយថ្ងៃទៅមួយថ្ងៃ appeared first on Kampuchea Thmey Daily.

ភីភាមិនមែនជាម្ហូបអត្តសញ្ញាណខេត្តស្ទឹងត្រែង មានម្ហូបពីរមុខតំណាងឲ្យខេត្តភាគឦសាននេះ

Dy Bunnara — Mon, 30 Mar 2026 01:59:43 +0000

ភីភាមិនមែនជាម្ហូបអត្តសញ្ញាណរបស់ខេត្តស្ទឹងត្រែងនោះទេ ដែលកន្លងទៅនេះមុខម្ហូបនេះត្រូវបានពលរដ្ឋតាមសហគមន៍ក្នុងខេត្តពេញនិយមទទួលទាន។

លោក សរ សុពុត្រា អភិបាលនៃគណៈអភិបាលខេត្តស្ទឹងត្រែងបានឲ្យដឹងថា ម្ហូបដែលជាអត្តសញ្ញាណរបស់ខេត្តស្ទឹងត្រែងគឺភ្លាត្រីក្អែក ដែលម្ហូបនេះគឺជាម្ហូបតំណាងឱ្យខេត្តស្ទឹងត្រែង និងម្ហូបមួយមុខទៀតគឺឡាបអង្ករលីង។

លោកអភិបាលខេត្តបានអះអាងថា ម្ហូបភីភាមិនមែនជាម្ហូបអត្តសញ្ញាណរបស់ខេត្តតំបន់ឦសាននេះទេ។ ម្ហូបនេះគឺជាម្ហូបប្រពៃណីរបស់ជនជាតិដើមភាគតិច ដែលពួកគាត់ចំណាំធ្វើបរិភោគនៅក្នុងសហគមន៍តែប៉ុណ្ណោះ។

«ម្ហូបអត្តសញ្ញាណរបស់ខេត្តយើងនេះគឺភ្លាត្រីក្អែក និងឡាបអង្ករលីងមិនមែនភីភានោះទេ។ ភីភាគ្រាន់តែម្ហូបសហគមន៍ហើយមិនអាចយកមកជាប្រភេទម្ហូបអត្តសញ្ញារបស់ខេត្តបានទេ»។

លោកអភិបាលខេត្តបានបន្តថា ខេត្តស្ទឹងត្រែងក្រៅតែជាខេត្តដែលសំបូរតំបន់អេកូទេសចរណ៍ដោយសារមានទន្លេចំនួន ៤ ហូរឆ្លងកាត់ ម្ហូបក៏ជាផ្នែកមួយទាក់ទាញនិងល្បីល្បាញផងដែរ។ លោកលើកឡើងពីសក្តានុពលខេត្តស្ទឹងត្រែងសំបូរត្រីធំៗ ហើយមានរសជាតិឆ្ងាញ់។

ត្រីដែលល្បីប្រចាំខេត្តតំបន់ឦសានេះ គឺត្រីប៉ាសេអ៊ីដែលជាប្រភេទត្រីកម្រ និងមានរសជាតិឆ្ងាញ់ហើយថ្លៃបំផុត ហើយដល់ពេលរដូវកាលតែងតែទាក់ទាញភ្ញៀវទេសចរធ្វើដំណើរមកសាករសជាតិត្រីអត្តសញ្ញាណរបស់ខេត្តស្ទឹងត្រែង។

លោកអភិបាលខេត្តបានបញ្ជាក់ថា ត្រីប៉ាសេអ៊ីជាប្រភេទមច្ឆាជាតិដែលជាអត្តសញ្ញាណរបស់ខេត្តស្ទឹងត្រែង ហើយដែលសម្បូរនិងរស់នៅតែក្នុងទឹកដីខេត្តស្ទឹងត្រែងប៉ុណ្ណោះ សូម្បីតែនៅខេត្តក្រចេះតាមដងទន្លេនៅក្បែរខាងក៏មិនមានដែរ៕

The post ភីភាមិនមែនជាម្ហូបអត្តសញ្ញាណខេត្តស្ទឹងត្រែង មានម្ហូបពីរមុខតំណាងឲ្យខេត្តភាគឦសាននេះ appeared first on Kampuchea Thmey Daily.

