តាមការបង្ហោះលើបណ្តាញសង្គមហ្វេសប៊ុក លោកបានបញ្ជាក់ថា ការអនុវត្តនេះ ស្របតាមស្មារតីអង្គប្រជុំអន្តរក្រសួង ដឹកនាំដោយលោកឧបនាយករដ្ឋមន្ត្រី សាយ សំអាល់ ស្តីពីកំណែទម្រង់សេវាសាធារណៈក្នុងវិស័យដីធ្លី និង សំណង់ ដោយផ្តោតលើគោលការណ៍ «រយៈពេលខ្លី ខ្លឹម និង ប្រកបដោយគុណភាព»។

លោកបន្ថែមថា ក្រោមការណែនាំរបស់អភិបាលរាជធានីភ្នំពេញ ការអនុវត្តតាមបរិបទថ្មីបានជួយបង្កើនប្រសិទ្ធភាពការងារ ស្របតាមយុទ្ធសាស្ត្របញ្ចកោណរបស់រាជរដ្ឋាភិបាល ដែលផ្តោតលើការធ្វើការឱ្យលឿន សម្រួលនីតិវិធី និង ដោះស្រាយការកកស្ទះក្នុងការស្នើសុំគោលការណ៍។

លោក សារិន វណ្ណា បានឱ្យដឹងទៀតថា បច្ចុប្បន្ន ការស្នើសុំបណ្ណកម្មសិទ្ធិនៅរាជធានីភ្នំពេញ អាចបញ្ចប់ក្នុងរយៈពេលប្រមាណ ១ ខែប៉ុណ្ណោះ។ លោកក៏បានលើកឡើងថា ប្រសិនបើរាជធានីភ្នំពេញ អាចអនុវត្តបានជោគជ័យតាមគំរូបរិបទថ្មី ខេត្តផ្សេងៗ ក៏គួរអនុវត្តដូចគ្នា ដើម្បីឆ្លើយតបការរំពឹងទុករបស់ប្រជាពលរដ្ឋ។

ក្នុងរយៈពេលថ្មីៗ នេះ លោក សារិន វណ្ណា ទទួលបានការគាំទ្រពីសាធារណជន ក្រោយបង្ហាញជំហរយ៉ាងម៉ឺងម៉ាត់ក្នុងការលុបបំបាត់អំពើពុករលួយ និង លើកកម្ពស់ការផ្តល់សេវាសាធារណៈប្រកបដោយតម្លាភាព យុត្តិធម៌ និង អនុលោមតាមនីតិវិធីជាធរមាន។ ទន្ទឹមនឹងនេះ លោកក៏បានផ្សព្វផ្សាយឯកសារមួយចំនួន ពាក់ព័ន្ធនឹងការកែទម្រង់នីតិវិធីផ្តល់សេវាសាធារណៈលើវិស័យដីធ្លីផងដែរ។

គួររំលឹកថា កាលពីថ្ងៃទី ២៤ ខែមិថុនា ឆ្នាំ ២០២៦ លោកឧបនាយករដ្ឋមន្ត្រី សាយ សំអាល់ បានចេញសេចក្តីសម្រេចប្រគល់ភារកិច្ចជូនលោក សារិន វណ្ណា ឱ្យដឹកនាំក្រុមការងារប្រតិបត្តិនៅតាមបណ្តារាជធានី-ខេត្ត ដើម្បីជួយដល់ក្រុមជនបង្គោលប្រឆាំងអំពើពុករលួយរបស់ក្រសួងរៀបចំដែនដី នគរូបនីយកម្ម និង សំណង់ ក្នុងការពង្រឹងប្រសិទ្ធភាព និង តម្លាភាព នៃការផ្តល់សេវាសាធារណៈ៕

The post ប្រធានមន្ទីររៀបចំដែនដី ៖ កំណែទម្រង់ថ្មី ការស្នើសុំបណ្ណកម្មសិទ្ធិនៅភ្នំពេញ ចំណាយពេលត្រឹម ១ ខែប៉ុណ្ណោះ appeared first on Kampuchea Thmey Daily.

យ៉ាងណាម៉ិញ ការអភិវឌ្ឍសហគមន៍នេសាទឱ្យប្រែក្លាយជាកន្លែងទេសចរណ៍ គឺដើម្បីកែប្រែជីវភាពរបស់ពលរដ្ឋក្នុងតំបន់ឱ្យកាន់តែប្រសើរ ស្របតាមគោលនយោបាយរបស់រាជរដ្ឋាភិបាលដែលបានដាក់ចេញ។

មានប្រសាសន៍ក្នុងពិធីបញ្ចុះបឋមសិលាបើកការដ្ឋានសាងសង់គម្រោងស្ថាបនាហេដ្ឋារចនាសម្ព័ន្ធសហគមន៍តំបន់ឆ្នេរ ដែលមាន សហគមន៍នេសាទព្រែកត្នោត, ត្រពាំងរពៅ, ត្រពាំងសង្កែ, កំពង់សាមគ្គី ក្នុងខេត្តកំពត និងសហគមន៍នេសាទ អូក្រសារខេត្តកែប នៅសហគមន៍នេសាទព្រែកត្នោត លោក សាយ សំអាល់ បានលើកឡើងថា ក្រោយពីប្រទេសកម្ពុជាងើបពីគំនរផេះផង់ ហើយទទួលបានសុខសន្តិភាពដែលយកមកដោយលំបាកពីសម្តេចតេជោ ហ៊ុន សែន អតីតនាយករដ្ឋមន្ត្រី កម្ពុជាត្រូវបានអភិវឌ្ឍន៍រីកចម្រើនលើគ្រប់វិស័យជាបន្តបន្ទាប់ ហើយការអភិវឌ្ឍនេះក៏បានប្រែក្លាយជីវភាពរស់នៅរបស់ប្រជាពលរដ្ឋឱ្យកាន់តែល្អប្រសើរជាបន្តបន្ទាប់។

