ភ្នំពេញ ៖ លោក ហេង រតនា អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (ស៊ីម៉ាក់) បានចុះផ្សាយតាមបណ្តាញសង្គមហ្វេសប៊ុកផ្ទាល់ខ្លួន អំពីប្រវត្តិនិងហេតុការណ៍ការទម្លាក់គ្រាប់បែកបំផ្លាញ «ស្ពានជ័យជម្នះ» (ដែលប្រជាពលរដ្ឋខ្លះហៅថា «ស្ពានមេទឹក») នៅឃុំថ្មដា ស្រុកវាលវែង ខេត្តពោធិ៍សាត់ ដោយយន្តហោះចម្បាំងថៃ កាលពីថ្ងៃទី១៣ ខែធ្នូ ឆ្នាំ២០២៥។

លោក ហេង រតនា បានលើកឡើងថា បន្ទាប់ពីបានអានសៀវភៅស្រាវជ្រាវចងក្រងប្រវត្តិនៃការទម្លាក់គ្រាប់បែកលើស្ពាននេះក្នុងសង្គ្រាមឈ្លានពានពីសំណាក់យោធាសៀម លោកបានបញ្ជាក់ថា គ្រាប់បែកដែលប្រើប្រាស់គឺប្រភេទ MK-82 ចំនួន ៧ គ្រាប់ ដែលមួយគ្រាប់ៗ មានទម្ងន់ប្រមាណ ២៣០ គីឡូក្រាម ហើយត្រូវបានយន្តហោះចម្បាំងទម្លាក់ជា ២ ដង។

តាមឯកសារស្រាវជ្រាវ ស្ពាននេះត្រូវបានកសាងដំបូងនៅឆ្នាំ ១៩៨៤ ក្រោមការដឹកនាំផ្ទាល់របស់ ប៉ុល ពត ហើយបានដាក់ឈ្មោះថា «ស្ពានប្តេជ្ញាឈ្នះ»។ នៅក្នុងយុទ្ធនាការរដូវប្រាំងឆ្នាំ ១៩៨៥ កងទ័ពរដ្ឋាភិបាលប្រជាមានិតកម្ពុជាបានវាយដណ្តើមយកជ័យជម្នះនៅទីតាំងនេះ ហើយបានសាងសង់ស្ពានដែកថ្មី ដោយប្តូរឈ្មោះជា «ស្ពានជ័យជម្នះ» រហូតមកដល់សព្វថ្ងៃ។

ក្រោយមក ស្ពានបេតុងនិងផ្លូវថ្មីនៅតំបន់នេះ ត្រូវបានរាជរដ្ឋាភិបាលសម្ពោធដាក់ឱ្យប្រើប្រាស់ជាផ្លូវការនៅឆ្នាំ ២០២០ ដែលជាគម្រោងសហប្រតិបត្តិការជាមួយរដ្ឋាភិបាលចិន។

លោក ហេង រតនា បានសម្តែងការចាប់អារម្មណ៍យ៉ាងខ្លាំងចំពោះសេចក្តីសង្ខេបរបស់ក្រុមស្រាវជ្រាវ ដែលមានខ្លឹមសារថា ៖

«នៅក្រោមចរន្តទឹកហូរកាត់ពីលើបំណែកបាក់បែកដោយសារគ្រាប់បែករបស់ខ្មាំង! ស្ពានមេទឹកកំពុងឈរយ៉ាងស្ងៀមស្ងាត់ក្នុងនាមជា «សាក្សី» នៃសោកវិនាសកម្មដែលមិនអាចបំភ្លេចបាន។ ការទម្លាក់គ្រាប់បែកកម្ទេចស្ពានពីសំណាក់ចោរសៀមឈ្លានពាននេះ មិនត្រឹមតែជាការកាត់ផ្តាច់រូបវន្តនៃផ្លូវគមនាគមន៍ប៉ុណ្ណោះទេ ប៉ុន្តែវាគឺជាការកាត់ផ្តាច់ទំនាក់ទំនងរវាងមនុស្សនិងមនុស្ស និងការបំផ្លាញសេចក្តីសុខសាន្តនៃមាតុភូមិជាទីស្រលាញ់របស់យើង។»

លោកបានបន្ថែមថា បំណែកដែកនិងសសរស្ពានដែលបាក់បែកនោះ មិនមែនគ្រាន់តែជាកម្ទេចឥដ្ឋបេតុងទទេនោះទេ ប៉ុន្តែវាជា សាក្សីរស់នៃប្រវត្តិសាស្ត្រដ៏ឈឺចាប់ និងជាស្នាមរបួសពីសង្គ្រាមឈ្លានពាន ដែលត្រូវទុកជាភស្តុតាងសម្រាប់រំលឹកដល់ការលះបង់ និងបទពិសោធន៍ដ៏លំបាករបស់ជាតិ ព្រមទាំងជាមេរៀនដល់យុវជនជំនាន់ក្រោយឱ្យយល់អំពីតម្លៃនៃ «សន្តិភាព» ។