អភិបាលខេត្តស្ទឹងត្រែង៖ ទេសចរឆ្លងទៅលេងឡាវតិចជាងមុន ខណៈខេត្តស្ទឹងត្រែងលែងក្លាយជាតំបន់ឆ្លងកាត់ដូចមុន

Dy Bunnara — Sat, 28 Mar 2026 07:53:58 +0000

ខេត្តស្ទឹងត្រែងបានផ្លាស់ប្តូរមុខមាត់ពីតំបន់ដែលគ្រាន់តែជាកន្លែងឆ្លងកាត់ បានក្លាយទៅជាគោលដៅដែលទេសចរមកលេងម្តងហើយចង់មកលេងម្តងទៀត។

លោក សរ សុពុត្រា អភិបាលខេត្តស្ទឹងត្រែងបានឲ្យដឹងថា កត្តាដែលជំរុញឱ្យខេត្តស្ទឹងត្រែងមានការប្រែប្រួលនេះ ដោយសារមានការអភិវឌ្ឍហេដ្ឋារចនាសម្ព័ន្ធផ្លូវថ្នល់មានភាពល្អប្រសើរជាងមុន ការធានាបានសន្តិសុខសុវត្ថិភាពជូនភ្ញៀវទេសចរ គួបផ្សំខេត្តមានតំបន់អេកូទេសចរណ៍ដ៏សំបូរបែប។

លោក សរ សុពុត្រា បានឲ្យដឹងថា ពីដើមខេត្តស្ទឹងត្រែងគឺជាតំបន់មួយដែលទេសចរគ្រាន់តែធ្វើដំណើរឆ្លងកាត់ដើម្បីទៅលេងនៅប្រទេសឡាវ ឥលូវនេះឥរិយាបថរបស់ទេសចរមានការផ្លាស់ប្តូរ។

«ឥឡូវនេះយើងឃើញទេសចរដែលឆ្លងទៅលេងប្រទេសឡាវមានចំនួនតិចវិញ គឺទេសចរចូលមកគឺទៅលេងនៅតំបន់ទេសចរណ៍ក្នុងខេត្តដូចជានៅតំបន់រ៉ាមសារកោះហាន និងទៅតាមបណ្តាកោះទេសចរណ៍មួយចំនួនទៀតនៅក្នុងស្រុកសេសាន រហូតធ្លាយទៅដល់សៀមប៉ាង»។

ដើម្បីជំរុញឲ្យទេសចរមកកម្សាន្តហើយជាប់ចិត្តនោះ លោកអភិបាលខេត្តបានលើកឡើងពីយុទ្ធសាស្រ្តបង្កើនការផ្សព្វផ្សាយ ការបង្កើតមាតិកា និងរៀបចំព្រឹត្តិការណ៍ផ្សេងៗ។ ជាក់ស្ដែងខេត្តបានបង្កើតឲ្យមានសួនផ្កាពណ៌លឿងនៅក្បែរព្រះរាជដំណាក់ ដែលបានស្រូបយកភ្ញៀវទេសចរពីភ្នំពេញ និងបណ្តាខេត្តផ្សេងៗមកថតផ្សព្វផ្សាយជាហូហែរ។

បន្ថែមពីនេះ បើតាមលោក សរ សុពុត្រា អាជ្ញាធរខេត្តបានដាក់គោលដៅធ្វើយ៉ាងណាឱ្យភ្ញៀវទេសចរដែលមកដល់ខេត្តស្ទឹងត្រែង មិនត្រឹមតែទៅលេងនៅតំបន់រ៉ាមសារមួយនោះទេប៉ុន្តែគឺទៅលេងឱ្យបានសព្វគ្រប់កន្លែង ខណៈអាជ្ញាធរខេត្តក៏គិតគូរយកចិត្តទុកដាក់រឿងការផ្តល់សេវាកម្ម ការធានាតម្លៃកន្លែងស្នាក់នៅឲ្យបានសមរម្យ បន្ថែមការខិតខំរៀបចំបរិស្ថានខេត្តឲ្យបានស្អាត ដើម្បីទាក់ទាញទេសចរមកកម្សាន្ត៕