លោក សាយ សំអាល់ បន្តថា ទន្ទឹមនឹងការអភិវឌ្ឍប្រមុខរាជរដ្ឋាភិបាលបច្ចុប្បន្ន គឺសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគិតគូរជានិច្ចចំពោះសុខទុក្ខ និងតម្រូវការរបស់ប្រជាពលរដ្ឋ ពិសេសបានជំរុញដល់ក្រុមការងាររាជរដ្ឋាភិបាលចុះមូលដ្ឋានគ្រប់បណ្តាខេត្ត-ក្រុង ត្រូវកែច្នៃអភិវឌ្ឍន៍តំបន់នានាក្នុងមូលដ្ឋានខ្លួនឱ្យមានភាពទាក់ទាញ ក្នុងន័យដើម្បីប្រជាពលរដ្ឋអាចទទួលផលពីតំបន់នោះ ហើយលើកកម្ពស់ជីវភាពរស់នៅរបស់ពួកគាត់។

លោកឧបនាយករដ្ឋមន្ដ្រីបានលើកឡើងថា ការអភិវឌ្ឍសហគមន៍នេសាទឱ្យប្រែក្លាយជាកន្លែងទេសចរណ៍ គឺមានគោលដៅមួយចំនួនដូចជា ចង់ឱ្យប្រជានេសាទមានជម្រើសច្រើនក្នុងការប្រកបមុខរបរ, មានចំណូលជាប្រចាំ, មានប្រាក់សន្សំ, កាត់បន្ថយបំណុលគ្រួសារ, មានផ្ទះសំបែងរស់នៅសមរម្យ, មានម្ហូបអាហារគ្រប់គ្រាន់ ពិសេសអាចបញ្ជូនកូនៗទៅសិក្សា។ ក្រោយពីការស្ថាបនាហេដ្ឋារចនាសម្ព័ន្ធសហគមន៍តំបន់ឆ្នេររួចរាល់ ប្រជានេសាទនឹងទទួលបានផលពីវិស័យទេសចរណ៍នេះ ស្របទៅតាមគោលនយោបាយរបស់រាជរដ្ឋាភិបាលដែលបានដាក់ចេញ ដោយផ្អែកលើចក្ខុវិស័យកម្ពុជាឆ្នាំ ២០៣០ និង ២០៥០ ដើម្បីប្រែក្លាយកម្ពុជាជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០ និងក្លាយជាប្រទេសមានចំណូលខ្ពស់នៅឆ្នាំ ២០៥០។

តាមការឱ្យដឹងពីលោក ម៉ៅ ធនិន អភិបាលខេត្តកំពត ខេត្តកំពតមានសហគមន៍នេសាទចំនួន៩ ក្នុងនោះមាន៖ សហគមន៍នេសាទត្រពាំងរពៅ, សហគមន៍នេសាទព្រែកត្នោត, សហគមន៍នេសាទចង្ហោន, សហគមន៍នេសាទកែបថ្មី, សហគមន៍នេសាទទទឹងថ្ងៃ, សហគមន៍នេសាទត្រពាំងសង្កែ, សហគមន៍នេសាទកំពង់សាមគ្គី, សហគមន៍នេសាទកោះគ្រឹះស្នា និងសហគមន៍នេសាទលក។

លោក ម៉ៅ ធនិន អភិបាលខេត្តកំពតបានបន្តថា ការបង្កើតឱ្យមានសហគមន៍នេសាទនេះ គឺជាគោលបំណងរបស់រាជរដ្ឋាភិបាលនៅក្នុងការផ្ទេរសិទ្ធិអំណាចដល់ប្រជាពលរដ្ឋ ដែលរស់នៅក្នុងតំបន់ឱ្យចូលរួមគ្រប់គ្រងធនធានជលផលនៅក្នុងមូលដ្ឋានរបស់ខ្លួនប្រកបដោយចិរភាព និងធ្វើយ៉ាងណាឱ្យប្រជាពលរដ្ឋបានយល់ច្បាស់ ហើយឈានទៅចាត់ទុកថាខ្លួនជាម្ចាស់ផ្ទាល់លើធនធានទាំងនោះ ដើម្បីទទួលបានផលប្រយោជន៍ពីធនធានទាំងនោះប្រកបដោយសមធម៌៕

អត្ថបទ៖ សឹង រ៉ាត់

The post លោកឧបនាយករដ្ឋមន្ត្រី សាយ សំអាល់៖ ក្រោមការអភិវឌ្ឍ​សហគមន៍នេសាទឱ្យក្លាយជាកន្លែងទេសចរណ៍ គឺដើម្បីកែប្រែជីវភាពពលរដ្ឋក្នុងតំបន់ឱ្យកាន់តែប្រសើរ appeared first on Kampuchea Thmey Daily.

ក្នុង​វីដេអូ​ខ្លីប​ដែល​បង្ហោះ​លើ​បណ្ដាញ​សង្គម​ក្រសួង​ដែន​ដី​កាលពី​ថ្ងៃទី​២១ ខែវិច្ឆិកា បាន​ដកស្រង់​ប្រសាសន៍​របស់​លោក សាយ សំអាល់ ដែល​ថ្លែង​ពី​សារៈសំខាន់​នៃ​ការ​រៀបចំ​ក្រុង​ឱ្យ​មាន​សណ្ឋាប់​ធ្នាប់​ដោយ​បាន​ភ្ជាប់​នឹង​ការ​លុប​បំបាត់​ក្រុម​ជ្រុល​និយម​តាមរយៈ​ការ​គិតគូរ​ពី​ពួកគេ​ ធ្វើ​យ៉ាងណា​ឱ្យ​មនុស្ស​គ្រប់​គ្នា​បាន​ទទួល​ប្រយោជន៍​ពី​ការ​រៀបចំ​ទី​ក្រុង​ទាំង​អស់​គ្នា។

