លោក ស៊ិន ចាន់សេរីវុត្ថា Archives - Kampuchea Thmey Daily

SSCA៖ តម្លៃសំបុត្រយន្តហោះនឹងកើនឡើង បើតម្លៃប្រេងនៅបន្តអូសបន្លាយ

Din Thary — Fri, 13 Mar 2026 09:51:37 +0000

ជុំការកើនឡើងនៃតម្លៃប្រេងនាពេលបច្ចុប្បន្ន លោក ស៊ិន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលកម្ពុជា (SSCA) បានពន្យល់ថា តម្លៃសំបុត្រយន្តហោះអាចនឹងមានការប្រែប្រួលខុសពីតម្លៃដើម ប្រសិនបើថ្លៃប្រេងនៅបន្តអូសបន្លាយពេលយូជាងនេះ។

ក្នុងបទសម្ភាសជាមួយ«កម្ពុជាថ្មី» ដោយឆ្លើយតបទៅនឹងសំណួរថាតើ ប្រសិនបើសង្គ្រាមមជ្ឈិមបូព៌ាបន្តអូសបន្លាយ តម្លៃប្រេងក៏កំពុងកើនឡើង តើតម្លៃសំបុត្រយន្តហោះនឹងប្រែប្រួល ឬយ៉ាងណា? លោក ស៊ិន ចាន់សិរីវុត្ថា បានថ្លែងថា ជាកត្តាសត្យានុម័តជាទូទៅនៅពេលដែលមានផលវិបត្តិអ្វីមួយទាក់ទងនឹងប្រេង គឺមិនមែណប៉ះពាល់ត្រឹមតែវិស័យដឹកជញ្ជូនតាមផ្លូវអាកាសទេ តែវាប៉ះពាល់ដល់វិស័យទាំងអស់។

លោកបានពន្យល់ថា «ជាទូទៅក្រុមហ៊ុនអាកាសចរណ៍ធំៗ ដែលមានយុទ្ធសាស្រ្តល្អ តែងតែទិញប្រេងស្តុកទុក យ៉ាងហោចណាស់ពី ២ សប្តាហ៍ ទៅ ១ខែ ស្តុកទុកនៅក្នុងតម្លៃមួយ ព្រោះគាត់ធ្វើការគណនាតម្លៃសំបុត្រយន្តហោះអាស្រ័យទៅតាមតម្លៃប្រេង ចឹងនៅពេលគាត់ដឹងតម្លៃប្រេងមុន និងទិញស្តុកទុកមុន តម្លៃសំបុត្រយន្តហោះថោក ឬថ្លៃ ទៅតាមតម្លៃប្រេងនេះអែង»។

«ប៉ុន្តែប្រសិនបើតម្លៃប្រេងកើនឡើងនៅបន្តអូសបន្លាយពេលយូ បញ្ហាកាន់តែវែង ដូច្នេះច្បាស់ណាថា នឹងប៉ះពាល់ដល់នូវប្រេងស្តុកចាស់ដែលគាត់បានទិញស្តុកទុក ចឹងហើយគាត់ត្រូវការទិញប្រេងស្តុកថ្មី ដូច្នេះប្រេងស្តុកថ្មី តម្លៃសំបុត្រយន្តហោះថ្មី»។ លោក ស៊ិន ចាន់ បន្ថែមបែបនេះ។

ជាមួយគ្នានេះ លោកបានអះអាងថា សង្គ្រាមមជ្ឈិមបូព៌ានេះមិនមែនត្រឹមតែប៉ះពាល់ដល់វិស័យដឹកជញ្ជូនតាមផ្លូវអាកាសទេ គឺប៉ះពាល់ដល់វិស័យដឹកជញ្ជូនទូទៅ ព្រោះយើងបានដឹងហើយថាច្រកសមុទ្រ Hormoz គឺមិនអាចដឹកជញ្ជូនប្រេងបានទេ ដោយកប៉ាល់ទាំងអស់ត្រូវបានកកស្ទះនៅទីនេះទាំងអស់ ដូច្នេះវាធ្វើឱ្យមានហានិភ័យខ្ពស់ ដោយយើងកំពុងបារម្ភពីការផ្គត់ផ្គង់ប្រេង ដែលធ្វើឱ្យតម្លៃប្រេងឡើងថ្លៃ។

អ្នកនាំពាក្យរូបនេះ បានបន្ថែមទៀតថា កាលណាតម្លៃប្រេងឡើងថ្លៃវានឹងធ្វើឱ្យប៉ះពាល់ទៅដល់ជីវភាពប្រជាជនប្រចាំថ្ងៃដែរ ព្រោះយើងការប្រើប្រាស់សព្វថ្ងៃយើងដឹងហើយថាការនាំចូលប្រេងសាំង គឺច្រើនបំផុតពីការនាំចូលសុទ្ធសាត ហើយតម្លៃ គឺជាតម្លៃអន្តរជាតិ ដូច្នេះនៅពេលតម្លៃអន្តរជាតិ អ្វីៗក៏ត្រូវកើនឡើងដូចគ្នាដែរ៕

The post SSCA៖ តម្លៃសំបុត្រយន្តហោះនឹងកើនឡើង បើតម្លៃប្រេងនៅបន្តអូសបន្លាយ appeared first on Kampuchea Thmey Daily.