គួរបញ្ជាក់ថា ការទម្លាក់គ្រាប់បែកនេះបានកើតឡើងនាព្រឹកថ្ងៃទី១៣ ខែធ្នូ ដោយយន្តហោះចម្បាំងថៃ បានទម្លាក់គ្រាប់បែកចំនួនពីរលើកមកលើស្ពាន បណ្តាលឱ្យខូចខាតទាំងស្រុង និងប៉ះពាល់ដល់ការធ្វើដំណើររបស់ប្រជាពលរដ្ឋនៅតាមបណ្តោយផ្លូវជាតិលេខ ៥។ រដ្ឋាភិបាលកម្ពុជាបានចេញសេចក្តីថ្លែងការណ៍ថ្កោលទោសយ៉ាងខ្លាំងចំពោះទង្វើឈ្លានពាននេះ៕

The post យន្តហោះ F-16 ថៃទម្លាក់គ្រាប់បែក MK-82 ចំនួន៧គ្រាប់កម្ទេចស្ពានជ័យជម្នះ លោក ហេង រតនា លើកឡើងពីប្រវត្តិសាងសង់ឆ្នាំ១៩៨៤ appeared first on Kampuchea Thmey Daily.

ក្រោយការផ្សព្វផ្សាយជាបន្តបន្ទាប់ពីសំណល់គ្រាប់បែករបស់ថៃនៅកម្ពុជា ប្រទេសថៃបានច្រានចោលពីការរកឃើញទាំងអស់នេះនឹងថាគ្រាប់បែករបស់ខ្លួនពេលទម្លាក់លើកម្ពុជាគឺផ្ទុះទាំងអស់ ហើយការរកឃើញគ្រាប់បែក MK-៨៤ កន្លងទៅនេះគឺជាគ្រាប់បែកដែលសល់ពីសង្គ្រាមឆ្នាំ១៩៧០-១៩៧៥ ប៉ុណ្ណោះមិនពាក់ព័ន្ធនឹងថៃទេ។

អគ្គនាយកស៊ីម៉ាក់ លោក ហេង រតនា បានឆ្លើយតបថាការលើកឡើងរបស់ថៃនេះ គឺជាសក្ខីកម្មថ្មីមួយដែលទាហានថៃសារភាពបក្សពួកខ្លួនឯង ថាពិតជាបានប្រើប្រាស់គ្រាប់បែកទម្លាក់ពីយន្តហោះ រំលោភឈ្លានពានបូរណភាពទឹកដីកម្ពុជាពិតប្រាកដមែន។ ម្យ៉ាងវិញទៀត តាមបច្ចេកទេសយោធា គ្រាប់យុទ្ធភណ្ឌតែងតែមានអត្រាមិនផ្ទុះ (Failing rate)។ ការលើកឡើងនេះ មិនខុសពីកាលករណីគ្រាប់បែកចង្កោមថៃដែលធ្លាក់ស្លាប់កុមារកម្ពុជាកន្លងទៅ ដែលកាលនោះពួកគេអះអាងថាផ្ទុះទាំងអស់ តែធាតុពិត សំណល់ទាំងនោះនៅតែបន្តបង្កគ្រោះថ្នាក់ដល់ជនស៊ីវិល និងត្រូវបានស៊ីម៉ាក់រកឃើញជាហូរហែ។

ទាក់ទងនឹងការទម្លាក់កំហុសលើសង្គ្រាមទសវត្សរ៍ ៦០-៧០ លោក ហេង រតនា ថា អាចពិនិត្យ​លើលេខកូដអត្តសញ្ញណបាន ដោយលេខគ្រាប់បែកមានកូដគ្រាប់៖ 30003-923AS105 និងលេខឡូតិ៍ (Lot Number)៖ IMI96G015-011 ដែលផលិតដោយក្រុមហ៊ុនឧស្សាហកម្មយោធាអ៊ីស្រាអែល (IMI) នៅឆ្នាំ១៩៩៦។

លោកបានចោទសួរជាចម្លើយបកវិញថា៖ «តើគ្រាប់បែកដែលផលិតក្នុងឆ្នាំ១៩៩៦ អាចយកទៅប្រើប្រាស់ក្នុងសង្គ្រាមសហរដ្ឋអាមេរិកនៅកម្ពុជា អំឡុងឆ្នាំ១៩៦២–១៩៧៥ យ៉ាងដូចម្តេចកើត?»