The post អភិបាលខេត្តស្ទឹងត្រែង៖ ទេសចរឆ្លងទៅលេងឡាវតិចជាងមុន ខណៈខេត្តស្ទឹងត្រែងលែងក្លាយជាតំបន់ឆ្លងកាត់ដូចមុន appeared first on Kampuchea Thmey Daily.

ស្វែងយល់សំណង់សំខាន់ៗសម័យបារាំង និងសម័យសម្តេចតា បន្សល់ទុកជាតឹកតាងក្នុងខេត្តស្ទឹងត្រែង

Dy Bunnara — Sat, 28 Mar 2026 06:00:00 +0000

នៅក្នុងខេត្តស្ទឹងត្រែងមានបន្សល់ទុកសំណង់ប្រវត្តិសាស្រ្តមួយចំនួន ដែលត្រូវបានកសាងឡើងជំនាន់សម័យអាណានិគមបារាំង ក៏ដូចជាជំនាន់សម្តេចតាដឹកនាំប្រទេស។

ក្នុងដំណើរទស្សនកិច្ចផ្សព្វផ្សាយពីសក្ដានុពលរបស់ខេត្តស្ទឹងត្រែងរបស់ក្រុមអ្នកសារព័ត៌មាន ដឹកនាំដោយក្លិបអ្នកកាសែតកម្ពុជា លោក សរ សុពុត្រា អភិបាលនៃគណៈអភិបាលខេត្តស្ទឹងត្រែងបានបង្ហាញពីសំណង់ប្រវត្តិសាស្រ្តមួយចំនួនដែលបន្សល់ទុកក្នុងខេត្តស្ទឹងត្រែង។

លោកអភិបាលខេត្តបានគូសរំលេចដោយកត់សម្គាល់ថា សំណង់ដែលសេសសល់ក្នុងខេត្តស្ទឹងត្រែងសាងសង់ជំនាន់បារាំងគ្រប់គ្រងប្រទេសកម្ពុជា និងជំនាន់សម្តេចតាភាគច្រើនមានសភាពទ្រុឌទ្រោម ប៉ុន្តែកំពុងត្រូវបានអភិរក្សជាមរតកបេតិកភណ្ឌជាតិ។ សំណង់ជាតឹងតាងប្រវត្តិសាស្រ្តទាំងនោះមាន៖

អតីតព្រះរាជដំណាក់របស់ព្រះបរមរតនកោដ្ឋព្រះបាទនរោត្តម សីហនុ

មានទីតាំងស្ថិតនៅក្នុងក្រុងស្ទឹងត្រែង នៅចំចំណុចប្រសព្វរវាងទន្លេសេកុង និងទន្លេមេគង្គ។ ដោយសារមើលឃើញគុណតម្លៃជាស្នាដៃមរតករបស់អតីតព្រះមហាក្សត្រខ្មែរ ហើយតាមសំណើរបស់រដ្ឋបាលខេត្តនិងមជ្ឈមណ្ឌលឯកសារកម្ពុជា ព្រះមហាក្សត្រីបានសព្វព្រះរាជហឫទ័យប្រគល់ព្រះរាជដំណាក់នេះមកឱ្យមជ្ឈមណ្ឌលឯកសារកម្ពុជា ដើម្បីកសាងទៅជាព្រះសារមន្ទីរសម្រាប់តម្កល់ឯកសារ។