​​លោក​ថា៖ «អ៊ីចឹង​ហើយ​បាន​យើង​ខ្ញុំ​ខំ​ដោះស្រាយ​អាគារ​ដែល​មិន​រៀបរយ​ ដែល​ទ្រុឌទ្រោម អ្នក​ដែល​រស់​ក្នុង​ហ្នឹង​គឺ​ជា​អ្នក​ដែល​គេ​ភ្លេច! តែ​គេ​ភ្លេច​ហើយ​គាត់​នឹង​មាន​គំនិត​ជ្រុល​និយម​ហើយ​។ ព្រោះ​អ្នក​នៅ​ហ្នឹង​ជៀស​មិន​ផុត​ពី​គ្រឿង​ញៀន​ បៀតបៀន ហិង្សា​ទេ! សង្គម​យើង​បើ​បន្សល់​ការ​រៀបចំ​ក្រុង​ឱ្យ​មាន​អ្នក​ជ្រុល​និយម​ ការ​កាន់​អំណាច​របស់យើង​នឹង​មាន​បញ្ហា។ យើង​មិន​មែន​កាន់​អំណាច​ដើម្បី​តែ​កាន់​អំណាច​ទេ​! យើង​កាន់​អំណាច​​​ដើម្បី​ឱ្យ​ស្រុក​យើង​ហ្នឹង​វា​រុងរឿង»។

បើ​តាម​លោក​ សាយ សំអាល់ ថានៅ​លើ​ពិភព​លោក​ការ​រៀបចំ​ទីក្រុង​បាន​ត្រឹមត្រូវ​មិន​ត្រឹម​កសាង​បាន​សោភ័ណភាព​សណ្ឋាប់​ធ្នាប់​ប៉ុណ្ណោះ​ទេ តែ​វា​ក៏​នឹង​ជួយ​កាត់​បន្ថយ​គ្រឿងញៀន ជំងឺ​ទឹកនោមផ្អែម ​អំពើ​ចោរកម្ម​​ផងដែរ។ ដូច្នេះ​ហើយ​ទើប​ក្រសួង​ខិតខំ​ដោះស្រាយ​អាគារ​មិន​រៀបរយ អាគារ​ទ្រុឌទ្រោម​​ឱ្យ​មាន​សណ្ឋាប់ធ្នាប់​ឡើង​វិញ។

អត្ថបទដោយ ហ៊ុន សិរីវឌ្ឍន៍ ​​

The post ឧប. សាយ សំអាល់៖ យើងមិនមែនកាន់អំណាចដើម្បីតែកាន់អំណាចទេ! យើង​កាន់​អំណាច​ដើម្បី​ស្រុក​យើង​រុងរឿង appeared first on Kampuchea Thmey Daily.

ដោយសារ​មើល​ឃើញ​ពី​កំណើន​ទេសចរ​មក​កម្សាន្ត​នៅ​កោះ​ឋានសួគ៌​នេះ រួម​ទាំង​តម្រូវការ​ប្រើប្រាស់​បច្ចេកវិទ្យា​ជា​ចាំបាច់​នោះ​ លោក សាយ សំអាល់ ជំរុញ​ឲ្យ​បង្កើន​ល្បឿន​អ៊ីនធឺណិត​នៅ​លើ​កោះ ដើម្បី​បង្កើន​ការ​ទំនាក់ទំនង​ឲ្យ​កាន់​តែ​ប្រសើរ​ថែម​ទៀត។

ថ្លែង​នៅ​ក្នុង​ពិធី​បញ្ចុះ​បឋម​សិលា​បើក​ការដ្ឋាន​សាងសង់​អគារ​សណ្ឋាគារ​កម្ពស់ ១១ ជាន់​នៅ​លើ​កោះ​ទេសចរណ៍​កោះរ៉ុង​កាល​ពី​ថ្ងៃ ២៧ តុលា​ឆ្នាំ ២០២៥ លោក សាយ សំអាល់ ឧបនាយករដ្ឋមន្រ្តី រដ្ឋមន្រ្តី​ក្រសួង​រៀបចំ​ដែនដី នគរូបនីយកម្ម និង​សំណង់​បាន​បញ្ជាក់​ថា ក្រោយ​លោក​បាន​ធ្វើ​ដំណើរ​មក​ទស្សនកិច្ច​នៅ​កោះរ៉ុង​ជាច្រើន​ដង​ លោក​មើល​ឃើញ​សក្ដានុពល​​នៃ​កោះ​ឋានសួគ៌​នេះ​​ ដែល​ថ្ងៃ​ខាង​មុខ​នឹង​ក្លាយ​ជា​គោលដៅ​ទេសចរ​កម្រិតខ្ពស់ ខណៈ​បច្ចុប្បន្ន​មាន​ការ​អភិវឌ្ឍ​ មាន​ការ​សាងសង់​ហេដ្ឋារចនាសម្ព័ន្ធ​គាំទ្រ​យ៉ាង​ច្រើន​សម្រាប់​បម្រើ​ដល់​វិស័យ​ទេសចរណ៍​។

«ឥឡូវ​នេះ​​យើង​ឃើញ​មាន​អ្នក​ធ្វើការ​ផ្នែក​បច្ចេកវិទ្យា​ធំៗ​មក​កោះរ៉ុង ក្រៅពី​មក​ដើម្បី​​សម្រាក​លំហែ ​អ្នក​ខ្លះ​​​​មានភ្ជាប់មកជាមួយកុំព្យូទ័រ​ដើម្បី​ធ្វើ​​កិច្ច​ការងារ​ផ្សេងៗ​ទៀត»។ លោក​រដ្ឋមន្ត្រី​​បន្ថែម។