ចំពោះការលើកឡើងថាគ្រាប់បែកនេះ «មិនអាចផ្ទៀងផ្ទាត់ប្រភពបាន» ស៊ីម៉ាក់បានបញ្ជាក់ថា ការផ្ទៀងផ្ទាត់គឺធ្វើឡើងលើភស្តុតាងជាក់ស្តែង ដូចជា គ្រឿងបង្គំគ្រាប់បែក ទីតាំងរណ្តៅ សាក្សី និងទិន្នន័យហោះហើរ។

លោកថា កន្លងមករដ្ឋាភិបាលសហរដ្ឋអាមេរិកបានផ្តល់ទិន្នន័យទម្លាក់គ្រាប់បែកទាំងអស់នៅកម្ពុជាជូនរាជរដ្ឋាភិបាលដើម្បីគាំទ្រការបោសសម្អាតជាលក្ខណៈមនុស្សធម៌។ ប៉ុន្តែ សម្រាប់ទីតាំងគ្រាប់បែកដែលស៊ីម៉ាក់បានរកឃើញក្នុងករណីនេះ គឺគ្មាននៅក្នុងទិន្នន័យទម្លាក់គ្រាប់បែករបស់សហរដ្ឋអាមេរិកនោះឡើយ ដែលនេះបញ្ជាក់ច្បាស់ថាជាគ្រាប់បែករបស់ទាហានថៃ។

លោក ហេង រតនា បញ្ជាក់ថារាល់គ្រាប់បែកទម្លាក់ពីយន្តហោះ MK-84 គ្រាប់បែកចង្កោម និងយុទ្ធភណ្ឌដទៃទៀត ដែលស៊ីម៉ាក់ប្រមូលបាន សុទ្ធតែមានកំណត់ត្រាទីតាំង និងស្ថានភាពច្បាស់លាស់ ដែលបើកចំហឱ្យអ្នកជំនាញជាតិ និងអន្តរជាតិអាចមកពិនិត្យផ្ទៀងផ្ទាត់បានគ្រប់ពេល។ ភស្តុតាងទាំងនេះ នឹងត្រូវរក្សាទុកជាមរតកប្រវត្តិសាស្ត្រ ដើម្បីរំលឹកពីទុក្ខសោកនៃសង្គ្រាម និងផ្សព្វផ្សាយនូវវប្បធម៌សន្តិភាពសម្រាប់មនុស្សជាតិទៅថ្ងៃអនាគត។ 

លោកថា៖ «ការពិតនៅតែជាការពិត ដោយគ្មានការក្លែងបន្លំ លាបពណ៌ និងមួលបង្កាច់អ្វីឡើយ»៕ 

អត្ថបទដោយ ហ៊ុន សិរីវឌ្ឍន៍

The post ស៊ីម៉ាក់លើកយកភស្តុតាងច្បាស់ៗតបនឹងថៃជុំវិញករណីគ្រាប់បែក MK-84 ជិត១តោន appeared first on Kampuchea Thmey Daily.

​លោក ហេង រតនា សង្កត់ធ្ងន់ថា៖«ការបាញ់គ្រាប់បែកចង្កោមពីទាហានសៀមឈ្លានពាន​ មកលេីគោលដៅភូមិឋាន​ ស្រែចម្ការប្រជាពលរដ្ឋនិងហេដ្ឋារចនាសម្ពន្ធ័សុីវិល​ ដេីម្បីសម្លាប់មនុស្ស​ សម្លាប់ភូមិសាស្ត្រ និងជាអន្ទាក់វិបត្តិសេដ្ឋកិច្ចសង្គមចំពោះប្រជាពលរដ្ឋដែលរស់នៅក្នុងតំបន់ទាំងនោះ! »។

លោក ហេង រតនា អំពាវនាវឱ្យរួមគ្នាបង្ការគ្រោះថ្នាក់ដោយសារសំណល់យុទ្ធភណ្ឌសង្គ្រាម​ និងរំដោះដីនៃផលវិបាកសេដ្ឋកម្មសង្គមឱ្យបានឆាប់បំផុតជូនប្រជាពលរដ្ឋស្របតាមទស្សនវិស័យ និងវិធានការដឹកនាំរបស់សម្តេចធិបតីប្រមុខរាជរដ្ឋាភិបាល។

ក្នុងសង្គ្រាមឈ្លានពានកាលពីឆ្នាំ២០២៥ យោធាសៀមបានប្រើប្រាស់អាវុធធុនធ្ងន់ អាវុធធំ តូចជាង៤០ប្រភេទ ក្នុងនោះមានទាំងអាវុធដែលច្បាប់អន្តរជាតិមកលើទឹកដីកម្ពុជា បង្កផលប៉ះពាល់រយៈពេលវែងលើភូមិឋានពលរដ្ឋខ្មែរ៣៤៦ភូមិ បើគិតជាទំហំផ្ទៃដីគឺមានដល់រហូតដល់ទៅប្រមាណ៣៦ ៤០០០ហិកតា។  លោក ហេង រតនា ធ្លាប់បានឱ្យដឹងដូច្នេះ កាលពីថ្ងៃទី៦ ខែមេសា ឆ្នាំ២០២៦។