ខណៈតំបន់នោះធ្លាប់ជាតំបន់សង្គ្រាម បច្ចុប្បន្នអ្នកជំនាញស៊ីម៉ាក់កំពុងធ្វើការរុករកនិងសម្អាតគ្រាប់មីនឬគ្រាប់មិនទាន់ផ្ទុះដើម្បីធានាសុវត្ថិភាព។

អតីតអគារសាលាខេត្តចាស់

អតីតអគារសាលាខេត្តចាស់ ជាសំណង់ដ៏មានតម្លៃជាប្រវត្តិសាស្រ្តមួយទៀតរបស់ខេត្តស្ទឹងត្រែង ដែលត្រូវបានសាងសង់ឡើងតាំងពីសម័យបារាំង។ សំណង់ដែលធ្លាប់ដើរតួនាទីជាមណ្ឌលរដ្ឋបាលរបស់ខេត្តស្ទឹងត្រែង បច្ចុប្បន្នត្រូវបានអាជ្ញាធរខេត្តកំពុងធ្វើការជាមួយភាគីពាក់ព័ន្ធ ដើម្បីរៀបចំកែលម្អប្រែក្លាយទៅជាសារមន្ទីរវប្បធម៌សម្រាប់រក្សាទុកនូវរាល់ចម្លាក់ ឬសម្បត្តិវប្បធម៌ផ្សេងៗ ដើម្បីឱ្យភ្ញៀវទេសចរចូលទស្សនា។

បង្គោលព្រំដែនសម័យបារាំង

បង្គោលព្រំដែនកម្ពុជា-ឡាវជាសំណង់មរតកមួយទៀតរបស់បារាំងដែលបន្សល់ទុកក្នុងខេត្តស្ទឹងត្រែង ដែលមានទីតាំងនៅបណ្តោយផ្លូវជាតិលេខ ៧ ក្បែរច្រកព្រំដែនត្រពាំងក្រៀល។ គណៈកម្មការព្រំដែនកម្ពុជាមានផែនការរៀបចំប្លង់ និងកែលម្អទីតាំងនោះឱ្យមានជាសួនលម្អ ដើម្បីប្រែក្លាយទៅជាតំបន់ទេសចរណ៍ព្រំដែនសម្រាប់ឱ្យពលរដ្ឋអាចទៅកម្សាន្តនិងសិក្សាស្រាវជ្រាវ។

ពាក់ព័ន្ធការអភិរក្សសំណង់មរតកក្នុងខេត្តស្ទឹងត្រែង លោក សរ សុពុត្រា បានបញ្ជាក់ថា រដ្ឋបាលខេត្តបើកក្នុងការទទួលយកគ្រប់ជំនួយមិនថាមកពីបរទេសឬសប្បុរសជនក្នុងស្រុក ដើម្បីចូលរួមអភិរក្សសំណង់ទាំងនេះសម្រាប់ជាមរតកសម្រាប់មនុស្សជំនាន់ក្រោយ។

ជាមួយគ្នានេះ លោកអភិបាលខេត្តបានលើកពាក់ព័ន្ធសំណង់សាលាខេត្តចាស់ ខណៈអាជ្ញាធរខេត្តបានលើកសំណើទៅស្ថានទូតហ្វីលីពីនដើម្បីផ្តល់ការគាំទ្រ ហើយខាងស្ថានទូតហ្វីលីពីនបានបង្ហាញការចាប់អារម្មណ៍ និងគ្រោងចុះមកពិនិត្យមើលទីតាំងផ្ទាល់នាពេលខាងមុខ៕

The post ស្វែងយល់សំណង់សំខាន់ៗសម័យបារាំង និងសម័យសម្តេចតា បន្សល់ទុកជាតឹកតាងក្នុងខេត្តស្ទឹងត្រែង appeared first on Kampuchea Thmey Daily.