ដើម្បី​គាំទ្រ​ដល់​ការ​អភិវឌ្ឍ​កោះរ៉ុង​ប្រែក្លាយ​គោលដៅ​ទេសចរណ៍​ប្រណិត​ លោក​សាយ សំអាល់ នឹង​ជួប​ជជែក​ពិភាក្សា​ជាមួយ​លោក ជា វ៉ាន់ដេត រដ្ឋមន្ត្រី​ក្រសួង​ប្រៃសណីយ៍ ​និង​ទូរគមនាគមន៍ ដើម្បី​ជំរុញ​បង្កើន​ល្បឿន​​​អ៊ីនធឺណិត​ឲ្យលឿនជាងមុន​ ឬ​ក៏​ត្រូវ​អូស​ខ្សែ​កាប​ក្រោម​បាត​សមុទ្រ​ ដើម្បី​សម្រួល​ដល់​ការ​បំពេញ​ការងារ​របស់​ទេសចរ​ធុរកិច្ច​បច្ចេកវិទ្យា​ធំៗ។

កោះរ៉ុង​បាន​ក្លាយ​ជា​គោលដៅ​ទេសចរ​សម្រាក​លំហែ​កម្រិត​ខ្ពស់​ ក្រោយ​​​​កោះ​ឋានសួគ៌​នេះ​​មាន​ការ​អភិវឌ្ឍ​ទៅ​ជា​គោលដៅ​ទេសចរណ៍​ដ៏ល្បីល្បាញ​មួយ​នៅ​ក្នុង​ខេត្ត​​តំបន់​ឆ្នេរ​របស់​​​ប្រទេស​កម្ពុជា។

កោះ​ឋានសួគ៌​នេះ​មាន​​ឆ្នេរខ្សាច់​ដ៏​ស្រស់​ស្អាត​ រួម​ទាំង​មាន​បរិយាកាស​​ធម្មជាតិ​ដ៏​ស្រស់​ត្រកាល​ទាក់ទាញ​ទេសចរ​មក​សម្រាក​លំហែ។

កាល​ពី​ពេលថ្មីៗ​នេះ អគារ​សណ្ឋាគារ​ដ៏​ប្រណីត​ដែល​មាន​កម្ពស់ ១១ ជាន់ បាន​បើក​ការដ្ឋាន​សាងសង់​នៅ​លើ​កោះរ៉ុង ដែល​គ្រោង​បញ្ចប់​ការ​សាងសង់​នៅ​ប្រមាណ ២ ឆ្នាំ​ទៀត​នេះ។

លោកស្រី IWONA MAGDA KMIECIK នាយិកា​ប្រតិបត្តិ​ក្រុមហ៊ុន​ M.B.I.S Development បាន​បញ្ជាក់​ថា គម្រោង​សាងសង់​អគារ​ពហុ​មុខងារ និង​សណ្ឋាគារ​ដ៏​ប្រណិត Port Yves Palace ​កម្ពស់ ១១ ជាន់​នេះ តាម​ផែនការ​គ្រោង​បញ្ចប់​ការ​សាងសង់​នៅ​អំឡុង​ឆ្នាំ ២០២៧​ ខាងមុខ។

លោកស្រី​បញ្ជាក់​ថា គម្រោង​វិនិយោគ​នេះ​មិនមែន​ជា​ចេតនា​បង្ហាញ​ពី​អំណាច​នោះ​ទេ ប៉ុន្តែ​ចង់​បង្ហាញ​អំពី​តុល្យភាព​និង​ភាព​សុខដុមរមនា​ចុះសម្រុង​ជាមួយ​ពិភពលោក​ជុំវិញ​ខ្លួន។ តាម​រយៈ​គម្រោង Port Yves Palace ក៏​នឹង​ទាក់ទាញ​ភ្ញៀវ​ទេសចរ​មក​កម្ពុជា​កាន់តែ​ច្រើន បង្កើត​អនុស្សាវរីយ៍​ល្អៗ​សម្រាប់​ភ្ញៀវទេសចរ​ជាតិ និង​អន្តរជាតិ។ បន្ថែម​ពី​នេះ គម្រោង​នេះ​នឹង​នាំ​មក​នូវ​ជីវិតថ្មី​ដល់​កោះ​នេះ រួម​ទាំង​កសាង​ស្ពាន​វប្បធម៌ ស្ពាន​យោគយល់ និង​គោរព​គ្នា​ទៅវិញទៅមក៕

The post លោក សាយ សំអាល់ ជំរុញ​ឲ្យ​បង្កើន​ល្បឿន​អ៊ីនធឺណិត​​បន្ថែម ខណៈ​កោះរ៉ុង​ក្លាយ​ជា​គោលដៅ​ទេសចរ​ដ៏​ល្បី​មួយ​របស់​ពិភពលោក appeared first on Kampuchea Thmey Daily.

លោក សាយ សំអាល់ ឧបនាយករដ្ឋមន្រ្តី រដ្ឋមន្ត្រី​ក្រសួង​រៀបចំ​ដែនដី នគរូបនីយកម្ម​ និង​សំណង់​បាន​ថ្លែង​ថា ​ប្រទេស​កម្ពុជា​មាន​កន្លែង​ដើរ​លេង​​ប្រមាណ ៣០០ កន្លែង។ ដោយ​ឡែក​កោះរ៉ុង​នៅ​ក្នុង​ខេត្តព្រះសីហនុ​មាន​លក្ខណៈ​ពិសេស​ ដែល​បានទាក់ទាញ​ទេសចរចម្រុះជាតិសាសន៍​មកពីជុំវិញពិភពលោក ដោយសារ​កោះ​នេះ​មាន​​ឆ្នេរខ្សាច់​ដ៏ស្រស់ស្អាត​ រួមទាំង​មាន​ប​រិយាកាស​​ធម្មជាតិ​ដ៏ស្រស់ត្រកាលទាក់ទាញ​ទេសចរ​មក​សម្រាក​លំហែ។