ក្នុងសង្គ្រាមឈ្លានពានយោធាថៃប្រើប្រាស់អាវុធដូចជា គ្រាប់កាំភ្លើងធំតូច បាញ់ចេញពីកាំភ្លើងធំ យន្តហោះចម្បាំង គ្រាប់បែកចង្កោម ផ្សែងពុល និងអាវុធគីមី ដែលមួយចំនួនត្រូវបានច្បាប់ហាមឃាត់។ យោធាសៀមឈ្លានពាន បានបាញ់ប្រហារលើភូមិឋានស៊ីវិល ផ្ទះសម្បែង សណ្ឋាគារ វត្តអារាម មន្ទីរពេទ្យ សាលារៀន ស្ពាន ផ្លូវថ្នល់  តំបន់ទេសចរណ៍ ប្រាសាទព្រះវិហារ ប្រាសាទតាក្របី ប្រាសាទតាមាន់ធំ ជាដើម៕

The post មេស៊ីម៉ាក់ថា ថៃបាញ់គ្រាប់បែកចម្កោមលើកម្ពុជាក្នុងបំណងសម្លាប់មនុស្ស និងដាក់អន្ទាក់វិបត្តិសេដ្ឋកិច្ចសង្គម appeared first on Kampuchea Thmey Daily.

នៅក្នុងសិក្ខាសាលាស្ដីពីគ្រាប់បែកចង្កោមប្រភេទថ្មី CMR M-Series ដែលធ្វើឡើងកាលពីថ្ងៃទី២៥ ខែមីនា នៅសាលសន្និសីទសារមន្ទីរតេជោសន្តិភាព ក្នុងខេត្តសៀមរាប លោក ហេង រតនា អគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជា (CMAC) បានបញ្ជាក់ឱ្យដឹងថា គ្រាប់បែកចង្កោម ដែលយោធាថៃបានប្រើប្រាស់ក្នុងការបាញ់មកលើទឹកដីកម្ពុជា គឺមាន៣ប្រភេទសំខាន់ គឺ​M42​ M46 និង​M85។

លោកអគ្គនាយក CMAC អះអាងថា គ្រាប់បែកចង្កោមទាំងនេះបានបាញ់ផ្លោងមកលើភូមិឋានប្រជាពលរដ្ឋ​ ដីស្រែចម្ការ​ សាលារៀន​ មន្ទីរពេទ្យ​ តំបន់ស៊ីវិល និងទីតាំងកងទ័ពរបស់កម្ពុជា។

ការបញ្ជាក់របស់លោក ហេង រតនា គឺដោយសំអាងទៅតាមលទ្ធផលស្រាវជ្រាវរបស់ក្រុមជំនាញអង្គភាព CMAC នៅតំបន់រងផលប៉ះពាល់ចំនួន៣៧១ភូមិនៃខេត្តចំនួន៦ តាមបណ្តោយព្រំដែនខ្មែរ-ថៃ​ រួមមានខេត្តកោះកុង​ ពោធិ៍សាត់​ បាត់ដំបង​ បន្ទាយមានជ័យ​ ឧត្តរមានជ័យ​ និងខេត្តព្រះវិហារ​ រួមទាំងខេត្តសៀមរាបផងនោះ​ គឺបានកំណត់ជាតំបន់រងផលប៉ះពាល់ដោយគ្រាប់បែកចង្កោមរបស់ថៃចំនួនប្រមាណ៣ ៦០០ទីតាំង លើផ្ទៃដីសរុបប្រមាណ២ ៣៦០គីឡូម៉ែត្រក្រឡា។

ផ្អែកតាមការស្រាវជ្រាវខាងលើ លោក ហេង រតនា បានសន្និដ្ឋានថា​ យោធាថៃអាចប្រើប្រាស់គ្រាប់បែកចង្កោមកាំភ្លើងធំប្រភេទ155MM មានចំនួនប្រមាណ១២ម៉ឺនទៅ១៣ម៉ឺនគ្រាប់​ ដែលមានកូនគ្រាប់បែកចង្កោមពី៦លានទៅ៧លានគ្រាប់ឯណោះ។ ប៉ុន្តែយ៉ាងណា លោក ថា នេះជាការស្រាវជ្រាវជំហានបឋម ដោយការស្រាវជ្រាវមិនទាន់បញ្ចប់ទាំងស្រុងនៅឡើយយទេ។  

គ្រាប់បែកចង្កោមប្រភេទនេះ គឺបានបង្កហានិភ័យយ៉ាងធ្ងន់ធ្ងរ និងយូរអង្វែងដល់សុវត្ថិភាព និងជីវភាពរស់នៅរបស់ប្រជាពលរដ្ឋតាមតំបន់រងផលប៉ះពាល់​ ហេីយអង្គភាព CMAC ដែលជាសេនាធិការឱ្យរាជរដ្ឋាភិបាលកម្ពុជា បានបញ្ជាក់ពីការខិតខំប្រឹងប្រែងក្នុងការបន្តបេសកកម្មមនុស្សធម៌របស់ខ្លួន ដើម្បីធានាថាទឹកដីកម្ពុជាក្លាយជាតំបន់សុវត្ថិភាព ដោយគ្មានមីន គ្មានសំណល់យុទ្ធភ័ណ្ឌបន្សល់ពីសង្គ្រាម៕

ដោយ៖ ធឿន វ៉ាន់សុង

The post CMAC រកឃើញថា យោធាថៃប្រើគ្រាប់បែកចង្កោមនៃកាំភ្លើងធំប្រភេទ155MM ខ្ទង់១៣ម៉ឺនគ្រាប់ក្នុងការឈ្លានពានកម្ពុជា appeared first on Kampuchea Thmey Daily.