លោក ស៊ីន ចាន់សិរីវុត្ថា៖ ប្រសិនបើសង្គ្រាមនៅមជ្ឈិមបូព៌ា បន្តអូសបន្លាយ តម្លៃប្រេងនឹងកើនឡើង ហើយរាលដាលដល់គ្រប់វិស័យ

Din Thary — Thu, 12 Mar 2026 04:19:00 +0000

លោក ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលកម្ពុជា បានអះអាងថា បើសង្គ្រាមនៅតំបន់មជ្ឈិមបូព៌ាបន្តអូសបន្លាយ មិនមែនត្រឹមតែធ្វើឱ្យប៉ះពាល់ដល់វិស័យអាកាសចរណ៍ឡើយ តែនឹងធ្វើឱ្យប៉ះពាល់យ៉ាងធ្ងន់ធ្ងរដល់តម្លៃប្រេងឥន្ទនៈ ហើយរាលដាលដល់គ្រប់វិស័យ។

លោក ស៊ីន ចាន់សិរីវុត្ថា បានលើកឡើងថា បញ្ហាសង្គ្រាម បានជះឥទ្ធិពលទៅលើវិស័យផ្សេងៗជាច្រើន ដូច្នេះប្រសិនសង្គ្រាមនៅមជ្ឈិមបូព៌ាបន្តអូសបន្លាយ នោះអ្វីដែលប៉ះពាល់ធ្ងន់ធ្ងរមិនមែនត្រឹមតែវិស័យអាកាសចរណ៍ឡើយ គឺប៉ះពាល់ខ្លាំងដល់តម្លៃប្រេងឥន្ទនៈ នៅពេលប្រេងកើនឡើងហើយនឹងធ្វើឱ្យប៉ះពាល់ដល់គ្រប់វិស័យទំាងអស់។

លោកក៏បានបញ្ជាក់ថា៖ «ភ្ញៀវទេសចរដែលចូលមកប្រទេសកម្ពុជា គឺមិនមែនមកតែពីតំបន់មជ្ឈិមបូព៌ាទាំងស្រុងនោះទេ មជ្ឈិមបូព៌ាជាផ្នែកមួយហើយ ប៉ុន្តែអ្វីដែលប៉ះពាល់ដល់ការដឹកជញ្ជូនរបស់កម្ពុជា គឺដោយសារភ្ញៀវទាំងអស់នោះជា Hub នៃការតភ្ជាប់។ ប៉ុន្តែ Hub នៃការតភ្ជាប់គឺអាចផ្លាស់ប្តូរទិសនៃការហោះហើរទៅប្រទេសផ្សេងទៀត គ្រាន់តែរំខានដល់ការធ្វើដំណើរយូជាង ឆ្ងាយជាង ដោយអ្វីៗនឹងជំនួសមកវិញដោយទីតាំងកន្លែងផ្សេង»។

អាកាសយានដ្ឋាននៅឈូងសមុទ្រធំៗទាំង ៧ ទាំងដែលរងផលប៉ះពាល់ពីសង្គ្រាមនៅតំបន់មជ្ឈិមបូព៌ា រួមមាន នៅ ឌូបៃ (DXB), ដូហា (DOH), អាប៊ូ ដាប៊ី (AUH), Sharjah (SHJ), គុយវ៉ែត (KWI), បារ៉ែន (BAH) និង Dubai World Central (DWC)។

យោងតាមអាកាសចរស៊ីវិល ផលប៉ះពាល់ជាអវិជ្ជមានបឋម សម្រាប់កម្ពុជា អាចមានអ្នកដំណើរប្រមាណ ១២,៩៦០ នាក់ ក្នុងមួយសប្ដាហ៍ និង ៥១,៨៤០ នាក់ ក្នុងមួយខែ៕

ដោយ៖ ឌិន ថារី

The post លោក ស៊ីន ចាន់សិរីវុត្ថា៖ ប្រសិនបើសង្គ្រាមនៅមជ្ឈិមបូព៌ា បន្តអូសបន្លាយ តម្លៃប្រេងនឹងកើនឡើង ហើយរាលដាលដល់គ្រប់វិស័យ appeared first on Kampuchea Thmey Daily.

ត្រឹម ៤ ថ្ងៃ ការប៉ះទង្គិចគ្នានៅមជ្ឈឹមបូព៌ាធ្វើឱ្យមានការលុបជើងហោះហើរពាក់ព័ន្ធជាង ៩ ពាន់ជើង

Din Thary — Wed, 04 Mar 2026 07:27:42 +0000

លោក ស៊ិន ចាន់សិរីវុត្ថា រដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរស៊ីវិលកម្ពុជា បានឱ្យដឹងថា ការប៉ះទង្គិចគ្នានៅមជ្ឈឹមបូព៌ា (តំបន់ឈូងសមុទ្រ) រយៈពេល ៤ ថ្ងៃ ( គិតចាប់ពីថ្ងៃ ២៨ កុម្ភះ ដល់ត្រឹមថ្ងៃ ៣ មិនា ២០២៦) បានធ្វើឱ្យមានការលុបជើងហោះហើរពាក់ព័ន្ធប្រមាណជាង ៩,៥០០ ជើងដែលឆ្លងកាត់នៅក្នុងតំបន់មជ្ឈឹមបូព៏ា។

ប្រាប់«កម្ពុជាថ្មី» នៅរសៀលថ្ងៃទី០៤ ខែមិនា ឆ្នាំ២០២៦ លោក ស៊ិន ចាន់សិរីវុត្ថា បានពន្យល់ថា ការលុបចោលជើងហោះហើរទាំងនេះត្រូវបានបង្កឡើងដោយការបិទដែនអាកាសក្នុងតំបន់ បន្ទាប់ពីការកើនឡើងនៃជម្លោះអ៊ីរ៉ង់ឆ្នាំ២០២៦ រួមទាំងការវាយប្រហារដែលប៉ះពាល់ដល់រដ្ឋឈូងសមុទ្រ និងអាកាសយានដ្ឋាន។

ទន្ទឹមនេះអ្នកនាំពាក្យអាកាសចរណ៍រូបនេះ បានបន្ថែមថា ការលុបចោលជើងហោះហើរទាំងនេះ ពាក់ព័ន្ធទៅនឹងអាកាសយានដ្ឋាននៅឈូងសមុទ្រធំៗទាំង ៧ រួមមាន នៅ ឌូបៃ (DXB), ដូហា (DOH), អាប៊ូ ដាប៊ី (AUH), Sharjah (SHJ), គុយវ៉ែត (KWI), បារ៉ែន (BAH) និងDubai World Central (DWC)។