ថ្លែងនៅ​ក្នុង​ពិធីបញ្ចុះ​​បឋម​សីលា បើក​ការដ្ឋាន​សាងសង់​អគារ​សណ្ឋាគារ​កម្ពស់ ១១ ជាន់​នៅ​លើ​កោះ​ទេសចរណ៍​កោះរ៉ុង​កាល​ពី​ថ្ងៃ ២៨ តុលា​ឆ្នាំ ២០២៥ លោក សាយ សំអាល់ បាន​អះអាង​ថា ក្រោយ​ពេល​លោក​បាន​ធ្វើ​ដំណើរ​មក​ទស្សនកិច្ច​កោះរ៉ុង​ជាច្រើន​ដង​ លោក​មើល​ឃើញ​សក្ដានុពល​នៃ​កោះ​ឋានសួគ៌នេះ​​ ដែលថ្ងៃ​ខាង​មុខ​នឹង​ក្លាយជា​គោលដៅ​ទេសចរកម្រិតខ្ពស់ ខណៈ​បច្ចុប្បន្ន​មានការ​អភិវឌ្ឍ​ ​មាន​ការ​សាងសង់​ហេដ្ឋារចនាសម្ព័ន្ធ​គាំទ្រ​​យ៉ាងច្រើន​សម្រាប់​បម្រើ​ដល់​វិស័យ​ទេសចរណ៍​។

«ឥឡូវ​នេះ​​យើង​ឃើញ​មាន​អ្នក​ធ្វើការ​ផ្នែក​បច្ចេកវិទ្យា​ធំៗមក​កោះរ៉ុង ក្រៅពី​មកដើម្បី​​សម្រាក​លំហែ ​អ្នក​ខ្លះ​​​មកមាន​ទាំង​កាន់កុំព្យូទ័រ​ដើម្បី​មក​​​​ធ្វើ​កិច្ច​ការងារ​ផ្សេងៗ»។ លោក​រដ្ឋមន្រ្តី​​បន្ថែម។

ដើម្បី​គាំទ្រ​ដល់​ការ​អភិវឌ្ឍ​កោះរ៉ុង​ប្រែក្លាយ​គោលដៅ​ទេសចរណ៍​ប្រណិត​ លោក​សាយ សំអាល់ បាន​គូសបញ្ជាក់​​ថា លោក​នឹង​ជជែក​ពិភាក្សា​ជាមួយ​លោក ជា វ៉ាន់ដេត រដ្ឋមន្ត្រី​ក្រសួង​ប្រៃសណីយ៍ ​និង​ទូរគមនាគមន៍ ដើម្បី​ជំរុញ​​បង្កើន​ល្បឿនស់​អ៊ីនធឺណិត ឬត្រូវ​អូសខ្សែ​កាប​ក្រោមបាតសមុទ្រ​ដើម្បី​សម្រួល​ដល់​ការ​បំពេញ​ការងារ​របស់​ទេសចរ​ធុរកិច្ច​ធំៗ។

លោក​ស្រី IWONA MAGDA KMIECIK វិនិយោគិន​មួយ​រូបបាន​ប្រដូច​កោះរ៉ុង​ទៅ​នឹង​កោះ​ឋាន​សួគ៌ ដែល​ពិបាក​រក​នៅ​កន្លែង​ណា​ផ្សេង​អាច​​ប្រដូច​បាន។

លោក​ស្រី IWONA MAGDA KMIECIK ដែល​មាន​សញ្ជាតិ​ដើម​ប៉ូឡូញ និង​ទើប​​ទទួល​បាន​​សញ្ជាតិ​កម្ពុជា​ផង​នោះ​ កាលពីពេលថ្មីៗនេះបានបើក​ការដ្ឋាន​​សាងសង់​​​​អគារ​ពហុ​មុខងារ និង​សណ្ឋាគារ​ដ៏​ប្រណីត​នៅ​លើកោះរ៉ុង ដើម្បីផ្តល់​សេវាកម្ម​ស្នាក់នៅ​សម្រាប់​ទេសចរ​កម្រិត​ខ្ពស់។

លោក​ស្រី IWONA MAGDA KMIECIK ដែល​​ជាម្ចាស់​រមណីយដ្ឋាន Apsara Resort លើកោះរ៉ុង​​ផង​នោះ​​​បាន​បញ្ជាក់ថា អគារស្នាក់នៅ​ដ៏ប្រណិត​​​កម្ពស់ ១១ នេះ​​ នឹង​លេច​រូបរាង​នៅ​លើ​កោះ​ឋានសួគ៌​កោះរ៉ុងនៅ​ប៉ុន្មាន​ឆ្នាំ​ទៀត​នេះ​ ​ខណៈ​តាម​ផែនការ​គ្រោង​បញ្ចប់​ការ​សាង​សង់​នៅ​អំឡុង​ឆ្នាំ ២០២៧​៕

បន្ត​ចុចអាន៖ ទៅលេង​កោះរ៉ុង កោះរ៉ុង​សន្លឹម កុំភ្លេច​ឆែ​កមើល​កន្លែង​ស្នាក់នៅទាំងនេះ

បន្តចុចអាន៖ មក​កម្សាន្ត​កោះរ៉ុង ចាយ​ស្នាក់នៅ ​ហូប​ចុក ធ្វើ​ដំណើរ​ មួយ​យប់​យ៉ាង​ហោច​ណាស់​ម្នាក់ ១៥០ ដុល្លារ

The post កោះរ៉ុងកាន់តែអភិវឌ្ឍ អនាគតជាគោលដៅសម្រាកលំហែកាយអ្នកជំនួញបច្ចេកវិទ្យាធំៗ appeared first on Kampuchea Thmey Daily.