តាមការបញ្ជាក់របស់លោក ហេង រតនា លើបណ្តាញសង្គមហ្វេសប៊ុក ករណីនេះបណ្តាលមកពីការផ្ទុះគ្រាប់ប្រភេទ M79 (M381) ដែលជាសំណល់យុទ្ធភណ្ឌសង្គ្រាម បណ្តាលឱ្យកុមារាប្រុសអាយុ ៨ឆ្នាំម្នាក់ និងកុមារីអាយុ ១៤ឆ្នាំម្នាក់ រងរបួសធ្ងន់ធ្ងរ និងបានស្លាប់បាត់បង់ជីវិត។

លោកបានលើកឡើងថា នេះជាទុក្ខសោកនាដកម្មមួយដែលបង្កឡើងដោយសំណល់គ្រាប់មិនទាន់ផ្ទុះនៃសង្គ្រាម ដែលអាចមានអាយុកាលជាង ៣០ ទៅ ៤០ ឆ្នាំហើយ ប៉ុន្តែបន្តបង្កគ្រោះថ្នាក់ និងបំផ្លិចបំផ្លាញជីវិតប្រជាពលរដ្ឋ ជាពិសេសកុមារ និងមនុស្សជំនាន់ក្រោយៗ។

ក្នុងឱកាសនោះ លោក ហេង រតនា ក៏បានបួងសួងដល់វត្ថុសក្តិសិទ្ធក្នុងលោក សូមពាំនាំវិញ្ញាណខន្តកុមារទាំងពីរ ឱ្យបានទៅកាន់ឋានសុគតិភពដោយសុខសាន្តផងដែរ៕

The post លោក ហេង រតនា សម្តែងការសោកស្តាយ ក្រោយកុមារ ២នាក់ស្លាប់ដោយសារផ្ទុះគ្រាប់ M79 នៅកំពង់ធំ appeared first on Kampuchea Thmey Daily.

បើតាមការបញ្ជាក់របស់លោក ហេង រតនា អគ្គនាយកនៃ មជ្ឈមណ្ឌលសកម្មភាពកម្ចាត់មីនកម្ពុជា (CMAC) គ្រឿងចក្រកម្ទេចមីនធុនធ្ងន់ប្រភេទ Komatsu នេះ មានទម្ងន់ជាង ៤០ តោន និងជាសម្ភារបច្ចេកទេសសំខាន់សម្រាប់ការបង្កើនប្រសិទ្ធភាពនៃការងារកម្ទេចមីននៅតំបន់មានហានិភ័យខ្ពស់។

គ្រឿងចក្រប្រភេទនេះ ត្រូវបានអភិវឌ្ឍន៍ និងកែច្នៃបច្ចេកទេសនៅកម្ពុជា តាមរយៈកិច្ចសហការរវាងអង្គភាព CMAC និងក្រុមហ៊ុន Komatsu ចាប់តាំងពីចុងទសវត្សរ៍ឆ្នាំ១៩៩០ ហើយត្រូវបានដាក់ឱ្យដំណើរការប្រើប្រាស់ជាផ្លូវការនៅក្នុងអង្គភាព CMAC ចាប់ពីឆ្នាំ២០០៥មក។

លោក ហេង រតនា បានថ្លែងអំណរគុណយ៉ាងជ្រាលជ្រៅដល់រដ្ឋាភិបាលជប៉ុន ដែលបានផ្តល់គ្រឿងចក្រកម្ទេចមីនធុនធ្ងន់នេះជូនរាជរដ្ឋាភិបាលកម្ពុជា ដើម្បីគាំទ្រដល់ប្រតិបត្តិការបោសសម្អាតមីន និងសំណល់យុទ្ធភណ្ឌសង្គ្រាមមនុស្សធម៌នៅកម្ពុជា ឲ្យកាន់តែមានល្បឿនលឿន និងមានប្រសិទ្ធភាពខ្ពស់។

ការគាំទ្រនេះ មានសារៈសំខាន់ជាពិសេសសម្រាប់ការបោសសម្អាតសំណល់យុទ្ធភណ្ឌសង្គ្រាមនៅតាមតំបន់ព្រំដែន និងតំបន់ដែលរងផលប៉ះពាល់ពីអតីតសង្គ្រាម ដើម្បីធានាសុវត្ថិភាពជូនប្រជាពលរដ្ឋ អាចវិលត្រឡប់ទៅរស់នៅភូមិឋានវិញ និងប្រើប្រាស់ដីធ្លីសម្រាប់ការកសាងជីវភាព និងអភិវឌ្ឍន៍សេដ្ឋកិច្ចក្នុងបរិយាកាសសន្តិភាព និងសុវត្ថិភាពយូរអង្វែង៕

The post ជប៉ុនផ្តល់គ្រឿងចក្រកម្ទេចមីនថ្មី គាំទ្រ CMAC ពន្លឿនការបោសសម្អាតសំណល់យុទ្ធភណ្ឌសង្គ្រាម appeared first on Kampuchea Thmey Daily.