ការប៉ាន់ស្មាននៃការលុបចោលជើងហោះហើរ ទាំង ៤ ថ្ងៃនេះ គឺនៅថ្ងៃទី២៨ ខែកុម្ភៈ អាចមានការលុបចោលជើងហោះហើរប្រមាណជាង ១,៤០០ ជើង នៅថ្ងៃទី១ ខែមីនា មានជាង ៣,៤០០ ជើង នៅថ្ងៃទី២ ខែមីនា មានជាង ៣,៤០០ ជើង នៅថ្ងៃទី៣ ខែមីនា មានជាង ១,៣០០ ជើង សរុបជើងហោះហើរដែលបានលុបចោលទាំងអស់នេះចំនួនជាង ៩,៥០០ ជើង។

ជាមួយគ្នានេះ លោក ស៊ិន ចាន់ ក៏បានបញ្ជាក់ដែរថា៖«ជើងហោះហើរទាំងជាង ៩,៥០០ ជើងនេះ គឺមិនមែនជាការលុបចោលទូទាំងពិភពលោកទេ គឺសំដៅជាពិសេសតែទៅលើការលុបចោលនៅទូទាំងអាកាសយានដ្ឋានសំខាន់ៗចំនួន ៧ នៅឈូងសមុទ្រដែលបានរៀបរាប់ខាងលើ»៕

ដោយ៖ ឌិន ថារី

The post ត្រឹម ៤ ថ្ងៃ ការប៉ះទង្គិចគ្នានៅមជ្ឈឹមបូព៌ាធ្វើឱ្យមានការលុបជើងហោះហើរពាក់ព័ន្ធជាង ៩ ពាន់ជើង appeared first on Kampuchea Thmey Daily.

សង្គ្រាមនៅមជ្ឈិមបូព៌ា ប៉ះពាល់អ្នកដំណើរចេញ-ចូល កម្ពុជាជាង ១ ម៉ឺននាក់ មួយសប្ដាហ៍

Din Thary — Tue, 03 Mar 2026 03:20:24 +0000

យ៉ាងហោចណាស់មានអ្នកដំណើរចំនួន ១២ ៩៦០ នាក់ រងការប៉ះពាល់ក្នុងការធ្វើដំណើរតាមផ្លូវអាកាសចេញ-ចូលកម្ពុជា នៅក្នុងមួយសប្ដាហ៍ ដោយសារអ៊ីស្រាអែល និងអាមេរិក បើកការវាយប្រហារទៅលើប្រទេសអ៊ីរ៉ង់កាលពីថ្ងៃសៅរ៍សប្ដាហ៍មុន។

លោក ស៊ិន ចាន់សិរីវុត្ថា រដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរស៊ីវិលកម្ពុជា បានគូសបញ្ជាក់ឱ្យដឹងថា ការវិវត្តន៍នៃជម្លោះនៅតំបន់មជ្ឈិមបូព៌ា បានបង្កឱ្យសេវាកម្មការតភ្ជាប់ជើងហោះហើរមួយចំនួនដែលភ្ជាប់តាមមជ្ឈមណ្ឌលដឹកជញ្ជូនជាក់លាក់នៅទីក្រុង ដូហា ឌូបៃ និងអាប៊ូដាប៊ី ជួបប្រទះការផ្អាក (ផ្នែកខ្លះ) ឬមានការកែសម្រួលកាលវិភាគហោះហើជាបណ្តោះអាសន្ន។

ថ្លែងប្រាប់ «កម្ពុជាថ្មី» នៅថ្ងៃទី០៣ ខែមិនា ឆ្នាំ២០២៦ លោក ស៊ិន ចាន់សិរីវុត្ថា បានឱ្យដឹងថា ការកើនឡើងនៃសកម្មភាពជម្លោះយោធាថ្មីៗ នៅតំបន់មជ្ឈិមបូព៌ា បានធ្វើឱ្យស្ថាភាពនៃការតភ្ជាប់ជើងហោះហើរបច្ចុប្បន្នរវាងកម្ពុជា ជាមួយតំបន់មជ្ឈិមបូព៌ា មានការប្រែប្រួល ដោយក្នុងនោះមានការបិទដែនអាកាសជាបណ្តោះអាសន្ន, ការរំខានប្រតិបត្តិការនៅអាកាសយានដ្ឋានមជ្ឈមណ្ឌលសំខាន់ៗក្នុងតំបន់ឈូងសមុទ្រ (Gulf) ការប្តូរផ្លូវហោះហើរនៅលើច្រកអាកាសចរណ៍រវាងអឺរ៉ុប-អាស៊ី និងការកើនឡើងនៃចំណាយប្រេងឥន្ធនៈ និងថ្លៃធានារ៉ាប់រងហានិភ័យសង្គ្រាម ជាដើម។

ក្នុងនោះ ផលប៉ះពាល់រវាងការតភ្ជាប់ជើងហោះហើរដោយផ្ទាល់ ឬ ដោយប្រយោលទៅកាន់កម្ពុជា តាមរយៈមជ្ឈមណ្ឌលអាកាសចរណ៍ក្នុងតំបន់ឈូងសមុទ្រ ចំនួន ៣ គឺ Qatar Airways-QR (តារយៈ Hub-មជ្ឈមណ្ឌលទីក្រុងដូហា), Emirates Airlines-EK (តារយៈ Hub-មជ្ឈមណ្ឌលទីក្រុងឌូបៃ) និង Etihad Airways-EY (តារយៈ Hub-មជ្ឈមណ្ឌលទីក្រុងអាប៊ូដាប៊ី)។