​លើក​ឡើង​ក្នុង​ពិធីបញ្ចុះ​​បឋម​សីលា បើក​ការដ្ឋាន​សាងសង់​អគារ​សណ្ឋាគារ​កម្ពស់ ១១ ជាន់​នៅ​លើ​កោះ​ទេសចរណ៍​កោះរ៉ុង​កាល​ពី​ថ្ងៃ ២៨ តុលា​ឆ្នាំ ២០២៥ លោក សាយ សំអាល់ បាន​បញ្ជាក់ថា ការ​រៀបចំ​ផែនការ​នេះគឺ​ដើម្បី​ពិនិត្យ​លទ្ធភាព​​ដំណាំ​ណា​អាច​ដាំដុះ​បាន ហើយ​ដំណាំ​ណា​ដែល​ចាំបាច់​បំផុត​ដែល​ត្រូវ​ដឹក​ពី​ដី​គោក។

«សូម្បី​តែ​ដូង​បើ​អាច​គួរ​​ដាំ​ឲ្យ​បាន​ច្រើន​នៅ​លើ​កោះ ដែល​ជា​តម្រូវការ​របស់​​ភ្ញៀវទេសចរ​មក​កម្សាន្ត​។ យើង​ត្រូវ​មាន​របស់​ហូប របស់​ប្រើប្រាស់​បរិបូណ៌ ដែល​ចាំបាច់​ត្រូវ​មាន​ការ​រៀបចំ​ឲ្យ​បាន​លម្អិត។ លោក សាយ សំអាល់ បញ្ជាក់​បន្ថែម។

ក្រៅ​ពី​ដាំដុះ​បន្លែ​បង្ការ​ដើម្បី​ផ្គត់ផ្គង់​ លោក​រដ្ឋមន្រ្តី​ក៏​ជំរុញ​ឲ្យមាន​​ការ​ចិញ្ចឹម​សត្វ​ថែមទៀត។ លោក សាយ សំអាល់​បានបញ្ជាក់ថា បើ​ត្រូវការ​ជំនួយ​ ក្រសួង​នឹងផ្តល់​ការ​​គាំទ្រ​តាម​លទ្ធភាព​និង​ភាព​ជាក់ស្តែង។

រដ្ឋមន្ត្រី​ក្រសួង​រៀបចំ​ដែនដី នគរូបនីយកម្ម និង​សំណង់ ​ក៏កត់សម្គាល់ពី​វប្បធម៌​ចេះជួយគ្នា​របស់​ពលរដ្ឋ​​នៅ​កោះរ៉ុង​។ បើតាមលោក​រដ្ឋមន្រ្តី​ អ្នក​មក​កម្សាន្ត​កោះ​នេះ​មិនមែន​មក​ផ្សង​ព្រេង​នោះ​ទេ គឺ​មក​ស្វែង​រក​ជីវិត​ថ្មី។

សក្ដានុពល​កោះរ៉ុង​មិន​ត្រឹម​តែ​ជា​គោលដៅ​ទេសចរ​រយៈ​ពេល​ខ្លី បច្ចុប្បន្ន​ក៏​ឃើញ​មាន​អ្នក​ជំនួយ​ធំៗ​ដែល​មក​ស្នាក់​នៅ​រយៈពេល​យូរ ហើយ​​មាន​ការ​វិនិយោគ​ផ្សេងៗ។

លោកសាយ សំអាល់ ណែនាំដល់​អាជ្ញាធរ​ក៏​គួរ​រៀបចំ​​ចាប់យក​សក្តានុពល​តាម​សហគមន៍​ដូចជា ការកែច្នៃ​ម្ហូប​អាហារ​​ផ្សេងៗ​​ ដើម្បី​ទាក់​ទាញ​​សម្រាប់ភ្ញៀវ​​មក​កម្សាន្ត​។

ពាក់ព័ន្ធ​ការ​ជំរុញ​ការ​ដាំដុះបន្លែនិង​ការផ្គត់ផ្គង់​ត្រី​​សាច់នៅលើ​កោះរ៉ុង​ លោក រាជ សុវណ្ណ អភិបាល​ក្រុង​កោះរ៉ុង​បាន​ឲ្យ​កម្ពុជា​ថ្មី​ថា បច្ចុប្បន្ន​នៅ​លើ​កោះ​មិន​ទាន់​មាន​ដាំដុះ​បន្លែ​ធំដុំ​ទេ គឺ​ពលរដ្ឋ​ដាំដុះ​បន្លែ​បន្តិចបន្តួច​ ដើម្បី​ផ្គត់ផ្គង់​ការ​រស់នៅ​ប្រចាំ​ថ្ងៃ រួម​ទាំង​បម្រើ​​មួយ​ផ្នែក​ដល់​វិស័យ​ទេសចរ។ លោក​បាន​លើក​ឡើង​មូលហេតុ​គឺ​មក​ពី​បញ្ហា​ដី​ធ្លី​មិន​ទាន់​ដោះស្រាយ​ដាច់ស្រេចពាក់ព័ន្ធ​ជាមួយ​ក្រុមហ៊ុន​វិនិយោគ​ ខណៈ​អាជ្ញាធរ​កំពុង​ជំរុញ​ការ​ដោះស្រាយ​បញ្ចប់​​ឲ្យបានឆាប់។

កោះរ៉ុង​បាន​ប្រែ​ក្លាយ​ជា​គោលដៅ​ទេសចរណ៍​ដ៏​ទាក់ទាញ និង​ត្រូវ​បាន​គេ​ប្រដូច​កោះ​ម៉ាល់ឌីវ ហើយ​ដែល​ទេសចរ​មក​លេង​ខេត្ត​ព្រះសីហនុ​ មិន​អាច​រំលង​មក​សម្រាក​លំហែ​​នៅ​​លើ​កោះ​ឋានសួគ៌​នេះ។

ក្រុង​កោះរ៉ុង​មានភូមិសាស្រ្ត​គ្រប​ដណ្តប់​លើ​កោះ​តូច​ធំ​ចំនួន ១៨ ​ហើយ​បច្ចុប្បន្ន​មាន​ពលរដ្ឋ​​ប្រមាណ ១ ៣៥១ គ្រួសាររស់នៅ​កកកុញ​លើកោះធំៗ​ចំនួនពីរ​គឺ​កោះរ៉ុង​ និង​កោះរ៉ុងសន្លឹម។