លោក ហេង រតនា សរសេរលើទំព័រហ្វេសប៊ុកផ្លូវការនាព្រឹកថ្ងៃទី១២ ខែមករា ឆ្នាំ២០២៦ ដូច្នេះ៖« ប្រាសាទព្រះវិហារ​ ជាសម្បត្តិមនុស្សជាតិ​លេីពិភពលោកនេះ​ និងជាទីតាំងមានសក្តិសិទ្ធិភាព​ ត្រូវបានរងការទម្លាក់គ្រាប់បែក​និងបាញ់ផ្លោង​កម្ទេច​ បំផ្លិចបំផ្លាញដ៏មហាឃោរឃៅព្រៃផ្សៃ​ដោយសារការឈ្លានពានបូរណភាពទឹកកម្ពុជាទាំងកំរោលរបស់សៀម! អ្នកបំផ្លិចបំផ្លាញត្រូវតែមានការទទួលខុសត្រូវ។ »។

ប្រាសាទព្រះវិហារ ស្ថិត​នៅ​លើ​ខ្ពងរាប​នៃ​ជួរ​ភ្នំ​ដងរែក ដែល​មាន​កម្ពស់​៦២៥ម៉ែត្រ​ធៀបនឹង​ទឹកសមុទ្រ ស្ថិត​ក្នុងស្រុក​ជាំក្សាន្ត​ ខេត្តព្រះវិហារ។ ប្រាសាទ​នេះ​បាន​ចាប់​ផ្ដើម​កសាង​ក្នុង​ រជ្ជកាលព្រះបាទយសោវរ្ម័នទី១ (៨៨៩-៩១០គ.ស) និងបញ្ចប់ក្នុងរជ្ជកាលព្រះបាទសូរ្យវរ្ម័នទី២ (១១១៣-១១៥០គ.ស) ដើម្បីឧទ្ទិសដល់អាទិទេព ព្រះឥសូរក្នុងសាសនាហិណ្ឌូក្នុងទម្រង់ជាទេពភ្នំសិខរេស្វរ និងភដ្រេស្វរ។ ប្រាសាទព្រះវិហារបានបញ្ចូលក្នុងបញ្ជីបេតិកភណ្ឌពិភពលោកនៃអង្គការយូណេស្កូ នៅថ្ងៃទី៧ ខែកក្កដា ឆ្នាំ២០០៨ និងត្រូវបានគ្រប់គ្រងដោយអាជ្ញាធរជាតិព្រះវិហារ។

ប្រាសាទព្រះវិហាររងនូវការឈឺចាប់ និងការបំផ្លិចបំផ្លាញម្ដងហើយម្ដងទៀតពីសំណាក់ភាគីថៃ ចាប់តាំងពីត្រូវបានដាក់បញ្ជូនទៅក្នុងបញ្ជីបេតិកភណ្ឌពិភពលោកនៃអង្គការយូណេស្កូ ពោលគឺរងការបំផ្លិចបំផ្លាញក្នុងសង្គ្រាមដែលថៃវាយប្រហារមកលើកម្ពុជានៅឆ្នាំ២០០៨ដល់ឆ្នាំ២០១១ ក្នុងសង្គ្រាម៥ថ្ងៃនៅចុងខែកក្កដា និងសង្គ្រាម២១ថ្ងៃ ឆ្នាំ២០២៥។

ក្នុងសង្គ្រាមឆ្នាំ២០០៨ ដល់ឆ្នាំ២០១១  ប្រាសាទព្រះវិាហររងគ្រាប់ផ្លោងធំៗពីសំណាក់យោធាសៀមជាង​៥៥០គ្រាប់ និងកាំភ្លើងតូចធំរាប់មុឺនគ្រាប់។ ចេតនាសៀម គឺចង់បំផ្លាញប្រាសាទដ៏ពិសិដ្ឋនេះឱ្យរលាយបាក់បែករាបទៅជាដី។ នេះបើតាមបណ្ឌិត្យសភាចារ្យ រស់ ចន្ត្រាបុត្រ សរសេរនៅក្នុងសៀវភៅ “ប្រាសាទព្រះវិហារ មោទនភាពជាតិខ្មែរ” ចែកចាយដោយអង្គភាពអ្នកនាំពាក្យរាជរដ្ឋាភិបាល។