ពាក់ព័ន្ធទៅនឹងជើងហោះហើរទាំង ៣ នេះ បច្ចុប្បន្ន កម្ពុជាប្រតិបត្តិការហោះហើរដែលភ្ជាប់ជាមួយតំបន់មជ្ឈិមបូព៌ាចំនួន ៥២ ជើង/សប្ដាហ៍ (ទ្វេរទិស) ដោយចំនួនចលនាជើងហោះហើរ ៤៦ ជើង/សប្តាហ៍ (ទ្វេរទិស) នៅអាកាសយានដ្ឋានអន្តរជាតិតេជោ (រាប់បញ្ជួលជើងហោះហើរដឹកជញ្ជូនទំនិញតាមផ្លូវអាកាស ៨ ជើង/សប្តាហ៍ (ទ្វេរទិស)) និង ៦ ជើង/សប្តាហ៍ (ទ្វេរទិស) នៅអាកាសយានដ្ឋានអន្តរជាតិសៀមរាបអង្គរ។ មជ្ឈមណ្ឌលអាកាសចរណ៍(Hubs)ទាំងនេះ បម្រើជាច្រកផ្លាស់ប្តូរជើងហោះហើរ សម្រាប់ចរាចរណ៍អ្នកដំណើរចូល និងចេញពីកម្ពុជា។

តាមការប៉ាន់ស្មានផលប៉ះពាល់ជាអវិជ្ជមានបឋម អាចមានអ្នកដំណើរ ប្រហែល ១២,៩៦០ នាក់ ក្នុងមួយសប្ដាហ៍ និងប្រហែល ៥១,៨៤០ នាក់ ក្នុងមួយខែ។

លោក ស៊ិន ចាន់ បានពន្យល់ថា មិនមែនបានន័យថា ភ្ញៀវទាំងអស់មិនអាចធ្វើដំណើរបាននោះទេ ប៉ុន្តែគ្រាន់តែប៉ះពាល់ទៅដល់ការធ្វើដំណើររបស់ពួកគេ ដោយភ្ញៀវទេសចរទាំងអស់នោះអាចធ្វើដំណើរទៅតាមផ្លូវផ្សេងៗមកកាន់ប្រទេស កម្ពុជា។ ចំពោះផលប៉ះពាល់នេះ មិនមែនសម្រាប់តែប្រទេសកម្ពុជាមួយនោះទេ គឺប៉ះពាល់ជាសកល។

ទោះបីជាមានផលរំខានបែបនេះក្តី អ្នកនាំពាក្យអាកាសចរណ៍ស៊ីវិលរូបនេះ បានអះអាងថា ប្រទេសកម្ពុជានៅតែមានសុវត្ថិភាព មានដំណើរការជាប្រក្រតី និងមិនរងផលប៉ះពាល់ពីទស្សនៈសន្តិសុខ ឬការគ្រប់គ្រងដែនអាកាសឡើយ។ អាកាសយានដ្ឋាន និងដែនអាកាសជាតិរបស់យើងនៅតែបន្តដំណើរការតាមស្ថានភាពធម្មតា។

ប៉ុន្តែ ដោយសារការវិវត្តន៍នៃជម្លោះនៅតំបន់មជ្ឈិមបូព៌ា និងការអភិវឌ្ឍពាក់ព័ន្ធនឹងដែនអាកាសក្នុងតំបន់នេះ សេវាកម្មមួយចំនួនដែលភ្ជាប់តាមមជ្ឈមណ្ឌលដឹកជញ្ជូនជាក់លាក់នៅទីក្រុង ដូហា ឌូបៃ និងអាប៊ូដាប៊ី បានជួបប្រទះការផ្អាក (ផ្នែកខ្លះ) ឬមានការកែសម្រួលកាលវិភាគហោះហើជាបណ្តោះអាសន្ន។

សេចក្តីសម្រេចប្រតិបត្តិការទាំងនេះ គឺធ្វើឡើងដោយក្រុមហ៊ុនអាកាសចរណ៍ ដើម្បីឆ្លើយតបនឹងស្ថានភាពខាងក្រៅតំបន់ ហើយមិនពាក់ព័ន្ធនឹងបញ្ហាណាមួយនៅក្នុងព្រះរាជាណាចក្រកម្ពុជាទេ។

អាកាសចរស៊ីវិលកំពុងសម្របសម្រួលយ៉ាងជិតស្និទ្ធ និងសហការបន្តជាមួយក្រុមហ៊ុនអាកាសចរណ៍ដែលពាក់ព័ន្ធ និងអាជ្ញាធរអាកាសយានដ្ឋាន ដើម្បីតាមដានការវិវត្តន៍ស្ថានការណ៍ និងសម្របសម្រួលក្នុងការរៀបចំការធ្វើដំណើរជាក់ស្តែង នៅក្នុងករណីចាំបាច់។

«អ្នកដំណើរត្រូវបានណែនាំឱ្យពិនិត្យកាលវិភាគថ្មីដោយផ្ទាល់ជាមួយក្រុមហ៊ុនអាកាសចរណ៍របស់ខ្លួនផងដែរ។ ប្រព័ន្ធអាកាសចរណ៍របស់កម្ពុជា នៅតែមានស្ថិរភាព និងសុវត្ថិភាព។ វិធានការបច្ចុប្បន្នមានលក្ខណៈបង្ការ និងបណ្តាលមកពីកត្តាខាងក្រៅ»។ លោក ស៊ិន ចាន់បន្ថែមបែបនេះ៕

ដោយ៖ ឌិន ថារី

The post សង្គ្រាមនៅមជ្ឈិមបូព៌ា ប៉ះពាល់អ្នកដំណើរចេញ-ចូល កម្ពុជាជាង ១ ម៉ឺននាក់ មួយសប្ដាហ៍ appeared first on Kampuchea Thmey Daily.