​ដោយឡែក​កោះរ៉ុង​ដែល​ជា​ទី​ប្រជុំជន​មាន​ពលរដ្ឋ​រស់នៅ​យ៉ាង​ច្រើន​កុះករ ហើយ​ជាគោលដៅ​ទេសចរណ៍​ចម្រុះជាតិសាសសន៍​មក​កម្សាន្ត ខណៈ​នៅ​ប៉ុន្មានឆ្នាំចុងក្រោយនេះ​មាន​ការ​អភិវឌ្ឍ​ហេដ្ឋារចនាសម្ព័ន្ធ​ ដោយ​មាន​សាងសង់​បណ្ដាញ​ផ្លូវ​បេតុង​ខ្វាត់ខ្វែង ខណៈ​ប្រព័ន្ធ​ភ្លើង​អគ្គិសនី​របស់​រដ្ឋ​ត្រូវ​បាន​តភ្ជាប់​អាច​ប្រើប្រាស់ ២៤/​២៤​ ម៉ោង។ នៅ​លើ​កោះ​មានសំណង់​​​រីសត ផ្ទះសំណាក់​តូច​ធំ​ ដែល​តម្លៃ​មាន​ចាប់​ពី ១៥ ដុល្លារ អាច​ដល់​រាប់​រយ​ ឬ​រាប់​ពាន់​ដុល្លារ​ក្នុង​មួយ​យប់។

វឌ្ឍនភាព​ថ្មី​មួយ​ទៀត ក្រុមហ៊ុន​ឯកជន​ក្នុង​ស្រុក​មួយ​ក៏​កំពុង​អភិវឌ្ឍ​អាកាសយានដ្ឋាន​នៅ​លើកោះ​ ដែល​នឹង​បង្កើត​បណ្តាញ​តភ្ជាប់​សម្រួល​ការ​ធ្វើដំណើរ​​​សម្រាប់​ភ្ញៀវទេសចរ​ពី​គ្រប់​គោលដៅ​មក​កម្សាន្ត​នៅ​​លើ​កោះរ៉ុង​កាន់​តែ​ងាយ​ស្រួល៕

The post ​លោក សាយ សំអាល់ ជំរុញ​រៀបចំ​ផែនការ​ដាំដុះ​បន្លែ​នៅនឹង​កន្លែង ​ផ្គត់ផ្គង់​ទេសចរ​លើ​កោះរ៉ុង​ appeared first on Kampuchea Thmey Daily.

ការ​លើក​ឡើង​នេះ ក្នុង​ពិធី​ជួប​សំណេះសំណាល​ជាមួយ​សិស្ស​ជ័យលាភី​ប្រឡង​សញ្ញាបត្រ​មធ្យម​សិក្សា​ទុតិយភូមិ ឆ្នាំ​សិក្សា ២០២៤-២០២៥ ទូទាំង​ខេត្ត​កំពត និង​ផ្ដល់​រង្វាន់​ជូន​សិស្ស​ប្រឡង​ជាប់​និទ្ទេស A ទាំង ៨៩ នាក់ ដែល​បាន​រៀបចំ​ធ្វើ​នៅ​បរិវេណ​ពហុ​កីឡដ្ឋាន​ខេត្ត​កំពត កាលពី​ថ្ងៃ​ទី ១៨ ខែ​តុលា ឆ្នាំ ២០២៥ ម្សិលមិញ។

នា​ឱកាស​នោះ លោក​ឧបនាយករដ្ឋមន្ត្រី សាយ សំអាល់ បាន​លើកទឹកចិត្ត​ដល់​យុវជន និង​សិស្សានុ​សិស្ស ពិសេស​អ្នក​រៀន​មិន​សូវ​ពូកែ សូម​កុំអាល​អស់​សង្ឃឹម ត្រូវ​បន្ត​ប្រឹងប្រែង​រៀន​សូត្រ​ជាប្រចាំ និង​អភិវឌ្ឍន៍​សមត្ថភាព​ជានិច្ច ទាំង​ជំនាញ​ក្នុង​សាលា ចំណេះដឹង បំណិត​ជីវិត​ក្នុង​សង្គម ដើម្បី​ចូលរួម​កសាង​ស្រុកទេស​ឲ្យ​រីកចម្រើន​គង់វង្ស​ត​ជំនាន់​រហូត​ទៅ។

លោក​បណ្ឌិត ប៉ែន ស៊ីម៉ន អ្នក​តំណាងរាស្ត្រ​មណ្ឌល​កំពត និង​ជា​ប្រធាន​ក្រុម​ការងារ​គណបក្ស​ប្រជាជន​ចុះ​មូលដ្ឋាន​ខេត្ត​កំពត លើក​ឡើង​ដែរ​ថា នៅ​ក្នុង​សម័យកាល​ណា​ក៏ដោយ ការ​សិក្សា​អប់រំ បង្កើត​ធនធាន​មនុស្ស ជា​ការងារ​សំខាន់​បំផុត​សម្រាប់​ប្រទេស​ជាតិ​មួយ ព្រោះ​មាន​តែ​ចំណេះវិជ្ជា​ទេ ដែល​អាច​ជួយ​ស្រោចស្រង់​កសាង​ប្រទេស​ឲ្យ​គង់វង្ស​រុងរឿង​បាន។

លោក ម៉ៅ ធនិន អភិបាល​ខេត្ត​កំពត បញ្ជាក់​ថា សម្រាប់​លទ្ធផល នៃ​ការ​ប្រឡង​សញ្ញាបត្រ​មធ្យមសិក្សា​ទុតិយភូមិ សម័យ​ប្រឡង ២៨ សីហា ឆ្នាំ ២០២៥ ខេត្ត​កំពត មាន​សិស្ស​ប្រឡង​ជាប់​សរុប ចំនួន ៤.៦៩៨ នាក់ ស្រី ២.៧២៥ នាក់ ស្នើ ៩០.៨៥%។ ក្នុង​នោះ សិស្ស​ទទួល​បាន​និទ្ទេស A មាន​ចំនួន ៨៩ នាក់ កើន​ឡើង​ជាង​ឆ្នាំមុន ១១ នាក់ (​និទ្ទេស A ទទួល​បាន​ម៉ូតូ ១ គ្រឿង ថវិកា ៤០ ម៉ឺន​រៀល និង​ឱកាស​ទទួល​បាន​កញ្ចប់​អាហារូបករណ៍​នៅ​ថ្នាក់​ឧត្ដមសិក្សា)៕

អត្ថបទ ៖ សឹង រ៉ាត់

The post លោក សាយ សំអាល់ ៖ «ការងារអប់រំជាកិច្ចការងារមួយសំខាន់មិនអាចខ្វះបាន ហើយអនាគតកម្ពុជាត្រូវពឹងលើវិស័យអប់រំនេះ» appeared first on Kampuchea Thmey Daily.