របាយការណ៍​របស់អាជ្ញាធរជាតិ​ព្រះវិហារគិតត្រឹម ខែតុលា ឆ្នាំ២០២៥ ឱ្យដឹងថា ក្នុងសង្គ្រាមរយៈពេល៥ថ្ងៃ នៅចុងខែកក្កដា ឆ្នាំ២០២៥ កងទ័ព​សៀមបាន​បាញ់​ប្រហារ​លើ​ប្រាសាទ​ព្រះវិហារបណ្ដាលឱ្យមានការខូចខាត ប្រាង្គប្រាសាទព្រះវិហារចំនួន១៤២កន្លែង និងតំបន់ជុំវិញចំនួន៤២កន្លែង រួមបញ្ចូលទាំងវត្តកែវសិក្ខាគិរីស្វារៈ ហេដ្ឋារចនាសម្ព័ន្ធសាធារណៈ និងអគារការិយាល័យអភិរក្សរបស់អាជ្ញាធរជាតិព្រះវិហារ។

 ក្នុងសង្គ្រាមរយៈពេល២១ថ្ងៃ នៅខែធ្នូ ឆ្នាំ២០២៥ ក្រសួងការពារជាតិធ្លាប់បញ្ជាក់ថា យោធាថៃបាន ប្រើយន្តហោះចម្បាំងទម្លាក់គ្រាប់  យន្តហោះគ្មានមនុស្សបើក កាំភ្លើងធំប្រភេទ ១៥៥ម.ម និងកាំជ្រួចហ្វូង DTI-2  និងSR4 , កាំជ្រួចហ្វូង DTI-1G បាញ់ប្រហារលើភូមិសាស្ត្រប្រាសាទព្រះវិហារ។ ការខូចខាតប្រាសាទព្រះវិហារ ពីព្រោះតែសព្វាវុធធុនធ្ងន់នេះ គឺក្រសួងវប្បធម៌កម្ពុជា អះអាងថា ធ្ងន់ធ្ងរលើសពីអ្វីដែលបានកត់ត្រាទុកអំពីការខូចខាតព្រោះសង្គ្រាមនៅក្នុងខែកក្កដា ឆ្នាំ២០២៥។

តាមក្រសួងវប្បធម៌ បើយោងតាមភស្តុតាងរូបថត និងវីដេអូដែលប្រមូលបានដោយអាជ្ញាធរជាតិព្រះវិហារ ក្នុងអំឡុងពេលបេសកកម្មចងក្រងឯកសារនាថ្ងៃទី២៨ ខែធ្នូ ឆ្នាំ២០២៥ សំណង់ ស្ថាបត្យកម្មសំខាន់ៗស្ទើរតែទាំងអស់នៃប្រាសាទ ចាប់ពីគោបុរៈទី១ ដល់គោបុរៈទី៥ រួមទាំងស្ពានហាលតភ្ជាប់ ទាំងអស់ និងជណ្តើរបុរាណខាងជើងបានទទួលរងផលប៉ះពាល់យ៉ាងធ្ងន់ធ្ងរ។  ហេដ្ឋារចនាសម្ព័ន្ធបម្រើឱ្យការងារ អភិរក្ស ជួសជុលក្រោមគម្រោងសហប្រតិបត្តិការអន្តរជាតិ ក៏ត្រូវទទួលរងការខូចខាតទាំងស្រុង។

ព្រះបាទសុរិយាវរ្ម័នទី២ ដែលកសាងប្រាសាព្រះវិហារ បានដាក់បណ្ដាសាថា៖ «បុគ្គលណាដែលបានថែរក្សាទីកន្លែងសក្ការៈបូជានេះ បុគ្គល ទាំងនោះនឹងបានសោយសុខនៅឋានសួគ៌ ចាកផុតពីបាបកម្ម។ ជនណាដែលបំផ្លាញផ្ទាំង សិលាចារឹកនេះ ជននោះនឹងធ្លាក់ទៅក្នុងឋាននរក ៣២ ជាន់ ជាយូរអង្វែងជានិច្ច បើកាលណាព្រះអាទិត្យ និងព្រះច័ន្ទនៅតែរះ»។ នេះបើតាមបណ្ឌិតសភាចារ្យ រស់ ចន្ត្រាបុត្រ ដកស្រង់ចេញពីសិលាចារឹកប្រាសាទព្រះវិហារ K383 រៀបរៀងក្នុងសៀវភៅ «ប្រាសាទព្រះវិហារ មោទនភាពជាតិខ្មែរ»៕

ដោយ៖ ង៉ិល ណារ៉ាត់

The post មេស៊ីម៉ាក់៖ ថៃត្រូវតែទទួលខុសត្រូវ ចំពោះទង្វើដ៏មហាព្រៃផ្សៃបំផ្លិចបំផ្លាញប្រាសាទព្រះវិហារ appeared first on Kampuchea Thmey Daily.