អាកាសចរស៊ីវិល៖ ការដឹកជញ្ជូនទំនិញតាមផ្លូវអាកាសពីបាងកក-ភ្នំពេញ មានការកើនឡើង

Din Thary — Wed, 06 Aug 2025 08:10:00 +0000

លោក ស៊ិន ចាន់សិរីវុត្ថា រដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរស៊ីវិល បានឱ្យដឹងថា ស្ថានភាពការហោះហើរភ្នំពេញ-បាងកក គឺមិនមានអ្វីផ្លាស់ប្ដូរនោះទេ ប៉ុន្តែចំពោះការដឹកជញ្ជូនទំនិញមួយចំនួនតាមយន្តហោះពីបាងកក មកភ្នំពេញបែរជាមានការកើនឡើងទៅវិញ។

នៅរសៀលថ្ងៃទី០៨ ខែសីហា នេះ លោក ស៊ិន ចាន់សិរីវុត្ថា បានមានប្រសាសន៍ថា៖«នៅរយៈពេលចុងក្រោយនេះ យើងសង្កេតឃើញថា ការដឹកជញ្ជូនទំនិញតាមយន្តហោះ ពីបាងកកមកកាន់រាជធានីភ្នំពេញ បែរជាមានការកើនឡើងទៅវិញ ដោយកត្តាទាំងនេះអាចបណ្ដាលមកពីការដឹកជញ្ជូនតាមផ្លូវគោកមិនសូវមាន ជាហេតុធ្វើឱ្យមានការផ្លាស់ប្តូរមកដឹកជញ្ជូនតាមជើងយន្តហោះជំនួសវិញនូវប្រភេទទំនិញដែលមានតម្លៃមួយចំនួន»។

ទន្ទឹមនេះ លោកក៏បញ្ជាក់ដែរថា ស្ថានភាពការហោះហើរភ្នំពេញ-បាងកក បាងកក-ភ្នំពេញ នៅថ្ងៃទី០៨ ខែសីហា ឆ្នាំ២០២៥ នេះ គឺនៅរក្សាប្រក្រតីភាពជាធម្មតាមិនមានអ្វីផ្លាស់ប្ដូរនោះទេ ប៉ុន្តែចាប់ពីថ្ងៃទី០៧ ខែសីហា រហូតដល់ថ្ងៃទី១៥ ខែកញ្ញា ក្រុមហ៊ុនអាកាសចរ Bangkok Airways បានផ្អាកការហោះហើររបស់ខ្លួននៅពេលព្រឹកមួយជើងដោយសារកត្តាភ្ញៀវទេសចរ ក្រៅពីនេះ ជើងហោះហើរផ្សេងទៀត ដូចជា Thai Vietjet Air និង Thai airways ជាដើមនោះបានចាប់ផ្តើមដំណើរការហោះហើរឡើងវិញ មិនមានលុបចោលជើងហោះហើរនោះទេ។

លោកក៏បានបញ្ជាក់ដែរថា «សម្រាប់ជើងហោះហើរ Bangkok Airways គឺជើងហោះហើររបស់ក្រុមហ៊ុនអាកាសចរណ៍មួយនេះមានច្រើនជើង ប៉ុន្តែធ្វើការផ្អាកជើងហោះហើរសម្រាប់តែជើងពេលព្រឹកមួយជើងប៉ុណ្ណោះ»។

ដោយឡែកសម្រាប់ជើងហោះហើរផ្លូវសៀមរាបវិញ ក៏មិនមានអ្វីប្រែប្រួលដែរ ការហោះហើរនៅដំណើរការជាធម្មតា មិនមានការលុបចោលនោះទេ។

ជុំវិញការហោះហើរតាមផ្លូវអាកាសនេះដែរ កាលពីថ្ងៃទី០១ ខែសីហា កន្លងទៅ លោក ស៊ិន ចាន់សិរីវុត្ថា ក៏បានឱ្យដឹងដែរថា ក្រុមហ៊ុនអាកាសចររបស់ថៃចំនួន ៣ បានកាត់បន្ថយជើងហោះហើររបស់ខ្លួន គឺ ក្រុមហ៊ុនអាកាសចរ Thai airways Bangkok airways និងក្រុមហ៊ុន Thai Vietjet Air កន្លងមកធ្លាប់ហោះហើរចំនួន ២ជើង ប៉ុន្តែបច្ចុប្បន្នលុបមកនៅត្រឹម ១ជើងប៉ុណ្ណោះ ក្នុងមួយថ្ងៃ។

បញ្ហានេះគឺបណ្ដាលមកពីកត្តាភ្ញៀវទេសចរមិនគ្រប់គ្រាន់ប៉ុណ្ណោះ។ ព្រោះបន្ទាប់ពីកម្ពុជា-ថៃ មានបញ្ហាទំនាស់មក ឃើញថា មិនសូវមានអ្នកធ្វើដំណើរទៅបាងកកនោះទេ ភ្ញៀវមួយចំនួនធំ បានផ្លាស់ប្តូរទិសដៅ។ មួយវិញទៀត ភ្ញៀវទេសចរមួយចំនួន ងាកមកប្រើជើងហោះហើរក្នុងស្រុកជំនួសវិញ ដូច្នេះនេះជាហេតុធ្វើឱ្យក្រុមហ៊ុនអាកាសចរណ៍ថៃមួយចំនួនត្រូវតែលុបចោលជើងហោះហើរ៕

ដោយ៖ ឌិន ថារី

The post អាកាសចរស៊ីវិល៖ ការដឹកជញ្ជូនទំនិញតាមផ្លូវអាកាសពីបាងកក-ភ្នំពេញ មានការកើនឡើង appeared first on Kampuchea Thmey Daily.