សួន ស៊ីន ស៊ីសាមុត នឹងលេចរូបរាងឆាប់ៗនេះក្នុងក្រុងស្ទឹងត្រែង ដើម្បីរំលឹកដល់ស្នាដៃអតីតតារាចម្រៀងឯកប្រចាំប្រទេសកម្ពុជា

Dy Bunnara — Fri, 27 Mar 2026 08:26:29 +0000

អាជ្ញាធរខេត្តស្ទឹងត្រែងគ្រោងរៀបចំសាងសង់សួនស៊ីន ស៊ីសាមុត ដើម្បីរំលឹកដល់ស្នាដៃអតីតតារាចម្រៀងឯកប្រចាំប្រទេសកម្ពុជា។

លោក សរ សុពុត្រា អភិបាលខេត្តស្ទឹងត្រែងបានឲ្យដឹងថា គម្រោងកែលម្អសួន ស៊ីន ស៊ីសាមុត គ្រោងចាប់ផ្តើមក្រោយពិធីបុណ្យចូលឆ្នាំខ្មែររួច។

លោកបានរំលេចគោលបំណងក្នុងការបង្កើតសួននេះឡើង គឺដើម្បីជាការអរគុណនិងដឹងគុណចំពោះមរតកសំឡេងឯករបស់លោកព្រឹទ្ធាចារ្យ ស៊ីន ស៊ីសាមុត ដែលជាមរតកដ៏មានតម្លៃមិនអាចកាត់ថ្លៃបាន។

សួនដែលគ្រោងរៀបចំឡើងនេះ មានទីតាំងស្ថិតនៅក្បែរមាត់ទន្លេនៅក្នុងក្រុងស្ទឹងត្រែង។

ខេត្តស្ទឹងត្រែងជាខេត្តកំណើតរបស់អធិរាជសំឡេងមាស លោក ស៊ីន ស៊ីសាមុត។ ភាពល្បីល្បាញរបស់លោកគឺ ដោយសារទឹកដមសំលេងដ៏ពីរោះរណ្ដំចិត្ត គួបផ្សំបទចំរៀងមនោសញ្ចេតនាគ្រប់រសជាតិ មានទាំងបទលន្លង់លន្លោច សប្បាយ កំសត់ ខ្លោចផ្សារ ដែលជាស្នាដៃនិពន្ធរបស់លោកផ្ទាល់ និងអ្នកនិពន្ធដទៃក្នុងជំនាន់របស់លោក៕

The post សួន ស៊ីន ស៊ីសាមុត នឹងលេចរូបរាងឆាប់ៗនេះក្នុងក្រុងស្ទឹងត្រែង ដើម្បីរំលឹកដល់ស្នាដៃអតីតតារាចម្រៀងឯកប្រចាំប្រទេសកម្ពុជា appeared first on Kampuchea Thmey Daily.

Grab និង PassApp មិនទាន់មានវត្តមានក្នុងខេត្តស្ទឹងត្រែង អភិបាលខេត្តជំរុញឲ្យក្រុមហ៊ុនចាប់យកឱកាសវិនិយោគ

Dy Bunnara — Fri, 27 Mar 2026 02:58:49 +0000

បច្ចុប្បន្នខេត្តស្ទឹងត្រែងនៅមិនទាន់មានក្រុមហ៊ុនផ្តល់សេវាដឹកជញ្ជូនធំៗដូចជា Grab ឬ PassApp មកវិនិយោគនៅឡើយទេ។ នេះអាចមកពីម្ចាស់ក្រុមហ៊ុនទាំងនោះយល់ឃើញថា ខេត្តស្ទឹងត្រែងមិនទាន់មានមនុស្សច្រើន ឬមិនទាន់មានទីផ្សារទូលំទូលាយ។ នេះបើតាមលោក សរ សុពុត្រា អភិបាលនៃគណៈអភិបាលខេត្តស្ទឹងត្រែង។

លោក សរ សុពុត្រា អះអាងថា នេះអាចជាការគិតខុសរបស់ក្រុមហ៊ុន ព្រោះបច្ចុប្បន្នខេត្តស្ទឹងត្រែងមានមនុស្សរស់នៅនិងធ្វើដំណើរកាន់តែច្រើនឡើងៗ។