លោក សាយ សំអាល់​ រដ្ឋមន្រ្តី​ក្រសួង​រៀបចំ​ដែនដី នគរូបនីយកម្ម​និង​សំណង់ បាន​ថ្លែង​យ៉ាង​ដូច្នេះ​ថា «ខ្ញុំ​អាច​ជម្រាប​ជូន​ពុក​ម៉ែ​ថា ស្រុក​ខ្មែរ​នេះ​កាល​ពី​ទំនាស់​ដីធ្លី​ច្រើន​បំផុត អាច​មាន​ល្បាក់ ២ ម៉ឺន​ករណី​នៅ​ទូទាំង​ប្រទេស។ ឥលូវ​នេះ​ការ​ដោះស្រាយ​បន្តបន្ទាប់​នៅ​សល់​ប្រហែល​នៅ​ខ្ទង់​ ២០០ ករណី​ ហើយ​ត្រឹម​ខែ ១២ នឹង​ដោះស្រាយ​សឹង​បញ្ចប់​ទាំង​អស់​នៅ​ទូទាំង​ប្រទេស»។

ពាក់ព័ន្ធ​ដំណើរការ​ចុះ​បញ្ជី​ដីធ្លី​ទូទាំង​ប្រទេស លោក​រដ្ឋមន្ត្រី​ សាយ សំអាល់ បាន​បញ្ជាក់​ថា អាជ្ញាធរ​កំពុង​បន្ត​នីតិវិធី​ក្នុង​ការ​ចុះបញ្ជី​ដីធ្លី​ជូន​ពលរដ្ឋ ជូន​វត្ត សាលារៀន តំបន់​ការពារ​ធម្មជាតិ​របស់​ក្រសួង​បរិស្ថាន ដី​កសិកម្ម​របស់​ក្រសួង​កសិកម្ម ដី​បឹង​របស់​ក្រសួង​ធនធាន​ទឹក ដែល​នឹង​បញ្ចប់ឆាប់ៗ​​ត្រឹម​ចុង​ឆ្នាំ ២០២៥។

យ៉ាងណាមិញ បើ​តាម​លោក​រដ្ឋមន្ត្រី ការបញ្ចប់​ការងារ​​នេះ​ទាំង​ស្រុង អាច​ត្រូវ​ការ​ពេល​វេលា​តិច​តួច​បន្ថែម​ទៀត​ដើម្បី​សម្អាត​កែ​តម្រូវ​កិច្ចការ​មួយ​ចំនួន​ដែល​​នៅ​សេសសល់​។ ក្នុង​នោះ​លោក​រដ្ឋមន្ត្រី​បាន​លើក​ឡើង​ករណី​ពលរដ្ឋ​ដែល​មិន​បាន​ចុះ​បញ្ជី​ដីធ្លី​ទាន់ពេល​វេលា​ដោយសារ​ជាប់​រវល់​បំពេញ​ការងារ​ផ្សេងៗ ក៏​នៅ​មាន​សិទ្ធិ​និង​ឱកាស​អាច​ស្នើ​នីតិវិធី​ដើម្បី​ចុះ​បញ្ជី​ដី​ធ្លី​ស្រប​​តាមគោលដៅ​របស់​រដ្ឋាភិបាល​​​ក្នុងការ​ចុះបញ្ជី​ដីធ្លី​ឲ្យ​បាន​គ្រប់​គ្នា​បញ្ចប់​ទូទាំង​ប្រទេស។

លោក​រដ្ឋមន្ត្រី​បាន​បន្ត​ថា ដំណើរការ​ចុះ​បញ្ជី​តាមផែនការ​ជំរុញ​របស់​រដ្ឋាភិបាល អាជ្ញាធរ​បាន​ប្រើប្រាស់​កម្លាំង​សរុប​ដែល​រួម​មាន​មន្ត្រី​ជំនាញ​ប្រមាណ​ ៥ ពាន់​នាក់​រួម​ទាំង​អ្នក​គាំទ្រ​ប្រហែល ៥ ពាន់​នាក់​ទៀត។

ដោយឡែក​ពាក់ព័ន្ធ​ពលរដ្ឋ​រស់នៅ​តំបន់​សៀមរាប​អង្គរ​ ដែល​ជា​តំបន់​បេតិកភណ្ឌសំបូរ​ដោយប្រាសាទបុរាណ​ ការ​ប្រើប្រាស់​ដី​ធ្លី​នៅ​ទីនោះ​ត្រូវ​អនុវត្ត​លក្ខខណ្ឌ​ផ្សេង​គ្នា​ ហើយ​អាជ្ញាធរ​កំពុង​សម្របសម្រួល​ជាមួយ​​ពលរដ្ឋ​ទាំង ១១៤ ភូមិ​ ដែល​រស់នៅ​តំបន់​អង្គរ ធ្វើ​យ៉ាងណា​អាច​ឲ្យ​ពលរដ្ឋ​មាន​កម្មសិទ្ធិ​ដីធ្លី​​រស់នៅ​បាន​ស្រួល​​ទន្ទឹម​អាច​ការពារ​មរតក​ដូន​តា​ផង​ដែរ៕

The post រដ្ឋមន្រ្តី​ក្រសួង​ដែនដី ​រំពឹង​ទំនាស់​ដីធ្លី​នឹង​កាត់​បន្ថយ​អស់​ត្រឹម​ខែ​ឆ្នូ ឆ្នាំ ២០២៥ appeared first on Kampuchea Thmey Daily.