គ្មានអ្វីប្រែប្រួល ប្រតិបត្តិហោះហើរនៅអាកាសយានដ្ឋានចាស់ ត្រូវបានផ្ទេរទៅអាកាសយានដ្ឋានអន្តរជាតិតេជោ តាមផែនការ

Din Thary — Mon, 04 Aug 2025 05:23:00 +0000

លោក ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរស៊ីវិលកម្ពុជា បានគូសបញ្ជាក់ថា ពាក់ព័ន្ធទៅនិងវឌ្ឍនភាពនៃការផ្លាស់ប្តូរជើងហោះហើរពីអាកាសយានដ្ឋានអន្តរជាតិភ្នំពេញ ទៅកាន់អាកាសយានដ្ឋានអន្តរជាតិតេជោថ្មី អ្វីៗត្រូវបានរៀបចំរួចជាស្រេច និងគ្មានអ្វីប្រែប្រួលនោះទេ គឺនៅថ្ងៃទី០៩ ខែកញ្ញា ខាងមុខនេះ កម្ពុជានឹងបើកឱ្យដំណើរការជាផ្លូវការនូវអាកាសយានដ្ឋានថ្មីលំដាប់ 4F មួយនេះ។

ពាក់ព័ន្ធនិងការផ្លាស់ប្ដូរជើងហោះហើរទៅកាន់ប្រលានយន្តហោះអន្តរជាតិថ្មីនេះដែរ លោក ស៊ិន ចាន់សិរីវុត្ថា បានលើកឡើងថា ចំពោះក្រុមហ៊ុនពាក់ព័ន្ធដែលផ្ទេរប្រតិបត្តិការរបស់ខ្លួន ទៅអាកាសយានដ្ឋានអន្តរជាតិតេជោ អ្វីៗគឺបានរួចរាល់ជាស្រេចទៅតាមផែនការ។ មានន័យថា អ្វីៗគ្រប់យ៉ាងបានព្រមព្រៀងនិងឯកភាពគ្នា ដោយបានធ្វើការ និងបានចូលរួមជាមួយគ្នានៅក្នុងការបង្វឹក ក៏ដូចជាបណ្ដុះបណ្ដាលបុគ្គលិកទាំងអស់ ឱ្យស្គាល់ពីវិធាន និងនីតិប្រតិបត្តិ (SOP) រួចរាល់ផងដែរ។

ជាមួយគ្នានោះចំពោះក្រុមហ៊ុនដំណើរការហោះហើរ ក៏មិនមានអ្វីប្រែប្រួលដូចគ្នាដែរ គឺក្រុមហ៊ុនអាកាសចរចំនួន ៣១ ក្រុមហ៊ុន ក្នុងនោះ មានក្រុមហ៊ុនជាតិចំនួន ៣ និងមានក្រុមហ៊ុនអន្តរជាតិចំនួន ២៨ ក្រុមហ៊ុន ដែលបានផ្ទេរប្រតិបត្តិការរបស់ខ្លួនពីអាកាសយានដ្ឋានអន្តរជាតិភ្នំពេញ ទៅកាន់អាកាសយានដ្ឋានអន្តរជាតិតេជោ។

លោកក៏បានបញ្ជាក់ដែរថា «ចំពោះការហោះហើរ អាកាសចរស៊ីវិលកម្ពុជា ក៏បានរៀបចំឱ្យមានការហោះហើរបង្ហាញ មុននឹងដាក់ឱ្យដំណើរការជាផ្លូវការ មានន័យថា ការហោះហើរនោះយើងធ្វើដូចមែនទែន ដែលគេហៅថាការហោះហើរបង្ហាញ ដែលមានការហោះហើរជើងក្នុងស្រុកមួយ និងមានការហោះហើរជាអន្តរជាតិមួយ។ ប៉ុន្តែសម្រាប់ក្រុមហ៊ុនហោះហើរជាអន្តរជាតិ អាកាសចរស៊ីវិលនៅមិនទាន់កំណត់ទេថា និងយកជើងហោះហើរចេញពីណាមកនោះទេ ប៉ុន្តែសម្រាប់ជើងហោះហើរក្នុងស្រុកគឺអាចយកពីខេត្តសៀមរាប ឬខេត្តព្រះសីហនុ»។

សូមជម្រាបថា អាកាសយានដ្ឋានអន្តរជាតិតេជោលំដាប់ 4F តម្លៃ ២ ពាន់លានដុល្លារ ដំណាក់កាលទី១ បានបិទបញ្ចប់ការសាងសង់ទាំងស្រុង និងត្រៀមបើកឱ្យដំណើរការនៅថ្ងៃទី ០៩ ខែកញ្ញា ឆ្នាំ ២០២៥។

អាកាសយានដ្ឋានអន្តរជាតិតេជោ នឹងមកជំនួសអាកាសយានដ្ឋានអន្តរជាតិភ្នំពេញបច្ចុប្បន្ន ដែលមានសមត្ថភាពបម្រើសេវាកម្មដឹកភ្ញៀវទេសចរណ៍បានរហូតដល់ទៅ ៦ ដងលើសព្រលានបច្ចុប្បន្ន។

អាកាសយានដ្ឋានអន្តរជាតិតេជោមាន ៣ ដំណាក់កាល គឺដំណាក់កាលទី១ តម្លៃ ២ ពាន់លានដុល្លារ សាងសង់រួចរាល់នៅឆ្នាំ ២០២៥ អាចទទួលអ្នកដំណើរបានប្រមាណ ១៣ លាននាក់ក្នុងមួយឆ្នាំ ដំណាក់កាលទី២ នឹងបញ្ចប់នៅឆ្នាំ ២០៣០ ដែលអាចទទួលបានអ្នកដំណើរប្រមាណជា ៣០ លាននាក់ក្នុងមួយឆ្នាំ និងដំណាក់កាលចុងក្រោយ នឹងបញ្ចប់នៅឆ្នាំ ២០៥០ អាចនឹងទទួលបានអ្នកដំណើររហូតដល់ ៥០ លាននាក់ក្នុងមួយឆ្នាំ៕

ដោយ៖ ឌិន ថារី

The post គ្មានអ្វីប្រែប្រួល ប្រតិបត្តិហោះហើរនៅអាកាសយានដ្ឋានចាស់ ត្រូវបានផ្ទេរទៅអាកាសយានដ្ឋានអន្តរជាតិតេជោ តាមផែនការ appeared first on Kampuchea Thmey Daily.