លោក​ ហេង រតនា បាន​សរសេរ​លើ​ហ្វេសបុក​ផេក​របស់​លោក​នៅ​ថ្ងៃទី​១៤ ខែ​ធ្នូ​នេះថា បញ្ហា​ផ្ទុះ​មីន​ដែល​ថៃ​លាបព័ណ៌​កម្ពុជាកន្លង​ទៅ​គ្រាន់​តែ​ជា​យុទ្ធសាស្ត្រ និង​ឧបាយកល​ប្រើកម្លាំង​ធ្វើសង្គ្រាម​ឈ្លាន​ពាន​កម្ពុជា​ និង​សំដែង​ក្លែង​ខ្លួន​ជា​តួអង្គ​ជា​អ្នក​គោរព​ច្បាប់​អន្តរជាតិ​ល្អ​ប៉ុណ្ណោះ។

លោក​បានសរសេរ​ថា៖ «ក្នុងនាមប្រជាពលរដ្ឋខ្មែរមួយរូបខ្ញុំសូមសំដែងនូវអំណរគុណឯ.ឧប្រធានាធិបតីDonald J. Trump ដែលបានខិតខំលះបង់និងជំរុញឱ្យមានការគោរពដល់ស្មារតីសន្តិភាពដែលមានស្រាប់! ជាមួយនេះឯ.ឧ​ប្រធានាធបតី​ ក៏បានបញ្ជាក់កាពិតខ្លីពីបញ្ហាគ្រោះថ្នាក់មីនរបស់ទាហានសៀមនានាកន្លងមកជា”ឧបទ្ទេវហេតុ”​»។

លោក​ថា​ថៃ​ដែល​តែង​តែ​ធ្វើ​ខ្លួនជា​អ្នក​គោរព​ច្បាប់​អន្តរជាតិ​តែ​ បាន​បំពាន​អនុសញ្ញា​ជាច្រើន​ដូច​ជា​ អនុសញ្ញាការហាមឃាត់ប្រេីប្រាស់អាវុធគីមី​ អនុសញ្ញាការហាមឃាត់ប្រេីប្រាស់គ្រាប់បែកចង្កោម​ សន្ធិសញ្ញា/អនុសញ្ញាស្តីពីការកំណត់ព្រំដែនកម្ពុជា-សៀម និងអនុសញ្ញាអន្តរជាតិស្តីពីសិទ្ធិមនុស្ស​ ការការពារជនសុីវិលពេលមានសង្គ្រាមជាដេីម។ ចុងក្រោយនេះ​ មេដឹកនាំគ្មានសភាសៀម​នេះ​ មិនស្តាប់តាមស្មារតីអំពាវនាវឱ្យមានសន្តិភាពរបស់អន្តរជាតិណាឡេីយ។

​លោក​សរសេរ​បន្ថែម​ថា៖ «ហេីយអ្វីដែលពួកចោរឈ្លានពានបែរជាអាចទទួលបាន​ “ចំពោះការសម្លាប់ជនកម្ពុជាមិនរេីសមុខរួមមានទារក​ ក្មេងៗ​ ប្រជាជន​ និងអាចារ្យ​វត្ត​ជាដេីម»។

បើ​ទោះ​បី​ជា​បាន​និយាយ​ទូរស័ព្ទជាមួយ​ប្រធានាធិបតីអាមេរិក​លោក ដូណាល់ ត្រាំ កាលពី​យប់​ថ្ងៃទី​១៣ ខែ​ធ្នូ ដើម្បី​ឱ្យ​មាន​ការ​អនុវត្តន៍​កិច្ច​ព្រមព្រៀងសន្ដិភាព​ជា​ថ្មី​ក្ដី ក៏​ថៃ​នៅ​តែ​បន្ត​បាញ់​ប្រហារ​ ទម្លាក់​គ្រាប់​បែក មក​លើ​ទឹក​ដី​កម្ពុជាដដែលរហូត​ដល់​ថ្ងៃទី​១៤ ខែធ្នូ​នេះ​។ នាយករដ្ឋមន្ត្រី​ចាំ​ផ្ទះ​ថៃ​ អនុទីន បាន​សរសរ​លើ​ហ្វេសបុក​របស់​ខ្លួន​កាលពី​ព្រឹក​ថ្ងៃទី​១៣ ខែ​ធ្នូ​ថា​ ថៃ​នឹងបន្ត​សកម្មភាព​យោធា​លើ​កម្ពុជា​រហូត​ដល់​ពេល​ដែល​មាន​អារម្មណ៍​ថា​គ្មាន​ការគំរាម​កំហែងទឹកដី និង​ប្រជាជន​ថៃ។ បន្ថែម​លើ​នេះ​សារព័ត៌មាន​ថៃ​ក៏បាន​ដក​ស្រង់​សំដី​របស់​នាយករដ្ឋមន្ត្រី​នេះ​មក​ចុះ​ផ្សាយផងដែរ​ថា​ «ពេល​នេះ​ថៃ​មិន​ត្រូវ​ការ​ស្ដាប់​អ្នក​ណា​ទាំង​អស់​ទៀត​ហើយ​»៕

អត្ថបទដោយ ហ៊ុន សិរីវឌ្ឍន៍

The post អគ្គនាយកស៊ីម៉ាក់អរគុណ​លោកប្រធានាធិបតី​ដូណាល់ត្រាំដែលបញ្ជាក់​ពី​ការ​ពិត​លើ​បញ្ហា​សៀម​ជាន់​មីន​កន្លង​ទៅ appeared first on Kampuchea Thmey Daily.