លោក សរ សុពុត្រា បានលើកឡើងកាលពីពេលថ្មីៗនេះ ដែលមានយុទ្ធនាការសាកល្បងដឹកជញ្ជូនដោយស៊ីក្លូ ដែលទទួលបានការចាប់អារម្មណ៍យ៉ាងខ្លាំងពីសំណាក់ប្រជាពលរដ្ឋក្នុងខេត្ត ដែលនេះជាភស្តុតាងបង្ហាញពីតម្រូវការជាក់ស្ដែង។

លោកអំពាវនាវដល់ក្រុមហ៊ុនដឹកជញ្ជូនដូចជា Grab និង PassApp ឱ្យមកពិភាក្សាគ្នាដើម្បីបង្កើតយន្តការដឹកជញ្ជូនជាផ្លូវការនៅក្នុងខេត្តស្ទឹងត្រែង។

ក្រៅពីអំពាវនាវដល់ក្រុមហ៊ុនធំៗក្នុងការចាប់ឱកាសវិនិយោគសេវាដឹកជញ្ជូនក្នុងខេត្ត លោកក៏លើកទឹកចិត្តដល់សមាគមម៉ូតូកង់បីឱ្យនាំយកមធ្យោបាយធ្វើដំណើរមកចូលរួមផ្ដល់សេវាកម្មដឹកជញ្ជូន ដើម្បីសម្រួលដល់ការធ្វើដំណើររបស់ប្រជាពលរដ្ឋ និងភ្ញៀវទេសចរមកកម្សាន្តខេត្តភាគឦសាននេះផងដែរ៕

The post Grab និង PassApp មិនទាន់មានវត្តមានក្នុងខេត្តស្ទឹងត្រែង អភិបាលខេត្តជំរុញឲ្យក្រុមហ៊ុនចាប់យកឱកាសវិនិយោគ appeared first on Kampuchea Thmey Daily.

លោក សរ សុពុត្រា Archives - Kampuchea Thmey Daily

អភិបាល​ខេត្ត​ស្ទឹងត្រែង​៖ យក​ភាព​​ស្មោះត្រង់​​​ជា “ដើម​ទុន”​ ចម្បង​​ក្នុង​ការ​បម្រើប្រជាជន

ភីភាមិន​​មែនជា​ម្ហូបអត្តសញ្ញាណ​ខេត្តស្ទឹងត្រែង ​មានម្ហូបពីរមុខ​តំណាង​​ឲ្យ​ខេត្ត​ភាគ​​ឦសាន​នេះ

អភិបាលខេត្តស្ទឹងត្រែង៖ ទេសចរឆ្លងទៅលេង​ឡាវតិចជាងមុន ខណៈខេត្តស្ទឹងត្រែងលែងក្លាយជាតំបន់​ឆ្លងកាត់ដូចមុន

ស្វែងយល់​សំណង់​សំខាន់​ៗ​សម័យបារាំង និងសម័យ​សម្តេចតា បន្សល់ទុកជាតឹកតាងក្នុងខេត្តស្ទឹងត្រែង

អភិបាលខេត្តស្ទឹងត្រែង៖ យកភាពស្មោះត្រង់ជា “ដើមទុន” ចម្បងក្នុងការបម្រើប្រជាជន

ភីភាមិនមែនជាម្ហូបអត្តសញ្ញាណខេត្តស្ទឹងត្រែង មានម្ហូបពីរមុខតំណាងឲ្យខេត្តភាគឦសាននេះ

អភិបាលខេត្តស្ទឹងត្រែង៖ ទេសចរឆ្លងទៅលេងឡាវតិចជាងមុន ខណៈខេត្តស្ទឹងត្រែងលែងក្លាយជាតំបន់ឆ្លងកាត់ដូចមុន

ស្វែងយល់សំណង់សំខាន់ៗសម័យបារាំង និងសម័យសម្តេចតា បន្សល់ទុកជាតឹកតាងក្នុងខេត្តស្ទឹងត្រែង