ក្រុមហ៊ុនអាកាសចរណ៍ថៃ ៣ កាត់បន្ថយជើងហោះហើរ

Din Thary — Fri, 01 Aug 2025 08:15:00 +0000

នៅថ្ងៃទី០១ ខែសីហា ឆ្នាំ២០២៥ នេះ លោក ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានឱ្យ«កម្ពុជាថ្មី» ដឹងថា បច្ចុប្បន្នមានក្រុមហ៊ុនអាកាសចរថៃចំនួន ៣ កាត់បន្ថយជើងហោះហើរ ពីមួយថ្ងៃ ២ ជើង មកនៅត្រឹមមួយថ្ងៃ ១ជើងប៉ុណ្ណោះ ដោយសារតែកត្តាភ្ញៀវទេសចរ។

លោក ស៊ីន ចាន់សិរីវុត្ថា បានមានប្រសាសន៍ថា មកទល់ពេលនេះ ស្ថានភាពនៃការហោះហើរ ជើងហោះហើរភ្នំពេញ-បាងកក បាងកក-ភ្នំពេញ ក៏ដូចជា បាងកក-សៀមរាប គឺនៅរក្សាប្រក្រតីភាពជាធម្មតាមិនមានអ្វីផ្លាស់ប្ដូរនោះទេ។ ប៉ុន្តែសម្រាប់ជើងហោះហើរបាងកក ចំនួនភ្ញៀវទេសចរមានការធ្លាក់ចុះ និងមានក្រុមហ៊ុនអាកាសចរថៃមួយចំនួនបានសម្រេចកាត់បន្ថយជើងហោះហើរ។

ក្នុងនោះ ក្រុមហ៊ុនអាកាសចរចំនួន ៣ ដែលបានកាត់បន្ថយជើងហោះហើររបស់ខ្លួន គឺ ក្រុមហ៊ុនអាកាសចរ Thai airways Bangkok airways និងក្រុមហ៊ុន Thai Vietjet Air កន្លងមកធ្លាប់ហោះហើរចំនួន ២ជើង ប៉ុន្តែបច្ចុប្បន្នលុបមកនៅត្រឹម ១ជើងប៉ុណ្ណោះ ក្នុងមួយថ្ងៃ។

លោក ស៊ីន ចាន់សិរីវុត្ថា បានអះអាងថា បញ្ហានេះគឺបណ្ដាលមកពីកត្តាភ្ញៀវទេសចរមិនគ្រប់គ្រាន់ប៉ុណ្ណោះ។ ព្រោះបន្ទាប់ពីកម្ពុជា-ថៃ មានបញ្ហាទំនាស់មក ឃើញថា មិនសូវមានអ្នកធ្វើដំណើរទៅបាងកកនោះទេ ភ្ញៀវមួយចំនួនធំ បានផ្លាស់ប្តូរទិសដៅ។ មួយវិញទៀត ភ្ញៀវទេសចរមួយចំនួន ងាកមកប្រើជើងហោះហើរក្នុងស្រុកជំនួសវិញ ដូច្នេះនេះជាហេតុធ្វើឱ្យក្រុមហ៊ុនអាកាសចរណ៍ថៃមួយចំនួនត្រូវតែលុបចោលជើងហោះហើរ។

បើតាមមន្ត្រីអាកាសចរណ៍ស៊ីវិលដដែល ស្ថានភាពនៃការហោះហើរជើងហោះហើរភ្នំពេញ-បាងកក បាងកក-ភ្នំពេញ ក៏ដូចជា បាងកក-សៀមរាប គឺនៅរក្សាប្រក្រតីភាពជាធម្មតាមិនមានអ្វីផ្លាស់ប្ដូរនោះទេ។ ប៉ុន្តែសម្រាប់តំបន់គ្រោះថ្នាក់ អាកាសចរស៊ីវិលកម្ពុជានៅមិនទាន់អាចបញ្ជាក់បានទេថាតើ អាចបើកដំណើរការឡើងវិញនៅពេលណានោះទេ។

ជុំវិញបញ្ហានេះ អាកាសចរស៊ីវិលកម្ពុជា មានតែរងចាំមើលស្ថានភាពទូទៅនៃបញ្ហាព្រំដែនរវាងប្រទេសទាំងពីរ កម្ពុជា-ថៃ នេះសិន ប៉ុន្តែចំពោះការបិទដែនអាកាសលើតំបន់ប្រយុទ្ធគ្នានោះ ការហោះហើរនៅមិនទាន់មានការប្រែប្រួលនោះទេ ហើយចំនួនជើងហោះហើររំលងនៅរក្សាស្ថានភាពដដែល។ បានន័យថា ក្រុមហ៊ុនជើងហោះហើររំលង គ្រាន់តែហោះប្តូរទៅផ្លូវផ្សេងបញ្ចៀសពីខ្សែផ្លូវគ្រោះថ្នាក់នោះតែបន្តិចប៉ុណ្ណោះ តាមការណែនាំរបស់ក្រុមការងារជើងហោះហើររបស់កម្ពុជា៕

ដោយ៖ ឌិន ថារី

The post ក្រុមហ៊ុនអាកាសចរណ៍ថៃ ៣ កាត់បន្ថយជើងហោះហើរ appeared first on Kampuchea Thmey Daily.

អាកាសចរស៊ីវិល៖ ជើងហោះហើរឆ្លងកាត់តំបន់ជម្លោះកម្ពុជា-ថៃ នៅតែមិនទាន់អនុញ្ញាតឱ្យមានការហោះហើរឡើយ

Din Thary — Wed, 30 Jul 2025 03:50:17 +0000

លោក ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរស៊ីវិល បានឱ្យ«កម្ពុជាថ្មី» នៅព្រឹកថ្ងៃទី៣០ ខែកក្កដា ឆ្នាំ២០២៥ នេះ ដឹងថា គិតមកដល់ម៉ោង ១០ និង ០០នាទីនេះ ស្ថានភាពជើងហោះហើរ និងដែនអាកាសកម្ពុជានៅរក្សាស្ថានភាពដដែលមិនមានអ្វីប្រែប្រួលនោះទេ។ ជាមួយគ្នានោះដែរ សម្រាប់ជើងហោះហើររំលងដែលបានបិទមិនឱ្យហោះឆ្លងកាត់តំបន់ជម្លោះកម្ពុជា-ថៃ នៅមិនទាន់អាចបើកឱ្យដំណើរការហោះហើរដូចដើមនៅឡើយទេ។

លោក ស៊ិន ចាន់សិរីវុត្ថា បានគូសបញ្ជាក់ថា ស្ថានភាពនៃការហោះហើរជើងហោះហើរភ្នំពេញ-បាងកក បាងកក-ភ្នំពេញ ក៏ដូចជា បាងកក-សៀមរាប គឺនៅរក្សាប្រក្រតីភាពជាធម្មតាមិនមានអ្វីផ្លាស់ប្ដូរនោះទេ។ ប៉ុន្តែសម្រាប់តំបន់គ្រោះថ្នាក់ អាកាសចរស៊ីវិលកម្ពុជានៅមិនទាន់អាចបញ្ជាក់បានទេថាតើ អាចបើកដំណើរការឡើងវិញនៅពេលណានោះទេ។

«ជុំវិញបញ្ហានេះ អាកាសចរស៊ីវិលកម្ពុជា កំពុងរង់ចាំមើលស្ថានភាពទូទៅនៃបញ្ហាព្រំដែនរវាងប្រទេសទាំងពីរ កម្ពុជា-ថៃ នេះសិន ប៉ុន្តែចំពោះការបិទដែនអាកាសលើតំបន់ប្រយុទ្ធគ្នានោះ ការហោះហើរនៅមិនទាន់មានការប្រែប្រួលនោះទេ ហើយចំនួនជើងហោះហើររំលងនៅរក្សាស្ថានភាពដដែល។ បានន័យថា ក្រុមហ៊ុនជើងហោះហើររំលង គ្រាន់តែហោះប្តូរទៅផ្លូវផ្សេងបញ្ចៀសពីខ្សែផ្លូវគ្រោះថ្នាក់នោះតែបន្តិចប៉ុណ្ណោះ តាមការណែនាំរបស់ក្រុមការងារជើងហោះហើររបស់កម្ពុជា»។ លោក ស៊ិន ចាន់សិរិវុត្ថា បន្ថែមបែបនេះ។

លោក ស៊ិន ចាន់សិរីវុត្ថា បានអះអាងថា បញ្ហានេះអាកាសចរស៊ីវិល បានតាមដាន និងពិនិត្យយ៉ាងយកចិត្តទុកដាក់ គឺមិនមានការប្រែប្រួលនោះទេចំពោះដែនអាកាស ប៉ុន្តែសម្រាប់ការបើកដំណើរការឱ្យដូចដើមឡើងវិញ អាកាសចរស៊ីវិលនៅមិនទាន់អាចបើកឱ្យដូចដើមឡើងវិញនោះទេ ដោយអាកាសចរបាននិងកំពុងតាមដាន ពិនិត្យ និងវាយតម្លៃហានិភ័យ រហូតដល់មានការជូនដំណឹងជាថ្មី។

គួរបញ្ជាក់ថា កាលពីថ្ងៃទី២៥ ខែកក្កដា ក្រោយសង្គ្រាមកម្ពុជា-ថៃ បានផ្ទុះឡើងដែលបង្កឡើងដោយភាគីថៃ ជាអ្នកបើកការឈ្លានពានមកលើកម្ពុជាមុននោះ ដើម្បីបញ្ចៀសគ្រោះថ្នាក់នានាតាមដែនអាកាសដែលអាចកើតមានជាយថាហេតុ អាកាសចរស៊ីវិលកម្ពុជាបានចេញសេចក្ដីប្រកាសមួយ ដើម្បីបញ្ជាក់ដល់ក្រុមហ៊ុនជើងហោះហើរទាំងឡាយណាដែលហោះក្រោមកម្ពស់ ១១គីឡូ ត្រូវតែផ្លាស់ប្តូរទិសនៃការហោះហើរទៅលើផ្លូវផ្សេងជំនួសវិញ។ ប៉ុន្តែសម្រាប់ជើងហោះហើរដែលហោះនៅកម្ពស់ខ្ពស់ជាង ១១គីឡូម៉ែត្រ ពុំចាំបាច់ធ្វើការហោះហើរផ្លាស់ប្តូរទិសតាមផ្លូវដែលមានជម្លោះនោះទេ។

អាកាសចរស៊ីវិលកម្ពុជា ក៏បានបញ្ជាក់ដែរថា ស្ថានភាពជើងហោះហើរភ្នំពេញ-បាងកក ក៏ដូចជា បាងកក-សៀមរាប នៅរក្សាប្រក្រតីជាធម្មតា លើកលែងតែជើងហោះហើរ Thai Airways ដែលធ្លាប់ហោះហើរក្នុងមួយថ្ងៃពីរជើង ថយមកនៅត្រឹមក្នុងមួយថ្ងៃមួយជើងវិញ គិតពីថ្ងៃទី២៧ ដល់ថ្ងៃទី៣១ ខែកក្កដា នេះ ដោយសារតែចំនួនភ្ញៀវមិនគ្រប់ទៅតាមទីផ្សារ៕

ដោយ៖ ឌិន ថារី

The post អាកាសចរស៊ីវិល៖ ជើងហោះហើរឆ្លងកាត់តំបន់ជម្លោះកម្ពុជា-ថៃ នៅតែមិនទាន់អនុញ្ញាតឱ្យមានការហោះហើរឡើយ appeared first on Kampuchea Thmey Daily.